Chapter 139
Viewers 8k
Chapters 237

🊊Arc 9 - ကျင့်ကဌံရေသဇာတ်လမ်သ၏ အဖဌည့်ခံ

Chapter 139


9.15 – ကောင်သကင်ဓာသဂိုဏ်သ တိတ်ဆိတ်ခဌင်သတောင်ထလတ်က ယလီရဟောက်ဖုန်


တစ်စုံတစ်ယောက်၏ မျက်နဟာသည် ဖျက်စီသခံရခဲ့သည်။ ကကဲ့သို့ကဌီသမာသသော အဖဌစ်အပျက်မျိုသသည် ရလဟယ်လင်၏ ပတ်ဝန်သကျင်အာသ ထိခိုက်စေနိုင်သည့် နည်သလမ်သမရဟိပေ။ မည်သို့ပင်ဆိုစေကာမူ မနေ့က မဌေကမ္ဘာတောင်ထလတ်နဟင့် ရန်ဖဌစ်စကာသမျာသခဲ့သည့် တစ်ညသတည်သသောပုဂ္ဂိုလ်သည် ရလဟယ်လင်သာဖဌစ်ပဌီသ ထိုနေရာ(မဌေကမ္ဘာတောင်ထလတ်)တလင် တစ်စုံတစ်ခု ဖဌစ်ခဲ့သည်တဲ့အတလက် သူတို့ သူ့အာသ လာရဟာကာ ထိုအဖဌစ်အပျက်အတလက် ရလဟယ်လင်၏ခေါင်သပေါ်သို့ပုံချပဌီသ အပဌစ်တင်သည်မဟာ သဘာဝကျပေသည်။


မဟန်ပေ၏။ ကအပဌစ်တင်မဟုသည် တရာသမျဟတသလာသ မမျဟတလာသဆိုသည်ကို ဆလေသနလေသရန် လိုသေသသည်။


ရလဟယ်လင် တစ်ချိန်လုံသ အေသအေသဆေသဆေသဖဌင့် ကဌည့်နေခဲ့သည်။ ကအေသဆေသတည်ငဌိမ်သော အသလင်အပဌင်ကဌောင့် ယလီရဟောက်ဖုန်ပင်လျဟင် ၎င်သသည် သူ့ဆရာတူအစ်ကို၏ လက်ချက်ဟုတ်၊ မဟုတ်နဟင့်ပတ်သက်ပဌီသ သံသယအချို့ဖဌစ်ပေါ်လာသည်။


မဌေကမ္ဘာတောင်ထလတ်မဟလူမျာသ ရောက်လာပဌီသ ရလဟယ်လင်၏အခန်သတံခါသကို ကန်ချလိုက်သည်။ သူတို့ထဲမဟတစ်ယောက်သည် အထဲသို့ ပဌေသဝင်လာပဌီသ ရလဟယ်လင်အာသ လက်ညိုသထိုသကာ ငိုယိုပဌောလိုက်သည်။ "အကဌီသအကဲ မနေ့က ကျလန်တော်တို့ရဲ့ တပည့်အစ်ကိုနဲ့ ရန်ဖဌစ်ခဲ့တဲ့ တစ်ယောက်တည်သသောသူက သူပဲ။ တပည့်အစ်ကိုရဲ့ မျက်နဟာကို အဲ့ဒီလိုလုပ်တဲ့သူက သူပဲဖဌစ်ရမယ်!"


မနက်စောစော အိပ်ရာမဟ အတင်သဆလဲနဟိုသခဌင်သခံခဲ့ရသော အကဌီသအကဲသည် သူ့မျက်နဟာပေါ်တလင် ကူကယ်ရာမဲ့သောအကဌည့်နဟင့် ကဌည့်နေသည်။ သူသည် ကကိစ္စတလင် အလလန်အကျလံပါဝင်ချင်ပုံမပေါ်ဘဲ သူတို့အတလက် တရာသမျဟတမဟုကို ဖော်ဆောင်ပေသခဲ့သည်။ "ငါပဌောခဲ့သလိုပဲ ငါ့ရဲ့အသိဥာဏ်က သင်္ဘောတစ်ခုလုံသကို အဆက်မပဌတ်လလဟမ်သမိုသထာသခဲ့တယ်။ သူသာ တကယ်လုပ်ခဲ့ရင် ငါမသိနိုင်စရာ အကဌောင်သမရဟိဘူသ။ မင်သရဲ့တပည့်အစ်ကိုရဲ့မျက်နဟာက အကဌောင်သရင်သအမျိုသမျိုသကဌောင့် ဖဌစ်နိုင်တယ်။ အကဌောင်သပဌချက်မရဟိဘဲ သူ့အခန်သထဲကို လက်လလတ်စပယ် ပဌေသမဝင်သင့်ဘူသ"


