Chapter 5

Volume 1 : Beginner ၏ လျှို့ဝှက်ခန်း

Chapter 5 (2 of Hearts – ကတ်ဆွဲခြင်း)

ဇာတ်ကွက်ကတ်သည် ဘုရားသခင်၏ရှုထောင့်မှ ဇာတ်ကွက်ကို ပြန်ထုတ်ခြင်းနှင့် ညီမျှသည်။ ‘ဖြစ်စဉ်ကိုပြီးပြည့်စုံစွာ ရှင်းလင်းနိုင်ခြင်း’အတွက် သဲလွန်စအားလုံးကို တွေ့ရှိခဲ့သော ကစားသမားများအတွက် ဆုလာဘ်ဖြစ်နိုင်သည်။ ဤဇာတ်ကွက်သည် အလွန်နှစ်မြှုပ်နေသောကြောင့် ကျုံးရှောင်မိန်၏အော်သံများသည် လေထဲတွင် ပဲ့တင်ထပ်နေဆဲဖြစ်သည်။

ရှောက်လုံသည် စုံထောက်ကျိုးကြောင်းဆင်ခြင်ခြင်း ဝတ္ထုများကို နှစ်သက်သော်လည်း ဤကဲ့သို့ ရက်စက်ကြမ်းကြုတ်သော လူသတ်မှု မြင်ကွင်းကို မြင်လိုက်ရသဖြင့် ချမ်းစိမ့်စိမ့်ဖြစ်နေသေးသည်။

ကျုံးရှောင်မိန်နှင့် ဟဲ့ရုန်ချန်တို့က မှားခဲ့ကြသော်လည်း ကျောက်စန်း၏နည်းလမ်းမှာ ဆိုးရွားလွန်းလှသည်မဟုတ်ပါလား?

ဇနီးဖြစ်သူကိုသတ်ပြီး ဝမ်းကွဲ၏နှလုံးကိုထုတ်ယူကာ အလောင်းကိုယူသွားခဲ့သည်။ ထို့အပြင် သူသည် သစ်သီးဓားပေါ်တွင် ဟဲ့ရုန်ချန်၏လက်ဗွေကို တမင်တကာချန်ထားခဲ့ကာ သေဆုံးသူ၏ကိုယ်ပေါ်တွင်လည်း သူ့သွေးတွေကို ချန်ထားခဲ့သည်။ ဒါက တစ်ဖက်လူကို ချောက်ချဖို့ ကြိုးစားတာမလား?

ဤဇာတ်လမ်း၏ နောက်ဆက်တွဲရှိပါက ကျုံးရှောင်မိန်၏အလောင်းကို ရှာဖွေတွေ့ရှိပါလိမ့်မည်။ ရဲတပ်ဖွဲ့သည် အခင်းဖြစ်ပွားရာနေရာကို စုံစမ်းသောအခါ လက်နက်ကို ရှာဖွေတွေ့ရှိခဲ့ပြီး သစ်သီးဓားတွင် ဟဲ့ရုန်ချန်၏ လက်ဗွေရာများ ပါရှိခဲ့သည်။ သေဆုံး၏ခန္ဓာကိုယ်ပေါ်တွင် ဟဲ့ရုန်ချန်၏သွေးကိုလည်း တွေ့ရှိမည်ဖြစ်သည်။ သံသယအရှိဆုံးလူဟာ ထုံးစံအတိုင်း ဟဲ့ရုန်ချန် ဖြစ်သွားလိမ့်မည်။

သို့သော်လည်း ဟဲ့ရုန်ချန်က သေဆုံးသွားခဲ့ပြီး ကျောက်စန်းက အလောင်းကို မည်သို့စွန့်ပစ်ခဲ့သည်ကို မသိရသေးပေ။

သေဆုံးမှု သက်သေမရှိရင် အမှုက ဆိုင်းငံ့ထားရမယ့် ကိစ္စ ဖြစ်သွားမည်။

ကျောက်စန်းသည် အလုပ်ကိစ္စခရီးထွက်နေတာက သက်သေအတုများ ဖြစ်နိုင်သည်။ ဤနည်းဖြင့် ကျုံးရှောင်မိန်သည် မတော်တဆမှုတစ်ခုကြောင့် သေဆုံးသွားခဲ့ပြီး သူက အာမခံကုမ္ပဏီထံမှ လျော်ကြေးငွေ ယွမ် 2 သန်း ရရှိလိမ့်မည်။

ကျောက်စန်း၏ စိတ်ပိုင်းဆိုင်ရာမူမမှန်ခြင်းနှင့် နက်နဲသောအတွေးတွေက သူ့ကို ကြက်သီးမွေးညင်းထစေခဲ့သည်။

ရှောက်လုံက သူ၏ ပြင်းထန်သော နှလုံးခုန်သံကို တည်ငြိမ်စေပြီး ခေါ်လိုက်သည်။

"System Elf?"

