MM Story Teller

Chapter 197

Viewers 32k

🦊Arc 13 [စွမ်းအင်ကျောက် လက်မှုပညာရှင်]

Chapter 197

13.4

ဆရာသခင်အမျိုးသမီးကမူ ရွှယ်လင်ကိုဂရုစိုက်ပေးရန် နောက်တွင်ချန်နေခဲ့သည်။ သူမသည် ရွှယ်လင်၏လက်ကိုဆွဲယူကာနှစ်သိမ့်ပေးလာ၏။

"စိတ်မကောင်းမဖြစ်ပါနဲ့..ဒီလိုမိသားစုကနေထွက်လာနိုင်တာကောင်းတယ်..." ရွှယ်လင်၏မျက်နှာပေါ်မှသွေးများကို သန့်စင်လိုက်ပြီဖြစ်သောကြောင့် အမျိုးသမီးသည် သူ့မျက်နှာကို အသေအချာမြင်တွေ့ရပြီဖြစ်သည်၊ အနှီသူသည် အင်မတန်ကြည့်ကောင်းသော်လည်း မျက်လုံးအထိ ဆံပင်ရှည်များဖုံးနေသောကြောင့် သူ့စတိုင်နှင့်သဘောထားမှာ ပုန်းကွယ်နေလေသည်၊ အဝတ်အစားနှင့် လှုပ်ရှားမှုတိုင်းကိုလည်း နှိမ့်ချထား၏။

"မင်းလိုကြည့်ကောင်းတဲ့ဆရာမျိုးကို သဘောကျတဲ့လူတွေ အများကြီးရှိမှာပါ...ငါတို့မင်းအတွက် အကောင်းဆုံးအုပ်ထိန်းသူကိုရှာပေးမယ်..."

ရွှယ်လင်သည် ယခုလေးတင်ပြန်ရလာသောဆွဲကြိုးကိုကိုင်ထားပြီး မျက်ဝန်းများကအုံ့မှိုင်းနေ၏။ လည်ဆွဲနှင့်ပတ်သက်သောအမှတ်တရများကို ပြန်တွေးနေပုံရပြီး အတန်ကြာမှ သူမထံသို့ အာရုံပြန်လည်လာခဲ့သည်။

"ကျွန်တော့်ကိုမစောင့်ရှောက်ကြလည်းရပါတယ်..ကျွန်တော်က နှစ်တွေအကြာကြီး ကိုယ်ဟာကိုယ်ဂရုစိုက်လာခဲ့တာဆိုတော့..ကျွန်တော်နေတတ်နေပါပြီ..."

သူသည်မူလက ရွှေလက်ချောင်းကိုတပါတည်းယူလာပြီး ထိုမိသားစုထံမှ အရင်ထွက်လာရန်စီစဥ်ထားခဲ့သည်၊ ကျန်သည့်ကိစ္စများကို နောက်ပိုင်းမှဖြေရှင်းရန် စီစဥ်ခဲ့သော်လည်း ထိုအိမ်မှအလွယ်လေးထွက်လာနိုင်ခဲ့ပြီး နောက်ထပ်ပြဿနာတစ်ခုဖြင့်ရင်ဆိုင်ရလေပြီ။ သူသည် သူစိမ်းတစ်ယောက်၏အိမ်တွင် နေထိုင်ရနိုင်ပြီး ဟောက်ယွမ်လျန်လက်ထဲမှ ပြန်ရလာခဲ့သည့်လွတ်လပ်မှုက မကြာခင်အခြားလူလက်ထဲသို့ပြန်ရောက်သွားတော့မည်။ ယင်းက ရွှယ်လင်လိုချင်သည့်အရာမဟုတ်သော်ငြား ထိုအခန်းကဏ္ဍများက သည်ကမ္ဘာတွင် လိုက်လုပ်ရမည့်အရာများပင်။

ဤကမ္ဘာမှ ဆရာသခင်များက အသက်နှစ်ဆယ်အရွယ်ရောက်မှသာ အရွယ်ရောက်ပြီဟုသတ်မှတ်နိုင်သည်။ ရွှယ်လင်သည် အရွယ်ရောက်ရန် နှစ်နှစ်ပင်လိုသေးသည် ၎င်းကသူ့အနေဖြင့် နောက်ထပ်လူတစ်ယောက်ထံတွင် သူ၏လွတ်လပ်မှုများကို ပုံအပ်ထားရဦးမည်ဟုဆိုလိုသည်။

