Chapter 92

Volume 5 : ဇီဝသိပ္ပံဌာန

Chapter 92 (မျိုးရိုးဗီဇသန္ဓေပြောင်းလဲခြင်း ၁၀)

နံရံကို ရိုက်ခတ်လာသည့် ကျောက်တုံးကြီးတွေ၏ ကျယ်လောင်သော အသံကြောင့် လူတိုင်း ကြောက်ရွံ့တုန်လှုပ်သွားကြသည်။ နံရံပြိုကျသည်နှင့် ကားတစ်စင်းလုံးသည် ပြုတ်ကျလာသော ကျောက်တုံးများကြောင့် သတ္တုအပိုင်းအစများ ရိုက်ခတ်လာလိမ့်မည်။ 

ယွဲ့ရှင်းဝမ်က ဘတ်စ်ကားရှေ့သို့ လျှောက်လာပြီး စိတ်လှုပ်ရှားစွာ မေးသည်။

"လမ်းရှင်းပြီလား?"

ခယ်ရှောင်ပင်း: "အဲဒါက ရှင်းပြီ၊ ဒါပေမယ့် ရှောင်ထူရဲ့ ထောက်လှမ်းရေးအကွာအဝေးအတွင်း အတားအဆီးအသစ်တစ်ခု ပေါ်လာတယ်…"

ယွဲ့ရှင်းဝမ်က ကျန်းရှောင်နျန်ကို လာဖို့ လက်ယပ်ခေါ်လိုက်သည်။

"ဂျူနီယာညီလေး ဒီကိုလာဦး၊ ကားအရှေ့က နံရံကို ဖယ်ပြီး လမ်းအခြေအနေကြည့်လိုက်…"

ကျန်းရှောင်နျန်က ချက်ချင်းပဲ သွားကြည့်သည်။ အရှေ့ဘက်နံရံကို ဖယ်ရှားပြီးနောက် ရွှီယိရှန်းက မှန်ကို သန့်စင်ရန် wiper ကို အသုံးပြုခဲ့သည်။ ထိုမှသာ အားလုံးက သူတို့ရှေ့ရှိ လမ်းအခြေအနေကို မြင်လိုက်ရသည်။ မြေထိုးစက်က ဆယ်မီတာကျော်အကွာကို တွန်းထုတ်ခဲ့ပြီး ရွှံ့မြေပြိုမှုကြောင့် ပိတ်ဆို့နေသော လမ်းအားလုံးကို ရှင်းလင်းခဲ့သည်။ သို့သော် တောင်ထိပ်ပေါ်ရှိ ကျောက်တုံးများသည် အဆက်မပြတ် လိမ့်ဆင်းနေသောကြောင့် ရှင်းလင်းပြီးသော လမ်းမှာ ကျောက်တုံးများ ထပ်မံပြိုကျသဖြင့် ပိတ်ဆို့သွားခဲ့သည်။

မိနစ်ဝက်မျှသာရှိ၍ ပရော်ဖက်ဆာထန်ကို ကယ်တင်ရန် အကောင်းဆုံးအချိန်ကို ရွှေ့ဆိုင်းလိုက်ကြသည်။

ယွဲ့ရှင်းဝမ်က ခဏလောက်စဉ်းစားသည်။

"ငါတို့ မြေထိုးစက်နောက်ကနေ အနီးကပ်လိုက်ပြီး မြေထိုးစက်ကို ပြန်လာခိုင်းပြီးတော့ ဘတ်စ်ကားရှေ့က ကျောက်တုံးတွေကို ဖယ်ခိုင်းလိုက်မယ်…"

ကျန်းရှောင်နျန်: "ဟုတ်ပြီ၊ ငါပြန်လှည့်လိုက်မယ်…"

ရှေ့တွင် အလုပ်လုပ်နေသော မြေထိုးစက်သည် ကျန်းရှောင်နျန်၏ အမိန့်အရ လှည့်လာကာ လမ်းဘေးရှိ ကျောက်တုံးအားလုံးကို မြစ်ထဲသို့ တွန်းချလိုက်သည်။ မြေထိုးစက်က ဘတ်စ်ကားကို ထိလုနီးပါးအချိန်တွင် ယွဲ့ရှင်းဝမ်က ပြောလာသည်။ 

"ကားထွက်ဖို့ အဆင်သင့်ပြင်ထား…"

