🦊Arc 11 chapter 161

🦊Arc 11 - ဧကရာဇ်ပလ္လင်ထက်မှ ကောလေး

Chapter 161

11.1 - သူတို့က အခြေအနေချင်းလည်း တူပြီး ဝမ်းနည်းစရာ အဆုံးသတ် ရှိတာချင်းလည်း တူတယ်

ရွှယ်လင်၏ ခြေလှမ်းများ ရပ်တန့်သွား၏။ သူ့ကို ဆွဲခေါ်လာသောလူက စိတ်လှုပ်ရှား ထိတ်လန့်စွာဖြင့် လှည့်ကာ အော်ပြောလိုက်လေသည်။

 "အရှင်... သူပုန်တွေက ကျွန်တော်တို့ကို သတ်ဖို့လာနေပြီ ... ဧကရီကြီးက အစောကြီးတည်းက သူ့လူတွေကို ခေါ်ပြီး ထွက်ပြေးသွားပြီ... အရှင် အခု ထွက်မပြေးရင် အရမ်း နောက်ကျသွားလိမ့်မယ်..."

ရွှယ်လင် : "???"

အကူစနစ်လေးက အေးဆေးတည်ငြိမ်စွာ ပြောလိုက်သည်။

 " host စိတ်လျော့ပါ အရင်ဦးဆုံး ဒီကောင်ကို သတိမေ့အောင် ရိုက်နှက်လိုက်ပြီးမှ ဘာတွေ ဖြစ်နေတယ်ဆိုတာ သိအောင် အေးဆေး ကြည့်ကြမယ်လေ"

ရွှယ်လင် 'အိုး' ဟု အသံပြုလိုက်လေသည်။ ထို့နောက် သူ့နှုတ်ခမ်းများကို တင်းတင်းစေ့ကာ သူ့ရှေ့မှလူကို စိုက်ကြည့်နေလိုက်သည်။ ထိုအကြည့်ကြောင့် သူ ရှေ့မှ မိန်းမစိုးဟု ထင်ရသည့်လူငယ်လေး၏ မျက်နှာက နီရဲသွားလေသည်။ သူက ပြာယာခတ်သွားပြီး အထိတ်တလန့် ထပ်ပြောလိုက်သည်။ 

" အရှင်... ဒီအစေခံက အဓိပ္ပာယ် မရှိတာတွေ ပြောနေတာ မဟုတ်ပါဘူး ကျေးဇူးပြုပြီး စကားနားထောင်ပေးပါ ... အပြင်ဘက်က တိုက်ခိုက်သံတွေကို နန်းတော် အနောက်ဘက်ကတောင် ကြားနေရပြီ ..."

ရွှယ်လင်က ထိုသူနားကို တဖြည်းဖြည်း ချဥ်းကပ်သွားလေသည်။ ထိုသူ၏ ပဟေဠိ ဖြစ်နေသော အကြည့်များ အောက်တွင်ပင် သူ့လက်ကို မြှောက်ကာ ထိုမိန်းမစိုး၏ လည်ဂုတ်ကို ရိုက်ချလိုက်လေသည်။ 

မိန်းမစိုးလေး၏ မျက်နှာတွင် မယုံကြည်နိုင်မှုအပြည့်ဖြင့် သတိလစ်သွားရတော့သည်။ 

ထိုမိန်းမစိုးလေးက သူ့ကို ဘာကြောင့် ထိုကဲ့သို့ ကြည့်နေသည်ကို ရွှယ်လင် မသိပေ။ သို့သော် လက်ရှိ အခြေအနေက အရမ်း တင်းမာနေသည်ကိုတော့ သူ ပြောနိုင်သည်။ ထို့အပြင် သူ့ကို ဒုက္ခပင်လယ်မှ ကယ်တင်နိုင်မည့်သူ့ကိုလည်း သတိလစ်အောင် ပြုလုပ်ခဲ့သေးသည်။ သို့သော် သူက ကံဆိုးသော မူလခန္ဓာကိုယ် ပိုင်ရှင် မဟုတ်တော့ပေ။ သူ့တွင် ပြဿနာကို ဖြေရှင်းရန် နည်းလမ်းများစွာ ရှိပေသည်။

