MM Story Teller

Ch-114

Viewers 15k

၇၀ခုနှစ်များတွင် ကလေးများပြုစုပျိုးထောင်ခြင်း

အပိုင်း (၁၁၄)

ချင်းရို့က လုယန်လက်ထဲမှ တယောကို ဆွဲလုကာ ကလေးလေးတွေအတွက် တီးခတ်ပေးချင်ခဲ့သည်။

မူကြိုဆရာမက ထပ်ပြီးနားမထောင်နိုင်တော့ဘူးလေနော်။

ထားလိုက်ပါတော့၊ သည်းခံရမယ်....

ဂီတသံစဥ်က သိပ်မကောင်းသော်ငြား ကိုယ်ဝန်ဆောင်ပညာရေးမှာ ဖခင်ဖြစ်သူကို ပါဝင်ခွင့်ပေးဖို့ လိုအပ်လေ၏။ ဒီလိုမျိုးအလေ့အကျင့် အပြုအမူတွေဟာ မိဘနဲ့ ကလေးတွေကြားထဲက ဆက်ဆံရေးကို မြှင့်တင်နိုင်သည်ပင်။

အနည်းဆုံးတော့ ကလေးလေးတွေက သူတို့အဖေရဲ့ တယောသံကို ကြားရင် "စိတ်လှုပ်ရှား"နေကြရောပဲ။

ချင်းရို့ရဲ့ ဗိုက်ဟာ ဟိုနေရာ ဒီနေရာမှ ဖောင်းထွက်လာလိမ့်မယ်။ ကလေးလေးတွေက သူတို့အဖေနဲ့ ဆက်သွယ်ကြဖို့ စိတ်လှုပ်ရှားနေတတ်ကြတယ်လေ။ ချင်းရို့နဲ့ လုယန်တို့ကလည်း သူမရဲ့ဗိုက်ပေါ်မှတစ်ဆင့် ကလေးလေးတွေနဲ့ high-fiveလုပ်ပေးတတ်ကြတယ်။

ကလေးလေးတွေက မိခင်ဝမ်းဗိုက်မှတစ်ဆင့် သူတို့မိဘတွေနဲ့ အပြန်အလှန်ဆက်ဆံရတဲ့ ဒီလိုhigh-fiveဂိမ်းကို အလွန်နှစ်သက်ကြလေရဲ့။

သူတို့အဖေရဲ့ တယောသံကို နားထောင်ရတဲ့အချိန်တိုင်း အလွန်စိတ်လှုပ်ရှားစွာ တက်တက်ကြွကြွလှုပ်ရှားပေလိမ့်မည်။ ဖြစ်နိုင်တာကတော့ ကလေးတွေက အဲဒါဟာ အရမ်းဆိုးရွားလို့ သောင်းကျန်းနေတာ၊ ဒါမှမဟုတ် သဘောကျလွန်းလို့ လက်ခုပ်တီးနေတာဖြစ်မှာပေါ့လေ။

ယခုလနောက်ပိုင်းတွင် သန္ဓေသားလှုပ်ရှားမှုတွေ မကြာမကြာ ရှိလာခဲ့ပြီဖြစ်သလို ချင်းရို့က တစ်နေ့တာလုံး သူတို့ရဲ့တည်ရှိမှုကို ရှင်းရှင်းလင်းလင်း ခံစားနိုင်နေခဲ့ပြီ။

ကလေးလေးနှစ်ယောက်ဟာ သူတို့မိဘတွေနဲ့ ဆက်သွယ်ရတာကို အလွန်သဘောကျကြသည်ပင်။ သူတို့လေးတွေက ကမ္ဘာကြီးကို ကောင်းစွာနားလည်နေပြီဖြစ်သလို ပြင်ပကမ္ဘာကြီးရဲ့ အသံတွေကိုပါ ကြားနိုင်သည့်အပြင် အလင်းရောင်တည်ရှိနေတာကိုလည်း ခံစားနိုင်နေခဲ့ပြီ။

ချင်းရို့က ပိပိပုစွန်နှစ်ကောင်မွေးလာမယ့်အကြောင်းကို စိတ်မပူတော့ပါချေ။ ဘယ်လိုပဲဖြစ်ဖြစ် သူတို့လေးတွေက သူမကိုယ်တိုင်လွယ်ထားပြီးမွေးမယ့် သူမရဲ့ကလေးပဲလေ မဟုတ်ဘူးလားနော်?

