MM Story Teller

Ch-108

Viewers 15k

၇၀ခုနှစ်များတွင် ကလေးများပြုစုပျိုးထောင်ခြင်း

အပိုင်း (၁၀၈)

ကျောင်းဆင်းသောအခါ ချန်ကျင်းရိနှင့် ရှမင်ရှီးတို့အနောက်သို့ အမြီးသေးသေးလေးနှစ်ယောက်လိုက်လာခဲ့ကြ၏။ လင်းယောက်ရန်နှင့် လျိုယွဲ့တို့က လုအိမ်ကို အတူတူကစားရန်လာလည်ကြသည်။

ယခုအချိန်တွင် ချင်းရို့က အိမ်မှာတစ်ယောက်တည်းဖြစ်နေတာမို့ ဒီကလေးငယ်လေးတွေကို မငြင်းဆန်ခဲ့။ ချင်းမျန့်ရဲ့ အမြွှာလေးတွေဖြစ်တဲ့ ချန်ကျင်းဟွနှင့် ချန်ကျွမ်းကျွမ်းတို့လည်း သူတို့ဒေါ်လေးအိမ်မှာ လာကစားကြလေ၏။

ဘေးအိမ်မှ ကျန်းချန်ပေ့ရဲ့ ၆နှစ်အရွယ်သားဖြစ်သူ ကျန်းရိချောင်လည်း အိမ်မှလစ်ထွက်လာခဲ့သည်။

မိသားစုခြံဝင်းထဲတွင် ကင်းလှည့်အစောင့်များအပြင် တာဝန်ကျကျန်းမာရေးအဖွဲ့လည်းရှိ၍ ယေဘုယျအားဖြင့် မိဘတွေဟာ သူတို့ကလေး ပျောက်သွားမည်ကို စိတ်ပူစရာမလိုပါချေ။

ချင်းရို့က ကလေးတွေကို ရေတွက်ကြည့်လိုက်ရာ နှစ်၊ သုံး၊ လေး... ခုနစ်ယောက်ရှိနေတာပဲကွယ်။

အဲဒီအချိန်ကာလ၌ မိသားစုခြံဝင်းတွင် ကလေးအများစုကလွဲ၍ တခြားမရှိပေ။ မိသားစုတွင် သားဆက်ခြားခြင်းနှင့် ကလေးမွေးဖွားခြင်းတို့မှာ မဖြစ်မနေလုပ်ရသည်များမဟုတ်ဘဲ အကြုံပြုချက်သာ။

ဤနေရာရှိ ကေဒါတွေရဲ့ လိုအပ်ချက်များနှင့် စပ်လျဥ်း၍ ကလေးမွေးဖွားခြင်းကို ထိန်းချုပ်ရန်ဖြစ်၏။ ကလေးဆက်တိုက်မွေးဖွားခြင်းမဟုတ်ဘဲ နှစ်အနည်းငယ်ခြားပါက အကောင်းဆုံးဖြစ်မည်ပင်။

ချန်ကျွမ်းကျွမ်းဟာ အသက်အကြီးဆုံးဖြစ်သလို တစ်ဦးတည်းသော မိန်းကလေးဖြစ်လေ၏။ မိန်းကလေးများဟာ ယေဘုယျအားဖြင့် ယောက်ျားလေးများထက် ပိုမိုနာခံကာ ထက်မြက်ကြသူများဖြစ်၍ ချင်းရို့လည်း ကျွမ်းကျွမ်းနှင့် ကျင်းဟွတို့အား ကလေးတွေကို ကူညီပြီး ကြည့်ရှုစောင့်ရှောက်ပေးဖို့ တောင်းဆိုခဲ့သည်။

ကလေးငယ်များစွာဟာ အစည်းအဝေးလုပ်ဖို့ စုဝေးနေကြရာ မူကြိုသေးသေးလေးတစ်ခုနဲ့တောင် တူသွားပေသည်။

ချင်းရို့အိမ်ရှိ ခြံထဲ၌ မြက်ခင်းလေးတစ်ခုရှိရာ ဒီကလေးတွေက ကစားချင်ကြတယ်လို့ ပြောကြ၏။ ချန်ကျွမ်းကျွမ်းက သူမနဲ့အတူ ကြိုးခုန်ဖို့ အဖော်ရှာချင်ခဲ့သော်လည်း ယောက်ျားလေးအဖွဲ့မှာ ကြိုးခုန်ဖို့ မလိုလားကြပါချေ။

ချင်းရို့က ကလေးတွေစားဖို့အတွက် ခရမ်းချဉ်သီးတွေကို ခြင်းအနည်းငယ်ခူးဆွတ်ဖို့ ကလေးတွေအားခေါ်သွားရန် ချန်ကျွမ်းကျွမ်းကို ပြောလိုက်ပြီး ပိန္နဲခြောက်တစ်အိတ်ကိုပါ ထုတ်ပေးခဲ့သည်။ သူမကတော့ ချိုမြိန်တဲ့ ကွေ့ဟွားနဲ့ရွှေဖရုံသီးမွှေးမွှေးလေး တစ်အိုးချက်လိုက်ပြီး ကလေးတွေကို တစ်ပန်းကန်စီ ကျွေးလိုက်သည်။