မည်သို့ပင်တွေးကြည့်ပါစေ၊ ကောင်းသည့်ကိစ္စမဟုတ်ပေ။

"ဆောရီး..." သူ့လေသံကိုနားထောင်ကြည့်ပါက စာနာရန်မလိုအပ်သည့် ပုံစံပေါ်နေကာ ယခင်က သူကြုံတွေ့ခဲ့ရသည့် နေ့ရက်များအကြောင်းပြောပြရန် ခက်ခဲသွားစေခဲ့သည်။ အမျိုးသမီးမှာ မျက်လုံးများနီရဲနေရင်း ရွှယ်လင်၏လက်ကို ဆုပ်ကိုင်ထားလျက်ဖြင့် ဆက်ပြောလာလေသည်။

"ဒါကဥပဒေပဲလေ..ပြောင်းလို့မှမရတာ..စိတ်အေးအေးထား..တို့ကကြင်နာတတ်ပါတယ်..မင်းကိုဟောက်မိသားစုက ထပ်မနှောင့်ယှက်စေရတော့ပါဘူး..ငါတို့ မင်းရဲ့အုပ်ထိန်းသူရွေးတဲ့အခါ နောက်ခံနဲ့အချက်အလက်တွေကိုသေချာစစ်ဆေးပြီးမှ မင်းကိုအခွင့်အရေးပေးမယ့် အဆင့်အတန်းမြင့်လူကိုရွေးမှာပါ..."

"အုပ်ထိန်းသူတွေကို ဘယ်လိုဆုံးဖြတ်တာလဲ.."

"ပုံမှန်ဆိုရင်တော့...မင်းရဲ့မိဘတွေကနေစတယ်...မင်းလိုအခြေအနေဆိုရင် မင်းအဖေဘက်ကိုမကြည့်တော့ဘူး..မင်းအမေရဲ့အသိုင်းအဝိုင်းဘက်ကိုပဲကြည့်တော့တယ်.."

"ဒါပေမဲ့..ကျွန်တော့်အမေက သေသွားတာကြာပြီလေ..." ရွှယ်လင်က နှုတ်ခမ်းတို့ကိုပြန်စေ့လိုက်၏။

အမျိုးသမီးမှာ စိတ်ဓာတ်ကျကာ ကယ်သူမဲ့နေရလေပြီ။ သူမသည် ရွှယ်လင်၏လက်ကို သူမလက်ထဲတွင် ဆုပ်ကိုင်ရင်းပြောလာ၏။

"သင့်တော်တဲ့အုပ်ထိန်းသူ မတွေ့သေးခင် ငါမင်းကိုအဖွဲ့အစည်းမှာ စောင့်ရှောက်ပေးမယ်လေ..ဖြစ်နိုင်ရင် မင်းအမေအကြောင်းကို ပြောပြ...ပြီးတော့ အဲဒီမိသားစုမှာ မင်းတို့ဘယ်လိုနေခဲ့ရလဲ...ငါတို့တရားမျှတမှုကိုရှာဖွေဖို့ မင်းကိုကူညီမယ်.."

ရွှယ်လင် သူမကိုကြည့်လိုက်သည်။

အမျိုးသမီး၏မျက်ဝန်းများက အားပေးနှစ်သိမ့်မှုတို့ကိုသယ်ဆောင်ထားသည်၊ သူမသည်ကား အတော်လေးငယ်ရွယ်ပုံရသော်လည်း ရွှယ်လင်ထက် အသက်ပိုကြီးနေ၏။ သူမကလက်ဆန့်ကာ ရွှယ်လင်၏ခေါင်းကို ပွတ်သပ်ပေးလာသည်။

"ငါတို့အဖွဲ့အစည်းက အကြီးကြီးတော့မဟုတ်ပေမဲ့ ငါတို့မှာ ကျောထောက်နောက်ခံကောင်းတွေရှိပါတယ်..မင်းစိတ်ချလက်ချနဲ့ ငါတို့ကိုသာအပ်ထားလိုက်...ငါတို့မင်းအတွက်မျှတစေရမယ်လို့ကတိပေးတယ်..."

