Chapter 128

Volume 6 : အားကစားပြိုင်ပွဲများ

Chapter 128 (အားကစားပြိုင်ပွဲ ၁၉)

C183 သုတေသနအဖွဲ့သည် ကျောင်းသားများစွာ မျှော်လင့်ထားသည့် ချန်ပီယံဆုကိုလည်း ရရှိခဲ့သည်။ သည်အဖွဲ့က တကယ်ကို သန်မာပြီး သူတို့၏ခံစစ်ကို ဖြတ်ကျော်ကာ ချောမွေ့စွာ ကန်သွင်းဖို့ ကြိုးစားဖို့ဆိုတာ မဖြစ်နိုင်သလောက်ပါပဲ။ ပွဲပေါင်းများစွာအပြီးတွင် 183 ၏ ဂိုးပေါက်ထဲသို့ ဂိုး 5 လုံးသာ အောင်မြင်စွာသွင်းယူနိုင်ခဲ့ပြီး ပြိုင်ဘက်များသည် ကျန်းဖျင်စစ်ကို ထိန်းချုပ်ရန် သူတို့၏ဦးနှောက်များကို စုစည်းပြီးမှသာ အောင်မြင်သောကန်သွင်းချက်များဖြစ်ခဲ့သည်။

ဂိုးသမားနှစ်ဦးကြား ကွာဟမှုက ကြီးမားသည်။ C-183 ၏ ဂိုးသမားသည် ဘောလုံးလမ်းကြောင်းကို ပြောင်းလဲစေရုံသာမက ဘောလုံးကို လမ်းကြောင်းမှ သွေဖည်သွားစေကာ ဂိုးမသွင်းနိုင်သလို အဝေးကန်ချက်ဖြင့် ပြိုင်ဘက်၏ ဂိုးပေါက်ထဲသို့ ဘောလုံးကို ကန်သွင်းနိုင်သည်။

အခြားအဖွဲ့များမှ ဂိုးသမားများ လုပ်နိုင်ပါသလား။ မဖြစ်နိုင်ပါ။

သည်တော့ အားလုံးရှုံးသွားတာက လက်ခံနိုင်သည်။ ပြိုင်ပွဲအပြီးတွင် B-110 အဖွဲ့မှ ကျောင်းသားများသည် သူတို့နှင့် လက်ဆွဲနှုတ်ဆက်ရန် စတင်လုပ်ဆောင်ခဲ့သည်။

"ဂုဏ်ယူပါတယ်!" 

"ဒီနေ့ မင်းတို့မှာ ပျော်ရွှင်စရာဖြစ်ရပ်လေးခုတောင် ရှိနေပုံပဲ!"

ယွဲ့ရှင်းဝမ်က "ကျေးဇူးတင်ပါတယ်" ဟု ယဉ်ကျေးစွာပြောခဲ့သည်။

ဆုချီးမြင့်ပွဲကို ကစားကွင်းထဲတွင် ကျင်းပခဲ့သည်။ 183 သုတေသနအဖွဲ့မှ အဖွဲ့ဝင် 12 ဦးသည် စင်မြင့်ပေါ်၌ အတူတကွ ရပ်ခဲ့ကြသည်။ ဆုပေးမည့် ဧည့်သည်များ၊ ပန်းများ မရှိဘဲ တောက်ပသော ဆုတံဆိပ်တစ်ခု သူတို့၏လည်ပင်းတွင် အလိုအလျောက် ပေါ်လာသည်။

ဆုပေးပွဲအပြီးတွင် ခယ်ရှောင်ပင်းက အားလုံးကို တက်ကြွစွာ ပြောလိုက်သည်။

"အဖွဲ့လိုက် ဓာတ်ပုံရိုက်ကြရအောင်!"

ယွဲ့ရှင်းဝမ်: "ပွဲမစခင်က အဖွဲ့လိုက်ဓာတ်ပုံရိုက်ပြီးပြီမဟုတ်ဘူးလား?"

ခယ်ရှောင်ပင်း: "အဲဒီအချိန်တုန်းက ငါတို့က ဆုမရသေးတာ… ဒါပေမယ့် အခု အားလုံးက ရွှေတံဆိပ်ဆုကို ကိုင်ထားပြီး အမှတ်တရအထိမ်းအမှတ်ပေါ့!"

ဤအကြံပြုချက်ကို အဖွဲ့ဝင်များက ချက်ချင်း သဘောတူခဲ့သည်။ လူ 12 ယောက်က အမြန်တန်းစီပြီး နှစ်တန်းစီ တန်းစီကြသည်။ ရှောင်ထူက သူတို့ရှေ့မှာ ရပ်ပြီး ဓာတ်ပုံရိုက်သည်။ ခယ်ရှောင်ပင်းက ပြောလာသည်။

"ငါတို့ရဲ့ညာလက်နဲ့ ရွှေတံဆိပ်ဆုကို ကိုင်ထားရအောင်!"

အားလုံးက လိုက်လုပ်ကြသည်။

ဓာတ်ပုံရိုက်၍ ပြီးသွားသောအခါ ကျောင်းသားများသည် သူတို့၏မျက်နှာအနှံ့ အပြုံးများဖြင့် ရွှေတံဆိပ်ဆုများကို သေသေသပ်သပ် ကိုင်ထားခဲ့ကြသည်။ ခယ်ရှောင်ပင်းသည် နောက်ဆုံးဓာတ်ပုံ effect ကို အလွန်ကျေနပ်ခဲ့သည်။ 

"ငါ ဓာတ်ပုံတွေကို နောက်မှ စုစည်းပြီး အားလုံးရဲ့ တက်ဘလက်ကွန်ပျူတာဆီ ပို့ပေးမှာမို့ အချိန်မရွေးကြည့်လို့ရတယ်…"

သူက ရှောင်ထူကို ဖယ်လိုက်ချိန်တွင် ချင်လုက ရုတ်တရက် ပြောလာသည်။

"ငါ့အစ်မနဲ့ ငါ နှစ်ယောက်တည်း ဓာတ်ပုံရိုက်လို့ရမလား?"

