MM Story Teller

Chapter 9

Viewers 4k

👻Chapter 9:

ဝိဥာဥ်လက်ထပ်ပွဲ (8)

“ရှောင်ရွှယ်...မင်းက ကိုယ့်ကို ခွင့်လွှတ်ပေးဖို့ ဆန္ဒရှိနေတာလား"

လီပင်းက ချက်ချင်းပင် ယုံကြည်ချက်တို့ ရှိလာသည်။ ဆိုရလျှင် သူက လော့ဇီယန်နှင့် ကျင်းထျန်းယိတို့ နှစ်ယောက်က သူတို့ကို ဤနေရာတွင် ချန်ထားခဲ့ပြီး ချူကျောင်းအစီအစဥ်အတိုင်း ချောင်အိမ်တော်သို့ လိုက်သွားလိမ့်မည်ဟု မယုံချေ။

သူတို့၏ တာဝန်က အသစ်လေးများကို ကူညီရန် ဖြစ်သည်။

ချူဟွိုက်က ဝမ်ရွှယ်ကို စိုက်ကြည့်နေရင်း သူ့မျက်လုံးများက တဖြေးဖြေး နက်ရှိူင်းလာသည်။

"ဝမ်ရွှယ်"

လော့ဇီယန်က မျက်မှောင်ကြုတ်လိုက်ရင်း " မင်း ပြတ်ပြတ်သားသား ဆုံးဖြတ်ပြီးပြီလို့ ထင်နေတာ..." သူက ဝမ်ရွှယ် အမြင်မှန်မရပဲ လီပင်းကို ဖက်တွယ်နေသေးသည့် အကြောင်းရင်းကို နားမလည်ချေ။

“ဟုတ်တယ်" ဝမ်ရွှယ်က နူးနူးညံ့ညံ့ ပြန်ဖြေလာသည်

" စိုးရိမ်ပေးတဲ့အတွက် ကျေးဇူးပါ အစ်ကိုလော့...ကျွန်မ ကျွန်မက လီပင်းနဲ့ ဒီမှာ အတူတူနေခဲ့ချင်လို့ပါ"

“ကောင်းပြီလေ" လော့ဇီယန်က ဤကိစ္စကို အာရုံနောက်ခံပြီး ဂရုစိုက်မနေတော့ချေ " ဒါဖြင့် မင်း ဂရုစိုက်ရမယ်နော်"

“လီပင်း...ရှင် တကယ်ပဲ ကျွန်မတို့နဲ့အတူ မလိုက်တော့ဘူးလား" ချူဟွိုက်က သူ့ကို တစ်ကြိမ်ထပ်ပြီး တည်တည်ငြိမ်ငြိမ် မေးလိုက်သည်။

ချူဟွိုက်၏ အကြည့်အောက်တွင် လီပင်းက တွန့်ဆုတ်ဆုတ် ဖြစ်လာရသည်။ သူ၏ လက်ရှိ ခံစားနေရသော ခံစားချက်ကို ဝန်မခံချင်၍ ဒေါသတကြီး ပြောလာသည်

" ငါက ဘာလို့ နင့်စကားကို နားထောင်ရမှာလဲ"

“သူ့ကို ထားလိုက်တော့" ကျင်းထျန်းယိ၏ မျက်လုံးများက နက်မှောင်နေသည်။

သူက ချူဟွိုက်၏ လက်ကို ဆွဲလိုက်ရင်း အပြင်ထွက်သွားလေသည်။ ချူဟွိုက်၏ လက်ချောင်းထိပ်လေးများက အေးစက်နေပြီး လက်သည်းခွံများက ပုံမှန် လခြမ်းပုံသဏ္ဍာန်မျိုး မဟုတ်ပဲ လှပသေသပ်သည်။

