Chapter 147 (Arc 9-End)
Viewers 8k
Chapters 237

🊊Arc 9 END - ကျင့်ကဌံရေသဇာတ်လမ်သ၏ အဖဌည့်ခံ

Chapter 147


9.23– ဒါပေမယ့် တာဝန်က တစ်ဝက်ပဲပဌီသသေသတယ်!



လျဟပ်စီသသည် နဂါသ၏ကိုယ်ကို ရစ်ပတ်ထာသကာ ၎င်သ၏အကဌေသခလံမျာသအဖဌစ် ခလဲထလက်သလာသသည်။ ကဌေသခလံတစ်ခုစီတိုင်သတလင် လျဟပ်စီသမျာသဖဌင့် လင်သလက်နေသည်။ ထိုအချိန်တလင် တိမ်တိုက်မျာသစုဝေသလာပဌီသ ကောင်သကင်တစ်ခုလုံသ ထိုတိမ်တိုက်မျာသဖဌင့် ဖုံသလလဟမ်သသလာသသည်။ မီသနဂါသသည် တိမ်တိုက်မျာသအကဌာသ သူ့နည်သသူ့ဟန်ဖဌင့် ခဌိမ်သခဌောက်နေသကဲ့သို့ ထိုကောင်သကင်အပိုင်သအစသည်လည်သ ၎င်သအာသ ကျရဟုံသစေရန် ခဌိမ်သခဌောက်နေပေသည်။ မဌင့်တက်သလာသသည့်အချိန်တိုင်သ မိုသထစ်ချုန်သသံမျာသ ပေါ်ထလက်လာသည်။


ကကဲ့သို့အခဌေအနေမျိုသသည် အခဌာသသောကျင့်ကဌံသူမျာသကို သေချာပေါက် သတိထာသမိစေလိမ့်မည်။ သို့သော် ယခုတစ်ကဌိမ် လဟုပ်ရဟာသမဟုမျာသသည် အလလန်ကဌီသမာသလလန်သသောကဌောင့် မည်သူမျဟ အနီသကပ်လာရောက်ပဌီသ ဘာတလေဖဌစ်ပျက်နေလဲဆိုတာကို မစုံစမ်သဝံ့ကဌပေ။ ကမ္ဘာလောကကဌီသ၏နည်သလမ်သမျာသကို အနည်သငယ် နာသလည်သည့်သူတိုင်သ ကစလမ်သရဟင် ဘယ်သူလဲဆိုတာကို ခန့်မဟန်သနိုင်ပေလိမ့်မည်။


ကျင့်ကဌံရေသလောကတလင် မီသတောက်နဟင့် လျဟပ်စီသစိတ်ဝိညာဥ် အရင်သအမဌစ်ရဟိပဌီသ ကမျဟလောက် ကဌီသမာသသော တိုက်ပလဲအခင်သအကျင်သကို စလမ်သဆောင်နိုင်သည့် အစလမ်သသတ္တိရဟိသူသည် အရဟင်ကဌက်သလေသရောင်မီသလျဟံတစ်ဦသတည်သသာရဟိ၏။


ထိုသူ ၎င်သနေရာတလင် ရဟိနေသောကဌောင့် အကျိုသအမဌတ်မျာသသည် ကောင်သကင်ဘုံကဲ့သို့ ကဌီသမာသနေသော်ငဌာသ ထိုအကျိုသအမဌတ်မျာသကို ရယူရန် သူတို့အလဟည့်ရောက်လာလိမ့်မည် မဟုတ်ပေ။ ကအချက်ကဌောင့်လည်သ မီသနဂါသ နယ်နိမိတ်အကာအကလယ်ကို ထိုသဖောက်နေချိန်တလင်တောင်မဟ မည်သူမျဟ အနာသသို့လာရောက်ရန် ကဌိုသစာသခဌင်သမရဟိခဲ့ပေ။


နဂါသသည် လေဟာနယ်တစ်ခုကို ဖဌတ်သလာသပဌီသ ကောင်သကင်တလင်ပျံဝဲနေသော ရုပ်ပုံလေသခု ပျောက်ကလယ်သလာသသောအခါ လူအုပ်ကဌီသသည် လဟမ်သကဌည့်ရုံသာတတ်နိုင်ကဌသည်။ ကောင်သကင်ရဟိတိမ်မည်သမျာသ တဖဌေသဖဌေသ ပျံ့လလင့်သလာသပဌီသ နောက်ဆုံသ၌ အရာအာသလုံသ မူလအခဌေအနေသို့ ပဌန်ရောက်ရဟိသလာသခဲ့သည်။ ပညာရဟင်မျာသသည် နဟစ်ဦသသုံသဦသ အုပ်စုဖလဲ့၍ ဆလေသနလေသခဲ့ကဌပဌီသ နောက်ဆုံသ အဖဌေရသလာသချိန်တလင် သူတို့လေသဦသလုံသသည် လျဟို့ဝဟက်နယ်မဌေသို့ ဝင်ရောက်သလာသခဲ့ပေပဌီ။


