MM Story Teller

Chapter 37

Viewers 4k

👻Chapter 37:

သွေးနီလရဲ့ သမန်းဝံပုလွေ သတ်ဖြတ်ခြင်း (15)

သူမအတွက်ကတော့ ချူကျောင်းက သုံးလေးရက်လောက် သိခဲ့ဖူးတဲ့ သူစိမ်းတစ်ယောက် သာသာပဲ။ သူမ သေသွားလည်း သနားနေစရာ မရှိဘူး။

သူမ လူမသတ်ချင်သော်လည်း ချူကျောင်းက သူမနှင့် သူမအိမ်ကြား ကန့်လန့်ခံနေသော အတားအဆီးတစ်ခု ဖြစ်လာ၍ သူမ၏ မူစန်းကို ထုတ်လိုက်ရန် လက်တွန့်နေမည် မဟုတ်ပေ။ အရင်အချိန်တုန်းက ရလဒ်က သူမအပေါ်သာ မူတည်ခဲ့သည်။

ဒီနေ့ထိ ရောက်လာဖို့က အရမ်းခက်ခဲခဲ့တာ၊ သူမအသက်ကလည်း ပွက်ကာသီကာလောက် လွတ်ခဲ့ရတာ။ ဒီတစ်ကြိမ်မှာ ဘယ်လိုလုပ်ပြီး ကျရှုံးအောင် လုပ်နိုင်ပါ့မလဲ။

စုန့်ချန်က အံတင်းတင်းကြိတ်ပြီး နှုတ်ခမ်းတင်းတင်းစေ့မိသည်။

ညနက်နေပြီဖြစ်၍ မြို့ထဲရှိ အပူချိန်ကလည်း တဖြေးဖြေး ကျဆင်းလာသည်။ ကျင်းထျန်းယိက ချူဟွိုက်၏ ဂျာကင်အင်္ကျီကို ဇစ်ဆွဲပေးလိုက်သည်။

"ရှင် မချမ်းဘူးလား" ချူဟွိုက်က ကျင်းထျန်းယိနှင့်အတူ လော်မင်ကို ရှာရန် သွားနေရင်း လှည့်မေးလာသည်။

ယခုမှသာ ကျင်းထျန်းယိက သူ့အဝတ်အစားများကို ချွတ်ပြီး သူ့ကို ဝတ်ပေးခဲ့မှန်း မှတ်မိသွားရသည်။ ထိုလူက သေသေသပ်သပ် အင်္ကျီလက်တိုလေး တစ်ထည်သာ ဝတ်ထားသည်။ ထပ်ပြီး ကျင်းထျန်းယိက သူ့ပင်ကိုယ်စိတ်အတိုင်း အထိန်းအကွပ် မရှိသည့်ပုံပေါ်နေသည်။

"မချမ်းဘူး" ကျင်းထျန်းယိက ခေါင်းခါပြရင်း ရယ်သံနှင့် ပြောလာသည်

" မင်း မယုံရင် ကိုယ့်ကို လာထိလို့ ရတယ်နော်"

ချူဟွိုက် " ....."

ချူဟွိုက်က နောက်ကို လှည့်ကြည့်လာရာ ကျင်းထျန်းယိနှင့် အကြည့်ချင်း ဆုံသွားရသည်။

ကျင်းထျန်းယိက သူ့ကို ပြုံးပြနေသည်။

ညလေအဝှေ့တွင် တစ်ယောက်ယောက်က ခလုတ်ဆွဲလာသည့် အသံကို အနောက်မှ ကြားလိုက်ရသည်။

အစ်မချန်ချန်...။

ချူဟွိုက်က တိတ်တဆိတ် ရေရွတ်လိုက်ရင်း သူ့မျက်လုံးထက် သနားသည့် အရိပ်အရောင်များ ပြည့်လျှံလာသည်။