လော့ဇီယန်ကလည်း သူတို့နောက် လိုက်လာခဲ့သည်။

သုံးယောက်လုံး လှေကားခုံကို ကျော်ပြီး ထွက်သွားကြသောအခါ သူတို့ကို ကြည့်နေသည့် လီပင်းက အံ့သြသွားရသည်။ သူက လော့ဇီယန်နှင့် ကျင်းထျန်းယိတို့က သူနှင့် ဝမ်ရွှယ်ကို တကယ်ကြီး ထားသွား၍ မယုံနိုင်အောင် ဖြစ်သွားရသည်။ တစ်ခဏမျှ သူက ထိတ်လန့်သွားရသော်လည်း သူ့မျက်နှာမပျက်ရအောင် လိုက်သွားမည့်အစား နေခဲ့ရန် ဆုံးဖြတ်လိုက်သည်။

ချူဟွိုက်က အဓိပ္ပါယ်အပြည့်ပါသည့် မျက်ဝန်းတစ်စုံနှင့် လီပင်းရှိရာ လှည့်ကြည့်လာသည်။

ကျောက်ရှင်းက လွန်ခဲ့သည့် နာရီပိုင်းကမှ သေဆုံးသွားသည် ဖြစ်ပြီး သရဲကလည်း သူ၏ နောက်ထပ်မစ်ရှင်ကို မကြာခင် စလာနိုင်သည်။ သို့သော်လည်း သူက လီပင်း အသိဝင်လာနိုင်ရန် အချိန်လောက်ပါ့မလား မသိချေ။

ယင်းမိသားစုတွင် နေခဲ့သည်က အမှန်တကယ် ကောင်းမွန်သော ဆုံးဖြတ်ချက် ဖြစ်သည်။ သို့သော် သူတို့၏ လက်ရှိအခြေအနေနှင့်....

လီပင်းသာ အသတ်ခံလိုက်ရလျှင် သရဲက ကျန်သည့်သူများကို အချိန်တစ်ခုစာထိ ဘာမှ လုပ်လာနိုင်မည် မဟုတ်ပေ။

သူက ဤအကြောင်း စဥ်းစားနေရင်း ချူဟွိုက်၏ မျက်လုံးများက မယုံနိုင်သလို ဖြစ်သွားသည့် အလင်းတန်းတစ်ခု ပေါ်လာသည်။

မဟုတ်ဘူး။ ဘယ်လိုလုပ်ပြီး ဒီလိုမျိုး ဖုန်းကွယ်ထားတဲ့ စည်းမျဥ်းမျိုး ရှိနိုင်မှာလဲ။

ထိုအခိုက် သူက တစ်ဖွဲ့တည်းသားချင်းကို စတေးရမည့် နည်းလမ်းနှင့် အချိန်ကို စဥ်းစားနေသလို ဖြစ်သွားသည်။

သရဲများက သူတို့ကို ရက်ရက်စက်စက် မသတ်နိုင်ကတည်းက သူတို့ကို အသက်တစ်ရှိုက်ရှူရန် အချိန်တစ်ချို့ ပေးထားခြင်း ဖြစ်နိုင်သည်။ လော့ဇီယန် ပြောဖူးသည့် စကားများအရ ပရလောကထဲရှိ ဖြစ်ရပ်အများစုတွင် အချိန်အကန့်အသတ် ရှိလေသည်။

ကိုယ့်အဖွဲ့ဖော်ကို စတေးပြီး ပြဿနာအားလုံးကို ရှောင်လိုက်သည်နှင့် ဖြစ်ရပ်အဆုံးထိ အသက်ရှင်နိုင်ပေသည်။

ဝိဥာဥ်လက်ထပ်ပွဲက ကွာခြားမှုမရှိပေ။ သူတို့က အဓိကဇာတ်လမ်းမစခင် သုံးရက်အလိုတွင် ရောက်လာကြခြင်းဖြစ်သည်။ ဤကိစ္စတွင် လူတစ်ယောက်က သူ၏ အဖွဲ့ဖော်ကို သရဲရှိသည့် နေရာကို ဦးဆောင်ခေါ်သွားခဲ့လျှင်....