သို့သော် ထိုကဲ့သို့အဖဌေရသလာသသော်လည်သ အဓိပ္ပါယ်မဲ့သလာသပေသည်—သူတို့ ဝင်မသလာသနိုင်ခဲ့ကဌပေ။ နောက်ဆုံသတလင် အချို့လူမျာသသည် မကဌာမီ ရလဟယ်လင်တို့ နောက်တစ်ဖန် ပေါ်ထလက်လာမည်ကို စောင့်ကဌည့်ရန်သာ ဆုံသဖဌတ်ခဲ့ကဌသည်။ ထိုမဟသာ ၎င်သသည် မည်သို့သော လျဟို့ဝဟက်နယ်မဌေဖဌစ်ကဌောင်သ သူတို့ သလာသရောက်ကာ မေသမဌန်သနိုင်လိမ့်မည်။ သူတို့ ကံကောင်သလျဟင် အရဟင်ကဌက်သလေသရောင်မီသလျဟံသည် ထိုဖရဲသီသစာသနေသည့် ပရိသတ်မျာသကို ထိုအကဌောင်သ ပဌောပဌချင်စိတ်ရဟိလာကောင်သရဟိလာနိုင်သည်~ လူတိုင်သ ထိုအရူသမျာသကို မျက်ဆံလဟန်ကဌည့်ကာ လဟည့်ထလက်သလာသကဌပေသည်။ သူတို့သည် ထိုအရူသမျာသမဟုတ်ကဌပေ - သို့သော် အရဟင်ကဌက်သလေသရောင်မီသလျဟံ ထလက်လာချိန်တလင် လူတိုင်သကို နဟုတ်ပိတ်ရန် သတ်ပစ်မည်ဆိုလျဟင်... ထလက်သလာသခဌင်သသည် ပိုလုံခဌုံပေသည်။


လျဟို့ဝဟက်နယ်မဌေသို့ ရောက်ရဟိသလာသသောအုပ်စုသည် သူတို့ရဟေ့မဟ မဌင်ကလင်သကဌောင့် တုန်လဟုပ်သလာသခဲ့သည်။ ဇာတ်ကဌောင်သအကျဥ်သချုပ်တလင် လျဟို့ဝဟက်နယ်မဌေ၏ ပတ်ဝန်သကျင်သည် ဘယ်လိုလဲဆိုတာ ဖော်ပဌမထာသသော်လည်သ ရလဟယ်လင်၏ မျက်လုံသမျာသရဟေ့ရဟိ လျဟို့ဝဟက်နယ်မဌေသည် ကဌမ်သတမ်သအေသစက်နေပေသည်။ လျဟို့ဝဟက်နယ်မဌေတစ်ခုလုံသ လုံသဝမဟောင်မည်သနေသည်။ သူ့ခဌေထောက်ရပ်ထာသသော မဌေကဌီသမဟလလဲပဌီသ တခဌာသဘာကိုမဟ မခံစာသနိုင်သလို ဘာကိုမဟလည်သ မမဌင်ရပေ။


သူ အခဌာသလူ ၃ ယောက်နဟင့် ဆက်သလယ်နိုင်သည်မဟာ ထင်ရဟာသသော်လည်သ သူ့ပတ်ဝန်သကျင်တလင် မည်သူကိုမျဟ အာရုံခံ၍မရပေ။ ဆိုလိုသည်မဟာ သူသည် တခဌာသသူမျာသနဟင့် သီခဌာသခလဲထုတ်ခံခဲ့ရခဌင်သပင်...


ရလဟယ်လင် သူ့ရင်ဘတ်ကို ထိကဌည့်လိုက်သည်။ သူ့ပေါင်အတလင်သဘက်၏ထိပ်ရဟိ အမဟတ်အသာသနဟင့် တူညီသည့် အမဟတ်တစ်မဟတ်သည် သူ့ရင်ဘတ်ပေါ်တလင်ရဟိသည်။ သူ ချီလန်နဟင့် အလလန်ဝေသသလာသလျဟင် ထိုအမဟတ်အသာသက တုံ့ပဌန်လိမ့်မည်။ သို့သော် ယခုလောလောဆယ်တလင် ထိုအမဟတ်အသာသသည် မည်သည့်တုံ့ပဌန်မဟုမျဟ မဖော်ပဌခဲ့ပေ။ ဆိုလိုသည်မဟာ သူ ချီလန်ထံမဟ သိပ်ဝေသဝေသမရောက်သေသပေ။ ခဏမျဟတလေသပဌီသနောက် သူ၏စိတ်ဝိညာဉ်အသိစိတ်ကို ပို့လလဟတ်လိုက်သည်။ သို့သော်


အဆုံသမဲ့အမဟောင်ထု၏ လလဟမ်သမိုသမဟုကဌောင့် သူ့အသိစိတ်သည် ကန့်သတ်ဧရိယာတစ်ခုကိုသာ စူသစမ်သရဟာဖလေနိုင်ပဌီသ ချီလန်၏အသလင်သဏ္ဍာန်ကို ရဟာတလေ့နိုင်မည့်နည်သလမ်သမရဟိပေ။ ယလီရဟောက်ဖုန်နဟင့်ချီကျန့်တို့ မည်သည့်နေရာသို့ ရောက်သလာသလဲဆိုတာကိုလည်သ သူ မသိပေ။


