MM Story Teller

Chapter 36

Viewers 4k

Chapters 120

👻Chapter 36

သွေးနီလရဲ့ သမန်းဝံပုလွေ သတ်ဖြတ်ခြင်း (14)

ဒါ တိုက်ဆိုင်မှု တစ်ခုလား။

ချူဟွိုက်က စိတ်လွတ်သွားစဥ် လက်ထဲရှိ အလေးချိန်က ရုတ်တရက် ကွယ်ပျောက်သွားလေသည်။

ကောင်ငယ်လေးက လေထုထဲ ပျောက်ကွယ်သွားလေသည်။

ချူဟွိုက် လန့်သွားရသည်။

သွေးနီလသာနေသည့် အချိန်အတွင်း လရောင်က မှိန်မှိန်လေးသာ ရှိနေသည်။ သူက အမျိုးသမီးကြီး၏ အလောင်းရှေ့ အေးအေးဆေးဆေး ထိုင်ချလိုက်ရင်း စုန့်ချန်၏ မြင်ကွင်းကို ပိတ်လိုက်၍ သူမက စပ်စု၍ မရတော့ချေ။

ချူဟွိုက်က သေသေချာချာ စစ်ဆေးကြည့်သော်လည်း အလောင်းတွင် မည်သည့်ဒဏ်ရာမှ ရှိမနေချေ။ သူမက တိတ်တိတ်ဆိတ်ဆိတ် သေသွားခဲ့သည့်အတိုင်း။

သူက သက်ပြင်းခိုးရှိုက်လိုက်ရင်း ထရပ်ရန် ပြင်သည့်အချိန် အမျိုးသမီး၏ မီးခိုရောင်သန်းပြီး ညှိုးခြောက်နေသည့် လက်ကို အင်္ကျီလက်အောက်တွင် ရိပ်ခနဲ တွေ့လိုက်ရသည်။ သူ၏ မျက်လုံးများက ချက်ချင်း နက်မှောင်သွားသည်။

ထိုအမျိုးသမီးက လက်သီးတင်းတင်းစုပ်ပြီး လက်ညှိုးက '၁'လို ပုံစံမျိုး ထောင်ထားသည်။ သူမက စုန့်ချန်ကို ညွှန်ပြနေသည်။

ချူဟွိုက်က နှုတ်ခမ်းတင်းတင်းစေ့ပြီး မျက်လွှာချလိုက်သည်။ သူ၏ မျက်နှာအမူအရာက မည်းမှောင်နေ၍ မျက်တောင်ကော့ကော့များက မျက်နှာထက် အရိပ်တစ်ခု ဖြစ်ပေါ်စေသည်။

ယဇ်ပူဇော်သည့် ဖြစ်စဥ်၏ အစမှ အဆုံးထိ မည်သူမှ စုန့်ချန်ရှိနေသည့်ဘက်တွင် ရှိမနေချေ။ ကျင်းထျန်းယိက အမြဲတမ်း အခြားတစ်ဖက်တွင် ရပ်နေ၍ ပြောရလျှင်...ထိုအမျိုးသမီးက စုန့်ချန်ကို ညွှန်ပြနေခြင်း ဖြစ်သည်။

သူမ မသေခင် တစ်ခုခုကို တွေ့ခဲ့တာများလား။

စုန့်ချန်က သူတို့ကြားထဲမှာ ပုန်းနေတဲ့ သရဲလား။

ချူဟွိုက်က ထိုအမျိုးသမီး၏ အင်္ကျီလက်ကို ဆွဲချလိုက်ရင်း သူမလက်ကို ဖုံးထားလိုက်သည်။ သူက မတ်တပ်ရပ်လိုက်ရင်း မျက်ခုံးကို အသာပွတ်လိုက်သည်။ ကိစ္စတွေ ဒီလောက် ရိုးရှင်းပါ့မလား။

သူက စုန့်ချန်ကို ကြည့်ရင်း မျက်လုံးကို အနည်းငယ် မှေးကြည့်လိုက်သည်။ သူ့မြင်ကွင်းတွင် စုန့်ချန်နောက်၌ လူမရှိသော လမ်းမကြီးကိုသာ ထင်းထင်းကြီး တွေ့ရသည်။