ရွှယ်လင်က နှုတ်ခမ်းတို့ကိုဖိလိုက်၏။ အတော်ကြာအောင် နှုတ်ဆိတ်နေပြီးမှ ပါးစပ်ဟလာကာ ထိုနှစ်များအတွင်း ဟောက်မိသားစုနှင့် ဖြစ်ခဲ့သမျှရန်ပွဲများကို ဖြည်းဖြည်းချင်းရှင်းပြလိုက်သည်။ သူပြောပြီးတော့မည့်အချိန်တွင် အပြင်ဘက်၌ မှောင်နေပြီဖြစ်ကာ အမျိုးသမီးက သူမညစာမစားလိုက်ရ၍စိတ်ဆိုးသွားလေ၏။ ရွှယ်လင်ကိုထမင်းကျွေးပြီးသည့်နောက် သူ့အားကောင်းကောင်းအနားယူရန်ပြောပြီး ရီပို့ရေးရန်ထွက်သွားလေသည်။

ရွှယ်လင်ပြောတာအားလုံးက အမှန်ဆိုရင် မိသားစုထဲက ဟိုနှစ်ယောက်က ဆွဲချပြီးအပြစ်ပေးခံရတော့မှာ။ ပြောရရင် လုံတောင်မလုံလောက်သေးဘူး!။

ဒီလောက်ချစ်စရာကောင်းတဲ့ ကလေးမျိုးကို ဒီလိုဆက်ဆံရဲရတယ်လို့?။

ရီပို့က ရွှယ်လင်ကို ဆရာကာကွယ်ရေးအဖွဲ့အစည်းမှ စာနာမှုဖြင့်အကူအညီပေးမှုကို ရစေခဲ့သည်။ ဤကဲ့သို့ ထက်မြက်ရဲရင့်သောလူငယ်လေးက မမျှတသောကံကြမ္မာကို ကြုံတွေ့ခဲ့ရမှုကြောင့် သူတို့အားလုံးကိုသက်မချစေခဲ့သည်။ တစ်ဖွဲ့လုံးကရွှယ်လင်၏အခြေအနေကို သိသွားကြသည့်အခါ ၎င်းတို့က ရွှယ်လင်ကို ပါဝါပိုကြီးသည့်အုပ်ထိန်းသူရှာပေးရာတွင် ပိုကူညီပေးချင်လာကြသည်။

မိသားစုထဲမှာကလေးရှိနေတာလား? သွားလိုက်တော့! ကလေးက ဆရာသေးသေးလေးကိုအနိုင်ကျင့်ရင်ရော?။

လက်ထပ်ထားတယ်? ပယ်တယ်! ကလေးရဲ့အခုအခြေအနေက ရေရှည်စောင့်ရှောက်ရမှာ၊ မိသားစုအသစ်က သူ့ကိုကောင်းကောင်းမစောင့်ရှောက်နိုင်ရင်ရော၊ ပြီးတော့ ထပ်ပြီးကံဆိုးရင်ရော?

အသေအချာစိစစ်လိုက်ပြီး မိသားစုများ၏ လိုအပ်ချက်နှင့် နောက်ခံကိုစစ်ဆေးကြည့်ပြီးမှ သူတို့၏ရွေးချယ်မှုနှင့် လုံးဝအံကိုက်နေသော မိသားစုတစ်စုထွက်လာလေ၏။ ကာကွယ်ရေးအဖွဲ့အစည်းမှလူများက သည်မိသားစု၏ အခြေအနေကသာ အင်မတန်ကောင်းသည်ဟု ယူဆကြသည်၊ ၎င်းတို့က မွေးစားရန်လည်း မသေချာသေးပေ။ မူလက အကြောင်းပြန်ရန် အချိန်ယူကြလိမ့်မည်ဟု တွေးထားကြသော်လည်း မမျှော်လင့်ဘဲ ဒုတိယမြောက်နေ့တွင် လော့ဒ်အိမ်မှအကြောင်းပြန်စာရလာခဲ့၏။

မြို့စားအိမ်တော်က ပစ္စည်းဥစ္စာမရှားပါးသလို အကြောင်းပြန်လာသည့်အိမ်တော်ထိန်းသည်လည်း သူတို့၏သခင်လေးအသစ်ကို စောင့်ရှောက်ချင်ကြကြောင်း သဘောထားပြလာကြလေသည်။

လူတိုင်းက အဆင့်အတန်းမြင့်ခြင်းနှင့် မြို့စားအိမ်တော်၏ပါဝါကြောင့် ကျေနပ်နေကြပြီး မြို့စားမင်းမှလွဲ၍ မည်သူကမှသူ့အား လာရှုပ်ကြမည့်ပုံမပေါ်ပေ။ ထိုနေရာက ကလေးအတွက်သွားရန် အကောင်းဆုံးနေရာဖြစ်သည်၊ အရွယ်ရောက်ပြီး အချစ်နှင့်ဂရုစိုက်ခံမှုတို့အောက်တွင် သူ့ကိုယ်သူစောင့်ရှောက်နိုင်ကာ တောက်ပသည့်အနာဂတ်လည်းရနိုင်မည်။ လူအများစုကမူ သူ့အနာဂတ်က ပိုပြီးပင်ရှေ့ရောက်လိမ့်မည်ဟု ခန့်မှန်းထားကြ၏။

