Chapter 8

Volume 1 : Beginner ၏ လျှို့ဝှက်ခန်း

Chapter 8 (2 of Diamonds – ပြီးပြည့်စုံသောရှင်းလင်းချက်)

ရှောက်လုံသည် နံရံနှစ်ခုပေါ်ရှိ ဂဏန်းပဟေဠိများကို အမြန်ဖော်ထုတ်လိုက်သည်။ သည်အချိန်မှာ သူက စက္ကန့် 30 သာ အသုံးပြုရသေး၏။ ချိန်သီးပေါ်ရှိ နာရီနှင့် မိနစ်လက်တံများသည် 7:00 သို့ ညွှန်ပြနေသေးပြီး ဒုတိယလက်တံက စက္ကန့် 30 ကိုသာ ညွှန်ပြသည်။

သင်္ချာပုစ္ဆာနှစ်ခုကို ဖြေရှင်းရန် စက္ကန့် 30 အချိန်က လျှို့ဝှက်ခန်းများစွာကို ကစားခဲ့ဖူးသည့် ရှောက်လုံကြောင့်ဖြစ်သည်။ သူသည် ဂိမ်းအတွေ့အကြုံများစွာရှိပြီး မေးခွန်းကိုမြင်သောအခါ အဖြေတစ်ခုကို တစ်ခါတည်းတွေးနိုင်သည်။

အထူးအကျိုးသက်ရောက်မှု ကတ်နှစ်ခုအား ရရှိမှုသည် ရှောက်လုံအားစွမ်းအားပြည့်စေသည်။ သူက ကတ်ကို ယူလိုက်ပြီး တတိယနံရံကို လျှောက်သွားသည်။

တတိယနံရံသည် ပထမနှစ်ခုနှင့် ကွဲပြား၏။

နံရံမှာ တရုတ်စာလုံးလေးလုံးတွေ့သည်။

田、王、屮、日။

ဤမေးခွန်းအတွက် အရိပ်အမြွက်မရှိခဲ့ဘဲ သူ့စိတ်ကူးကိုသာ အသုံးချနိုင်ခဲ့သည်။

တရုတ်စာလုံးလေးလုံးသည် နောက်ဆုံးစကားဝှက်ကို ကိုယ်စားပြုသည်။ တရုတ်အက္ခရာများတွင် ဆွဲချက်များကဲ့သို့ မရိုးရှင်းပါ။ ဆွဲချက်များသာဖြစ်ပါက စကားလုံးလေးလုံးမဟုတ်ဘဲ စကားလုံးအနည်းငယ်သာ ရေးလိမ့်မည်။

တရုတ်အက္ခရာကို ဂဏန်းအဖြစ်ပြောင်းရန် အခြေခံအချက်ကို တွေ့ရှိရမည်ဖြစ်သည်။

ရှောက်လုံသည် နံရံပေါ်ကို ဓာတ်မီးဖြင့် ထွန်းလိုက်ပြီး 10 စက္ကန့်ကြာ ဂရုတစိုက်ကြည့်ကာ လျင်မြန်စွာ ကောက်ချက်ချလိုက်သည်။

၎င်းတို့ကို တရုတ်အက္ခရာ သို့မဟုတ် မျိုးရိုးအမည်နှင့် စကားစုများအဖြစ် မတွေးပါနှင့်။ ၎င်းတို့ကို ဂရပ်ဖစ်အဖြစ် ရိုးရှင်းစွာ တွေးခေါ်ကြည့်ပါ။

ဤစာလုံးလေးလုံးတွင် တူညီသောအရာမှာ ခေါက်နိုင်သည့် အလယ်တွင် 'ခေါက်ချိုးညီဝင်ရိုး' ပါရှိသည်။