ရွှီယိရှန်းသည် ချက်ချင်း ကားစက်ကိုနှိုးလိုက်ပြီး မြေထိုးစက်နောက်သို့ အနီးကပ်လိုက်ခဲ့သဖြင့် မြေထိုးစက်မှ ရှင်းလိုက်သောလမ်းကို နောက်တစ်ကြိမ် ထပ်မပိတ်ဆို့နိုင်တော့ပေ။ သို့သော်လည်း မိုးသည်းထန်စွာ ရွာသွန်းမှုကြောင့် မြေပြိုမှုများ ဖြစ်ပွားခဲ့ပြီး အဆိုပါလမ်းသည် သွားလာရခက်ခဲသည်။ မြေထိုးစက်တစ်စီးက ရှေ့ကလမ်းကိုဖွင့်လိုက်ရင်တောင် အမြင့်ကနေ လှိမ့်ဆင်းလာသည့် ကျောက်တုံးကြီးတွေက တော်တော်အန္တရာယ်များသေးစည်။

ကျန်းရှောင်နျန်၏ မြေထိုးစက်သည် အထူးပစ္စည်းဖြင့် ပြုလုပ်ထားပြီး ကျောက်တုံးများ ပြုတ်ကျပါက လုံးဝပျက်စီးမည်မဟုတ်ပေ။

သို့သော် ဘတ်စ်ကားက သိပ်မခိုင်ခံ့ပေ။ ခေါင်မိုးက အပေါက်တစ်ခုဖြစ်သွားပြီး ပြတင်းပေါက်မှန်က အပိုင်းအစတွေ အများကြီးကွဲသွားသည်။ ကားပျက်စီးသွားပါက သယ်ယူပို့ဆောင်ရေးယာဉ်မရှိတော့ဘဲ ပိုဒုက္ခဖြစ်လိမ့်မည်။

ယွဲ့ရှင်းဝမ်က အသက်ပြင်းပြင်းရှူပြီး ချက်ချင်း ပြောလိုက်သည်။

"ရှောင်နျန်၊ ကာကွယ်ရေးကို ခိုင်ခံ့အောင်လုပ်ဖို့ ကားခေါင်မိုးပေါ်မှာ နောက်ထပ်နံရံတစ်ခု ဆောက်လိုက်…"

ကျန်းရှောင်နျန်က ခေါင်းငြိမ့်လိုက်ပြီး ချက်ချင်းပဲ ပြိုကျနေသည့် ကျောက်တုံးတွေကို ပိတ်ဆို့ဖို့ ဘတ်စ်ကား၏ အပေါ်ဘက်တွင် အလျားလိုက် နံရံကို ဆောက်လိုက်သည်။

ခေါင်းပေါ်မှ ကျယ်လောင်သော ပေါက်ကွဲသံတစ်ခု ထွက်ပေါ်လာပြီး နောက်ထပ် ကျောက်တုံးတစ်ခု ဆင်းသက်ကာ တိုက်ဆောင့်ခြင်းက ကားကိုယ်ထည် ယိမ်းယိုင်သွားစေသော်လည်း နံရံက "အကာအကွယ်ဒိုင်း" ကဲ့သို့ဖြစ်နေပြီး ကားကိုယ်တိုင်လည်း ပျက်စီးမည်မဟုတ်ပေ။

မြေထိုးစက်သည် ရှေ့သို့ မောင်းနှင်လာခဲ့ပြီး ဘတ်စ်ကားသည် အကြမ်းခံဒိုင်းအလွှာဖြင့် ခက်ခက်ခဲခဲ ရှေ့သို့ ရွေ့လျားသွားခဲ့သည်။ ဘမ်းဟူသော အသံသည် သူတို့နားထဲတွင် ဆက်တိုက် မြည်နေပြီး မရေမတွက်နိုင်သော ကျောက်တုံးများ၏ ဖိအားကြောင့် ကားတစ်စီးလုံး ရွေ့လျား၍ မရအောင် ပြုလုပ်နေသည်။

ရှောင်နျန်၏ နံရံဒိုင်းသည် လုံလောက်စွာ မခိုင်ခံ့ဘဲ သူတို့၏ကားကို ဖျက်ဆီးခံရမည်ကို စိုးရိမ်သောကြောင့် လူတိုင်း အသက်ရှုကြပ်သွားကြသည်။