အခု မေးခွန်းတစ်ခု ရှိလာပြီ။

မစ်ရှင်က ကိုယ့်ကြားထဲ ပုန်းနေတဲ့ သရဲကို ရှာဖို့ ဖြစ်တယ်ဆိုရင် ဒီ'သရဲ'ကို ဘယ်လို သတ်မှတ်ရမလဲ။

သရဲယောင်ဆောင်ထားတဲ့ ပြိုင်ပွဲဝင်လား၊ ဒါမှမဟုတ် သရဲက ထိန်းချုပ်ထားတဲ့ ပြိုင်ပွဲဝင်လား၊ ဝိဥာဥ်လက်ထပ်ပွဲရဲ့ ကမ္ဘာကလိုမျိုးလေ...၊ အဲ့လိုမဟုတ်ရင်လည်း သရဲက တခြားတစ်ခုခုကို ထိန်းချုပ်ထားတာလား။

ဒီဖြစ်ရပ်ထဲမှာ သရဲ ဘယ်နှစ်ယောက် ရှိနေတာလဲ။

အခုထိတော့ သူက သရဲကို နှစ်ခါပဲ ကြုံရသေးတယ်။

ပထမဆုံးအကြိမ်က လီရှင်းရန် သေသွားတဲ့အချိန်။

သရဲက လီရှင်းရန်ကို အိမ်ထဲက ထွက်အောင် လှည့်စားခေါ်ထုတ်ပြီးတော့ သရဲအဖွဲ့ကလူကို သတ်ခိုင်းခဲ့တယ်။

ဒုတိယအကြိမ်က ကျန်းချွမ်ဖန့်ရဲ့ ယဇ်ပူဇော်ခြင်း အချိန်။ သရဲက သူ့ကမ်းလှမ်းချက်ကို စုဆောင်းဖို့အတွက် အားတင်းပေါ်လာပေမယ့် လူတွေ မမြင်ရအောင် အထူးနည်းလမ်းကို သုံးသွားခဲ့တယ်။ ဒါကြောင့် သရဲရဲ့ ပုံစံအစစ်ကို ဘယ်သူမှ မမြင်လိုက်ရဘူး။

စုန့်ချန်ကို သရဲက ထိန်းချုပ်ထားတယ်လို့ ယူဆလိုက်မယ်ဆိုရင် လူမသတ်အောင် သရဲကို တားမြစ်ထားတဲ့အရာက ဘာဖြစ်နေမလဲ။

လီရှင်းရန်ကို ကျန့်ယောင်က သတ်လိုက်တာ၊ သူကလည်း မျက်စိနဲ့ တပ်အပ်မြင်ခဲ့ရတယ်။ အဲ့ဒီကိစ္စမှာ သရဲက လူတွေကို လမ်းမှားသွားအောင် နေရာတစ်ခုကနေပဲ ကစားပြသွားတာ။

သရဲက ဘာလို့ သူကိုယ်တိုင် မလုပ်ခဲ့တာလဲ။

ဒါမှမဟုတ် လူသတ်တာက သရဲဖြစ်နေပေမယ့် သူတို့ သတိမထားမိတာက တစ်ယောက်နဲ့တစ်ယောက်ကို ခွဲထားလို့များလား။

ဘယ်အဖွဲ့မှာ သရဲ ရှိနေတာလဲ။

ဒါမှမဟုတ် သရဲက ဒီလူသတ်ဂိမ်းကြီးမှာ လုံးဝ မပါဘူးလား။

သရဲရဲ့ စွမ်းရည်က ဘာလဲ။

ကျင်းထျန်းယိက တစ်ဖက်လူ၏ မျက်နှာက အနည်းငယ် ပြောင်းလဲသွား၍ ချူဟွိုက်ကို ကြည့်လာသည်။

ချူဟွိုက်က စုန့်ချန်ကို ကြည့်နေသည်။ ကျင်းထျန်းယိက သူ့ကြည့်နေသည့်ဆီ လိုက်ကြည့်ရင်း မည်သူမှ သတိမထားမိခင် ခေါင်းညိမ့်ပြလိုက်သည်။

