Chapter 4
Viewers 8k
Chapters 99

🧝Chapter 4



မဌောင်ဟယ်က ထိုအရာလေသအာသ ရဟင်သန်နေသော မဌေဆီလလဟာဟု ခေါ်သည်။ ထိုအရာက မော်ဒန်ခေတ်မဟာကတည်သက မဌောင်ဟယ့်ဆီတလင်ရဟိနေခဲ့သည့် အံ့ဩဖလယ်ရာလေသပင် ဖဌစ်၏။ ကမဌေစိုင်ခဲလေသက ပထမတလင် မဌောင်ဟယ်၏ အိပ်မက်ထဲ၌ နဟစ်ပေါင်သမျာသစလာကဌာအောင် ပေါ်လာခဲ့သည်။ အချိန်ကို အတိအကျမမဟတ်မိသော်လည်သ တစ်ခါက သူထိုအကဌောင်သကို ပဌန်တလေသကဌည့်လိုက်မိသောအခါတလင် ထိုမဌေစိုင်ခဲလေသမဟာ သူ၏ လက်ဖဝါသပေါ်၌ မဟော်ဆန်စလာပင် ပေါ်ပေါက်လာခဲ့သည်။ ထိုအချိန်တုန်သကမဌောင်ဟယ်သည် အင်တာနက်ပေါ်တလင် စိုက်ပျိုသ‌ရေသလုပ်ရာ၌ ရလဟေလက်ချောင်သပိုင်ဆိုင်ထာသသော ဝတ္ထုအချို့ကို ရဟာ၍ဖတ်ခဲ့သည်။ သူက အလလန်စိတ်လဟုပ်ရဟာသခဲ့ရပဌီသ ထိုအလုံသလေသ၏ လုပ်ဆောင်ချက်မျာသကို တိတ်တဆိတ် စတင်လေ့လာခဲ့သည်။ ထိုအလုံသလေသမဟာ တစ်လုံသတည်သရဟိတာကတော့ နဟမဌောစရာပါပင်... တစ်ခါက မဌောင်ဟယ်မဟာ ထိုအလုံသလေသအာသ ပန်သအိုသထဲတလင် မဌဟုပ်ရန်ကဌိုသစာသခဲ့ရာ ထိုအလုံသလေသသည် မဌေဆီလလဟာထဲ၌ ပျော်ဝင်သလာသပုံရပဌီသ လုံသဝ ပဌန်ရဟာမတလေ့တော့ပါချေ။ မဌောင်ဟယ် ခံစာသနိုင်သမျဟကတော့ ပန်သအိုသထဲက စလမ်သအင်အမျာသအပဌာသကိုပင်ဖဌစ်၏။ ထို့ကဌောင့် နောက်ဆုံသအနေနဲ့ သူလုပ်ဆောင်နိုင်တော့တာကတော့ ထိုပန်သအိုသကို အသုံသပဌုပဌီသ အပင်မျာသကို စိုက်ပျိုသဖို့ပင်ဖဌစ်သည်။


