MM Story Teller

Chapter 80

Viewers 4k

♎️Chapter 80

ထိုပုံစံအတိုင်း ရက်များစွာကုန်ဆုံးသွားပြီး ပိတ်ရက်ကနောက်တဖန်ရောက်လာပြန်သည်။ ရှန်းရှီကော အိမ်တွင်မရှိ၍ မိဘများကသူ့အားအိမ်ပြန်လာနေရန်ခေါ်နေပြီး သူသည်လည်း ရက်အနည်းငယ်ခန့်စိတ်အေးအေးဖြင့်နေနိုင်လိမ့်မည်ဟုတွေးလိုက်လေသည်။

ရှန်းရှီကောကဘယ်တော့မှပြန်မလာတော့ဘူးဆိုတော့ ထွက်သွားပြီလား။

ဖုယွမ်ကျိုးကား ငေးတိငေးကြောင်ဖြင့် ဖုန်းကိုချလိုက်သည်။

သို့သော်လည်း အိမ်သားများက ရှန်းရှီကောအိမ်ပြောင်းသွားသည့်အရိပ်အယောင်မတွေ့ခဲ့ရကြောင်းပြောခဲ့၍ ထိုသူကပြန်ရောက်လာနိုင်သည်။ ဖုယွမ်ကျိုးမှာ ထပ်မမေးတော့သည့်တိုင် စိုးရိမ်စိတ်ကဝင်နေဆဲ။ ရှန်းရှီကောသာထွက်သွားချင်နေပါက အိမ်ကိုပင်ထားခဲ့နိုင်မှန်းသူသိနေခဲ့သည်။ ထို့ကြောင့် မည်သည့်ပြဿနာမှရှိလာမည်မဟုတ်ပေ။

ရှန်းရှီကော အိမ်တွင်မရှိ၍ ဖုယွမ်ကျိုးလည်း ရှဲ့လင်နှင့်အတူပြန်လာခဲ့သည်။ မကြာမီ နှစ်သစ်ကူးနေ့ရောက်တော့မည်ဖြစ်ရာ မိသားစုနှင့်အတူ နှစ်သစ်ကူးအားလပ်ရက်တို့ကိုကုန်ဆုံးချင်နေခဲ့သည်။ ယွိဖေးတို့မိသားစုလည်းရောက်လာသော်ငြား ရှဲ့လင်မိဘများကမလာခဲ့ပေ။သူတို့ကနိုင်ငံခြားတွင်ရှိနေဆဲဖြစ်ကာ နွေဦးပွဲတော်အတွင်း ပြန်လာရန်ရုန်းကန်နေရလေသည်။

ရှဲ့လင်ကဆင်တူလက်စွပ်ဝတ်ထားပြီး မည်သူမှမရှိသည့်အချိန် ဖုယွမ်ကျိုးကိုပွေ့ဖက်ကာ နမ်းရှုံ့ခဲ့သည်။ သည့်နောက် နောက်ထပ်ဆင်တူလက်စွပ်တစ်ကွင်းကိုထုတ်ကာသူ့အားမေးလာခဲ့၏။

"ကိုယ်မင်းကိုဝတ်ပေးရမလား..."

မတိုင်ခင်ကလည်း သူတို့သဘောတူထားခဲ့ကြသည်။ သူတို့တရားဝင်တွဲကြသည့်အခါ ရှဲ့လင်က ဖုယွမ်ကျိုးကိုလက်စွပ်ဝတ်ပေးရမည်။ ဖုယွမ်ကျိုးက ရှက်သွေးဖြာစွာဖြင့် သူ့အတွက်လက်စွပ်တစ်ကွင်းကိုယူလိုက်လေ၏။

သူသည်ကား ရှဲ့လင်စိတ်မကောင်းဖြစ်သွားမည်ကိုစိုးရိမ်သည့်တိုင် ပြောဖြစ်အောင်ပြောလိုက်သေး၏။

"ယွမ်ယဲ့ကဖိုင်နယ်ရောက်တော့မယ်...အခြေအနေမှကောင်းရဲ့လားမသိဘူး..."