သူ၏ အဖွဲ့ဖော်က အသတ်ခံရပြီး ထိုလူက အချိန်တစ်ခုစာထိ ဘေးကင်းနေမည်ဖြစ်ကာ ထိုအချိန်ပြီးဆုံးသွားသလျှင် ထိုသူက ထိုလုပ်ခဲ့သည့်အတိုင်း ပြန်လုပ်မည်ဖြစ်သည်။

ထိုလူက ဤနည်းလမ်းကို သုံးပြီး အခြားသူများကလည်း သူတို့အကြံအတိုင်း နားထောင်ကာ လိုက်ပါနေသရွေ့ ထိုလူက အားလုံးကို စွန့်လွှတ်၍ တမင်သက်သက် လမ်းကြောင်းမှားပေါ် ရောက်နေသော်လည်း အသက်ရှင်ရန် အခွင့်အရေးရမည် ဖြစ်သည်။

ချူဟွိုက်က သူ့မျက်လုံးထဲရှိ ထူးဆန်းသော အရိပ်အရောင်ကို ဖုံးကွယ်လိုက်ရင်း ကျင်းထျန်းယိကို မော့ကြည့်လာသည်။

“ဘာဖြစ်လို့လဲ" ကျင်းထျန်းယိက ဤအကြည့်ကြောင့် ဇဝေဇဝါ ဖြစ်သွားရသည်။

ချူဟွိုက်က အပြုံးလေးနှင့် ခေါင်းအသာယမ်းပြလာရင်း မျက်လွှာချလိုက်သည်။

ကျင်းထျန်းယိက သေချာပေါက် အဲ့လိုလူမျိုး မဟုတ်ဘူး။ သူက ဤသို့ နည်းလမ်းမျိုးကို အထင်သေးမိကာ လူကြီးလူကောင်းတစ်ယောက်၏ နှလုံးသားကို တစ်ဖက်သတ်အမြင်နှင့် တိုင်းတာရန် မလိုအပ်ပေ။

[မြင့်မြတ်တဲ့သူကို အထင်သေးတဲ့အကြည့်နဲ့ အကဲမဖြတ်သင့်ဘူးလို့ ပြောတာပါ]

သုံးယောက်လုံး ထွက်သွားကြ၍ လီပင်းက စိတ်ရှုပ်နေပြီး တံခါးဘက်ကို ခဏခဏ ကြည့်ကြည့်နေမိသည်။

သူက နောင်တရမိသည်။

ပြောရလျှင် ဖြစ်ရပ်ထဲ နေသည်မှာ ကြာပြီဖြစ်သော်လည်း သရဲနှင့် မတွေ့ဖူးပေ။ သို့သော်လည်း ဝမ်ရွှယ်က မတူချေ။ ပထမဆုံး သူမက အမျိုးသားသရဲကို မြင်ခဲ့ပြီး နောက်ပိုင်း၌ တဲထဲတွင် သရဲတစ်ကောင်၏ ဟန့်တားခြင်းကို ခံရသည်။ နောက်ပြီး သူမက ကျောက်ရှင်း သေဆုံးခဲ့သည်ကို မျက်မြင်တွေ့ခဲ့ရသေးသည်ပင်။

တစ်ဖက်တွင်လည်း သူက အလွန် ကံကောင်းလေသည်။

ရိုးရိုးသားပြောရလျှင် လွန်ခဲ့သော နှစ်ရက်က ဖြစ်ရပ်ထဲ ဝင်လာသည့်အချိန်မှစ သူ့ပတ်လည်ရှိ အရာများက အစစ်အမှန်မဟုတ်ဟု ခံစားရသည်။ ကျောက်ရှင်းသေသွားမှသာ ဤကမ္ဘာကြီးက အစစ်အမှန်ဖြစ်ပြီး လူတစ်ယောက်ကို အချိန်မရွေး သတ်ပစ်နိုင်မှန်း နားလည်သွားရသည်။