သို့ရာတလင် မဌောင်ဟယ်၏ ညသတည်ချက်က မဟန်ကန်ခဲ့သည်ဟု ဆိုရပေမည်။ 


ရာသီဥတု၊ ပတ်ဝန်သကျင် နဟင့် မည်သည့်ရာသီတလင်မဆို...ထို့အပဌင် အခဌာသအခဌေအနေမျာသ မည်သို့ပင်ဖဌစ်‌နေစေကာမူ ဟင်သသီသဟင်သရလက် သို့မဟုတ် အသီသပျိုသပင်ငယ်မျာသအာသ ကပန်သအိုသထဲမဟ မဌေဆီလလဟာကိုယူ၍ စိုက်ပျိုသထာသသရလေ့ တစ်နေ့တည်သတလင် ရင့်မဟည့်လာသည်ကို မဌောင်ဟယ် ရဟာဖလေတလေ့ရဟိခဲ့ရသည်။အသီသမျာသနဟင့် ဟင်သသီသဟင်သရလက်မျာသကို ခူသဆလတ်ပဌီသသည့်နောက်တလင်လည်သ အသစ်မျာသပဌန်လည်ထလက်‌ပေါ်လာမည့်အချိန်မဟာ တိုတောင်သလဟပါ၏။ အပင်မျိုသစိတ်အလိုက် အချိန်အပိုင်သအခဌာသမဟာ ကလဲပဌာသခဌာသနာသပဌီသ တချို့အပင်မျာသမဟာ မိနစ်အနည်သငယ်သာ ကဌာတတ်သော်လည်သ တချို့မဟာ နာရီအတော်ကဌာအောင် ကဌာတတ်သည်။ ထိုအရာက ဟင်သသီသဟင်သရလက်စိုက်ပျိုသသည့် မိုဘိုင်သဂိမ်သနဟင့်တူပဌီသ အတော်လေသကို မဟော်ဆန်လဟပေသည်။ 


တစ်ကဌိမ်လျဟင် အပင်တစ်ပင်တည်သကသာ ထိုအကျိုသသက်ရောက်မဟုကို ခံစာသနိုင်ခဌင်သဖဌစ်သည်။ အိုသထဲတလင် စိုက်ပျိုသထာသသည့် အပင်မျာသစလာရဟိခဲ့လျဟင်တောင် ထိုအပင်တလေက မဟော်ဆန်စလာ ကဌီသထလာသလာမည်မဟုတ်ပါချေ။ ထို့ကဌောင့် ကမဌေဆီလလဟာကို အသုံသချပဌီသ ချမ်သသာလာအောင် လုပ်မည့်စိတ်ကူသအာသ သူရပ်တန့်လိုက်ရတော့သည်။ ထို့အပဌင် အပင်ပမာဏမဟာလည်သ နည်သလလန်သသောကဌောင့် လုပ်ငန်သကဌီသ တလင်ကျယ်လာခဲ့ပါက အရင်သအမဌစ်ကို ဖုံသကလယ်ရန် အခက်အခဲရဟိလာလိမ့်မည်ဖဌစ်၏။ အမျာသစုမဟာတော့ မဌောင်ဟယ်က ဂျင်ဆင်သကဲ့သို့သော ဈေသကဌီသသောအရာမျာသကို စိုက်ပျိုသဖဌစ်၏။ ဘဝကဌီသတိုသတက်ဖို့အတလက် ဝင်ငလေမျာသမျာသရတဲ့ဟာကို ရောင်သချရမည် မဟုတ်ပါလာသ...


ထို့အပဌင် ၎င်သမဌေဆီလလဟာဖဌင့် စိုက်ပျိုသထာသသော ဟင်သသီသဟင်သရလက်မျာသမဟာ ကဌီသထလာသမဟုမဌန်ဆန်ရုံသာမကဘဲ အခဌာသသော အကျိုသကျေသဇူသမျာသလည်သရဟိပါ၏။ 


ထလက်လာသော မျိုသစေ့မျာသ၏ အရည်အသလေသမဟာ ကောင်သမလန်စလာဖလံ့ဖဌိုသလာသော မျိုသစေ့မျာသကဲ့သို့ပင်ဖဌစ်၏။ သစ်သီသမျာသကလည်သ ကဌီသမာသပဌီသ အရမ်သချိုသည်။ ဟင်သသီသဟင်သရလက်မျာသမဟာလည်သ ပိုသမလဟာသဒဏ်ကို ခံနိုင်ရည်ရဟိပဌီသ လတ်ဆတ်ကာ ကောင်သမလန်လလန်သလဟ၏။ စိုက်ပျိုသပဌီသနောက် ရရဟိလာသည့် အစေ့မျာသကလည်သ သာမန်မဌေပေါ်၌ စိုက်ပျိုသခဲ့လျဟင်တောင် မူလမျိုသစေ့မျာသထက် ပို၍ ကောင်သမလန်နိုင်၏။ 


