Chapter 9

Volume 1 : Beginner ၏ လျှို့ဝှက်ခန်း

Chapter 9 (2 of Diamonds – S-level ကိရိယာကတ်)

Hearts ၏ စောင့်ရှောက်သူသည် ချောမောလှပသော အစ်မတစ်ယောက်ဖြစ်သည်။ Diamonds ၏ စောင့်ရှောက်သူ ပုံသဏ္ဌာန်ကလည်း ဆင်တူလိမ့်မည်ဟု ရှောက်လုံ ထင်ခဲ့သည်။ ရလဒ်အနေဖြင့် သူစကားပြောလိုက်ချိန်မှာပဲ သူ့နားထဲမှာ ကြည်လင်ပြီး ချိုမြိန်သော ကလေးအသံကို ကြားလိုက်ရသည်။

"မင်္ဂလာပါ ငါက A of Diamonds ပါ… နင့်ရဲ့ ပြီးပြည့်စုံသောရှင်းလင်းရေးအတွက် ဂုဏ်ယူပါတယ်!"

ရှောက်လုံ လှည့်ကြည့်လိုက်တော့ ဆိုဖာပေါ်မှာ ထိုင်နေသည့် Loli လေးကို တွေ့လိုက်ရသည်။ သူမသည် အနီရောင်ဒူးရှည်ဂါဝန်ကို ဝတ်ဆင်ထားပြီး ခြေအိတ်အဖြူနှင့် အနီရောင်ဖိနပ်တစ်ရံကို စီးထားသည်။ မိန်းကလေး၏ ဦးခေါင်းပေါ်တွင် ကျစ်ဆံမြှီးနှစ်ခွာပါရှိပြီး ဖောင်းမို့မို့ကလေးမျက်နှာပေါ်မှာ ကြီးမားသော အပြုံးတစ်ခုရှိသည်။ သူမ၏မျက်လုံးများက ကွေးညွတ်ပြီး ဘယ်ဘက်ထောင့်တွင် ချစ်စဖွယ် ပါးချိုင့်တစ်ခုရှိသည်။

သူမသည် ခုနစ်နှစ် သို့မဟုတ် ရှစ်နှစ်အရွယ်မျှသာရှိပြီး သူမ၏နူးညံ့ဖြူစင်သောမျက်နှာက လူကြီးများကို နူးညံ့သိမ်မွေ့သွားစေသည်။

သို့သော် ဤလူက Diamonds ၏ စောင့်ရှောက်သူဖြစ်သည်ကို သတိရမိ၏... ရှောက်လုံသည် ကလေးများအပေါ် ချစ်မြတ်နိုးမှုကို အမြန်ဖယ်ရှားကာ ချက်ချင်း လျှောက်သွားသည်။

"ငါက ဖြစ်စဉ်ကို ပြီးပြည့်စုံစွာရှင်းလင်းနိုင်ခဲ့တာကြောင့် ကတ်ဆွဲလို့ရမှာမလား?"

"သေချာတာပေါ့၊ နင်ကံကောင်းအောင် ကြိုးစားကြည့်ပါ…"

သူ့ရှေ့မှာ တောက်ပနေသော ရတနာသေတ္တာကြီး ပေါ်လာသည်။ ရှောက်လုံသည် အမြန်လျှောက်သွားပြီး သေတ္တာထဲသို့ သူ့လက်ကိုထည့်ပြီး ကတ်တစ်ကတ်ကို ဆွဲထုတ်လိုက်သည်။

[S အဆင့် ‘ကိရိယာကတ်: သံလိုက်အိမ်မြှောင်’ကို ရရှိသည့်အတွက် ဂုဏ်ယူပါသည်။]

2 of Hearts ကို ပြီးပြည့်စုံစွာ ရှင်းလင်းပြီး ထောင်ယွမ်မင်ကတ်ကို ဆွဲယူပြီးကတည်းက ရှောက်လုံသည် ဤကတ်ကမ္ဘာကို ပဏာမနားလည်ခဲ့သည်။ သံလိုက်အိမ်မြှောင်ကို ရသောအခါတွင် သူ အံ့ဩခြင်းမရှိပေ။ သူက ကတ်ကို ကောက်ကိုင်လိုက်ပြီး သေသေချာချာကြည့်သည်။

[ကိရိယာကတ်: သံလိုက်အိမ်မြှောင်]

