MM Story Teller

Chapter 45

Viewers 3k

Chapters 204

🌱Arc 2 -[ အလယ်ခေတ်တွင် လယ်စိုက်ခြင်း ]

Ch 45

အုတ်ဂျုံများရိတ်သိမ်းချိန် (၂)

စွေ့ချီချောင်းက စစ်သည်များ၏ အခြားတိုင်းပြည်ကို တိုက်ခိုက်ကာ သုံ့ပန်းများ ဖမ်းဆီးမည့် အစီအစဥ်ကို ငြင်းဆန်လိုက်သည်။

ထိုအစားသူက အခြားတိုင်းပြည်များထံမှ သိုးထိန်းခွေးများကိုသာ၀ယ်၍ ထွန်ယက်ရေး အဆင်ပြေစေရန် ဖြေရှင်းပေးလိုက်မည်ပင်။

သူလိုချင်နေသည်က တစ်ခုတည်းပင်။

မြင်းထိန်းကြိုးဖြစ်သည်။

အလယ်ခေတ်တွင် စိုက်ပျိုးရေး လုပ်သားအင်အား မည်သည့်အခါကမှ မလုံလောက်ခဲ့ပဲ လယ်လုပ်သားများမှာ မောပန်းခြင်း ဆာလောင်ငတ်မွတ်ခြင်းတို့ကြောင့် အသက်ဆုံးရှုံးကြသည်များပင် ရှိလေသည်။

စိုက်ပျိုးမြေများစွာရှိသော်လည်း စိုက်ပျိုးနိုင်သူကား များများစားစားမရှိချေ။

တော်၀င်မျိုးနွယ်များအတွက် လယ်လုပ်သားများမှာ

သိုးထိန်းခွေးများလောက်ပင် တန်ဖိုးမရှိချေ။ ထိုလူတို့က သိုးထိန်းခွေးများကို အုတ်ဂျုံများဖြင့် လဲလှယ်၀ယ်ယူကြသည်။ သူတို့က နွားကျောင်းသားများထံမှ သားဖောက်ခံရပြီး မြက်ခင်းစိမ်းကျယ်ကြီးများပေါ်တွင် ကြီးပြင်းလာကြသည်။ သူတို့ကို ပိုင်ရှင်များက အမဲလိုက်ခွေးများအဖြစ် ထိန်းကျောင်းမွေးမြူကြလေသည်။

တောင်ပိုင်းမှခွေးများမှာ အမွှေးတိုတိုနှင့် ကြံ့ခိုင်သောကိုယ်ရှိကြသည်။ စွေ့ချီချောင်းမှတ်မိသည်မှာ ၄င်းတို့က သြစတေးလျ သိုးထိန်းခွေးများနှင့် အနည်းငယ်ဆင်သည်ကိုပင်။ သူတို့၏ အမွှေးများကပို၍ တိုနေရုံသာဖြစ်သည်။ ထိုခွေးများမှာ ဥာဏ်ရည်မြင့်မားလျက် မည်သူက သူတို့၏ ပိုင်ရှင်ဆိုသည်ကို တန်းသိကာ စွေ့ချီချောင်းကို တွေ့သည်နှင့် ခေါင်းငုံ့ကာ သူ့လက်များကို အနံ့ခံခဲ့သည်။

ကြိုးနှင့် ချည်ခံထားရသော ရှောင်ပိုင်မှာ စွေ့ချီချောင်း၏ ခြေထောက်များကို ငုံ့ကြည့်နေခဲ့သည်။ သူ၏ဘ၀တွင် စွေ့ချီချောင်း၏ ပုခုံးပေါ်၌ ထိုင်ခွင့်ကိုပင် မရသေးချေ။ သူက သိုးထိန်းခွေးကြီးကို မနာလိုစွာ ကြည့်လိုက်မိသည်။

အကယ်၍ ဤခေတ်မှလူများက ကြောင်များကို နှိမ့်ချဆက်ဆံခြင်းကြောင့်သာမဟုတ်လျှင် ရှောင်ပိုင်မှာ ဤရူးကြောင်ကြောင်ခွေးများထက်ပင် ပိုအသုံး၀င်ပေလိမ့်မည်။