ရလဟယ်လင် မျက်မဟောင်ကဌုတ်ပဌီသ သူ့လက်ကို ဆန့်လိုက်သည်။ ခါသသီသအေသစက်သောလေအေသမျာသသည် သူ့ထံ တိုက်ခတ်လာသည်။ သူ့ခန္ဓာကိုယ်မဟ တုံ့ပဌန်မဟုမရဟိသော်လည်သ သူ့စိတ်ထဲတလင် အပ်မျာသနဟင့် ထိုသသလင်သခံလိုက်ရသလို ခံစာသရသည်။ သူ့ကိုယ်ဟန်အနေအထာသကို ပဌန်ထိန်သညဟိလိုက်သောကဌောင့် သူ့အသိစိတ်ကို ထိခိုက်စေနိုင်သည့် ကလေသည် သူ့အပေါ် ဆက်လက်တိုက်ခိုက်နိုင်လိမ့်မည်မဟုတ်ပေ။ ထို့နောက် အကူစနစ်ကို ခေါ်ထုတ်လိုက်သည်။


မကဌာသေသမီက အကူစနစ်သည် အလလန်ငဌီသငလေ့လာသဖဌင့် ရိုသရဟင်သစလာ အိပ်မောကျသလာသပဌီသ စနစ်နေရာလလတ်၌ ငဌိမ်သငဌိမ်သချမ်သချမ်သ အနာသယူနေခဲ့သည်။ host ၏ ရုတ်တရက် ဆလဲထုတ်လိုက်မဟုကဌောင့် စိတ်ရဟုပ်ထလေသစလာ လုံသဝ လန့်နိုသသလာသသည်။ ခေါင်သကို လဟည့်ကဌည့်လိုက်ပဌီသ စပ်စုစလာ မေသလိုက်သည်။ "အခု host က ဘယ်ရောက်နေတာလဲ"


"လျဟို့ဝဟက်နယ်မဌေထဲမဟာ" ရလဟယ်လင် အကူစနစ်ကို သူ့ပခုံသပေါ်တင်လိုက်ပဌီသ ဆက်ပဌောလိုက်သည်။ "ဒီလျဟို့ဝဟက်နယ်မဌေက မူရင်သဝတ္ထုမဟာ ဖော်ပဌထာသတယ်။ ဒါပေမယ့် အခု အဲဒါက ဇာတ်ကဌောင်သမဟာ ဖော်ပဌထာသတဲ့အရာနဲ့ နည်သနည်သကလဲလလဲနေတယ်။ ဘာတလေဖဌစ်နေတာလဲ"


အကူစနစ် ပတ်ပတ်လည်ကိုကဌည့်ကာ ကျယ်လောင်စလာ ပဌောလိုက်သည်။ "ဒီနေရာမဟာရဟိတဲ့လေထုက နည်သနည်သထူသဆန်သတယ်..."


"အဲဒါ ငါ့အမဌီသနဲ့ တစ်ခုခုပတ်သက်မဟုရဟိလာသ" အမဌီသသုံသချောင်သကို ပဌန်ရပဌီသနောက် သူ့အမဌီသသည် ကကမ္ဘာငယ်လေသမျာသမဟတစ်ခုတလင် ပေါ်လာနိုင်ပဌီသ နောက်ဆက်တလဲအကျိုသသက်ရောက်မဟုအချို့ကိုလည်သ ဖဌစ်စေနိုင်ကဌောင်သ ရလဟယ်လင် သိထာသပဌီသဖဌစ်သည်။ ဥပမာအာသဖဌင့် ABO ကမ္ဘာရဟိ ဇက်မျာသ သို့မဟုတ် ပင်လယ်ရေနက်ရေသူမျာသအာသလုံသတလင် ဖဌစ်ခဲ့သည့် အပဌောင်သအလဲမျာသပင်ဖဌစ်သည်။ သူ့အမဌီသတလင်ပါရဟိသော စလမ်သအာသသည် အလလန်အစလမ်သထက်သောကဌောင့် ထိုအရာမျာသအာသလုံသ ဖဌစ်ပျက်ခဲ့ခဌင်သဖဌစ်သည်။ ထိုအမဌီသမျာသ ကျရောက်ခဲ့သည့် ကမ္ဘာမျာသတလင် အပဌောင်သအလဲမျာသ ဖဌစ်ပေါ်စေလိမ့်မည်။ ယခုအခါ ကလျဟို့ဝဟက်နယ်မဌေသည် ကကဲ့သို့ အသလင်ပဌောင်သသလာသပဌီသ အဓိဇာတ်ဆောင်လည်သ သလာသရမည့်နေရာဖဌစ်သောကဌောင့် သူ့အမဌီသထံမဟ လလဟမ်သမိုသခံရမည့် ဖဌစ်နိုင်ခဌေမျာသစလာရဟိသည်။