မဟုတ်ဘူး။ လီပင်းက ပြင်းပြင်းထန်ထန် ခေါင်းရမ်းလိုက်သည်။

သူက ထူးခြားသည်။

သရဲက ခြေလှမ်းလာလျှင်ပင် သူ၏ ပထမဆုံးပစ်မှတ်က ကြက်ကလေး တစ်ကောင်တောင် မဖမ်းနိုင်သည့် ဝမ်ရွှယ် သို့မဟုတ် ချူကျောင်းတို့လို အားနည်းသည့် အမျိုးသမီးတစ်ယောက် ဖြစ်နိုင်သည်။ သရဲက သူ့ကို ဘယ်လိုလုပ်ပြီး အရင်ဆုံး ပစ်မှတ်ထားလာနိုင်မှာလဲ။

ဒါ ဖြစ်နိုင်တယ်။

သူ့ရွေးချယ်မှုက မှန်ရဲ့သားနဲ့ ဘာလို့ ဘယ်သူမှ မယုံကြတာလဲ။

သို့သော်လည်း သူက ယင်းမိသားစုတွင် ဆက်မနေချင်တော့ပေ။

သူက ဤနေရာတွင် အလောင်းနှစ်လောင်းသုံးလောင်း ရှိနေသေးမှန်း နောက်မှ သိလိုက်ရသည်။

အဖေယင်းနဲ့ အမေယင်းတို့သာ မကျေနပ်လို့ သရဲဖြစ်သွားရင်ရော...သူ ဘာလုပ်ရမလဲ။

“ရှောင်ရွှယ်....ချောင်အိမ်တော်ဆီ သွားကြရအောင်..." လီပင်း၏ မျက်လုံးများက တွန့်ဆုတ်ဆုတ် ဖြစ်နေသည့် အရိပ်ရောင်တို့ ပေါ်လာသည်။

ဝမ်ရွှယ်က လီပင်းနောက် ရောက်နေမှန်း မည်သူမှ မသိလိုက်ချေ။ သူမ၏ လည်ပင်းက မြွေတစ်ကောင်လို ဖြေးဖြေးချင်း လိမ်လာပြီး လီပင်း၏ ကျိုးပဲ့လွယ်သည့် လည်ပင်းကို စိုက်ကြည့်နေသည်။

လီပင်းက သူမ၏ ထူးထူးဆန်းဆန်း အပြုအမူကို သတိထားမိဟန် မရှိပဲ မျက်နှာမပျက်ရန် သူ့ကိုယ်သူ စကားပြောနေသည်

" ငါ...ငါတို့က အဖွဲ့ပဲလေ။ တစ်ယောက်တည်း လှုပ်ရှားဖို့က ကောင်းတဲ့ ရွေးချယ်မှု မဟုတ်ဘူး"

ဝမ်ရွှယ်က ရုတ်တရက် အသံထွက် ရယ်မောလာ၍ သူမအသံက တောင်ကုန်းပေါ်က ငှက်ရွှေဝါလေး တစ်ကောင်လို နားဝင်ချိုလှသည်

" အရာရှိလီ...ကျွန်မတို့ အတူရှိခဲ့တာ ခုနစ်နှစ် ရှိပြီနော်...ဟုတ်တယ်ဟုတ်"

လီပင်းက ဝမ်ရွှယ် သူ့ကို ခေါ်လာသည့် ပုံစံက ထူးဆန်းနေမှန်း သတိမထားမိပဲ မျက်လုံးပင့်သွားသည်။ ဝမ်ရွှယ်က သူ့ကို မေးလာတယ် ဆိုတော့ သူမက သူနဲ့ ပြန်သင့်မြတ်ချင်တယ်လို့ ပြောချင်တာလား။

ဤအခြေအနေကို အခွင့်ကောင်းယူပြီး လီပင်းက ဆိုလာသည်

" ဟုတ်တာပေါ့ ရှောင်ရွှယ်ရဲ့။ အထက်တန်းကတည်းကဆိုတော့ ကိုယ်တို့ အတူတူရှိနေတာ ခုနစ်နှစ် ရှိပြီ။ မင်း မေ့သွားပြီလား။ ကိုယ်တို့ ဘွဲ့ရပြီးရင် အလုပ်ရှာပြီး လက်ထပ်ကြမယ်။ ပြီးရင် ကလေးယူကြမယ် ဆိုပြီး ပြောခဲ့တာ..."