သေချာပေါက် ခယ်ရှောင်ပင်းက ငြင်းမှာမဟုတ်ဘူး။

"ကိစ္စမရှိပါဘူး!"

အမြွှာညီအစ်မသည် နှစ်ယောက်အတူ ရပ်ကာ ရင်းရင်းနှီးနှီး ဓာတ်ပုံရိုက်ခဲ့ကြသည်။ မိန်းကလေး လေးယောက်သည် တူညီသော လုပ်ရှားမှုများနဲ့ “ညီအစ်မ ဓာတ်ပုံ” ရိုက်ခဲ့သည်။ လျှိုကျောက်ချင်းက စနောက်လေသည်။

"ရှင်းဝမ်နဲ့ ဖျင်စစ်တို့ကော နှစ်ယောက်တည်း ဓာတ်ပုံမရိုက်ဘူးလား?"

ကျန်းဖျင်စစ်က ယွဲ့ရှင်းဝမ်ကို ‌တည်ငြိမ်စွာ ခေါင်းငြိမ့်ခေါ်လိုက်သည်။

"လာလေ…"

ယွဲ့ရှင်းဝမ်သည် သူ့ဆီ လျှောက်လာပြီး သူ့ဘေးမှာ ရပ်လိုက်သည်။ ကျန်းဖျင်စစ်သည် သူ၏လက်ညာဖြင့် ရွှေတံဆိပ်ဆုကို ကိုင်ထားပြီး ဘယ်ဘက်ဖြင့် ယွဲ့ရှင်းဝမ်၏ပခုံးအား ညင်သာစွာ ကိုင်ထားသည်။ ပုံမှန်အားဖြင့် လေးနက်သော မျက်နှာပေါ်တွင် ရှားရှားပါးပါး အပြုံးတစ်ခုရှိနေသည်။

ယွဲ့ရှင်းဝမ်က တောက်ပစွာ ပြုံးလိုက်သည်။ သူသည် ရွှေတံဆိပ်ဆုကို ညာလက်ဖြင့် ကိုင်ထားပြီး ဘယ်လက်ဖြင့် အောင်ပွဲခံသည့် အမူအရာကို ပြုလုပ်ခဲ့သည်။

ဂရုတစိုက်တွက်ချက်ပြီးနောက် သူတို့နှစ်ယောက်သည် တစ်ယောက်နဲ့တစ်ယောက် သိလာတာ နှစ်အတော်ကြာပြီး ဘယ်တော့မှ အတူတူ ဓာတ်ပုံမရိုက်ဖူးကြပေ။

နောက်ဆုံးဓာတ်ပုံကိုကြည့်လိုက်တော့ ယွဲ့ရှင်းဝမ်သည် သူ့စိတ်ထဲမှာ အလွန်ကျေနပ်သွားသည်။ သူနှင့် ဖျင်စစ်၏ အတူတူ ရပ်နေပုံက အလွန်လိုက်ဖက်ညီသည်ဟု သူအမြဲတမ်း ခံစားမိသည်။ ယွဲ့ရှင်းဝမ်က လှည့်ပြီး ခယ်ရှောင်ပင်းကို ‌ပြောလိုက်သည်။

"ငါ့ဆီပို့ပေးဖို့ မမေ့နဲ့နော်…"

ခယ်ရှောင်ပင်း: "စိတ်မပူပါနဲ့၊ ငါပြန်သွားပြီး ဓာတ်ပုံပြင်ဖို့ အရောင်နဲ့ အလင်း ချိန်ညှိပြီးရင် အားလုံးဆီ ပို့ပေးမယ်!"

လျှိုကျောက်ချင်းက အံ့ဩသွားသည်။

"ရှောင်ခယ်က ဓာတ်ပုံပြင်တတ်သေးတာလား?"

ခယ်ရှောင်ပင်း: "ကျွန်တော်က ပုံမှန်အားဖြင့် ဘာမှမလုပ်ဘဲ အပျင်းထူတတ်လို့ ဓာတ်ပုံပြင်ဆော့ဖ်ဝဲလ်ကို လေ့လာခဲ့တာ…"

သူသည် Otaku တစ်ဦးဖြစ်ပြီး ပြင်ပအားကစားလုပ်ခြင်းမရှိသော်လည်း အခြားသူများထက် ကွန်ပျူတာဆော့ဖ်ဝဲ၊ ဝတ္ထုနှင့် anime အမျိုးအစားအားလုံးကို ပိုသိသည်။ လျှိုကျောက်ချင်းက သူ့ကို ပုခုံးပေါ် ပုတ်လိုက်ပြီး အပြုံးဖြင့် ပြောသည်။

"ရှောင်ခယ်က ငါတို့ 183 ရှေ့တန်း သတင်းထောက် ဖြစ်ထိုက်ပါတယ်!"