ထို့ကြောင့် သူက လက်ရှိ ပတ်ဝန်းကျင်ကို အေးအေးဆေးဆေး လိုက်ကြည့်ကာ အကဲခတ်လိုက်သည်။ သူ ယခု ရောက်နေသော နေရာမှာ နန်းတော် စာကြည့်ဆောင် ဖြစ်နေသည်ကို တွေ့လိုက်ရသောအခါ အံ့အားသင့်သွားရတော့သည်။ 

မနီးမဝေးတွင် ဧကရာဇ်၏ အလုပ်ကိစ္စများကို ဖြေရှင်းရသည့် စားပွဲတစ်လုံး ရှိနေလေသည်။ ပစ္စည်းများက ဖရိုဖရဲပရမ်းပတာဖြစ်နေသည်။ သို့သော် အပြင်ဘက်တွင်လည်း ရှုပ်ထွေးကာ ဖရိုဖရဲဖြစ်နေသောကြောင့် မည်သူကမျှ ၎င်းတို့ကို ရှင်းလင်းပေးရန် စိတ်ကူးမရှိပေ။ 

အကူစနစ်လေး၏ ညွှန်ကြားချက်အရ ရွှယ်လင်သည် လျှို့ဝှက်အခန်းကို ဖွင့်ကာ ပျောက်ဆုံးနေသော အင်ပါယာကျောက်စိမ်း တံဆိပ်နှင့် ကျားအဆောင်အယောင် တံဆိပ်ကို ထုတ်ယူလိုက်လေသည်။ ၎င်းတို့ကို သူ့ခန္ဓာကိုယ်ထဲသို့ ထည့်ကာ သိမ်းဆည်းလိုက်ပြီးနောက် လက်ရေးလှ၊ ပန်းချီများနှင့် ကျောက်စိမ်းအိုးကို ယူလိုက်ကာ သူ့နေရာလွတ်ထဲသို့ ထည့်လိုက်သည်။ အရေးအကြီးဆုံးအရာမှာ အကူစနစ် ညွှန်ပြသော လိမ်းဆေးဘူးများပင်။ သူတို့က စားပွဲနှင့် မဝေးသော ဗီဒိုထဲတွင် ထည့်သိမ်းထားသည်။ ရွှယ်လင် ၎င်းတို့အားလုံးကို သိမ်းကြုံးယူလိုက်ပြီးနောက် အခန်း တံခါးဖွင့်ကာ အပြင်ကို ကြည့်လိုက်သည်။ 

နန်းတော်က မီးလောင်ကျွမ်းနေပုံပင်။ နေရာတိုင်းတွင် ဆူညံနေကာ အော်ဟစ်သံများ ကြားနေရသည်။ လူအများကြီးက တစ်နေရာထဲတွင် စုစည်းနေပုံပေါ်သည်။ သူပုန်ခေါင်းဆောင်များနှင့် သစ္စာဖောက်များက နန်းတော်ထဲသို့ ရောက်မလာသေးပေ။ ထိုသို့ဆိုလျှင်တောင် အမည်ခံ ဧကရာဇ် ရွှယ်လင်ကမူ လုံးဝ စွန့်ပစ်ခံလိုက်ရလေပြီပင်။ သူ စာကြည့်ဆောင် တံခါးကို ဖွင့်လိုက်ချိန်တွင် တံခါးနားတွင် စောင့်နေသင့်သော စစ်သားများက ရှိမနေတော့ပေ။ 

ရွှယ်လင် 'ကျစ်'ခနဲ စုတ်သတ်လိုက်သည်။ အဓိပ္ပာယ်မှာ သူ့ကို ကူခိုးပေးမည့်သူ မရှိတော့ခြင်းပေ။ သူ လက်ရှိ ဝတ်ထားသော နဂါးဝတ်ရုံကို လဲရန်လည်း အဆင်မပြေသောကြောင့် တံခါးကို ပိတ်ကာ ပြန်လှည့်သွားသည်။ 