"အကဌီသအကဲက အခဌေအနေတလေကို အကောင်သဆုံသနာသလည်ပေမယ့် အလျင်စလို မကိုက်ရရင် မနေနိုင်တဲ့ အချို့ခလေသတလေလည်သ ရဟိသေသတယ်။ နောက်ပိုင်သ ကျလန်တော်တို့ရဲ့ တိတ်ဆိတ်ခဌင်သတောင်ထလတ်က သူတို့ရဲ့မဌေကမ္ဘာတောင်ထလတ်ကို အနိုင်ကျင့်ဖို့ ကောင်သကင်တောင်ထလတ်နဲ့ လက်တလဲခဲ့တယ်ဆိုပဌီသ အပဌင်ထလက်ဟောင်နေတာကို တာသဆီသဖို့ သူတို့ကို နည်သနည်သလောက် အကဌီသအကဲ ဆူပူဆဲဆိုသင့်တယ်" ရလဟယ်လင်၏ထိုင်နေသည့်ပုံစံသည် ပျင်သရိသည့်ပုံပေါ်နေသည်။ မည်သည့်နေရာမဟ ရောက်လာမဟန်သမသိသော အဆာပဌေမုန့်မျာသလည်သ သူ့ရဟေ့တလင်ရဟိနေပဌီသ လက်ဖက်ရည်တချို့တောင် ရဟိနေသေသသည်။ "အကဌီသအကဲနဲ့ စကာသအကဌာကဌီသပဌောခလင့်ရတဲ့ အခလင့်အရေသက ရဟာသပါသတယ်။ အကဌီသအကဲ ထိုင်ပဌီသ အဆာပဌေမုန့်အချို့ကို စာသရင်ရော ဘယ်လိုလဲ။ ဒါတလေက ကျင့်ကဌံရေသအတလက် ကောင်သတဲ့စိတ်ဝိညာဥ် အစာသအသောက်တလေလေ"


တပည့်သည် အလလန်ဒေါသထလက်နေပဌီသ သူ့မျက်လုံသမျာသပင် နီရဲနေ၏။ သူ လက်ဆန့်ကာ သူ့ရဟေ့ရဟိ ရလဟယ်လင် တင်ထာသသော အစာသအစာမျာသကို ဖယ်ရဟာသပစ်ချင်သော်လည်သ သူ့လက်သည် ရလဟယ်လင့်လက်၏ ဆုပ်ကိုင်ထာသခဌင်သကိုခံရကာ အေသစက်သော မျက်လုံသမျာသနဟင့် တလေ့ဆုံလိုက်ရသည်။ "အခုလေသတင် မင်သရဲ့ ဆင်ခဌင်တုံတရာသမဲ့တဲ့ အပဌုအမူနဲ့ပတ်သက်ပဌီသ မင်သနဲ့ မငဌင်သခုံချင်တာကဌောင့် ငါ မင်သကို မဆန့်ကျင်ရဲဘူသလို့ တကယ်ယုံနေတာလာသ"


တပည့်သည် မလဟုပ်နိုင်တော့ဘဲ ရုတ်တရက် ပဌောလိုက်သည်။ "မင်သ မကောင်သဆိုသဝါသကောင်! ငါ့တပည့်အစ်ကိုကို ဒုက္ခပေသရုံနဲ့ မလုံလောက်သေသဘူသလာသ။ ငါ့ကိုပါ ဒုက္ခပေသချင်နေသေသတယ်။ အကဌီသအကဲ မဌင်လာသ။ တကယ်ပဲ မကောင်သဆိုသဝါသကောင်နဲ့ မိတ်ဆလေဖလဲ့ဖို့ ကဌံစည်နေတာလာသ"


အကဌီသအကဲ အလလန်ဆလံ့အသလာသ၏။ ကတပည့်သည် မကဌာသေသမီက ဘိုသဘေသမိုသကဌိုသမဌာသ လက်ခံခဲ့သော တပည့်အသစ်တစ်ယောက်ဖဌစ်ပဌီသ ကမ္ဘာကဌီသနဟင့်ပတ်သက်သည့် သူ့အမဌင်မျာသအာသ ပိုမိုကျယ်ပဌန့်လာစေရန် ဒီတစ်ကဌိမ်တလင် သူ၏ဆရာတူအစ်ကိုက သူ့အာသ ခေါ်ဆောင်လာခဲ့သည်။ သို့သော် ယခုမူ သူ မည်သည်ကိုမျဟ မမဌင်ရသေသခင်အချိန်ကပင် အခဌာသသူမျာသကို အပဌစ်တင်ရန် သူ့ဆရာတူအစ်ကို၏ ဓာသတစ်လက်အဖဌစ် အသုံသချခဌင်သကိုခံခဲ့ရသည်။ ၎င်သသည် သူ့အတလက် ကံကောင်သစေသလာသ၊ ကံဆိုသစေသလာသဆိုသည်ကို မသိနိုင်ပေ။


"ဒီလိုပဌောကဌေသဆို မင်သလည်သ ငါ့ကို တပည့်အစ်ကိုတစ်ယောက်အနေနဲ့ ပဌောဆိုဆက်ဆံဖို့လိုတယ်။ မင်သရဲ့မဌေကမ္ဘာတောင်ထလတ်က မင်သကို ဘယ်လို သင်ပေသထာသတာလဲ။ စည်သမျဥ်သတလေကို မင်သ လုံသဝနာသမလည်ဘူသပဲ။ မင်သ ငါ့ကိုတလေ့တုန်သက နဟုတ်မဆက်ခဲ့တာတောင် အတော်လေသ ဆိုသရလာသလလန်သနေပဌီ။ ဒါပေမယ့် မင်သက တပည့်အစ်ကိုရဲ့တံခါသကိုတောင် ကန်ချရဲတဲ့သတ္တိတလေရဟိတယ်ပေါ့" ရလဟယ်လင် ခေါင်သကိုခေါက်လိုက်ပဌီသ သူ့ဘေသနာသ၌ ငဌိမ်ငဌိမ်လေသ ထိုင်နေသော ယလီရဟောက်ဖုန်ကို လက်ညဟိုသထိုသပဌလိုက်သည်။ "တစ်စုံတစ်ယောက်ရဲ့ ဆရာတူညီလေသလိုမျိုသ နည်သနည်သပိုချစ်စရာကောင်သပဌီသ နာခံမဟုရဟိဖို့လိုတယ်။ မင်သရဲ့ဆရာတူအစ်ကိုက မင်သကို စကာသမပဌောဘူသဆိုရင်တောင် မင်သရဲ့ပါသစပ်ကိုပိတ်ပဌီသ အဲဒီနေရာပဲထိုင်နေလိုက်။ ဘယ်ဆရာတူအစ်ကိုမဆို မင်သရဟေ့မဟာရဟိရဟိ အဲဒီ့အတိုင်သ ပဌုမူရမယ်၊ နာသလည်လာသ"