ရှဲ့လင်က ယွမ်ယဲ့ သူ့ကိုသဘောကျနေမှန်းသိသောကြောင့် သူ့အသံကိုတိုးလိုက်ပြီး မဝံ့မရဲဖြင့်ပြောလိုက်သည်။ သို့သော်လည်း ဂိမ်းပြိုင်ပွဲကယွမ်ယဲ့အတွက်အရေးကြီးပြီး အနာဂတ်တွင် ပရိုဖက်ရှင်နယ်ကစားသမားဖြစ်လာရန်အတွက်လည်း ကြိုးစားရလိမ့်မည်။

ထိုသူဝင်ပြိုင်နေသည့်ဂိမ်းပြိုင်ပွဲက မျိုးဆက်သစ်ကစားသမားများပါနေသည့် ပထမအဆင့်ဂိမ်းပြိုင်ပွဲအမျိုးအစားဖြစ်နေသည်။ ထိုပြိုင်ပွဲက အချိန်တိုအတွင်း တိုက်ခိုက်ရပြီး တရားဝင်ပရိုဖက်ရှင်နယ်ပြိုင်ပွဲမျိုးမဟုတ်၍ နာမည်ကြီးသည်။ ၎င်းက နောင်လာမည့်ပရိုဖက်ရှင်နယ်ပြိုင်ပွဲများအတွက် အကြိုလေ့ကျင့်ပေးခြင်းမျိုးဖြစ်ပြီး ထူးချွန်ကစားသမားအချို့ကိုလည်းရွေးချယ်ပေးသွားလိမ့်မည်။

ပြိုင်ပွဲကျင်းပပေးသည့်ဂိမ်းကုမ္ပဏီက ထျန်းချန်တွင်တည်ရှိပြီး ပြည်တွင်းမှခေါင်းဆောင်များလည်း ဂိမ်း၏အရေးကြီးနေရာတွင်ပါဝင်နေကြသည်၊ မြို့တော်မှ e-sport လောကကိုမြှင့်တင်ပေးရန်အတွက် ၎င်းတို့က ဖိုင်နယ်ပွဲကိုကိုယ်တိုင်တက်ရောက်ရပြီး TV မှလည်းတိုက်ရိုက်ထုတ်လွှင့်ပေးမည်ဖြစ်သည်။

ယွမ်ယဲ့၏ဂိမ်းအဆင့်က မြင့်သည့်နေရာတွင်ရှိသည်။ တရားဝင်ပရိုဖက်ရှင်နယ်ဂိမ်းစတင်သည့်အခါ ပရိုဖက်ရှင်နယ်ကစားသမားနီးနီးကစားနိုင်စေကာမူ သူမျှော်မှန်းထားသည့် ထိပ်တန်းကစားသမားအသင်းကိုဝင်နိုင်မဝင်နိုင်အပေါ်မူတည်နေလေသည်၊၊ ဖုယွမ်ကျိုးသည်လည်း ယွမ်ယဲ့အိပ်မက်ကိုနားလည်၍ ကူညီပေးချင်နေပြီး ယခုလိုအချိန်တွင်မနှောင့်ယှက်ချင်ပေ။

သူရှဲ့လင်ကိုရှင်းပြလိုက်သည်။ ရှဲ့လင်ကမစဥ်းစားတတ်သူမဟုတ်ပေ။ နားထောင်ကြည့်ပြီးနောက် သူခေါင်းညိတ်ပြီးလက်ခံလိုက်သည်။

"အိုကေ..."

ထိုသူသည် ခဏမျှရပ်လိုက်ပြီးမေးလိုက်ပြန်၏။

"ဖိုင်နယ်ကဘယ်တော့လဲ..."

ဖုယွမ်ကျိုး: "အတန်းထဲကလူတွေလည်းသွားကြမှာ...မင်းရောလိုက်မှာလား..."