ချူဟွိုက်စိတ်က အနည်းငယ် သက်သာရာရသွားသည်။ ဤသည်က သူနှင့်ကျင်းထျန်းယိတို့ ဆက်သွယ်သည့် နည်းတစ်ခုပင်။ တစ်ယောက်ကို တစ်ယောက် ကြည့်လိုက်ရုံနှင့် တစ်ဖက်လူ၏ အတွေးကို နားလည်ပြီး အသံမထွက်သည့် နည်းလမ်းနှင့် တုန့်ပြန်ပေးသည်ပင်။

" ခုနက ဘာဖြစ်သွားတာလဲ" စုန့်ချန်က မျက်မှောင်ကြုတ်လိုက်သည်။

ထိုအချိန်က ချူကျောင်းက ထူးဆန်းနေ၍ သူမက မျက်စိရှင်ရှင်ထားပြီး သတိထားနေရသည်။ ထို့ကြောင့် သူမက တစ်ဖက်လူကို မလွတ်တမ်း စိုက်ကြည့်နေသော်လည်း ရုတ်တရက် ပေါ်လာသည့် အနီရောင် မြူခိုးထုကြီးက မျက်စိရှေ့ကို ပိတ်လာခဲ့သည်။

သွေးနီရောင် မြူခိုးထုကြီးက ပူပြင်းတောက်လောင်နေ၍ ထိုအချိန်က သူမမျက်လုံးများပင် ပြာကျတော့မည်ဟု ထင်ခဲ့သည်။

သွေးနီရောင် မြူခိုးမှိုင်းကြီး လွင့်ပျယ်သွားသည်အချိန် အမျိုးသမီးက သေနေပြီ ဖြစ်သည်။

သူမက အရေးကြီးတာ တစ်ခုခုကို လွဲချော်သွားခဲ့တာပဲ။

သို့သော်လည်း ချူကျောင်းလက်ထဲ ကောင်လေးမရှိတော့သည်ကို သူမမျက်စိနှင့် တပ်အပ်မြင်ခဲ့ရသည်။

ချူကျောင်းက ဘာကို တွေ့သွားခဲ့တာလဲ။

သူတို့က အသက်ရှင်နိုင်မယ့် နည်းလမ်းကို သိသွားကြတာလား။

စုန့်ချန်၏ မျက်လုံးများက တဖြေးဖြေး နစ်ဝင်လာသည်။

ချူကျောင်းက အဲ့ဒီအမျိုးသမီးကို ပြောခိုင်းခဲ့တဲ့ စကားလုံးတွေက တော်တော်လေး ထူးဆန်းနေတယ်။

ထို့နောက် စုန့်ချန်က မနေနိုင်ပဲ ချူကျောင်း၏ ဇစ်မြစ်ကို သံသယဝင်လာရသည်။

အဖြူရောင် လမင်းကြီးက သူတို့ရပ်နေသည့် နေရာပေါ်သို့ ရုတ်တရက် နေရာယူလာသည်။

လရောင်က တောက်ပပြီး ကြည်စင်နေသော်လည်း ထောင့်စွန်းတွင် သွေးရောင် ကျန်နေသေးသည်။

လော်မင်က ဓါးကို သုံးပြီး ပုပုနှင့်လူကို အပိုင်းပိုင်း ခုတ်ထစ်ခဲ့သည်။ ယခုအချိန်တွင်ဖြင့် အသားတုံး ကြီးကြီးသေးသေးများက ဝက်သားတုံးလို မြေပြင်ပေါ် ပြန့်ကျဲနေသည်။

လရောင်အောက်တွင် သွေးနက်ကြီးများက မှင်ရည်လို ပန်းထွက်နေပြီး အကိုင်းမရှိပဲ အနက်ရောင် သန်းနေသည့် သစ်လုံးတစ်ခုကို ဆေးသုတ်ထားသည်နှင့် တူနေသည်။ မထင်မှတ်ပဲ ထိုသွေးရောင်တို့က အန္တရာယ်များသလို ညှို့ငင်မှုတို့ ရောယှက်နေသည့်ပုံပေါ်နေသည်။