သည်တစ်ခါတော့ အေးစက်စက် အမျိုးသားစက်သံမဟုတ်ဘဲ နူးညံ့သောအမျိုးသမီးအသံက သူ့ကို နှုတ်ဆက်လာသည်။ လှပတင့်တယ်သော ခန္ဓာကိုယ်နှင့် ဆံပင်ကောက်ကောက်ဖြင့် အနီရောင် ရှည်လျားသော ဂါဝန်ကို ဝတ်ဆင်ထားသည့် အရွယ်ရောက်ပြီးသူ အမျိုးသမီးတစ်ဦးက သူ့ရှေ့တွင် ရုတ်တရက် ပေါ်လာသည်။

အလှလေးက သူ့ကို အပြုံးဖြင့် ကြည့်နေသည်။

"မင်္ဂလာပါ ရှောက်လုံ… ငါက Hearts ရဲ့ စောင့်ရှောက်သူ… နင်ငါ့ကို မေးခွန်းတွေ မေးလို့ရတယ်…"

Hearts ရဲ့ စောင့်ရှောက်သူလား?

ရှောက်လုံသည် နံရံပေါ်ရှိ Hearts of 2 – K ကတ်များကို စိုက်ကြည့်ရင်း တွေးတောလိုက်သည်။

"ကတ်နံရံမှာ ဘာလို့ A of Hearts မရှိရတာလဲ?"

အနီရောင်အလှလေးက ပြုံးပြသည်။ 

"ငါက A of Hearts ပဲလေ…"

"မင်းရှင်းပြပေးနိုင်မလား?"

"ရတာပေါ့…" အလှလေး၏အသံက အလွန်ကြင်နာသည်။ "ကတ်တစ်ထုပ်ဆီမှာ စုစုပေါင်း 54 ကတ်ရှိတယ်ဆိုတာ နင်သိထားသင့်တယ်… ဒီကတ်ကမ္ဘာမှာ A of Hearts၊ A of Diamonds၊ A of Spades နဲ့ A of Clubs ဆိုပြီး လျှို့ဝှက်အခန်းလေးမျိုးရဲ့ တံခါးစောင့်တွေရှိတယ်… အခြားကတ်တွေမှာ မတူညီတဲ့လျှို့ဝှက်ခန်းတွေနဲ့ ကမ္ဘာငယ်တွေပါရှိပြီး အဲဒါတွေကို နင်ကစိန်ခေါ်ဖို့ လိုအပ်တယ်…"

ရှောက်လုံက ခေါင်းငြိမ့်လိုက်သည်။

"A of Hearts က စောင့်ရှောက်သူဖြစ်ပြီး ငါက 2 of Hearts ကနေ စခဲ့တာဆိုတော့ အခက်ဆုံးက K of Hearts ဖြစ်မှာလား? System ငါ့ကို အရင်ကပြောခဲ့တာကတော့ K ရဲ့အထက်မှာ ဘုရင်နှစ်ပါးရှိသေးပြီး… နောက်ဆုံးက SS အဆင့် လျှို့ဝှက်ခန်းလား?"

လှပသော အမျိုးသမီးက သူ့ကို လေးလေးနက်နက် ကြည့်နေသည်။

"မှန်တယ်…"

ရှောက်လုံသည် ကတ်ကစားတာနဲ့ပတ်သက်ပြီး သိပ်မသိသော်လည်း J က Jack(အစေခံ)၊ Q က Queen(ဘုရင်မ)၊ K က King(ဘုရင်)၊ A က Ace(supreme)တို့ဖြစ်ကြောင်း သူသိသည်။ ရောင်စုံ Joker နှင့် အဖြူအမည်း Joker များလည်း ရှိပြီး လူအများက ဘုရင်ကြီးနှင့် ဘုရင်ငယ်ဟု မကြာခဏ ခေါ်ဝေါ်ကြသည်။ တချို့နေရာများတွင် သူတို့ကို တစ္ဆေကြီးနှင့် တစ္ဆေငယ်ဟုလည်း ခေါ်ကြသည်။

ဤကတ်ကမ္ဘာတွင် A သည် တံခါးစောင့်ဖြစ်ပြီး 2 မှ K သည် လျှို့ဝှက်အခန်းများဖြစ်သည်။ အခက်အခဲမှာ D မှ C၊ B၊ A နှင့် S ဖြစ်သည်။ K အမျိုးအစားလေးမျိုးသည် အခက်ခဲဆုံး S အဆင့်လျှို့ဝှက်အခန်းများ ဖြစ်နိုင်သည်။ ထို့နောက် နောက်ဆုံးအခန်းများမှာ ဘုရင်များထိုင်သည့် SS အဆင့် လျှို့ဝှက်အခန်းများဖြစ်သည်။

သူအခုလေးတင် ဖြတ်ကျော်သွားသည့် 2 of Hearts အခန်းက အရိုးရှင်းဆုံး D အဆင့်အခန်းဖြစ်သည်။