အကူစနစ်လေးက နန်းတော်တစ်ခုလုံး၏ မြေပုံကို သူ့အားပြလေသည်။ လူများ မည်သည့်နေရာတွင် စုဝေးနေသည်ကို သူ တွေ့နိုင်ပြီး ဘယ်နေရာတွင် ထွက်ပြေးပုန်းရှောင်နေသည်ကိုလည်း တွေ့နိုင်ပေသည်။ မည်သည့်နေရာတွင် တိုက်ပွဲဖြစ်နေသည်ကိုပင် တွေ့နိုင်သည်။ ထိုအရာ အားလုံးက သူ့ရှေ့တွင် ပြသထားလေသည်။ သူ အလေးမထားသလို တစ်ချက် ကြည့်လိုက်သည်။ အင်ပါယာ စာကြည့်ဆောင်မှ နန်းတော်အပြင်ဘက်အထိ ပေါက်သည့် လျှို့ဝှက်လမ်းကြောင်း တစ်ခု ရှိလေသည်။ ယခင်မင်းဆက်များမှ ဧကရာဇ်များမှာ သေရမည်ကို ကြောက်သောကြောင့် ဖြစ်နိုင်သည်။ ထိုလမ်းကြောင်းကို သေချာဖုံးကွယ်ထားသည်။ သိသိသာသာပင် ၎င်းကို နှစ်ပေါင်းများစွာ ကြာသည်အထိ စွန့်ပစ်ထားခဲ့ပုံရ၏။ အရာအားလုံးကို ရှင်းရှင်းလင်းလင်း မသိရသေးသော်လည်း ၎င်းကို ရှာတွေ့သွားသည့် ရွှယ်လင်အပြင် မည်သူမျှ ၎င်းကို မတွေ့ဖူးသေးသလို ထိုထဲသို့ ဝင်လည်း မဝင်ခဲ့ဖူးပေ။ 

ရွှယ်လင်က မိန်းမစိုးလေး၏ ချိုင်းအောက်တွင် လက်ထည့်ကာ မိန်းမစိုးလေးကို ဂျုံအိတ်ကဲ့သို့ဆွဲကာ လျှို့ဝှက်လမ်းကြောင်းထဲသို့ ခေါ်သွားလေသည်။ 

ထိုလျှို့ဝှက်လမ်းကြောင်းမှာ နှစ်ပေါင်းများစွာ ကြာသည့်တိုင်အောင် အဖွင့်မခံခဲ့ရပေ။ ထို့ကြောင့် ဖုန်မှုန့်များဖြင့် ပြည့်နှက်နေပြီး မည်သည့် အရာကိုမျှ ရှင်းရှင်းလင်းလင်း မမြင်ရပေ။ သို့သော် လေထုကတော့ ကောင်းနေသေးသည်။ အချိန်အတော် ကြာသည်အထိ ပိတ်ထားခံခဲ့ရသော်လည်း အောက်သိုးသိုးနံ့ မထွက်ဘဲ အသက်ရှူလို့ ရနေသေး၏။

မိန်းမစိုးလေးကို လျှို့ဝှက်လမ်းကြောင်းထဲသို့ ပစ်ထည့်လိုက်ပြီးနောက် ရွှယ်လင် အင်ပါယာ စာကြည့်ဆောင် တံခါးကို ထပ်ဖွင့်လိုက်ပြန်သည်။ ထိုနေရာက သူ ခုနက မွေနှောက်ခဲ့သောကြောင့် ဇောက်ထိုးမိုးမျှော် ဖြစ်နေချေသည်။ သူက ထိုင်ခုံအနည်းငယ်ကို ကန်ကြောက်လိုက်ပြီး အခန်းကို မွှေနှောက်ထားရသယောင် လုပ်လိုက်သည်။ ထို့နောက် လှည့်ကာ လျှို့ဝှက်လမ်းကြောင်းကို ဝင်သွားပြီး သူ့နောက်မှ တံခါးကို ပိတ်လိုက်လေ၏။

သူ ထွက်သွားပြီးနောက် စစ်သားတစ်စုက အင်ပါယာ စာကြည့်ဆောင်ထဲသို့ အလျင်စလို ဝင်လာကြလေသည်။ သူတို့ကလည်း အခန်းကို မွှေနှောက် ရှာကြပြီး အသုံးဝင်သည့် မည်သည့် ပစ္စည်း တစ်စုံတစ်ရာကိုမျှ မတွေ့သောအခါ သူတို့က ဒီရေကဲ့သို့ ချက်ချင်း အလျင်စလို ပြန်ထွက်သွားကြပြန်သည်။ 