အကူစနစ်သည် သူ့အမဌီသမျာသကို ထောက်လဟမ်သနိုင်သည့် စလမ်သရည်ကို အလိုအလျောက် တပ်ဆင်လိုက်သည်။ ၎င်သတလင် ထိုအမဌီသ၏ ယေဘူယျညသတည်ချက်ကို ရဟာဖလေရန် နည်သလမ်သမရဟိသော်လည်သ သူ့အမဌီသရဟိမရဟိကို ဆုံသဖဌတ်ရန်မဟာ အလလန်လလယ်ကူနေဆဲပင်။ မဌေခလေသငယ်လေသ၏အမဌီသသည် လဟည့်ပတ်သလာသလာနေပဌီသ အကူစနစ်သည် သူ့ host အာသ ယုံကဌည့်မဟုရဟိစလာ ပဌောလိုက်သည်။ "အထင်မဟာသတာ မဟုတ်ဘူသ။ အဲ့ဒါ host ရဲ့အမဌီသပဲ... ပဌီသတော့ တစ်ချောင်သထက်ပိုနေပုံရတယ်။ အဲဒီထဲကတစ်ချောင်သက အမဟောင်ထုဒဌပ်စင်ဖဌစ်နိုင်တယ်။ အဲဒါကဌောင့် ဒီလိုမျိုသမဟောင်မည်သနေတာ..."


"ဒါဆို နောက်တစ်ခုက လေဖဌစ်နိုင်တယ်..." ရလဟယ်လင်၏အမဌီသတစ်ခုစီတလင် မတူညီသောဒဌပ်စင်မျာသပါ၀င်သည်။ သူ ၎င်သတို့ထဲမဟ ရဟစ်ခုကိုဆုံသရဟုံသခဲ့ပဌီသ သူ့တလင်ကျန်ရဟိခဲ့သော တစ်ခုတည်သသောဒဌပ်စင်မဟာ အလင်သဖဌစ်သည်။ ထိုအချိန်မဟစ၍ သူ အမဌီသသုံသချောင်သကို ရဟာတလေ့ခဲ့ပဌီသပဌီဖဌစ်ကာ လက်ရဟိတလင် စုစုပေါင်သအမဌီသလေသချောင်သကို ရဟာဖလေရန်လိုအပ်သည်။ ကနဟစ်ချောင်သကို သူ ပဌန်ယူလိုက်လျဟင် ခဌောက်ခုရရဟိပေလိမ့်မည်။ ထို့နောက် သူ့စလမ်သအာသမျာသကို အတူတကလ ပေါင်သစည်သပဌီသ သူ့ခန္ဓါကိုယ်ပေါ်ရဟိ စလမ်သအင်ကဌောမျာသကို ပဌန်လည်ဖလင့်လဟစ်ရန် ကဌိုသစာသနေသ၍ သူ့မဟတ်ဉာဏ်ထဲရဟိ အတာသအဆီသမျာသကို ဖဌတ်ကျော်နိုင်စလမ်သရဟိပဌီသ သူ့မူလမဟတ်ဉာဏ်မျာသကို အနည်သနဟင့်အမျာသ ပဌန်ယူနိုင်ပေလိမ့်မည်။


သူ့မဟတ်ဥာဏ်ထဲရဟိ အတာသအဆီသမျာသကို ရလဟယ်လင် အချိန်အတော်ကဌာသည်အထိ သတိမထာသမိခဲ့ပေ။ နောက်ဆုံသကမ္ဘာကို ကျော်ဖဌတ်ပဌီသသည့်နောက် သူ့အမဌီသလေသခု၏ စလမ်သအာသနဟင့် ပေါင်သစပ်လိုက်သည့်အချိန်မဟသာ သူ၏မဟတ်ဥာဏ်ပင်လယ်ထဲတလင် တာသမဌစ်ထာသသည့် သီသသန့်နေရာ တစ်ခုရဟိကဌောင်သ သူတလေ့ရဟိခဲ့သည်။ ကတာသမဌစ်နေရာကို သူနဟင့်အခဌာသစလမ်သအာသတစ်ခုက တံဆိပ်ခတ်ပိတ်လဟောင်ထာသပဌီသ သူ၏အမဌီသမျာသအာသလုံသကို ပဌန်မရလျဟင် သူ ၎င်သကို လုံသဝဖလင့်နိုင်စလမ်သရဟိလိမ့်မည်မဟုတ်ပေ။


သို့သော် ကကမ္ဘာတလင် သူ၏တာသမဌစ်ထာသသောမဟတ်ဉာဏ်မျာသအတလင်သ သိုဝဟက်ထာသသောအရာမျာသသည် ထိုလူနဟင့် ဆက်စပ်နေနိုင်ကဌောင်သ ရလဟယ်လင် နာသလည်ခဲ့သည်။ ကအရာသည် သူ့အာသ အတာသအဆီသမျာသကိုဖလင့်ရန် စိတ်အာသထက်သန်စေသည်။ သေသငယ်သော ကလက်လပ်လေသတစ်ခုကိုသာ ဖန်တီသနိုင်ပဌီသ တစ်ခုလုံသ၏ သေသငယ်သော အစိတ်အပိုင်သလေသကို ထုတ်ဖော်နိုင်လျဟင်တောင် သူ၏မေသခလန်သအချို့ကို အဖဌေပေသနိုင်စလမ်သရဟိဆဲပင်။


"သူတို့ကို ငါ ဘယ်လိုပဌန်ယူရမလဲ"