သူတို့အဖွဲ့က ဓာတ်ပုံရိုက်နေတာကို မြင်တော့ အခြားကျောင်းသားများလည်း သူတို့နဲ့ ဓာတ်ပုံရိုက်ဖို့ ပြေးလာကြသည်။ မျက်စိတစ်မှိတ်အတွင်းမှာပဲ ရှောင်ထူ၏ကွန်ပြူတာထဲမှာ သိမ်းဆည်းထားသော ဓာတ်ပုံရာနဲ့ချီသွားပြီး စာကြည့်တိုက်က အသံထုတ်လွှင့်လာခဲ့သည်။

"ဒီအားကစားပြိုင်ပွဲရဲ့ နောက်ဆုံးပြိုင်ပွဲ၊ အဖွဲ့လိုက်လွန်ဆွဲပွဲစပါတော့မယ်… စာရင်းသွင်းထားသော အဖွဲ့တွေက လက်မှတ်ရေးထိုးပြီး ပင်မနေရာကို အမြန်ဆုံးဝင်ရောက်ပေးပါ…"

အဖွဲ့တစ်ဖွဲ့စီသည် ဘောလုံးပြိုင်ပွဲတစ်ခုအပါအဝင် အများဆုံးအဖွဲ့လိုက်ပြိုင်ပွဲ 4 ခုအတွက် စာရင်းသွင်းနိုင်သည်ဟု စာကြည့်တိုက်က သတ်မှတ်ထားခဲ့သည်။ ယွဲ့ရှင်းဝမ်သည် 4x800 မီတာ လက်ဆင့်ကမ်းပြိုင်ပွဲ၊ အဖွဲ့လိုက်လှေလှော်၊ ဘောလုံးနှင့် လွန်ဆွဲခြင်းတို့ကို စာရင်းသွင်းခဲ့သည်။

လွန်ဆွဲခြင်းသည် အဖွဲ့လိုက်ပြိုင်ပွဲအားလုံးတွင် အလွယ်ကူဆုံးဖြစ်သည်။ အခြားပြိုင်ပွဲများထက် လွန်ဆွဲပြိုင်ပွဲအတွက် စာရင်းသွင်းထားသည့်အဖွဲ့များ ပိုများလာမည်ဟု ယူဆနိုင်သည်။

ဒါက မှန်ကန်ကြောင်း သက်သေပြခဲ့သည်။ ပင်မနေရာသို့ လူတိုင်းရောက်ပြီးနောက်တွင် ဖွင့်ပွဲအခမ်းအနားနှင့် တူညီလုနီးပါးရှိသည့် ပင်မနေရာတွင် လူပြည့်နေတာကို တွေ့လိုက်ရသည်။ ကျောင်းသားအားလုံး လာခဲ့ကြပြီး လွန်ဆွဲပြိုင်ပွဲအတွက် အဖွဲ့ပေါင်း 2000 ကျော် လက်မှတ်ရေးထိုးခဲ့ကြသည်။

ကွင်းကို 1 မှ 50 အထိ နံပါတ်များဖြင့် သတ်မှတ်ထားပြီး ဧရိယာ 50 ခွဲထားသည်။ လွန်ဆွဲဧရိယာတစ်ခုစီတွင် မျဉ်းကြောင်းသုံးကြောင်းပါရှိသည်။ အလယ်မျဉ်းသည် ဂိမ်း၏အလယ်ဗဟိုဖြစ်ပြီး အခြားမျဉ်းနှစ်ကြောင်းသည် မျက်နှာချင်းဆိုင်ရပ်နေမည့် ကျောင်းသားများကို ကိုယ်စားပြုပြီး ဤမျဉ်းကို ဖြတ်လို့မရပါ။

၎င်းနောက်တွင် ကျောင်းလွန်ဆွဲပွဲ၌ အသုံးပြုသည့် ကြိုးနှင့် တူသော အထူရှိသည့် ကြိုးတစ်ချောင်းကို အလယ်တွင် ချည်ထားပြီး ကြိုး၏အလယ်ဗဟိုကို ကိုယ်စားပြုသည့် အနီရောင်အလံငယ်တစ်ခုရှိသည်။

ထုတ်လွှင့်မှုတွင် စည်းမျဉ်းများကို စတင်ဖတ်ကြားခဲ့သည်။

"လွန်ဆွဲပြိုင်ပွဲမှာ ရှုံးထွက်စနစ်ကို အသုံးပြုပြီး ပါဝင်တဲ့အဖွဲ့အားလုံးက ကျပန်းအဖွဲ့တွေနဲ့ ကစားကြရမယ်… ချန်ပီယံဆုကို အဆုံးအဖြတ်မပေးခင်အထိ အနိုင်ရသူက နောက်တစ်ဆင့်ကိုတက်ပြီး ရှုံးတဲ့သူက တိုက်ရိုက်ထွက်ရမှာဖြစ်ပါတယ်… ပွဲအစမှာ ကြိုးရဲ့ အလယ်ကအနီရောင်အလံဟာ ကွင်းအလယ်ဗဟိုမျဉ်းနဲ့ လိုက်လျောညီထွေရှိဖို့ လိုအပ်ပြီး အနိုင်ရသူကို ဆုံးဖြတ်ဖို့ အလံက တစ်ဖက်ခြမ်းရဲ့နယ်နိမိတ်အတွင်း ရွေ့သွားရပါမယ်…"