သူက ထိုခွေးများ၏ လုပ်ဆောင်နိုင်စွမ်းကိုသံသယ၀င်နေမိသည်။

သိုးထိန်းခွေးမှာလည်း ရှောင်ပိုင်အား မကြိုက်လှဘဲ တစ်ဖက်ကြောင်၏ ရန်လိုမှုကို ခံစားမိပုံပင်

သူက စွေ့ချီချောင်း၏ လက်ကိုလျက်လိုက်သည်နှင့် ထိုရန်လိုမှုကပိုပြင်းထန်လာက ချက်ချင်းပင် ထကိုက်ကြတော့သည်။

ရှောင်ပိုင်မှာ လက်သည်းတို့ကို ဆန့်ထုတ်လျက် ကုတ်ထည့်လိုက်ရာ သိုးထိန်းခွေးမှာ နာကျင်စွာအသံပြုလာသည်။

ထိတ်လန့်သွားသော အစေခံမှာ ခွေးက လူများကိုတိုက်ခိုက်မည်ကိုစိုး၍ ကြိုးကို တင်းတင်းဆွဲလိုက်မိလေသည်။

စွေ့ချီချောင်းသည်လည်း အံ့အားသင့်စွာဖြင့် ကြိုးကိုပြန်ဆွဲလိုက်ရသည်။ ကြိုး၏အဆုံးတွင် ရှောင်ပိုင်နှင့်ထိုခွေးမှာ တစ်ဦးကိုတစ်ဦးမာန်ဖီလျက်ပင်။

အစေခံများသည်လည်း အံ့သြသွားခဲ့ရသည်။ သူတို့သိသည်မှာ ထိုသို့သောအခြေအနေက ခွေးနှစ်ကောင် အကြားတွင်သာဖြစ်ပေါ်နိုင်သည်ဟုပင်။

သိုးထိန်းခွေးထွက်သွားသည်နှင့် ရှောင်ပိုင်မှာချက်ချင်းငြိမ်ကျသွားခဲ့သည်။

လက်ရှိတွင် အနားယ၌ မည်သူမျှမရှိတော့သည်ဖြစ်၍

သူကရှောင်ပိုင်၏ အမွှေးထူထူကိုယ်လေးကို ချီမလိုက်လျက် မျက်နှာကို တည့်တည့်ကြည့်ကာဆိုလိုက်သည်။

"မင်းရဲ့သ၀န်တိုတတ်တဲ့ လယ်ဗယ်ကသိပ်မြင့်တာပဲ ဟမ်…"

ရှောင်ပိုင်"..."

ဘာကိုသ၀န်တိုရမှာလဲ… ဘာအတွက်လဲ…

အဲဒီခွေးရဲ့တုံးတုံးအအ ရူးကြောင်ကြောင်မျက်နှာကို အထင်သေးလို့ပါနော်…

စွေ့ချီချောင်းမှာ အစောပိုင်းကဖြစ်ရပ်ကြောင့် စိတ်အခြေအနေ အနည်းငယ်ကောင်းမွန်သွားသည်။

နောက်ဆုံးတော့ ရှောင်ပိုင်က ကြောင်အစစ်တစ်ကောင်မဟုတ်တာတောင် ချစ်စရာကောင်းနေတုန်းပဲ…

သူကကြောင်လေး အနားကိုတိုးကပ်ပြီး နှာခေါင်းလေးကိုတို့ထိလိုက်သည်။

ရှောင်ပိုင် : "..."

.......

အုတ်ဂျုံများ ရင့်မှည့်ရန်ကြာချိန်က တိုတောင်းကာ

၄င်းတို့ကို ၃လအတွင်းရိတ်သိမ်းနိုင်လေသည်။

လယ်လုပ်သားများ လွန်စွာအထင်ကြီးသည့် စွေ့ချီချောင်း၏ ရေမြောင်းစနစ် ပြီးဆုံးသွားသည်နှင့်

အုတ်ဂျုံများမှာ ရိတ်သိမ်းချိန်တန်လေပြီ။

လယ်ထဲတွင် အကြာဆုံးအချိန်ဖြုန်းခဲ့သော လယ်လုပ်သားများအတွက် ကောက်ရိတ်သိမ်းခြင်းဆိုသည်မှာ အရင်းနှီးဆုံးအလုပ်အကိုင်ဖြစ်သည်။