လူတစ်ဦးတည်း လျှို့ဝှက်ခန်းတစ်ခုအနေဖြင့် လူများကို အလောင်းရှိသော အခန်းတစ်ခုထဲသို့ တိုက်ရိုက်ပစ်ချခဲ့ပြီး လူသတ်မှုကို ဖော်ထုတ်ရန် မိနစ် 30 သာ အချိန်ရှိသည်။ လူအများစုသည် အိပ်ယာပေါ်၌ အမျိုးသမီးအလောင်းကို သေလောက်အောင်ကြောက်ကြလိမ့်မည်။ သူတို့တွေ စိတ်ဖြေလျှော့ပြီး သဲလွန်စရှာဖို့ သတ္တိရှိပေမယ့် နောက်ဆုံးမှာတော့ လူ 90% ကျော်ဟာ ဖုန်းစကားဝှက်ကို မဖြေရှင်းနိုင်ခဲ့ပေ။ သူတို့က လူသတ်သမားကို ခန့်မှန်းရုံသာရှိပြီး ပြီးပြည့်စုံသောရှင်းလင်းရေးဖြစ်နိုင်ခြေက 1% ထက်နည်းပါသည်။

သူ၏ရှင်းလင်းရေးရမှတ်က စိန်ခေါ်သူ 99% ထက် ပိုများနေတာ အံ့ဩစရာမရှိပေ။

D အဆင့်လျှို့ဝှက်ခန်းတစ်ခုက သည်လောက်အခက်အခဲရှိနေပြီဖြစ်သည်။ နောက်ပိုင်း အခန်းတွေက ဘယ်လောက်တောင် ကြောက်စရာကောင်းမလဲဆိုတာ သူ တွေးကြည့်နိုင်သည်။

ရှောက်လုံက အနည်းငယ် မျက်မှောင်ကြုတ်ကာ ဆက်မေးသည်။

"ဇာတ်ကွက်ကတ်ကို ပြီးပြည့်စုံတဲ့ရှင်းလင်းရေးနဲ့ပဲ ရနိုင်တာလား? သဲလွန်စတွေအားလုံးကို မစုဆောင်းနိုင်ဘူးဆိုရင် ဥပမာအားဖြင့် ဖုန်းစကားဝှက်ကို ဖွင့်လို့မရတာမျိုးပေါ့… ဒါပေမယ့် လူသတ်သမားကို မှန်ကန်စွာဖော်ထုတ်နိုင်ပြီး အဲဒါကို ဖြစ်စဉ်ရှင်းလင်းရေးအဖြစ်ပဲ သတ်မှတ်ပြီးတော့ ဆုလာဘ်က ပြောင်းလဲသွားမှာလား?"

A of Hearts ခေါင်းငြိမ့်လိုက်သည်။ 

"ဟုတ်ပါတယ်၊ သဲလွန်စတွေရဲ့ 50% ကိုစုဆောင်းခြင်းက လူသတ်သမားကို ရွေးချယ်နိုင်စေပြီး အဲဒါကို Hearts လျှို့ဝှက်ခန်းကို ရှင်းလင်းခြင်းအဖြစ် မှန်ကန်စွာတွက်ချက်ပါတယ်… သဲလွန်စစုဆောင်းခြင်း 100% ရှိမှသာ အဲဒါကို ပြီးပြည့်စုံတဲ့ ရှင်းလင်းရေးအဖြစ် မှတ်ယူနိုင်ပြီး ဇာတ်ကွက်ကတ်ကို ရရှိနိုင်မယ့်အပြင် ကတ်ဆွဲမယ့်အခွင့်အရေးကိုလည်း ရနိုင်ပါတယ်… ဇာတ်ကွက်ကတ်နဲ့ ဒီလျှို့ဝှက်အခန်းအပေါ် နင့်နားလည်မှုက ပိုမိုပြည့်စုံလာမှာဖြစ်ပါတယ်… လျှို့ဝှက်ခန်းထဲက ဇာတ်ကောင်တွေနဲ့ ထပ်တွေ့ရင် ဒီဇာတ်ကွက်ကတ်က နင့်ကို ကူညီပေးနိုင်တယ်…"

2 of Hearts အခန်း၏ ဇာတ်ကွက်တွင် ကျုံးရှောင်မိန်နှင့် ဟဲ့ရုန်ချန်က အသတ်ခံခဲ့ရသည်။ သူငယ်ချင်းလျှိုယွင်သည် မည်သည့်အခါမှ ပေါ်မလာပေ။ နောက်တစ်ယောက်ကတော့ ကျောက်စန်း၊ သူ့ဝမ်းကွဲ၏အလောင်းကို ခရီးဆောင်အိတ်ထဲမှာ ထည့်ပြီး သယ်သွားခဲ့သည့် လူသတ်မှုဖြစ်သည်။ နောင်တွင် ဤစိတ်မမှန်သော လူသတ်သမားကို ရင်ဆိုင်ဖို့ ဖြစ်လာနိုင်မှာလား?