သူက ပုပုနှင့်လူ၏ စကားတစ်စွန်းတစ်စမှ စုန့်ချန်တွင် အားပြင်းသည့် လက်နက်ရှိနေမှန်း ခန့်မှန်းမိသည်။

ထို့ပြင် ထိုလက်နက်အသေးစားကလည်း အလွယ်တကူ ဖွက်ထား၍ ရနိုင်သည်။

သာမန်ဖြစ်ရပ်များတွင် အခြေခံ ဆေးဝါးများ၊ ထောက်ပံ့ပစ္စည်းများနှင့် လက်နက်တို့လို ထွေလီကာလီ ပစ္စည်းများကို ဖြစ်ရပ်ထဲ ဝင်ပြီးသည်နှင့် ကမ္ဘာကြီးက သိမ်းယူထားခဲ့သည်။ ထို့ကြောင့် တိုက်ခန်းထဲမှ လူများက ထိုပစ္စည်းများကို ယူသွားလေ့မရှိကြချေ။

မုဒိန်းကောင်ကို သတ်ရန် သူသုံးခဲ့သည့် မီးဖိုချောင်သုံးဓါးက သူ့လက်ချောင်းကို ဓါးရှခိုင်းသည့်အချိန်က ကျင်းထျန်းယိ ပေးခဲ့သည့်ဓား ဖြစ်သည်။

ထို့နောက် ချူဟွိုက်မှာ ထိုဓါးက အသုံးဝင်လာမည်ဟု ထင်မထားခဲ့ချေ။

ဤအတွက်ကြောင့် ရူးသွပ်ဖွယ် သွေးနီလရောင် မြို့တော်၏ မစ်ရှင်က ပြိုင်ပွဲဝင်များ၏ လက်နက်များကို မယူထားမှန်း အမှတ်ရစေသည်။

ဒါဆို စုန့်ချန်က မူစန်းကို တမင်ယူလာခဲ့တာ ဖြစ်နိုင်တယ်။

ဤဖြစ်ရပ်က တစ်ခုခုမှားနေကြောင်း သူမကို ပြောပြီးသည်နှင့် စုန့်ချန်က သူ့ကို တစ်ခုခုလုပ်လာခြင်းအပေါ် မယုံကြည်နိုင်ဖြစ်သွားရုံသာ။

လမ်းစောင်းပေါ် အလင်းကျနေသည့် လရောင်အောက်တွင် စုန့်ချန်၏ မျက်လုံးလှလှလေး၌ တွန့်ဆုတ်မှုအချို့ ရှိနေဆဲဖြစ်သည်။ သူမက လက်မြောက်လာပြီး ချူဟွိုက်၏ ခေါင်းနောက်ပိုင်းဆီ သေနတ်ချိန်လိုက်သည်။

သူမက မောင်းခလုတ်ကို လက်ညှိုးတင်လိုက်ပြီး သူမမျက်နှာက ပြင်းထန်နေသည်။

မျက်စိတစ်မှတ်စာအတွင်း ကိစ္စတစ်ခု ဖြစ်သွားခဲ့သည်။

ကျင်းထျန်းယိက ရုတ်တရက် လှည့်ပတ်လိုက်ရင်း ချူဟွိုက်ကို ဘေးကို တွန်းပို့လိုက်သည်။ စုန့်ချန်က မျက်လုံးအစုံ ပြူးကျယ်သွားရင်း တစ်စက္ကန့်မျှ မှိုင်တွေသွားရသည်။

လှုပ်ရှားမှုကို မရပ်လိုက်ပဲ ကျင်းထျန်းယိက မူစန်းကို ဖမ်းကိုင်လာသည်။

စုန့်ချန်က ရုတ်တရက် နှလုံးရပ်သွားသလို ခံစားလိုက်ရပြီး သူမမျက်လုံးအနားသားများက ဆုတ်ပြဲတော့မလို ခံစားရသည်။ သို့နှင့် မောင်းခလုတ်ကို ဆွဲတင်လိုက်သည်။