田 ကို အလယ်ကနေ အချိုးညီအောင်ခေါက်လိုက်ရင် ဂဏန်း ၈ ဖြစ်လာမည်။

王 ကို အလယ်ကနေ အချိုးညီအောင်ခေါက်လိုက်ရင် ဂဏန်း 3 ဖြစ်လာမည်။ 

屮 ကို အချိုးကျကျ ခေါက်ပြီးနောက် 4 ဖြစ်လာသည်။ 

日 ကို အပေါ်အောက် ခေါက်လိုက်သောအခါ 0 ဂဏန်း ဖြစ်လာသည်။

စာလုံးလေးလုံးစလုံးမှာ ခေါက်ချိုးညီဝင်ရိုးရှိပြီး ခေါက်ပြီးနောက် ဂဏန်းများဖြစ်လာသည်။ ဤသည်မှာ ဤပဟေဠိ၏ တွေးခေါ်မှုစနစ်ဖြစ်သည်။ 

ရှောက်လုံသည် စကားဝှက်လော့ခ်ခတ်ထားသော ဂီယာများကို 8340 သို့ ချိန်ညှိရန် တုံ့ဆိုင်းမနေပေ။

သူမျှော်လင့်ထားသည့်အတိုင်း လော့ခ်ဖွင့်သံနှင့်အတူ ရတနာသေတ္တာထဲတွင် ကတ်တစ်ခုရှိသည်။

[ကိရိယာကတ်: ခေါက်စက္ကူ]

ရှားပါးမှု: A

ဖော်ပြချက်: 2 of Diamonds လျှို့ဝှက်ခန်း၏ တရုတ်စာလုံးပဟေဠိကို ဖြေရှင်းပြီးနောက် ၎င်းကို ရတနာသေတ္တာမှ ရယူနိုင်သည်။

မှတ်ချက်: Origami ဂိမ်းကို သင်ကစားဖူးပါသလား။ စာရွက်ကို သင်လိုချင်သည့်ပုံစံဖြစ်အောင် ခေါက်ရန် သင့်စိတ်ကူးကို အသုံးပြုပြီး ၎င်းသည် တကယ့်အရာဝတ္ထုကဲ့သို့ လျင်မြန်စွာ ကျယ်လာမည်ဖြစ်သည်။ ဥပမာအားဖြင့် စက္ကူလှေကို ပင်လယ်ထဲထားလိုက်ရင် လှေငယ်လေးဖြစ်သွားလိမ့်မည်။ မြင်းပုံစံခေါက်ပြီး မြင်းစီးလို့ရသည်။ လူအများစုသိကြသည့် origami နည်းပညာဖြစ်သော လေယာဉ်ကို ခေါက်ရန် မအကြံပြုပါ။ ခေါက်ထားသော လေယာဉ်သည် အစိုင်အခဲကိုယ်ထည် ကျယ်လာသောအခါ အလွယ်တကူ ပျက်ကျနိုင်သည်။

အသုံးပြုနိုင်သောအရေအတွက်: ကံမကောင်းစွာဖြင့် ထိုကဲ့သို့သောခိုင်ခံ့သောခေါက်စက္ကူကို တစ်ကြိမ်သာအသုံးပြုနိုင်ပါသည်။

ရှောက်လုံသည် အရိုးရှင်းဆုံး စက္ကူလေယာဉ်ကိုသာ ခေါက်နိုင်သည်။ အဆတစ်ရာဖြင့် ချဲ့ထွင်ထားသော်လည်း လူကိုသယ်ဆောင်ပြီး ပျံသန်းခြင်းမပြုနိုင်ပေ။ သူသည် အခြား origami များကို မသိသောကြောင့် ၎င်းကို ဦးစွာ သိမ်းဆည်းခြင်းက ပိုကောင်းပါသည်။ Origami ကျွမ်းကျင်သည့်သူတွေနဲ့တွေ့ရင် သူတို့ကိုပေးလိုက်မည်။ ၎င်းသည် ရှားပါးမှု A ဖြစ်ပြီး အရာဝတ္ထု၏ လုပ်ဆောင်ချက်က အလွန်အားကောင်းရပါမည်။ ဒါကို မဖြုန်းတီးနိုင်ပါ။ အရေးကြီးသော အခိုက်အတန့်တွင် ကား သို့မဟုတ် လှေ ခေါက်လိုက်ပါက သူတို့၏ အသက်များကို ကယ်တင်နိုင်မည်ဖြစ်သည်။