ရှားပါးမှု: S

ဖော်ပြချက်: လက်တွေ့တွင် အသုံးများသော်လည်း ကတ်ကမ္ဘာတွင် အလွန်ရှားပါးသော သင်္ချာကိရိယာတစ်ခုဖြစ်သည်။ လျှို့ဝှက်ခန်းကို ပြီးပြည့်စုံစွာရှင်းလင်းပြီးနောက် အကန့်အသတ်ကတ်ဆွဲခြင်းမှ ၎င်းကိုရယူရန် ဖြစ်နိုင်ခြေအလွန်နည်းပါသည်။

နောက်ထပ်စွမ်းရည် 1: စက်ဝိုင်းဆွဲခြင်း

အသုံးပြုပုံ: သံလိုက်အိမ်မြှောင်ကိရိယာကိုထုတ်ပြီး မည်သည့်အနေအထားတွင်မဆို စက်ဝိုင်းပုံဆွဲပါ။ 10 စက္ကန့်ကြာပြီးနောက် စက်ဝိုင်းသည် အရွယ်အစားတူ သတ္တုအကွင်းတစ်ခု ဖြစ်လာလိမ့်မည်။ သင်က အကွင်းကို လွင့်မျောစေပြီး ရန်သူကို တိုက်ခိုက်ရန် လက်နက်အဖြစ် အသုံးပြုနိုင်သည်။ အကွင်း၏ စွမ်းအားသည် သင်အသုံးပြုပုံပေါ်တွင် မူတည်ပါသည်။ ကျေးဇူးပြု၍ သင်ကိုယ်တိုင် နားလည်အောင် ကြိုးစားပါ။

မှတ်ချက်: တိုးတက်မှုသည် အဆင့် 1 ဖြစ်ပြီး ဆွဲထားသော စက်ဝိုင်းသည် 10 စက္ကန့်အကြာတွင် အစိုင်အခဲဖြစ်လာမည်ဖြစ်သည်။ အဆင့်တိုးလာတိုင်း ဆွဲထားသောစက်ဝိုင်း အစိုင်အခဲဖြစ်လာရန် အချိန်ကို တစ်စက္ကန့်စီလျှော့ချသည်။ အဆင့်အပြည့်တွင် ၎င်းကို 0.5 စက္ကန့်သို့လျှော့ချသည်။

နောက်ထပ်စွမ်းရည် 2: ကတ်သည် အဆင့် 10 သို့ တိုးလာသောအခါ လော့ခ်ပွင့်မည်။

ရှောက်လုံသည် ဖော်ပြချက်ကို ဖတ်ပြီး လက်တွေ့အကျိုးသက်ရောက်မှုကို စမ်းကြည့်လိုသောကြောင့် ဤကိရိယာကတ်ကို ချက်ချင်း အသက်သွင်းလိုက်သည်။

ကတ်ကို အသက်သွင်းပြီး သူ့လက်ဖဝါးမှာ ငွေသံလိုက်အိမ်မြှောင်တစ်ခု ပေါ်လာသည်။ သံလိုက်အိမ်မြှောင်၏ ထောက်တိုင်နှစ်ချောင်းမှာ ခလုတ်တစ်ခုရှိနေတာကလွဲရင် အလယ်တန်းကျောင်းသင်္ချာမှာသုံးသည့် သံလိုက်အိမ်မြှောင်နဲ့ ဆင်တူပါသည်။

ဦးစွာ သူသည် မြေပြင်ပေါ်တွင် ပုံမှန်အရွယ်အစား 1 စင်တီမီတာရှိသော စက်ဝိုင်းကိုဆွဲပြီးနောက် ထောက်တိုင်များ၏အရှည်ကို အမြင့်ဆုံးအထိ ချိန်ညှိကာ အချင်း 100 စင်တီမီတာရှိသော စက်ဝိုင်းပုံဆွဲခဲ့သည်။ 10 စက္ကန့်ကြာပြီးနောက် သူဆွဲလိုက်သော စက်ဝိုင်းများကဲ့သို့ အရွယ်အစားတူ ငွေဖြူရောင်သတ္တုကွင်းနှစ်ကွင်း ပေါ်လာသည်။ အကွင်းများသည် အလွန်ပါးလွှာပြီး အထိအတွေ့က ငွေကြိုးကဲ့သို့ဖြစ်နေသည်။ အကွင်းများသည် သူ၏လှုပ်ရှားမှုနှင့်အတူ လေထဲသို့ လွင့်ပျံသွားသည်။