ရှဲ့လင်ကသွားရန်သဘောတူလိုက်သည်။ ဖိုင်နယ်ညတွင် သူတို့အတူသွားကြပြီး အခြားသူများလည်းရောက်လာခဲ့ကြသည်။ ဖိုင်နယ်ပွဲကိုမြို့လယ်ခေါင်မှ အားကစားခန်းမတွင်ကျင်းပခဲ့သည်။ လက်မှတ်ဝယ်ပြီးသည့်တိုင် ရုံကမဖွင့်သေး၍ အားလုံးကအပြင်တွင်စောင့်နေခဲ့ကြသည်။

"အေးလိုက်တာ!"

အတန်းဖော်များအားလုံး တုန်ယင်နေသော်လည်း မျက်နှာပေါ်တွင် စိတ်လှုပ်ရှားမှုကိုယ်စီရှိနေကြ၏။ အချို့သူများက ဂိမ်းမကစားဖူးကြသော်လည်း သူငယ်ချင်းများကိုကြည့်ပြီး စိတ်လှုပ်ရှားနေကြသည်၊ သည်ရက်ပိုင်းအတွင်း ဂိမ်းအကြောင်းလေ့လာခဲ့ကြသောကြောင့် ဂိမ်းပြိုင်ပွဲကိုခဏလေးကြည့်ရုံဖြင့် နားလည်နေကြလေ၏။

ဖုယွမ်ကျိုး၏ဂိမ်းစကေးက မဆိုးလှပေ။ သူသည် သူငယ်ချင်းအချို့ကို ဂိမ်းအကြောင်းရှင်းပြနေလိုက်၏။ သူသည်ကားစကားပြောနေရင်း ဘေးဘီကြည့်မိရာမှ ရုတ်တရက်ပင် သူအင်မတန်ရင်းနှီးနေသည့်ပုံရိပ်တစ်ခုကိုမြင်လိုက်ရသည်။

ရှန်းရှီကောပင်။

တကယ်ပဲရှန်းရှီကောလား။

၎င်းပုံစံကသူ့အတွက် ရင်းနှီးသလိုဖြစ်နေခဲ့သည်၊၊ ဖုယွမ်ကျိုးက အကောင်းဆုံးကြိုးစားပြီး ပိုသေချာအောင်ကြည့်ချင်သော်လည်း အခုအချိန်ကမှောင်နေပြီး လမ်းမီးတိုင်များအောက်တွင် အားကစားရုံအတွင်းသို့ဝင်သွားကြသည့်လူအချို့ရှိနေ၍ တဖက်လူ၏ပုံစံကိုအတိအကျမခွဲနိုင်ခဲ့ပါချေ။

သို့သော်လည်း ရှန်းရှီကောသာဆိုပါက ဘယ်လိုလုပ်သည်နေရာအထိရောက်လာပါမည်နည်း၊၊ သူ့အားလာတွေ့ခြင်းပေလား။ ရှန်းရှီကောက သူဂိမ်းပြိုင်ပွဲကိုလာကြည့်မှန်းမသိခဲ့သည်လည်းဖြစ်နိုင်သည်။ အကယ်၍ သူ့ကိုတွေ့ချင်ခဲ့သည်ဆိုလျှင် ကျောင်းဂိတ်ဝတွင်စောင့်နေရုံပင်။ သို့ထိတိုင် ရှန်းရှီကောကတစ်ခါမှ ထိုသို့မစောင့်ခဲ့ပေ။ အစကသူ့ကိုကျောင်းတွင်လာရှာသေးသည့်တိုင် နောက်ပိုင်း၌ တစ်ခါမှထပ်ရောက်မလာတော့ချေ။

"ဘာဖြစ်လို့လဲ..."

ရှဲ့လင်က ဖုယွမ်ကျိုးမျက်နှာပေါ်မှ ထူးဆန်းနေသည့်အရိပ်အခြေကြောင့် မေးလာလေသည်။

"ဘာမှမဖြစ်ပါဘူး..."