လီပင်းက သူတို့ အနာဂတ်ကို ချစ်ကြည်နူးစွာ စိတ်ကူးယဥ်နေသည်။

မှန်မှန်ပြောရလျှင် သူက ဝမ်ရွှယ်ကို လက်မလွှတ်ချင်ပေ။ သူမက နာခံမှု ရှိသည်။ သူတို့ အထက်တန်းတက်စဥ်က ဝမ်ရွှယ်သည် ကလေးထိန်းတစ်ယောက်လို သူ့အဝတ်များကို အမြဲတမ်း လျှော်ဖွပ်ပေးပြီး သူ၏ နေ့စဥ်ဘဝကိုလည်း ဂရုစိုက်ပေးသည်။

သူက သူမ သူ့ဘေးမှာ ရှိနေသည်နှင့် အသားကျနေပြီဖြစ်သည်။

ဝမ်ရွှယ်က လှုပ်ရှားလာသည် " ဟုတ်တယ်နော်" သူမက သူ့ဝမ်းဗိုက်ကို အနောက်ကနေ ဖက်လာသည်။

လီပင်းက အရမ်း ပျော်နေသော်လည်း ဝမ်ရွှယ့်လက်နှင့် ရုတ်တရက် ထိသွားချိန် သူ့ခန္ဓာကိုယ်တစ်ခုလုံးက ထိန်းမရအောင် တုန်ယင်လာသည်။

သူမ၏လက်က အေးစက်ပြီး စိုစွတ်နေကာ စီးကျနေသည့် ရေစီးကြောင်းပင် ရှိနေသေးသည်။

ဝမ်ရွှယ့်အရေပြားပုံစံက....

တစ်ခဏမျှ လီပင်းက ပေါက်ကွဲတော့မည့် ဗန်းမုန့်ပေါင်း သို့မဟုတ် ပူစီဖောင်းတစ်ခုကို ထိနေရသည်ဟုပင် တွေးမိသည်။

လီပင်းက အလိုလို ခေါင်းငုံ့ကြည့်လိုက်သည်။ သို့သော်လည်း သူမြင်လိုက်ရသည်က နူးညံ့သည့် လက်သွယ်သွယ်လေး တစ်ခုပင်။

မဟုတ်ပါဘူး။ ထင်ယောင်ထင်မှား ဖြစ်နေရုံပါ။ သူက အခု အရမ်း လန့်နေတာ မို့လား။ သူက အရမ်း လန့်နေလို့ပါ။

ဝမ်ရွှယ်က ဘယ်လိုလုပ်ပြီး သရဲဖြစ်လာနိုင်မှာလဲ။ သူ ဘာတွေစဥ်းစားနေတာပါလိမ့်။ သူမသာ သရဲဆိုရင် အခုထိ ဘာလို့ အသက်ရှူနေဦးမှာလဲ။

အမှန်တွင် သူတို့က တစ်ယောက်နှင့်တစ်ယောက် အရမ်း နီးကပ်နေကြ၍ သူမ၏ အသက်ရှူသံကို ထောက်လှမ်းနိုင်သည်။

လီပင်း နားမလည်ခဲ့သည့် အရာက သူက လော့ဇီယန်ကို စိတ်ပျက်အောင် လုပ်မိသွားသည် ဆိုသည်ကိုပင်။ ထို့ကြောင့် လော့ဇီယန်က သရဲက ပါဝင်သူကို သတ်ပြီးသွားသည့်နောက်ပိုင်း ဘေးကင်းမည့် အချိန်အကန့်အသတ်ကို သူ့အား ပြောမပြသွားခြင်း ဖြစ်သည်။