ကင်မရာဆီသို့ ကျောက်စန်း၏ နောက်ဆုံးအပြုံးကို တွေးရင်း ရှောက်လုံသည် မတတ်နိုင်ဘဲ သူ၏ဦးရေပြား ထုံကျင်သွား၏။ သူက သူ့ကိုယ်သူ တည်ငြိမ်စေရန် အသက်ပြင်းပြင်းရှူကာ မေးလိုက်သည်။

"ဆုတွေက ဘယ်မှာလဲ?"

A of Hearts က နူးညံ့စွာ ပြောလာသည်။

"နင့်ရဲ့အိတ်ကတ်ထဲမှာ နင့်ရဲ့ကတ်ထုပ်ကို ရှာတွေ့နိုင်တယ်…"

ရှောက်လုံသည် သူ့လက်ကို အိတ်ကပ်ထဲထည့်လိုက်ပြီး လက်တွေ့ဘဝတွင် တွေ့နိုင်သော ကတ်ထုပ်သေးသေးလေးကို တွေ့လိုက်သည်။

အနက်ရောင်ကတ်ထုပ်သည် သူ့လက်ဖဝါး၏ ထက်ဝက်မျှသာရှိပြီး မျက်နှာပြင်ပေါ်တွင် 'ကတ်လျှို့ဝှက်ခန်း' ဟူသော စာလုံးကို ရေးထားသည်။ သည်ကတ်က ခေါက်ထားသော စာအုပ်စာမျက်နှာလိုပဲဖြစ်သည်။ ဖွင့်လိုက်သည်နှင့် ကတ်ထုပ်က ကတ်များအတွက် ဇယားကွက်ဒါဇင်ကို ပြသထားသည်။

ဤအချိန်တွင် ပထမဇယားကွက်သုံးခု၌ သူယခုရရှိထားသောကတ်များပါရှိသည်။

[ဇာတ်ကွက်ကတ်: နှင်းဆီဈာပန]

ရှားပါးမှု: S

ဖော်ပြချက်: 2 of Hearts လျှို့ဝှက်ခန်းကို ပြီးပြည့်စုံစွာရှင်းလင်းပြီးနောက် နှင်းဆီဈာပနာကတ်ကို ရရှိခဲ့သည်။ 1% အောက် လူတွေသာ ဇာတ်ကွက်ကတ်ကို ရရှိနိုင်သည်။ ဇာတ်ကွက်ကတ်က အရမ်းရှားပါးတာကြောင့် သေချာသိမ်းထားပါ။ အဲဒါကို အချိန်မရွေးကစားနိုင်ပြီး လူနှစ်ဦးကိုသတ်ခဲ့သည့် ဒေါက်တာကျောက်စန်း၏ အံ့သြဖွယ်ကောင်းသောအပိုင်းကို ခံစားကြည့်ရှုနိုင်ပါသည်။

*****

[ကိရိယာကတ်: သစ်သီးဓား]

ရှားပါးမှု: C

ဖော်ပြချက်: ကျုံးရှောင်မိန်ကိုသတ်သော လူသတ်လက်နက်ဖြစ်သည်။ အလျား 20 စင်တီမီတာနဲ့ အကျယ် 5 စင်တီမီတာရှိသည်။ အလွန်ထက်၏။ 2 of Hearts လျှို့ဝှက်ခန်းကို ရှင်းလင်းခြင်းအတွက် သတ်မှတ်ထားသည့်ဆုကို လက်တစ်ဖက်တွင် ဆုပ်ကိုင်ထားလို့ရသည်။ လူတိုင်းနီးပါးတွင် တစ်ခုစီရှိတာကြောင့် လမ်းဘေးရှိ သစ်သီးဓားက ဈေးမကြီးပါဘူး။

မှတ်ချက်: သည်ဓားကို သင်ပိုင်ဆိုင်ပြီး သင်အလိုရှိသမျှအတွက် အသုံးပြုနိုင်သည်။ သတ္တိရှိပါက လူတွေကို သတ်နိုင်ပါသည်။

အသုံးပြုရန်အရေအတွက်: 10/10

*****

[ကိရိယာကတ်: နှင်းဆီရေမွှေး]

ရှားပါးမှု: C

ဖော်ပြချက်: လျှိုယွင်က ကျုံးရှောင်မိန့်ကို မွေးနေ့လက်ဆောင်အဖြစ် ပေးခဲ့တာဖြစ်သည်။ အဲဒါကိုဖွင့်ပြီးရင် နှင်းဆီရနံ့တွေ သင်းပျံ့လာနိုင်ပါသည်။