ရှောက်လုံသည် သူ၏ကိုယ်ပိုင်နေရာတစ်ဝိုက်တွင် ပျံသန်းရန် အကွင်းများကို ထိန်းချုပ်ဖို့ကြိုးစားနေစဉ် သူ့ရင်ထဲ၌ ပျော်ရွှင်နေခဲ့သည်။

အကွင်းနှစ်ကွင်း၊ အကြီးတစ်ခုနှင့် အသေးတစ်ခုသည် သူ့လက်ချောင်းများ၏ လှုပ်ရှားမှုအရ လေထဲတွင် အမှန်တကယ် လွင့်မျောနေပြီး ပြုတ်ကျခြင်းမရှိပေ။

'မှော်' ကဲ့သို့သော ဆွဲငင်အားဆန့်ကျင်သည့် ဖြစ်စဉ်အမျိုးအစားသည် ရှောက်လုံအတွက် အချိန်အတော်ကြာအောင် လိုက်လျောညီထွေဖြစ်ရန် ခက်ခဲစေသည်။ ထို့နောက် ကတ်ကမ္ဘာထဲရှိ သူ့ကိုယ်သူ တွေးမိပြီး ထောင်ယွမ်မင်ကို သူဘယ်လိုခေါ်ရမလဲ... လွင့်မျောနေသောအကွင်းပြုလုပ်ခြင်း၏ သိပ္ပံနည်းကျအခြေခံအကြောင်း ပြောရန်ပင် မလိုအပ်ပါ။

ကမ္ဘာကြီးကိုယ်တိုင်က သိပ္ပံနည်းကျ မဟုတ်ဘူး။

ရှောက်လုံသည် အကွင်းများကို အောက်သို့ချလိုက်ပြီး S အဆင့် ကိရိယာကတ်ဖြစ်သော 'သံလိုက်အိမ်မြှောင်' ၏အသုံးပြုမှုကို အမြန်ရှာဖွေတွေ့ရှိခဲ့သည်။

သံလိုက်အိမ်မြှောင်ဖြင့်ဆွဲထားသော စက်ဝိုင်းကို 1 စင်တီမီတာ မှ 100 စင်တီမီတာ ကြားတွင် လွတ်လပ်စွာ ချိန်ညှိနိုင်သည်။ လူကြီးများအတွက် နားကပ်များ၊ လက်စွပ်များ၊ ခါးလှည့်ကွင်းများဖြင့်—— စက်ဝိုင်း၏အရွယ်အစားမှာ သတ္တုကွင်းအရွယ်အစားဖြစ်သည်။

ဤကတ်၏ အစွမ်းထက်သော အစိတ်အပိုင်းမှာ ၎င်းကို အသုံးပြုရန် အလွန်လိုက်လျောညီထွေရှိသောကြောင့် ဖြစ်သည်။ သူသည် လက်ကောက်အရွယ် အကွင်းတစ်ကွင်းကို ဆွဲနိုင်ပြီး အခြားသူများကို တိုက်ခိုက်ရန် လျှို့ဝှက်လက်နက်အဖြစ် အသုံးပြုနိုင်သည်။ ရန်သူများကို ထောင်ချောက်ဆင်ရန် အသုံးပြုနိုင်သော အကွင်းကြီးတစ်ကွင်းကို သူဆွဲနိုင်သည်။ လိုအပ်သောအခါတွင် သူသည် အခြားသူများ၏လည်ပင်းကို ချိုးရန် ပါးလွှာသောသတ္တုအကွင်းကို အသုံးပြုနိုင်သည်။

သဘောတရားအရ သံလိုက်အိမ်မြှောင်ကို လက်ထဲတွင် ကိုင်ဆောင်ထားပြီး သူသည် စက်ဝိုင်းလက်နက်တွေ ပြတ်လတ်တော့မည်မဟုတ်ပေ။ နေရာဒေသမရွေး သူတို့ကို ချက်ချင်း ဆွဲနိုင်သည်။

ဒါက တကယ်ကို S အဆင့်ကိရိယာတစ်ခုပါပဲ။

ရှောက်လုံသည် ကတ်အသစ်ကို သူ့ကတ်ထုပ်ထဲသို့ ထည့်လိုက်ပြီး ကတ်ကိုပြန်လည်စီစဉ်လိုက်သည်။