လီပင်းက ခက်ခက်ခဲခဲ တံတွေးမြိုချလိုက်ပြီး စိတ်တည်ငြိမ်ရန် ကြိုးစားနေရသည်။ ထို့နောက် သူက အားတင်းပြုံးလိုက်ရင်း " ရှောင်ရွှယ်... ကိုယ့်အမှားဆိုတာ ကိုယ်သိပါတယ်။ ကိုယ် မင်းကို စိတ်ပျက်အောင် လုပ်ခဲ့မိသလို ကိုယ့်အတွက်လည်း ဘာမှ ထူးခြားမသွားရပါဘူး။ ကိုယ့်နှလုံးသားက ဟာလာဟင်းလင်းဖြစ်သွားသလို ခံစားရတယ်။ ဒါပေမယ့် ကိုယ် မင်းကို ချစ်နေသေးတယ်...ကိုယ်က..."

“ထပ်မပြောနဲ့တော့...ကျွန်မ နားလည်တယ်" ဝမ်ရွှယ်က သူ့အပေါ် ခေါင်းမှီထားလိုက်သည်။

ဝမ်ရွှယ်၏ အသက်ရှူသံက လီပင်း၏ နောက်ကျောကို ထိတွေ့လာ၍ ရေခဲတမျှ အေးစက်နေသည်။ သူမ၏ သဘောထားက သူ့ကို အရမ်း စိတ်ကျေနပ်စေသည်။

“ဒါဖြင့် ကျွန်မ ရှင့်ကို တစ်ခု ရွေးခိုင်းရင်ရော...ရှင်..."

ဝမ်ရွှယ်က စကားရပ်သွားပြီး သူမမျက်လုံးထက် ရက်စက်မှုအရိပ်ရောင်က လက်ခနဲ ပေါ်လာသည် " ရှင် ကျွန်မနဲ့အတူ လိုက်သေရဲလား"

“ဘာကြီး" လီပင်းက သူမပြောသည့် အကြောင်းရာကို ရှင်းရှင်းလင်းလင်း မကြားလိုက်ရချေ။

ဝမ်ရွှယ်က နူးနူးညံ့ညံ့ ဆိုလိုက်သည် " ကျွန်မ ပြောတာက...ဇာတ်ကောင်သာ ပြောင်းပြန်ဖြစ်သွားရင် ရှင့်ကို ကျွန်မနဲ့အတူ လိုက်သေစေချင်တယ်"

“ရှောင်ရွှယ်" လီပင်းက သူမပြောလိုက်သည့်အရာကို မယုံကြည်နိုင်ခဲ့။ သို့သော်လည်း သူက တုန်လှုပ်သွားသလို ခံစားရသည်။

“လူတစ်ယောက် အသက်ရှင်နေရင် သူတို့က စောင်ခြုံကြတယ်။ ဒါပေမယ့် လူတစ်ယောက် သေသွားပြီဆိုရင်တော့ အခေါင်းနဲ့ အုပ်ခံရတယ်။ တစ်ယောက်တည်း အသက်ရှင်ရတာက အရမ်း အထီးကျန်ဆန်တယ်။ ရှင်လည်း အဲ့လို ထင်တယ် မဟုတ်လား..."