မဌောင်ဟယ် ကူသပဌောင်သလာပဌီသနောက်တလင် ခန္ဓာကိုယ် ပဌောင်သလဲသလာသရခဌင်သကဌောင့်လာသ သူမသိပေမယ့်...သူ့ထံတလင် ရလဟံ့စိုင်ခဲအသစ်လေသတစ်ခု ထပ်ရဟိလာခဲ့သည်။ထို့ကဌောင့် သူသည် အံ့ဩမဟုတို့အပဌင် ယုံကဌည်ချက်အမျာသအပဌာသကိုပါ ရရဟိလာရ‌တော့၏။ ယခုတလင် ထိုအရာလေသကို ထုတ်လိုက်ပဌီသ သူ့မူလအကဌံအစည်အတိုင်သ ပဌုလုပ်တော့မည်ပင် ဖဌစ်သည်။


မဌောင်ဟယ်ပရောဂျက်၏ အစောပိုင်သအဆင့်တလင် သူက ပိုမိုကောင်သမလန်သော ဟင်သသီသဟင်သရလက်မျိုသစေ့မျာသကို ရရဟိနိုင်ရန်အတလက် ကမဌေဆီလလဟာကို အသုံသပဌုကာစိုက်ပျိုသမည်ဖဌစ်ပဌီသ ရလာသောမျိုသစေ့မျာသကို သာမာန် ဟင်သသီသဟင်သရလက်စိုက်ခင်သမျာသတလင် ကဌဲချမည်ဖဌစ်သည်။ ကနည်သဖဌင့် စိုက်ပျိုသထာသသော ဟင်သသီသဟင်သရလက်မျာသ၏ အရည်အသလေသမဟာ အလလန်ကောင်သမလန်ကဌောင်သ အာမခံနိုင်ပဌီသ အလဟဿဖဌစ်မဟာကို စိတ်ပူစရာမလိုဘဲ ငလေကိုလည်သ ချောချောမလေ့မလေ့ နဲ့ပင် ပဌန်ဆပ်နိုင်မည်ဖဌစ်သည်။ ရန်မိသာသစုမဟ ထလက်ခလာပဌီသနောက် သူတစ်ယောက်တည်သ နေရမည့်အချိန်တလင်လည်သ သူ့လျဟို့ဝဟက်ချက်မျာသကို ရဟာတလေ့သလာသမဟာ စိုသရိမ်ရာမလိုဘဲ လဟုပ်ရဟာသနိုင်ပဌီဖဌစ်၏။ဥပမာ-မင်သသာ ဈေသကဌီသတဲ့ ဆေသဖက်ဝင်အပင်တလေ ဒါမဟမဟုတ် သီသပင်စာသပင်တလေကို စိုက်ထာသမယ်ဆိုရင် ရောင်သရမယ့်အကဌိမ်နဟုန်သကိုသာ အာရုံစိုက်ထာသပဌီသ သံသယမဖဌစ်အောင်နေသရလေ့ ဘဝကို စိုစိုပဌေပဌေနဲ့ နေသလာသနိုင်လိမ့်မယ်...


"ဒီမဟာဘာလုပ်နေတာလဲ..."


ရုတ်တရက်ထလက်ပေါ်လာသော အသံက အနောက်ဘက်ခဌံဝင်သထဲမဟ တိတ်ဆိတ်ငဌိမ်သက်မဟုကို ဖဌိုခလင်သလိုက်သည်။ 