ရှောက်လုံသည် ခေါက်စက္ကူကတ်ကို ယူလိုက်ပြီး နောက်ဆုံးပဟေဠိဆီ လှည့်လိုက်သည်။

ရတနာသေတ္တာတစ်ခု ကျန်နေသေးပြီး ဖွင့်ပြီးလျှင် ဖြစ်စဉ်ကို ပြီးပြည့်စုံစွာ ကျော်ဖြတ်နိုင်မည်ဖြစ်သည်။

သူသည် နောက်ဆုံး နံရံကို ဓာတ်မီးဖြင့် ထိုးလိုက်ပြီး နံရံပေါ်တွင် ရှုပ်ပွနေသော မြားသင်္ကေတများစွာကို တွေ့လိုက်ရသည်။

←↓→↓←

→↓←↓→

←↓↓→↑←

→↓↓←↑↑

ရှောက်လုံ၏နှုတ်ခမ်းထောင့် မြှောက်တက်သွားသည်။

သည်လိုပဟေဠိ အမျိုးအစားကို သူလုပ်ခဲ့ဖူးသည်။

ထိုအချိန်တုန်းက သူနှင့် သူ့သူငယ်ချင်းများသည် သွေးစုပ်ဖုတ်ကောင်ပုံစံ လျှို့ဝှက်လွတ်မြောက်ခြင်းအခန်းတွင် ကစားနေကြသည်။ သူတို့သည် လျှို့ဝှက်ခန်းတွင် အလားတူ ယန္တရားတစ်ခုကို ကြုံတွေ့ခဲ့ရသော်လည်း ၎င်းသည် နံရံပေါ်ရှိ မြားသင်္ကေတများမဟုတ်ပေ။ RDDLUU ကဲ့သို့သော အင်္ဂလိပ်စာလုံးများဖြစ်ပြီး U ကအပေါ်၊ D ကအောက်၊ L ကဘယ်ဘက်နှင့် R ကညာဘက်တို့ဖြစ်သည်။ အပေါ်၊ အောက်၊ ဘယ်၊ ညာ ဟူသော အရပ်လေးမျက်နှာကိုလည ဆိုလိုသည်။

အပေါ်၊ အောက်၊ ဘယ်၊ ညာနှင့် ဂဏန်းများအကြား ဆက်စပ်မှုမှာ အဘယ်နည်း။

ကိုယ့်လက်ညိုးနဲ့ ဖော်ပြထားသော ဦးတည်ချက်ကို လိုက်နာပြီး လက်ဖဝါးမှာ ရေးနေသ၍တော့ နံပါတ်တစ်ခုကို ရပါလိမ့်မည်။

←↓→↓← ၊ ဘယ်၊ အောက်၊ ညာ၊ အောက်၊ ဘယ်၊ ဒါကို ဂဏန်း 5 လို့ရေးထားသည်။

→↓←↓→၊ ညာ၊ အောက်၊ ဘယ်၊ အောက်၊ ညာ၊ ဒါကို ဂဏန်း 2 လို့ရေးထားသည်။ 

←↓↓→↑←၊ အဖြေမှာ 6၊ →↓↓←↑↑၊ အဖြေမှာ 0 ဖြစ်သည်။

ဤနံရံ၏မြားကုဒ်က 5260 ရလဒ်ကို ပေးထားသည်။

ရှောက်လုံသည် စကားဝှက်လော့ခ်ခတ်ထားသော ဂီယာများကို 5260 သို့ လျင်မြန်စွာရွှေ့ကာ ရတနာသေတ္တာကို အောင်မြင်စွာဖွင့်လှစ်ပြီး 2 of Diamonds လျှို့ဝှက်ခန်း၏ နောက်ဆုံးကတ်ကို ရယူခဲ့သည်။

[ကိရိယာကတ်: လေးလမ်းသွားမြား]