အန်နီမေးရှင်းကို ဖန်သားပြင်ကြီးတွင် ပြသခဲ့ပြီး စည်းမျဉ်းများက နားလည်ရလွယ်ကူသည်။ အနိုင်ရချင်ရင် ကြိုးကို အားကြိုးမာန်တက် ဆွဲပြီး အလယ်မှ အနီရောင်အလံကို ကိုယ်ဘက်သို့ ဆွဲရမည်။ သို့သော် ကြိုးဆွဲခြင်းမှာလည်း ကျွမ်းကျင်မှု လိုအပ်ပြီး အဖွဲ့ဝင်များအားလုံး ခွန်အားကြီးမားပြီး စည်းချက်တူသ၍ သာမာန်လွန်ဆွဲပြိုင်ပွဲသည် လွယ်ကူစွာ အနိုင်ရရန် လွယ်ကူပါသည်။ သို့သော် ယနေ့ အားကစားပြိုင်ပွဲတွင် အထူးစွမ်းရည်များကို အသုံးပြုထားပြီး ပြင်းထန်သောခွန်အားတစ်ခုတည်းဖြင့် အလုပ်မဖြစ်နိုင်ပါ။ တစ်ဖက် အုပ်စုလိုက်ထိန်းချုပ်မှုကို အသုံးပြုပါက လွန်ဆွဲပွဲကို မည်သို့နိုင်မည်နည်း။ 

တစ်ချိန်တည်းတွင် လွန်ဆွဲပြိုင်ပွဲတစ်ပွဲ၌ အဖွဲ့ ၅၀ ရှိသည်။ ယွဲ့ရှင်းဝမ်သည် အကြိမ် 120 ကိုကျခဲ့ပြီး တတိယဂိမ်းက သူတို့၏အလှည့်ဖြစ်လာမည်ဖြစ်သည်။

ယွဲ့ရှင်းဝမ်က သူ၏အဖွဲ့ဝင်များကို ပွဲကြည့်စင်သို့ ခေါ်သွားခဲ့သည်။

ကျန်းဖျင်စစ်က အသံတိုးတိုးဖြင့် မေးသည်။

"မင်းသေချာလား?"

ယွဲ့ရှင်းဝမ်က ခဏလောက်စဉ်းစားပြီး ပြောလိုက်သည်။

"ငါတို့ရဲ့စွမ်းရည်အများစုကို ဘောလုံးပွဲ‌မှာ အသုံးပြုခဲ့ပြီးပြီ… လက်ရှိ ငါတို့မှာကျန်တာက ချင်မြောင်ရဲ့ဝိုင်ခွက်၊ ချင်လုရဲ့ ဆိုက်ဘေးရီးယားအအေးလှိုင်း၊ စီနီယာအစ်မလန်ရဲ့ အရပ်ဘက်ရေးရာဗျူရိုနဲ့ စီနီယာအစ်ကိုရွှီရဲ့ DNA Helix၊ ဟုတ်တယ်မလား?"

လူတိုင်းက ခေါင်းငြိမ့်လိုက်သည်။

24 နာရီ စောင့်ဆိုင်းချိန်ပါသော စွမ်းရည်များကို မနေ့က တစ်ကြိမ် အသုံးပြုခဲ့ပြီး ယနေ့တွင် အသုံးပြုနိုင်ခဲ့သည်။ ယွဲ့ရှင်းဝမ်၏ လိမ္မော်သီးဝယ်ယူခြင်းကဲ့သို့သော အကန့်အသတ်ရှိသော စွမ်းရည်တချို့သည် ဂိမ်းတစ်ခုလုံးတွင် သုံးကြိမ်သာအသုံးပြုနိုင်ပြီး အဆိုပါလှုပ်ရှားမှုကြီးများကို ဘောလုံးဂိမ်းများတွင် အသုံးပြုခဲ့သည်။

ထို့ကြောင့် နောက်ထပ်ပြိုင်ပွဲတွင် ကစားရန် သူတို့မှာ ကတ်အများကြီး မရှိတော့ပေ။

ပွဲစစချင်းမှာတော့ ကွင်းထဲက အဖွဲ့တစ်ဖွဲ့ချင်းစီ၏ အားပေးသံများ ဆူညံသွားခဲ့သည်။ လွန်ဆွဲပြိုင်ပွဲသည် အဖွဲ့ဝင်အားလုံး၏ စည်းချက်ညီညီရှိရန် လိုအပ်ပြီး တစ်ချိန်တည်းတွင် အလုပ်ကြိုးစားရန် လိုအပ်သည်။ ယွဲ့ရှင်းဝမ်က ပြောလိုက်သည်။

"နောက်ကျရင် ကျွန်တော်တို့ တစ်၊နှစ်၊သုံးအော်မယ်၊ သုံးအထိအော်ပြီးရင် ကျွန်တော်တို့ တစ်ချိန်တည်း အားဆွဲကြမယ်… စီနီယာအစ်မလင်းက ပြိုင်ဘက်ဆီကနေ အဖွဲ့လိုက်ထိန်းချုပ်ရေးကို ခံနိုင်အောင် သန့်စင်ခြင်းမြက်ခင်းပြင်ကို ကျွန်တော်တို့ခြေထောက်အောက်မှာထားဖို့ အာရုံစိုက်ပါ…"

လင်းမန့်လော်: "ငါ့ရဲ့မြက်ခင်းပြင်ကို သုံးကြိမ်ပဲ အသုံးပြုနိုင်တယ်…"

ယွဲ့ရှင်းဝမ်က ရေတွက်ပြီး ပြောခဲ့သည်။

"သုံးကြိမ်ဆိုတော့ ငါတို့က တတိယအချီကိုတက်ဖို့အထိ လုံလောက်တယ်၊ ပြီးမှ ဘာဖြစ်မလဲဆိုတာ ငါတို့ကြည့်ကြတာပေါ့…"