သူတို့၏ သခင်က တပ်ဖွဲ့ကို လှုပ်ရှားဖို့ အမိန့်ပေးလိုက်သည်။ သူတို့ ဧကရာဇ်ကို ဖမ်းမိသည်ဖြစ်စေ မဖမ်းမိသည် ဖြစ်စေ အရေးမကြီးပေ။ သူတို့ လုပ်ရန် လိုသည်မှာ သူတို့၏ သခင် လိုချင်သော အရာကို ရှာရန်ပင်။ 

ရွှယ်လင် လျှို့ဝှက်လမ်းကြောင်းကို ဝင်လိုက်ပြီးနောက် ဝင်ပေါက်ဘေးရှိ ဗီဒို အတန်းလိုက်ကြီးကို တွေ့လိုက်ရသည်။ အကူစနစ်လေး၏ အကူအညီဖြင့် သူ ဗီဒိုထဲရှိ ဖယောင်းတိုင်များနှင့် မီးခြစ်ဆံများကို တွေ့လိုက်ရသည်။ ဖယောင်းတိုင်ကို ထွန်းညှိလိုက်ပြီးနောက် လက်ကို မျက်နှာရှေ့တွင် မြှောက်ကြည့်လျှင်တောင် မမြင်နိုင်သော အမှောင်ထုက ကွယ်ပျောက်သွားရတော့သည်။ 

သူ မိန်းမစိုးလေးကို ကန်လိုက်ပြီး သတိမေ့နေကြောင်း အတည်ပြုလိုက်လေသည်။ ထို့နောက် သက်ပြင်းချလိုက်ပြီး ဘာတွေဖြစ်နေသည်ကို အကူစနစ်လေးအား ပြောပြခိုင်းလေသည်။

ကမ္ဘာအများကြီးကို ဖြတ်ကျော်လာခဲ့ပြီးနောက် ရွှယ်လင်က သူ ကူးပြောင်းလာသည့် အခါတိုင်း ဖြစ်နေကျ အရေးပေါ် အခြအနေများကို ကျင့်သားရနေပေပြီ။

 သို့သော် ဤကမ္ဘာက စွမ်းရည်များ မှော်ပညာများဖြင့် ပြည့်နှက်နေသော ကမ္ဘာမဟုတ်သည်မှာ ထင်ရှားလေသည်။ ထို့ပြင် သူ ရောက်လာသော မူလကိုယ်က ကြောက်စရာ ကောင်းလောက်အောင် အားနည်းပျော့ညံ့လေသည်။ ခုနက အနည်းငယ် အားထုတ်လိုက်မှုက သူ့ရုပ်ပိုင်းဆိုင်ရာ ခွန်အားများ အားလုံးကို ကုန်ဆုံးသွားစေပုံပေါ်သည်။ ယခု သူ လျှို့ဝှက်လမ်းပေါ်တွင် ထိုင်လိုက်ပြီး အသက်ပြင်းပြင်း ရှူရှိုက်နေရုံသာ တတ်နိုင်သည်။ သူ့တွင် အကူစနစ်လေး၏ အမွှေးကို ဆွဲနှုတ်ရန်ပင် ခွန်အား မကျန်တော့ပေ။ 

လျှို့ဝှက်လမ်းက ညစ်ပတ်လွန်းသောကြောင့် ဖြစ်နိုင်သည် အကူစနစ်လေးက သူ၏ အမွှေးဖြူဖြူလေးများကို အညစ်အကြေးများ မစွန်းထင်းစေချင်သောကြောင့် host နှင့် ဝိညာဥ်ဆက်သွယ်ရေးမှသာ ဆက်သွယ်ရန် ရွေးချယ်လိုက်သည်။ သူက ဤကမ္ဘာ၏ ဇာတ်ကြောင်းကို ရွှယ်လင်အား အလျင်အမြန် ပေးပို့လိုက်သည်။ 