မြို့စားအိမ်တော်ကို ခြေနင်းအဖြစ်အသုံးချလိုက်လျှင် ကလေး၏အနာဂတ်ကောင်းလေးမှာ လုံးဝစိတ်ချရလောက်သည်။

ရွှယ်လင် အသိပေးစာရလိုက်ချိန်တွင် မြို့စားအိမ်တော်က သူ၏ဘဝအသစ်အတွက် ပြင်ဆင်ထားပြီးပြီ။ မြို့စားအိမ်တော်မှ အိမ်တော်ထိန်းပင် သူ့အားလူကိုယ်တိုင်လာခေါ်ပြီး မြို့စားက မနက်ဖြန်အစည်းအဝေးရှိနေ၍ သူ့အားလာမကြိုနိုင်၍ စိတ်မကောင်းဖြစ်ရကြောင်းဆိုကာ သူ၏သက်တော်စောင့်ကအစားလာကြိုခဲ့သည်။ ရွှယ်လင်အနေဖြင့် စိတ်မကောင်းမဖြစ်ရန်နှင့် မြို့စားကသူ့အားအင်မတန်နှစ်သက်ကာ သူ့အားကြိုဆိုနေကြောင်းပြောပြလာ၏။

ရွှယ်လင်က မျက်တောင်လေးသာခတ်ပြလိုက်သည်။ စိတ်ထဲတွင်တော့ အနှီ 'သက်တော်စောင့်' ကိုရင်းနှီးနေကာ...ဒါက gong တွေလုပ်ရမယ့်အပိုင်းမလား?

****

မစ်ကီးဝေးကြယ်စုတစ်ခုလုံးကို ဧကရာဇ်ကအုပ်စိုးပြီး အင်ပါယာတွင် အုပ်ချုပ်သူဘုရင်ခံ အမြောက်အများတည်ရှိနေသည်။

တော်ဝင်မိသားစုသည် အင်ပါယာတစ်ခုလုံး၏ ဗဟိုချက်မ ဖြစ်၏။ တော်ဝင်မိသားစုအတွင်းမှ တိရစ္ဆာန်အသွင် သားရဲလူသားများသည်ကား ကြယ်စုအတွင်းမှ စံပြဖြစ်သော မစ်ကီးဝေးနဂါးများနှင့် မတူညီပါချေ။

တခြားကြယ်စုများမှလူကြီးများက ကြယ်စုအတွင်းရှိ သေရေးရှင်ရေး၏ အဓိကပြဿနာမှာ မစ်ကီးဝေးနဂါးဂိုဏ်း၏ တည်ရှိမှုဟုဆိုကြသည်။ ၎င်းတို့သည် သားရဲလူသားများကို အလစ်ဖမ်းတိုက်ခိုက်ကြပြီး ကြယ်စုပြင်ပမှရန်သူများကို ရှင်းလင်းကြသည်။ နှစ်များစွာနယ်ချဲ့လာကြပြီးသည့်အခါ ၎င်းတို့က စကြဝဠာအတွင်းရှိ မစ်ကီးဝေးကြယ်စုနေရာကို အပိုင်ယူလိုက်နိုင်ကြကာ သားရဲလူသားများကိုဂုဏ်တက်စေခဲ့ပြီး ယခုဆိုလျှင် လူသားများကို ပျော်ရွှင်ချမ်းမြေ့စွာ နေထိုင်နိုင်စေခဲ့၏။

ထို့ကြောင့် မစ်ကီးဝေးနဂါးများက မစ်ကီးဝေးကြယ်စု၏ ဗဟိုအူတိုင်ဖြစ်လာခဲ့သည်။ အုပ်ချုပ်မှုစနစ်က ကြိမ်ဖန်များစွာ ပြောင်းလဲခဲ့လင့်ကစား တော်ဝင်မိသားစုက အဆင့်လျော့ကျမသွားခဲ့ပေ။ ၎င်းတို့၏တိရစ္ဆာန်ပုံစံက သမိုင်းအစဥ်အဆက်ရှိခဲ့ဖူးသော တိရစ္ဆာန်များအားလုံးတွင် စွမ်းအားအကြီးဆုံးဖြစ်ပြီး ၎င်းတို့၏တည်ရှိမှုကြောင့်ပင် မစ်ကီးဝေးကြယ်စုက စကြဝဠာအတွင်း တည်မြဲနေရခြင်းဖြစ်ကာ အခြားမျိုးနွယ်စုများ၏ ကျုးကျော်မှုကို မခံရသေးခြင်းပင်ဖြစ်သည်။

