MM Story Teller

Chapter 33

Viewers 4k

Chapters 120

👻 Chapter 33

သွေးနီလရဲ့ သမန်းဝံပုလွေ သတ်ဖြတ်ခြင်း (11)

ညမှောင်မှောင်ထဲတွင် ဝမ်ကျယ်၏ စူးစူးဝါးဝါး အော်သံကြီးက လူတိုင်းကို ကြောက်လန့်သွားစေသည်။

ဝမ်ကျယ်က သူဆင့်ခေါ်လိုက်သည့် သရဲအဖွဲ့ထံကနေ အသတ်ခံလိုက်ရ၏။

လော်မင်က လှောင်ပြုံးပြုံးလိုက်ရင်း သူ့အရည်အချင်းကို ချူကျောင်းကို ထုတ်မပြလိုက်ရ၍ နေရခက်နေသည်။

ချူဟွိုက်က ရုတ်တရက် သဘောပေါက်သွားပြီး သူ့မျက်နှာက ပြောင်းလဲသွားသည်။

သူက လော်မင်ကို အဓိပ္ပါယ်ပါပါ ကြည့်လိုက်ပြီး ကျင်းထျန်းယိကို ဆွဲကာ ထွက်ပြေးတော့သည်။

ထင်ထားသလိုပင် ထိုသရဲအဖွဲ့က ဝမ်ကျယ်ကို သတ်ပြီးသည်နှင့် သူတို့က တစ်ခုခုကို သိလိုက်ရသည်။

သူတို့လက်များက ဝမ်ကျယ့်သွေးတို့ စွန်းထင်းနေသည်။ လူတိုင်းက မတ်တပ်ရပ်နေကြရင်း တိုက်ခိုက်တော့မည့် ကိုယ်ဟန်ပြင်လိုက်ပြီး တစ်ယောက်နှင့်တစ်ယောက် သတိကြီးကြီးထားပြီး ကြည့်လိုက်ကြသည်။

ဝမ်ကျယ်သေသွားပြီးနောက် သူတို့ခေါင်းထဲ အနီစက်အသစ်တစ်ခု ပေါ်လာသည်။

တစ်နည်းဆိုရသော် တစ်ယောက်ယောက်က သရဲယောင်ဆောင်သွားခဲ့သည်။

ထို့နောက် သူတို့က ပြေးသွားကြသော ချူဟွိုက်တို့ အုပ်စုနှင့် နောက်ကလိုက်သွားကြသည့် သားအမိစုံတွဲကို စိုက်ကြည့်လိုက်သည်။

သူတို့က လော်မင်ပြောသွားသည့် 'ဆင့်ခေါ်ခြင်း' ဆိုသည့် စကားလုံးကို အမှတ်ရသွားကြသည်။

လူတိုင်းက တစ်ယောက်ကိုတစ်ယောက် စိုက်ကြည့်နေရင်း တစ်ပြိုင်တည်းမှာပင် ကောက်ချက်ချလိုက်ကြသည်။ အဲ့ဒီလူသုံးယောက်ထဲမှာ ပြဿနာတစ်ခုခု ရှိနေတယ်။

စုန့်ချန်က ချုဟွိုက်တို့အုပ်စုကို ကြည့်နေရင်း သူမမျက်လုံးများက ရှုပ်ထွေးနောက်ကျိသွားသည်။

ကျင်းထျန်းယိက ချူကျောင်းကို တကယ်ရှာတွေ့သွားတာပဲ။

ကျင်းထျန်းယိက သူမကြောင့် သရဲဖြစ်သွားမှန်း ၁၀၀ရာခိုင်နှုန်း သေချာလေသည်။ ဒါပေမယ့် ချူကျောင်းကရော...။

ချူကျောင်းက တကယ် သရဲလား။

ချူကျောင်း၏ ဇစ်မြစ်ကို ကျင်းထျန်းယိတစ်ယောက်တည်းသာ သိလိမ့်မည်။ သို့သော်လည်း ချူကျောင်းက သာမန်လူတစ်ယောက် ဖြစ်နေလျှင်ပင် ကျင်းထျန်းယိက သူမကို သတ်မည်မဟုတ်မှန်း သံသယဝင်စရာမလိုချေ။

သူမကို မသတ်ပဲ ထိုလူက ချူကျောင်းဘေးတွင် နေပြီး သူမကို ကာကွယ်ပေးရန်အတွက် ဖြစ်နိုင်သည့် နည်းမျိုးစုံ လုပ်မည်ဖြစ်သည်။

စုန့်ချန်က ကျင်းထျန်းယိကို ချက်ချင်း သွားမေးလိုက်ချင်သည်။ ချူကျောင်းက နတ်ဘုရား ဆိုရင်ရော....