ဖုယွမ်ကျိုးခေါင်းခါပြလိုက်သည်။ ခဏအကြာတွင် ဝင်ပေါက်ပွင့်လာပြီး ပရိသတ်များက အားကစားရုံထဲသို့ တစ်ယောက်ပြီးတစ်ယောက်ဝင်သွားခဲ့ကြသည်။ သူတို့နှစ်ယောက်သည်လည်း အခြားကျောင်းသားများအနောက်မှလိုက်ဝင်လာခဲ့၏။

အားကစားရုံက ကြီးမားလွန်းနေ၏။ စင်ကို ထိုင်ခုံအတန်းသုံးလွှာနှင့်ဝိုင်းထားပြီး အခြားတစ်ဖက်တွင်တော့ ဖန်သားပြင်ကျယ်ကြီးရှိသည်။ ဂိမ်းပြိုင်ပွဲအတွင်း ပရိသတ်များ ကြည်လင်ပြတ်သားစွာဖြင့်ရှုစားနိုင်စေရန် အားကစားရုံအတွင်းမှ အလင်းရောင်များကိုမှိန်ထားပြီး မီးရောင်အစုံကိုပါထည့်သွင်းပေးထားခဲ့သည်။ ဂိမ်းပြိုင်ပွဲ၏ပင်မနောက်ခံသီချင်းမှာ လေလှိုင်းထဲတွင် ပဲ့တင်ထပ်နေပြီး ရှိပြီးသားလေထုကို ပိုတက်ကြွစေခဲ့သည်။

သည်နှစ်တွင် ဤဂိမ်းပြိုင်ပွဲက အင်မတန်ရေပန်းစားနေပြီး ကုမ္ပဏီဘက်မှလည်း ဖိုင်နယ်အတွက် ကြော်ငြာထားပြီးဖြစ်လေ၏။ လာကြည့်သည့်ပရိသတ်ကများလွန်းသောကြောင့် ထိုင်ခုံအားလုံးပြည့်နေလေပြီ။ ယွမ်ယဲ့ကသူတို့အတွက်ကြိုတင်စီစဥ်ထားသောကြောင့် ဖုယွမ်ကျိုးနှင့်အတန်းဖော်တို့၏နေရာက အတော်လေးကောင်းမွန်နေလေသည်။

ဖုယွမ်ကျိုးနှင့်ရှဲ့လင်တို့က ဘေးချင်းကပ်ထိုင်ကြသည်။ ထိုင်လိုက်ပြီးသည်နှင့် သူခေါင်းထဲဝင်လာသည့်အတွေးမှာ...ရှန်းရှီကောများလား။သူတို့ပွဲထဲမှာစုံကြမှာလား။

သူ့စိတ်အခြေအနေကရှုပ်ထွေးလာနေပြီး ရှန်းရှီကောမဟုတ်ပါစေနှင့်ဟုသာ ဆုတောင်းနေမိပြီး တဖက်တွင်လည်း ဖြစ်နေစေချင်ပြန်သည်။ သူ့ဘက်မှရှန်းရှီကောနှင့်မတွေ့ချင်လျှင်ပင် ရှန်းရှီကောကိုသာတွေ့လိုက်ရပါက သူ၏အခြေအနေမှာစိတ်ချရနိုင်ကြောင်း အတည်ပြုနိုင်ပေမည်။ အနည်းဆုံး သူ့ကိုယ်သူထိခိုက်အောင်လုပ်မည့်အစား ဂိမ်းပြိုင်ပွဲကိုလာကြည့်နေသေးသည်မဟုတ်လား။

သို့သော်လည်း ပရိသတ်များက သာမန်ဝင်မရပေ။ အားကစာရုံထဲသို့ဝင်ကြည့်နိုင်ရန် ကြိုတင်ပြီးလက်မှတ်ဖြတ်ထားရလေသည်။

ထိုသို့တွေးလိုက်မိပြီးသည့်နောက် ဖုယွမ်ကျိုးမျက်လုံးများက အလိုလိုရွေ့လျားသွားသော်လည်း သူဘာကိုရှာနေမိမှန်းမသိတော့ပေ။လူအများကြားထဲ၌ လူတစ်ယောက်ကိုရှာတွေ့ရန်မှာ လုံးဝမဖြစ်နိုင်ချေ။

