Chapter 112

🌱 Arc 3 - [ကြယ်တာရာခေတ် ABOကမ္ဘာတွင် လယ်စိုက်ခြင်း ]

Ch 112

အန္တရာယ်အများဆုံး ကျေးကျွန်များ(၁)

စွေ့ချီချောင်းက ဤနှစ်တွင် ငါးကန်အမြောက်အမြားကိုတိုးချဲ့နိုင်ခဲ့ပြီး ရေနေသတ္တဝါများကိုလည်း မွေးမြူနိုင်ခဲ့သည်။ ကုန်းနေသတ္တဝါတို့ကိုမူ ခဏမေ့ထားလိုက်၏။ ဤနေရာတွင် နေရာအလုံအလောက်မရှိသလို မွေးမြူရန်လည်းဒုက္ခများနိုင်သည်။ ထို့ကြောင့် နောက်ပိုင်းမှသာ အမဲလိုက်ရန်ဆုံးဖြတ်ချက်ချထားလိုက်၏။

စွေ့ထင်သည်ကား စွေ့ချီချောင်းက မြေတူးစက်ကိုသုံးပြီး ငါးကန်ကိုဖော်လိမ့်မည်ဟု တထစ်ချတွေးထားချေသည်။ ၎င်းက အင်မတန်မြန်ဆန်စွာဖြင့် တူးဖော်ပြီးစီးသွားသောကြောင့် သူမက ရေကူးကန်တစ်ကန်ပါတူးပေးရန် တောင်းဆိုမည်ဟု တွေးထားလိုက်သည်။ ထို့အပြင် သူတို့ထံတွင် ရေကြည်ပိုရနိုင်မည့် အခွင့်အရေးများရှိနေပြီပင်။

သူမ ပြောလိုက်သည်နှင့် ကျန်သူများကပါ ရေကန်တစ်ကန်တူးပေးပါရန် အင်တိုက်အားတိုက်တောင်းဆိုလာကြလေ၏။ ဤနေရာတွင် အပန်းဖြေရန်နေရာမရှိသေးသောကြောင့် ရေကူးကန်တစ်ကန်ဆောက်ပေးလျှင်လည်း မဆိုးလှပေ။

စွေ့ချီချောင်းကား ဂရုမစိုက်ချေ။ ရေကန်တစ်ကန်ကိုတူးပြီး အပေါ်မှ မိုးကာစဖြင့်အုပ်ထားလိုက်ကာ မိုးရွာသည့်အခါတွင် ရေမဝင်နိုင်ရန် ကျောက်ပြားတစ်ချပ်ဖြင့်ဖုံးထားလိုက်ချေ၏။ ထို့နောက် အင်မတန်လေးနက်သောအမူအရာဖြင့် ကြေညာလိုက်သည်။

"ရေကန်ကို အလှည့်ကျစောင့်ကြည့်တဲ့အခါ ငါးတွေမဝင်အောင်၊ သစ်ရွက်ခြောက်တွေမကျအောင်၊ ရွှံ့နဲ့တခြားအမှိုက်တွေ ကန်ထဲမဝင်အောင် စောင့်ကြည့်ပေးရမယ်..."

သူပြောလိုက်သည့်စကားကြောင့် စွေ့ထင်မှာ ခဏတွင်းချင်း ရေကန်ကငါးညှိီနံ့နံသလိုပင် ခံစားလိုက်ရသည်။ 

"ထားလိုက်စမ်းပါ...ရေကန်နဲ့ပတ်သတ်တာတွေအကုန်လုံး ငါ့ကိုသာအပ်ထားလိုက်..."