တစ်ပါးတည်းသော နတ်ဘုရားဖြစ်နေရင် ရှင်သတ်မှာလား။ နတ်ဘုရားက အသတ်ခံရပြီးသည်နှင့် သရဲတစ်ဖွဲ့လုံးက ချက်ချင်း အနိုင်ရသွားမည် ဖြစ်ကာ ဖြစ်ရပ်ထဲမှ ထွက်သွားနိုင်မည်ပင်။

သူ လုပ်နိုင်ပါ့မလား။

ချူကျောင်းက အသက်တစ်ခုတည်း သူတို့အသက်တွေက အများကြီးလေ။

ရိုးရိုးသားသားပြောရလျှင် သူမကို သရဲအဖြစ် သတ်မှတ်လိုက်သည့်သူကို မသိသော်လည်း သရဲဖြစ်ပြီးနောက် ပထမဆုံးခံစားရသည်က ပျော်ရွှင်မှုပင်။

သူမက ကျင်းထျန်းယိနှင့် တစ်ဖွဲ့တည်း ဖြစ်သွား၍ ပျော်သွားခဲ့သည်။

ကျင်းထျန်းယိသာ သူမနားရှိနေလျှင် အသက်ရှင်နိုင်သည့် အခွင့်အလမ်းက ပိုများလာမည်ပင်။

သို့သော်လည်း ယခုတွင် ကျင်းထျန်းယိက သူမနှင့် ဆန့်ကျင်ဘက်တွင် ရပ်နေသည်။

အနီစက်လေးက တဖြေးဖြေး ဝေးကွာသွား၍ သူတို့ထဲတွင် သာမန်လူ သို့မဟုတ် နတ်ဘုရား ရှိနေသည်။

ကျင်းထျန်းယိက သရဲဖြစ်နေသော်လည်း သရဲအဖွဲ့ကို ဆန့်ကျင်ပြီး သာမန်လူအဖွဲ့နှင့် သွားပူးပေါင်းနေသည်။

စုန့်ချန်က နှုတ်ခမ်းတင်းတင်းစေ့မိသည်။

သူမ အသက်ပြန်ရှင်မှ ဖြစ်မည်။

ဒါက သူမရဲ့ နောက်ဆုံးဖြစ်ရပ်။

သူမ၏ မိဘများက သူမပြန်အလာကို စောင့်နေကြဆဲပင်။

အချိန်အတော်ကြာ နေမကောင်းဖြစ်ပြီးနောက် နှလုံးဖောက်လာ၍ သူမမိဘများက မျက်ရည်ဖြိုင်ဖြိုင်ကျခဲ့ရသည်။

နောက်ဆုံး သူမက ကိုက်ညီမည့် နှလုံးတစ်ခု ရခဲ့ပြီးနောက် ခွဲစိတ်ပြီး ဆေးရုံတက်ခဲ့ရသည်။ သို့သော်လည်း စုန့်ချန်တွင် ပျော်ချိန်မရလိုက်ပဲ ဤကြောင်တောင်တောင် ကမ္ဘာကြီးထဲ ရောက်ခဲ့ရလေသည်။

သူမ အသက်ပြန်ရှင်မှ ဖြစ်မည်။

နောက်ဆုံး သူမ ဒီနေရာမှာ သေသွားခဲ့ရင် အသက်ရှင်ဖို့ ကြိုးစားခဲ့ရသမျှ အကုန်လုံး သဲထဲရေသွန်ဖြစ်သွားမှာပေါ့။

ဒီကမ္ဘာကြီးထဲက ထွက်သွားနိုင်သရွေ့ ဘဝသစ်တစ်ခု စတင်နိုင်မည် ဖြစ်သည်။ လက်တွဲဖော် သူငယ်ချင်း ညီအစ်မ သူဌေး။