မကြာခင်မှာ အကြိမ် 120 အလှည့်ကျပြီး ယွဲ့ရှင်းဝမ်က အားလုံးကို ကွင်းထဲသို့ ခေါ်ဆောင်သွားသည်။

ပထမအချီတွင် တွေ့ဆုံခဲ့ကြသော အဖွဲ့သည် အုပ်စုလိုက်ထိန်းချုပ်မှုဖြင့် စတင်ခဲ့ပြီး လင်းမန့်လော်၏ မြက်ခင်းပြင်ဖြင့် ဖြေရှင်းခဲ့ကြသည်။ ယွဲ့ရှင်းဝမ်နှင့် အခြားသူများက အခြားစွမ်းရည်များကို အသုံးမပြုခဲ့ကြပေ။ သူတို့သည် တစ်၊ နှစ်၊ သုံး အော်ကာ လူတိုင်းက ဂိမ်းကိုအနိုင်ရဖို့ တစ်ချိန်တည်းမှာ ကြိုးစားအားထုတ်ခဲ့ကြသည်။

ဒုတိယအချီတွင် တစ်ဖက်၌ အမျိုးသား 10 ဦးနှင့် အမျိုးသမီး 2 ဦး ပါဝင်ခဲ့သည်။ ယောင်္ကျားလေးတော်တော်များများသည် သန်မာကြပြီး 183 သုတေသနအဖွဲ့ထဲက မိန်းကလေးများထက် သူတို့၏ ခွန်အားက သေချာပေါက် သန်မာပါသည်။ ယွဲ့ရှင်းဝမ်သည် ချင်လုကို အချက်ပြပြပြီး ချင်လုသည် ပြိုင်ဘက်ကို အေးခဲသွားစေရန် “ဆိုက်ဘေးရီးယားအအေးလှိုင်း”ဖြင့် ဂိမ်း စတင်ခဲ့ပြီး အနိုင်ရရန်အတွက် သူမ၏အဖွဲ့ဝင်များကို အောင်မြင်စွာ ကူညီပေးခဲ့သည်။

တတိယအချီတွင် ရွှီယိရှန်း ဆန့်ကျင်ဘက်မှ လူများစွာကို ချည်နှောင်ရန် DNA helix ကိုအသုံးပြုခဲ့ပြီး အားလုံးက ဂိမ်းကိုအနိုင်ရရန် အခွင့်အရေးယူခဲ့ကြသည်။

စတုတ္ထအချီမှာ တွေ့ခဲ့သည့် အဖွဲ့ကလည်း ခွန်အားဖြင့် အနိုင်ယူဖို့ ခက်ခဲပါသည်။ ဂိမ်းအစတွင် ချင်မြောင်သည် ဝိုင်ခွက်ကိုဖွင့်ကာ ပြိုင်ဘက်၏လက်ထဲရှိ ကြိုးက မြေပြင်ပေါ်ကို ချက်ချင်း ပြုတ်ကျသွားသည်။ 183 အဖွဲ့က အားထုတ်စရာမလိုဘဲ ကြိုးကို သူတို့ဘက်သို့ ဆွဲလိုက်သည်။

ပဉ္စမအချီမှာ ကံကောင်းခဲ့သည်။

ဆဋ္ဌမအချီတွင် လင်းမန့်လော်၏ သန့်စင်ခြင်းမြက်ခင်းပြင်က ကုန်သွားခဲ့ပြီး လူတိုင်း၏စွမ်းရည်များက ကုန်ဆုံးလုနီးပါးဖြစ်ခဲ့သည်။ အစမှာတင် သူတို့ထိန်းချုပ်ခံရပါက ရှုံးသွားလိမ့်မည်။

မကြာမီ ပြိုင်ပွဲစတင်ခဲ့သည်။ ဆန့်ကျင်ဘက်အခြမ်းမှာ ဂီတတက္ကသိုလ်မှ ကျောင်းသားများရှိသည်။ အစပိုင်းတွင် သူတို့သည် “မမေ့နိုင်သောည”ကို ထုတ်လွှင့်ခဲ့ပြီး 183 အဖွဲ့ကို အိပ်ပျော်စေရန် ကြိုးပမ်းခဲ့သည်။ သို့သော် ၎င်းသည် စက္ကန့်အနည်းငယ်မျှသာရှိသော်လည်း သီချင်းဆိုရန် အချိန်ယူရသည်။

ကျန်းဖျင်စစ်သည် ရုတ်တရက် အကြံတစ်ခုရပြီး သူ့ညာလက်ကို မြှောက်လိုက်ကာ သူ့လက်ဖဝါးထဲက တြိဂံတစ်ခုကို အမြန်ပစ်လိုက်သည်—

ပုစဉ်းရင်ကွဲအတောင်ပံများကဲ့သို့ ပါးလွှာပြီး ဖောက်ထွင်းမြင်ရသော တြိဂံပေတံသည် ကြိုးကို အလျားလိုက်ဖြတ်ကာ လွန်ဆွဲရာတွင် အသုံးပြုသည့်ကြိုးအား အမှန်တကယ် ဖြတ်တောက်ပစ်လိုက်သည်။

ဆန့်ကျင်ဘက်မှ သီချင်းဆို၍မပြီးမီတွင် ကြိုးပြတ်သွားပြီး 183 သုတေသနအဖွဲ့မှ အမြန်နောက်ဆုတ်ကာ ကြိုးကို ပြတ်ပြတ်သားသား ဆွဲလိုက်ကြသည်။