ရှားပါးမှု: A

ဖော်ပြချက်: 2 of Diamonds လျှို့ဝှက်ခန်း၏ မြားပဟေဠိကို ဖြေရှင်းပြီးနောက် ၎င်းကို ရတနာသေတ္တာမှ ရယူနိုင်သည်။

မှတ်ချက်: ပြောင်းလွယ်ပြင်လွယ်ဖြင့် အသုံးပြုနိုင်သည်။ အထူးသဖြင့် ဝင်္ကပါတစ်ခုနှင့် ကြုံတွေ့ရသောအခါတွင် သင်၏အဖွဲ့ဝင်များအား အကြံဥာဏ်များပေးရန်အတွက် မြားကို အသုံးပြု၍ သူတို့သည် အဆုံးသို့မရောက်စေရန် အကြံဉာဏ်များပေးနိုင်ပါသည်။ ကိရိယာကတ်သည် အလွန်စေးကပ်နိုင်မှုမြင့်မားပြီး မြေပြင်၊ အကိုင်းအခက်များ၊ အဆောက်အအုံများ အစရှိသဖြင့် မည်သည့်နေရာတွင်မဆို ကပ်ထားနိုင်သည်။ ကိရိယာကတ်ကို နေရာတွင် ချန်ထားခဲ့တာနဲ့ မျက်လုံးမကောင်းသူများမြင်ရအောင် အရောင်ခုနစ်ရောင်ဖြင့် စိတ်ကြိုက်ပြင်ဆင်နိုင်သည်။

အသုံးပြုနိုင်သောအရေအတွက်: အကန့်အသတ်မရှိ

ရှောက်လုံသည် ဖော်ပြချက်ကို ထပ်မံကြည့်ရှုပြီးနောက် ဤလေးလမ်းသွားမြား ကိရိယာကတ်တွင် ‘ဝင်္ကပါ’ဟု ဖော်ပြထားသော အဓိကစကားလုံးကို တွေ့ရှိခဲ့သည်။

၎င်းသည် နောင်အခါ Diamonds လျှို့ဝှက်ခန်းများတွင် ယန္တရားများဖြင့် ပြည့်နေသော ဝင်္ကပါကို သူကြုံတွေ့ရနိုင်ဖွယ်ရှိကြောင်း ပြသခဲ့သည်။

ထို့အပြင် ဤကတ်သည် 'အဖွဲ့ဝင်များ' ကို ရှင်းရှင်းလင်းလင်း ရည်ညွှန်းထားပြီး နောက်ပိုင်းကာလတွင် ဝင်္ကပါသည် အမှန်တကယ်ပင် အဖွဲ့လိုက်ပုံစံနှင့် လမ်းကြောင်းပေါင်းစုံ ရှာဖွေရေးဖြစ်ကြောင်း သက်သေပြခဲ့သည်။ မှားယွင်းသော ယန္တရားအပေါ် လျှောက်လှမ်းသူသည် သူတို့၏အဖွဲ့ဝင်အားလုံးကို ဆူးချွန်များထဲသို့ သတ်ပစ်ခံရမည်ဟု ဆိုလိုခြင်းဖြစ်နိုင်သည်။

Diamond လျှို့ဝှက်ခန်းသည် 'ယန္တရားဝင်္ကပါ' ၏ ဦးတည်ချက်တွင် ဖွံ့ဖြိုးတိုးတက်နေပါက စိန်ခေါ်သူများသည် ဝင်္ကပါထဲမှ ထွက်လမ်းရှာရရုံသာမက ပဟေဠိများကို ဖြေရှင်းရန်နှင့် မှန်ကန်သော ယန္တရားကိုဖွင့်ရန် သူတို့၏ ဦးနှောက်များကို အသုံးပြုကာ အချိန်မရွေး ဖြစ်ပေါ်လာနိုင်သော ပြစ်ဒဏ်ကို ရင်ဆိုင်ရမည်။ မြားမိုးရွာခြင်း၊ ဓားအခင်းအကျင်း၊ ကျောက်တုံးများ၊ ပဟေဠိများ၊ အဆိပ်များ၊ မီးတောက်များ… ပြစ်ဒဏ်ခံရမည့် နည်းလမ်းများစွာရှိပြီး လျှို့ဝှက်ခန်းနှောင်းပိုင်းက သူ့စိတ်ကူးကို ကျော်လွန်မည်ဆိုလျှင် အခက်အခဲများစွာရှိသည်။