ရာသီဥတုပူနွေးလာချိန်တွင် လူတိုင်းရေဆင်းကူးကြသည်။

စွေ့ချီချောင်းသည်လည်း ပင်ကိုယ်စရိုက်အရ ရေကူးရန်စိတ်မဝင်စားသော်လည်း ဆောင်းတွင်းတစ်တွင်းလုံး ဝဖီးနေခဲ့သောရှောင်ပိုင်ကို ရေကူးရန်ခေါ်ထုတ်လာခဲ့သည်။

ရှောင်းပိုင်က သာမန်ကြောင်များနှင့်မတူပေ။ သူက ရေမကြောက်တတ်ဘဲ စွေ့ချီချောင်းက သူ့ဝမ်းဗိုက်ကိုကိုင်ထားသည့်အခါ ဇိမ်ကျနေပြီး ရေထဲမှ ခြေထောက်တို့ကိုလှုပ်ခါနေလေသည်။

ဤသို့ဖြင့် စွေ့ချီချောင်းမှာ ရေထဲသို့ဆင်းပြီးမဆော့သော်လည်း အင်္ကျီနှင့်ဘောင်းဘီမှာ ရွှဲရွှဲစိုသွားလေသည်။ ၎င်းတို့က အသားတွင်ကပ်နေပြီး အောက်ရှိအသားအရေကိုပင် ဖောက်ထွင်းမြင်နေရသည်။ စွေ့ထင်နှင့်အခြားသူများမှာ သူ့ကိုမကြည့်ရဲကြတော့ဘဲ သူ့အားမြင်နေရသူတိုင်း ရေကန်အနားမှ တစ်ယောက်ပြီးတစ်ယောက် ခွာသွားကြသည်။ သူတို့ စွေ့ချီချောင်းကိုဆက်ကြည့်နေပြီး စိတ်ကြွလာခဲ့ပါက ခံစားရမည်မှာ သူတို့ကိုယ်တိုင်ပင်။ စွေ့ချီချောင်းကို ပရောပရည်လုပ်ရန်အတွေးကို သူတို့မေ့ထားလိုက်ကြသည်။ သူတို့က အယ်လ်ဖာအချင်းချင်း သို့မဟုတ် အယ်လ်ဖာနှင့်ဘီတာဆက်ဆံရေးကို ပိုနှစ်သက်ကြသည်။ အနည်းဆုံး ထိုသို့လုပ်ခြင်းက သူတို့အတွက် အသက်အန္တရာယ်မရှိပေ။

ရှောင်ပိုင်က စွေ့ချီချောင်းကိုလှစ်ကနဲလှမ်းကြည့်သည်။ သူ့လက်ဖဝါးဖြင့် ရေပြင်ကို ရုတ်တရက်ရိုက်လိုက်လေရာ ရေများကဖွားကနဲ စင်ထွက်လာ၏။ စွေ့ချီချောင်းက အလိုလိုရှောင်လိုက်သော်လည်း ခေါင်းနှင့်မျက်နှာမှာ စိုသွားခဲ့ပြီး ဆံပင်များကပါးပေါ်တွင် ကပ်သွားခဲ့သည်။ မူလက ပုံမှန်အတိုင်းဖြစ်နေခဲ့သော သူ၏မျက်လုံးများမှာ ရေငွေ့များနှင့်ဖုံးလွှမ်းသွားခဲ့သည်။

ရှောင်ပိုင်: "ဟီးဟီး..."

စွေ့ချီချောင်းက ရှောင်ပိုင်ကိုကြည့်လိုက်သည့်အခါ ရှောင်ပိုင်က သခင်ဖြစ်သူနှင့်ကစားချင်နေကြောင်း နားလည်သွားလေ၏။

သူ့အလုပ်များကို ကူလုပ်ပေးသည့်အပြင် ရှောင်ပိုင် အခြားလုပ်သည်မှာ စားသောက်ပြီးအိပ်စက်ခြင်းသာဖြစ်သည်။ ထို့ကြောင့် အတော်လေးပျင်းစရာကောင်းလေ၏။ စဥ်းစားကြည့်ပြီးနောက် ရှောင်ပိုင်ကိုကူညီပြီး ရေကန်ကိုဆယ်ပတ်၊ အပတ်နှစ်ဆယ်ခန့်လှည့်ပေးလိုက်သည်။ 