မှတ်ချက်: လိုအပ်သောအခါ သင်က အဲဒါကို သင့်ခန္ဓာကိုယ်ပေါ်မှာ ဖြန်းနိုင်ပြီး သင့်အား အနံ့ခံရန် မီတာ 30 အတွင်း ပစ်မှတ်အားလုံးကို ဆွဲဆောင်နိုင်ပြီးတော့ သင့်ကို ပို၍ရိုးရှင်းစွာ သေဆုံးစေနိုင်ပါသည်။

လက်ကျန်ပမာဏ: 100ml

ရှောက်လုံ: "…"

ကတ်ပြားပေါ်ရှိ ဖော်ပြချက်ကို ကြည့်ရင်း ရှောက်လုံ၏ အမူအရာက တဖြည်းဖြည်း တင်းမာလာသည်။

သူက D အဆင့်အခက်အခဲအခန်းကိုဖွင့်ခဲ့ပြီး လူသတ်မှုဖြစ်ပွားရာနေရာသို့ တိုက်ရိုက်ပြောင်းရွှေ့ခံခဲ့ရသည်။ နောက်ဆုံးတွင် သူသည် သူ့ကို ဟာသလုပ်နေသော ဆုကတ်များအတွက်သာ ဖြစ်စဉ်ကို ကျော်ဖြတ်ခဲ့ရသည်။ ပို၍ရိုးရှင်းစွာ သေဆုံးနိုင်တယ်ဆိုတာက ဘာကိုဆိုလိုတာလဲ? ဤကတ်ကမ္ဘာက နေရာတိုင်းတွင် ဆိုးသွမ်းမှုများဖြင့် ပြည့်နှက်နေသည်။

သူသည် မှုခင်းဆေးပညာရှင်တစ်ဦးဖြစ်ပြီး ထိုသို့သော မြင်ကွင်းကို ဖြတ်သန်းရန် သည်းမခံနိုင်ပေ။ သာမန်လူဆိုရင်ကော ဘယ်လိုလုပ်မည်နည်း။

မမျှော်လင့်ဘဲ သေဆုံးသွားသည့်လူအားလုံးကို ကတ်ကမ္ဘာထဲသို့ အတင်းဆွဲခေါ်သွားမယ်ဆိုရင် ဘာဖြစ်မည်နည်း။ အသက် 18 နှစ်အောက်ကလေးများ၊ ကြောက်တတ်သောမိန်းကလေးများ ဒါမှမဟုတ် နှေးကွေးလေးလံသောသက်ကြီးရွယ်အိုများသည် 2 of Hearts သို့ဝင်ရောက်ပြီး အိပ်ရာပေါ်က အလောင်းတစ်ခုကို ရုတ်တရက် တွေ့လိုက်ရပါက ဘယ်လိုတုံ့ပြန်ကြမည်နည်း။ သူတို့တွေ ကြောက်လန့်မည်မဟုတ်ပါလား။ 

သူတို့တွေက မိနစ် 30 အတွင်း ဖြစ်စဉ်ကို ရှင်းလင်းနိုင်ပါ့မလား။ သူတို့မအောင်မြင်၍ ပြစ်ဒဏ်အခန်းထဲသို့ ပစ်ချခံရပါက သူတို့သည် ပို၍ဆိုးရွားသည့်ပုံစံဖြင့် သေဆုံးရမည်မဟုတ်ပါလား။ 

ဒါကို စဉ်းစားရင်း ရှောက်လုံသည် သူ့အရှေ့က အနီရောင် အလှလေးကိုကြည့်ကာ တိုးတိုးပြောလိုက်သည်။

"ဒီကတ်ကမ္ဘာမှာ စိန်ခေါ်သူဘယ်နှစ်ယောက်ရှိလဲ? ဖြစ်စဉ်တစ်ခုကိုကျော်ဖြတ်ဖို့ ကျရှုံးပြီး အိမ်မက်ဆိုးအခန်းထဲကို ဝင်သွားတဲ့ စိန်ခေါ်သူတွေရဲ့ ရှင်သန်မှုနှုန်းက ဘယ်လောက်မြင့်သလဲ?"

A of Hearts က ပြန်ဖြေသည်။

"ကတ်ကမ္ဘာမှာ ကစားသမားအရေအတွက်က သန်း 80 ကျော်ရှိပြီး မိနစ်တိုင်း တိုးလာနေတယ်… ဖြစ်စဉ်တစ်ခုကိုကျရှုံးပြီးနောက် အိမ်မက်ဆိုးအခန်းထဲ အပို့ခံရရင် ရှင်သန်မှုနှုန်း 1% ထက်နည်းတယ်… ဒါကြောင့် မကျရှုံးဖို့ ကြိုးစားပါ… အိမ်မက်ဆိုးက နင်သေချာပေါက် မကြုံချင်တဲ့အရာပဲဖြစ်လိမ့်မယ်…"

သူမက ခဏရပ်ကာ ပြုံးလိုက်သည်။

"နင်က ငါမြင်ဖူးသမျှထဲမှာ အတည်ငြိမ်ဆုံးလူသားပဲ… Hearts အခန်းထဲက ထွက်လာသူအများစုဟာ ကြောက်ရွံ့တုန်လှုပ်နေတတ်ကြတယ်… နင့်ခန္ဓာက်က တုန်လှုပ်ခြင်းမရှိဘဲ အလောင်းရဲ့မျက်နှာနဲ့တောင် ဖုန်းကို အေးအေးဆေးဆေး ဖွင့်လိုက်သေးတယ်…"

ရှောက်လုံ: "..."