တော်ဝင်မိသားစုတွင် အဓိကမျိုးနွယ်စုကြီးသုံးစုရှိ၏။ ပထမတစ်စုမှာ စစ်ဖက်ဆိုင်ရာဖြစ်ကာ စစ်တပ်တစ်ခုလုံးကို ထိန်းချုပ်ထားပြီး အင်ပါယာ၏သုံးပုံတစ်ပုံကို နေရာယူထားသည်။ ၎င်းတို့က အင်ပါယာကို ကျယ်ပြန့်စွာလွှမ်းမိုးထားပြီး လျို့ဝှက်လှုပ်ရှားကာ ထောက်ပံ့ထားသော ရဲဝန်ထမ်းများကလည်း ၎င်းတို့၏ စီရင်မှုအောက်တွင်ရှိနေ၏။

ဒုတိယအင်အားစုမှာ ပါလီမန်ဖြစ်ပြီး ပါလီမန်၏ပြောရေးဆိုခွင့်ကို ချုပ်ကိုင်ထားသည်။ အစိုးရ၏ကိစ္စရပ်အများစုက ထိုနေရာတွင် အခြေတည်သော်လည်း တကယ်တမ်းတွင် အင်အားသိပ်မရှိလှပါချေ။ အင်ပါယာ၏ ဘဏ္ဍာရေးနှင့်သက်ဆိုင်သော ကိစ္စရပ်များကိုမူ တော်ဝင်မိသားစုလက်ထဲတွင်သာ ထားရှိနေရသေးသည်။

တတိယမြောက်အင်အားစုမှာ ထိပ်ဆုံးအလွှာ တော်ဝင်မိသားစုပင်ဖြစ်သည်။ အဆိုပါအဖွဲ့အစည်းကြီး၏ ထိပ်ဆုံးပြောရေးဆိုခွင့်ရှိသူမှာ အင်ပါယာ၏ ပထမဆုံးမြို့စားဖြစ်ကာ သူ့အောက်မှစစ်ဗိုလ်ချုပ်ကို ရာထူးနေရာပေးလျှင်ပင် ဒုတိယမြောက်မြို့စားဟုသတ်မှတ်၍မရပေ။

ထိုနေရာအတွက် ပါဝါအားကောင်းသောတော်ဝင်မိသားစုမှလူတိုင်း အမြဲတစေတိုက်ခိုက်ကြလေ့ရှိပြီး တော်ဝင်မိသားစုမှမင်းသားတစ်ယောက်တည်းသာ နေရာယူထားနိုင်သည်။

ထိပ်ဆုံးအလွှာသည် အင်ပါယာပြင်တွင် တိုက်ခိုက်ရန်ဖိအားပေးခဲ့၏။ စစ်ဌာနချုပ်ကဲ့သို့ပင် ၎င်းက အင်ပါယာစစ်အင်အား၏ သုံးပုံတစ်ပုံမျှကို ချုပ်ကိုင်ထားနိုင်သည်၊ သို့သော် ပထမအလွှာမှ ကျင်းပခိုင်းသော အဆင့်မြင့်တိုက်ခိုက်ပွဲမှာ ပြင်းထန်တတ်သောကြောင့် မြို့စားမှ ကိုယ်တိုင်လေ့ကျင့်ပေးပြီး ၎င်း၏ခွင့်ပြုချက်နှင့်မှ ကျင်းပနိုင်သည်။ ၎င်းတို့က စစ်ပွဲတွင်အတွေ့အကြုံရှိဖူးသော ပထမတန်းစားစစ်သည်များကို ကိုယ်စားပြုဖော်ပြတတ်ပြီး ထို့ကြောင့်ပင် နှစ်များစွာကြာအောင် အတည်တကျမဖြစ်လာရခြင်းလည်းဖြစ်သည်။ ၎င်းကမှ အင်ပါယာ၏ဝှက်ဖဲပင် သူတို့သာ အမြင့်ရောက်သွားခဲ့လျှင် အင်ပါယာလည်း အဆုံးသတ်သွားလိမ့်မည်။