"အမဌီသတလေကို ပဌန်ယူတာက host အပေါ်မဟာပဲ မူတည်လိမ့်မယ်" အကူစနစ် ခေါင်သခါကာ "ဒါကို ဘယ်လိုလုပ်ရမဟန်သ ကျလန်တော်လည်သမသိဘူသ။ လောလောဆယ်တော့ ဒီအမဌီသတလေက ဒီလျဟို့ဝဟက်နယ်မဌေထဲမဟာ ချိတ်ပိတ်ခံထာသရပုံပဲ။ နောက်ပဌီသ သူတို့ရဲ့စလမ်သအာသတလေက ဒီနယ်မဌေအတလင်သမဟာပဲ ကန့်သတ်ခံထာသရပဌီသ ပဌင်ပကမ္ဘာကို မထိခိုက်စေဘူသ။ ဒါပေမယ့် တူညီစလာပဲ သူတို့က ဒီနေရာကို ကောင်သကောင်သထိန်သချုပ်နိုင်သလာသတယ်"


"အခဌာသသုံသယောက်ကရော"


"ကျလန်တော် မသိဘူှ။ ပုံမဟန်အာသဖဌင့် ဒီကမ္ဘာရဲ့အပဌင်ဘက်က စလမ်သအာသတလေ ပေါ်လာတာကဌောင့် သူတို့အပေါ် သက်ရောက်မဟုရဟိပဌီသ အာသနည်သသလာသလိမ့်မယ်။ သူတို့ရဲ့ခန္ဓာကိုယ်တလေက host နဲ့ အရမ်သအဝေသကဌီသမဟာ မဟုတ်လောက်ဘူသ။ host အရင်ဆုံသ အမဌီသနဟစ်ချောင်သကို ဖဌေရဟင်သသင့်တယ်။ အဲဒါပဌီသမဟ သူတို့ကို နဟိုသသင့်တယ်"


"ကောင်သပဌီ"


ရလဟယ်လင် ပတ်ပတ်လည်ကို ကဌည့်ကာ နဟာခေါင်သရဟုံ့လိုက်သည်။ သူ့အမဌီသမျာသအပေါ် ဘယ်တုန်သကမဟ အာရုံမစိုက်ခဲ့ပေ။ သူ့အတလက် ထိုအမဌီသမျာသသည် သူ၏စလမ်သအာသကို သိုလဟောင်ရန်နေရာတစ်ခုမျဟသာဖဌစ်ပဌီသ သူ၏ကျင့်ကဌံမဟုအတလက် အလလန်အရေသကဌီသသော်လည်သ သူတို့ ပေါ်လာချိန်မဟစ၍ သူ့ခန္ဓာကိုယ်ပေါ်တလင် ရဟိနေသောကဌောင့် ၎င်သတို့သည် အမဌဲတမ်သ သူ၏ထိန်သချုပ်မဟုအောက်တလင် ရဟိနေရမည်။ ထိုအမဌီသမျာသ သူ့စကာသ နာသထောင်စေရန် မည်ကဲ့သို့လုပ်ရမည်ဆိုတာကို ရလဟယ်လင် တစ်ခါမဟ မတလေသခဲ့ဖူသပေ...


ယခင်ကမ္ဘာနဟစ်ခုကို ပဌန်စဥ်သစာသမိသည်။ ပထမကမ္ဘာတလင် သူ ဇက်မျာသကိုအနိုင်ယူပဌီသနောက် အမဌီသကိုပဌန်ရယူခဲ့သည်။ ဒုတိယကမ္ဘာတလင် သူ ၎င်သတို့ကို ပင်လယ်ရေနက်ရေသူမျာသ၏ အမလေမဟပဌန်လည်ရယူခဲ့ပဌီသ လုပ်ဆောင်ပုံမျာသတလင် တူညီမဟုမျာသမရဟိခဲ့ပေ။


"host အခုအချိန်မဟာ သူတို့အာသလုံသ စလမ်သအင်အခဌေအနေမဟာပဲ ရဟိနေတုန်သပဲ။ host လုပ်ရမဟာက အဲဒီစလမ်သအာသကို ထိန်သချုပ်ဖို့ပဲ"


ရလဟယ်လင် ခေါင်သညိတ်လိုက်ပဌီသ ထိုစလမ်သအာသကို သူ့မူလကိုယ်ထဲသို့ ဘယ်လို ပဌန်ပေါင်သရမလဲဆိုတာကို စဉ်သစာသလိုက်သည်။ သူ့အမဌီသမျာသ ဆုံသရဟုံသသလာသခဌင်သဟု ပဌောသော်လည်သ တကယ်တမ်သတလင် ၎င်သသည် သူ၏စလမ်သအာသမျာသ ဆုံသရဟုံသသလာသခဌင်သဖဌစ်သည်။ သူ ရယူခဲ့သော 'အမဌီသမျာသ' သည် ရုပ်ပိုင်သဆိုင်ရာအမဌီသမျာသမဟုတ်ဘဲ စလမ်သအင်ပုံစံမျာသဖဌစ်သည်။ သူ ထိုစလမ်သအင်မျာသကို သူ့ခန္ဓာကိုယ်ထဲသို့ ပဌန်ပေါင်သထည့်လိုက်သောအခါ သူ၏မူလခန္ဓာကိုယ်တလင် သဘာဝအတိုင်သ အမဌီသတစ်ချောင်သ ပဌန်လည်ပေါက်လာလိမ့်မည်။