သူတို့က အပင်တစ်ပင် ကြီးထွားချိန်နှင့် ရိတ်သိမ်းချိန်အထိ မည်မျှအချိန်ယူရကြောင်း ကောင်းကောင်းသိလေသည်။

၄င်းကို ဦးစွာရှာတွေ့သည်မှာ စံအိမ်ထဲမှ အစေခံများဖြစ်လေသည်။

ထိုအစေခံများမှာ နယ်စား၏ ပိုင်ဆိုင်မှုထဲတွင်ပါ၀င်ပြီး နယ်စား ကျွဲနွားများနှင့်သိုးများကို ထိန်းသိမ်းစောင့်ရှောက်ရသည်။ ယခုနှစ်တွင်နယ်စားမှာ အုတ်ဂျုံများကိုအကြိုရိတ်သိမ်း၍ ကျွဲနွားများနှင့် သိုးများကိုကျွေးရန်ပြောခဲ့သည်။

ဤအချိန်အတွင်း၌ အုတ်ဂျုံပင်များတွင် ပါ၀င်သော ပရိုတိန်းဓါတ်ကအမြင့်ဆုံးဖြစ်ကာ ရိတ်သိမ်းနှုန်းလည်းကောင်းမွန်လေသည်။

ထို့အပြင် ရိတ်သိမ်းချိန်ရောက်သည်နှင့် နယ်စား၏ ကိုယ်ပိုင်စိုက်ခင်းထဲမှ အုတ်ဂျုံပင်များမှာ အခြားအခင်းရှိ အုတ်ပင်များထက် ပိုစိမ်းလန်းကာ လှပနေသည်ကို စံအိမ်ထဲမှ လူတိုင်းမျက်မြင်တွေ့လိုက်ရသည်။ အုတ်ဂျုံပင်များက ပိုမြင့်ကာ ပို၍လည်းရိတ်သိမ်းရသည်။

သို့သော် ၄င်းတို့က သူတို့အတွက် အရေးမပါချေ။ မြက်အနည်းငယ် ပိုရိတ်ရသည်သာရှိသည်။ သူတို့နားမလည်သည်က အသီးမည်မျှများများ ရိတ်သိမ်းရမည်ကိုပင်။

ယခုတွင် အုတ်ဂျုံများရင့်မှည့်ချိန်ကို ရောက်လာပြီဖြစ်၍ လယ်လုပ်သားအကုန်လုံးက မျက်စိဖွင့်နားစွင့်လျက် နယ်စားက ထိုအုတ်ဂျုံပင်များအား အသေးစိတ် လေ့လာနေသည်ကို စောင့်ကြည့်နေခဲ့ကြသည်။

ထိုအုတ်ဂျုံများက သူတို့ယခင် ရိတ်သိမ်းဖူးသည်တို့နှင့်ကွဲပြားသည်ကို ၀န်ခံရပေမည်။

အုတ်ဂျုံပင်၏ ပင်စည်က လေးလံကာ အကိုင်းတစ်ခုချင်းစီက လေးလံနေပြီး အဖျားကလည်း ညွတ်ကျနေခဲ့သည်။ ပိုအရေးကြီးသည်က ထိုအုတ်ဂျုံပင်တွင် ရွက်ဆစ်ခုနှစ်ခုရှိနေသည်ပင်။ ထို့အပြင် အဆစ်တစ်ခုစီတွင် အုတ်စေ့များစွာ ရှိနေခြင်းဖြစ်သည်။

လယ်လုပ်သားများ ပါးစပ်အဟောင်းသားပွင့်လျက်ဖြစ်သွားသည်။

နယ်စားအရှင်က အထွက်နှုန်းကို တိုးအောင်လုပ်လိုက်တာလား…

သူ၏တွက်ချက်နိုင်စွမ်းမှာ မကောင်းလှသလို လယ်ဧကမည်မျှတွင် အထွက်နှုန်းမည်မျှ တိုးမည်ကို ၁၀၀ရာခိုင်နှုန်းအထိ မခန့်မှန်းနိုင်သော်လည်း ဤသည်မှာ နည်းနည်းနောနော ပမာဏ မဟုတ်မှန်းမြင်နိုင်လေသည်။