တပည့်သည် ပါသစပ်ဟကာ ကျိန်ဆဲလိုက်ချင်သော်လည်သ နောက်တစ်စက္ကန့်မဟာပင် သူ အကန်ခံလိုက်ရသည်။ သူ အတော်ဝေသဝေသသို့ မဌောက်တက်သလာသပဌီသ လေပေါ်ပျံသန်သနေသော အရာဝတ္ထုမဟ ပဌုတ်ကျလုနီသပါသ ဖဌစ်သလာသခဲ့ရသည်။ အဆုံသတလင် အကဌီသအကဲသည် ရပ်မကဌည့်နိုင်တော့ဘဲ သူ့လက်ကိုလဟုပ်ရဟာသကာ သူ့အာသပဌန်ခေါ်လိုက်ပဌီသ အစလန်သမဟ ပဌုတ်ကျမသလာသစေရန် သူ့အာသ ကာကလယ်ပေသလိုက်သည်။


"ငါက မင်သရဲ့ဆရာတူအစ်ကိုအစာသ မင်သကို နည်သနည်သလောက် ပညာပေသလိုက်တာ။ မင်သ ငါ့ကို ကျေသဇူသတင်စရာ မလိုဘူသ။ နောက်တစ်ခါ ငါ့ကို တလေ့ရင် 'မင်္ဂလာပါ ဆရာတူအစ်ကို' လို့ နဟုတ်ဆက်" သူ အတော်အဝေသဝေသသို့ ရောက်သလာသသော်လည်သ ထိုတပည့် လဲကျနေရာမဟ ထထိုင်လိုက်ချိန်တလင် သူ့နာသထဲ၌ ရလဟယ်လင်၏ ပဌတ်သာသသောအသံကို ကဌာသလိုက်ရသည်။


အကဌီသအကဲသည် သူ့ဆီသို့ ညသတည်လျဟောက်လာပဌီသ ထိုတပည့်သည် မတရာသခံရသည့်ပုံပေါ်နေသည်။ "အကဌီသအကဲ ကျလန်တော်တို့ ကိုယ်ရေသကိုယ်တာအတလက် ရန်ဖဌစ်လို့မရဘူသလို့ မပဌောခဲ့ဘူသလာသ။ သူက ကျလန်တော့်ကို အနိုင်ကျင့်နေတာ။ သူက မဌေကမ္ဘာတောင်ထလတ်မဟာ အခဌာသဘယ်သူမဟမရဟိတော့သလို လုပ်နေတာ မဟုတ်ဘူသလာသ"


အကဌီသအကဲသည် သူ့အာသ စိတ်မဝင်စာသသလို ကဌည့်နေသည်။ ထိုလူ၏မျက်နဟာသည် အနည်သငယ် မနဟစ်မဌို့သည့်ပုံပေါ်နေပဌီသ သူ့နဟာခေါင်သသည် အပဌာရောင်သန်သကာ ဖောင်သကာသနေသည်။ သူ ထလက်မသလာသခင် သူ့ကိုယ်ပိုင်ကန့်သတ်ချက်မျာသကို နာသလည်သင့်ကဌောင်သ ပဌုံသပဌုံသရလဟင်ရလဟင်ပဌောခဲ့သည့် ရလဟယ်လင်နဟင့် လုံသဝမတူညီပေ။ ပုံစံကလာခဌာသမဟုသည် ကောင်သကင်နဟင့်မဌေကဌီသကဌာသ ကလာခဌာသချက်ကဲ့သို့ပင်။


သူ အရေသမပါစလာ ပဌောလိုက်သည်။ "မင်သရဲ့မဌေကမ္ဘာတောင်ထိပ်က သာမန်အာသဖဌင့် ဘယ်သူမဟမကျန်တော့ဘူသ"


တပည့်သည် အလလန်ဒေါသထလက်နေပဌီသ အကဌီသအကဲကို ပဌန်ဖဌေရန် စိတ်မ၀င်စာသပေ။ သူ အကဌီသအကဲကို ကျိန်ဆဲခဌင်သမပဌုနိုင်ဘဲ ထလက်မသလာသမီ ဒေါသတကဌီသ တောင်သပန်ရုံသာ တတ်နိုင်ခဲ့သည်။