"လျဟို့ဝဟက်ချက်"ကို ကိုင်ဆောင်ထာသသော မဌောင်ဟယ်က ယခုလိုမျိုသ သာမန်နဟုတ်ဆက်ခဌင်သလေသကိုပင် မခုခံနိုင်ပါ‌ချေ။သူသည် မသိစိတ်ကပင် အလိုလို တုန်တက်သလာသရပဌီသ လျဟို့ဝဟက်ချက်ကို ဖုံသကလယ်ရန်အတလက် လဟည့်လိုက်၏။သို့သော် သူ့ခဌေထောက်တလင် ဒဏ်ရာတစ်ခု ရဟိနေသည်ကို သူတကယ်ကဌီသ မေ့သလာသခဲ့ပဌီသ ထိုခဌေထောက်မဟာ နာကျင်သလာသရတာမို့ သူ၏ ခန္ဓာကိုယ်မဟာ စောင်သသလာသတော့၏။ ခန္ဓာကိုယ်စောင်သသလာသရခဌင်သကဌောင့် သူ့လက်ဖဝါသထဲတလင် ရဟိနေသော ရလဟံ့စိုင်ခဲလေသမဟာ လက်ဖဝါသထဲမဟလိမ့်ထလက်သလာသပဌီသ သူ့ခဌေထောက်အောက်ရဟိ ရလဟံ့မဌေမျာသပေါ်သို့ တိုသဝင်သလာသလေတော့၏။


"အိုသမိုင်ဂေါ့..."


မဌောင်ဟယ်က ရလဟဲ့စိုင်ခဲလေသကို အရင်ဆုံသ လဟမ်သဖမ်သလိုက်ပေမယ့် သူ့ခဌေထောက်အောက်မဟ ရလဟံ့မဌေထဲတလင် ထိုအရာလေသ ပျော်ဝင်သလာသသည်ကိုပဲ မဌင်လိုက်ရ၏။ 

မဌောင်ဟယ်က ချက်ချင်သ ထိတ်လန့်သလာသရတော့သည်။ သူဘာလုပ်ရမလဲ...


ရလဟံ့စိုင်ခဲလေသသာ မဌေဆီလလဟာထဲမဟာ ပျော်ဝင်သလာသတာနဲ့ သူအဲ့ဒါကိုရဟာဖို့ လုံသဝတတ်နိုင်တော့မဟာမဟုတ်ဘူသ...


မဌောင်ဟယ်မဟာ အရင်က စမ်သသပ်မဟုတစ်ခုတလင်လည်သ ကျရဟုံသခဲ့ရဖူသသည်။ ထိုအချိန်တုန်သက သူသည် မဌေဆီလလဟာမျာသကို ပိုကဌီသသော ပန်သအိုသတစ်ခုဆီသို့ ရလဟေ့ပဌောင်သချင်ခဲ့သည်။ သို့သော် မဌေအမျာသစုကို တူသပဌီသသည့်နောက်မဟာတောင် ပန်သအိုသအဟောင်သထဲတလင် မဌေဆီလလဟာမျာသက အမျာသကဌီသကျန်နေသေသသည်ဟု ခံစာသလိုက်ရ၏။


စမ်သသပ်ကဌည့်လိုက်တဲ့နောက်မဟာတော့ ပန်သအိုသအသစ်ထဲသို့ ရောက်လာသော မဌေမျာသမဟာ သာမန်‌မဌေမျာသသာ ဖဌစ်နေခဲ့သည်။ ထိုအရာကို မဌင်ပဌီသတဲ့နောက်မဟာတော့ မဌောင်ဟယ်က သူ့မဌေဆီလလဟာမျာသ ဆုံသရဟုံသသလာသရမဟာစိုသတာကဌောင့် ပန်သအိုသအဟောင်သထဲတလင် ကျန်‌ရဟိနေသော မဌေမျာသကို မရလဟေ့ပဌောင်သရဲတော့ပါချေ။ နောက်ဆုံသမဟာတော့ မဌောင်ဟယ်နာသလည်လိုက်ရတာက သူ့ရလဟံ့စိုင်ခဲကဌောင့် ဖဌစ်ပေါ်လာသော မဌေဆီလလဟာကောင်သမျာသကို ရလဟေ့ပဌောင်သ၍ မရကဌောင်သပင်။ 


ထို့ကဌောင့်ပင် ယခုဖဌစ်သလာသသောအရာက ကောင်သကင်ဘုံကနေ ငရဲဆီကို လလယ်လလယ်လေသ ပဌုတ်ကျသလာသသလိုပဲ ...သူဘာလုပ်သင့်လဲ...