မည်သို့ပင်ဖြစ်စေ ဤကမ္ဘာကြီးထဲမှ ထွက်သွားပြီးသည်နှင့် သူတို့အတွက် ပြန်ဆုံနိုင်မည့် အခွင့်အရေး ရှိလာမည် မဟုတ်ပေ။

သူမလမ်းကို လာပိတ်ရဲတဲ့သူမှန်သမျှ အကုန်သေရမယ်။

သုန်မှုန်နေသော မျက်နှာနှင့် စုန့်ချန်က ဘယ်လက်နှင့် ညာဘက်အင်္ကျီလက်ထဲ နှိုက်လိုက်ပြီး ဖုံးထားသည့် အေးစက်စက်ပစ္စည်းတစ်ခုကို ထိလိုက်သည်။

သရဲအဖွဲ့များက ချူဟွိုက်တို့ အုပ်စုနောက် လိုက်နေကြချိန် စုန့်ချန်က သူမ၏ အဝတ်အစားများကို ခါချလိုက်ရင်း ရုတ်တရက် ဝမ်းနည်းလာသလို ခံစားရသည်။

စိတ်မကောင်းပါဘူး။

👻

"ရှင်...။ ကျွန်မကို မဆွဲနဲ့တော့...ကျွန်မလက် ပြုတ်ထွက်တော့မယ်"

ချူဟွိုက်က အသက်လုရှူလိုက်ရင်း ဆက်မပြေးနိုင်တော့ပေ။ ကျင်းထျန်းယိက သူ့ရှေ့ကနေပြီး လမ်းတစ်လျှောက်လုံး ဆွဲခေါ်ခဲ့ခြင်း ဖြစ်သည်။ ကျင်းထျန်းယိက အားနှင့်ဆွဲလွန်း၍ သူ့လက်မောင်းပင် ရှည်ထွက်လာတော့မည်ဟု ချူဟွိုက် ထင်မိသည်။

လော်မင်ကလည်း သူတို့နောက်မှ တပ်ကြပ်မကွာ လိုက်လာသည်။ သူက စိတ်ပန်းပြေနေသည့်ပုံစံနှင့် နောက်ကလိုက်လာသည့် သရဲအုပ်စုကို လေချွန်ပြလိုက်သေးသည်။

သူလုပ်ပြသည့်ပုံစံကြောင့် သရဲအဖွဲ့ကလူများ ဒေါသထွက်နေကြပြီ ဖြစ်သည်။

ကျင်းထျန်းယိက အပြေးရပ်သွားပြီး သူ၏ သန်သန်မာမာ လက်မောင်းများက ချူဟွိုက်ခါးတစ်ဝိုက် ရစ်ပတ်လာသည်။ ချူဟွိုက်က မေ့လဲမတတ် ဖြစ်သွားပြီး ကျင်းထျန်းယိ၏ လည်ပင်းကို အလိုလို ဖက်လိုက်မိသည်။ သူ့နဖူးက ကျင်းထျန်းယိ၏ နောက်စေ့နှင့် အနည်းငယ် ပွတ်သတ်သွား၍ ချူဟွိုက်မှာ အံ့သြသွားရသည်။

ကျင်းထျန်းယိက ပြုံးလိုက်ပြီး ချူဟွိုက်ကို ကျောပိုးထားလိုက်သည်။

“ကိုယ်က မင်းကို ကျောပိုးပြီး ပြေးမှာမို့လို့ တင်းတင်းကိုင်ထား"

သူက ခေါင်းစောင်းပြီး ချူဟွိုက်ကို ကြည့်လာ၍ သူ၏ ဆံပင်ထပ်လေးများက ချူဟွိုက်မျက်နှာကို ပွတ်တိုက်သွားလေသည်။

ချူဟွိုက်က ကျင်းထျန်းယိ၏ ကျောပြင်ကျယ်ကြီးထက် မှီထားရင်း အနည်းငယ် ရှက်သွားရသည်။ ထို့နောက် သူက ဤကိစ္စကို ကျေကျေနပ်နပ် လက်ခံလိုက်၏။