ဘန်း...။

ကျည်ဆန်က ကျင်းထျန်းယိ ရင်ဘတ်ဆီ အရှိန်အပြည့်နှင့် ဦးတည်သွားသည်။

ထိုခဏ ချူဟွိုက်၏ နှလုံးက လည်ချောင်းမှ ခုန်ထွက်လာတော့မလို ခံစားရသည်။

ကျင်းထျန်းယိက အံ့သြဖို့ကောင်းစွာ ဘေးဘက်ကို ရှောင်တိမ်းလိုက်သည်။ ကျည်ဆန်က သူ့အဝတ်ကို ဖြတ်သွားပြီး သူ့နောက်က နံရံပေါ် အပေါက်ရာထင်ခဲ့သည်။

စုန့်ချန်၏ မျက်နှာက လူသေလို ဖြူစုတ်သွားကာ မျက်လုံးများက စိတ်ပျက်မှုများ ပြည့်နှက်နေသည်။

ဒါက သူမရဲ့ တစ်ခုတည်းသော အခွင့်အရေး ဖြစ်ခဲ့တာ။

ကျင်းထျန်းယိ၏ မျက်နှာက ပြင်းထန်လာပြီး နက်စွေးနေသော မျက်လုံးများက အရိုးထဲထိ ဖောက်ထွက်မတတ် တစ်ဖက်လူကို အေးစိမ့်စိမ့် ခံစားစေမိသည်။

ကျင်းထျန်းယိက စုန့်ချန်၏ ခပ်သွယ်သွယ် လက်ကောက်ဝတ်ကို ဆုပ်ကိုင်လိုက်ချိန် သူမက ရုန်းကန်လှုပ်ရှားလာသော်လည်း ထိုတိုက်စစ်က ကျောက်တုံးကို ကြက်ဥနှင့် ပေါက်သလို အားကုန်သွားသည်သာ ရှိသည်။

“အား..." စုန့်ချန်က အသည်းခိုက်မတတ် အော်လိုက်မိသည်။

သူမ၏လက်က အားပျော့စွာ ပြုတ်ကျသွားရင်း ကိုင်ထားသည့် မူစန်းကလည်း မြေကြီးပေါ် တစ်လိမ့်လိမ့် ကျသွား၍ ခပ်ဝေးဝေးထိ ရောက်သွားသည်။

ချူဟွိုက်က အနားရောက်လာ၍ သူ့ခြေသံတရှပ်ရှပ်က စုန့်ချန်၏ နှလုံးသားပေါ် နင်းခြေသွားသလို ခံစားရသည်။

သူမကို ကျင်းထျန်းယိက ထိန်းချုပ်ထား၍ စုန့်ချန်က မလှုပ်နိုင်တော့ပေ။ ချူဟွိုက်က မူစန်းကို ကုန်းကောက်လိုက်သည်။ သူက လက်မြောက်လိုက်ပြီး မူစန်းနှင့် စုန့်ချန်ဆီ ချိန်လိုက်သည်။

ချူဟွိုက်က မတ်မတ် ရပ်ထားသော်လည်း ဖြူဖျော့နေပုံပေါ်သည်။ ထိုအချိန် သူ့မျက်ဝန်းထက် နာကျင်နေသည့် အရိပ်ရောင်တို့ သန်းနေသည်။

" အစ်မချန်ချန်။ ဒီကျည်ဆန်ကို အစ်မချန်ချန်ဆီ ပြန်ပေးပါ့မယ်" ချူဟွိုက်က ပြုံးပြလိုက်သည်။ သူက တွန့်ဆုတ်မနေပဲ ခလုတ်မောင်းကို ဆွဲတင်လိုက်သည်။