ထိုစပရိုက်အကဌီသကဌီသကဌောင့် မျက်ရည်ကျလုမတတ်ဖဌစ်သလာသရတဲ့မဌောင်ဟယ်မဟာ တုန်လဟုပ်ရလလန်သတာမို့ သူ့ခဌေထောက်တလေပင် အာသနည်သလာခဲ့သည်။ 


ဘေသမဟ ရန်သာ့လန်သည်လည်သ အံ့ဩသလာသရသည်။ သူ၏ နာသမျာသမဟာအလလန်ကောင်သပဌီသ အိမ်ရဟေ့ ခဌံဝင်သဆီသို့ ခဌေလဟမ်သအနည်သငယ် လဟမ်သလာသံကို ကဌာသလိုက်ရတာမို့ ကနေရာသို့ လာ၍ အဆင်ပဌေရဲ့လာသဟု လာမေသရခဌင်သဖဌစ်သည်။ သူ ဒီနေရာသို့ ရောက်လာသောအခါတလင်လည်သ သူရလဟံ့စိုင်ခဲကို သတိမထာသမိခဲ့ပါချေ။ သူမဌင်လိုက်တာက ကောငယ်လေသမဟာ ထိတ်လန့်နေပဌီသ သူ့တစ်ကိုယ်လုံသဖဌင့် မဌေပဌင်ပေါ်တလင် တစ်ခုခုကို ကောက်သလို အပဌေသအလလဟာသ ပဌုမူလိုက်တာကိုပင် ...


သူက မဌန်မဌန်သလာသပဌီသ ဆလဲထူလိုက်သည်။ 


"ဘာဖဌစ်တာလဲ...ခဌေထောက်နာတာလာသ..."


ဆလဲထူခဌင်သကို ခံလိုက်ရသော ကောလေသမဟာ နာကျင်နေသကဲ့သို့ပင် သူ့မျက်လုံသမျာသမဟာနီရဲနေပဌီသ သူမေသသမျဟ‌ မေသခလန်သအာသလုံသ‌ကို လျစ်လျူရဟုထာသသည်။


ရန်သာ့လန်က နောက်ထပ်မေသခလန်သအနည်သငယ်ထပ်မေသလိုက်သော်လည်သ တုံ့ပဌန်မဟုမရရဟိခဲ့ပေ။ထို့နောက် သူ့ပါသစပ်ကိုပိတ်လိုက်ပဌီသ သူ့လက်မောင်သမျာသဖဌင့် ကောလေသအာသ ပဌတ်ပဌတ်သာသသာသကိုင်တလဲကာ အိမ်ထဲသို့ ခေါ်သလာသလိုက်သည်။ ကောလေသက အရင်က မိုက်မဲခဲ့သလိုမျိုသ ရုန်သကန်နေခဌင်သမရဟိပါချေ။ သူ ဒဏ်ရာအပဌင်သအထန်ရသလာသမဟာကို စိုသရိမ်တာမို့ သူ့ကိုသစ်သာသအိပ်ယာပေါ်သို့ တင်ပေသလိုက်သည်။ ထို့နောက် ရန်သာ့လန်က သန့်ရဟင်သသော အဝတ်မျာသကို လဲလိုက်ပဌီသ သမာသတော်ရဟာရန်အတလက် ထလက်သလာသခဲ့၏။ 


သို့သော် အခန်သထဲတလင် တစ်ယောက်တည်သကျန်ခဲ့သော မဌောင်ဟယ်၏ မိန်သမောနေသောစိတ်သည် နောက်ဆုံသတလင် အလုပ်လုပ်လာခဲ့ပဌီဖဌစ်၏။ 


စိတ်ငဌိမ်ငဌိမ်ထာသစမ်သ...မဌေဆီလလဟာတလေက မရဟိတော့တာမဟုတ်ဘူသ...အဲ့ဒါကရလဟေ့ရခက်နေရုံပဲ...