လျှို့ဝှက်အခန်းထဲရှိ သူ၏လုပ်ဆောင်မှုအားလုံးကို စောင့်ရှောက်သူက စောင့်ကြည့်နေပုံရသည်။

သူ့လို မှုခင်းဆေးပညာရှင်တစ်ယောက်အတွက် အလောင်းကို လျစ်လျူရှု၍ရသည်။ Hearts အခန်း၏အခက်အခဲကို ကွင်းဆက်လူသတ်မှုအဖြစ် အဆင့်မြင့်ထားသော်လည်း အလောင်းကို ရေခဲတိုက်ထဲမှာ ထားရင်တောင် သူကြောက်မည်မဟုတ်ပေ။

သို့သော် သူ မကြောက်သောကြောင့် နှစ်သက်သည်ဟု မဆိုလိုပါ။

သူသည် သာမန်လူဖြစ်ပြီး စိတ်မမှန်သူမဟုတ်ပေ။ သူသည် အလောင်းကို နေ့တိုင်းမတွေ့ချင်ပါ။

ရှောက်လုံက မျက်မှောင်ကြုတ်ပြီး အေးအေးဆေးဆေး ဆက်မေးသည်။ 

"SS အဆင့်လျှို့ဝှက်ခန်းကို ရှင်းလင်းပြီးရင် လူသားကမ္ဘာထဲ ပြန်သွားနိုင်မယ်လို့ system elf ပြောခဲ့တာကို မှတ်မိသေးတယ်… အဲဒါကို လူဘယ်နှစ်ယောက် ရှင်းလင်းပြီးပြီလဲ?"

A of Hearts က နောင်တရစွာဖြင့် ပခုံးတွန့်လိုက်၏။ 

"ဘယ်သူမှ အဲဒီအဆင့်ကို အောင်အောင်မြင်မြင် မကျော်ဖြတ်နိုင်သေးဘူး…"

ဤအဖြေကြောင့် ရှောက်လုံက အလွန်အံ့သြသွားခဲ့ရသည်။ စိန်ခေါ်သူ သန်း 80 ကျော်ရှိခဲ့ပြီး သူတို့ထဲတွင် ကျိုးကြောင်းဆင်ခြင်ခြင်း၌ ကျွမ်းကျင်သောသူများ ပါရှိရမည်။ သို့တိုင် မည်သူမျှ အဆုံးထိ မရောက်ခဲ့ကြပေ။ ဒါက ပုံမှန်တော့ မဟုတ်ချေ။ ကမ္ဘာကြီးသည် လူသားများအတွက် တမင်တကာ ခက်ခဲနေပြီး လူသားများကို အောင်မြင်စွာ ပြန်သွားခွင့်မပေးလိုခြင်း ဒါမှမဟုတ် နောက်ပိုင်းလျှို့ဝှက်ခန်းများ၏ အခက်အခဲများသည် အလွန်ကြောက်မက်ဖွယ်ကောင်းပြီး ကျိုးကြောင်းဆင်ခြင်ခြင်း ကျွမ်းကျင်သူများပင် ပဟေဠိကို မဖြေရှင်းနိုင်သောကြောင့် ဖြစ်နိုင်သည်။

ပထမတစ်ခုကတော့ မေးရင်လည်း အသုံးမဝင်ချေ။ A of Hearts က ‘ငါတို့က နင်တို့အတွက် တမင်တကာ ခက်ခဲအောင် လုပ်ထားတာ’လို့ သူ့ကို မပြောနိုင်ပေ။ နောက်ဆုံးတစ်ခုဆိုရင်တော့ မျှော်လင့်ချက် ရှိကောင်းရှိနိုင်သည်။ လျှို့ဝှက်ခန်းတွေက ဘယ်လောက်ပဲ ခက်ခဲနေပါစေ သူတို့တွေ မဖြေရှင်းနိုင်သ၍ အဖြေတစ်ခုရဖို့ နည်းလမ်းက အမြဲတမ်းရှိနေမှာဖြစ်သည်။

ရှောက်လုံက မေးခွန်းတစ်ခု စဉ်းစားလိုက်သည်။ 

"လျှို့ဝှက်ခန်းထဲက သေဆုံးသူနဲ့ လူသတ်သမားတွေဟာ ငါ့လို ကမ္ဘာပေါ်က လူသားတွေလား? ဒါမှမဟုတ် မင်းတို့ပြုလုပ်ထားတဲ့… ဉာဏ်ရည်မြင့်သတ္တဝါတွေလား?"