ကျန်းဖျင်စစ် ကြိုးဖြတ်သည့် အနေအထားသည် ပြိုင်ဘက်ဘက်ကိုသာဖြစ်ပြီး အနီရောင်အလံက သူ့ဘက်တွင် ရှိနေသည်။ ထို့ကြောင့် သူတို့သည် “အနီရောင်အလံကို သူတို့၏ နယ်နိမိတ်ဘက် ဆွဲနိုင်ခြင်း” အခြေအနေဖြင့် အနိုင်ရသူကို ဆုံးဖြတ်ခဲ့သည်။

183 သုတေသနအဖွဲ့မှ အနိုင်ရခဲ့သည်။

တစ်ဖက်ရှိ ကျောင်းသားများက အံ့အားသင့်သွားကြသည်။

"လွန်ဆွဲတဲ့ကြိုးကို ဖြတ်လို့ရတာလား?"

"သေချာတယ်၊ 183 ရဲ့ ဦးနှောက်လှည်ပတ်မှုက ပုံမှန်မဟုတ်ဘူး!"

တကယ်တော့ “ကြိုးပျက်ရင် ပြန်ဆွဲဖို့ လိုအပ်တယ်” ဒါမှမဟုတ် “ကြိုးဖြတ်ရင် ပြစ်ဒဏ်ကျမယ်”ဆိုသော စည်းမျဉ်းမပြောထားသောကြောင့် ကျန်းဖျင်စစ်က စမ်းကြည့်ချင်တာဖြစ်သည်။ စာကြည့်တိုက်၏ စည်းမျဉ်းများတွင် ၎င်းကို မဖော်ပြထားသည့်အတွက် စမ်းကြည့်တာ ထိခိုက်မှုမရှိပါဘူး။ ပြစ်ဒဏ်ကျူးလွန်ရင် သူတို့တွေ ဖယ်ထုတ်ခံရမှာက ကြီးမားသောကိစ္စဖြစ်သည်။ မည်သို့ပင်ဆိုစေကာမူ တစ်ဖက်အဖွဲ့သည် “မမေ့နိုင်သောည”ကို သီဆိုလိုက်သည်နှင့် တစ်ပြိုင်နက် သူတို့အားလုံးက အိပ်ငိုက်ပြီး ဖယ်ထုတ်ခံရမည်ဖြစ်ကာ ရလဒ်က အတူတူပင်ဖြစ်ပါသည်။

ဒါကို ပြစ်ဒဏ်လို့ မခေါ်ဘူးဆိုရင်ကော? သူတို့တွေ ဂိမ်းကိုအနိုင်ရဖို့ အခွင့်အရေးယူလို့ရတယ်!

ကျန်းဖျင်စစ်၏ကြိုးစားမှုသည် မှန်ကန်သောရွေးချယ်မှုဖြစ်ကြောင်း သက်သေပြခဲ့သည်။ 183 ၏ ကျောင်းသားများသည် ကမ္ဘာသစ်ဆီသို့ တံခါးဖွင့်လာခဲ့သည်။ နောက်ထပ်သတ္တမနှင့် အဋ္ဌမအချီတွင် ဝီစီသံမြည်လာသည်နှင့်တစ်ပြိုင်နက် ကျန်းဖျင်စစ်သည် တြိဂံပေတံဖြင့် ကြိုးကိုဖြတ်တော့သည်။

လွန်ဆွဲပွဲတွင် အဖွဲ့များ များလွန်းသဖြင့် လူအများအပြားသည် သူတို့၏ ပြိုင်ဘက်များမှလွဲ၍ သူတို့၏ စစ်ဆင်ရေးကို ရှင်းရှင်းလင်းလင်း မမြင်ကြပေ။

C-183 သုတေသနအဖွဲ့သည် ကွာတားဖိုင်နယ်သို့ ရောက်ရှိလာသည့်တိုင်အောင် ပရိသတ်များ မသိရှိခဲ့ပေ။ 

လွန်ဆွဲပြိုင်ပွဲသည် သူတို့ကြောင့် “ကြိုးဖြတ်ပြိုင်ပွဲ”အဖြစ် ပြောင်းလဲခဲ့သည်။

183 ၏လက်ထဲမှာ ပျက်စီးသွားသော ကြိုးများ အများကြီးရှိသည်။

ဖိုရမ်မှာ ထပ်မံပေါက်ကွဲပြီး လူတော်တော်များများက အသက်ရှူကျပ်နေကြသည်။

"လခွမ်း၊ ကြိုးကိုဖြတ်ဖို့ ငါဘာကြောင့် မတွေးခဲ့မိတာလဲ?"

"ငါတို့သာ အလယ်ကနေ ကြိုးကို ဖြတ်လို့ရမယ်မှန်း သိခဲ့ရင် အလယ်စည်းကို ငါတို့ဘက် အလွယ်တကူဆွဲလို့ရတယ်မဟုတ်ဘူးလား?"