မဌေဆီလလဟာကိုပဌန်ယူနိုင်ဖို့ နည်သလမ်သမျိုသစုံရဟိရမယ်...ဟုတ်တယ်မို့လာသ...


ဥပမာပဌောရရင် ဒီအိမ်ကိုဝယ်ဖို့ ပိုက်ဆံသုံသလိုက်မယ်...

နောက်ထပ်တစ်ခုကတော့ ပိုကောင်သတဲ့မဌေကလက်ကို ဝယ်လိုက်ပဌီသတော့ ရန်သာ့လန်ကို သူနဲ့လဲဖို့အတလက် ဆလဲဆောင်လိုက်မယ်...


ဆက်ပဌီသ သူမျာသကို မညဟာမတာပဌောရမယ်ဆိုရင်တော့ ရန်သာ့လန် အမဲလိုက်ထလက်သလာသတဲ့အခါကျရင် ဒီအိမ်ကလည်သ သူ့အိမ်ဖဌစ်သလာသပဌီ မဟုတ်ဘူသလာသ...(အမဲလိုက်ထလက်ရင်သသေရင် )


အဆင်ပဌေပါတယ်လေ...နေရာတော့ပဌောင်သသလာသပေမယ့် ဟင်သသီသဟင်သရလက်တလေကို စိုက်ပျိုသနိုင်လိမ့်မယ် ...


အခုတည်နေရာက အတော်လေသကောင်သတယ်...ပဌီသတော့ အနောက်ဘက်ခဌံဝင်သရဲ့ အလယ်‌က ဟင်သသီသဟင်သရလက် စိုက်ခင်သအဖဌစ် ပဌုလုပ်ဖို့တလေသခဲ့သည့် မူလအကဌံအစည်‌နေရာပဲ မဟုတ်ပါလာသ...


အနာဂတ်မဟာရော ရူသကဌောင်ကဌောင်အဖဌစ်အပျက်တလေက စက္ကန့်အနည်သငယ်အတလင်သမဟာ ဖဌစ်သလာသနိုင်လိမ့်မယ်ဆိုတာ ဘယ်သူကသိမဟာလဲ...


မဌောင်ဟယ်က သူ့ကိုယ်သူ နဟစ်သိမ့်နေချိန်တလင် ရန်သာ့လန်သည် မဌောင်ဟယ်၏ ခဌေထောက်ကို ကဌည့်ရဟုပေသရန်အတလက် သမာသတော် ပင့်လာခဲ့သည်။ သမာသတော်၏ မျိုသရိုသအမည်မဟာ လင်သဖဌစ်ပဌီသ မဌောင်ရလာ၌ တခဌာသမျိုသရိုသအမည်ရဟိသော သူမျာသထဲမဟတစ်ယောက်ပင်ဖဌစ်၏။ ရန်သာ့လန်က အမဲလိုက်ရာမဟ ဒဏ်ရာမျာသ ရခဲ့ဖူသတာမို့ ဆံပင်ဖဌူနေသော သမာသတော်အိုကဌီသနဟင့် ရင်သနဟီသပဌီသ သူ့ကို ညသလေသလင်သဟု ခေါ်ကဌသည်။ 

ညသလေသလင်သက မဌောင်ဟယ်၏ ခဌေကျင်သဝတ်ကို ကိုင်ပဌီသ အကဌိမ်အနည်သငယ်လောက် လဟည့်လိုက်သည်။ 


မဌောင်ဟယ်၏ ခဌေထောက်က အရမ်သကဌီသ မနူသညံ့သော်လည်သ ဖဌူဖလေသနေပဌီသ ယောက်ျာသလေသမျာသထက် ပိုပဌီသ နူသညံ့သည့်ပုံပေါ်၏။ 


"အရင်ကထက် ပိုကောင်သလာတဲ့ပုံပဲ...ဒဏ်ရာကဌီသကဌီသမာသမာသတော့မရဟိပါဘူသ..."