ပထမဆုံးအနေဖြင့် ရွှယ်လင် သူ၏ လက်ရှိခန္ဓာကိုယ်၏ အထောက်အထားကို စစ်ဆေးလိုက်ပြီးနောက် ရယ်လိုက်တော့သည်။ 

အကူစနစ်က သူ့ရှေ့တွင် ဘာကြောင့် ပေါ်မလာရသည်ကို နားလည်သွားသည်။ 

သူ သ-တ်မှာကို ကြောက်နေသောကြောင့်ပင်။

ဤကမ္ဘာမှာ ABO ပုံစံနှင့် ဆင်တူ၏။ မည်သူ ဖန်တီးခဲ့မှန်း မသိသော်လည်း ရွှယ်လင် ယခု ဇာတ်လမ်းမျိုးကို တီထွင်သူတို့၏ ဥာဏ်ကို ချီးကျူးမိသည်။ 

ဤကမ္ဘာတွင် မိန်းမများ မရှိပေ။ ထိုမိန်းမများအစား "ကော"ဟု ခေါ်သော ယောက်ျားများသာ ရှိသည်။ သူတို့က သေးကွေးပြီး သူတို့၏ ခွန်အားက သာမန် ယောက်ျားများထက်ပင် အလွန်အားနည်းသည်။ အတိုချုပ်ပြောရရင် ထိုသူတို့က ချောမောလှပပြီး ကလေးမွေးနိုင်သော ယောက်ျားများပင်။

 ဤကမ္ဘာတွင် ကောများက ဇနီးသည်များ အဖြစ် မွေးဖွားလာကြခြင်းဖြစ်သည်။ သူတို့၏ ကိုယ်ပေါ်တွင် အနီရောင် အမှတ်အသားများ ပါဝင်ကြပြီး ထိုအနီရောင် အမှတ်အသားတို့၏ တောက်ပမှုက သူတို့၏ မျိုးပွားနိုင်သည့် အဆင့်ကို ညွှန်းဆိုလေသည်။ 

အခြေခံအားဖြင့် သူတို့ ကလေးရနိုင် မရနိုင်မှာ အနီရောင် အမှတ်အသားပေါ်တွင် မူတည်သည်။ 

ရွှယ်လင်၏ လက်ရှိ ခန္ဓာကိုယ်မှာ ကောတစ်ယောက် ဖြစ်၏။ သို့သော် သူ ကောဖြစ်သည်ကို သိသူ အနည်းငယ်သာ ရှိသည်။ အကူစနစ်လေး သူ့ကို ယူလာခိုင်းသော လိမ်းဆေးမှာ သူ၏ အနီရောင် အမှတ်အသားကို ဖုန်းကွယ်ရန် မျက်နှာပေါ်တွင် လိမ်းရသော လိမ်းဆေး ဖြစ်သည်။ သူ၏ အနီရောင် အမှတ်အသားမှာ မျက်လုံးထောင့်စွန်းတွင် တည်ရှိသောကြောင့် အလွန် သိသာသည်။ အနီရောင် အမှတ်အသား၏ အရောင်မှာ မှိန်ဖျော့သော်လည်း ၎င်းက သူ ကောတစ်ယောက် ဖြစ်သည်ဆိုသော အထောက်အထားပင်။ 

သို့သော် သူက လူပေါင်းများစွာ၏ အထက်တွင် ဧကရာဇ်အဖြစ် ရပ်တည်နေသူ ဖြစ်ပြီး ယခင် ဧကရာဇ်၏ နန်းသွေးပင်။ သူ့တွင် အားနည်းသော ခန္ဓာကိုယ်နှင့် နာခံတတ်သော စိတ်ထားရှိသော်လည်း ကောင်းကင်ဘုံ၏ သားတော်ဖြစ်ကြောင်း အမိန့်ပါပြီးသားဖြစ်၏။ 

သို့သော်လည်း ၎င်းက ဧကရီကြီး နှစ်ပေါင်းများစွာ ကြာအောင် လျှို့ဝှက် ကြံစည်ထားသည့် အကြံအစည်ပင် ဖြစ်သည်။ သူက ဧကရီကြီးနှင့် သူ့မယ်တော့်မိသားစု၏

ကျားကွက်ရုပ်တစ်ခု သာသာပင်။