ရှောက်လုံသည် လေးထောင့်ဘောင်တွင် စာကြောင်းနှစ်ကြောင်း ပေါ်လာသောအခါ ဒါကို တွေးနေမိသည်။

[58 စက္ကန့်အတွင်း D အဆင့်လျှို့ဝှက်ခန်း 'ဂဏန်းပဟေဠိ' ကို ပြီးပြည့်စုံစွာရှင်းလင်းနိုင်သည့်အတွက် စိန်ခေါ်သူရှောက်လုံအား ဂုဏ်ယူပါတယ်။ ဖြစ်စဉ်ရှင်းလင်းရေးရမှတ်က စိန်ခေါ်သူများ၏ 99% ထက် သာလွန်ကောင်းမွန်ပါသည်။]

[ဖြစ်စဉ်ရှင်းလင်းရေးကို S အဆင့်အဖြစ် အကဲဖြတ်သည်။ ပြီးပြည့်စုံသောရှင်းလင်းရေးတစ်ခုက အပိုကတ်ဆွဲခြင်းအခွင့်အရေးကို ရရှိမည်ဖြစ်သည်။ ဆုများကို ရှင်းလင်းရန် ကိုယ်ပိုင်နေရာသို့ ကျေးဇူးပြု၍ ပြန်သွားပါ။]

ရှောက်လုံသည် ပြီးပြည့်စုံသောရှင်းလင်းရေး အချက်ပြမှုကိုမြင်ပြီး ကိုယ်ပိုင်နေရာသို့ ပြန်သွားရန် 'ထွက်ပေါက်' ခလုတ်ကို နှိပ်လိုက်သည်။

***

တစ်ချိန်တည်းမှာပင် 2 of Diamonds ၏ လျှို့ဝှက်ခန်းထဲ၌

ယွီဟန်ကျန်းသည် နံရံပေါ်ရှိ ညီမျှခြင်းများကို ကြည့်ကာ အနည်းငယ် မျက်မှောင်ကြုတ်လိုက်သည်။

သူသည် သင်္ချာကို အလွန်မုန်းတီး၏။ 4894=1236 ကို ကြည့်ပြီး ခွဲခြမ်းစိတ်ဖြာရင်း ခေါင်းကိုက်နေခဲ့သည်။

ထိုအချိန်၌ပင် အနီရောင်စာလုံးများက သူ့ခေါင်းထက်ရှိ လေးထောင့်ဘောင်ထဲတွက် ရုတ်တရက် ပေါ်လာသည်။

[စိန်ခေါ်သူရှောက်လုံသည် 58 စက္ကန့်အတွင်း 2 of Diamonds လျှို့ဝှက်ခန်း ‘ဂဏန်းပဟေဠိ’ကို ပြီးပြည့်စုံစွာရှင်းလင်းနိုင်ခဲ့ပြီး 2 of Diamonds ၏ ကမ္ဘာစံချိန်သစ်ကို ချိုးဖျက်နိုင်ခဲ့သည့်အတွက် ဂုဏ်ယူပါသည်။]

တစ်မိနစ်အတွင်း မေးခွန်းတစ်ခုမဖြေရသေးသော ယွီဟန်ကျန်း: "…"

အခန်းထဲသို့ဝင်ကာ နံရံလေးခုအတွက် စကားဝှက်ဂီယာများကို ရွေ့လျားလှည့်ရန် အချိန်ယူရသည်။ 58 စက္ကန့် ပြီးပြည့်စုံသော ရှင်းလင်းရေးသည် မေးခွန်းလေးခုဖြေဆိုခြင်းကို ဆိုလိုသည်။ တစ်နည်းအားဖြင့် ရှောက်လုံသည် မေးခွန်းတစ်ခုစီကို ရှင်းလင်းရန် ပျမ်းမျှ 10 စက္ကန့် အချိန်ယူခဲ့သည်။