"စည်းမျဉ်းတွေအပေါ် ငါတို့ရဲ့နားလည်မှုက လုံလောက်မှုမရှိသေးဘူး…"

ကျန်းဖျင်စစ်သည် မေးခွန်းကို စစ်ဆေးကြည့်သောအခါ ထိပ်တန်းကျောင်းသား၏ ‘သော့ချက်ကို ဆုပ်ကိုင်နိုင်သည်’ဟူသော စည်းမျဥ်းများတွင် ဟာကွက်များကို ချက်ချင်း ဖမ်းမိခဲ့သည်။

ရှစ်သင်းမှ လေးသင်းပြိုင်ပွဲဖြစ်သည်။

တစ်ဖက်ခြမ်းရှိ ရူပဗေဒဌာနသည် လျှပ်စစ်ကို တိုက်ရိုက်အသုံးပြုခဲ့ပြီး လျှပ်စီးကြောင်းသည် ကြိုးတစ်လျှောက်စီးသွားကာ ပြင်းထန်သော ဓာတ်လိုက်မှုက လူတိုင်းကို ကြိုးအား မကိုင်နိုင်အောင် ဖြစ်သွားစေသည်။ လျှိုကျောက်ချင်းသည်လည်း ကျန်းဖျင်စစ်၏ လုပ်ဆောင်ချက်ကို သင်ယူခဲ့ပြီး ကြိုးဖြတ်ရန်အတွက် ခွဲစိတ်ဓားကို ထုတ်လိုက်ကာ အားလုံးက ကြိုးအလယ်စည်းကို ဆွဲပြီး နောက်ဆုံးလေးသင်းထဲ ဝင်ရောက်ခဲ့သည်။

သို့သော် လေးသင်းမှ ဖိုင်နယ်နှစ်သင်းပြိုင်ပွဲ၌ ပြိုင်ဘက်သည် C-183 သုတေသနအဖွဲ့၏ လုပ်ဆောင်ချက်ကို မြင်ပြီး အစမှာတင် ချက်ချင်း ဦးဆောင်ခဲ့သည်။

သူတို့သည် သုတေသနအဖွဲ့၏ အမြန်နှုန်းအပိုဆုရသော အဖွဲ့ A ဖြစ်ကြပြီး အဖွဲ့ C ထက် ပိုမြန်သည်။

ရူပဗေဒဌာနမှ ကောင်လေးတစ်ယောက်သည် မည်သည့်စွမ်းရည်အား ထည့်သွင်းထားသည်ကို သူတို့မသိခဲ့ပေ။ လူတိုင်းသည် သူတို့လက်ထဲက ကြိုးဟာ အလွန်နူးညံ့နေပြီး လုံးဝမကိုင်နိုင်အောင်ဖြစ်‌ကာ ရေခဲတုံးများပေါ်တွင် လျှောက်နေသလိုမျိုး ဖြစ်နေသည်ဟု ခံစားလိုက်ရသည်။ 2 စက္ကန့်အကြာတွင် C-183 ကျောင်းသားများအားလုံး ချော်လဲကာ မြေပြင်ပေါ်သို့ လဲကျသွားသည်။

ကြိုးကို တစ်ဖက်က ဆွဲလိုက်ပြီး သူတို့တွေ ဖြတ်ဖို့ နောက်ကျသွားလေပြီ။

ယွဲ့ရှင်းဝမ်က စိတ်ရှုပ်စွာ ထလိုက်ပြီး ပြောသည်။

"ဘာဖြစ်သွားတာလဲ?"

ကျိုဖုန်းက မြေပြင်ကိုကြည့်ကာ ပြောလိုက်သည်။

"ငါတို့ဘက်ခြမ်းက ပွတ်တိုက်မှုတွေကို ဖယ်ရှား‌လိုက်တာဆိုတော့ တစ်ဖက်က စက်ပြင်ဘာသာရပ်ဖြစ်နိုင်တယ်!"

လွန်ဆွဲပြိုင်ပွဲတွင် ပွတ်တိုက်မှုက အလွန်အရေးကြီးပါသည်။ နှစ်ဖက်စလုံးသည် ခွန်အားနှင့် လုံးဝတူညီသည်ဟု ယူဆပါက ဖိနပ်နှင့် မြေပြင်ကြားတွင် ပွတ်တိုက်မှု ပိုပြင်းထန်သော မည်သည်မဆို အနိုင်ရရန် အလားအလာ ပိုများပါသည်။ ထို့ကြောင့် လူအများအပြားသည် လွန်ဆွဲပြိုင်ပွဲများတွင် ပါဝင်ကြသည့်အခါ ချွန်ထက်သောဖိနပ်များကို ဝတ်ဆင်ကြမည်ဖြစ်သည်။ လက်မှာလည်း အလားတူပါပဲ။ ခြောက်သွေ့သောလက်များသည် ချွေးထွက်များသောလက်များထက် ပွတ်တိုက်မှုပိုများပြီး ကြိုးကို ဆွဲရန် ပိုမိုလွယ်ကူသည်။

ပွတ်တိုက်မှုကို ဖယ်ရှားလိုက်သည်နှင့် ကြိုးကို လက်နှင့်မကိုင်နိုင်ရုံသာမက ခြေလက်များလည်း မတည်မငြိမ်ဖြစ်လာသည်။

ဘယ်လိုလုပ်ပြီး သည်လွန်ဆွဲပွဲကို ဆက်လုပ်လို့ရတော့မှာလဲ။

C-183 သုတေသနအဖွဲ့သည် ယခုအချိန်အထိ စည်းမျဉ်းများတွင် ဟာကွက်များကို ဖမ်းမိထားသော်လည်း ပြိုင်ဘက်သည် လွန်ဆွဲပြိုင်ပွဲ၏ အခြေခံနိယာမကို ဆုပ်ကိုင်ထားပြီး စက်ပြင်ဘာသာရပ်ဖြင့် ယှဉ်ပြိုင်မှုကို အနိုင်ရတာက မယုံနိုင်စရာမရှိပါ။

ယွဲ့ရှင်းဝမ်သည် တစ်ဖက်အဖွဲ့နှင့် လက်ဆွဲနှုတ်ဆက်ရန် အစပြုခဲ့သည်။ 

"ဂုဏ်ယူပါတယ်!"