အဝေးတွင်ရပ်နေသည့်  ကျေးကျွန်များမှာမူ နောက်လှည့်ကြည့်လာကာ ခံစားချက်မပါသည့်မျက်နှာများဖြင့် ပြောလာ၏။

"ဒီဘော့စ်က အရမ်းရိုမန့်တစ်ဆန်တယ်နော်...ငါပြောချင်တာက သူကြောင်နဲ့ကစားနေတဲ့အခါ...."

စွေ့ချီချောင်းသည် ရှောင်ပိုင်နှင့်ကစားနေသည်ကိုရပ်လိုက်ပြီး မေးလိုက်ပေသည်။

"ပျော်ရဲ့လား..."

ရှောင်းပိုင်: "ဝါး...."

သူက ဘယ်တော့မှ စွေ့ချီချောင်းအပေါ် နောက်တစ်ကြိမ်အခွင့်အရေးယူတော့မည်မဟုတ်ပေ။

.....

လအနည်းငယ်ကြာပြီးနောက် နွေဦးမြေဖော်ခြင်းပြီးစီးသည့်အခါ ဝဲလ်၏အဖွဲ့က သူတို့ဖောက်သည်များနှင့် နောက်တစ်ကြိမ်ဆက်သွယ်နိုင်ခဲ့၏။ စွေ့ချီချောင်း၏ တောင်းဆိုချက်အရ ဝဲလ်က အရည်အသွေးမြင့်သောမျိုးစေ့များကို တတ်နိုင်သမျှရှာခဲ့ပေးရန် လုပ်ငန်းရှင်များကိုမှာခဲ့ပြီး အကောင်းဆုံးသစ်စေ့များဖြစ်ရန်လည်း တောင်းဆိုပေးခဲ့သည်။

လူသားတို့သည်ကား ဂလက်ဆီတစ်ခွင်ကိုလှည့်လည်နေခဲ့ကြပြီး အမျိုးမျိုးသောဂလက်ဆီများထံမှ သီးနှံပင်များကိုယူလာခဲ့ကြသည်။ သူတို့က ထူးခြားပျိုးပင်များနှင့် ကမ္ဘာပေါ်မှပျိုးပင်တို့ကို ပေါင်းစပ်ပြီး မျိုးကွဲအသစ်တို့ကိုဖန်တီးခဲ့ကြသည်။

ဝဲလ်တို့အဖွဲ့၏ ဖောက်သည်လုပ်ငန်းရှင်များမှာ အဆက်အသွယ်ပေါများလှသည်။ ထိုသူက လုပ်ငန်းရှင်များထံမှ အေးမြမှုကိုခံနိုင်ရည်ရှိသော ပျိုးပင်များကိုစုံစမ်းခဲ့သောကြောင့် စိုက်ပျိုးမြေများမှာ ဆောင်းရာသီတွင်ပင် မပျက်စီးဘဲ အသုံးပြုနိုင်ခဲ့သည်။

သို့ထိတိုင် မမျှော်လင့်ထားသည့်အခြေအနေမျိုးမှာ ဖြစ်ပျက်တတ်သည်ပင်။ ထို့အပြင် ယိုယွင်းနေသောဂြိုလ်မှာ ပရမ်းပတာဖြစ်နေသည့် ကြယ်တာရာထဲမှအပျက်အစီးဒေသတစ်ခုသာဖြစ်ပြီး ဤနေရာတွင် ဥပဒေနှင့်အမိန့်ဟူသည်မရှိချေ။ ဝဲလ်မှာ ပျက်စီးနေသောဂြိုလ်ပေါ်သို့ လုပ်ငန်းရှင်များ မရောက်လာမီမှာပင် ဓားပြအုပ်စုတစ်စုနှင့်ရင်ဆိုင်လိုက်ရသည်။