မူစန်း၏ ကိုယ်ထည်က လူသေကောင်၏ ကိုယ်အပူချိန်လို အေးစက်နေသည်။ ယင်းက သက်ရှိ လူသားတစ်ယောက်၏ အပူကို စုပ်ထုတ်လိုက်ပြီး အကြောင်းပြချက်မရှိပဲ အေးစက်သွားစေသည်။

ဘန်း...။

ကျည်ဆန်က လျှပ်စီးလက်သလို လွင့်ထွက်သွားသည်။ စုန့်ချန်၏ မျက်လုံးအစုံ ပြူးကျယ်သွားပြီး သူမရင်ဘတ်မှ သွေးတို့ ပန်းထွက်လာသည်မှာ ပန်းပွင့်ဆုပ်ကြီး တစ်ခုနှင့်ပင် တူနေသည်။

သူမ၏ မျက်နှာလှလှလေးက ဖြူဖျော့သွားပြီး ချစ်စဖွယ်ပန်းပွင့်များလည်း ကွယ်ပျောက်သွားလေသည်။

ကျင်းထျန်းယိက ကိုင်ထားသည်ကို လွှတ်လိုက်သည်။

စုန့်ချန်၏ ခန္ဓာကိုယ်က မြေကြီးပေါ် ဗိုင်းခနဲ လဲကျသွားသည်။

သူမ မပိုင်ဆိုင်တော့သည့် နှလုံးက အခုန်ရပ်သွားလေသည်။

သူမ မသေဆုံးမီ အခိုက်အတန့်တွင် သွေးအိုင်ထဲ လဲနေရင်း စုန့်ချန်က ကြာပန်းရနံ့ အမွှေးအိုးမှ အနံ့သင်းသင်းလေးနှင့် အရသာရှိသော ဟင်းလျာနံ့များကို အနံ့ရလိုက်၍ မျက်ရည်များက တလိမ့်လိမ့် စီးကျလာသည်။

အမေ ၊ အဖေ။ ကျွန်မ ဘယ်တော့မှ ပြန်လာနိုင်တော့မှာ မဟုတ်ဘူး။

မဟုတ်ဘူး။

သူမ အခုလေးတင် ဘာမြင်လိုက်ရတာလဲ။

စုန့်ချန်၏ မျက်လုံးများက ထိတ်လန့်မှုတို့ ပြည့်နှက်သွားရသည်။

သူမက ခေါင်းမော့လိုက်ရင်း ကောင်းကင်က လမင်းကြီးနှင့် မျက်နှာချင်းဆိုင်လိုက်သည်။

ဒါပေမယ့် ဒါက အဖြူရောင် လမင်းကြီးလည်း မဟုတ်ဘူး။

ဒါက ညှို့ဓါတ်ပြင်းတဲ့ သွေးနီလကြီးပဲ။

စုန့်ချန်က နောက်ဆုံးလက်ကျန် အားကုန်ထုတ်လိုက်ရင်း သူမလက်ချောင်းကို အနည်းငယ် ရွေ့လိုက်သည်။

ဒါက သူတို့အတွက် နောက်ဆုံးလုပ်ပေးနိုင်မယ့် အရာပဲ။

အစ်ကိုကျင်း၊ ကျောင်းကျောင်း၊ ငါ တောင်းပန်ပါတယ်။

……

ချူဟွိုက်က ရီဝေဝေ ရပ်ကြည့်နေဆဲ ဖြစ်သည်။

သူက စုန့်ချန်ကို သတ်ရန် မရည်ရွယ်ထားသော်လည်း တစ်ဖက်လူက အလွယ်တကူ သေဆုံးသွားမည်ဟု ထင်မထားခဲ့ချေ။

ကျန်းချွမ်ဖန့်၏ မသေခင် သတိပေးသွားသည့် အချက်အရ စုန့်ချန်ကိ သရဲမဟုတ်လျှင် သရဲက ထိန်းချုပ်ထားသည့်သူဟု သူ အစက ထင်ခဲ့သေးသည်။ ထို့ကြောင့် စုန့်ချန်သူ အသက်ကို ခြိမ်းခြောက်ခံနေရလျှင် သရဲက ကိုယ်ထင်ပြလာနိုင်သည်။