ချူဟွိုက်က မဖော်ပြနိုင်လောက်အောင် ပင်ပန်းနေပြီ ဖြစ်သည်။ ကျင်းထျန်းယိက သူ့ရှေ့တွင် မတ်တပ်ရပ်လိုက်ပြီး သူ၏ တွန့်ချိုးနေသော မျက်ခုံးတို့ကို ဖြေပေးလိုက်ရင်း ပြုံးပြလာ၏။

ချူဟွိုက်က စုန့်ချန်က ဘယ်လောက်ထိ ခန့်မှန်းပြီးနေမှန်း မသိချေ၊။ သို့သော်ငြား သူ့ဘက်ကလည်း စုန့်ချန်၏ ဇစ်မြစ်ကို သံသရှိသည်။

ယခုအချိန်က အဖြူရောင်လသာသည့် အချိန်ဖြစ်၍ သရဲအဖွဲ့ကလူများက တဇွတ်ထိုး လူသတ်ရဲကြတော့မည်မဟုတ်ပေ။

ချူဟွိုက်က အသက်တစ်ချက် မရှူလိုက်မီ သွေးနီရောင် စာတန်းကြီးက ပြိုင်ပွဲဝင်များအားလုံး၏ ခေါင်းထဲ ရုတ်တရက် ပေါ်လာသည်။

[နတ်ဘုရား၏ စောင့်ရှောက်မှု:ယဇ်ပူဇော်ခြင်းကို ဖွင့်လိုက်ပါပြီ]

[ဂုဏ်ယူပါတယ်။ ဒါက နတ်ဘုရားက မင်းတို့အပေါ် ကောင်းချီးပေးတာပါ]

[ယဇ်ပူဇော်ခြင်း: မိမိကိုယ့်ကိုယ် နှစ်ကြိမ် ဇာတ်မြစ်ဖော်ထုတ်လိုက်တာနဲ့ သရဲရဲ့ ဖျက်ဆီးမှုကို ခံရလိမ့်မယ်။ ဒါပေမယ့်လည်း လူတစ်ယောက်ကိုတော့ အဝေးပို့နိုင်ခဲ့တယ်]

ချူဟွိုက်က လက်သီးတင်းတင်းဆုပ်ထားမိသည်။

စုန့်ချန်၏ မျက်လုံးတို့ စုကျုံ့သွားသည်။

ယခုလေးတင် အမျိုးသမီးက သူမကိုယ်သူမ နှစ်ကြိမ် ဇစ်မြစ်ဖော်လိုက်၍ ပုံဖော်၍မရနိုင်သည့် နည်းလမ်းနှင့် သေသွားခဲ့ရသည်။ သို့သော်လည်း ကလေးက ပျောက်သွားခဲ့ရာ....

စောစောက သွေးနီစာတန်းနှင့် ဆက်စပ်ကြည့်လျှင် ....ချူကျောင်းက နတ်ဘုရားပဲ။

စုန့်ချန်၏ မျက်ဆံတို့ စူးနစ်သွားပြီး သူမ၏ မျက်နှာအမူအရာလည်း ပြောင်းသွားသည်။

"ကောင်းချီးပေးတာလား။ သောက်ချီးပဲ..."

ချူဟွိုက်က နှာမှုတ်ပြီး ပထမဆုံးအကြိမ် ဆဲလိုက်မိသည်။

ဂိမ်းက နှစ်ကြိမ် ကစားပြီးသွားပြီ ဖြစ်သည်။ အချိန်ကုန်လာသည်နှင့်အမျှ ပြိုင်ပွဲဝင်များကလည်း အသက်ရှင်နိုင်မည့် အခွင့်အလမ်းကို ရှာတွေ့သွားနိုင်သည်ဟု ကမ္ဘာကြီးက နားလည်သွား၍ အခွင့်ကောင်းယူပြီး နောက်ထပ် အသက်တစ်ခု ပျက်စီးသွားအောင် လုပ်ခဲ့သည်။

သိသိသာသာပင် အသက်ရှင်နိုင်မည့် နည်းလမ်းမှန် တစ်ခု ရှိနေသော်လည်း တမင်သက်သက် သူတို့ကို ယဇ်ပူဇော်အောင် လုပ်ခဲ့သည်။ ဒါတကယ်ကို မြင်သာနေတဲ့ လုပ်ရပ်ကြီး။