ပြေးစရာမလိုတဲ့ ခံစားချက်က အရမ်းကောင်းတာပဲ။

ချူဟွိုက်က ကျင်းထျန်းယိပုခုံးပေါ် မေးတင်ထားရင်း ကျင်းထျန်းယိ၏ ရင်ဘတ်တစ်ဝိုက်ကို ဖက်လာသည်။

ကျင်းထျန်းယိက ကျောပိုးထားရင်း မြန်မြန်ပြေးလိုက်သည်။ သူ့မျက်နှာက နီရဲမနေပဲ မောပန်းနေဟန်လည်း မရှိကာ အသက်ရှူသံလည်း ပုံမှန်အတိုင်း တည်ငြိမ်လှသည်။

လော်မင်၏ အကြည့်တို့ ခါးသီးသွားရင်း ကျင်းထျန်းယိနားပြေးသွားကာ ရယ်သံနှောပြီး ပြောလာသည်

" မင်း မောနေပြီလား။ မင်းမောနေရင် မင်းကိုယ်စား ချူကျောင်းကို ငါ ပိုးပေးမယ်"

ချူဟွိုက်"....."

ကျင်းထျန်းယိက အပြုံးမမည်သော အပြုံးတစ်ခု ပြလာသည်။

"မင်းမှီလာတဲ့အချိန်မှ ပြောကြတာပေါ့"

သူက ပြောပြီးသည်နှင့် ချက်ချင်း အရှိန်တင်လိုက်သည်။

စစချင်းတွင် လော်မင်က စိတ်လှုပ်ရှားသွားရသော်လည်း အချိန်အတော်ကြာထိ ပြေးပြီးနောက် လည်ပင်းနှင့် မျက်နှာတစ်ဝိုက် နီရဲလာပြီး အသက်ရှူသံလည်း ရောထွေးလာသည်။ သို့သော်လည်း ကျင်းထျန်းယိ၏ ပုံစံက ချစ်ဇနီးနှင့် လပြည့်ဝန်းကြီး ကြည့်ရန် လမ်းလျှောက်ထွက်လာသည့်အတိုင်း အေးအေးဆေးဆေး ဖြစ်နေသည်။

"မင်းက သောက်ကျိုးနည်း လူရော ဟုတ်ရဲ့လား"

"ကျွန်မ လေးလားဟင်"

ချူဟွိုင်က မေးလာရင်း " ကျွန်မကို အောက်ချလိုက်ရင်ရော။ ကျွန်မ တကယ် မမောတော့ဘူးရယ်။ ပြေးလို့ရပြီ"

ကျင်းထျန်းယိ " ရပါတယ်။ မင်းက ရှင်းရှင်းလင်းလင်း မမြင်ရတော့ အဆင်ပြေမှာ မဟုတ်ဘူး။ မင်း လဲကျသွားနိုင်တယ်"

ချူဟွိုက်က လန့်သွားရသော်လည်း နောက်ကလိုက်လာသည့် လော်မင်က ချက်ချင်း အရူးလို ဖြစ်သွားရသည်။

ကျင်းထျန်းယိ၏ ပြောဆိုချက်ကြောင့် ချူဟွိုက် သရဲမဟုတ်မှန်း ရှင်းလင်းသွားပြီ ဖြစ်သည်။

လော်မင်က သူ့နာဖူးသူ ရိုက်လိုက်ရင်း " ဘာလို့များ မင်း သရဲဖြစ်မယ်လို့ ထင်ထားတာပါလိမ့်။ ချူကျောင်း... မင်းက သရဲမဟုတ်ဘူးပဲ။ မင်းမှာ ညအမြင်မရှိဘူးပေါ့"

ချူဟွိုက်မျက်နှာက အနည်းငယ် နားမလည်နိုင်သလို ဖြစ်သွားသည့်ပုံပင် " ရှင်ဘယ်လို သိသွားတာလဲ"

" မင်းအခုလေးတင် ကိုယ့်ကို မျက်လုံးမှိတ်ပြလိုက်တာပဲကို " ကျင်းထျန်းယိက သာမန်ကာလျှံကာ ပြန်ဖြေလာသည်။