ဆယ်မိနစ်ခန့် ကြောက်ရွံ့ပြီးနောက် သူတို့၏ ဦးခေါင်းထက်တွင် ကျယ်လောင်သော ဆူညံသံများ တဖြည်းဖြည်း အားနည်းလာကာ ရှေ့သွားမည့်လမ်းသည် လုံးဝရှင်းလင်းသွားပြီး အထစ်အငေါ့မရှိဘဲ ပြိုကျနေသော ကျောက်တုံးအပိုင်းကို ဖြတ်သွားကြသည်။

ရွှီယိရှန်းက သူ့ရှေ့ရှိ တောင်လမ်းကို ကြည့်ပြီး သက်ပြင်းချရင်း ပြောသည်။

"မိုးသက်မုန်တိုင်းက ကျနေတုန်းပဲ၊ တောင်လမ်းက မြင်ကွင်းက အရမ်းနိမ့်တယ်… နောက်ပြီး ငါတို့ ဘတ်စ်ကားရဲ့ ခေါင်မိုးက ကျောက်တုံးတွေနဲ့ ဖုံးနေတယ်… အဲဒါက ဝန်ပိုပိတယ်!"

အခုလေးတင် လမ်းပေါ်မှာ ကျန်းရှောင်နျန်၏ နံရံတွေက ကားကို အရိုက်မခံရအောင် ကာကွယ်ထားပေမယ့် ဘတ်စ်ကား၏ ခေါင်မိုးပေါ်မှာ ကျောက်ခဲတွေ ပိုများလာနေသည်။ မရေမတွက်နိုင်အောင် လေးလံသော ကျောက်တုံးများသည် ခေါင်မိုးပေါ်တွင် ပိနေသဖြင့် မောင်းနှင်ရန် လုံးဝမဖြစ်နိုင်ပေ။

ဝန်ပိုများပါက တောင်တက်လမ်းကိုသွားရန် ပို၍အန္တရာယ်များပါသည်။ မတော်တဆမှုတစ်ခုကြုံလာပါက ဘရိတ်ဖြင့် ရပ်တန့်နိုင်မည်မဟုတ်ပေ။

ယွဲ့ရှင်းဝမ်က သေသေချာချာ စဉ်းစားပြီး ပြောလိုက်သည်။

"ချင်လုက ကျောက်ထုလွှာလှုပ်ရှားမှုနဲ့ နေရာ ပြောင်းနိုင်တယ်မလား?"

ကျောက်ထုလွှာလှုပ်ရှားမှုသည် အလေးချိန်အားဖြင့် အကန့်အသတ်မရှိဘဲ နိယာမအားဖြင့် ခြေထောက်၏ အနေအထားကို ပြောင်းလိုက်ခြင်းဖြစ်သည်။ ဒါကိုကြားတော့ ချင်လုက ချက်ချင်း ပြောသည်။

"ငါ နေရာပြောင်းလို့ရတယ်၊ ဒါပေမယ့် နေရာပြောင်းဖို့ တိကျတဲ့အကွာအဝေးနဲ့ ထောင့်တစ်ခုလိုတယ်… နေရာပြောင်းတာမှားပြီး လူတိုင်းကို မြစ်ထဲပို့လိုက်မိရင် မကောင်းဘူး!"

တောင်လမ်း၏ ဤအပိုင်းသည် တစ်ဖက်တွင် မြင့်မားသော တောင်ထွတ်များနှင့် အခြားတစ်ဖက်တွင် ကြည်လင်ပြတ်သားသော မြစ်များရှိသည်။

ရှေ့သို့ တိုက်ရိုက်ပြောင်းနိုင်သော ဖြောင့်တန်းသောလမ်းနှင့် မတူဘဲ ကွေ့ကောက်သောလမ်းကို ကောင်းစွာမတွက်ချက်ပါက ဘတ်စ်ကားသည် မြစ်ထဲသို့ နေရာပြောင်းသွားမည်ဖြစ်ပြီး အားလုံးစုပေါင်း၍ ရေနစ်သွားမည်ဖြစ်သည်။

ယွဲ့ရှင်းဝမ်က ခယ်ရှောင်ပင်းကို ကြည့်ပြီး ပြောလိုက်သည်။

"ငါတို့ရဲ့ အမြင်အာရုံက နိမ့်လွန်းတယ်… စီနီယာအစ်ကိုရွှီ ကားရပ်လိုက်၊ ကုန်းဆင်းပိုင်းမှာ ဝန်ပိုတင်တာက အရမ်းအန္တရာယ်များတယ်… ရှောင်ထူကို အရင်စုံစမ်းကြည့်ခိုင်းလိုက်…"