သူတွေ့လိုက်သူက ရှန်းရှီကောမှန်းမသေချာသည့်တိုင် နောက်ထပ်တွေ့လိုက်ရသည့်ပရိသတ်တစ်ယောက်ကမူ သူ့အား အံ့ဩသွားစေခဲ့သည်။

ဥပဓိရုပ်ကောင်းကောင်းနှင့် သက်လတ်ပိုင်းအရွယ်လူတစ်ယောက်သည် သူတို့နှင့်မဝေးသောနေရာတွင်ထိုင်နေ၏။ ၎င်းမျက်နှာကမပြုံးမရယ်နှင့် ခပ်တည်တည်ပင်။ သူ့ဘေးပတ်လည်မှပရိသတ်များက စိတ်တက်ကြွစွာဖြင့်အော်ဟစ်နေကြသည့်တိုင် သူကမဖြုံပေ။ အခြားသူများကြည့်ရှုနေကြသည့်နေရာကိုသာ မမှိတ်မသုတ်ကြည့်နေလေသည်။

ထိုသူကပါပါးယွမ်ပင်။

ဖုယွမ်ကျိုးက တဖက်လူကိုချက်ချင်းမှတ်မိသွားခဲ့သည်။ မတိုင်ခင်က ထိုအမျိုးသားနှင့်စကားပြောခဲ့ချိန်တွင် ဖိုင်နယ်ပွဲအကြောင်းထည့်ပြောခဲ့သော်လည်း ပါပါးယွမ်က ဘာမှမတုံ့ပြန်ခဲ့လေရာ တဖက်လူက ဂိမ်းပြိုင်ပွဲအထိလာကြည့်လိမ့်မည်ဟုထင်မထားခဲ့မိချေ။

ယခုလေးတင် ထိုးကျနေသည့်စိတ်က ချက်ချင်းပြန်တက်သွားခဲ့ပြီး ယွမ်ယဲ့သိနေပါ့မလားဟု သိချင်စိတ်ဖြစ်သွားခဲ့လေသည်။ ဂိမ်းပြိုင်ပွဲစတင်ချိန်တွင် အစီအစဥ်တင်ဆက်သူကစင်ပေါ်တက်လာပြီး နောက်ဆုံးတွင် ဖိုင်နယ်ပွဲကိုတရားဝင်စတင်ခဲ့လေပြီ။

ကစားပွဲနည်းပြနှင့် အဖွဲ့ဝင်များလည်း စင်ပေါ်ရောက်ရှိလာကြပြီ။ အစီအစဥ်တင်ဆက်သူကတစ်ယောက်ချင်းစီကိုမိတ်ဆက်ပေးလာ၏။ ပထမဆုံးအနေဖြင့် တသင်းစီမှခေါင်းဆောင်များကိုမိတိဆက်ပေးလာသည်။ စလိုက်မီးကယွမ်ယဲ့ကိုထိုးပေးလိုက်သည့်အခါ ပရိသတ်များက အရူးအမူးအော်ဟစ်လာကြပြီး တက်ကြွမှုအပြည့်ဖြင့် လက်ခုပ်သံများက ကပွဲခန်းမ၏ခေါင်မိုးကိုပင်ပွင့်ထွက်သွားစေနိုင်၏။

ယွမ်ယဲ့က စင်အောက်မှပရိသတ်ကိုလက်ပြလိုက်သည်။ ၎င်းကအရပ်ရှည်ပြီးချောမောကာ ဂိမ်းကစားသည့်စွမ်းရည်အဆင့်မှာလည်းထိပ်တန်းဖြစ်နေလေသည်။ ဟာသဉာဏ်ရွှင်ပြီး ပျော်တတ်၏။ ၎င်းသည်ပရိသတ်အများဆုံးပိုင်ဆိုင်ထားပြီး အခြားပရိသတ်များလည်း သူ့အားနှစ်သက်ကြလေသည်။