ထိုနေရာတွင် အမြဲတစေ စားစရာအလုံအလောက်မရှိကြသူများနှင့် တစ်ပါးသူအပေါ် အခွင့်အရေးယူတတ်သည့် အဖွဲ့များရှိတတ်၏။ ၎င်းတို့အနက်တစ်ဖွဲ့မှာ သူတို့၏ကုန်သင်္ဘောများထံမှ ကုန်ပစ္စည်းများကိုလုယက်ကြသည့်အဖွဲ့ပင်။

သတင်းရသည့်အချိန်တွင် ဝဲလ်က မြက်ရိတ်နေခဲ့သည်။ တစ်ဖက်အဖွဲ့က အလွန်ကြမ်းတမ်းကြောင်းကြားရသည့်အခါ သူ့လန့်ဖျပ်သွားပြီး အဲလစ်ထံအပြေးသွား၍ စကားပြောရတော့သည်။

သူတို့က လူတိုင်းထံမှ ကုန်ပစ္စည်းအတွက်အခွန်ကောက်ရုံသာ လုပ်နိုင်ကြ၏။ လွန်ခဲ့သောလအနည်းငယ်က သူတို့အဖွဲ့ကိုတိုက်ခိုက်ခဲ့ပြီး လက်ရှိတွင် စွေ့ချီချောင်းအပေါ် ရိက္ခာများ အကြွေးတင်နေခဲ့သည်။ ပစ္စည်းများသာ ထပ်ပြီးအလုခံရပါမူ...

"မစ္စတာထရစ်စတန်ကို အမြန်အကြောင်းကြားလိုက်တော့…"

အဲလစ်က အမြန်ပင် ဆုံးဖြတ်လိုက်လေတော့၏။

ဝဲလ်သည်လည်း တုံ့ဆိုင်းမနေတော့ပေ။ မှန်သည်။ မစ္စတာထရစ်စတန်ကို အကူအညီတောင်းလိုက်ခြင်းက အကောင်းဆုံးရွေးချယ်မှုပင်။ ထိုသူတို့၏ တိုက်ခိုက်ရေးသင်္ဘောနှင့်သာဆိုလျှင် သူတို့အဖွဲ့အစည်းတစ်ခုတည်းက ရိက္ခာများ ကို ပြန်လုရန် မလုံလောက်ပေ။ သူတို့ လေ့ကျင့်ထားခဲ့စဉ်အချိန်ကပင် ထိုကြေးစားများနှင့် မယှဉ်နိုင်သည့်အပြင် ကိရိယာများကလည်း ထိုလူများနှင့်ယှဉ်နိုင်ရန် မဖြစ်နိုင်ပေ။ 

စွေ့ချီချောင်း၊ ဝဲလ်နှင့်အခြားသူအိုမီဂါများမှာ ဆရာတပည့်ဆက်ဆံရေး တစ်ကြိမ်ရှိခဲ့ဖူးပြီး နှစ်ဖက်လုံး သတင်းအချက်အလက်များကိုလည်း ဖလှယ်နိုင်ခဲ့ကြသည်။ ဝဲလ်က စွေ့ချီချောင်းကို ဆက်သွယ်သည့်အချိန်တွင် စွေ့ချီချောင်းက စားသောက်နေ၏။ ဝဲလ်၏ကုန်ပစ္စည်းများ ဓားပြတိုက်ခံရသည်ဟုကြားရသည့်အခါ သူက အနည်းငယ် စိတ်မချမ်းသာမှုနှင့်အတူ မျက်မှောင်ကြုတ်လိုက်မိချေသည်။

စွေ့ချီချောင်းနှင့် ဝဲလ်တို့က သဘောတူစာချုပ်ကို ချုပ်ဆိုထားခဲ့ကြ၏။ ဤတစ်ကြိမ် ကုန်ပစ္စည်းများရောက်လာခဲ့ပါက ၎င်းတို့ထဲမှအချို့တဝက်ကို သူ့ထံပို့ကာ အကြွေးပေးချေရမည်ဖြစ်သည်။