ကျင်းထျန်းယိက ချူဟွိုက်ကို ဆွဲခေါ်လိုက်ပြီး ပြောလာသည် " သွားကြစို့။ လော်မင်ကို ရှာဖို့ နေရာရှာစွမ်းရည်ကို သုံးလိုက်မယ်"

လော်မင်က ထိုသရဲအုပ်စုကို လမ်းလွဲရန်အတွက် သွားပြီ ဖြစ်သော်လည်း ထိုလူ ဘယ်သွားမှန်း သူတို့ မသိလိုက်ချေ။

သူတို့က လော်မင့်လုံခြုံရေးကိုဖြင့် စိတ်မပူမိပေ။ ထိုလူက တစ်ယောက်တစ်ယောက်ချင်း ယှဥ်တိုက်နိုင်ရုံမကပဲ ထိုသရဲအုပ်လိုက်ကြီးကို အလဲထိုးရန်လည်း သူ့အတွက် ပြဿနာမရှိချေ။

စုန့်ချန်က သူတို့နောက်ကို လိုက်လာသည် " ငါ့ရဲ့ စွမ်းရည်ကလည်း နေရာရှာတဲ့ စွမ်းရည်ပဲ။ သူ့ကို ရှာဖို့ ကူပေးလို့ရတယ်...."

ကျင်းထျန်းယိ၏ မျက်နှာက အနည်းငယ် အေးစက်သွားသည်။

စုန့်ချန်က ခါးသက်သက် ပြုံးမိသည်။ ကျင်းထျန်းယိကိုတော့ ထင်ထားပြီးသားပါ။ အမှန်တွင်လည်း သူမက သူ့ကို သရဲအဖြစ် သတ်မှတ်ခဲ့သူ ဖြစ်နေသည်။

သူမက ခေါင်းလှည့်လိုက်ပြီး ချူကျောင်းကို စကားဆိုလာသည် " ကျောင်းကျောင်း။ ဘယ်အချိန်ကတည်းက လော်မင်နဲ့ ခင်သွားရတာလဲ"

ချူဟွိုက်က ပြုံးလိုက်ပြီး အဓိပ္ပါယ်ပါပါ ပြောလာသည် " သူက မိတ်ဆွေကောင်း တစ်ယောက်ပါ"

စုန့်ချန်က 'မိတ်ဆွေ' ဆိုသည့် စကားလုံးကို ကြားလိုက်စဥ် မခံမရပ်နိုင် ဖြစ်သွားရသည်။

ချူကျောင်း၏ စကားလုံးထဲတွင် ထေ့လုံးများ ပါနေသည်။

အမှန်တွင်ဖြင့် သူတို့တိုက်ခန်းရှိလူများကို ရန်စခဲ့သည့် လော်မင်က အတိတ်ကမကျေနပ်ချက်များကို သင်ပုန်းခြေပြီး ကျင်းထျန်းယိတို့နှင့် ဓါတ်ကျနေသည်။ သို့သော်လည်း ကျင်းထျန်းယိနှင့် ချူဟွိုက်၏ အဖော်အနေနှင့် သူမက ကျင်းထျန်းယိကို ဇစ်မြစ်ဖော်ခဲ့သည်က ကျိုးကြောင်းမဆီလျော်သည့် ကိစ္စကြီး ဖြစ်နေသည်။

စုန့်ချန်က တောင့်တောင့်ကြီး ရပ်နေရင်း ရှင်းပြလာသည်

" အစ်ကိုကျင်း။ ကျွန်မ တကယ် စိတ်မကောင်းပါဘူး။ ဖြစ်ရပ်ထဲကို ပထမဆုံး ဝင်လာတဲ့အချိန်မှာ သရဲက အစ်ကိုကျင်းအယောင်ဆောင်ထားတယ် ထင်လို့ ဇစ်မြစ်ဖော်ခဲ့မိတာပါ။ သရဲက လူတွေကို စိတ်ရှုပ်ထွေးအောင် လုပ်နိုင်မယ်လို့ ထင်မထားခဲ့ဘူး။ ကျွန်မ ပေါ့သွားတာပါ။ ကံကောင်းလို့ ဆိုးဆိုးဝါးဝါး ကိစ္စတွေ ဖြစ်မသွားတာ၊ မဟုတ်ရင် ကျွန်မ ဘဝတစ်လျှောက်လုံး အပြစ်ရှိစိတ်နဲ့ နေသွားရလိမ့်မယ်"