ဖုယွမ်ကျိုးကလည်း လက်ခုပ်တီးပြီးအားပေးနေခဲ့သည်။ ယွမ်ယဲ့ ယခုလိုမျိုးပရိသတ်များကိုဖျော်ဖြေပြနေခြင်းက အသင့်တော်ဆုံးဟုသူအမြဲထင်ခဲ့သည်။ ယခင်ဘဝက ယွမ်ယဲ့၏ဝမ်းနည်းနေသည့်ပုံစံကို သူမြင်ခဲ့ဖူးသည်။ ယခုတော့ ယွမ်ယဲ့ ဖိုင်နယ်ပွဲစင်မြင့်ထက်တွင် ရပ်နေသည့်ပုံရိပ်ကိုနောက်တကြိမ်ထပ်မြင်ရပြီး သူစိတ်လှုပ်ရှားနေခဲ့၏။

ပါပါးယွမ်ကလည်း ဂိမ်းပြိုင်ပွဲကိုလာကြည့်နေလေရာကြီးမားသောပြောင်းလဲမှုတစ်ခုဖြစ်လာခဲ့ပြီ။ ယွမ်ယဲ့လည်း လက်တွင်ဒဏ်ရာမရနိုင်တော့ပေ။

ယခင်ဘဝက ယွမ်ယဲ့သည်လက်တွင်ဒဏ်ရာရသည့်အကြောင်းအရင်းကို တစ်ခါမှထုတ်မပြောခဲ့ပေ။ သည်ဘဝတွင်တော့ ထိုကံဆိုးမှုကိုသူမဖြစ်ဖြစ်အောင်တားရပေလိမ့်မည်။

အသင်းနှစ်သင်းမှခေါင်းဆောင်များကိုမိတ်ဆက်ပေးပြီးသည့်နောက် စလိုက်မီးက လက်ထောက်ခေါင်းဆောင်ထံရောက်သွားလေသည်။ လက်ထောက်ခေါင်းဆောင်က ယွမ်ယဲ့ဘေးတွင်ရပ်နေပြီး ၎င်းက ယွမ်ယဲ့နှင့်နှစ်အတန်ကြာလက်တွဲလာခဲ့သူဖြစ်ကြောင်း ဖုယွမ်ကျိုးမှတ်မိလိုက်၏၊၊ ထိုသူ၏အမည်မှာ ချန်ကျစ်ဟန်ဖြစ်ကာ သူတို့သုံးယောက်အတူ ထမင်းစားခဲ့ဖူးကြသည်။

ဖုယွမ်ကျိုးက တစ်ယောက်တည်းဂိမ်းကစားလာခြင်းဖြစ်ပြီး ပွဲများတွင်လည်းဝင်ပြိုင်ခဲ့သည်။ ချန်ကျစ်ဟန်၏အရည်အချင်းက ကစားသမားများကြားတွင်ထိပ်တန်းအဆင့်မဟုတ်သော်လည်း နာမည်ကြီး စတားလိုက်အသင်းကိုဝင်နိုင်ခဲ့သည်။ ထိုသူမှာ အစတည်းက ယွမ်ယဲ့နှင့်အတူ ဝင်လာခဲ့ခြင်းဖြစ်လေ၏။

ဖုယွမ်ကျိုးနားလည်ထားချက်အရဆိုလျှင် ချန်ကျစ်ဟန်၏အရည်အချင်းနှင့်သာဆိုလျှင် အတော်လေးခက်ခဲလိမ့်မည်ဆိုသော်လည်း ယွမ်ယဲ့၏အခိုင်အမာထောက်ခံမှုကြောင့် သူကအခွင့်အရေးရသွားခဲ့သည်။ နောက်ပိုင်း ချန်ကျစ်ဟန်ကအသင်းထဲတွင် အရေးပါသူဖြစ်လာပြီး ယွမ်ယဲ့ကမူလက်ဒဏ်ရာကြောင့် နိုင်ငံခြားထွက်သွားခဲ့ရသည်။