‘နှင်းဆီဈာပန’ဇာတ်ကွက်ကတ်ကို နောက်ဆုံးဇယားတွင် ထည့်သွင်းထားဆဲဖြစ်သည်။ အခုလေးတင် သူရလာသော လေးလမ်းသွားမြားနှင့် ခေါက်စက္ကူကိုလည်း နေရာချလိုက်သည်။ ဤကတ်နှစ်ခုကို ယာယီ အသုံးမပြုနိုင်သေးပေ။ လိုအပ်ရင် နောက်မှ ထုတ်လိုက်မည်။

ထို့နောက် အချိန်မရွေး အဆင်ပြေစွာ ထုတ်နိုင်ရန် သံလိုက်အိမ်မြှောင်ကို ဒုတိယဇယားတွင် ထားခြင်းဖြင့် သူဆက်လက်လုပ်ဆောင်ခဲ့သည်။

ရှောက်လုံသည် စီစဉ်တာကို အပြီးသတ်ပြီး ကတ်တစ်ခုစီ၏ အနေအထားကို ထပ်မံစစ်ဆေးသည်။ ထောင်ယွမ်မင်သည် ပထမဇယားတွင်ရှိနေဆဲဖြစ်ပြီး သံလိုက်အိမ်မြောင်သည် ဒုတိယဇယားတွင်ပါဝင်နေကာ နောက်တွင် နန်းတော်ကိုးခုလေးထောင့်ကွက်၊ သင်္ချာညီမျှခြင်း၊ သစ်သီးဓားနှင့် နှင်းဆီရေမွှေးတို့ ဖြစ်သည်။ ထို့နောက်တွင် ကတ်အလွတ်တစ်ဒါဇင်ကျော်ရှိခဲ့ပြီး နောက်ဆုံးတွင် နှင်းဆီဈာပန၊ လေးလမ်းသွားမြားနှင့် ခေါက်စက္ကူတို့ ဖြစ်သည်။

လက်ရှိတွင် စုစုပေါင်း ကတ်ကိုးကတ်ရှိပြီး နှစ်ခုမှာ S အဆင့် ဖြစ်သည်။

S အဆင့်ကတ်များ အားလုံးက အဆင့်မြင့်နိုင်သော ကတ်များဖြစ်ကြောင်း တွေ့ရှိခဲ့သည်။ ၎င်းတို့သည် အမြင့်ဆုံး ဘက်စုံအသုံးပြုနိုင်ပြီး အသုံးပြုနိုင်သော အရေအတွက်ကို ကန့်သတ်ထားခြင်းမရှိပါ။ သံလိုက်အိမ်မြှောင်ဖြင့် အမြဲတမ်း စက်ဝိုင်းပုံဆွဲနိုင်ပြီး ပျက်စီးခြင်းမရှိဘဲ ထောင်ယွမ်မင်ကို အချိန်မရွေး ဆင့်ခေါ်နိုင်ကာ “မက်မွန်ပွင့်နွေဦးကိုမှတ်မိပါ”ကို တစ်နေ့တစ်ကြိမ် အသုံးပြုနိုင်သည်။

A အဆင့်ကတ်သည် S အဆင့်ကတ်ထက် အားနည်းသည်။ ဥပမာအားဖြင့် ခေါက်စက္ကူကို တစ်ကြိမ်သာအသုံးပြုနိုင်ပါသည်။ လေးလမ်းသွားမြားတွင် အသုံးပြုနိုင်သောအရေအတွက်ကို ကန့်သတ်မထားသော်လည်း 'လမ်းညွှန်ခြင်း' ၏ အခန်းကဏ္ဍသာရှိသည်။ ဝင်္ကပါထဲတွင် ၎င်းက နတ်ဘုရားကတ်တစ်ခု ဖြစ်ပေမယ့် ဝင်္ကပါအပြင်မှာ ကြီးကြီးမားမားတော့ မဟုတ်ဘူး။

A အဆင့်အောက်ကတ်များက ပိုဆိုးသည်။ ဥပမာအားဖြင့် သစ်သီးဓားကိရိယာသည် 10 ကြိမ်သာ အသုံးပြုနိုင်ပြီး နှင်းဆီရေးမွှေးက 100 ml ပမာဏရှိပြီး အသုံးပြုပြီးနောက် သေသွားပြီဖြစ်သည်။ နန်းတော်ကိုးခုလေးထောင့်ကွက်ကို 9 ကြိမ်သာ အသုံးပြုနိုင်ပြီး သင်္ချာညီမျှခြင်းကို 2 ကြိမ်သာ အသုံးပြုနိုင်သည်။

