MM Story Teller

Chapter 50

Viewers 4k

👻Chapter 50

အေးခဲပြီး သေသွားရခြင်း (5)

ကျင်းထျန်းယိက သဲလွန်စစာရွက်ကို ယူလိုက်ပြီး ကျေးဇူးတင်စကားပြောလိုက်ကာ စင်ပေါ်မှ ဆင်းသွားသည်။ သူက ဓါတ်လှေကားဆီ လျှောက်သွားလိုက်ရင်း တံခါးပွင့်သွားသည့်အချိန် ချူဟွိုက်ကို တွေ့လိုက်ရသည်။

ချူဟွိုက်က မျက်ခုံးပင့်လိုက်ပြီး အပြုံးလေးနှင့် ကြည့်လာသည် " အရာရှိကြီး...."

"အရာရှိကြီး...."ဆိုသည့် စကားလုံးက စုန့်မင်းဆက်အစောပိုင်းရှိ ရှန့်ကုန်း(သခင်ကြီး)ဆိုသည့်စကားလုံးနှင့် အတူတူဖြစ်သည်။ သို့သော်လည်း နောက်ပိုင်းတွင် အခြားအဓိပ္ပါယ်များပါ ပေါင်းစပ်ပါဝင်လာသည်။ ချူဟွိုက်က အဓိပ္ပါယ်ကို သိသော်လည်း ကျင်းထျန်းယိကို မစပဲ မနေနိုင်ချေ။

ကျင်းထျန်းယိက ဟန်ဆောင်ပြောနေမှန်း သိ၍ ရယ်မိသွားရင်း သူ့ဆီမှ အကြည့်ခွာကာ အရှက်မရှိသလို ပြောလာသည် " သခင်မကြီးခင်ဗျာ...."

ချူဟွိုက်က ချောင်းတဟွတ်ဟွတ်ဆိုးလိုက်ရင်း စာရွက်ခေါက်ကို လက်လှမ်းပြီး တောင်းလိုက်သည် "ကျွန်မကို ပေး...."

"ဘာလဲ....မင်းက အချစ်သင်္ကေတလေးကို သိမ်းပိုက်ချင်တယ်ပေါ့...."

ကျင်းထျန်းယိက ထိုစကားပြောလိုက်သော်လည်း ချူဟွိုက်လက်ထဲသို့ စာရွက်ခေါက်လေးကို နာနာခံခံ ပေးလာသည်။

လော့ဇီယန်ရှိနေသေးမှန်း တွေ့လိုက်၍ သူက မေးလိုက်သည် " မင်းဘာလို့ စင်ပေါ် မတက်သေးတာလဲ...."

လော့ဇီယန်က လက်ကိုပွတ်ပြီး ရိုးရိုးသားသား ပြန်ဖြေလာသည် " ကျွန်တော် ကြောက်နေလို့...."

ကျင်းထျန်းယိက တိုက်ပွဲကို ဦးဆောင်နေ၍ သူ့အခြေအနေက မှိုင်းညှို့နေလျှင် ရှက်စရာကောင်းလိမ့်မည်ဟု တွေးမိသည်။ ဒါက ယောကျ်ားတစ်ယောက်ရဲ့ ဂုဏ်သိက္ခာနဲ့ ဆိုင်နေတယ်....

ကျင်းထျန်းယိက သူ့ပုခုံးကို ပုတ်လိုက်ရင်း စိတ်ခွန်အားပေးလာသည်

" မင်းလုပ်နိုင်ပါတယ်....သရဲတစ်ကောင် ခေါ်လာခဲ့....ငါလည်း ဖြစ်ရပ်ထဲမှာ သရဲဧည့်သည်ရဲ့ အခန်းကဏ္ဍကို သိချင်မိတယ်...."

လော့ဇီယန်က စိတ်ကို စုစည်းပြီး မတ်တပ်ရပ်လိုက်ကာ အလေးပြုလာရင်း အပြုံးလေးနှင့် စကားဆိုလာသည်

" တာဝန်ကို ကျေပွန်အောင် ဆောင်ရွက်ခဲ့ပါ့မယ်...." သူက စိတ်ငြိမ်သွားရန် အသက်ပြင်းပြင်းရှူလိုက်ပြီး ဓါတ်လှေကားထဲသို့ ယုံကြည်ချက်အပြည့်ရှိနေသည့် ပုံစံနှင့် ဝင်သွားလေသည်။

"နေဦး...." ချူဟွိုက်က ရုတ်တရက် စကားဆိုလာသော်လည်း သူ့စကားမဆုံးခင် ဓါတ်လှေကားတံခါးက ပိတ်သွားလေသည်။

ကျင်းထျန်းယိ " ဘာကိစ္စရှိလို့လဲ...."