မွှေးကြိုင်နေတဲ့ ကွေ့ဟွားမှာ အရင်က စစ်ဦးစီးချုပ်လင်း ပေးထားခြင်းပင်။ ပိန္နဲခြောက်ကိုတော့ လီချင့်ဟွားက နေလှန်းအခြောက်ခံထားပြီးနောက် သူမအား ပေးထားခဲ့တာဖြစ်၏။

အသေးလေးတွေက စားသောက်ရင်း ကစားနေကြ၏။

"ငါ့ဒေါ်လေးရဲ့ လက်ရာက အရသာရှိတယ်!"

"ငါ့ဒေါ်လေးက အရမ်းလှတာပဲ!"

"အဲဒါ ငါ့ဒေါ်လေးကွ!"

…

အရသာရှိတဲ့ အစားအစာတွေ ရှိနေသရွေ့ ဒီကောင်ငယ်လေးတွေရဲ့ ပါးစပ်ထဲမှာ *သက်တံလေးတွေ အဆက်မပြတ်ပစ်နေကြမှာပင်။ (*မြှောက်ပင့်ပြောတာပါ)

စားသောက်ပြီးနောက် ဆက်လက်ဆော့ကစားကြပြန်၏။

ချင်းရို့က ပူပူနွေးနွေးဆိတ်နို့ကို သောက်လိုက်ပြီး ကလေးလေးတွေ ဆော့ကစားနေတာကို ကြည့်နေရင်း သူမ မူကြိုကို ပြန်ရောက်သွားသလို ခံစားရလေ၏။

"အဖေက ဘယ်သူလုပ်မလဲ၊ အမေက ဘယ်သူလုပ်မလဲ?"

သူတို့အဖွဲ့တွင် မိန်းကလေးဆိုလို့ ချန်ကျွမ်းကျွမ်းတစ်ယောက်ပဲရှိတာကြောင့် အမေဇာတ်ကောင်ရွေးချယ်ကြတဲ့အခါ အားလုံးက သူမကို ကြည့်လိုက်ကြရာ ချန်ကျွမ်းကျွမ်း ပြောလိုက်လေ၏။ "ငါ အမေမဖြစ်ချင်ဘူး၊ ကျောင်းဆရာမဖြစ်ချင်တာ"

ကျန်းရိချောင်ဟာ အဖေဇာတ်ကောင်ကို တက်တက်ကြွကြွယူလိုက်သလို လျိုယွဲ့သည်လည်း အမေဇာတ်ကောင်ကိုယူရန် တက်ကြွစွာလက်မြှောက်လိုက်သည်။

"ငါ အဖေဖြစ်တော့မယ်!"

"ငါ အမေဖြစ်တော့မယ်!!"

ချင်းရို့: "…"

ရှောင်ကျင်းရိ၊ ရှမင်ရှီးနှင့် လင်းယောက်ရန်တို့က ကလေးတွေအဖြစ်သာ လုပ်နိုင်ခဲ့၏။ ချန်ကျင်းဟွကတော့ ဆရာဝန်ဖြစ်ချင်တယ်လို့ ဆို၏။

လင်းယောက်ရန်: "အဖွားကရော ဘယ်သူလုပ်မှာလဲ?"

ရှမင်ရှီး အကြံပြုလိုက်၏။ "ငါ့ဒေါ်လေးက အဖွားပဲ!"

ချင်းရို့: "ကောင်းပြီ ငါက အဖွားပေါ့"

သူမရဲ့အမျိုးသားရှောင်လုက လောင်လုအဖြစ် အဆင့်မြှင့်သွားခဲ့ပြီး အခု သူမကလည်း အဖွားချင်းအဖြစ် အဆင့်မြှင့်သွားခဲ့ပြီပေါ့။

ရှမင်ရှီးက ချင်းရို့အား ချက်ချင်းကြည့်ကာ ပြောလိုက်၏။ "အဖွား သား ဗိုက်ဆာနေပြီ!"

ချင်းရို့: "..." မင်းက ဒရာမာထဲမှာ အရမ်းနစ်မြောနေတာပဲနော်။

အဖေဖြစ်သူ ကျန်းရိချောင်က ပြင်းပြင်းထန်ထန် ချောင်းဆိုးလိုက်ပြီး "မင်းအမေကို မြန်မြန်ချက်ပေးဖို့ပြောလိုက်"

သူက သူရဲ့'ဇနီးလေး'လျိုယွဲ့အား ပုတ်လိုက်ရင်း "မိန်းမရေ မြန်မြန်ချက်တော့လေ"

လျိုယွဲ့ အရမ်းအံ့အားသင့်သွားကာ "ငါ အမေဖြစ်နေတုန်း ဘာလို့ ထမင်းချက်နေရတာလဲ?"