A of Hearts ပြုံးလိုက်သည်။ 

"ဒီမေးခွန်းက ငါဖြေနိုင်တဲ့အတိုင်းအတာထက် ကျော်လွန်နေပါတယ်… နင်ဘယ်လိုထင်လဲ?"

ရှောက်လုံ၏ရင်ထဲတွင် ရဲရင့်သော ထင်ကြေးပေးမှုများ ရှိနေသည်။ အေးစက်စက် system elf က ‘မင်းငါ့ကိုမမြင်ရပေမယ့် ငါမင်းကိုမြင်နိုင်တယ်’လို့ ပြောခဲ့သည်။ သူတို့က ဤကမ္ဘာထဲသို့ ဝင်ရောက်လာသူအားလုံးကို မြင်တွေ့နိုင်သည်။ ဆိုလိုသည်မှာ သူတို့သည် ဤကမ္ဘာတွင် အဆင့်အတန်းမြင့်မားသင့်သည်။

သူ့အရှေ့က အနီရောင်အလှလေးသည် သူ့ကိုယ်သူ A of Hearts လို့ခေါ်သည်။ သူမသည် Hearts အဆင့်အတွက်သာ တာဝန်ရှိပြီး အခြားအဆင့်များတွင်လည်း မတူညီသောလူများ ရှိကြသည်။

ဤကမ္ဘာကြီးကို ကစားသမားမျိုးစုံပါသော အွန်လိုင်းဂိမ်းတစ်ခုအဖြစ် နားလည်နိုင်ပေသည်။

စိန်ခေါ်သူများသည် မတော်တဆ သေဆုံးပြီး ကတ်ကမ္ဘာထဲသို့ အတင်းအကြပ် တွန်းပို့ခံခဲ့ရသော လူသားများဖြစ်သည်။ ကျုံးရှောင်မိန်နှင့် ကျောက်စန်းတို့လို လျှို့ဝှက်ခန်းထဲက လူတွေ၊ လျှို့ဝှက်ခန်းထဲမှာ မရှိခဲ့သော A of Hearts နှင့် တစ်ခါမှရုပ်မမြင်ဖူးဘဲ အသံပဲကြားရသည့် system elf တို့သည် ဖြစ်စဉ်တွေကို ရှင်းလင်းဖို့ မလိုအပ်ပေ။ သူတို့သည် ဂိမ်းတစ်ခုထဲရှိ NPC များနှင့်ဆင်တူပြီး ကတ်ကမ္ဘာ၏ မူလနေထိုင်သူများဖြစ်သည်။

သို့သော် အခြားဂိမ်းများနှင့်မတူဘဲ ဤကမ္ဘာရှိ NPC များသည် ကစားသမားများထက် များစွာပို၍ အစွမ်းထက်ပါသည်။

ကစားသမားတစ်ဦးမှ ဖြတ်ကျော်ရန် ကျရှုံးပြီးနောက် သူတို့က ကစားသမားကို သတ်ပစ်နိုင်သည်။ သူတို့က ခံစားချက်တွေ IQ တွေရှိပြီး ရက်စက်ကြမ်းကြုတ်သောနည်းလမ်းများဖြင့် သတ်ပစ်နိုင်သည်။ ကျောက်စန်းကဲ့သို့ ပုံမှန်မဟုတ်သော လူသတ်သမားကို အခြားလျှို့ဝှက်ခန်းများတွင် တွေ့ပါက သူသည် ဘာမှမပြောဘဲ ကစားသမား၏နှလုံးကို ဖောက်ထုတ်နိုင်သည်။

အခြားဂိမ်းများတွင် ဂိမ်းများကိုသာ ကစားခဲ့ကြသော်လည်း သည်နေရာတွင် သူတို့က သူတို့၏အသက်ကို ကယ်တင်ရသည်။

A of Hearts သည် သူ့မေးခွန်းကို မဖြေတာကြောင့် ဤကမ္ဘာကြီး၏ အဓိကစည်းမျဉ်းများကို သူမေးလိုက်ခြင်းဖြစ်ကြောင်း ဆိုလိုသည်။ လျှို့ဝှက်ခန်းများထဲရှိ သက်ရှိသက်မဲ့‘လူသားများ’သည် သူ့လို လူသားများနှင့် အခြေခံအားဖြင့် ကွဲပြားသည်။

ရှောက်လုံသည် သူ့စိတ်ထဲမှာပေါ်လာသည့် အတွေးများကို ခေတ္တချုပ်တည်းထားလိုက်ပြီး အကြောင်းအရာကို ပြောင်းလဲလိုက်သည်။ 

"နောက်တစ်ကတ်ဆွဲဖို့ ငါအခွင့်အရေးရတာမလား?"