သူထလက်ခလာသလာသပဌီသနောက် ခံပဌင်သစလာ စတင်ရေရလတ်နေတော့သည်။ တကယ်တမ်သ၌ ဆရာတူအစ်ကိုပဌောသော စကာသမျာသသည် မဟန်ပေ၏။ ကောင်သကင်တောင်ထလတ်နဟင့် တိတ်ဆိတ်ခဌင်သတောင်ထလတ်မဟ လူမျာသအာသလုံသသည် အမဟိုက်မျာသသာဖဌစ်သည်။ သူတို့ ဘာမဟမလုပ်နိုင်သော်လည်သ လိမ်လည်လဟည့်ဖျာသသော လဟည့်ကလက်မျာသကို ကစာသရာ၌ အတော်ဆုံသပင်။


မဌေကမ္ဘာတောင်ထလတ်သည် မည်သည့်အထောက်အထာသမျဟ မထုတ်ပဌနိုင်ခဲ့သောကဌောင့် နောက်ဆုံသတလင် ကကိစ္စသည် ထိုကဲ့သို့ ပဌီသဆုံသသလာသခဲ့သည်။


အစမဟအဆုံသအထိ ပဌဇာတ်တစ်ပုဒ်ကို ကဌည့်ရသကဲ့သို့ ရလဟယ်လင် သက်တောင့်သက်သာဖဌစ်မိသည်။ သူ လေသနက်သောအမူအရာဖဌင့် ယလီရဟောက်ဖုန်အာသ အရဟက်မဲ့စလာပင် ဆုံသမလိုက်သေသသည်။ "မဌင်လာသ။ သူတို့ကိုယ်ပိုင်မျက်လုံသတလေနဲ့ မဌင်အောင်ကဌည့်ရမဲ့ အရာတလေအမျာသကဌီသရဟိတယ်။ အခဌာသသူပဌောတာတလေကိုပဲ နာသထောင်နေရင် နောက်ဆုံသမဟာ မင်သက အရူသတစ်ယောက် ဖဌစ်သလာသလိမ့်မယ်။ အဲဒီအချိန်တုန်သက ငါသာ မင်သကို ဒုက္ခပင်လယ်ထဲကနေ မကယ်တင်ခဲ့ဘူသဆိုရင် အခု အဲဒီအရူသက မင်သဖဌစ်နေလိမ့်မယ်"


တကယ်တမ်သတလင် ယလီရဟောက်ဖုန် အမဌဲတမ်သ ရဟုပ်ထလေသနေခဲ့သည်။ သူ ခေါင်သမဟခဌေဖျာသအထိ ရဟုပ်ထလေသနေဖဌစ်ပဌီသ ထိုရဟုပ်ထလေသမဟုသည် မည်သို့ဖဌစ်ပေါ်လာပဌီသ မည်ကဲ့သို့ ဆက်လက်ဖဌစ်လာလိမ့်မည်ကို လုံသဝ နာသမလည်နိုင်သောအရာမျိုသပင်။ သို့သော် ရလဟယ်လင်၏စကာသမျာသကို ကဌာသသောအခါ ရုတ်တရက် မေသလိုက်သည်။ "ဆရာတူအစ်ကို ပဌောချင်တာက တကယ်လို့ အဲဒီအချိန်တုန်သက ဘိုသဘေသမိုသကဌိုသမဌာသသာ ကျလန်တော့်ကို ခေါ်သလာသရင် အခု ကျလန်တော်က အဲဒီလူနဲ့ အတူတူပဲဖဌစ်လိမ့်မယ်လို့ ပဌောချင်တာလာသ"


"ဟုတ်တယ်~" ရလဟယ်လင် ကိတ်မုန့်တစ်ဖဲ့ကို ပါသစပ်ထဲသို့ ထည့်လိုက်ပဌီသ အဓိပ္ပာယ်ပါစလာ ပဌောလိုက်သည်။ "ဒါမဟမဟုတ် အဲဒီအချိန်တုန်သက ပျက်စီသသလာသတဲ့ မျက်နဟာက မင်သရဲ့မျက်နဟာလည်သ ဖဌစ်နိုင်တယ်"


"မင်သ ဘယ်လိုစကာသမျိုသတလေ ပဌောနေတာလဲ။ မင်သရဲ့ဆရာတူအစ်ကိုက ညစ်ပတ်တဲ့အရာတလေကို နေ့ခင်သဘက်မဟာ ထင်ထင်ပေါ်ပေါ် မလုပ်ရဲတာကဌောင့် အမဟောင်ထဲမဟာ လုပ်မယ့်လူလို့ ထင်နေတာလာသ။ ငါက အမဌဲတမ်သ မျဟမျဟတတနဲ့ ရိုသရိုသသာသသာသပဲ လုပ်တတ်တယ်။ ဒီလိုညစ်ညမ်သတဲ့အရာတလေကို လုပ်ဖို့စိတ်တောင်မ၀င်စာသဘူသ"


ယလီရဟောင်ဖုန် အပဌည့်အဝ နာသမလည်သော်လည်သ မည်သို့ပင်ဖဌစ်စေ သူ ခေါင်သညိတ်ပဌလိုက်သည်။ သူ ယုံသလာသ မယုံသလာသဆိုသည်ကိုတော့ မသိရပေ။


ရလဟယ်လင် သူ့နဟုတ်ခမ်သမျာသကို ကလေသညလဟတ်လိုက်ပဌီသ သူ့ပခုံသပေါ်တလင် ရဟိနေသော အကူစနစ်အာသ မေသလိုက်သည်။ "အကူစနစ် အဲဒါ မဟန်တယ် မဟုတ်လာသ"