ဤရှောက်လုံ၏ ဂဏန်းယန္တရားများကို ဖော်ထုတ်သောအရှိန်က မြန်လွန်းသည် မဟုတ်ပါလား။

ယွီဟန်ကျန်းက မျက်မှောင်ကြုတ်ပြီး ကြေညာချက်ကို ပြန်ကြည့်လိုက်သည်။

သူသိသော ရှောက်လုံသည် ဆေးတက္ကသိုလ်၏ မှုခင်းဆေးပညာဌာနမှ ပါမောက္ခတစ်ဦးဖြစ်သည်။

သူတို့၏ ပထမဆုံး အဆက်အသွယ်ကတော့ ဆေးတက္ကသိုလ်မှ မိန်းကလေးတစ်ယောက်က ပြုတ်ကျသေဆုံးသွားလို့ပဲဖြစ်သည်။ စုံစမ်းမှုစတင်ပြီးသည်နှင့် ကျောင်းသားများက သူမ၏နောက်ဆုံးအတန်းမှာ ပရော်ဖက်ဆာရှောက်၏အတန်းဖြစ်ကြောင်း ပြောကြသည်။ ကျောင်းသားများ၏ ပါမောက္ခရှောက်အပေါ် အကဲဖြတ်မှုမှာ အလွန်မြင့်မားသည်။ အစတွင် ယွီဟန်ကျန်းသည် အလွန်လေးစားရသော ပါမောက္ခရှောက်က အသက် 40 သို့မဟုတ် 50 ဝန်းကျင်ရှိ ပညာရှင်တစ်ဦးဖြစ်မည်ဟု ထင်ခဲ့သည်။ ရှောက်လုံသည် ဤမျှငယ်မည်ကို သူ မမျှော်လင့်ထားပေ။

ရှောက်လုံ ရဲစခန်းကို ထွက်ဆိုချက်ပေးရန် ရောက်လာသောနေ့က မိုးရွာနေသည်။

ထိုလူ၏ အနက်ရောင်ဆံပင်သည် မိုးရေကြောင့် စိုစွတ်နေပြီး သူ့နားရွက်တွင် ကပ်နေကာ ကြည်လင်သောမျက်နှာကို ဖုံးအုပ်ထားသည်။ သူ့မျက်တောင်တွေက ရှည်ပြီး ထူသည်။ မိုးရေတွေက ကြည်လင်သည့် အနက်ရောင်မျက်လုံးတွေကို နူးညံ့သောအလွှာနဲ့ ဖုံးလွှမ်းသွားသည်။

ရှပ်အင်္ကျီအဖြူကို ဝတ်ထားပြီး သူ့အဝတ်အစားတွေက မိုးရေတွေစိုနေပေမယ့် ရှက်နေသည့်ပုံမပေါ်ပါ။ ထိုလူ၏ ကိုယ်ဟန်အနေအထားမှာ ဖြောင့်မတ်သည်။ သူ့မှာ ဖြူစင်သော စိတ်ထားရှိပြီး ရယ်မောနေသော မျက်လုံးတွေနဲ့ တစ်ချက်ရုံဖြင့် လူတွေအား ဖော်ရွေတယ်လို့ ခံစားရစေသည်။

ယွီဟန်ကျန်းသည် အလွှာပေါင်းစုံမှ လူများနှင့် ထိတွေ့ဖူးသော်လည်း ရှောက်လုံ၏ စိတ်နေစိတ်ထားက ထူးခြားသည်မှာ ‌အသေအချာပင်ဖြစ်သည်။ နူးညံ့သိမ်မွေ့ပြီး ထက်မြက်ကာ အရည်အချင်းရှိကြောင်းဖြင့် ဤသည်မှာ ကျောင်းသားများ၏ သူ့အပေါ်အကဲဖြတ်ချက်ဖြစ်သည်။ ဆေးကျောင်းသားများက သူ့ကို နတ်ဘုရားလို့ မှတ်ယူကြပြီး သူ့အတန်းက အမြဲပြည့်ကျပ်နေတယ်လို့ ဆိုသည်။ အတန်းပျက်နှုန်း အလွန်ပြင်းထန်သော တက္ကသိုလ်တွင် သူ့အတန်းကို အခြားဌာနများမှ ကျောင်းသားများ လာရောက်နားထောင်တာမျိုးရှိခဲ့သည်။