သို့သော်လည်း စုန့်ချန်က အဆုံးတွင် သေသွားခဲ့သည်။

သူ နောင်တမရပေ။ ချူဟွိုက်က တဖြေးဖြေး စိတ်တည်ငြိမ်လာသည်။

အခြေအနေက တဖန်ပြန်ပြီး ငြိမ်သက်သွားသည်။

သူတို့ကြား ပုန်းနေသည့် သရဲနှင့်ပတ်သက်၍ မည်သည့်အကြံမှ ရှိမနေသေးချေ။

“မင်း ကြောက်နေတာလား" ကျင်းထျန်းယိက မေးလာသည်။

ချူဟွိုက်က နှုတ်ခမ်းတင်းတင်းစေ့ပြီး ခေါင်းယမ်းပြသည်။ သူ၏ မျက်ဝန်းနက်နက်ထဲတွင် ရှုပ်ထွေးသော ခံစားချက်များ ကိန်းအောင်းနေသည်။

ကျင်းထျန်းယိက ချူဟွိုက်လက်ကို ဆုပ်ကိုင်လိုက်ချိန် တစ်ဖက်လူ၏ မူစန်းကို ကိုင်ထားသည့် လက်ငါးချောင်းက ဖြူဖျော့နေပြီ ဖြစ်သည်။

ကျင်းထျန်းယိက ရယ်သွမ်းသွေးလိုက်သည် "အကုန်လုံးကို လုပ်နိုင်သလိုမျိုး ပြဖို့ မလိုပါဘူး"

သူနှင့်ချူဟွိုက်က ကောင်းကင်နှင့် မြေကြီးလိုမျိုး မတူညီသည့် ဇာတ်ကောင်နေရာနှင့် ကစားနေကြရသည်။ လူတိုင်းက မလွယ်ကူသလို ခံစားနေရချိန် ချူဟွိုက်က အေးအေးဆေးဆေး ပြုမူနိုင်သည်။ သူက ဒဏ်ရာဒဏ်ချက် အားလုံးကို သူ့ဆီချန်ထားခဲ့ပြီး သူတို့ကို နှစ်သိမ့်ပေးခဲ့သည်။ ထို့ပြင် သူက သူ့ကိုယ်တိုင် စိတ်တည်ငြိမ်သွားသည်ထိ စောင့်နေပြီးမှ အခြားသူများကို စိတ်ချထားရန် ပြုံးပြလာသည်။

ကျင်းထျန်းယိက သူ့ကို မြင်သာအောင် ပြောလာသည့်အချိန် ချူဟွိုက်ကိုယ်က တောင့်ခနဲ ဖြစ်သွားရသည်။

ကျင်းထျန်းယိက ချူဟွိုက်၏ လက်ချောင်းများကို တစ်ချောင်းပြီးတစ်ချောင်း ဖြေလျော့ပေးလာရင်း အေးစက်စက် မူစန်းကို ခါထုတ်ပစ်ကာ ချူဟွိုက်လက်ကို လှမ်းကိုင်လာသည်။

ကျင်းထျန်းယိ၏ လက်ဖဝါးက တော်တော်လေး နွေးထွေးသည်။

ချူဟွိုက်ခေါင်းထဲ ရူပဗေဒဆိုင်ရာ အချက်အလက်တစ်ခု ရုတ်တရက် ပေါ်လာသည်။ အတွင်းပိုင်းအားအင် များတဲ့နေရာကနေ နည်းတဲ့နေရာဆီ အားအင်တွေ ကူးပြောင်းပေးလို့ရတယ်။ အပူကို ဝတ္ထုနှစ်ခုလုံး အပူချိန်ညီမျှသွားတဲ့အချိန်ထိ ထုတ်လွှတ်ပေးလို့ရတယ်။