သူက မြက်ပင်များဖြတ်ရန်ပင် စိတ်မပါတော့ချေ။ သို့နှင့်သူက လယ်လုပ်သားများ၏ မြေဧကထံအသော့ ပြေးတော့သည်။

သို့သော် ထိုအုတ်ဂျုံပင်များတွင်မူ အထွက်နှုန်းတိုးနေခြင်းမရှိပဲ ယခင်ပမာဏ အတိုင်းသာဖြစ်သည်။ နှစ်ခုကို ယှဥ်ကြည့်ပြီးနောက် လယ်လုပ်သားများ၏ အုတ်ဂျုံပင်များက ပိုတိုပြီး တစ်ပင်စီတွင် ရွက်ဆစ်လေးငါးခုခန့်သာရှိကာ တစ်ခုစီတွင်လည်း ဆယ်စေ့ထက်ပိုမပါရှိသည်ကို သိလိုက်ရသည်။

နယ်စားအရှင်၏ စိုက်ပျိုးရေးနည်းလမ်း ရလဒ်မှာ သိသာလွန်းလှသည်။

အစေခံမှာ ထိုင်လျက်ကျသွားမိသည်။

ကောင်းကင်ဘုံရေ...

သူနေ့တိုင်းစိုက်ခင်းများကို စောင့်ကြည့်ခဲ့ရသည်။

ထို့ကြောင့် ထိုစိုက်ခင်းနှစ်ခု၏ မတူညီသည့်တစ်ခုတည်းသော အချက်မှာ နယ်စားအရှင်ကသူ၏ စိုက်ခင်းတွင် မြက်များစိုက်ရန် ပြောခဲ့ခြင်းပင်။ ၄င်းအပြင် နယ်စားမှာ သူ၏လယ်ဧကများကို ရေပိုလောင်းရန်ပင်မပြောခဲ့ချေ။

နယ်စားက ထိုအပင်များမှာ ကျွဲနွားများနှင့် သိုးများကိုကျွေးရန်လည်း သုံးနိုင်သည်ဟုဆိုခဲ့သည်။ ထို့ကြောင့်ပင် သူတို့ကမြက်ပင်များ စိုက်ပျိုးခြင်းမှာ အရေးမပါလှဟု ထင်ခဲ့ခြင်းပင်။

ယခုတွင်မူ သူ့အတွက် အရာအားလုံးကို နားလည်ရန် လွယ်ကူသွားချေပြီ။ ကောက်ပင်များကြား မြက်ပင်များစိုက်ပျိုးခြင်းက အထွက်နှုန်းကို တိုးစေသည်။

၄င်းမှာ သိသာလွန်းလှသည်။ ကိုက်လန်များကိုပင် ယခင်နှစ်များကထက် ပို၍ရိတ်သိမ်းခဲ့ရသည်။ သို့တိုင်အောင် ၄င်းတို့ကို ကောက်ရိတ်သိမ်းချိန် မတိုင်ခင်အထိ နားမလည်နိုင်ခဲ့ချေ။

"ထိုင်ပြီးဘာလုပ်နေတာလဲ ၀က်ပျင်းကောင်…"

လှည့်လည်ကြည့်ရှူနေသော ရွာအကြီးအကဲမှာ

မြေပြင်ပေါ်တွင်ထိုင်နေသည့် အစေခံကိုမြင်လျှင်သူ၏လက်ထဲမှ ကြိမ်တုတ်ကို ဆွဲထုတ်လိုက်သည်။

အစေခံမှာ ကပျာကယာထလာပြီးပြောသည်။

"ကျွန်တော် နယ်စားအရှင်ရဲ့ အုတ်ဂျုံပင်တွေကို ကြည့်နေတာပါ… ကြည့်ရတာသူတို့က အတော်အထွက်နှုန်းတိုးလာတာပဲ…"

ရွာအကြီးအကဲမှာ သံသယဖြင့် မျက်မှောင်ကျုံ့လျက်ကြည့်နေရာမှ အစေခံဆိုလိုသည်ကို နားလည်သွားခဲ့သည်။