ထွက်ဆို‌ချက်ရေးသည့် လုပ်ငန်းစဉ်မှာ သည်လူဟာ အမြဲတမ်း တည်ငြိမ်နေပြီး သူ၏စိတ်ပိုင်းဆိုင်ရာ အရည်အသွေးဟာ အလွန်မြင့်မားပြီး လိမ္မာပါးနပ်ကြောင်း ထင်ရှားပါသည်။

ယွီဟန်ကျန်း၏ သူ့အပေါ် ပထမဆုံး အထင်အမြင်က အလွန်ကောင်းသည်။

‌ကောင်မလေး၏အမှုကို အမြန်ဖြေရှင်းပြီး သူတို့တွေ တွေ့ဆုံတာမျိုးမရှိတော့ဘူးလို့ သူထင်ခဲ့သည်။ ထို့နောက် MCU မှ ဆိုးရွားသော အဆိပ်သင့်မှုကိစ္စနှင့် ကြုံတွေ့ခဲ့ရသည်။ ယွီဟန်ကျန်းသည် အဆိပ်ကို မှုခင်းဆေးပညာစစ်ဆေးရေးစင်တာသို့ ပေးပို့ခဲ့ပြီး ရှောက်လုံနှင့် ထပ်မံတွေ့ဆုံခဲ့သည်။

သူတို့နှစ်ယောက်ဟာ တစ်ယောက်နဲ့တစ်ယောက် ရင်းနှီးလာခဲ့ပြီး အချင်းချင်း Friend Add ခဲ့ကြသည်။ ရှောက်လုံသည် ဤအမှုကို စုံစမ်းစစ်ဆေးရာမှာ အများကြီး ကူညီပေးခဲ့ပြီး ယွီဟန်ကျန်းက သူ့ကို ညစာစားဖို့ ဖိတ်ခေါ်ခဲ့သည်။ နွေဦးပွဲတော် နီးကပ်လာသည်နှင့်အမျှ ရှောက်လုံ ပြန်မလာမချင်း ညစာစားပွဲကို ရွှေ့ဆိုင်းခဲ့သည်။

ကံမကောင်းစွာပဲ နှစ်သစ်ကူးခုနစ်ရက်မြောက်နေ့တွင် ယွီဟန်ကျန်းအတွက် ရှောက်လုံနှင့် တွေ့ဆုံရန်အချိန်မရှိခဲ့ပေ…

ရင်းနှီးသောနာမည်က မရေမတွက်နိုင်သော အမှတ်ရစရာများကို သူ့စိတ်ထဲတွင် ပြေးဝင်လာစေသည်။ ယွီဟန်ကျန်းသည် အသက်ပြင်းပြင်းရှူပြီး သူ့စိတ်ကို မြန်မြန်တည်ငြိမ်အောင် ပြုလုပ်လိုက်သည်။

58 စက္ကန့်အတွင်း ကိန်းဂဏန်းပဟေဠိလျှို့ဝှက်ခန်းကို ပြီးပြည့်စုံစွာ ကျော်ဖြတ်နိုင်သူသည် ကိန်းဂဏန်းပဟေဠိများ၏ ကျွမ်းကျင်ပညာရှင်တစ်ဦးဖြစ်သည်မှာ ထင်ရှားပါသည်။ သည်ရှောက်လုံနဲ့ သူသိသော မှုခင်းဆရာဝန်ငယ်က အတူတူပဲလား။ ယွီဟန်ကျန်းက ဒါကို မဆုံးဖြတ်နိုင်ချေ။