ကုန်ပစ္စည်းများတွင် အအေးဒဏ်ခံနိုင်သော သီးနှံမျိုးစေ့များပါသည့်အကြောင်း စွေ့ချီချောင်းလည်းသတင်းကြားထားခဲ့သည်။ သူ ပန်းကန်တို့ကိုချထားရင်း တည်ငြိမ်စွာပင်ပြောလိုက်လေ၏။

"မင်းတို့နဲ့အတူသွားမယ့် ငါ့လူတွေကိုပဲစောင့်နေ..."

ဝဲလ်မှာ စိတ်ပေါ့ပါးသွားရသည်။ ဆိုလိုသည်မှာ စွေ့ချီချောင်းလည်း ဤကိစ္စအပေါ်အာရုံစိုက်ရန် ဆုံးဖြတ်ထားသည့်အဓိပ္ပါယ်ပင်။ ဝဲလ်သည်ကား  အထပ်ထပ်အခါခါကျေးဇူးတင်နေလေ၏။

"အဆင်မပြေဖြစ်သွားရရင်တော့ တောင်းပန်ပါတယ်...ကျေးဇူးတင်ပါတယ်...အရှင်သခင်ကြီးရယ်..."

စွေ့ဟူက အနှီတဝမ်းကွဲညီလေး၏ မျက်နှာမကောင်းသည်ကိုမြင်လိုက်ရသည့်အခါ သူတို့ထွက်ခွာရမည့်အကြောင်းနှင့်ပတ်သတ်၍ မေးမြန်းလိုက်သည်။

"ညီလေး...ငါတို့က ဘယ်သူ့ကိုသွားတိုက်ရမှာလဲ..."

စွေ့ချီချောင်းက ခပ်တိုးတိုးတုံ့ပြန်သည်။

"ဒီနယ်မြေမှာ အထိကရုဏ်းတွေဖြစ်လွန်းတယ်...လူတစ်ယောက်က ဝဲလ်ရဲ့ကုန်တွေကို ဖြတ်လုသွားတယ်လေ..."

သတင်းဆိုးပင်ဖြစ်သည်ဟု စွေ့ဟူက ချက်ချင်းပင်တွေးလိုက်မိချေ၏။ သူက ဝဲလ်အပေါ်စိတ်မကောင်းမဖြစ်မိဘဲ ဝဲလ်၏ကုန်ပစ္စည်းများအား လုယက်သွားသူများကိုသာ စိုးရိမ်မိလေသည်။ သူတို့အနေဖြင့် အခြားသူများထံမှလုယက်နိုင်သော်လည်း  ဝဲလ်၏လူများထံမှ ပစ္စည်းများကို လုလိုက်ပေသည်။ ထိုကုန်များထဲတွင် တစ်ဝမ်းကွဲညီလေး၏ ကုန်များလည်းပါနေခဲ့သည်။ ဤသည်မှာ တစ်ဝမ်းကွဲညီလေးထံမှ သွယ်ဝိုက်လုယက်လိုက်ခြင်းပင်။

စွေ့ချီချောင်းမဆိုနှင့်၊ သူတို့ပင် ခွင့်မလွှတ်ပေးနိုင်ပေ။ စွေ့ဟူက ပြောလိုက်လေသည်။ 

"ငါတို့တာဝန်ထား...ငါသူတို့ရဲ့ကတုံးခေါင်းတွေကိုဖြတ်လာခဲ့မယ်..."