ပြီးပြည့်စုံသောရှင်းလင်းရေးက အပိုကတ်ဆွဲခြင်းအခွင့်အရေးတစ်ခုပေးသည်။ ‘ဆုများကို ရှင်းလင်းရန် ကိုယ်ပိုင်နေရာသို့ပြန်သွားပါ’ဟု ဖော်ပြချက်တွင်ပါရှိသည်။ ဤနေရာက သူ၏ကိုယ်ပိုင်နေရာဖြစ်သင့်သည်။ ထူထဲသော အဖြူရောင် မြူခိုးရှိပြီး ကြီးမားသော ကတ်နံရံတစ်ခုနှင့် သက်ဆိုင်ရာ အဆင့်စောင့်ရှောက်သူ ရှိနေသည်။

A of Hearts က ပြုံးပြသည်။ 

"ဟုတ်ပါတယ်၊ နင်က အခန်းကို ပြီးပြည့်စုံစွာရှင်းလင်းနိုင်ခဲ့ပြီး ဖြစ်နိုင်ခြေ 0.01% ရှိတဲ့ S အဆင့် ရှားပါးကတ်ကို ရနိုင်ပါတယ်… ကတ်တစ်ခုကိုဆွဲပြီး နင့်ရဲ့ကံကိုစမ်းလိုက်ပါ…"

နောက်အခိုက်အတန့်မှာတော့ သူ့ရှေ့တွင် ရွှေရောင်ရတနာသေတ္တာကြီး ပေါ်လာသည်။

ဤသည်မှာ ရှောင်လုံ ထူးဆန်းသောကတ်ကမ္ဘာသို့ ရောက်ကတည်းက ကြားခဲ့ရသည့် အကောင်းဆုံးသတင်းဖြစ်နိုင်ဖွယ်ရှိသည်။

သတ်မှတ်‌ထားသောဆုများ ‘သစ်သီးဓား’နှင့် ‘နှင်းဆီရေမွှေး’တို့သည် C အဆင့်ကတ်များဖြစ်ပြီး ၎င်းတို့၏အသုံးပြုမှုမှာ အကန့်အသတ်ရှိသည်။ နှင်းဆီရေမွှေး၏ ပမာဏမှာ 100ml သာရှိပြီး သစ်သီးဓားတွင် အသုံးပြုမှု ကန့်သတ်ချက်ရှိသည်။ အပိုဆု S အဆင့်ကတ်သည် spades လွတ်မြောက်ခြင်းအခန်းတွင် ကူညီပေးနိုင်မည့် အတော်အတန် အားကောင်းသော ကိရိယာတစ်ခုဖြစ်မည်ဟု သူမျှော်လင့်ခဲ့သည်။

ကံမကောင်းစွာပဲ သူ ငယ်ငယ်ကတည်းက ထီလက်မှတ်ဝယ်သောအခါ အများဆုံး ငါးယွမ်သာရခဲ့ပြီး သူ၏မဲနှိုက်ခြင်းကံက သိပ်မကောင်းပေ။

ရှောက်လုံသည် ရှေ့သို့ တိုးလာပြီး ရတနာသေတ္တာထဲသို့ ရောက်ရှိသွားသည်။

ရတနာသေတ္တာထဲတွင် ကတ်များစွာရှိသည်။ ကတ်အသစ်များသည် ထိတွေ့ရတာကောင်းမွန်ပြီး အသုံးပြုထားသည့်ပစ္စည်းများက အလွန်အဆင့်မြင့်နိုင်သည်။ ရှောက်လုံ စမ်းကြည့်လိုက်တော့ တစ်ကြိမ်တွင် ကတ်တစ်ကတ်သာ ဖမ်းယူနိုင်တာကို တွေ့ရှိခဲ့သည်။ တစ်ခုထက်ပို၍ ဖမ်းမိပါက အခြားကတ်များသည် ရတနာသေတ္တာထဲသို့ အလိုအလျောက် ပြန်ကျသွားမည်ဖြစ်သည်။

သူသည် လောဘကြီးသူမဟုတ်တာကြောင့် ကတ်တစ်ခုကို ပေါ့ပေါ့ဆဆ ဆွဲယူလိုက်သည်။

[S အဆင့် ရှားပါးကတ် ‘ဆင့်ခေါ်ခြင်းကတ်: ထောင်ယွမ်မင်’ကို ရရှိသည့်အတွက် ဂုဏ်ယူပါသည်။]

ရှောက်လုံ: "???"

လူတစ်ယောက်ကို ချက်ချင်း ခုတ်လို့ရတဲ့ ဓားတစ်လက် ဒါမှမဟုတ် အဝေးပစ်သေနတ်တစ်လက်ကို သူရသင့်တာမဟုတ်ဘူးလား? 

ထောင်ယွမ်မင်က ဘယ်သူကြီးလဲ?

#TK