ကလေးလေးတွေဟာ တက်ကြွရွှင်လန်းတဲ့ ကလေးလေးတွေဖြစ်ပါစေလို့ပဲ သူမဆုတောင်းမိပါရဲ့။ သူတို့လေးတွေ ဆိုရှယ်မကောင်းဘူး ဒါမှမဟုတ် သီချင်းမဆိုနိုင်ဘူးဆိုရင်လည်း ပြဿနာမရှိပါဘူးလေ၊ သူတို့လေးတွေဆီမှာ သူတို့အဖေရဲ့အမွေရှိနေဦးမှာပဲနော်။

သူမကတော့ ရွှင်လန်းတက်ကြွတဲ့ ကလေးလေးတွေဖြစ်လာဖို့ပဲ မျှော်လင့်ထားပါတယ်။

လုယန် တယောထိုးနေချိန် သူမရဲ့ ယောက္ခမနှင့် တူဖြစ်သူ ရှမင်ရှီးတို့ဟာ အလွန်စိတ်လှုပ်ရှားနေလျက်။ အကြောင်းကတော့ သူတို့လုမိသားစုမှာ ဂီတစွမ်းရည်လုံးဝမရှိသော်လည်း သူတို့အားလုံးက အနုပညာရှင်ဖြစ်လာဖို့ ဆန္ဒရှိနေတာကြောင့်ပင်။

သူတို့အားလုံး တယောထိုးဖို့ အပြေးအလွှားဖြစ်နေကြလျက်။

"ငါ့ကိုစမ်းကြည့်ခွင့်ပေးဦး! ငါလည်းတယောထိုးချင်တယ်!"

"သားလည်းစမ်းကြည့်မယ်!!!"

ချင်းရို့က သူ့ယောက္ခမဖြစ်သူနဲ့ ရှမင်ရှီးတို့ တယောထိုးတာကို နားထောင်ပြီးတဲ့နောက် လုယန်ရဲ့စကေးတွေဟာ အတော်လေးကောင်းနေပြီလို့ ခံစားလိုက်ရ၏။

လုမိသားစုထဲမှာ လုကောကသာ အရည်အချင်းအရှိဆုံး တယောဆရာတစ်ယောက်ပဲ။

လုကျုံးရီသည် အသက်ကြီးခါမှ "*ဒုတိယမြောက်နွေဦး"ကို ရှာဖွေတွေ့ရှိသွားသည့်နှယ် တယောထိုးခြင်းကို သဘောကျသွားခဲ့သည်။ ကံကောင်းထောက်မစွာဖြင့် ဤနေရာမှာ ကမ်းခြေရှိတာကြောင့် သူ ကမ်းခြေမှာ တယောသွားထိုးတတ်သဖြင့် လူတွေကို အနှောင့်အယှက်မဖြစ်စေတဲ့အတွက် သူ့ကို မည်သူမှ အပြစ်တင်ပြောဆိုခြင်းမရှိကြပေ။

(*ဒုတိယမြောက်အချစ်)

ပင်လယ်လှိုင်းလုံးများကသာ ကျောက်ဆောင်များပေါ်သို့ တဟုန်ထိုးတက်တက်လာကာ သူ့ကို ဒေါသတကြီး အော်ဟစ်နေသည့်အလား - ဆိုးရွားလွန်းတယ်၊ ဆိုးရွားလိုက်တာ၊ ဆိုးရွားလိုက်တာ...