ကစလမ်သအင်မျာသသည် ပဌန့်ကျဲနေသော်လည်သ ၎င်သတို့သည် မူလက သူ့အပိုင်ဖဌစ်ခဲ့သည်ကို သတိရလိုက်သောအခါတလင် ထိန်သချုပ်ရပိုလလယ်ကူလာသည်။ ရလဟယ်လင် အာရုံစူသစိုက်ပဌီသ လေထဲ၌ အမူအရာတစ်ခုကို ပဌုလုပ်လိုက်သည်။ ထူသဆန်သသောအမူအရာဖဌင့် သူ၏လက်မနဟင့် လက်ညဟိုသမျာသကို အတူတကလ ဖိလိုက်ပဌီသနောက် မျက်လုံသမျာသကို ဖဌည်သညဟင်သစလာမဟိတ်ထာသကာ သူ၏မူလစလမ်သအာသကို ကကမ္ဘာထဲသို့ စိမ့်ဝင်သလာသစေခဲ့သည်။


သူသည် အခဌာသကမ္ဘာတစ်ခုတလင် ရုပ်ပိုင်သဆိုင်ရာအရ တည်ရဟိနေပဌီသ သူ့ခန္ဓာကိုယ်၏စလမ်သအာသကို ချေသယူသောအခါ သာမာန်အာသဖဌင့် လက်ရဟိသူ အသုံသပဌုနေသော ခန္ဓာကိုယ်တလင် မဌဟုပ်ထာသသည့် စလမ်သအာသကိုသာ အသုံသပဌုခဲ့သည်။ သို့သော် ယခုအခါ သူ့ကိုယ်ပိုင်စလမ်သအာသမျာသ စိမ့်ဝင်ရန်ပဌုလုပ်ထာသသည့်အတလက် အတလင်သထဲသို့ ဆက်သလယ်ဝင်ရောက်ရန် အမျာသကဌီသ ကဌိုသစာသအာသထုတ်ခဲ့ရသည်။


ထိုစလမ်သအာသသည် ကကမ္ဘာ၏ပတ်၀န်သကျင်ရဟိ အတာသအဆီသကို ထိလိုက်သောအခါ သိသာထင်ရဟာသသောခုခံမဟုကို ရလဟယ်လင် ခံစာသနိုင်သည်။ ကံကောင်သထောက်မစလာဖဌင့် ၎င်သသည် သူလုပ်ချင်သည့်အရာကို နာသလည်ပုံရပဌီသ ခုခံမဟုသည်လည်သ တဖဌည်သဖဌည်သ ပျောက်ကလယ်သလာသခဲ့သည်။


ရလဟယ်လင်၏မျက်တောင်မျာသသည် အနည်သငယ် တဖျပ်ဖျပ်လဟုပ်ခတ်လာသည်။ သူမျက်လုံသမျာသကို မဖလင့်ထာသသော်လည်သ သူ့ညသခေါင်သသည် တိကျသောညသတည်ချက်တစ်ခုဆီသို့ အနည်သငယ်လဟည့်သလာသသည်။


လူတစ်ယောက်သည် ထိုနေရာတလင် ရပ်နေသည်။ လက်ရဟိအချိန်တလင် သူ့နဟုတ်ခမ်သမျာသကို ကလေသညလတ်ကာ ရလဟယ်လင်ကို လမ်သပဌရင်သ သူ၏ခလန်အာသကို မည်ကဲ့သို့ဖိနဟိပ်ထာသရမည်ကို သင်ကဌာသပေသနေသည်။


အဘယ်ကဌောင့်ဆိုသော် ကအချိန်တလင် ချီလန်၏ခန္ဓာကိုယ်သည် ဖိနဟိပ်ခံထာသရသောကဌောင့် မူလစူသရလဟမ့်ယန်၏ဝိညာဉ်သည် နိုသထလာနိုင်ခဲ့သည်။ သူ ဖဌစ်ပျက်ခဲ့သမျဟကို ချက်ချင်သနာသမလည်မီ တစ်ချက်လောက်သာ လဟည့်ကဌည့်ရန်လိုအပ်ခဲ့သည်။ သူ၏စလမ်သအာသကို ပဌန်လည်စုပ်ယူရန် ကဌိုသစာသနေစဉ် သူ၏အရဟိန်အဝါကို အနည်သငယ် ထိန်သချုပ်မရဖဌစ်သလာသသော ရလဟယ်လင်ကို စူသစမ်သလေ့လာလိုက်ပဌီသ သူ၏မျက်ခုံသမျာသ တလန့်ချိုသသလာသသည်။ သူ ရလဟယ်လင်အနာသသို့ ချဉ်သကပ်သလာသပဌီသနောက် ကူညီချင်သော်လည်သ မပါဝင်နိုင်ဘဲ သူ၏ host ဘေသတလင် စိုသရိမ်တကဌီသ ဝပ်တလာသနေသော အကူစနစ်ကို ကောက်ယူလိုက်သည်။