၄င်းမှာ အလွန့်အလွန် များပြားသော အုတ်ဂျုံများပင်ဖြစ်သည်။ လွန်ခဲ့သောရက်အနည်းငယ်ကအထိ မသိသာသေးသော်လည်း ယခုမူမျက်၀ါးထင်ထင် မြင်နေရချေပြီ။ ၄င်းမှာ ရွက်ဆစ်များပိုများကာ တစ်ခုချင်းစီတွင်လည်း အုတ်ဂျုံစေ့များ ပြွတ်ခဲလျက်ရှိလေသည်။

နယ်စား၏ ကိုယ်ပိုင်လယ်များတွင် အုတ်ဂျုံအထွက်နှုန်းတိုးသည့် သတင်းက လယ်လုပ်သားများထံ အလျင်အမြန် ပျံ့နှံ့သွားခဲ့သည်။

လူတိုင်းက နယ်စား၏ လယ်ဧကထံကိုပြေးလျက် သူတို့၏ မျက်စိဖြင့်တပ်အပ်ကြည့်ရှုကြပြီးလျှင် မယုံနိုင်မှုကြောင့် မျက်၀န်းထောင့်များပင်ရဲလာခဲ့သည်။

"တွေ့လား…"

"ဒါပေါ့ဟ ငါတစေ့ချင်းစီတောင်ရေလိုက်ပါတယ်… ရွက်ဆစ်တွေက ၇ခုတောင် ပြီးတော့ အဖူးတွေ ဆယ်ခုလောက်ရှိတယ်…"

"ကျွတ် ကျွတ် အုတ်ဂျုံတွေဘယ်လောက်တောင်ရလိုက်မလဲ…"

"ဘုရားရေ ငါ့မိသားစုလယ်ထဲမှာလည်း ဒီလောက်ထိ အထွက်နှုန်းတိုးလို့ကတော့ကွာ…"

"ပြောရမယ်ဆိုရင် နယ်စားအရှင်စိုက်ထားတဲ့မြက်တွေက နဂိုက ငါ့အိမ်နားမှာ ပေါက်နေတာ၊ အခုတော့ သိုးတွေစားသွားပြီ…"

"သူတို့ကဒီလိုမျိုးလည်း အသုံး၀င်လိမ့်မယ်လို့ ဘယ်သူသိမှာလဲ…"

"တွေးကြည့်စမ်းပါ နယ်စားက နှံစားပိုးတွေကို ဘယ်လိုသတ်ရမလဲဆိုတာလည်းသိတယ်… အပင်တွေ အထွက်နှုန်းတိုးအောင် ဘယ်လိုလုပ်ရမလဲဆိုတာလည်း သေချာပေါက် သိလောက်တာပေါ့…"

ဘယ်လို မှော်ဆန်တဲ့ ဖြေရှင်းနည်းမျိုးပါလိမ့်… နယ်စားက ဒီမြက်တွေကို သူ့လယ်ထဲမှာပဲစိုက်ခိုင်းတာမ ထူးဆန်းတော့ပါဘူး…

ဤမြက်များမှာ နဂိုက နေရာအစုံတွင် အလေ့ကျပေါက်နေခဲ့ခြင်းဖြစ်သည်။ လူတိုင်း ၄င်းတို့ကိုဆွဲနှုတ်နိုင်ကာ မည်သူကမှလည်း ဂရုမစိုက်ခဲ့ချေ။

အုတ်ဂျုံ၏အထွက်နှုန်းသာမက ကိုက်လန်၏ အထွက်နှုန်းပါတိုးလာလျှင် ဂျုံရိတ်သိမ်းချိန်ကျလျှင် ဂျုံများပါ အထွက်တိုးလိမ့်မည်လား မသိနိုင်ပေ။

အဆုံးတွင် ဂျုံများက အုတ်ဂျုံများထက်ပိုအဖိုးတန်လေသည်။

လယ်လုပ်သားများမှာ ခေါင်းချင်းဆိုင်လျက် ထိုအကြောင်းအရာကို ဆွေးနွေးနေကြပြီး သူတို့၏အမူအယာများမှာ မနာလိုမှုကြောင့် တွန့်လိမ်နေခဲ့သည်။

နယ်စားအရှင်က သူတို့၏လယ်ထဲတွင်ရော မြက်ပင်များ စိုက်ရန်ခွင့်ပြုပေးလိမ့်မည်လော မတွေးပဲ မနေနိုင်ကြချေ။