လက်ရှိရရှိထားသောကတ်များကို အကဲဖြတ်ရာတွင် ကတ်ရှားပါးမှု၌ အဆင့်လိမ်လည်တာမျိုးမရှိပါ။

ဆိုလိုသည်မှာ S ရှားပါးမှုကတ်သည် အစွမ်းထက်ဆုံး၊ A အဆင့်ကတ်သည် တချို့သောလျှို့ဝှက်ခန်းများတွင် အံ့ဖွယ်နည်းဖြင့် အကျိုးသက်ရောက်မှုရှိသော်လည်း ကြီးမားသောကန့်သတ်ချက်များရှိသည်၊ B နှင့် C အဆင့်ကတ်များသည် မရေမတွက်နိုင်သော အဆင့်သတ်မှတ်ချက်နိမ့်သောကတ်များဖြစ်ပြီး ရရှိရန်အတော်လေးရိုးရှင်းကာ သုံးရတာလည်း အရမ်းလွယ်ပါသည်။

နောက်ပိုင်းအဆင့်များတွင် ပိုမိုအဆင့်မြင့်သောလျှို့ဝှက်ခန်းများကိုရှင်းလင်းလိုပါက သူ၏ခန္ဓာကိုယ်ပေါ်တွင် S နှင့် A အဆင့်ကတ်များပိုမိုထားရှိခြင်းက ပိုကောင်းပါသည်။

ကတ်ကမ္ဘာတွင် ဆွဲထားသောကတ်များသည် ကစားသမား၏ တိုက်ခိုက်ရေးစွမ်းအားကို တိုးမြင့်စေမည်ဖြစ်သည်။ ထို့ကြောင့် နောက်လျှို့ဝှက်ခန်းတွင် ရှောက်လုံသည် အတတ်နိုင်ဆုံး ပြီးပြည့်စုံစွာရှင်းလင်းရန် ရည်မှန်းသင့်သည်။ သူရရှိသော အဆင့်နိမ့်ကတ်များကို အသုံးပြုရလျှင်ပင် S အဆင့်ကတ်များကို ပိုမိုဆွဲရန်အတွက် ပြီးပြည့်စုံသော ဖြစ်စဉ်ရှင်းလင်းရေးဆီ လျှောက်လှမ်းရမည်။

ရှောက်လုံသည် ကတ်ထုပ်ကို ဖယ်လိုက်ပြီး ဆိုဖာပေါ်ရှိ ကလေးမလေးအား ကြည့်လိုက်သည်။

"ရှင်းလင်းရေးပြီးသွားရင် ငါ 15 မိနစ်လောက် အနားယူလို့ရမလား?"

ကလေးမလေးက မေးစေ့ကို လက်နဲ့ထောက်ရင်း ပြုံးပြသည်။

"Diamonds လျှို့ဝှက်ခန်းမှာ အနားယူချိန်မရှိဘူး… တစ်မိနစ်အတွင်း နောက်ထပ်ကတ်ကို တတ်နိုင်သမျှ အမြန်ဆုံးရွေးချယ်ဖို့ လိုအပ်တယ်…" သူမသည် လက်ကိုဝှေ့ယမ်းလိုက်ပြီး ကတ်လေးကတ်က ရှောက်လုံရှေ့ကို ရုတ်တရက် ပျံသွားသည်။

ရှောက်လုံက မျက်မှောင်ကြုတ်လိုက်သည်။ လျှို့ဝှက်ခန်းအမျိုးအစားတစ်ခုစီ၏ စောင့်ရှောက်သူများချမှတ်ထားသော စည်းမျဉ်းများက ကွဲပြားပုံရသည်။ Hearts လျှို့ဝှက်ခန်းပြီးနောက် သူသည် 15 မိနစ်ခန့် အနားယူနိုင်ပြီး Diamonds လျှို့ဝှက်ခန်းသည် အနားယူချိန်မရှိဘဲ နောက်တစ်ဆင့်သို့သာ ဆက်သွားနိုင်သည်။

လက်ရှိတွင် ရှောက်လုံရွေးချယ်နိုင်သည့် လျှို့ဝှက်ခန်းများမှာ 3 of Hearts၊ 3 of Diamonds၊ 2 of Spades၊ 2 of Clubs တို့ဖြစ်သည်။