အတွင်းပိုင်းတွင် မည်မျှပင်အင်အားပြင်းထန်နေကြပါစေ၊ အင်ပါယာအတွင်းမှ ပထမအလွှာတွင်မူ ငြိမ်သက်နေတတ်လေ၏။

ယခုကဲ့သို့သောနောက်ခံဖြင့် ပထမအလွှာမှလူတိုင်း ဆက်လက်အသက်ရှင်နေကြရသည်။ ဇာတ်လိုက် gong သည်လည်း ၎င်းတို့အနက်မှတစ်ယောက်ပင်။ ပထမအလွှာမှလက်ရှိသူ့နေရာသည် သူ့အတွက် နောင်အနာဂတ်တွင် စစ်ဗိုလ်ချုပ်ကြီသုံးယောက်အနက်မှ တစ်ယောက်ဖြစ်လာသည်အထိ အရေးကြီးလာလိမ့်မည်။

လက်ရှိမြို့စားမင်းမှာ ဧကရာဇ်၏ဦးလေးတော်စပ်သည်။ မင်းသားယင်ကျားသည် ရွှယ်လင်၏လက်ရှိကိုယ်ထက် နှစ်ဆအသက်ရှင်နေထိုင်လာခဲ့၏။

အနှီသူသည် ဧကရာဇ်ဟောင်း၏ညီငယ်ဖြစ်ပြီး အသက်နှစ်ဆယ်အရွယ်တည်းက ပထမမြို့စားနေရာတွင်ရှိနေခဲ့သည်။ ထိုအချိန်တည်းကဆိုလျှင် ဆယ့်ခြောက်နှစ်ခန့်ပင်ရှိပြီဖြစ်ကာ တော်ဝင်မိသားစုမှမည်သူကမျှ သူ့အား အနိုင်မရနိုင်ကြသေးပေ။ သို့သော် လက်ရှိဧကရာဇ်ဖြစ်စေ၊ ဧကရာဇ်ဟောင်းဖြစ်စေ နှစ်ယောက်လုံးက ညီငယ်ဖြစ်သူ သို့မဟုတ် ဦးလေးဖြစ်သူကို အင်မတန်ယုံကြည်ကြသည်။ အကယ်၍ ဧကရာဇ်ထက်တစ်ဆင့် ရာထူးနိမ့်ပြီး ဧကရာဇ်ထက် လုပ်ပိုင်ခွင့်ပိုများနေသူရှိခဲ့လျှင် အနှီမြို့စားမင်းမှလွဲ၍ အခြားသူမရှိနိုင်တော့ပေ။

ယခုမှပင်ရွှယ်လင်မှာ 'ငါတို့မှာ ကျောထောက်နောက်ခံကောင်းရှိတယ်' ဟုပြောလိုက်သော အမျိုးသမီးဆရာသခင်ဖြစ်သူ၏စကားကို နားလည်သွားခဲ့ပြီ။ ပထမမြို့စားကသာ သူ့အားမွေးစားချင်ခဲ့လျှင် ၎င်းနောက်မှလူက ဧကရီဘုရင်မကြီးဖြစ်နေရန် အခွင့်အရေးများပေသည်။

အကြောင်းမှာ တစ်ယောက်က နောက်ကွယ်မှအားလုံးကိုကြိုးကိုင်ချင်လျှင် ရွှယ်လင်နှင့်အနှီမြို့စားမင်းထံ၌ သေးမျှင်သောရင်းနှီးမှုရှိထားသင့်သည်။

ထိုအချိန်ကလည်း သူ့အမေကို မြို့စားမင်းကရာထူးခန့်အပ်ခဲ့သည်။ သူမ နှုတ်မထွက်ခင်အထိ သူမက မြို့စားမင်း၏ အထူးလက်မှုပညာရှင်ဆရာသခင်ဖြစ်ခဲ့ကာ မြို့စားမင်းနှင့်ရင်းနှီးသောအဆက်အဆံရှိခဲ့၏။

စနစ်ပြောပြချက်အရ အမေနှင့်မြို့စားမင်းအကြားတွင် အခြားသူများကို ပြောပြ၍မရနိုင်သော လျို့ဝှက်ချက်များကို ဖလှယ်ခဲ့ကြဖူးသည်ဟုဆိုသည်။ အမေကသူ့အတွက်ချန်ထားရစ်ခဲ့သော အဆိုပါလည်ဆွဲမှာလည်း မြို့စားမင်းကထိုအချိန်က သူမကိုပေးခဲ့သည့်ပစ္စည်းပင်....။

ရွှယ်လင်: "ကျစ်...ကျစ်...မြို့စားကနှစ်တွေဒီလောက်ကြာအောင် တစ်ယောက်တည်းနေလာခဲ့တာ...သူငါ့အမေကို တစ်ဖက်သတ်ကြိုက်နေတာများလား...."