မည်သူမှ သူမကို အာရုံမထားမှန်း သိလိုက်၍ စုန့်ချန်က အားတင်းပြုံးလိုက်သည်။

" ဒါပေမယ့် အစ်ကိုကျင်းလည်း အဆိုးထဲက အကောင်းဖြစ်သွားတာပေါ့။ ကျောင်းကျောင်းကို အစ်ကိုကျင်းရဲ့ နေရာရှာစွမ်းရည်နဲ့ တွေ့သွားတယ် မဟုတ်လား"

ချူဟွိုက်က မျက်ခုံးပင့်မိသွားသည်။

စုန့်ချန်ရဲ့ ပြောချက်ကတော့ ကျင်းထျန်းယိက အဲဒါ သူမကြောင့် သူ့ကို ရှာနိုင်သွားတာဆိုပဲ။ ဒီအကြောင်းပြချက်ကြီးက ဟာကွက်ကို ရှိမနေဘူး။

စုန့်ချန် " ခုနက အစ်ကိုကျင်းတို့နောက်ကို လူတွေ လိုက်နေတာ တွေ့လို့ တစ်ခုခု ဖြစ်သွားမှာစိုးတာနဲ့ သူတို့နဲ့အတူ လိုက်ချင်ယောင်ဆောင်လိုက်တာ။ ဒါမှ အစ်ကိုကျင်းတို့နဲ့တွေ့ပြီး သူတို့ကို အတူတူ ဖြေရှင်းနိုင်မှာလေ"

စုန့်ချန်က သူမကိုယ်သူမ ဖြူစင်အောင် လုပ်နေသည်။

သူမ၏ ကြည့်ကောင်းသည့် မျက်နှာလှလှလေးနှင့် အသံချိုချိုလေးက ပနံသင့်နေ၍ သူမ၏ လက်ရှိသွင်ပြင်က ပဟေဠိဖြစ်စရာကောင်းနေသည်။ ထိုပုံစံကို မြင်ပြီး ချူဟွိုက်နှလုံးသားက တဖြေးဖြေး အေးစက်လာသည်။

သူက ထိုအချိန်က ဖြစ်ခဲ့သည့် အခြေအနေကို စစ်ဆေးရန် ကျင်းထျန်းယိကို ခေါင်းစောင်းကြည့်လိုက်သည်။

ချူဟွိုက်မေးမည့် အရာကို သိနေသည့်အတိုင်း ကျင်းထျန်းယိက ခေါင်းအသာယမ်းပြလာပြီး သူ့မျက်ဝန်းထက် စိတ်ပျက်မှု အထင်းသား ပေါ်နေသည်။ စုန့်ချန်က သူ့ကို တကယ် အထင်သေးခဲ့တာပဲ။

စောစောက သွေးနီလသာနေသည့်အချိန် ချူဟွိုက်က အခြေအနေကို ရှင်းရှင်းလင်းလင်း မမြင်ရသော်လည်း ကျင်းထျန်းယိက မြင်နိုင်လေသည်။

သူတို့သာ နည်းနည်းနောက်ကျမှ လူစုမိသွားရင် အမျိုးသမီးရော ကလေးရော သေသွားတော့မလို့။

စုန့်ချန်က လိမ်နေတာ။ သူမက အခြားသူတွေကို အရူးလုပ်ပြီး အပြစ်က ရှောင်လို့ရပေမယ့် သူ့ရှေ့က နှစ်ယောက်က ငတုံးမှ မဟုတ်တာ။

တစ်ကြိမ် သစ္စာဖောက်ဖူးတဲ့သူက ယုံကြည်ဖို့ ထိုက်တန်သေးလို့လား။

ချူဟွိုက်က မျက်ခုံးအသာပွတ်မိသည်။

ဘယ်လိုပဲဖြစ်ဖြစ် သူတို့က တိုက်ခန်းတစ်ခုတည်းက လာတဲ့သူတွေပဲလေ။ ပြီးတော့ စုန့်ချန်ကလည်း သူ နှစ်ပေါင်းများစွာ အာရုံမခံဖူးတဲ့ နွေးထွေးမှုကို ပေးခဲ့တယ်။