"ငါမချက်ချင်ဘူး၊ ကန်တင်းမှာပဲ သွားစားကြတာပေါ့။ စားပြီးရင် တစ်ရေးတစ်မောအိပ်ချင်ပြီ"

"အဖွား ချက်နိုင်တယ်!"

ချင်းရို့ သူမရဲ့ ဗိုက်ကို အေးအေးဆေးဆေးဖြင့် ထိလိုက်ကာ "အဖွားက နေမကောင်းဖြစ်နေလို့ မချက်နိုင်ဘူးကွယ်၊ ဒီတော့ အခု ဘယ်သူက ချက်သင့်တာလဲ?"

ရှမင်ရှီး စိုးရိမ်စွာဖြင့် "အဖွား နေမကောင်းဘူးဆိုတော့ ငါ အဖွားကို ဆေးရုံအရင်ပို့ရမယ်!"

ဆရာဝန်ဇာတ်ကောင် ချန်ကျင်းဟွက အဖွားချင်းကို စစ်ဆေးပေးပြီးနောက် "သူမကို ဆေးရုံတင်ထားရမယ်!"

…

ချင်းရို့လည်း 'ရောဂါကြောင့်အိပ်ရာထဲလဲနေတဲ့အဖွားဇာတ်ကောင်'ကို ကြိုးကြိုးစားစား ကစားပေးခဲ့သည်။

ကလေးတွေအားလုံးမှာ သရုပ်ဆောင်နိုင်တဲ့ အရည်အချင်းတချို့ ရှိကောင်းရှိနေလေရဲ့။ သူတို့အားလုံးက သူတို့ရဲ့ အခန်းကဏ္ဍတွေမှာ အရမ်းကို အံဝင်ခွင်ကျဖြစ်နေလိုက်ကြတာ၊ အထူးသဖြင့် ခင်ပွန်းနှင့် ဇနီးသည်အဖြစ် ကျန်းရိချောင်နှင့် လျိုယွဲ့တို့ပဲပေါ့။

"မိန်းမရေ အဝတ်လျှော်ဖို့ ငါ့ကို လာကူပါဦး"

"လောင်ကျန်း ကိုယ့်ဘာသာလုပ်။ မလျှော်ချင်ဘူးဆိုရင် မဝတ်နဲ့တော့"

လင်မယားနှစ်ယောက် အဆက်မပြတ် ငြင်းခုံနေကြလျက်။

လင်းယောက်ရန်: "ငါ့အစ်ကိုက ငါနဲ့မကစားဘူးဆိုရင် သူက ညီလေးကို ဂရုစိုက်နေတာပဲဖြစ်မယ်"

ချန်ကျင်းရိ: "သူက မင်းညီအရင်းမဟုတ်ဘူး"

ရှမင်ရှီး: "ဘာလို့ ငါ့ညီအရင်းမဟုတ်ရတာလဲ?"

ထိုအချိန်တွင် အဖေဇာတ်ကောင် ကျန်းရိချောင်ကအကြောင်းအရာကို ဝင်ရောက်စွက်ဖက်စွာဖြင့် "ဘာလို့ ကလေးက ငါနဲ့မတူတာလဲ?"

လျိုယွဲ့: "ငါဘယ်လိုသိမှာလဲကွာ?"

"မင်းပဲ သူ့ကို မွေးထားတာမဟုတ်ဘူးလား?"

…

ချင်းရို့တစ်ယောက် ဆက်ပြီးနားမထောင်နိုင်တော့ဘူးလို့ ခံစားလိုက်ရ၏။ ဒါက ဘယ်လိုထူးဆန်းတဲ့ ကိုယ်ဝန်ဆောင်ပညာရေးမျိုးလဲဟေ ? ! !

ကလေးတွေရဲ့ မိသားစုကစားနည်းဟာ ဒီလောက် မရှုပ်ထွေးသင့်ဘူးလေနော်။

"ကောင်းပြီ၊ ကောင်းပြီ၊ မင်းတို့က သဟဇာတဖြစ်ကြတဲ့ မိသားစုပါပဲ၊ ရန်မဖြစ်ကြနဲ့ကွယ်။ အဖေကျန်းနဲ့ အမေလျိုတို့က ကိုယ့်ကလေးတွေကို ကိုယ်ဂရုစိုက်သင့်တယ်နော်"

"ညီအစ်ကိုတွေ အချင်းချင်းလည်း ချစ်ခင်သင့်တယ်ကွယ်"

"ဖက်ထုပ်အတူတူလုပ်ပြီး အရသာရှိတဲ့ ညစာ ပြင်ဆင်ကြရအောင်ဟေ့"

Thanks for reading!

Prev Next