စနစ်: "ငါကဘယ်လိုလုပ်သိမှာလဲ...ငါကမင်းကို တတ်နိုင်သလောက်ကူပြီး အချက်အလက်တွေရှာပေးရုံပဲလေ..မြို့စားအိမ်တော်မှာ မင်းနေရာကို အသေအချာရအောင် အဲဒါကကူညီပေးလိမ့်မယ်..မင်းသိထားရမှာက မင်းမြို့စားအိမ်တော်ကိုဝင်ရုံတင်မကဘူး..မင်းကမင်းသားစံအိမ်ကိုပါဝင်ရမယ်....ပျံလွှားငှက်ကနေ ဖီးနစ်ငှက်ဖြစ်လာသလိုပဲ...."

ရွှယ်လင်သည် ချီးကျူးသလို အရွဲ့တိုက်သလိုစကားကို လျစ်လျူရှုထားလိုက်သည်။ တွေးတောနေပြီး ခဏအကြာမှပြောလာခဲ့၏။ "ဘယ်လိုနန်းတော်ဖြစ်ဖြစ်...ငါကတော့နှစ်နှစ်အတွင်းလွတ်လပ်ရမယ်..ဟုတ်တယ်မလား...."

"ဟုတ်တယ်...ဒါပေမဲ့ မင်းမှာ စဥ်းစားဖို့အချိန်သုံးနှစ်ရမယ်...အဲဒီအတောအတွင်း မင်းသူ့ကိုမတွေ့ရင် မင်းအခြားတစ်ယောက်ကိုလက်ထပ်ရလိမ့်မယ်..." စနစ်ကလှည့်ပတ်နေပြီး သူ့အတွေးတို့ကို ထုတ်ပြောလိုက်သည်။

"မင်းအတင်းပေးစားခံရရင်ရော...သူကမင်းကိုခိုးပြေးမှာမလို့လား?"

"သူကဒီကမ္ဘာမှာ ဘယ်သူဖြစ်နေမလဲ ငါမှမသိတာ..သူကငါ့ကို မြင်မြင်ချင်းချစ်မိမှာမဟုတ်ဘူး...ပိုဆိုးတာက...မင်းလို ဆန်ကုန်မြေလေးစနစ်ကပါ သူ့ကိုမမှတ်မိတော့တာ..."

"ငါလည်းမတတ်နိုင်ဘူး..." စနစ်မှာ အလွန်တရာမှ စိတ်ဆင်းရဲသွားရရှာသည်။ ဒါက ဘာမဟုတ်တာလေးပါ..ဘာလို့ငါ့ကိုဒီလိုဆက်ဆံရတာလဲ?

"မင်းအားနည်းနည်းလောက်စိုက်ထုတ်လိုက်ရုံနဲ့...သူ့အော်ရာကပြောင်းသွားမှာ..သူ့အော်ရာကိုမထုတ်တော့ ငါက သူ့ကိုအာရုံမခံနိုင်တော့ဘူး..ငါမကူညီနိုင်ရင်တောင် ပျော်စရာကောင်းမှာပါ.."

ရွှယ်လင်: "......" တကယ်ကို ဆန်ကုန်မြေလေးစနစ်ပဲဟေ့...ဘယ်နေရာသွားသုံးရပါ့မလဲ?

စနစ်: "......" QAQ

*****

နေသာပြီး လှပသောနံနက်ခင်းလေးတွင် မြို့စားမင်းအိမ်မှလူများက ရွှယ်လင်ကို ဆေးရုံမှလာခေါ်ကြသည်။ ရွှယ်လင်၏ ခေါင်းမှဒဏ်ရာကို အပြည့်အဝကုသထားပြီးဖြစ်သော်ငြား သူ့ကိုယ်က အားနည်းနေဆဲဖြစ်သည်။ သူ၏ဝိညာဥ်စွမ်းအင်ကို ဖျက်ဆီးပစ်နိုင်သော တားမြစ်ဆေးဝါးဓာတ်များကို ကိုယ်ထဲမှ ဖယ်ထုတ်လိုက်နိုင်ပြီဖြစ်သော်လည်း ထိုအတောအတွင်း သူသည်ဆေးရုံတွင်သာ နေခဲ့ရ၏။ မြို့စားအိမ်တော်သို့ ရောက်လာပြီးလျှင်ပင် နောင်တွင် ၎င်းတို့စီစဥ်ပေးသော ဆရာဝန်များနှင့် ဆက်လက်ကုသရဦးမည်။