လွန်ခဲ့တဲ့ နာရီအနည်းငယ်တုန်းက စုန့်ချန်က သူကို စနောက်နေတဲ့ အစ်မကောင်းတစ်ယောက် ဖြစ်ခဲ့ပြီးတော့ 'ညီမလေးကျောင်း' လို့တောင် ခေါ်ခဲ့သေးတာ။ သူမက ပညာတတ်တစ်ယောက် ဖြစ်တယ်၊ စိတ်ထားကောင်းတယ်၊ တခြားသူအပေါ် အကောင်းမြင်တယ်။

ဒါပေမယ့် အခုတော့...။

သူမက ဘာလို့ သူတို့ဆီ ရုတ်တရက် ပြန်လာရတာလဲ။

ကျင်းထျန်းယိရဲ့ အကာကွယ်ကို လိုချင်လို့လား။

ဘာလို့ ကျန်းချွမ်ဖန့်က မသေခင် သူမကို လက်ညှိုးထိုးသွားခဲ့တာလဲ။ သူမက ဘာတွေ့သွားလို့လဲ။

ဘယ်လိုပဲနေနေ စုန့်ချန်က သူ နတ်ဘုရား ဖြစ်မှန်း သိနေလောက်မှာ။

ဆန်းကြယ်တဲ့ ဖြစ်ရပ်ကြီးကလည်း အစစ်အမှန်ကြီး၊ သက်ရှိလူသားတစ်ယောက်ကလည်း ရုတ်တရက် လေထဲ ပျောက်သွားတယ်၊ နောက်တော့ မုန်းစရာကောင်းတဲ့ သွေးနီရောင် စာတန်းကြီးလည်း ပေါ်လာတယ်။ သူတို့က စိတ်ရောဂါရှိတဲ့သူတွေ မဟုတ်တဲ့အတွက် ခန့်မှန်းမိကြမှာပဲလေ။

ချူဟွိုက်က မျက်လုံးအောက်ပို့လိုက်ရင်း သူ၏ ခံစားချက်ကို ဖုံးကွယ်ထားသည်။ သူက မျက်လုံးပြန်ပင့်လာချိန် သူ့မျက်ဝန်းတစ်စုံက သန့်စင်ပြီး တောက်ပနေသည်။

"အစ်မချန်ချန်၊ အစ်မ ပြောတာမှန်တယ်၊ ကျွန်မက နတ်ဘုရားပါ" ချူဟွိုက်က ရယ်ပြီး ပြောလာသည်။ သူ၏ ပွင့်ပွင့်လင်းလင်းပြောလာသည့် စကားလုံးများက စုန့်ချန်၏ မျက်နှာကို ပြောင်းလဲသွားစေသည်။

ချူဟွိုက်၏ စိတ်က အရမ်း ကြည်လင်နေသည် ။

" အစ်မက သရဲ မဟုတ်ပါဘူး။ အစ်မက လူသားပါ"

" အခုလောလောဆယ် သေသေချာချာ ရှင်းမပြနိုင်သေးတော့ အစ်မက သရဲ မဟုတ်ဘူးလို့ ပြောပြရုံပဲ တတ်နိုင်တယ်။ ဒါက ဂိမ်းတစ်ခုသာသာပဲ။ ကျွန်မတို့ကို ကမ္ဘာကြီးက လှည့်စားထားတာ"

စုန့်ချန်က အံ့သြသွားသည်။ သူမ၏ မျက်နှာက မယုံနိုင်မှုတို့ ပြည့်နေပြီး စိတ်လှုပ်ရှားမှုကြောင့် မျက်လုံးက ဟိုသည်ရွေ့နေသည်။