စိတ်မသက်သာ ဖြစ်စေတဲ့ အရှုပ်ထုပ်ကြီးပဲ။

ချူဟွိုက်က နှုတ်ခမ်းထောင့်စွန်းကို အနည်းငယ် ပင့်တင်လိုက်ရင်း တွန့်ချိုးနေသော မျက်ခုံးတို့က တဖြေးဖြေး ပြေကျသွားသည်။

ကျင်းထျန်းယိက တစ်ဖက်လူ၏ မျက်လုံးတို့ ခံစားချက်မရှိတော့သလို ဖြစ်သွား၍ ချူဟွိုက် စိတ်ညစ်နေပြီမှန်း သိလိုက်သည်။ သူက ချူဟွိုက်ကို ရုတ်တရက် စကားခေါ်လာသည်။

"နောက်တစ်ကြိမ်ကျလို့ မင်း မသတ်နိုင်ရင် ကိုယ် သတ်ပေးမယ်။ ကိုယ့်အတွက်က ဘာမှ မဖြစ်သွားဘူး။ ဒါကြောင့်မို့ မင်းကိုယ်မင်း တွန်းအားပေးနေစရာမလိုပါဘူး" ကျင်းထျန်းယိက ဆိုလိုက်သည်။

"အင်း" ချူဟွိုက်က ချူကျောင်းပြန်ဖြစ်လာ၍ ရှက်ကိုးရှက်ကန်း ခေါင်းငုံ့လိုက်ရင်း ကျင်းထျန်းယိ မှာကြားချက်ကို နားထောင်နေသည်။

ကျင်းထျန်းယိ၏ မျက်လုံးများက အထက်စီးဆန်နေသည်။ "ကိုယ်ကလွဲပြီး တခြား ဘယ်သူ့ကိုမှ မယုံလိုက်နဲ့"

"ကောင်းပါပြီ" ချူဟွိုက်က အလေးအနက် ခေါင်းညိမ့်ပြလာသည် " လော်မင့်ကို သွားရှာကြရအောင်"

စုန့်ချန်၏ အလောင်းက လမ်းမလယ်ခေါင်တွင် ရှိနေသည်။ ချူဟွိုက်က သူမဘေးနား ဖြတ်သွားမိချိန် အရှိန်ရပ်သွားသည်။

ဆွတ်ဆွတ်ဖြူနေသော လရောင်အောက်တွင် သူက အပြာရောင် ကျောက်ခင်းလမ်းရှိ သွေးကွက်ထဲတွင် 'ကျုံး'ဟု ရေးထားသည်ကို တွေ့လိုက်ရသည်။ [T/N ကျုံးက တရုတ်အခြေစာလုံးပါ၊ ကန်ရှီအဘိဓါန်ထဲက စုတ်ချက်နှစ်ချက်နဲ့ ဆွဲရတဲ့ အခြေစာလုံး ဖြစ်ပါတယ်]

စာလုံးက တွန့်တွန့်လိမ်လိမ် ရေးထားလေသည်။

"ဘာဖြစ်..." ကျင်းထျန်းယိက ခေါင်းစောင်းလာရာ စာလုံးကို မြင်သွားသည်။ သူ၏ မျက်လုံးတို့ နက်မှောင်သွားလေသည်။

"ဘာလို့ သူမက ဒီစာလုံးကို ရေးသွားရတာလဲ" ချူဟွိုက်က မျက်မှောင်ကြုပ်လိုက်သည်။

ဤစာလုံးက ကျုံး (冂)ဟု အသံထွက်ပြီး မန်ဒရင်းဘာသာစကား၏ ပထမအသံလည်း ဖြစ်သည်။ 'မြို့ပြင်' ဟု အဓိပ္ပါယ်ရသည်။