သရဲအဖွဲ့က သူတို့ကို မမှီတော့ပေ။

လော်မင်က သက်ပြင်းခိုးချလိုက်ရင်း မျက်လုံးများက မည်းမှောင်နေကာ နောက်ဆုံးတွင် သိမ်းသွင်းခံလိုက်ရပြီ ဖြစ်သည်။

သူက ကျင်းထျန်းယိနှင့် မယှဥ်နိုင်ချေ။

ယခင်က အထင်မှားဖွယ်ရာ ဖုန်းခေါ်ဆိုမှုများကို အသာထား ကျင်းထျန်းယိ၏ ချူကျောင်းအပေါ် ဂရုစိုက်မှုက သူလုပ်နိုင်သည်ထက် ကျော်လွန်နေသည်။

ထိုအရာကို နားလည်သွားချိန် လော်မင်က အနည်းငယ် စိတ်အနှောင့်အယှက်ဖြစ်သွားရသည်။

သူက အမှားတစ်ဝက် အမှန်တစ်ဝက်ရောပြီး စနောက်လာသည် " မင်းက ကျူးပါကျဲရဲ့ မိန်းမပဲ"

ချူဟွိုက် "သူက ရှင့်ကို ကျူးပါကျဲလို့ ပြောနေတာ"

ကျင်းထျန်းယိက လော်မင့်ကို စိုက်ကြည့်လိုက်ပြီးမှ သူ့နှုတ်ခမ်းထက် ပြုံးရိပ်ထင်လာသည်

" မဟုတ်ဘူး။ မင်းပြောတာ မှားနေတယ်။ သူ ပြောတာက မင်းက ကိုယ့်မိန်းမတဲ့"

ဒုတိယတစ်ကြောင်းကို ပြောလိုက်ချိန် ကျင်းထျန်းယိက စိတ်ပျော်သွားလေသည်။

ချူဟွိုက်က တောင့်ခဲသွားရသည်။

လော်မင်က အရှိန်ကို နှေးလိုက်ရင်း ပြောလာသည် "ကျောင်းကျောင်း။ ငါ မှတ်မိပါသေးတယ်။ မင်းပြောခဲ့တာ သူက ဧဝရတ်..."

"ဘာလဲ" ကျင်းထျန်းယိက သိချင်လာသည်။

"ဘာမှမဟုတ်ပါဘူး" ချူဟွိုက်က ပြဿနာအိုးလော်မင့်ကို ခပ်တည်တည် ကြည့်လိုက်သည်။

ချူဟွိုက်က ပြောလာသည် " သူ ပြောတာ ကျွန်မက ဧဝရတ်တောင်ကြီးနဲ့ တူတယ်တဲ့"

လော်မင်က သီးသွားရသည်။ သူ တကယ်လည်း ပြောခဲ့တယ် ဆိုတော့ ငြင်းရခက်နေတယ်။

ချူဟွိုက်က ကျင်းထျန်းယိ၏ နာရွက်နား မှီလိုက်ပြီး တစ်ဖက်လူကို စနောက်လိုက်သည် " ဒါဆို...ရှင် ကျွန်မနဲ့ တစ်ညတာ ကုန်ဆုံးချင်လား"

သူ၏ အသက်ရှူသံက ကျင်းထျန်းယိ၏ နားရွက်နား တိုးတိုက်လာ၍ သူ့နားရွက်က ချက်ချင်း နီရဲသွားရသည်။

ချူဟွိုက်က ခေါင်းစဥ်ပြောင်းခြင်း အောင်မြင်သွား၍ စိတ်လိုလက်ရ ပြုံးလိုက်ရင်း အသံကြည်ကြည်လေးနှင့် မေးလာသည်

" ဒါနဲ့ ရှင့်ရဲ့ စွမ်းရည်ကရော ပစ်မှတ်ကို ရှာတာနဲ့အတူတူပဲလား"

ကျင်းထျန်းယိက နီရဲနေသော မျက်နှာနှင့် လော်မင့်ကို ကြည့်ပြီး ခေါင်းညိမ့်ပြလာသည် " မင်းရဲ့ စွမ်းရည်က ဆင့်ခေါ်တာလား"