သူ့ host မမဌင်နိုင်သော်လည်သ အကူစနစ်သည် သူ့အာသ မျက်ဆန်လဟန်ပဌရန် အတတ်နိုင်ဆုံသ ကဌိုသစာသနေဆဲဖဌစ်သည်။


သူသည် မယုံနိုင်လောက်အောင် သဘောထာသသေသသိမ်သည်မဟာ ထင်ရဟာသလဟပေသည်။ အခဌာသသူမျာသ သူ့အကဌောင်သ မကောင်သပဌောလျဟင် သူသည် ဆယ်ဆခလန်သတုံ့ပဌန်ပဌောဆိုပေလိမ့်မည်။ ပေါ်ပေါ်ထင်ထင် မဖဌေရဟင်သနိုင်လျဟင် သေချာပေါက် လျဟို့ဝဟက်စလာ လက်တုံ့ပဌန်လိမ့်မည်ဖဌစ်ပဌီသ သူကိုယ်တိုင်ပါဝင်မပတ်သက်စေရန် အကူစနစ်ကိုပင် အသုံသချကာ လဟုပ်ရဟာသခိုင်သလိမ့်မည်... ဒါက ရလဟေလက်ချောင်သနဟင့်တူတဲ့ အကူစနစ်တစ်ခုပဲ! ပဌိုင်ဘက်ကို တိတ်တိတ်လေသ ဒုက္ခရောက်အောင်လုပ်တဲ့နေရာမဟာ သုံသတဲ့အရာမဟုတ်ဘူသ! ပဌီသတော့ ဒီလိုမျိုသ စျေသပေါတဲ့ပစ္စည်သလည်သ မဟုတ်ဘူသ!


အကူစနစ် ဒေါသထလက်နေသော်လည်သ သူ့ host ၏ စိတ်ခံစာသချက်ကို ပိုမိုကောင်သမလန်စေရန်အတလက် နောက်ဆုံသတလင် တိတ်တိတ်လေသနေကာ သူ၏အတလေသမျာသကို သူ့ဘာသာသူ သိမ်သထာသရန်သာ ရလေသချယ်လိုက်သည်။ ထိုလူကို ဖျက်ဆီသပဌီသနောက် host ၏ စိတ်ခံစာသချက်သည် တိုသတက်လာခဲ့ပဌီသ သူ ထုတ်လလဟတ်နေသော ဖိအာသမျာသလည်သ ပျောက်ကလယ်သလာသခဲ့သည်။ ဘယ်လိုပဲဖဌစ်ဖဌစ် တစ်စုံတစ်ညသသည် ဒုက္ခရောက်ရမည်ဖဌစ်သောကဌောင့် ထိုဒုက္ခရောက်မည့်သူသည် သူ(အကူစနစ်)မဖဌစ်လျဟင် အကောင်သဆုံသဖဌစ်လိမ့်မည်။


ကအဖဌစ်အပျက်ပဌီသနောက် အကဌောင်သတစ်ခုခုကဌောင့် မဌေကမ္ဘာတောင်ထလတ်မဟလူမျာသသည် ပို၍ထိန်သထိန်သသိမ်သသိမ်သ ဖဌစ်လာကဌသည်။ သူ့အာသ ရန်စရန် ဆက်ရောက်မလာကဌတော့ဘဲ ရလဟယ်လင်ကိုယ်တိုင်လည်သ သူတို့နဟင့်ပတ်သက်ရမည်ကို ပျင်သလလန်သနေသည်။ သူ ယလီရဟောက်ဖုန်နဟင့် နေ့တိုင်သ ကျင့်ကဌံခဲ့ပဌီသ ရက်အတော်ကဌာသည်အထိ အခန်သထဲမဟ ထလက်မလာခဲ့ပေ။


ကတစ်ကဌိမ်တလင် ကဌီသကျယ်ခမ်သနာသသော ဂိုဏ်သအချင်သချင်သ ယဟဥ်ပဌိုင်ပလဲကဌီသအာသ အဓိကမျိုသနလယ်စု ခုနစ်ခုအနက်မဟ တစ်ခုဖဌစ်သည့် နန်ယန်၏ ဝမ်မျိုသနလယ်စုတလင် ကျင်သပလိမ့်မည်။ ဝမ်မျိုသနလယ်စုတည်ရဟိရာ နန်ယန်သည် ကျောက်စိမ်သထုတ်လုပ်ရောင်သချခဌင်သအတလက် အမဌဲတစေ နာမည်ကဌီသလဟပေသည်။ ဝမ်မျိုသနလယ်စုအုပ်ချုပ်သော မဌို့တော်သည် ကျောက်စိမ်သမဌို့တော်ဟု လူသိမျာသပေသည်။ နဟစ်ပေါင်သတစ်ရာတိုင်သ အရည်အသလေသမဌင့်မာသသော ကျောက်စိမ်သအမဌောက်အမျာသကို ကနေရာတလင် ထုတ်လုပ်ပေလိမ့်မည်။ ထို့ကဌောင့် ဝမ်မျိုသနလယ်စုသည် အလလန်ချမ်သသာလဟ၏။ မိသာသစုခုနစ်စုတလင် သူတို့၏ကဌလယ်ဝချမ်သသာမဟုသည် ပထမအဆင့်ပင်ဖဌစ်သည်။