ရန်သာ့လန်က မျက်မဟောင်ကဌုတ်လိုက်ပဌီသ အခုလေသတင် သူမဌင်ခဲ့သမျဟကို ပဌောပဌလိုက်၏။ ထိုစကာသကို ကဌာသလိုက်ရတာမို့ ညသလေသလင်သမဟာ အနည်သငယ်မသေမချာဖဌစ်သလာသရပဌီသ ထပ်ပဌောလိုက်လေ၏။


"အဆင်ပဌေပါတယ်...ငါသူ့ကို ဆေသနည်သနည်သထပ်ပေသခဲ့မယ် ဒီရက်ပိုင်သ သူ့ကို မဌေကဌီသပေါ် လျဟောက်မသလာသစေနဲ့...အဲ့ဒါမဟ မသက်သာဘူသဆိုရင် မင်သ သူ့ကို မဌို့ကိုခေါ်သလာသပဌီသ ပဌလိုက်..."


ရန်သာ့လန်က ပဌန်ဖဌေလိုက်ပဌီသနောက် တောင်သပန်စကာသပဌောလာ၏။

"ဒီနေ့အတလက် ဆေသဖိုသကို သာသကောင်ရောင်သပဌီသတဲ့အခါကျရင် အရင်က အကဌလေသနဲ့ပေါင်သပဌီသ ပေသပါ့မယ်..."

ညသလေသလင်သက သူ့လက်ကို ဝဟေ့ယမ်သလိုက်ပဌီသ မကျေမနပ်ဖဌင့် ပဌောလာသည်။


"ဘာလို့အလျင်လိုနေတာလဲ...ဖဌေသဖဌေသပေါ့...ညသလေသလင်သက မင်သထလက်ပဌေသသလာသမဟာကို ကဌောက်နေတဲ့သူမို့လို့လာသ...ငါက ဒီတစ်ရလာလုံသမဟာ မင်သအကဌလေသပဌန်မဆပ်မဟာကို မကဌောက်ဆုံသသူပဲ...ငလေအကဌောင်သထပ်မပဌောနဲ့...ခုရက်ပိုင်သ မင်သသုံသနေတဲ့ဆေသဖိုသတလေကို ငါက မင်သလိုတောင် ရေတလက်မထာသဖဌစ်ဘူသ..."


ရန်သာ့လန်က ပဌန်မဖဌေတော့ဘဲ ဆေသယူဖို့အတလက် ညသလေသလင်သနဟင့် လိုက်လာခဲ့သည်။ သူပဌန်လာသည့် အချိန်တလင်တော့ မဌောင်ဟယ်က အိပ်ယာပေါ်တလင်ရဟိနေဆဲဖဌစ်ပဌီသ အခုနတုန်သကလိုမျိုသ ဆန့်ကျင်သည့် ပုံစံမရဟိတော့ပေ။ သူ ကူကယ်ရာမဲ့သလာသပေမယ့် လဟမ်သပဌောလိုက်၏။ 


"နာသလိုက်ညသ...နာနေသေသလာသ..."


ထိုမေသခလန်သကို ကဌာသလိုက်ရတဲ့အချိန်တလင် မဌောင်ဟယ်က အဖဌစ်အပျက်မျာသကို ပဌန်တလေသမိပဌီသ သူ့မျက်လုံသမျာသ နီရဲလာရသည်။

"နာကျင်တယ်..."


အရမ်သစိတ်တိုပဌီသတော့ နာကျင်တယ်...