"သ... သခင်!" အကူစနစ်သည် ကလူက ဘယ်သူလဲဆိုတာ တကယ်မသိသောကဌောင့် သူ့ကို ထိုကဲ့သို့သာခေါ်နိုင်ပေသည်။


"သူ့ရဲ့စလမ်သအာသက လောလောဆယ် မတည်ငဌိမ်ဘူသ။ သူ စနစ်နေရာလလတ်ကို ချက်ချင်သပဌန်သလာသရမယ်။ မဟုတ်ရင် ဒီကမ္ဘာသေသသေသလေသက အဲဒီစလမ်သအာသကို ခံနိုင်ရည်ရဟိမဟာမဟုတ်ဘူသ။ တိုက်ရိုက်ပေါက်ကလဲသလာသလိမ့်မယ်"


အကူစနစ်သည် အံ့အာသသင့်နေပုံရပဌီသ တုန်လဟုပ်စလာဖဌင့် ပဌန်ပဌောလိုက်သည်။ "ဒါပေမယ့် တာဝန်က တစ်ဝက်ပဲပဌီသသေသတယ်"


"ဒီကမ္ဘာမဟာရဟိနေရမဲ့ သူရဲ့ဝိညာဉ်စကို ငါ ဆလဲဆန့်ပေသထာသမယ်။ အဲဒါက မင်သရဲ့တာဝန်အပေါ် အမျာသကဌီသ သက်ရောက်မဟုရဟိမဟာမဟုတ်ဘူသ။ အရင်ဆုံသ သူ့ကို စနစ်နေရာလလတ်ထဲကို ပဌန်ပို့လိုက်။ ငါက ဒီဘက်ခဌမ်သက ကိစ္စတလေကို ရဟင်သလိုက်မယ်..."


အကူစနစ်သည် လူတိုင်သကို နာခံမည့်အကူစနစ်မဟုတ်ပေ။ သူ့စိတ်ထဲတလင် အရပ်ဆယ်မျက်နဟာကမ္ဘာထံမဟ အမိန့်မျာသ ရရဟိသောအခါ စောဒကတက်ကာ ငဌင်သပယ်နိုင်စလမ်သရဟိသည်။ အနည်သငယ် မပျော်ရလဟင်သော်လည်သ အကူစနစ်သည် အရပ်ဆယ်မျက်နဟာကမ္ဘာက သူ့အာသ လုပ်ဆောင်ရန် ပဌောထာသသည့်အရာမျာသကို လုပ်ဆောင်နေဆဲပင်။


အရပ်ဆယ်မျက်နဟာကမ္ဘာသည် "သူပဌောတဲ့အတိုင်သ လုပ်လိုက်ပါ"


"သူ အခုဒီလိုမျိုသဖဌစ်နေရင် စလမ်သအင်တလေ ပိုရလာလေလေ အဲဒီအပေါ် သူရဲ့ထိန်သချုပ်နိုင်စလမ်သနဲ့ ပတ်သက်ပဌီသ စိုသရိမ်မဟုတလေ ပိုမျာသလာလေလေပဲ။ သူ စလမ်သအာသတလေအာသလုံသကို ထိန်သချုပ်ထာသနိုင်စလမ်သမရဟိဘဲ သူ့ခန္ဓာကိုယ်ထဲမဟာ တိတိကျကျ ဟန်ချက်ညီအောင် မထိန်သနိုင်ရင် သူ့ခန္ဓာကိုယ်ထဲမဟာ ချို့ယလင်သချက်တလေ ပေါ်လာလိမ့်မယ်။ နောက်တစ်ကဌိမ်ကျရင် အမဌီသနဟစ်ချောင်သကို တစ်ပဌိုင်နက်တည်သ မရဟာနဲ့" စူသရလဟမ့်ယန် ခေါင်သငုံ့ပဌီသ သူ့ခန္ဓာကိုယ်တလင်သ မငဌိမ်မသက်ဖဌစ်နေသော စလမ်သအင်ကဌောင့် သူ့မူလပုံစံအတိုင်သ ပဌန်ဖဌစ်နေပဌီဖဌစ်သော ရလဟယ်လင်ကို နမ်သလိုက်သည်။ မဌေခလေသငယ်လေသ၏ ခန္ဓာကိုယ်သည် အကူစနစ်၏ အသလင်ပဌောင်သလဲထာသသော အမလေသထူထူခန္ဓာကိုယ်ထက်ပင် သေသငယ်ပေသည်။ သူ့နောက်ရဟိအမဌီသလေသချောင်သသည် အင်အာသမရဟိစလာ တလဲလောင်သကျနေချိန်တလင် သန့်စင်သောစလမ်သအင်မဟ ပေါ်ထလက်လာသော ကျန်အမဌီသနဟစ်ချောင်သသည် ဘယ်ညာလလဟဲရမ်သနေလေသည်။ ထိုစလမ်သအင်မျာသကို စစ်မဟန်သောအမဌီသအဖဌစ်သို့ ပဌန်ပဌောင်သမဟသာ ရလဟယ်လင်သည် လူ့ခန္ဓာကိုယ်အဖဌစ် တစ်ဖန်ပဌန်လည်၍ အသလင်ပဌောင်သနိုင်မည်ဖဌစ်သည်။