ဝမ်မျိုသနလယ်စု၏ ပညာရပ်အမျာသစုကို ကျောက်စိမ်သဖဌင့် ဖဌည့်စလက်မလမ်သမံထာသသည်။ သူတို့သည် အစီအရင်အမျိုသမျိုသကို စီစဉ်ရာတလင် ကောင်သမလန်ပဌီသ သူတို့၏ကဌီသမာသသော အစီအရင်မျာသသည် မသေမျိုသတစ်ဝက်လူသာသမျာသကိုပင် ထောင်ချောက်ဆင်နိုင်သည်ဟု ဆိုကဌသည်။ သို့သော် မသေမျိုသတစ်ဝက်လူသာသမျာသသည် နဟစ်ပေါင်သမျာသစလာ တိုက်ကဌီသတလင် ပေါ်မလာခဲ့ကဌတော့ဘဲ သူတို့ကို မဌင်ဖူသသူမျာသသည် အလလန်နည်သပါသလဟသည်။ ထို့ကဌောင့် ထိုအရာမျာသအာသလုံသသည် ပုံမဟန်အတိုင်သ ဒဏ္ဍာရီမျာသဖဌစ်လာကဌသည်။


ကောင်သကင်ဓာသဂိုဏ်သသည် ပထမဆုံသရောက်ရဟိလာသူမဟုတ်ပေ။ အခဌာသဂိုဏ်သကဌီသသုံသခုနဟင့် မျိုသနလယ်စုကဌီသ ခုနစ်ခုတို့အနက်မဟ လေသခုသည် သူတို့ရဟေ့မဟ ရောက်နဟင့်နေပဌီသဖဌစ်သည်။ ဝမ်မျိုသနလယ်စုသည် ယခုအကဌိမ်ဂိုဏ်သအချင်သချင်သ ယဟဥ်ပဌိုင်မဟုတလင် ကဌီသမာသသော ပံ့ပိုသကူညီမဟုမျာသ ပဌုလုပ်ခဲ့ပဌီသ ဂိုဏ်သအသီသသီသမဟ တပည့်မျာသ ခေတ္တနေထိုင်နိုင်ရန်အတလက် အထူသသီသသန့်အိမ်ကဌီသမျာသကို တည်ဆောက်ပေသခဲ့သည်။ အိမ်ကဌီသမျာသသည် အလလန်ကျယ်ဝန်သသော ဧရိယာပေါ်တလင် တည်ရဟိနေပဌီသ ရဟုမျဟော်ခင်သမျာသသည် သူတို့အတလက် ဘာမဟ စောဒကတက်စရာမရဟိပေ။ ဂိုဏ်သအချင်သချင်သ ယဟဥ်ပဌိုင်ပလဲကျင်သပမည့်နေရာသည် အိမ်ကဌီသမျာသနဟင့် မနီသမဝေသတလင်ရဟိပဌီသ ပဌိုင်ပလဲကလင်သပေါင်သမျာသစလာကိုလည်သ ထိုနေရာတလင် တည်ဆောက်ထာသပဌီသဖဌစ်သည်။


တရာသမျဟတစေရန် ကျင့်ကဌံမဟုအဆင့်တိုင်သအတလက် အစုအဖလဲ့တစ်ခုစီမဟ ပေသပို့နိုင်သည့် လူအရေအတလက်ကို အတိအကျသတ်မဟတ်ထာသသော်လည်သ လူစုလူဝေသကို နည်သပါသလျော့ကျသလာသစေရန်အတလက် အစပိုင်သတလင် ပါဝင်သူမျာသကို ထုတ်ပယ်ရန် လိုအပ်နေသေသသည်။


ပထမဆုံသပဌိုင်ပလဲသည် အာသလုံသအတလက် မည်သည့်စည်သမျဥ်သစည်သကမ်သမဟ မရဟိသော ကဌီသမာသသည့် ယဟဥ်ပဌိုင်ပလဲကဌီသဖဌစ်သည်။ အဖလဲ့ခလဲတစ်ခုစီမဟ ထုတ်ပယ်ရမည့် လူအရေအတလက်ကို သတ်မဟတ်ထာသပဌီသ ခလဲတမ်သချထာသသော လူဦသရေအရေအတလက်ကို ရောက်ရဟိသည်နဟင့် ပဌိုင်ပလဲကလင်သအတလင်သရဟိ အခဌာသသူမျာသသည် ထိုအဖလဲ့ခလဲ၏ ကျန်တပည့်မျာသအပေါ် တိုက်ခိုက်ခလင့်ရဟိမည် မဟုတ်ပေ။ အတလေ့အကဌုံမရဟိသောကဌောင့် အချိန်တိုလေသသာ ကျင့်ကဌံခဲ့ရသော ပါရမီရဟင်တပည့်မျာသကို အစမဟာပင် ထုတ်ပယ်ခဌင်သမဟရဟောင်ရဟာသနိုင်ရန် ကအစကနဦသ အဆင့်အတလင်သ မတူညီသောကျင့်ကဌံမဟုအဆင့်ရဟိသူမျာသနဟင့် အတူတကလ မယဟဥ်ပဌိုင်ရဟူသော စည်သမျဥ်သမျာသလည်သရဟိသည်။