သို့သော် ပင်လယ်ကြီးဟာ ဘာမှမတတ်နိုင်ပါသဖြင့် ကျောက်ဆောင်ကိုပဲ ဒေါသတကြီး အပြေးလာလာနေခဲ့ရလေရဲ့။

ရဲဘော်လောင်လုကတော့ ပင်လယ်ကြီးအရှေ့မှာ ပျော်ရွှင်စွာ ဆက်လက်တယောထိုးနေခဲ့လေသည်။

ရှမင်ရှီးက တယောထိုးရတာကို နှစ်သက်သော်လည်း သူက အဖော်မင်သူဖြစ်ရာ သူ့သူငယ်ချင်းတွေနဲ့အတူတူ ရှိရတာ ပိုနှစ်သက်သည်။

သူလည်း တယောထိုးလေ့ကျင့်ခဲ့၏။ အနုပညာရှင်တစ်ယောက်ဖြစ်လာချင်တဲ့သူ့စိတ်ကို ဘယ်အရာကမှ တားဆီးလို့မရပါချေ။

ချန်ကျင်းရိကတော့ ဂီတတူရိယာများကို စိတ်မဝင်စားဘဲ ပန်းချီဆွဲခြင်းကိုသာ နှစ်သက်လေ၏။

လောင်လုနှင့် ရှောင်လုတို့ရဲ့ တယောတီးခတ်သံကြောင့် ချင်းရို့တစ်ယောက် နည်းနည်း စိုးရိမ်ပူပန်သလို ခံစားခဲ့ရ၏။ ဒီလိုမျိုး ကိုယ်ဝန်ဆောင်ပညာရေးကို နားထောင်ပြီးရင် ကလေးလေးတွေကို ဘယ်လိုသက်ရောက်သွားလေမလဲဆိုတာ သူမလည်း မသိတော့ပါချေ။

သူမက ကလေးလေးတွေကို နေ့တိုင်း သီချင်းဆိုပြသလို သူတို့လေးတွေ နားဆင်ဖို့ ရေဒီယိုကိုလည်း ဖွင့်ထားပေးခဲ့သည်။

"လှုပ်နေတယ်!! ထပ်လှုပ်လာတယ်!!"

"မင်းတို့ပါးပါးရောက်လာတာကို မင်းတို့သိနေတာလားကွာ"

ကိုယ်ဝန်ဆောင်ပညာရေးတွင် ကလေးတွေရဲ့အဖေဖြစ်သူကို ပါဝင်ခွင့်ပေးခဲ့တာ အလွန်အသုံးဝင်လေ၏။ လုယန်က သူမဗိုက်ထဲက ကလေးလေးတွေကို ထိတွေ့ရတာ၊ စကားပြောရတာတွေကို သဘောကျနေခဲ့ပြီး သူက ကလေးလေးတွေကိုလည်း ညင်ညင်သာသာလေး ပွတ်ပေးနေခဲ့သည်။

လုယန်က သူမရဲ့ ဗိုက်ပေါ်မှာ နားကပ်ကာ အတွင်းထဲက ကလေးလေးတွေရဲ့ လှုပ်ရှားမှုကို နားထောင်တတ်သည်။ သူက သူမရဲ့ဗိုက်ကို ဖရဲသီးကြီးတစ်လုံးလို ပွေ့ဖက်ထားတတ်ပါသေးသည်။ ထိုအခါ ချင်းရို့ကလည်း ဖရဲသီးသေးသေးလေးကို ကိုင်ထားသည့်အလား သူ့ခေါင်းကို ပြန်လည်ပွေ့ဖက်ထားပေလိမ့်မည်။

အနီးနားတွင် အပြင်လူများမရှိပါက သူ ကလေးလေးတွေရဲ့ လှုပ်ရှားမှုတွေကို နားထောင်တဲ့အခါ သူမက သူ့ကို တက်ကြွစွာ အနမ်းပေးမည်ဖြစ်သလို လုယန်ကလည်း သူမအား ပျော်ပျော်ကြီး ပြန်နမ်းပေလိမ့်မည်။

ကျန်းချန်ပေ့ ခြံဝင်းထဲမှာ မတ်တပ်ရပ်နေရင်း ဘေးအိမ်က စုံတွဲလေးရဲ့ ဆက်ဆံရေးကို မြင်လိုက်ရ၏။ သူတို့က သက်ကယ်ထီးအောက်မှာ ထိုင်နေကြရင်း ပင်လယ်လေညင်းလေးကလည်း ဖြည်းညှင်းစွာ တိုက်ခတ်နေလျက်။