မိုးသည်းထန်စွာရွာသွန်းမှုကြောင့် မြူများထူထပ်လာသည်။ လူတိုင်း၏မျက်လုံးများသည် ထူထပ်သောမြူမှ 5 မီတာအတွင်းရှိ အရာများကိုသာ မြင်နိုင်သည်။ သူတို့သည် တည်နေရာကို တွက်ချက်၍မရတာကြောင့် ကျန်းဖျင်စစ်၏ coordinate system ချင်လု၏ ကျောက်ထုလွှာလှုပ်ရှားမှုကို အသုံးမပြုနိုင်ပေ။

သို့ပေမယ့် ရှောင်ထူက စက်ရုပ်ဖြစ်ပြီး မြူခိုးဒဏ်မခံရဘဲ ရေဒါထောက်လှမ်းနိုင်သည့် အကွာအဝေးဟာ မီတာ ၅၀ လောက်ရှိပါသည်။ ထို့အပြင် ရှောင်ထူသည် သူ၏ခြေရင်းအောက်တွင် စက်သီးတစ်ခုရှိပြီး ယခုအချိန်တွင် တောင်လမ်းသည် ကုန်းဆင်းဖြစ်ပြီး ရှောင်ထူ၏အမြန်နှုန်းက လူသားများထက် ပိုမြန်သည်။

ခယ်ရှောင်ပင်းက ရှောင်ထူကို ကားထဲမှ ထုတ်လိုက်ပြီး ရှောင်ထူသည် မီးများကို ချက်ချင်း လင်းစေပြီး တောင်ပေါ်မှ လျှောကျသွားသည်။

ရှောင်ထူသည် လက်ပ်တော့နှင့် ထပ်တူပြုလုပ်ထားတာဖြစ်ပြီး ခယ်ရှောင်ပင်း၏လက်ပ်တော့တွင် ကွေးကောက်သောလမ်းကြောင်းကိုပြသနေစဉ် သူက လျှောဆင်းသွားသည်။ ကျန်းဖျင်စစ်က လမ်းကြောင်းကို ကြည့်ပြီး အကွာအဝေးကို အမြန်တွက်ချက်ကာ ချင်လုကို ပြောလိုက်သည်။

"ဘယ်ဘက်အောက်၊ 10 ဒီဂရီ၊ မီတာ 500…"

ချင်လုသည် ကမ္ဘာပေါ်ရှိ အနေအထားကို ပြင်ဆင်ပြီး နေရာပြောင်းကာ တောင်လမ်း၏ အခြားအပိုင်းတစ်ခုတွင် ဘတ်စ်ကားက ရုတ်တရက် ပေါ်လာသည်။

ရှောင်ထူသည် အခြားအကွာအဝေးကို လျှောက်လှမ်းရင်း ကျန်းဖျင်စစ်သည် သူ၏ ဦးနှောက်အတွင်း 3D ပုံစံတစ်ခုကို လျင်မြန်စွာ ဖန်တီးခဲ့ပြီး အကွေးလမ်းကြောင်း၏ အဆုံးအမှတ်ကို တွက်ချက်ခဲ့သည်။

"ညာဘက်အောက်၊ 30 ဒီဂရီ၊ မီတာ 300…"

30 ဒီဂရီ၊ ညာဘက်‌အောက်ထောင့်ကို စောင်းပြီး 300 မီတာ အကွာကို ပြောင်းလိုက်သည်။ ချင်လုနှင့် ဘတ်စ်ကားသည် လှည်ပတ်ပြီးနောက် တစ်ဖန်ခိုင်မြဲစွာ ဆင်းသက်လာခဲ့သည်။

လက်ပ်တော့ကို တစ်ချက်ကြည့်လိုက်ပြီး သည်နေရာက ကားကို U ပုံသဏ္ဌာန် တောင်ကုန်းလမ်း သုံးခုကို ဖြတ်ကျော်ပြီး တစ်ကီလိုမီတာအကွာက တစ်နေရာဆီ တိုက်ရိုက်ခုန်တက်သွားတာကို တွေ့ရတော့ လူတိုင်း အံ့သြသွားသည်။