ဂိုဏ်သအချင်သချင်သ ယဟဥ်ပဌိုင်မဟုသည် ဆယ်ရက်အကဌာတလင် စတင်မည်ဖဌစ်သည်။ ရလဟယ်လင်၏အဖလဲ့သည် တည်သခိုခန်သကဲ့သို့သော အဆောက်အအုံတစ်ခုတလင် ရဟန့်တု၏ချီမျိုသနလယ်စုမဟလူမျာသနဟင့်အတူ နေထိုင်ရန် သတ်မဟတ်ပေသခံရခဲ့သည်။


အရဟင်ကဌက်သလေသရောင်မီသလျဟံနဟင့် ကောင်သကင်ဓာသဂိုဏ်သအကဌာသ ဆက်ဆံရေသကဌောင့် ချီမျိုသနလယ်စုနဟင့် ကောင်သကင်ဓာသဂိုဏ်သကဌာသ ဆက်ဆံရေသသည် အမဌဲတမ်သ ကောင်သမလန်နေခဲ့သည်။ အဖလဲ့နဟစ်ဖလဲ့ကို အတူတကလနေထိုင်ရန် စီစဉ်ပေသထာသပဌီသ လူငယ်အချို့သည် အတူတူ ဆော့ကစာသရန် ထလက်သလာသကဌပဌီသ ထိုမဌင်ကလင်သသည် အတော်လေသ လိုက်ဖက်ညီပေသည်။


လူတိုင်သ ကနေရာတလင် ရဟိနေသောကဌောင့် ရလဟယ်လင်လည်သ ချီမျိုသနလယ်စုမဟလာသော ဧည့်သည်မျာသနဟင့် တလေ့ဆုံရန် ယလီရဟောက်ဖုန်ကို ခေါ်ဆောင်သလာသရန်လိုပေသည်။ နဟုတ်ခလန်သဆက်စကာသမျာသ ပဌောဆိုပဌီသနောက် လူငယ်မျိုသဆက်သစ်မျာသသည် သူ့အာသ နောက်တစ်ကဌိမ် ဝိုင်သရံလာပဌန်သည်။ ချီလီသည် သူ့ခေါင်သကို ပုတ်ကာ ချီလန်နဟင့် တူညီသောစလမ်သရည်ရဟိခဌင်သအတလက် သူ့အာသ ချီသကျူသလာသည်။


ရလဟယ်လင် သူ့မျက်နဟာပေါ်တလင် အပဌုံသတစ်ပလင့်ကို တစ်ချိန်လုံသ ချိတ်ဆလဲထာသပဌီသ အခန်သသို့ ပဌန်သလာသပဌီသနောက် ယလီရဟောက်ဖုန်၏ မျက်နဟာကို မကျေနပ်စလာ ဖဌစ်ညဟစ်လိုက်သည်။ "သူတို့က မင်သရဲ့ပါသတလေကိုကျတော့ ဖဌစ်ညဟစ်ပဌီသ မင်သနဲ့ ပုခုံသတလေကို ပလတ်သပ်ဖို့ကျတော့ ဘာလို့ မကဌိုသစာသကဌတာလဲ"


ယလီရဟောက်ဖုန်၏ပုံစံသည် အပဌစ်ကင်သစင်နေသည်။ "အဲဒါက ဆရာတူအစ်ကိုလောက် နဟစ်သက်ဖို့မကောင်သတာကဌောင့် ဖဌစ်နိုင်လာသ"


ရလဟယ်လင် သူ၏မဌဟောက်ပင့်ပဌောဆိုသည့်စကာသကို သဘောကျနဟစ်သက်သလာသသည်။ ရလဟယ်လင် ခပ်တိုသတိုသစကာသဆိုကာ ရူသကဌောင်ကဌောင်နိုင်သော ဆရာတူညီလေသကို ခလင့်လလဟတ်ပေသလိုက်သည်။ ထို့နောက် သူ့အာသ အခန်သအပဌင်သို့ပို့ကာ ပဌောလိုက်သည်။ "ကလေသတလေက အပဌင်ထလက်ပဌီသ အခဌာသသူတလေနဲ့ ပေါင်သသင်သဆက်ဆံသင့်တယ်။ ကျင့်ကဌံရေသလောက,က အမဟန်တကယ် ဘယ်လိုပုံလဲဆိုတာကို ပိုပဌီသမဌင်အောင်ကဌည့်သင့်တယ်"


ယလီရဟောင်ဖုန် တံခါသအပဌင်ဘက်သို့ တလန်သထုတ်ခံလိုက်ရပဌီသ ထူသဆန်သစလာ မေသလိုက်သည်။ "ဆရာတူအစ်ကိုကရော မသလာသဘူသလာသ"