ဖြစ်နိုင်တာကတော့ ဗိုက်ထဲက ကလေးလေးတွေ လှုပ်သွားလို့ သူတို့နှစ်ယောက်လုံး အနည်းငယ် စိတ်လှုပ်ရှားနေရင်း အချင်းချင်း တီးတိုးစကားဆိုနေကြ၏။

- အရမ်းကြည်နူးစရာကောင်းလိုက်တာ။

ဘယ်လောက်ချိုမြိန်စရာကောင်းတဲ့မြင်ကွင်းလေးလဲ။

ကျန်းချန်ပေ့ ပထမဆုံးအကြိမ် သူ ဖခင်ဖြစ်ခဲ့စဥ်အချိန်က ပျော်ရွှင်မှုကို မမှတ်မိတော့။ သူ ပျော်ရွှင်ခဲ့တာကို သတိရမိပေမယ့် လုယန်လောက်တော့ မပျော်ခဲ့ဘူးဆိုတာ သူသာလျှင်သိပေသည်။ မျက်စိတမှိတ်အတွင်းမှာပဲ ကလေးမွေးလာခဲ့သည်ပင်။

သူ့မိန်းမရဲ့ ဝမ်းဗိုက်မှတစ်ဆင့် ကလေးကို သူ မထိဖူးသလို သန္ဓေသားလှုပ်ရှားမှုကိုလည်း နားမထောင်ဖူးခဲ့ပေ။ သူမရဲ့ဗိုက်ကိုလည်း မထိဖူးခဲ့သလို ကလေးအတွက် တယောမထိုးပေးခဲ့ဖူးဘူး၊ စကားလည်း မပြောပေးခဲ့ဖူးဘူး...

ကျန်းချန်ပေ့: "…"

ဘေးအိမ်က သံပုရာသီးတွေကို စားနေရသလို ခံစားရနေပါပြီနော်။

သူက ကတ်ကြေးယူကာ ခြံထဲက အလှဆုံးပန်းပွင့်တွေကို ညှပ်လိုက်ပြီး ညစာပြင်ဆင်နေတဲ့ ဟွမ်ရှင်းရင်ကို ကိုးရိုးကားယားဖြင့် ပန်းတွေထိုးထည့်ပေးလိုက်ရာ ဟွမ်ရှင်းရင်က သူ့အား အနည်းငယ် အံ့အားသင့်စွာ တချက်ကြည့်လိုက်ပေမယ့် ဘာမှမပြောဘဲ ရေပုလင်းကိုရှာပြီး ပန်းတွေကိုထည့်ကာ ထမင်းစား စားပွဲပေါ် တင်လိုက်သည်။

အရသာရှိလှတဲ့ ဟင်းလျာတွေဟာ လန်းဆန်းဖူးပွင့်နေတဲ့ပန်းတွေဖြင့် လိုက်ဖက်နေလေရဲ့။ ပွင့်ဖတ်တွေက ခရစ်စတယ်လိုကြည်လင်ပြတ်သားနေပြီး လေထုမှာ ထူးထူးခြားခြား နွေးထွေးနေလေသည်။

သားဖြစ်သူ ကျန်းရိချောင်က စားပွဲပေါ်က ပန်းတွေကိုမြင်တော့ ဒေါသတကြီးဖြင့် "ဘာလို့ သားကျ ပန်းခူးလို့မရဘဲ ဖေဖေကျခူးလို့ရတာလဲ?"

သူ့အဖေက သူ့ကိုကျ ပန်းမခူးဖို့ သတိပေးခဲ့ပေမယ့် ကိုယ်တိုင်ကျတော့ ပန်းတွေအများကြီးခူးထားတယ်ရော။

"ငါက အခွင့်ထူးခံပဲလေ"

ဟွမ်ရှင်းရင်: "သားလိုချင်ရင် တစ်ခုယူလို့ရတယ်"

ကျန်းချန်ပေ့: "လိုချင်ရင် မင်းကိုယ်တိုင်စိုက်ပေါ့"

xxx

Prev Next