တစ်ဖက်က စက်ပြင်ဘာသာရပ်မှာ သင်ယူနေသည့် ကောင်လေးက ပြုံးပြီး ပြောလိုက်သည်။

"183 ကို အနိုင်ရတာက ကျွန်တော်တို့အတွက် ဖိုရမ်မှာ ခဏတာကြွားဖို့ လုံလောက်ပြီ!"

ကျိုဖုန်းက မေးလိုက်သည်။

"အတန်းဖော်၊ စက်ပြင်စွမ်းရည်တွေက အသုံးပြုရတာလွယ်လား?"

ကောင်လေးက ဆိုသည်။ 

"အဆင်ပြေပါတယ်… ကျွန်တော်က စက်ပြင်နဲ့သက်ဆိုင်တဲ့ ပွတ်တိုက်မှု၊ တုံ့ပြန်မှုစွမ်းအား၊ ဖိအား၊ စပရင်တွေကို လဲလှယ်ခဲ့တာ… တိုက်ခိုက်ရေးစွမ်းအားက သိပ်မပြင်းထန်ပေမယ့် လှည့်ကွက်တွေအတွက် အတော်လေးအဆင်ပြေတယ်…"

ရူပဗေဒဌာနရှိ လူအများစုသည် လျှပ်စစ်၊ အလင်းနှင့် သံလိုက်စက်ကွင်းများကိုသာ အဓိကထားကြသည်။ ယခုအခါ စက်ပြင်ဘာသာရပ်ကို အဓိကသင်ကြားသည့် ကျောင်းသားအား သူတို့တွေ ပထမဆုံးအကြိမ် တွေ့ဖူးခြင်းဖြစ်သည်။ ကျိုဖုန်းသည် အနာဂတ်တွင် သူ့မှာ အမှတ်အလုံအလောက်ရှိရင် စက်ပြင်စွမ်းရည်တချို့ကို လဲလှယ်ကြည့်ရမလားဟု တွေးတောနေခဲ့သည်။

ထို့အပြင် စက်ပြင်သည် ရူပဗေဒ၏ အခြေခံအုတ်မြစ်ဖြစ်သည်။

ပွတ်တိုက်မှုကို ဖယ်ရှားနိုင်စွမ်းက အလွန်အားကောင်းသည်။ အပြန်အလှန်အားဖြင့် ပွတ်တိုက်မှု များလာပါက ဆန့်ကျင်ဘက်သို့ သွားလာနိုင်မည် မဟုတ်ပါ။ တုံ့ပြန်မှုစွမ်းအား၊ ဖိအား စသည်တို့တွင် သူတို့၏ကိုယ်ပိုင်အသုံးဝင်မှုများရှိသည်။

ဤအဖွဲ့သည် လွန်ဆွဲပြိုင်ပွဲတွင် သူတို့၏ စွမ်းရည်ကို သိသာစွာ ချန်ထားခဲ့ပြီး နောက်ဆုံးတွင် ဖိုင်နယ်သို့ ရောက်ရှိကာ လွန်ဆွဲပြိုင်ပွဲချန်ပီယံကို ဆွတ်ခူးနိုင်ခဲ့သည်။

C-183 သည် လွန်ဆွဲပြိုင်ပွဲ၌ ဆုတံဆိပ်မရရှိခဲ့သော်လည်း လူတိုင်းက ရလဒ်ကို ပျော်ရွှင်စွာ လက်ခံနိုင်ကြသည်။ သူတို့သည် အဖွဲ့လိုက်ပြိုင်ပွဲ 3 ခုတွင် ရွှေတံဆိပ်များ ရရှိထားပြီးဖြစ်ကာ ပြိုင်ပွဲ 4 ပွဲအတွက် စာရင်းသွင်းပြီး 4 ပွဲစလုံးတွင် ရွှေတံဆိပ်များ ရယူတာက အလွန်အကျွံဖြစ်သွားမည်ဖြစ်သည်။

တစ်ဖက်မှ A-88 သုတေသနအဖွဲ့သည် စက်ပြင်ပွတ်တိုက်မှုများကို ဖယ်ရှားခြင်းဖြင့် လွန်ဆွဲပြိုင်ပွဲ၏ ချန်ပီယံဆုကို ရရှိခဲ့သည်။ အခြားသူများမှာ မေးခွန်းထုတ်စရာ မလိုဘဲ တစ်ယောက်ပြီး တစ်ယောက် ချီးကျူးကြသည်။

လွန်ဆွဲပြိုင်ပွဲက ပြီးသွားလေပြီ။

ဤအချိန်တွင် စာကြည့်တိုက်၏ အားကစားပြိုင်ပွဲများအားလုံး ပြီးဆုံးသွားခဲ့သည်။

အေးစက်စက် စက်အသံက ပြောလာသည်။

"ပထမအကြိမ် စာကြည့်တိုက်ရဲ့ အားကစားပြိုင်ပွဲမှာ ပါဝင်ပေးတဲ့အတွက် ကျေးဇူးတင်ပါတယ်… ည 8 နာရီမှာ ပိတ်ပွဲအခမ်းအနားကို ကျင်းပပါမယ်!"

#TK