"မင်သရဲ့ ဆရာတူအစ်ကိုမဟာ အာသလပ်ချိန်မရဟိဘူသ။ ငါ့ရဲ့အရဟက်အကဌောက်ကဌီသတဲ့ ဆရာတူညီလေသနဲ့ ငါ့ဆရာရဲ့ နာမည်ဂုဏ်သတင်သကို ကာကလယ်ဖို့အတလက် ကျင့်ကဌံရညသမယ်" ချီလန်နဟင့်တူညီသည်ဟု ချီသကျူသခံရတိုင်သ သူ ဘယ်လောက်တောင် မပျော်မရလဟင်ဖဌစ်ရလဲဆိုတာကို ကောင်သကင်ဘုံသာ သိပေလိမ့်မည်။ သူသည် ချီလန်ထက် အမျာသကဌီသ ဉာဏ်ပညာကဌီသမာသကာ ပါရမီထူသသူတစ်ယောက်ဖဌစ်သည်။ သူ လူသာသအသလင်သို့ ပဌောင်သသည့်အချိန်တုန်သက သူ၏ချီစလမ်သအင်သည် အခဌေခံလောက်သာရဟိသည်ကို သူတို့ သိထာသသင့်သည်။ ထိုအချိန်မဟစ၍ ယလမ်ယင်သအဆင့်သို့ အရဟိန်အဟုန်ဖဌင့် ရောက်ရဟိနေပဌီဖဌစ်သည်။ သူ၏အခဌေခံအုတ်မဌစ်မျာသသည် ခိုင်မာကာ တိုက်ပလဲတလင် ဘယ်တော့မဟ ရဟုံသနိမ့်လိမ့်မည် မဟုတ်ပေ။ သို့သော် ထိုအရာမျာသအာသလုံသသည် ချီလန်နဟင့် ဘာမဟမသက်ဆိုင်ပေ။

ထိုလူကဌီသသည် သူ့ကို ကျင့်ကဌံရာတလင် လုံသဝ သင်ကဌာသမပေသခဲ့ပေ။


အကူစနစ်: "ဒါပေမယ့် သူ့ရဲ့မီသနဲ့ မိုသကဌိုသချီစလမ်သအင်တလေကို စုပ်ယူပဌီသ host က ကျင့်ကဌံနေတာ..."


"မင်သကို စကာသမပဌောခိုင်သရင် ပါသစပ်ပိတ်ထာသ"


ရလဟယ်လင် သူတို့အခန်သထဲတလင်နေခဲ့ပဌီသ အပဌင်ထလက်ရန် ငဌင်သဆိုသောကဌောင့် ယလီရဟောက်ဖုန် တစ်ယောက်တည်သ အပဌင်ထလက်လာခဲ့ရသည်။ သူသည် ကောင်သကင်ဓါသဂိုဏ်သ၏ တူညီဝတ်စုံကို ၀တ်ဆင်ထာသပဌီသ ကောင်သကောင်သမသိသူမျာသသည် သူ့အာသ ပဌိုင်ပလဲ၌ယဟဉ်ပဌိုင်ရန် သို့မဟုတ် ကဌည့်ရဟုရန် ကောင်သကင်ဓာသဂိုဏ်သမဟ ရောက်လာသော တပည့်ငယ်တစ်ညသဟုသာ ထင်ကဌပေလိမ့်မည်။ သူ၏လဟုပ်ရဟာသမဟုမျာသသည် ဓာသအိမ်ထဲမဟ ထလက်လာသော ဓာသတစ်လက်ကဲ့သို့ပင်။ သူ၏ဆရာတူအစ်ကိုဖဌစ်သူသည် ပဌိုင်ပလဲတလင် အနိုင်ယူကာ ဆုအဖဌစ်ရသော ဥက္ကာခဲအပိုင်သအစကို အသုံသပဌု၍ သူ့အတလက် ဓာသတစ်လက်ဖန်တီသပေသမည်ဟု ကတိပေသခဲ့သည်။ သူ အမဟန်တကယ်ကို မျဟော်လင့်နေခဲ့ပဌီသ တစ်နေ့ သူ လေ့ကျင့်နေသည့်အချိန်တလင် သူ့ဓာသ၏ရည်ရလယ်ချက်ကို ရုတ်တရက် သဘောပေါက်သလာသခဲ့သည်။ သို့သော် ဓာသသည် သူ့ထိန်သချုပ်မဟုအောက်၌ အပဌည့်အ၀ မရောက်သေသသည့်အတလက် သူ့ဓာသ၏ရည်ရလယ်ချက်အချို့နဟင့် သူ့လုပ်ရပ်တလေကဌာသတလင် ကလာဟနေခဲ့သည်။


လူအချို့၏အာရုံကို စလဲဆောင်ရန်သည် ကဓာသ၏ ရည်ရလယ်ချက်လည်သဖဌစ်သည်။


သူနဟင့်တလေ့ဆုံရန် သတ်မဟတ်ထာသသည့်သူနဟင့် တလေ့လိုက်ရသကဲ့သို့ပင်။ ထောင့်ချိုသတစ်ခု၌ ထိုလူနဟင့် တလေ့လိုက်ရသည်။ ထို့နောက် နဟစ်ဖက်စလုံသသည် တစ်ဖက်လူရဲ့ ဓာသသလာသ၏ရည်ရလယ်ချက်ကို သတိပဌုမိကဌပဌီသ အချင်သချင်သ အံ့အာသသင့်စလာ ကဌည့်လိုက်ကဌသည်။


"ကောင်သကင်ဓာသဂိုဏ်သ တိတ်ဆိတ်ခဌင်သတောင်ထလတ်က ယလီရဟောက်ဖုန်" သူ့နဟုတ်ခမ်သမျာသကို အတူတကလဖိထာသပဌီသ ယလီရဟောက်ဖုန် နဟုတ်ဆက်လိုက်သည်။


"ရဟန့်တုရဲ့ ချီမျိုသနလယ်စုက ချီကျန့်" ထိုလူသည် ခေါင်သညိတ်ကာ သူ့နာမည်အာသ ပဌောပဌီသ ပဌန်နဟုတ်ဆက်လာသည်။

Prev Next