"သူမက အစက 'တံခါး (‘门 )' လို့ ရေးချင်တာကို သွေးစီးကြောင်း ချော်သွားလို့ အတူတူဆက်ပြီး ဒီစာလုံး ဖြစ်သွားတာလား" [‘门 က တရုတ်ဘာသာစကားမှာ တံခါးပါ]

ချူဟွိုက်က လမ်းတစ်ဖက်ကို ကြည့်လိုက်သည်။

သူတို့နှင့် ဆယ်မီတာခန့်အကွာတွင် အိမ်တစ်လုံး ရှိနေပြီး တံခါးက သူတို့ဘက်ကို မျက်နှာမူထားသည်။

စုန့်ချန်က သရဲမြင်လိုက်ပြီး အဲ့ဒီသရဲက တံခါးဘေးနားမှာ ရပ်နေလို့ များလား။

ကျင်းထျန်းယိက တွေးတွေးဆဆ ပြောလာသည် " သူမက ပြီးအောင် ရေးသွားဖို့ အချိန်မလောက်သွားတာ ဖြစ်နိုင်တယ်" သူ့စကားလုံးများက ချူဟွိုက်၏ စဥ်းစားပုံစဥ်းစားနည်းကို ကျယ်ပြန့်သွားစေသည်။

"နောက်ထပ် စာလုံးက ဘာဖြစ်လောက်မလဲ" ကျုံးပါသည့် စာလုံးက အများကြီး ရှိလေသည်။

ချူဟွိုက်က ခေါင်းငုံ့လိုက်ရင်း နာရီကို တစ်ချက်ကြည့်

မိသည်။ ယခုအချိန်က ၁၀နာရီ မိနစ်၃၀ရှိပြီ ဖြစ်၍ သွေးနီလက နောက်ထပ်နာရီဝက်အတွင်း ပေါ်လာတော့မည်ဟု ဆိုလိုခြင်းပင်။

" အမြန်လုပ်ရအောင်။ နာရီဝက်အတွင်း လော်မင့်ကို ရှာတွေ့ဖို့ လိုတယ်။ ပြီးတော့ ပြိုင်ပွဲဝင်တွေအားလုံးကို တတ်နိုင်သလောက် စုစည်းပြီး သူတို့ကို ဒါက လူသတ်တဲ့ ဂိမ်းသက်သက်ပဲ ဆိုတာ ပြောပြရမယ်"

“ကောင်းပြီ"

ကျင်းထျန်းယိက ချူဟွိုက်လက်ကို ကိုင်ထားရင်း ရှေ့ဆက်လျှောက်သည်။ သူက နေရာရှာစွမ်းရည်ကို သုံးနေရ၍ စကားတစ်ခွန်းမှ ဆိုမလာချေ။

ချူဟွိုက်က ရှေ့ဆက်လျှောက်နေသည်။

ရုတ်တရက် သူ့နောက်က ချမ်းစိမ့်စိမ့် ခံစားရသည်။

သူက ခေါင်းငဲ့ပြီး အနီးဆုံးရှိ အိမ်ပြတင်းပေါက်ကို စိုက်ကြည့်လိုက်သည်။

အိမ်က မည်းမှောင်နေပြီး ပြတင်းပေါက်မှ လှမ်းကြည့်နေသော မျက်လုံးတစ်စုံကို တွေ့လိုက်ရသည်။

ချူဟွိုက်က အသက်အောင့်မိသွားသည်။

ထိုမျက်လုံးက သွေးကြောတို့ ထောင်ထွက်နေပြီး မည်းမှောင်နေ၍ သူ့နောက်ကျောပင် အေးသွားရသည်။

သူက ထိုနေရာကိုပဲ ကွက်ကြည့်နေစဥ် ထိုမျက်လုံးက ပျောက်သွားပြီ ဖြစ်သည်။

ချူဟွိုက်က ကျင်းထျန်းယိကိုပါ ဆွဲပြီး အနီးကပ်ကြည့်စေသည်။ ပြတင်းပေါက်နောက်တွင် လူအရိုးတစ်ခုသာ ရှိနေပြီး သူ အရင်က ပုန်းခဲ့သည့် အိမ်က အရိုးနှင့် ဘာမှထူးခြားမနေချေ။