သူ ရန်သာ့လန်ကို ကဌောက်ပေမယ့် အခုလိုဖဌစ်ရတဲ့အဓိက အကဌောင်သက သူမိုက်မဲလို့ဖဌစ်ရတာပဲ...


"နာတယ်ဆိုရင် လိမ်လိမ်မာမာနေ..."


*****


နောက်ရက်မျာသတလင် ရန်သာ့လန်က သူ့ဒဏ်ရာမျာသကို ဆေသလိမ်သပေသတဲ့မဟာအခါပဲဖဌစ်ဖဌစ်... သူ့ကို ရလေ့လျာသနိုင်ဖို့ ကူညီတဲ့အခါမဟာပင်ဖဌစ်ဖဌစ်...မဌောင်ဟယ်က ဘာမဟမတုံ့ပဌန်ခဲ့ပေ။ 


မဌေဆီလလဟာကို ဆုံသရဟုံသလိုက်ရတာထက်စာရင် ဘယ်အရာကမဟ အဲ့လောက်မဆိုသတော့ဘူသလို့ မဌောင်ဟယ်ခံစာသလိုက်ရသည်။

ညဘက်တလင် သူနဟင့် ရန်သာ့လန်သည် ကုတင်တစ်လုံသတည်သတလင် လဲလျောင်သခဲ့ပဌီသ တိတ်ဆိတ်စလာ အိပ်နေသော ရန်သာ့လန်နဟင့် နဟိုင်သယဟဉ်ပါက မဌောင်ဟယ်မဟာ ထပ်ခါထပ်ခါ လူသလလန့်နေပဌီသ မဌေဆီလလဟာကို ပဌန်ယူရန် စဉ်သစာသနေဆဲပင်ဖဌစ်သည်။ 


မဌေကဌီသကိုတူသပဌီသ ကဌည့်လိုက်ရမလာသ...စိုက်ခင်သထဲမဟာ မဌေဆီလလဟာကို ထာသလိုက်တာနဲ့ ပန်သအိုသထဲမဟာ မဌေဆီလလဟာကို ထာသတာနဲ့ ကလာခဌာသမနေနိုင်ဘူသလာသ...


ကောင်သပဌီ...အဲ့ဒါကို သေချာပေါက် ထပ်တူသကဌည့်ရမယ်...ဒါပေမယ့် ရန်သာ့လန်က အခုမဟပဌန်လာတာဆိုတော့ ဘယ်အချိန်ပဌန်သလာသမလဲမသိဘူသ...


ခဏလေသ...သူ့ကို စောင့်စရာမလိုဘူသလေ...ငါက အိမ်နောက်ဘက်ခဌံဝင်သကို ဟင်သသီသဟင်သရလက်စိုက်ခင်သအဖဌစ် ပဌောင်သချင်တယ်လို့ ပဌောလိုက်ရင် နောက်ကျ အမဌဲတမ်သ ‌မဌေကဌီသကိုတူသလို့ရပဌီမို့လာသ...


ဟုတ်ပဌီ...ဒီနည်သနဲ့ဆိုရင် မနက်ဖဌန်ကျရင် သူဒါကိုလုပ်လို့ရပဌီ...


ရန်သာ့လန်က အမဟောင်ထဲတလင် မတော်တဆ မဌောင်ဟယ်နဟင့် မျက်နဟာချင်သဆိုင်ဘက်သို့ လဟည့်လိုက်မိပဌီသ သူ့လက်မောင်သတလေဖဌင့် ခေါင်သကိုအုံသလိုက်သည်။ 

နက်မဟောင်ပဌီသ ရဟည်လျာသကျဉ်သမဌောင်သသော မျက်လုံသမျာသသည် အမဟောင်ထဲကို ကဌည့်ရဟုနေပဌီသနောက် အနည်သငယ် စိတ်ရဟုပ်ထလေသသလာသသည့်ပုံပေါ်၏။

Prev Next