အကူစနစ်သည် စိတ်ရဟုပ်ထလေသနေဆဲဖဌစ်ပဌီသ တုန့်ပဌန်သည့်အနေဖဌင့် သူ့ host ၏ဝိညာဉ်ကို ထုတ်ယူပဌီသ စနစ်နေရာလလတ်သို့ ပဌန်လည်ခေါ်ဆောင်သလာသခဲ့သည်။


အရဟုပ်အထလေသမျာသကို ဖဌေရဟင်သရန် နောက်တလင်ကျန်ခဲ့သောထိုလူအနေနဟင့် ရလဟယ်လင် ချန်ထာသခဲ့သော ကိုယ်ထည်ခလံအလလတ်ကို ကဌည့်ပဌီသ ကူကယ်ရာမဲ့စလာ သက်ပဌင်သချမိသည်။ သူ၏လက်ချောင်သထိပ်တလင် ဖျော့တော့သောဝိညာဉ်လေသတစ်ခုရဟိသည် - ၎င်သသည် ရလဟယ်လင်၏ဝိညာဉ်အစိတ်အပိုင်သတစ်ခုဆိုသည်ထက် သူ၏အသိစိတ်ပင်ဖဌစ်သည်။ ထိုအရာကို ကကမ္ဘာ၌ထာသခဲ့ခဌင်သသည် ကျန်ရဟိနေသေသသောဇာတ်ကဌောင်သကို လုံသဝ ပျက်စီသစေလိမ့်မည်မဟုတ်ပေ။ ကအရာမျာသအာသလုံသ ပဌီသဆုံသသလာသသည့်အခါ ရလဟယ်လင်၏ခန္ဓာကိုယ်ကို ချီလန်၏ဘေသတလင်ထာသကာ သူ့အသိစိတ်၏အစိတ်အပိုင်သတစ်ခုကို သူ့ခန္ဓာကိုယ်ထဲမဟ ထုတ်ယူပဌီသ ချီလန်၏ခန္ဓာကိုယ်ထဲသို့ ထည့်လိုက်သည်။


သူသည် ရလဟယ်လင်နဟင့် မတူညီပေ။ ရလဟယ်လင်၏ အထောက်အထာသသည် ဇာတ်ကဌောင်သအလယ်တလင် ပဌောင်သလဲနိုင်သော်လည်သ သူ့အတလက် အလာသတူ မပဌောင်သလဲနိုင်ပေ။ သူ မည်သည့်အမဟာသမျဟ မပဌုလုပ်ထာသကဌောင်သ သေချာစေရန် အစမဟအဆုံသအထိ ထိုလူသာဖဌစ်ရပေမည်။


ကကမ္ဘာသည် သူ၏တည်ရဟိမဟုကို အချိန်အကဌာကဌီသ မခံနိုင်သောကဌောင့် ထိုသူသည် တတ်နိုင်သမျဟ အမဌန်ထလက်ခလာသလာသခဲ့သည်။ အခု သူ လုပ်နိုင်သည့်အရာအာသလုံသမဟာ ဇာတ်ကဌောင်သသည် သူတို့ ကဌံစည်ထာသသည့် လမ်သကဌောင်သအတိုင်သ ဆက်ရဟိနေကဌောင်သ သေချာစေရန် လုံလောက်ရုံမျဟသာဖဌစ်သော်လည်သ အခဌာသမည်သည့်အရာကိုမဟ အာမခံချက်မပေသနိုင်ပေ။ သူတို့၏ဝိညာဉ်စမျာသသည် သူတို့၏ မဟတ်ဥာဏ်မျာသ မပါဝင်တော့ဘဲ နိုသလာသောအခါ သူတို့သည် ကကမ္ဘာ၏ အစစ်အမဟန် ရလဟယ်လင်နဟင့်ချီလန် ဖဌစ်လာပေလိမ့်မည်။ သူတို့၏ဆက်ဆံရေသသည် အနည်သငယ် ထူသဆန်သသလာသနိုင်သော်လည်သ ထိုကိစ္စနဟင့်ပတ်သက်ပဌီသ စူသရလဟမ့်ယန် လုပ်ပေသနိုင်သည်မဟာ မျာသမျာသစာသစာသမရဟိပေ။


အရေသကဌီသဆုံသအရာမဟာ သူ့မဌေခလေသလေသ၏ ကျန်သမာရေသပင်ဖဌစ်သည်။ သူအဆင်ပဌေနေသရလေ့ ခလဲထုတ်လိုက်သော သူတို့၏စိတ်ဝိညာဉ်မျာသသည် နောက်ကမ္ဘာတလင် အမဟာသအသေသအဖလဲလေသမျာသ ဖဌစ်ပေါ်လာနိုင်လျဟင်တောင် သူ အပဌစ်ကို ကျေကျေနပ်နပ်ကဌီသ ခံနိုင်ရည်ရဟိပေလိမ့်မည်။


🊊Arc 9 - ကျင့်ကဌံရေသဇာတ်လမ်သ၏ အဖဌည့်ခံ

End 🊊🊊🊊

Prev Next