ယင်းက အရေးမကြီးသည့်ကိစ္စပင်။ သူတို့ညီလေးအနေနှင့်  ကိုယ်တိုင်လူလုံးထွက်ပြစရာ မလိုသေးချေ။

သူ စွေ့ချီချောင်းကိုလှမ်းကြည့်လိုက်သည်။ စွေ့ချီချောင်းသည်လည်း နားလည်လိုက်၏။ 

စွေ့ချီချောင်းက စွေ့ထင်အား ကတုံးသုံ့ပန်းများကို ဦးဆောင်ပြီး စုဝေးခိုင်းလိုက်သည်။ သူတို့အားလုံးက ကြေးစားဘဝမှလာခဲ့ကြ၍ ကြယ်တာရာနှင့်သက်ဆိုင်သည့်နယ်ပယ်တွင် အကျွမ်းတဝင်ရှိလောက်၏။ သူတို့ကိုလွှတ်လိုက်လျှင်အကောင်းဆုံးပင်။

"စနစ်ကိုချိတ်ဆက်ပြီးတာနဲ့...လက်နက်ကိုအဝေးကနေထိန်းချုပ်လို့ရပြီ..."

စွေ့ချီချောင်းက လူကိုယ်တိုင်မသွားနိုင်လျှင်ပင် အနှီသုံ့ပန်းများကို သေလောက်သည့်လက်နက်နှင့် လွှတ်မပေးနိုင်ပေ။ သူကိုယ်တိုင်လက်နက်ကိုထိန်းချုပ်မည်ဖြစ်၍ အကူများ၏အနောက်တွင် ရှိနေမည့်သဘောပင်။

ကတုံးများမှာ စိတ်လှုပ်ရှားနေကြလေသည်။ သူတို့သည်ကား နောက်တစ်ကြိမ်တိုက်ခိုက်ခွင့်ကို ဘယ်တော့မှရလောက်တော့မည်မဟုတ်ဟု ထင်ခဲ့ကြပေသည်။

စွေ့ချီချောင်းက အမည်ခေါ်လိုက်ချိန်၌ အားလုံးက စုဝေးလာကြသည်။ သူတို့အားလုံးမှာ အဆိုပါအခြေအနေကိုစိတ်လှုပ်ရှားနေကြပြီး ဝဲလ်နှင့်သူ့လူတစ်စုနှင့်အတူ ကုန်သင်္ဘောပေါ်သို့သွားရန် အဖွဲ့များခွဲလိုက်ကြ၏။

သတ်မှတ်နေရာသို့ရောက်ကြသည့်အခါ ကုန်အားလုံးမှာ အလုခံလိုက်ရပြီးပြီဖြစ်သည်။ လုယက်သူများ ထွက်ခွာသွားသည်မှာ မကြာသေးပေ။ ကုန်များအားစောင့်ကြပ်နေသူများမှာ မလှုပ်ရှားနိုင်ကြသော်လည်း ကံကောင်း၍ သူတို့အသက်ကို ရန်ရှာမခံရပေ။ တစ်ဖက်အဖွဲ့၏အဓိကရည်ရွယ်ချက်မှာ လုယက်ရန်သာဖြစ်သည်။ ကုန်ပစ္စည်းများကို စောင့်ကြပ်နေသူများမှာ သူတို့ကြားမှကွာခြားချက်ကြီးမားပုံကိုသိထားသောကြောင့် ခက်ခဲအောင်လုပ်မနေတော့ပေ။

စွေ့ထင်နှင့်ဝဲလ်တို့က ဓားပြများကိုဖမ်းရန် လူအမြန်စုလိုက်ကြသည်။

ဓားပြလှေ၏တည်နေရာကို အနီးကပ်စကန်ဖတ်နိုင်သည့်အခါ ကတုံးတို့က ထိုပုံကိုအသေအချာကြည့်ပြီး အံ့ဩသွားကြသည်။ ဤသည်မှာ သူတို့၏ ညီအစ်ကိုဟောင်းများအဖွဲ့မှသင်္ဘောပင်။ သင်္ဘောပေါ်မှလူတိုင်းက ကြေးစားများဖြစ်ကာ တစ်ခါတစ်ရံ အတူတကွအောင်ပွဲခံခဲ့ကြသေးသည်။