ရွှီယိရှန်းက ချီးကျူးသည်။

"ဒီနည်းလမ်းက ကောင်းတယ်… ကွေးကောက်တဲ့ တောင်လမ်းကို ဖြည်းညှင်းစွာသွားရင် ဒီတောင်လမ်းကို 18 ခေါက်လောက် ကွေးကောက်နေရမှာမို့ ငါတို့ နာ‌ရီအတော်ကြာတဲ့အထိ ထွက်နိုင်မှာမဟုတ်ဘူး… ကျောက်ထုလွှာလှုပ်ရှားမှုနဲ့ ငါတို့က လမ်းကောက်ကို တိုက်ရိုက်ကျော်သွားပြီး အောက်ကိုဆင်းလိုက်ရုံပဲ…"

ချင်လုက စိတ်လှုပ်ရှားစွာ ပြောသည်။ 

"ဟုတ်တယ်! ကျောက်ထုလွှာလှုပ်ရှားမှုက ကျွန်မတို့ တူညီတဲ့မျက်နှာပြင်မှာပဲ နေရာပြောင်းရမယ်ဆိုတာမျိုး မလိုအပ်ဘူး… မျဉ်းဖြောင့်အကွာအဝေးက မီတာ 500 ရှိနေသ၍ ကျွန်မတို့က အပေါ်၊အောက်ထောင့်ဖြတ် တယ်လီပို့နိုင်တယ်…"

တစ်နည်းဆိုရသော် သူတို့ရှေ့မှာ တောင်တစ်ခုရှိလျှင် ချင်လုက တောင်ခြေကနေ တောင်ထိပ်အထိ မျဉ်းဖြောင့်အကွာအဝေးကို တွက်ချက်ပြီး လူတိုင်းကို တောင်ထိပ်ကို ရွှေ့ပေးနိုင်ပါသည်။

ဤအစွမ်းထက်သည့်လုပ်ဆောင်ချက်ကို ရှာဖွေတွေ့ရှိပြီးနောက် အဖွဲ့ဝင်များက စိတ်လှုပ်ရှားမှုဖြင့် သက်ပြင်းချခဲ့သည်။ 

"အသိပညာက စွမ်းအားပဲ!"

"ဖျင်စစ်ရဲ့ တိကျတဲ့ ထောင့်နဲ့ အကွာအဝေး တွက်ချက်မှုကို ကျေးဇူးတင်ရမယ်! မဟုတ်ရင် ဒီလောက် ကွေ့ကောက်နေတဲ့ တောင်လမ်းတွေ အများကြီးကို ငါ့မျက်လုံးတွေ ညောင်းလိမ့်မယ်!"

ရှောင်ထူသည် ဘီးများဖြင့် လျင်မြန်စွာလျှောချသွားပြီး တောင်ပေါ်မှ လမ်းတစ်လျှောက်လုံး လျှောဆင်းကာ လက်ပ်တော့ပေါ်ရှိ အကွေ့အကောက်မြေပုံကို ပြသထားသည်။ ကျန်းဖျင်စစ်သည် ထောင့်နှင့် အကွာအဝေးကို လျင်မြန်စွာ တွက်ချက်နိုင်သောကြောင့် အန္တရာယ်ရှိပြီး အကွေ့အကောက်များသော တောင်ကုန်းလမ်း၏ မူလကီလိုမီတာဆယ်နှင့်ချီသော အကွာအဝေးကို ချင်လု၏ 12 ကြိမ် ကျောက်ထုလွှာလှုပ်ရှားမှုဖြင့် ဘတ်စ်ကားကို တောင်အောက်ခြေသို့ တယ်လီပို့နိုင်ခဲ့သည်။

သည်လုပ်ငန်းစဉ်က နာရီဝက်လောက်သာ ကြာခဲ့သည်။

တောင်အောက်၌ မိုးသည်းထန်စွာရွာခြင်းမရှိဘဲ ရာသီဥတုသာယာသည်။

ရွှီယိရှန်းသည် ပြန့်ကားပြီး ကျယ်ဝန်းသောလမ်းဆီသို့ လှမ်းကြည့်ကာ တိမ်ကင်းစင်သော ကောင်းကင်ကို မျှော်ကြည့်ရင်း သက်ပြင်းရှည်ကြီးချလိုက်သည်။

"ဒါက အရမ်းစိတ်လှုပ်ရှားစရာကောင်းတယ်! တောင်လမ်းတွေမှာ ငါပြိုင်တုန်းက ဒီလောက်စိတ်မလှုပ်ရှားဖူးဘူး!"