ရုတ်တရက် လီပင်းက သူ့နောက်ကျောက ချွေးစို့နေပြီမှန်း ခံစားလိုက်ရသည်။

“ကျွန်မ ရှင့်ကို...." ဝမ်ရွှယ်က အလွန် လေးနက်သည့် စကားတစ်ခွန်းကို ပြောလာသည်။

သူမတွင် အနီရောင် တောက်တောက် နှုတ်ခမ်းလေးများနှင့် နှင်းဆီရောင် ပါးမို့မို့လေးများ ရှိလေသည်။ သူမ၏ မျက်နှာအစိတ်အပိုင်းလေးများက နူးညံ့လှပြီး သတိုးသမီးတစ်ယောက်နှင့် ဆင်သည်။

လီပင်း၏ နှလုံးသားတို့ လှုပ်ယမ်းသွားသည်။ သူ့ကို ဝမ်ရွှယ်က အခန်းထဲ ခေါ်သွားလေသည်။

သူမက သူ့ကို ကျောပေးလာပြီး သူမ၏ ကုတ်အင်္ကျီအထူကြီးကို ချွတ်လိုက်သည်။

လီပင်း၏ နှလုံးသားက ရုတ်တရက် ခုန်ပေါက်လာသည်။

ဒါ မဟုတ်သေးဘူးလေ။

အကြောင်းတစ်ချို့ကြောင့် သူက လှည့်ပြေးသွားလေသည်။

ဝမ်ရွှယ်၏ လှုပ်ရှားမှုတို့ ရပ်တန့်သွားပြီး သူမက လီပင်း ထွက်ပြေးသွားသည့် နေရာကို စုံစမ်းနေသည့်ပုံရှိသည်။

ထို့နောက် သူမခန္ဓာကိုယ်ကို ပြပြီး ပြန်လှည့်လာသည့်အခါ....

👻

ချူဟွိုက်တို့ သုံးယောက်သား ချောင်အိမ်တော်သို့ သိပ်မကြာခင် ရောက်သွားကြသည်။

ချောင်သခင်မကြီးကို မြင်ပြီးနောက် ချူဟွိုက်က တစ်ခု နားလည်သွားရသည်။ ချောင်သခင်မကြီးက ယင်းမိသားစု၏ အလှည့်စားခံထားရခြင်း ဖြစ်နိုင်သည်။

အဖေယင်းက ယင်းရှောင်ဖုန်းနှင့် မာကျစ်ချိန်တို့၏ ဆက်ဆံရေးကို ကောင်းကောင်း သိထားသည်။

သို့သော်လည်း သူ့သမီးကို ချောင်မိသားစုနှင့် လက်ထပ်စေချင်သည့်အတွက် ယင်းရှောင်ဖုန်းနှင့် မာကျစ်ချိန်တို့၏ ဆက်ဆံရေးကို တမင်သက်သက် ဖုံးကွယ်ထားခဲ့သည်။ ချောင်သခင်မကြီး၏ ယောကျ်ားဖြစ်သူက နွေဦးနှင့် ဆောင်းဦးအတွင်း သေဆုံးသွားခြင်း ဖြစ်သည်။ ထိုနှစ်များအတွင်း သူမက ချောင်ရုန်ကို သူမလက်နှင့် ကိုယ်တိုင် ပျိုးထောင်ခဲ့လေသည်။ ချောင်မိသားစုကလည်း သူမ၏ ထိန်းချုပ်မှု အောက်တွင် ယနေ့ထိ သြဇာအာဏာ ရှိနေလျက်ပင်။ အခြင်းအရာ တော်တော်များများကို ရင်ဆိုင်ခဲ့ရသည့် သူမလို အတွေ့အကြုံများသည့် မိန်းမတစ်ယောက်အတွက် သူဆင်းရဲတစ်ယောက်ကို သတ်လိုက်ရန်က ဘာမှမဟုတ်ပေ။

ချောင်မိသားစုက အဖေယင်းကို ကူညီပြီး 'ပြဿနာ' ကို ဖြေရှင်းပေးသည်။ ထို့ကြောင့် အဖေယင်းက ဤအခွင့်အရေးကို ယူပြီး ယင်းရှောင်ဖုန်းကို လည်ပင်းညှစ်သတ်ကာ ချောင်မိသားစု၏ ကြာကန်ထဲ လွှင့်ပစ်လိုက်ခြင်း ဖြစ်သည်။