အဖြေမှာ ခွင့်ပြုပေးသည်ဟုပင်။

လယ်ငှားခလည်း ပေးရသလို မြက်စေ့တွေကလည်း ပိုနေတာ နယ်စားက ခွင့်မပြုဘဲနေမယ်တဲ့လား…

ယခင်က နယ်စားက အားလုံးကို အုတ်ဂျုံပဲအနှစ်ယာဂုတစ်ခွက်စီ တိုက်ကျွေးခဲ့သည်ကိုတွေးမိလျှင် သူက ရက်ရောသောလူပင်ဖြစ်ကာ အဆုံးတွင် သူတို့ငှားထားသောလယ်များသည်လည်း နယ်စား၏ ကိုယ်ပိုင်လယ်များပင် ဖြစ်သည်။

ထိုသို့တွေးပြီးနောက် သူတို့က အုတ်ဂျုံပင်များကို ကြည့်ရာတွင် ပို၍ မျက်စိပသာဒ ရှိလာတော့သည်။ သူတို့မှာ မနာလိုလည်း မဖြစ်နိုင်ကြတော့ဘဲ အကယ်၍ သူတို့၏ လယ်များတွင်လည်း မြက်ပင်များ စိုက်ပျိုးခွင့်ရပါက ရလဒ်များကို ကြိုတွေးကာ စိတ်ကူးယဥ်နေကြတော့သည်။ သို့သော်် ထိုမြက်စေ့များကိုအလကားရမည် မဟုတ်ချေ။ အဆုံးတွင်မူ အထွက်နှုန်းနှင့် ၀င်ငွေပိုတိုးလာမည်ဖြစ်၍ ထိုသို့ဆိုလျှင် ၄င်းမှာကောင်းချီးတစ်ခုပင် ဖြစ်လာလိမ့်မည်။

အစေခံများမှာမူ လယ်လုပ်သားများနည်းတူ အထွက်နှုန်းမတိုး၍ စိတ်ပျက်လက်ပျက်ခြေဆောင့်နေကြရသည်။ အစေခံအချို့ကသာ ရယ်မောလျက် နိုးထလာနိုင်သည်။

အကြောင်းမှာ မူလက သူတို့သည်သာ အိမ်တော်ထိန်းနှင့် အခွန်ဦးစီးကို မြှောက်ပင့်ရဲသူများဖြစ်ခဲ့၍ပင်။ သူတို့က နယ်စားအရှင်နည်းတူ သူတို့၏ကိုယ်ပိုင်လယ်များတွင် မြက်ပင်များ စိုက်ပျိုးခွင့်ရရန် ကြိုးစားခဲ့သည်။ ယခုတော့ အထွက်နှုန်းတိုးနေချေပြီ။

သူတို့မှာ ထွေထွေထူးထူး ဆုံးရှုံးသွားခြင်းမရှိပါသော်လည်း သူတို့၏အဖော်အပေါင်းများက အကျိုးအမြတ်များ ရိတ်သိမ်းနေသည်ကို မြင်ရသည်က စိုက်ခင်းပျက်စီးသွားသည်ထက်ပင် ပိုနာကျင်ရသေးသည်။

သို့သော် ယခုမှ နောင်တရနေရန် အချိန်မရှိချေ။ လက်ရှိတွင် သူတို့လုပ်နိုင်သည့် တစ်ခုတည်းသောအရာမှာ နယ်စားအရှင်အား မြက်ပင်များကိုသူတို့လယ်ထဲတွင် အခုစိုက်လျှင်ရော အကျိုးသက်ရောက်မှုရှိသေးသည်လား မေးရန်ပင်။

နယ်စားအရှင်စွေ့ချီချောင်းကမူ ဤရလဒ်ကို မကျေနပ်လှချေ။ အလယ်ခေတ်မှလူများမှာ လယ်အထွက်နှုန်းတွက်ရာတွင် မတော်လှချေ။ သို့သော် သူကတော့တွက်နိုင်သည်။ အထွက်နှုန်းမှာ ၁၀ရာခိုင်နှုန်းခန့်သာ တိုးလာလေသည်။

အဓိက အကြောင်းပြချက်မှာ သူရောက်လာသည်ကအတော်လေး နောက်ကျနေခဲ့သည့်အပြင် မြေသြဇာလိုအပ်မှုလည်း ရှိသေး၍ဖြစ်သည်။