လော်မင်က အံ့သြသွားသော်လည်း ခေါင်းညိမ့်ပြလာသည်။

ထို့နောက် သူက ချက်ချင်း နားလည်သွားသလို ပြောလာသည်

" မင်းရဲ့ နေရာရှာစွမ်းရည်နဲ့ ချူကျောင်းကို ရှာတွေ့သွားတာ မဆန်းတော့ပါဘူး။ မင်း အနောက်ဘက်ကို သွားတဲ့အချိန် မင်းရဲ့နေရာရှာ စွမ်းရည်နဲ့ အနီးနားက ပြိုင်ပွဲဝင်တွေကို စုံစမ်းလို့ရနေတာပဲ"

ကျင်းထျန်းယိက မျက်ခုံးပင့်ပြလိုက်သည် " ကြည့်ရတာ မင်းက ငါထင်ထားသလောက် တုံးမနေဘူးပဲ"

လော်မင်က ဒေါသထွက်လာရသည် " မင်းတော့လား"

ကျင်းထျန်းယိက ပြုံးပြလာသည် "ကျောင်းကျောင်း။ ကိုယ် မင်းကို မေးမယ် ဒီစွမ်းရည်နှစ်ခု ပေါ်လာရတဲ့ ရည်ရွယ်ချက်ကို ဘယ်လိုထင်မိလဲ"

"တစ်ယောက်နဲ့တစ်ယောက် သတ်နေဖို့ပေါ့" ချူဟွိုက်က အပြုံးလေးနှင့် ပြန်ဖြေလာသော်လည်း သူ့မျက်လုံးများက အေးစက်နေသည်။

သရဲက ဆင့်ခေါ်ခြင်းစွမ်းရည်ကို သုံးလိုက်သည့်အချိန် မျဥ်းကြောင်းလေးများ ပေါ်လာပြီး နေရာရှာစွမ်းရည်ရှိသည့် သရဲများ၏ ခေါင်းထဲ အနီစက်လေးများ ဖြစ်ပေါ်လာ၍ ထိုအနီစက်လေး အလုပ်လုပ်ပြီး သာမန်လူနှင့် နတ်ဘုရားကို ရှာတွေ့ပြီဟု တွေးမိစေသည်။

တစ်ယောက်နဲ့တစ်ယောက် အပြန်အလှန်သတ်နေကြတာက ဖြစ်ရပ်က လိုချင်တဲ့ အဆုံးသတ်များလား။

ချူဟွိုက်က အတွေးတို့နစ်နေမိသည်။

လမ်းအဆုံးနားတွင် ကျင်းထျန်းယိက ထောင့်ချိုးကို ကွေ့လိုက်သည့်အချိန် ပုံရိပ်တစ်ခုက ရုတ်တရက် ပေါ်လာသည်။

ထိုပုံရိပ်က တစ်ခုခု ချီထားသည်နှင့်တူသည်။

ချူဟွိုက်က မမြင်ရသော်လည်း နားပါးသည်။ သူက လမ်းတစ်ဖက်မှ ခြေသံမြန်မြန်လှမ်းလာသည့် အသံကို ကြားလိုက်ရသည်။

ထိုအချိန်က သက်လတ်ပိုင်းအမျိုးသမီးကြီးက တစ်ခုခုမှားနေမှန်း သတိထားမိသွား၍ ကလေးချီပြီး ချူဟွိုက်တို့အုပ်စုဆီမှ ခွဲထွက်လာခဲ့သည်။ သို့သော်လည်း သူတို့နှင့်ပြန်တိုးမည်ဟု ထင်မထားခဲ့ချေ။

ထိုအမျိုးသမီးက မောပန်းနေသည့်ပုံပင်။

သို့သော်လည်း သူမက ကလေးချီထားပြီး အားနှင့်အင်နှင့် ပြေးနိုင်သေးသည်။

သူမက ချူဟွိုက်တို့ အုပ်စုကို တွေ့လိုက်သောအခါ အံ့သြသည့်အကြည့်များနှင့် ကြည့်လာသည်။ သူမက အနည်းငယ် စိတ်လွတ်သွား၍ ခြေချော်ပြီး လော်မင်၏ အော်သံအောက်တွင် မြေကြီးပေါ် လဲကျသွားရသည်။

သရဲနှစ်ယောက်က သူမနောက်ကို လိုက်လာနေသည်။

👻

Prev Next