ကင်မရာမန်းက ချန်ကျစ်ဟန်ကို အနီးကပ်ရိုက်ပြလာ၏။ တီဗီဖန်သားပြင်ကျယ်တွင် သူကပရိသတ်ကို ချိုသာစွာဖြင့်ပြုံးပြနေပြီး လူတိုင်းကသူ့ကြောင့် နွေဦးလေပြည်လေးတိုက်ခတ်သွားသလိုခံစားလိုက်ရလေသည်။ သို့ရာတွင် စလိုက်မီးကတဖက်အသင်းသားကိုထိုးပြလိုက်သည်နှင့် ၎င်းမျက်နှာပေါ်ရှိအပြုဲးကတမဟုတ်ချင်းပျောက်ကွယ်သွားလေ၏။ သူမျက်နှာထားကမည်းမှောင်နေပြီး ယွမ်ယဲ့ကိုအသာလှမ်းကြည့်လိုက်သည်။

ဖုယွမ်ကျိုးနေရာက မြင်လွယ်သည့်နေရာတွင်ရှိပြီး စင်နှင့်အတော်လေးနီးကပ်သည်။ အလင်းရောင်ကခပ်မှိန်မှိန်သာဆိုသော်လည်း ချန်ကျစ်ဟန်မျက်နှာပေါ်အမူအရာကို သေချာမြင်လိုက်ရပြီး သူချက်ချင်းမျက်မှောင်ကြုတ်လိုက်မိသည်။

သူ့အနေဖြင့် ချန်ကျစ်ဟန်တွင် ယွမ်ယဲ့အပေါ် မကောင်းသည့်ခံစားချက်ရှိနေသလို အမြဲခံစားခဲ့ရသည်။ ယွမ်ယဲ့ရသည့်လက်ခုပ်သံက သူ့ထက်ပိုကျယ်နေ၍လည်းဖြစ်နိုင်သည်။ သူ့တွင်အရည်အချင်းအပြည့်အဝမရှိဘဲ အရန်ကစားသမားနေရာတွင်သာ ကစားနိုင်သည်မှာမဆန်းတော့ပေ။ လူအများက သူ့ထက်ယွမ်ယဲ့ကိုပိုပြီးစိတ်ဝင်စားကြသည်။

ချန်ကျစ်ဟန်က ယွမ်ယဲ့ကိုမျက်နှာသေဖြင့်ကြည့်နေခဲ့သည့်တိုင် ယွမ်ယဲ့သူ့ကိုစကားပြောလာသည့်အခါ သူ၏မျက်နှာထားက ချက်ချင်းပြောင်းလဲသွားပြီး ပြုံးပြလိုက်လေသည်။

သူ၏မျက်နှာထားပြောင်းလဲမှုမှာ မြန်လွန်းလှသောကြောင့် ဖုယွမ်ကျိုးသာသတိထားမိလိုက်သည်။ အနှီသူ၏ထိုမျက်နှာကိုမြင်လေ ဖုယွမ်ကျိုးမှာမကောင်းသည့်ခံစားချက်ရလာလေပင်။

ယခင်ဘဝက သူနှင့်ချန်ကျစ်ဟန်တို့ညစာစားခဲ့ကြသည့်အကြောင်းကို ပြန်သတိရမိသည်။ ထိုအချိန်က သူသည် ထိုပုဂ္ဂိုလ်ကိုအတော်လေးသဘောမကျခဲ့ပေ။ ၎င်းကထမင်းစားနေသည့်အတောအတွင်း စိတ်မပါလက်မပါဖြစ်နေပြီး မန်နေဂျာကခေါ်လိုက်မှ တက်ကြွစွာဖြင့်စကားပြန်လေသည်။

ယွမ်ယဲ့ကစိတ်ထဲမထားသည့်တိုင် ဖုယွမ်ကျိုးကမူ တေးမှတ်ထားလေသည်။ အခုတော့ သူ ချန်ကျစ်ဟန်၏မျက်နှာနှစ်ဖက်ကိုမြင်တွေ့ရပြီဖြစ်၍ ပို၍ပင်အော်ဂလီဆန်လာမိသည်။