ရှောက်လုံသည် ကျောင်းတွင် ကျယ်ကျယ်ပြန့်ပြန့် ချီးကျူးခံရကြောင်းသာ သူသိသည်။ သူသည် ပဟေဠိဂိမ်းများကို သီးသန့်ကစားခြင်း ရှိ၊ မရှိနှင့် ပတ်သက်၍ ယွီဟန်ကျန်း မသိပေ။

နောက်မှ သူ သည်ရှောက်လုံကို ဆက်သွယ်ပြီး စစ်ဆေးဖို့ အခွင့်အရေး ရှာရမည်။

ယွီဟန်ကျန်းသည် သူ၏ရှုပ်ထွေးနေသော အတွေးများကို ဖယ်လိုက်ပြီး နံရံပေါ်ရှိ သင်္ချာပဟေဠိကို ဆက်လက် အာရုံစိုက်ခဲ့သည်။

***

ရှောက်လုံ၏ ကိုယ်ပိုင်နေရာသို့ ပြန်ရောက်သောအခါ 2 of Diamonds ၏ ကမ္ဘာ့စံချိန်သစ်ချိုးထားသော သတင်းကို သူလည်းတွေ့ခဲ့သည်။

အံ့သြမှုတချို့ကို သူခံစားလိုက်ရသည်။

မေးခွန်းတစ်ခုအတွက် 10 စက္ကန့်အချိန်သုံးတာက သူ့အတွက် ပုံမှန်ပဲဖြစ်သည်။ ထို့အပြင် သူသည် လျှို့ဝှက်ခန်းဂိမ်းများစွာကို ကစားခဲ့ပြီး လျှို့ဝှက်ခန်းတွင် အသုံးအများဆုံး ယန္တရားမှာ ဂဏန်းပဟေဠိတစ်ခုဖြစ်သည်။

ကတ်ကမ္ဘာသို့ရောက်လာသူများသည် သူ့လိုမျိုး စိတ်ပိုင်းဆိုင်ရာ ခံနိုင်ရည် မြင့်မားမှုမရှိကြဘဲ ကိန်းဂဏန်းပဟေဠိဂိမ်းများကို မကြာခဏ ကစားကြသူများကဲ့သို့ မြင်နိုင်ခြေနည်းပါသည်။ ထို့ကြောင့် ဤကမ္ဘာ့စံချိန်သစ်ကို သူက သက်သက်သာသာဖြင့် ရယူနိုင်ခဲ့သည်။

2 of Diamonds လျှို့ဝှက်ခန်းက မခက်ခဲဘူး။ နာရီ၏အသံ အနှောင့်အယှက်ကို လျစ်လျူရှုပြီး စိန်ခေါ်သူသည် တည်ငြိမ်နေကာ ဂဏန်းများ၏ပုံစံ ရှာဖွေရန် ဂရုတစိုက် စောင့်ကြည့်နေသ၍ အဖြေကို အမြန်ရနိုင်မည်ဖြစ်သည်။

15 မိနစ် ဂဏန်းပဟေဠိအခန်းကို ရှောက်လုံက 58 စက္ကန့်အတွင်း ပြီးပြည့်စုံစွာ ရှင်းလင်းခဲ့သည်။

ဤပြီးပြည့်စုံသော ရှင်းလင်းရေးမှ သူမည်သည့်ကတ်ကို ရမည်နည်း။

ကတ်နံရံပေါ်က 2 of Diamonds ၏ ညာဘက်အောက်ထောင့်တွင် အစိမ်းရောင်စာလုံးဖြင့် ‘ရှင်းလင်းပြီး’ကို ကြည့်လိုက်ရင်း ရှောက်လုံက အေးဆေးတည်ငြိမ်စွာ ပြောလိုက်သည်။

"Diamonds လျှို့ဝှက်ခန်းရဲ့ စောင့်ရှောက်သူက ဘယ်မှာလဲ? ငါ့ကို ထွက်ပြီးလာတွေ့ပါ…"

#TK