သူသည် အမှုကိစ္စကိုဖြေရှင်းရန် 3 of Hearts သို့သွားခြင်း ဒါမှမဟုတ် ယန္တရားများကိုဆက်လက်ဖွင့်ရန် 3 of Diamonds သို့သွားနိုင်သည်။ ၎င်းတို့ကို ရှင်းလင်းနိုင်မည်ဟု သူယုံကြည်သည်။ သို့သော် သူသည် Spades နှင့် Clubs များကို အမြဲတမ်းရှောင်ရှားနိုင်မည်မဟုတ်ပေ။ လျှို့ဝှက်ခန်းအားလုံးနှင့် ရင်းနှီးရန် ဆုံးဖြတ်လိုက်သောကြောင့် ရှောက်လုံသည် Spades ကို ဆွဲလိုက်သည်။

ဒါဟာ ပထမဦးဆုံးအကြိမ် အနက်ရောင်ကတ်ကို သူဆွဲယူခဲ့တာ ဖြစ်သည်။

အမည်မသိလျှို့ဝှက်ခန်းနှင့် ကတ်၏အနက်ရောင်အလင်းတန်းများက ရှောက်လုံကို အနည်းငယ် စိတ်မသက်မသာဖြစ်စေသည်။

ဒါတောင် သူ့မှာ အများကြီး စဉ်းစားဖို့ အချိန်မရှိဘူး။ သူ့ခန္ဓာကိုယ်ကို ရင်းနှီးပြီး ထူးဆန်းသော စွမ်းအားတစ်ခုက 2 of Spades ၏ ကမ္ဘာထဲကို အတင်းအကျပ် စုပ်ယူလိုက်သည်။

***

ဤမြို့သည် လူသူကင်းမဲ့နေသောမြို့ဖြစ်နေ၏။

မီးခိုးရောင် ကောင်းကင်ကြီးက တစ်မြို့လုံးကို အရိပ်မိုးထားသည်။

စတိုးဆိုင်အများစုသည် တံခါးများပိတ်ထားကြပြီး လမ်းများမှာလည်း လူသွားလူလာမရှိကြပေ။ လမ်းဘေးနှစ်ဖက်တွင် စွန့်ပစ်ထားသောယာဉ်များ အများအပြားရပ်ထားခဲ့ပြီး ကားအားလုံးထဲတွင် လူမရှိပေ။ တချို့ကားများက သံချေးတက်သော အသွင်အပြင်ရှိသည်။

အရှေ့မလှမ်းမကမ်းမှာ အမှိုက်တွေ ရှိနေသည်။ အမှိုက်ပုံးထဲက အမှိုက်တွေကို မရှင်းတာကြာပြီဆိုတော့ ပုပ်သိုးနေတာ သိသာပါသည်။

အမှိုက်ပုံးထဲကို လေပြင်းတိုက်ပြီး အမှိုက်ပုံးထဲရှိ ပလပ်စတစ်အိတ်က လွင့်ထွက်သွားသည်။

ထိုဘေးတွင် ကျယ်လောင်သော အသံနှင့်အတူ သစ်ပင်ခြောက်တစ်ပင် လဲကျသွားသည်။ သစ်ပင်ပေါ်ရှိ ကျီးကန်းများသည် လန့်ဖျပ်ပြီး အဝေးသို့ ပျံတက်သွားကြသည်။ ကျီးကန်း၏အသံကြောင့် အမှိုက်ပုံးဘေးရှိ ကြွက်အနည်းငယ်က ထိတ်လန့်ကာ လှည့်ပတ်သွားနေကြသည်။ ရှောက်လုံအနားကနေ ကြွက်ကြီးတစ်ကောင် ဖြတ်သွားကာ သူ့ကိုကြည့်ဖို့ ရပ်လိုက်သည်။

ရှောက်လုံက ချက်ချင်းသတိရှိလာသည်။

ဒါက ပုံမှန်မဟုတ်သော ပတ်ဝန်းကျင်တစ်ခုပါ။ သူ ဘယ်လိုနေရာမျိုးကို ရောက်နေခဲ့တာလဲ။

ထိုအချိန်တွင် သူ့ခေါင်းပေါ်ရှိ ရင်းနှီးနေသော ‌လေးထောင့်ဘောင်က ရင်းနှီးနေသော အချက်ပြမှုများကို ပေးခဲ့သည်။

[2 of Spades လျှို့ဝှက်ခန်း၊ ဇွန်ဘီမြို့မှ ကြိုဆိုပါသည်။]