သူ့အနောက်တွင် ထောက်တိုင်အကြီးစားတစ်ခုရှိနေသည်မှာသေချာ၏။ ယွမ်ယဲ့ကြောင့်သာမဟုတ်လျှင် ၎င်းကဖိုင်နယ်အထိရောက်လာပြီး စတားလိုက်အသင်းတွင်စာချုပ်ချုပ်နိုင်မည်မဟုတ်။ သို့တစေ ချန်ကျစ်ဟန်ကမူ ကျေးဇူးတင်ရကောင်းမှန်းမသိသည့်အပြင် ယွမ်ယဲ့ကိုပါမနာလိုဖြစ်နေလေသည်။

မနာလိုဖြစ်နေတယ်။

သူ့နှလုံးသား ရင်ဘတ်ထဲမှခုန်ထွက်လာတော့မလိုပင်။ ယွမ်ယဲ့တစ်ယောက် လက်ဒဏ်ရာရစဥ်က နှုတ်ဆိတ်နေခဲ့ရသည့်အကြောင်းအရင်းကိုသတိရသွားမိသည်၊၊ သူ့စိတ်ထဲမှ ချန်ကျစ်ဟန်၏ယွမ်ယဲ့အပေါ် အဆိုးမြင်သဘောထားရှိနေပုံမှာ ပို၍ပိုကာထိတ်လန့်စရာကောင်းလာနေပြီး တုန်လှုပ်ဖွယ်ရာမှန်းဆချက်တစ်ခုကိုပေါ်လာစေခဲ့သည်။

ဖုယွမ်ကျိုးသည် ယွမ်ယဲ့က ခင်မင်မှု၏အရေးပါပုံအပေါ် အစွဲအလန်းကြီးတတ်မှန်းသိထားခဲ့သည့်တိုင် အသူထံတွင် သူငယ်ချင်းသိပ်မရှိခဲ့ပေ။ သူသည်ကား သူငယ်ချင်းများအပေါ်ကာကွယ်ပေးတတ်ပြီး ယခင်ဘဝက ဖုယွမ်ကျိုးမှာ တဖြည်းဖြည်းရုန့်ရင်းကြမ်းတမ်းခဲ့သည့်တိုင် ယွမ်ယဲ့ကသူ့အား တစ်ခါမှစိတ်မဆိုးခဲ့ပေ။

ယွမ်ယဲ့က လက်ရှိပါတနာကို အမြဲဂရုစိုက်ပေးခဲ့သည်။ မူလက စတားလိုက်အသင်းက သူ့ကိုစာချုပ်ချုပ်စေချင်ခဲ့သည်။ ချန်ကျစ်ဟန်လိုလူမျိုးက ဆက်နေပါစေ ထွက်သွားပါစေ အရေးမကြီးပေ။ သို့ထိတိုင် သူ၏လုပ်ကိုင်ပုံကြောင့် အသင်းကသူ့ကိုလက်ခံပေးခဲ့ကြသည်။

ကြည့်ရတာ ဒီချန်ကျစ်ဟန်က....

ဖုယွမ်ကျိုးသည်ကား စိတ်ထဲတွင်ယားကျိကျိဖြစ်လာလေပြီး စင်ပေါ်ကချန်ကျစ်ဟန်ကိုလှမ်းကြည့်လိုက်မိသည်။ အေးချမ်းနူးညံ့သည့်ပုံစံကိုမငြင်းနိုင်သည့်တိုင် ယခုတော့ ထိုသူကိုဘယ်လောက်ပင်ကြည့်ပါစေ အယုတ်တမာပုံစံသာပေါ်လာလေသည်။

သူငြိမ်ငြိမ်ထိုင်မနေနိုင်တော့ပေ။ အကြောင်းပြကာ သန့်စင်ခန်းကိုလစ်ထွက်လာလိုက်သည်၊၊ ထို့နောက်ဖုန်းထဲမှတဆင့် ချန်ကျစ်ဟန်၏အမည်အစစ်နှင့်အမည်ဝှက်ကိုရိုက်ရှာကြည့်လိုက်ပြီး သူတွေ့လိုက်ရသည့်အရာကြောင့် မျက်လုံးပြူးသွားခဲ့ရလေသည်။

♎️

Prev Next