သူက အခြားအပင်များနှင့် အရွက်များကိုသာ မြေသြဇာအဖြစ် အသုံးပြုခဲ့ရသည်။ သို့မဟုတ်ပါက အထွက်နှုန်းကို ၃၀ရာခိုင်နှုန်းအထိ တိုးနိုင်သည်ပင်။

မြေသြဇာများကို တွင်တွင်ကျယ်ကျယ်သုံးသော ၂၁ရာစုတွင်မူ တစ်နှစ်တွင် အုတ်ရိတ်သိမ်းနိုင်မှု တန်ချိန်မှာ ၂၀၀ကီလိုဂရမ်အထိ ရှိပြီး အုတ်မြက်များကမူ ၃၀၀၀မှ ၄၀၀၀ကီလိုအထိ ရိတ်သိမ်းနိုင်သည်။ အနာဂတ်မှ အထွက်နှုန်းကို ပြောနေစရာပင်မလိုပေ။

အဆစ်တစ်ခုချင်းစီတွင် အစေ့၂၀ခန့် အထိရှိလိမ့်မည်ဖြစ်ကာ ကောင်းကောင်းလေး ဂရုစိုက်ပေးလိုက်ရုံနှင့် တစ်ပင်တွင်၉ဆစ်ခန့် ရှိလိမ့်မည်။

အုတ်ဂျုံ၏ရိတ်သိမ်းမှုက ဂျုံ၏ ရိတ်သိမ်းရမှုထက် အမြဲပိုနည်းလေ့ရှိသည်။ ဤအလယ်ခေတ်တွင် လယ်တစ်ဧကအတွက် အုတ်ဂျုံ၏အထွက်နှုန်းမှာ ၃၀ကီလိုခန့်သာရှိလေသည်။

စွေ့ချီချောင်း မကျေမနပ်ဖြစ်နေစဥ်တွင် လယ်လုပ်သားများမှာတော့ အလွန်ပျော်ရွှင်နေကြသည်။

အဘယ်ကြောင့်မူ နယ်စားအရှင်က သူတို့အား မြက်စေ့များလည်း ထောက်ပံ့ပေးမည်ဖြစ်ကာ သူ့ပိုင်နက်တွင်းရှိ လယ်သမားများအားလုံးကိုလည်း သူ၏ စိုက်ပျိုးရေးနည်းစနစ်များကို သင်ကြားပေးမည်ဟုဆို၍ပင်။ ထို့အပြင်သူက ရိတ်သိမ်းပြီးသော အချို့ကိုသာလျှင် အခွန်အဖြစ်ကောက်ယူမည်ဖြစ်သည်။

အားလုံး တွေးထင်ထားသည့် ရိတ်သိမ်းရမည့် ပမာဏထက်စာလျှင် ဤသည်မှာ ဘာမှမဟုတ်သေးချေ။ သူတို့အတွက် နယ်စားမှာ ကောင်းကင်ဘုံမှ သူတို့အားကယ်တင်ရန် လွှတ်လိုက်သော နတ်သားတစ်ပါးနှယ်ပင်။

ရိတ်သိမ်းချိန် အရောက်တွင် မျှော်လင့်ထားသည့်အတိုင်းပင် နယ်စား၏ လယ်မှရိတ်သိမ်းရရှိသည့် အုတ်ဂျုံပမာဏမှာ လယ်လုပ်သားများနှင့် လယ်ရှင်တချို့၏ လယ်များထက်ပိုများလေသည်။ သူတို့မှာ ၃၀ကီလိုခန့်ကို သာရိတ်သိမ်းရသော်လည်း နယ်စားကမူ ၄၀ကီလိုကိုပင် ရိတ်သိမ်းနိုင်ခဲ့လေသည်။

သဲတစ်ပွင့်မှ အုတ်တစ်ချက်ဖြစ်လာသည် ဆိုသလို နယ်စားထံမှ မြက်ပင်များ စိုက်ပျိုးခွင့်ရရန် ခွင့်တောင်းခဲ့သူများက မတောင်းခဲ့သူများထက် ပိုရိတ်သိမ်းရလေသည်။