ဒါက အစွန်းအဖျားမြို့ဖြစ်ပါသည်။ ၎င်း၏လှပသောရှုခင်းကြောင့် တစ်ချိန်က ကတ်ကမ္ဘာတွင် ကမ္ဘာလှည့်ခရီးသည်များ ‌လာရောက်လေ့ရှိသည့် နာမည်ကြီးသောမြို့ ဖြစ်ခဲ့သည်။

လွန်ခဲ့သည့် ခြောက်လက မိသားစုသုံးယောက်သည် ဤနေရာသို့ ခရီးထွက်ခဲ့ပြီး မိုးသည်းထန်စွာရွာသည့်အချိန်နှင့် တိုက်ဆိုင်ခဲ့သည်။ အသက် 8 နှစ်အရွယ် ကောင်လေးသည် ဖျားနာပြီးနောက် ဆေးရုံသို့ ပို့ဆောင်ကုသခဲ့သည်။ ပထမကတော့ လူတိုင်းက သူ့မှာ အအေးမိပြီး အဖျားရှိနေတယ်လို့ ထင်ကြပေမယ့် ဆရာဝန်က ဘယ်လောက်ပဲ ကြိုးစားကြိုးစား မကုသနိုင်ခဲ့ဘူး။ ကယ်တင်တာ မထိရောက်မှုကြောင့် ကောင်လေးက သေဆုံးသွားခဲ့ပြီး မိုးရွာပြီးနောက်မှ သင်္ဂြိုဟ်ရန်အတွက် ပြင်ဆင်မှုပြုလုပ်ရန် ရင်ခွဲရုံတွင် ထားခဲ့သည်။

သို့သော် ညဉ့်နက်သောအခါ ကောင်လေးသည် ရင်ခွဲရုံထဲမှ ရုတ်တရက် ထွက်လာခဲ့သည်။

တာဝန်ကျသူနာပြုဆရာမက သူ့ကိုတွေ့သောအခါ သူက သူ့အမေ၏လည်ပင်းကို ကိုက်နေသည်။ သူနာပြုက အော်ဟစ်ပြီး လုံခြုံရေးအခန်းကို သွားခေါ်လိုက်သည်။ ကောင်လေးဟာ သူ့ပတ်ဝန်းကျင်က လူတွေကို ခွေးရူးလို တိုက်ခိုက်ခဲ့ပေမယ့် ဆေးရုံရှိ လုံခြုံရေးအစောင့်တွေက သူ့ကို အမြန်နှိမ်နင်းပြီး သော့ခတ်ထားခဲ့သည်။

ဒါတောင် အကိုက်ခံရသည့်လူက အလွန်များပြီး တချို့က ဆေးရုံကနေ လွတ်သွားကြသည်။

ဗိုင်းရပ်စ်က လျင်မြန်စွာ ပျံ့နှံ့လာသည်။

ရောဂါပိုးရှိသူတွေဟာ ကိုယ့်လူမျိုးကို အရူးအမူးကိုက်ကြသည်။

မူလက လှပသောရှုခင်းမြို့သည် ညတွင်းချင်း ကမ္ဘာပေါ်တွင် ကြောက်မက်ဖွယ်အကောင်းဆုံးငရဲအဖြစ်သို့ ပြောင်းလဲသွားသည်။

[2 of Spades လျှို့ဝှက်ခန်း ရှင်သန်ခြင်းပစ်မှတ်: ဇွန်ဘီများ၏ တိုက်ခိုက်မှုများကို ရှောင်ရှားပြီး မြို့လယ်ရှိဆေးရုံသို့သွားပါ။ သင့်ကိုကယ်ဖို့ ဆေးရုံပြင်ပလူနာအဆောက်အဦး၏ ခေါင်မိုးပေါ်မှာ တစ်စုံတစ်ယောက် ရှိနေလိမ့်မည်။]

[ဖြစ်စဉ်ကိုရှင်းလင်းရန် အချိန်ကန့်သတ်ချက်မှာ မိနစ် 60 ဖြစ်ပြီး အချိန်ကုန်သွားသည်နှင့် ကျရှုံးမည်ဖြစ်သည်။]