ကျိုဖုန်းက ရယ်ကာပြောသည်။

"ဒီတစ်ခေါက်ပြီးလို့ မင်းပြန်သွားတဲ့အခါကျရင် မင်းရဲ့ကားမောင်းကျွမ်းကျင်မှုကလည်း ခုန်ပျံကျော်လွှားနိုင်တဲ့အထိ သေချာပေါက်တိုးတက်လာလိမ့်မယ်…"

ရွှီယိရှန်းက သူ့နှာခေါင်းကိုပွတ်ကာ ပြောသည်။

"ငါပြန်သွားရင် ဘယ်တော့မှ ကားမောင်းမပြိုင်တော့ဘူး၊ အသက်ရှင်နေရတာပဲ ကောင်းတယ်မဟုတ်ဘူးလား?"

ယွဲ့ရှင်းဝမ်က သူတို့ကို သတိပေးသည်။

"အားလုံးက ကားပေါ်ကနေ အရင်ထွက်ပြီး ကားခေါင်မိုးပေါ်က ကျောက်တုံးတွေကို ဖယ်ပစ်ကြမယ်…"

အားလုံးက ကားပေါ်မှ ဆင်းကြသည်။

ပရော်ဖက်ဆာထန်၏ မျက်နှာသည် ဖြူဖျော့နေပြီး သူတို့ကို မကောင်းဆိုးရွားအုပ်စုကဲ့သို့ ကြည့်နေလေသည်။

တောင်တက်လမ်း၏ ဤအပိုင်းကို “ဟေးဟော်ဆယ့်ခြောက်ကွေ့”ဟု ခေါ်ပြီး ကြောက်စရာကောင်းသော U ပုံသဏ္ဌာန်အကွေးအကောက်များ ဆယ့်ခြောက်ခုရှိသောကြောင့် ဖြစ်သည်။ ပုံမှန်အားဖြင့် ဤတောင်တက်လမ်းသည် မကြာခဏ ယာဉ်တိုက်မှုများသည့် အပိုင်းဖြစ်သည်။ အခုတလော မိုးသည်းထန်စွာရွာနေပြီး တောင်တွေပေါ်မှာ မြူတွေထူထပ်နေသည်။ သည်လိုရာသီဥတုမျိုးမှာ တောင်တွေထဲ မောင်းဝင်ရဲဖို့ မဖြစ်နိုင်ပေ။

ဤလူအုပ်စုသည် ဘတ်စ်ကားကို တောင်ပေါ်သို့ မောင်းနှင်ရုံသာမက လမ်းတစ်လျှောက် ကားကို တယ်လီပို့ရန် ထူးဆန်းသောမှော်ပညာကို အသုံးပြုကာ နာရီဝက်အတွင်း ဆယ်ခြောက်ကွေ့တောင်လမ်း၏ ကီလိုမီတာ ဒါဇင်ပေါင်းများစွာကို မောင်းနှင်ခဲ့သည်။

သူသိသလောက်တော့ သန္ဓေပြောင်းတွေကို တိရစ္ဆာန်မျိုးရိုးဗီဇတွေနဲ့ ပေါင်းစပ်ပြီး သူတို့၏ ရုပ်ပိုင်းဆိုင်ရာ စွမ်းရည်တွေကို မြင့်တင်ပေးထားပါသည်...

သည်လိုမှော်ပညာမျိုး သူ မကြားဖူးဘူးချေ။

ပရော်ဖက်ဆာထန်သည် ကားပေါ်တွင် တောင့်တင်းစွာထိုင်ကာ စဉ်းစားမရဖြစ်ခဲ့သည်။ လျှိုကျောက်ချင်းက ထိုင်ခုံဘေးကနေ ဖြတ်သွားရင်း သူ့ကို တစ်ချက်ကြည့်လိုက်ပြီး ပြုံးကာ ပြောသည်။

"ပရော်ဖက်ဆာထန် ဆင်းလာပြီး ကိုယ်လက်လှုပ်ရှားမှုလေးလုပ်ပါလား? အကြာကြီးထိုင်နေရတာ မပင်ပန်းဘူးလား?"