ထို့အပြင် အုတ်မြက်များလည်း များစွာရိတ်သိမ်းရသေးသည်။ ကျွဲနွားနှင့် သိုးများမှာ အစားကြီးလှသည်။ သူတို့က ဤလတ်လတ်ဆတ်ဆတ်မြက်များကိုလည်း အလွန်ကြိုက်ကြလေသည်။

လယ်လုပ်သားများမှာ မိမိတို့၏လယ်ကို အထွက်တိုးစေရေးအတွက် တက်ကြွနေကြသည်ဖြစ်၍ နယ်စားအရှင်ညွှန်ကြားသမျှကို တသွေမတိမ်း လိုက်နာကြလေသည်။ ၄င်းမှာသူတို့အတွက်လည်း အကျိုးရှိသည်မဟုတ်ပါလား။

နယ်စား၏ လယ်များပေါ်မှ မြက်များမှာ အစိမ်းရောင်ခြုံစောင်ကြီးသဖွယ် ဖုံးအုပ်နေသည်ဖြစ်၍ သူတို့အား ၄င်းတို့ကို ဖြတ်စေကာ သူတို့၏ အုတ်များမရင့်မှည့်သေးသည့် ကိုယ်ပိုင်လယ်များ အဟာရအတွက် စိုက်ပျိုးရန် စေခိုင်းလိုက်ခြင်းဖြစ်သည်။

အုတ်ဂျုံပင်များ အခွံချွတ်စရာမလိုသော ကြီးထွားဆဲအချိန်နှင့် ယှဥ်လျှင် ဂျုံများအတွက်မူ အစေ့အညှောင့် ပေါက်စဥ်ကစ၍ပင် အစေ့မအောင်ခြင်းမဖြစ်ရစေရန် ဂရုတစိုက် အခွံခွာပေးရသည်။ ရိတ်သိမ်းချိန်နီးကပ်လာလျှင်ပင် လ်ိုအပ်ပါက နိုက်ထရိုဂျင်၊ မော့စဖော့ရပ်၊ ပိုတက်ဆီယမ် ဓါတ်မြေသြဇာများကို ဆက်တိုက်သုံးပေးနေရသည်။

မြေသြဇာကို စနစ်တကျထည့်သွင်း အသုံးပြုပါက အထွက်နှုန်း တိုးလာလိမ့်မည်။ လယ်လုပ်သားများမှာ အခြေခံအကျဆုံး မြေသြဇာကိုပင် မထည့်ခဲ့ချေ။ အာဟာရဓါတ်ကို လိုအပ်သော ဂျုံပင်များကိုမူ ပြောနေစရာပင်မလိုချေ။ သို့သော် အပင်မြေသြဇာများကမူ အကြိမ်ရေအတော်များများ ဖြတ်တောက်အသုံးပြုနိုင်သည်။ ၃လအတွင်း၌ ၄င်းတို့က ၁၀စင်တီမီတာအထိ ရှည်လာနိုင်၍ပင်။ ၄င်းတို့ကို ဖြတ်၍ မြေသြဇာအဖြစ် စိုက်ခင်းထဲတွင် မြှုပ်နှံနိုင်သည်။

တစ်လမျှ ကြာပြီးနောက်တွင် စိုက်ပျိုးနိုင်သော မြေများလည်း ချဲ့ထွင်ပြီးဖြစ်ကာ အခြားမျိုးစေ့များကိုလည်း စိုက်ပျိုးနိုင်လိမ့်မည်။ လက်ရှိတွင် တောပဲရိုင်းများကို စိုက်ပျိုးထားလျက် အနာဂတ်အတွက် စိုက်ပျိုးရာတွင် အာဟာရအဖြစ် အသုံး၀င်လာနိုင်သည်။ မည်ကဲ့သို့ မြေဆီလွှာမျိုးက ဆောင်းရာသီ ကောက်နှံပင်များအတွက် သင့်တော်ကြောင်းပင် ကြိုတင်စဥ်းစားပြီး ဖြစ်သည်။

ယခုတွင်မူ စွေ့ချီချောင်းက နောင်နှစ်နွေဦးတွင် ရိတ်သိမ်းနိုင်မည့်ပမာဏက ယခုနှစ်ထက် သာလိမ့်မည်ဟု အာမခံနိုင်လေပြီဖြစ်သည်။

🌾🌾🌾

Prev Next