သူမ၏ မူလအစီအစဥ်က တစ်ဒင်္ဂမျှ ယိမ်းယိုင်သွားရသည်။

မဟုတ်ဘူး၊ ချူကျောင်းက သူ့ကို လိမ်နေတာပဲ ဖြစ်ရမယ်။

စုန့်ချန်က နိုးနိုးကြားကြား ဖြစ်လာသည်။

ချူကျောင်းက အပြောကောင်းသည်။ သူမက ယခင်ကတည်းက သိပြီးသားဖြစ်သည်။ ချူကျောင်းက အမည်းကို အဖြူဖြစ်အောင် လုပ်နိုင်ပြီး ခပ်တုံးတုံးသရဲများကို အချင်းချင်းပြန်သတ်အောင် လုပ်ပစ်နိုင်သည်။ အခုကတော့ ဒီမိန်းမ သူမကို အရူးလုပ်နေတာပဲ ဖြစ်ရမယ်။

ဘာလို့ သူမက ချူကျောင်းကို ယုံကြည်ရမှာလဲ။

ချူကျောင်းက နတ်ဘုရားပဲ။ သရဲဖြစ်ပြီးတော့ အဲ့ဒီမိန်းမနဲ့ ပူးပေါင်းနေတဲ့ ကျင်းထျန်းယိက အချစ်ကြောင့် စုံလုံးကန်းနေလို့လေ။

ချူကျောင်းက သေကိုသေရမယ်။

စုန့်ချန်၏ မျက်လုံးထက် အေးစက်သည့် အလင်းရောင်တစ်ခု လက်ခနဲ ဖြစ်သွားသည်။

လက်ရှိအခြေအနေအရ ချူကျောင်းက နတ်ဘုရား ဖြစ်ရုံမကဘူး တစ်ပါးတည်းသော နတ်ဘုရားလည်း ဖြစ်နိုင်တယ်။

သူမက တစ်ပါးတည်းသော နတ်ဘုရား မဟုတ်ရင်တောင် သာမန်လူကို ရှာသတ်ဖို့ထက် မျက်စိရှေ့ကနတ်ဘုရားကို သတ်လိုက်တာ ပိုလွယ်နေတယ်။

ပြီးတော့ နတ်ဘုရားအရေအတွက်က သာမန်လူအရေအတွက်ထက်လည်း နည်းရမယ်။

အခုဆို ချူကျောင်းက အသတ်ခံရပြီးတာနဲ့ နတ်ဘုရားအဖွဲ့လည်း ပျက်ဆီးသွားဖို့ များတယ်။ သရဲအဖွဲ့သာ နိုင်သွားရင် သူမလည်း ဖြစ်ရပ်ထဲကနေ ချက်ချင်း ထွက်သွားနိုင်တော့မှာ။

သူမ အကြာကြီး လွမ်းနေရတဲ့ အိမ်ကို ပြန်နိုင်တော့မယ်။

သူမအမေက နာမည်ကြီး လူသိများတဲ့ စန္ဒယားပညာရှင် တစ်ယောက်။ ဒါပေမယ့်လည်း သူမက နေမကောင်းတဲ့အတွက် သူမအမေက အလုပ်ကို စွန့်လွှတ်ပြီး တစ်နေ့လုံး ကလေးထိန်းတစ်ယောက်လို သူမကို ပြုစုပေးနေရတာ။

သူမက မျက်လုံးပိတ်ပြီး လက်ဆန့်လိုက်ရင်း မှတ်ဥာဏ်ထဲရှိ သူမအိမ်တံခါးကို တွန်းဖွင့်လိုက်သည်နှင့် အနံ့အရသာနှင့် ပြည့်စုံသော အစားအသောက်နံ့များနှင့် ကြာပန်းနံ့တို့ ထုံသင်းနေသည့် ရနံ့ကို ရှူရှိုက်မိသည်။

စုန့်ချန်က ပန်းပွင့်ခြောက်များကို ကြည့်ရင်း သူမကိုယ်သူမ ခိုင်းနှိုင်းနေမည်စိုး၍ သူမအမေက ပြတင်းပေါက်ဘောင်တွင် ပန်းပွင့်လှလှလေးများနှင့် အလှဆင်ပေးထားတတ်သည်။

သူမ ပြန်သွားချင်တယ်။

သူမ အိမ်မပြန်ရတာ နှစ်ဝက်လောက် ရှိပြီ။

ချူကျောင်း အသတ်ခံရပြီးတာနဲ့ သူမ အိမ်ပြန်နိုင်တော့မယ်။

👻

Prev Next