ကတုံးတို့မှာ ဓားပြများ၏မိုက်တိမိုက်ကန်းစတိုင်ကို ရင်းနှီးနေသော်လည်း စွေ့ထင်ကမူ သူတို့နှင့် ဦးစွာဆက်သွယ်သင့်သည်ဟု အကြံပေးလာသည်၊ စစ်ကြောင်းကိုမလွှတ်မီ ယဥ်ယဥ်ကျေးကျေးပြောသင့်သည်ဟုလည်း ဆိုလာ၏။

စွေ့ထင်သည်ကား ထိုင်ခုံပေါ်တွင် ခြေချိတ်ထိုင်နေလေ၏။ ဗွီဒီယိုကောလ်ဝင်သွားသည်နှင့် သူမပြောလိုက်သည်။ "ကျွန်မတို့ရဲ့ပစ္စည်းတွေကို အခုချက်ချင်းပြန်ပေးပါ... မဟုတ်ရင်တော့ K921 နဲ့ပစ်ရပါလိမ့်မယ်..."

တစ်ဖက်အဖွဲ့: "......."

သူတို့အသိစိတ် ပြန်မကပ်ရသေးမီမှာပင် ခြိမ်းခြောက်ခံလိုက်ရပြီဖြစ်သည်။ K921 အကြောင်းပြောလိုက်စဥ်တွင် သူတို့ဘက်မှ စွေ့ထင်ပြောလိုက်သည့်စကားကို သေချာမကြားလိုက်သလိုပင်။

သူတို့ မျက်နှာပြင်ကိုလှမ်းကြည့်လိုက်ကြပြီးနောက် အလွန်အမင်း မျက်နှာထားတင်းမာနေသော အမျိုးသမီးအယ်လ်ဖာနှင့် မကြာသေးမီက အမည်မသိအဖွဲ့အစည်းတစ်ခု၏ ဖမ်းခေါ်ခံသွားရသည်ဟု ပြောကြသော ရင်းနှီးနေသည့်ကတုံးတို့ကို တွေ့လိုက်ရလေသည်။

တစ်ခဏမျှ နှစ်ဖက်ဗွီဒီယိုကောလ်မှာ သူတို့၏မိတ်ဆွေများကို မှတ်မိသွားသည့်အသံများဖြင့်သာ ပြည့်နှက်နေလေသည်။

"ဂျော်နီ… Shit မင်းကဘယ်လိုလုပ်ပြီး အဲဒီမှာရှိနေတာလဲ… အဖမ်းခံလိုက်ရပြီးတော့ မသေသေးဘူးလား..."

"ရှောင်ဝမ်...ငါမင်းကိုပြန်တွေ့ရတဲ့နေ့ ရှိသေးတာပဲ..."

"ဟေး...ဟေး....စကားမများကြစမ်းနဲ့..."

စွေ့ထင်က အော်လိုက်၏။

"မင်းတို့က အမှတ် XXX,XXX ကမလား...ဒီကုန်သင်္ဘောက မင်းတို့ပိုင်တာမဟုတ်ဘူးထင်တယ်..." တစ်ဖက်လူသည်လည်း ဇဝေဇဝါဖြစ်သွားလေ၏။ သူတို့မှာ မည်သည့်သင်္ဘောကိုမှ မစုံစမ်းဘဲ မလုယက်ရဲကြပေ။ ဤသင်္ဘောက အိုမီဂါအဖွဲ့၏အပိုင်ဖြစ်ကြောင်းလည်း အတည်ပြုထားခဲ့သည်။

"အဲဒီမှာ ငါတို့ပစ္စည်းတွေပါတယ်ဟဲ့…"

စွေ့ထင်သည်ကား ထအော်လေတော့၏။ 

"ငါ သုံးစက္ကန့်အတွင်းတိုက်တော့မှာနော်... သုံး... နှစ်... တစ်..."