[D အဆင့်လျှို့ဝှက်ခန်း၏ ဖော်ရွေစွာအကြံပြုချက်: ဇွန်ဘီများ၏တိုက်ခိုက်မှုများသည် အလွန်ပြင်းထန်သော်လည်း သူတို့၏လှုပ်ရှားမှုများက နှေးကွေးသည်။ သူတို့တွေ ဖမ်းမိတာခံလိုက်ရသည်နှင့် သင်သည် ဗိုင်းရပ်စ်ကူးစက်ခံရပြီး ဇွန်ဘီဖြစ်လာကာ ဤနေရာတွင် ထာဝရနေရမည်ဖြစ်သည်။]

Hearts နှင့် Diamonds အတွက် ရိုးရှင်းသော အကြံပြုချက်များနှင့် မတူဘဲ Spades လျှို့ဝှက်ခန်းက ပိုမိုအသေးစိတ်သော နောက်ခံရှိသည်။

ရှောက်လုံသည် လက်ရှိတွင် ဇွန်ဘီဗိုင်းရပ်စ် ကူးစက်ခံထားရသည့် ကမ္ဘာတစ်ခုတွင် ရှိနေသည်။

အကြံပြုချက်၏ နောက်ဆုံးစာကြောင်းက ရှောက်လုံကို ထိတ်လန့်သွားစေသည်။

တစ်နည်းဆိုရသော် ဤလျှို့ဝှက်ခန်းထဲတွင် ဇွန်ဘီတစ်ကောင်သည် သူ့ကို မတော်တဆ ကုတ်မိသွားပါက ဗိုင်းရပ်စ်ကူးစက်ခံရပြီး သူကဇွန်ဘီပုံစံဖြင့် ဤနေရာတွင်နေမည်ဖြစ်သည်။ 2 of Spades လျှို့ဝှက်ခန်းတွင် သူကြုံတွေ့ရမည့် ဇွန်ဘီအများအပြားက သူ့လိုမျိုး စိန်ခေါ်သူများ ဖြစ်ကောင်းဖြစ်နိုင်သည်။

ဤကတ်ကမ္ဘာတွင် ဇွန်ဘီပုံစံဖြင့် နေထိုင်တာထက် ရိုးရိုးရှင်းရှင်းသေလိုက်တာက ပိုကောင်းပါသည်။

ရှောက်လုံသည် လက်သီးများကို တင်းတင်းကျပ်ကျပ် ဆုပ်ထားပြီး လက်သည်းများက လက်ဖဝါးကို နာကျင်စေသည်။ ပြင်းထန်သော နာကျင်မှုက သူ့ကို လျင်မြန်စွာ ငြိမ်သက်သွားစေသည်။

သူ့နောက်ကနေ ဆူညံသံကြားတော့ ရှောက်လုံလှည့်ကြည့်လိုက်သည်။

ဇွန်ဘီများစွာသည် သက်ရှိများကို အနံ့ခံပြီး သူ့အား ဖြည်းညှင်းစွာ ဝိုင်းရံနေတာကို သူမြင်လိုက်ရသည်။

တချို့သော ဇွန်ဘီများသည် ပုံပျက်နေသည့်အသွင်အပြင်၊ တချို့မှာ လက်နှင့်ခြေထောက်များ မရှိကြဘဲ၊ တချို့မှာ သူတို့၏ဗိုက်တွင် အပေါက်များရှိနေသည်။ ကျောင်းဝတ်စုံ ဝတ်ထားသည့် ကျောင်းသူမိန်းကလေး၏ ခန္ဓာကိုယ်က အကောင်းပကတိဖြစ်နေသော်လည်း သူမ၏ မျက်လုံးများက ကြည်လင်ခြင်းမရှိဘဲ ခံစားချက်မဲ့စွာ သူ့ကို စိုက်ကြည့်နေသည်။ သူမ၏ပါးစပ်မှ သွားရည်တွေ စီးကျလာသည်။

သူနှင့် ဤဇွန်ဘီအမျိုးသမီးကြားရှိ အကွာအဝေးက ငါးမီတာထက် မပိုပေ။

သူ နောက်ပြန်လှည့်ကြည့်လိုက်တော့ သူ့မျက်လုံးတွေက ဇွန်ဘီအမျိုးသမီး၏ သေဆုံးနေသော ငါးနဲ့တူသည့် မျက်လုံးတွေကို တွေ့လိုက်ရသည်။

"……"

ရှောက်လုံသည် တောင့်တင်းသွားပြီး တစ်ဖက်သို့လှည့်ကာ မဆိုင်းမတွ ပြေးတော့သည်။

#TK