အချိန်ကြာပြီဖြစ်၍ အရိုးတွင် အသားမရှိတော့ပဲ မျက်တွင်းက မျက်ဆံမရှိ ဟောက်ပက်ကြီးဖြစ်နေသည်။

အရိုးမှာ မျက်လုံးမရှိဘူး။

ခုနကဟာက...သူ အမြင်မှားတာလား။

ချူဟွိုက်က မျက်မှောင်ကြုတ်လိုက်သည်။

သူ့စိတ်ထဲ အတွေးတစ်ခု ဝင်လာသည်။

"အစ်ကိုကျင်း။ ကျွန်မတို့ အနီးအနားက အိမ်တွေမှာလည်း အရိုးတွေ ရှိနေလား ဆိုတာ သိဖို့ လူခွဲပြီး ရှာကြည့်ရအောင်"

ကျင်းထျန်းယိက ပြုံးပြလာသည် " ကိုယ်မင်းကို ရှာခဲ့တုန်းက အိမ်တိုင်းလိုလိုမှာ အရိုးတွေရှိနေမှန်း ရိပ်ခနဲ တွေ့ခဲ့ရတယ်"

ချူဟွိုက်က ထိုစကားကြားသောအခါ လန့်သွား၍ နေရာမှာတင် အေးခဲသွားရသည်။

" ဒါဆို ရူးသွပ်ဖွယ် သွေးနီလရဲ့ လျှို့ဝှက်ချက်က..."

ကျင်းထျန်းယိက ခေါင်းငုံ့ပြလာပြီး သူ့မျက်နှာသွင်ပြင်က မှိုင်းညှို့နေကာ သူ့အသံက ဝေးကွာနေသလိုပင်

" လွန်ခဲ့တဲ့ နှစ်အနည်းငယ်လောက်က မြို့က လူတွေက 'သွေးနီလရဲ့ သမန်းဝံပုလွေ သတ်ဖြတ်ခြင်း' ဆိုတဲ့ ဂိမ်းကြီးထဲမှာ ထူးထူးဆန်းဆန်း ပိတ်ထားမိသွားခဲ့တယ်"

“အစကတည်းက ဒါကြီးက လှည့်စားထားတဲ့ ဂိမ်းကြီးဖြစ်နေတာပဲ" ချူဟွိုက်က သေချာလာသည်။

"ဟုတ်တယ်" ကျင်းထျန်းယိက အနည်းငယ် အေးစက်နေသည့်ပုံပေါ်သည်။

သူက စကားဆိုလာသည် " သရဲလို့ ကိုယ့်ကိုယ်ကို ထင်နေကြတဲ့သူတွေက အသက်ရှင်ဖို့အတွက် လူတွေကို လိုက်သတ်ခဲ့တယ်။ ပြီးတော့ အသက်ရှင်ချင်သေးလို့ တခြားသူတွေကို ဆက်ပြီး ဇစ်မြစ်ဖော်ထုတ်ခဲ့တယ်။ လူတွေက သူတို့ကို သရဲလို့ ထင်သွားအောင်လို့ပေါ့။ သူတို့က ဒါတွေကို အသက်ရှင်ချင်ရုံအတွက် လုပ်ခဲ့ကြတာပဲ။ ဒါပေမယ့် ဒီလိုလုပ်ခဲ့ပေမယ့်လည်း နောက်ဆုံးမှာ သေကြရတာပဲ"

“သုံးသပ်ရမယ်ဆို အဲ့ဒီလူတွေက လူသတ်သမားတွေပဲ" ချူဟွိုက်က သက်ပြင်းမောကြီး ချမိသည်။

👻

Prev Next