ဆရာဝန်က ရွှယ်လင်ကိုစမ်းသပ်ကြည့်သည့်အခါ မတိုင်ခင်က တိုက်ခိုက်မှုတွင် ထပ်မံရထားခဲ့သော ဒဏ်ရာကိုတွေ့ရှိခဲ့ကြ၏။ ရွှယ်လင်၏တောင်းဆိုချက်ကြောင့် စနစ်မှထပ်မံထည့်ပေးထားသော အညိုအမည်းဒဏ်ရာများလည်းရှိသေးသည်။ ထိုဒဏ်ရာများကြောင့် ဟောက်မိသားစုမှ အုပ်ထိန်းသူနှစ်ယောက်မှာ အပြစ်တင်ခံရခြင်းမှ မလွတ်နိုင်တော့ပါချေ။

ရွှယ်လင်အတွက် အသေးအဖွဲလေးဖြစ်သော်လည်း ယခုကဲ့သို့ ထိတ်လန့်ဖွယ်ကိစ္စများကို ကြုံတွေ့ခဲ့ရ၍ သူနာပြုများက သူ့အား အသေးစိတ် ဂရုစိုက်ပေးကြ၏

ပြီးနောက် သူ၏ဆွဲဆောင်မှုကို ထပ်ပေါင်းလိုက်သည့်အခါ အစာရေစာလည်းအလွန်အကျွံစားလိုက်ရသေးသည်။ မူလကိုယ်သည် သူစားမည့်အစားအသောက်ထဲတွင် အခြားသူများ အဆိပ်ခတ်မည်ကိုကြောက်ရွံခဲ့ဖူး၍ တို့ကနန်းဆိတ်ကနန်းနှင့်သာစားခဲ့သည်။

တစ်ကိုယ်လုံး အရိုးပြိုင်းပြိုင်းကျနေခဲ့သော်လည်း ဆေးရုံတွင်ရှိနေစဥ် အတောအတွင်း အသားပြန်ပြည့်လာသောကြောင် ဆရာဝန်များရော သူနာပြုများပါ အသက်ဝဝရှူနိုင်သွားကြသည်။

ရွှယ်လင် ဆေးရုံမှဆင်းရမည့်အကြောင်းကြားရသည့်အခါ သည်ရက်ပိုင်းအတွင်း သူအား ဂရုစိုက်ပေးခဲ့ကြသူများက ဝိုင်းအုံနှုတ်ဆက်လာကြ၍ ဆေးရုံဝင်ပေါက်က ပိတ်ဆို့နေလေတော့သည်။

ထိုလူများအားလုံးက အဝတ်အစားများကို သန့်ပြန့်နေအောင်ဝတ်ထားကြပြီး တံခါးပေါက်ကို တစ်ယောက်ပြီးတစ်ယောက် လာပိတ်ရပ်ကြနေကြသည်။ မျက်နှာအမူအရာများက စည်းကမ်းရှိသည့်နေရာတွင် ကြုံတောင့်ကြုံခဲ တစ်ဖက်လွန်နေသလိုဖြစ်နေကြပြီး သူသွားမည့်လမ်းတွင် တိုးဝှေ့နေကြလေသည်။

ရွှယ်လင်က အထုပ်အပိုးပြင်ပြီးသွားပြီးနောက် သူတံခါးခေါက်သံ ကြားလိုက်ရသည့်အခါ ဝင်လာခိုင်းလိုက်သည်။ စစ်ဝတ်စုံဖြင့်သူက သူ့အားနှုတ်ဆက်လာလေသည်။

ရင်ဘတ်ပေါ်မှ သတ္တုရင်ထိုးများနှင့် တံဆိပ်များကို ကြည့်ခြင်းအားဖြင့် ရွှယ်လင်သည် သည်လူက ဗိုလ်မှူးတစ်ယောက်ဖြစ်ကြောင်း အတပ်သိနေပြီး ဇာတ်ကြောင်းအရ ဇာတ်လိုက် gong ဘက်မှဖြစ်နိုင်သည်။

ရွှယ်လင်က သူ့အရှေ့မှ သားရဲလူသားကိုကြည့်ကာ မျက်တောင်ခတ်လိုက်ပြီး ရှက်ကိုးရှက်ကန်းဖြင့် ပြုံးပြလိုက်၏။

Prev Next