ကိစ္စတိုင်းက အဓိပ္ပါယ်ရှိသွားလေသည်။

ချောင်သခင်မကြီးက ယင်းရှောင်ဖုန်း ကိုယ်ဝန်ရှိနေသည်ကို မသိထားလောက်ချေ။

မဟုတ်ပါက သူမ၏ အကျင့်အရ ယင်းမိသားစုနှင့် လက်ထပ်ပွဲကြောင့် ဆက်သွယ်မိရင်ပင် ထိုသို့ မိန်းကလေးမျိုးကို မည်သို့များ ချွေးမအဖြစ် လက်ခံနိုင်မည်နည်း။ သူမသားကို ဦးထုပ်စိမ်းဆောင်းခိုင်းရသလို ဖြစ်မနေဘူးလား...။

[ဦးထုပ်စိမ်းဆောင်းတာက အမျိုးသမီးက ဖောက်ပြန်နေတာကို ပြောတာပါ။ dài lǜ mào zǐ [ဦးထုပ်စိမ်းဆောင်းတာ]က လင်ငယ်နေတာနဲ့ အသံထွက်တူပါတယ်တဲ့]

ထို့ကြောင့် လက်ထပ်ပွဲနှင့် ပတ်သတ်ချင်သည့်အတွက် အဖေယင်းက လိမ်လည်ပြီး ပင်လယ်ကို ဖြတ်ကူးခဲ့လေသည်။ [မရိုးသားတဲ့ နည်းလမ်းနဲ့ ရည်ရွယ်ချက် အောင်မြင်အောင် လုပ်တာပါ]

ယနေ့ညတွင် ဝိဥာဥ်လက်ထပ်ပွဲ ကျင်းပတော့မည် ဖြစ်၍ အိမ်တော်ကြီးတစ်ခုလုံး ဧည့်သည်များ ပြည့်နေကြပြီး အချို့က ချောင်သခင်မကြီးကို ခက်ခက်ခဲခဲ နှုတ်ဆက်နေရသည်။

သူတို့က သူမ၏ သားဖြစ်သူ လက်ထပ်ပွဲအတွက် ဂုဏ်ပြုပေးသင့်လား သားဖြစ်သူ၏ သေဆုံးမှုအတွက် နှစ်သိမ့်ပေးရမည်လား မသိတော့။

အဖေယင်းနှင့် အမေယင်းတို့ပါ ရှိနေသင့်သော်လည်း ထိုင်ခုံများက လွတ်နေသည် သို့သော် မည်သူမှလည်း ထူးဆန်းနေမှန်း သတိထားမိပုံမရချေ။

ချူဟွိုက်က သူက သူတို့ ခန္ဓာကိုယ်များကို ဖယ်ရှားပစ်လိုက်ရမလား မေးသည့်အချိန် ကျင်းထျန်းယိက ငြင်းလိုက်ရသည့် အကြောင်းရင်းကို ရုတ်တရက် နားလည်သွားရသည်။

အဖေယင်းနှင့် အမေယင်းတို့က NPCများသာ ဖြစ်၍ ပရလောက က သူတို့ကို ဖယ်ရှားပေးလိုက်မည်ပင်။

“ဘော့စ်...တစ်ခုခုများ စဥ်းစားထားတာ ရှိလား" လော့ဇီယန်က အနည်းငယ် စိုးရိမ်နေသည့် ပုံပင်။

ချူဟွိုက်ကလည်း ကျင်းထျန်းယိကို ကြည့်လာသည်။

" နေဦး" ကျင်းထျန်းယိက လက်ဖက်ရည် တစ်ငုံ သောက်လိုက်သည်။

ချူဟွိုက်၏ မျက်လုံးများက အဓိပ္ပါယ်ကို သဘောပေါက်သွားသလို ဖြတ်ခနဲ လင်းသွားသည်။ သူလည်း သူ့လိုမျိုး စောင့်နေတာလား။

👻

Prev Next