လင်းမန့်လော်သည် သူ့ထိုင်ခုံပတ်ပတ်လည်ရှိ နွယ်ပင်များကို ဖယ်ရှားလိုက်ပြီး ပရော်ဖက်ဆာထန်သည် ရှုပ်ထွေးသောအကြည့်ဖြင့် ကားထဲမှ ထွက်သွားခဲ့သည်။

လျှိုကျောက်ချင်းက သူ့အား ရေတစ်ဘူး ပေးလိုက်သည်။

"ခင်ဗျားရဲ့ထိတ်လန့်တုန်လှုပ်မှုကို ထိန်းချုပ်ဖို့ ရေနည်းနည်းသောက်လိုက်…"

ပရော်ဖက်ဆာထန်: "..."

ထိတ်လန့်တုန်လှုပ်မှုကို ထိန်းချုပ်ရမယ်? သူ့ရှေ့တွင် ဖြစ်ပျက်ခဲ့သည့်အရာများကြောင့် မယုံနိုင်လောက်အောင် ထိန်းမနိုင်သိမ်းမရဖြစ်မည်ဟု ခန့်မှန်းရသည်။

သူ့ဘေးတွင် ယွဲ့ရှင်းဝမ်က အဘိဓာန်ထူထူကိုဖွင့်ပြီး ပြောလိုက်သည်။

"အားလုံး နောက်ဆုတ်ကြ!"

လူအုပ်ကြီးက နောက်ဆုတ်သွားသည်။

ယွဲ့ရှင်းဝမ်က ရေရွတ်လိုက်သည်။

"ခုနစ်အပေါ် ရှစ်အောက်!"

ဘတ်စ်ကားပေါ်ရှိ ဘတ်စကတ်ဘောအရွယ် ကျောက်တုံးများကို မှော်စွမ်းအားတစ်ခုက ထိန်းချုပ်ထားသည်။ ကျောက်တုံးခုနစ်ခုသည် ကောင်းကင်သို့ပျံတက်ပြီး ရှစ်ခုက မြေပေါ်သို့ကျသွားသည်။ ချက်ချင်းဆိုသလိုပဲ ကျိုဖုန်းက သူ၏ညာလက်ကို မြှောက်လိုက်သည်။

"ပြုတ်ကျစမ်း!"

ဆွဲငင်အားသက်ရောက်မှုကြောင့် ကျောက်တုံးများသည် ဘေးဘက်သို့ ပြုတ်ကျသွားသည်။

ခေါင်မိုးပေါ်၌ ကျောက်တုံးသုံးခုကျန်နေသဖြင့် ကျန်းဖျင်စစ်သည် coordinate system ကို တိုက်ရိုက်အသုံးပြုကာ ကျောက်တုံးသုံးခုကို parabolic လှုပ်ရှားမှုတစ်ခုဖြင့် ဘေးဘက်သို့ကျသွားစေခဲ့သည်။

ကျန်းရှောင်နျန်သည် ကားခေါင်မိုးပေါ်တွင်ကပ်ထားသော အကြမ်းခံနံရံကို ဖယ်ရှားလိုက်ပြီး လင်းမန့်လော်သည် အစိမ်းရောင်နွယ်ပင်နှစ်ခုပါသော လှေကားထစ်တစ်ခုကိုတည်ဆောက်ခဲ့သည်။ ယွဲ့ရှင်းဝမ်နှင့် ကျန်းဖျင်စစ်တို့သည် အစိမ်းရောင်နွယ်ပင်များတစ်လျှောက်တက်ကာ ကားခေါင်မိုးကို ဂရုတစိုက်စစ်ဆေးခဲ့သည်။

ယွဲ့ရှင်းဝမ်၏အသံက ခေါင်မိုးမှ ထွက်ပေါ်လာသည်။

"ခေါင်မိုးက ချိုင့်နှစ်ခုဖြစ်သွားတယ်…"

ကျန်းဖျင်စစ်: "ကံကောင်းလို့ အပေါက်မဖြစ်သွားဘူး…"

ခယ်ရှောင်ပင်းက သူ့မျက်မှန်ကို ပင့်တင်ကာ ‌လေးနက်စွာ ပြောသည်။

"ဒါပေမယ့် ပြတင်းပေါက်မှန်တွေ တော်တော်ကွဲသွားတယ်… ညဘက်ဆို လေဝင်နိုင်တာကြောင့် အအေးမိဖို့ လွယ်တယ်မလား? ငါတို့ ဒီကားကို ပြင်ကြမလား?"

လျှိုကျောက်ချင်းက ခဏလောက် တွေးတောပြီး ပြောသည်။

"ပတ်တီးနဲ့ ပြတင်းပေါက်တွေကို ငါဖုံးပေးလိုက်မယ်ဆိုရင်ကော?