တစ်ဖက်အဖွဲ့: "....."

စွေ့ထင်သည်ကား တစ်ဖက်အဖွဲ့ကို လက်နက်ချရန်ပင်အခွင့်အရေးမပေးပေ။ မတိုက်ခင်တွင် ယဥ်ယဥ်ကျေးကျေးစကားပြောမည်ဆိုပြီး ပေါက်ပန်းလေးဆယ်ပင် ပြောခဲ့သေးသည်။ သူမသည်ကား တမင်တကာ မက်လုံးပေးလိုက်ခြင်းပင်။ သူမက အနည်းငယ်မျှပျော်ချင်ရုံသာဖြစ်ပြီး လက်နက်ကို က်ိုယ်တိုင်လည်း မထိန်းချုပ်နိုင်ပေ။ စွေ့ချီချောင်းအား အချက်ပြလိုက်ရုံသာဖြစ်သည်။

စွေ့ချီချောင်း၏ အစွမ်းအစနှင့်သာဆိုလျှင် တစ်ချက်ပစ်သည်နှင့် ကာနိုင်မည့်အခြေအနေမရှိပေ။ သူတို့၏အကာအကွယ်က K921 ၏ ယမ်းပေါက်ကွဲမှုကို တားနိုင်မည်မဟုတ်ပေ။

ဓားပြများ၏ အရွေ့စွမ်းအင်နှင့်လက်နက်စနစ်ကို ဖျက်ဆီးလိုက်ပြီးနောက် စွေ့ထင်က လူအချို့ကိုခေါ်ပြီး လေယာဥ်အတွင်းသို့ ဝင်သွားလိုက်၏။ K921 ၏ခြိမ်းခြောက်မှုကြောင့် သူတို့အဖွဲ့မှ အယ်လ်ဖာခေါင်းဆောင်မှာ ခေါင်းကိုလက်ဖြင့်အုပ်ရင်း ကြမ်းပြင်ပေါ်သို့လဲသွားခဲ့လေပြီ။

ဤတစ်ကြိမ်တွင် သူတို့၏လုပ်ရပ်အား နောင်တရနေလျှင်လည်း အကြောင်းမထူးတော့ချေ။ အမည်မသိအဖွဲ့အစည်းကို လှောင်ပြောင်ရဲသူမရှိသော်လည်း အနှီအိုမီဂါအဖွဲ့နှင့်အဆက်အသွယ်ရှိမည်ဟု မည်သူကမှမသိခဲ့ကြပေ။ ထို့အပြင် အနှီအဖွဲ့ဝင်များက ဒေါသလည်းကြီးကြသေးသည်။ စွမ်းအားပြင်းလက်နက်ကိုမလွှတ်လိုက်မီ စကားများများစားစားမပြောခဲ့ပေ။ ယခုလိုပုံစံနှင့် ဓားပြအဖွဲ့မှာ သူတို့ကိုယှဥ်တိုက်နိုင်မည်ဟု မဆိုလိုပေ။

အကာအကွယ်မှာ သုံးစက္ကန့်ပင်မခံလိုက်ပေ။ သူတို့၏အရွေ့စွမ်းအင်စနစ်က ဖျက်ဆီးခံလိုက်ရပြီး လက်နက်စနစ်က သင်္ဘောအခန်းငယ်အပေါ် သက်ရောက်လာကာ အယ်လ်ဖာဖယ်ရိုမုန်းများက ထောင်းကနဲထွက်ပေါ်လာ၏။

ဝဲလ်နှင့် သူ့လူများမှာ ဘာမှပင်မလုပ်လိုက်ရပေ။ သူတို့က စွေ့ထင်အနောက်မှလိုက်ပြီး ရန်သူများဘက်မှ အဖွဲ့ဝင်များကိုဖမ်းရုံသာ ရှိလေတော့၏။

🍀🍀🍀