ယွဲ့ရှင်းဝမ်က သေသေချာချာ စဉ်းစားခဲ့သည်။ အားလုံးတွင် အပေါက်တွေကို ပြုပြင်ရန် စွမ်းရည်မရှိသောကြောင့် စီနီယာအစ်ကိုလျှိုအား လေကိုပိတ်ဆို့ရန် ပြတင်းပေါက်မှန်တချို့ကို ကာခိုင်ဖို့ ယာယီပြုလုပ်ခိုင်းစေခဲ့သည်။ ထို့ကြောင့် သူခေါင်းငြိမ့်ကာ ပြောလိုက်သည်။

"ကောင်းပြီ၊ စီနီယာအစ်ကိုလျှိုရဲ့ ကြိုးစားမှုအတွက် ကျေးဇူးတင်ပါတယ်…"

လျှိုကျောက်ချင်းသည် ရှည်လျားသောပတ်တီးကို ဆင့်ခေါ်ကာ ပျက်စီးနေသော ပြတင်းပေါက်ကို ပြင်လိုက်သည်။

ရလဒ်အနေဖြင့် ဘတ်စ်ကားတစ်ခုလုံး၏ မှန်ဖြင့်ပြုလုပ်ထားသော ပြတင်းပေါက်တချို့မှာ ပတ်တီးဖြင့်ပတ်‌ထားသော “နာမကျန်းဘတ်စ်ကား” ဖြစ်လာခဲ့သည်။

ရွှီယိရှန်းက သူ့နားထင်ကို ညင်သာစွာ ပွတ်သပ်ရင်း ပြောသည်။

"ဒါက ငါမောင်းဖူးသမျှထဲမှာ စတိုင်အကျဆုံးကားပဲ…"

လျှိုကျောက်ချင်းက ရယ်ကာ ပြောသည်။

"ပတ်တီးနဲ့ပတ်ထားတဲ့ကားက တကယ်စတိုင်ကျတယ်…"

ကျိုဖုန်းက သက်ပြင်းချပြီး ဘတ်စ်ကားပေါ်ရှိ ပတ်တီးစကို လေးလေးနက်နက်ကိုင်ကာ ပြောသည်။

"ငါတို့နဲ့အတူ ပါလာပြီး တစ်ကိုယ်လုံး‌ဒဏ်ရာတွေနဲ့ ဒီဘတ်စ်ကားကို ငါသံယောဇဉ်ဖြစ်မိတယ်…"

လူတိုင်း: "..."

ပတ်တီးတွေဖြင့် ဖုံးလွှမ်း‌ထားသည့် သည်စုတ်ပြတ်နေသောဘတ်စ်ကားကို လမ်းပေါ်မှာ မောင်းနှင်ခဲ့သည်။ သူတို့က လွတ်မြောက်ဖို့ သည်‌မှာရှိမနေဘဲ ရယ်စရာကောင်းသလို ခံစားရသည်။

ပရော်ဖက်ဆာထန်သည် ရေဘူးတစ်ဝက်ကို သောက်ပြီး အချင်းချင်း နောက်ပြောင်နေသော လူငယ်အုပ်စုကို ကြည့်ကာ နှုတ်ဆိတ်နေခဲ့သည်။

ယွဲ့ရှင်းဝမ်က လျှောက်လာပြီး အပြုံးဖြင့်မေးသည်။

"ပရော်ဖက်ဆာထန်၊ ကျွန်တော်တို့ကို သန္ဓေပြောင်းအဖွဲ့လို့ ထင်နေတုန်းလား?"

ပရော်ဖက်ဆာထန်၏ နှုတ်ခမ်းက တုန်လှုပ်သွားပြီး ဘယ်လိုပြန်ဖြေရမည်ကို မသိပေ။

သည်အဖွဲ့က တကယ်ကို ထူးဆန်းပေမယ့် သူ့အပေါ် ဆိုးရွားသောဆန္ဒတွေ မရှိဘူးမလား။ ထို့အပြင် ဇီဝလက်နက်ကဲ့သို့ အေးစက်သော သန္ဓေပြောင်းများနှင့် မတူဘဲ ဤလူများသည် လမ်းတစ်လျှောက်တွင် တစ်ဦးနှင့်တစ်ဦး ဂရုစိုက်ကာ စကားပြော ရယ်မောကြပြီး ခံစားချက်ရှိသော လူသားများနှင့် ပိုတူသည်။

#TK