ချူဟွိုက်က သူ့ကို လက်ယမ်းပြလာ၍ ကျင်းထျန်းယိက လျှောက်သွားလိုက်စဥ် ချူဟွိုက်က စကားဆိုမလာပဲ သူရထားသည့် စာရွက်ခေါက်ကိုထုတ်ပြီး ကျင်းထျန်းယိလက်ထဲ ထည့်ပေးလာသည်။ ကျင်းထျန်းယိက ခေါင်းအသာငုံ့လိုက်ရင်း သူ၏ ရှည်မျောမျာ လက်ချောင်းများနှင့် စာရွက်ကို ဖွင့်ဖတ်ကြည့်သည်။ သူက မြင်ကွင်းတွင် ပေါ်လာသော စကားစု ၂၅ခုကို ကြည့်လိုက်ရင်း သင်္ကာမကင်းသည့် မျက်လုံးများ ပြလာသည်

" ပြဿနာ ရှိလို့လား...."

ချူဟွိုက်က အံ့သြသွားရင်း ရှင်းပြလာသည် " ဒါက ရှင့်စာရွက် မဟုတ်ဘူး....ရှင့်စာရွက်က ကျွန်မဆီမှာ ရှိတယ်...ရှင်ကိုင်ထားတာက ကျွန်မစာရွက်...."

ကျင်းထျန်းယိ၏ မျက်လုံးအစုံ အေးခဲသွားရသည်။ သူနှင့် ချူဟွိုက်ရထားသည့် စာရွက်တွင် ပါရှိသည့် အကြောင်းအရာက ပုံနှိပ်စက်မှ ထွက်လာသည့်အတိုင်း အတူတူဖြစ်နေသည်။

ချူဟွိုက် " စုစုပေါင်း စကားစု ၂၅ခု ရှိတယ်...တစ်ခုချင်းစီမှာ ဘာဆက်စပ်ချက်မှ မရှိဘူး....စကားလုံးတွေကို သပ်သပ်ရပ်ရပ် စီစဥ်ထားတယ်....တစ်တန်းမှာ အပိုဒ်ငါးခုစီ စုစုပေါင်း အတန်းငါးတန်းရှိတယ်....ကျွန်မထင်တာကတော့ သဲလွန်စက ဖေးဟွားလင် [တရုတ်ရိုးရာ ကဗျာစပ်သည့် ကစားနည်း]လိုမျိုး မြုပ်ထားတာ ဖြစ်လိမ့်မယ်....စကားလုံးတွေကို စည်းမျဥ်းတစ်ခုထားပြီး ဆက်စပ်ကြည့်မှ သဲလွန်စကို ရတာမျိုးလေ....ဒါပေမယ့် အဓိပ္ပါယ်ဖော်ကြည့်လို့လည်း မရဘူး...."

ချူဟွိုက်က ပြုံးပြလာသည် " ဒါကြောင့်...ကျွန်မတို့ ထပ်ပြီး အလှည့်စားခံရနိုင်တယ်...စစချင်းတုန်းက ကျွန်မက ပရောဂျက်တစ်ခုနှစ်ခုအတွက် အစဖော်နိုင်မယ့်အရာ ရခဲ့ပြီလို့ ထင်ခဲ့ပေမယ့် ကြည့်ရတာ ပရောဂျက်အားလုံးအတွက်ဆို စကားစုတစ်ခုစီက ပရောဂျက်တစ်ခုကို ကိုယ်စားပြုနေတာနဲ့တူတယ်...."

ကျင်းထျန်းယိက အပြုံးလေးနှင့် မေးလာသည်

" သဲလွန်စ၂၅ခုအတွက်ဆို ပူးတွဲလုပ်ရမယ့် အစီအစဥ် ဘယ်နှစ်ခုလောက် ရှိနေမလဲ...."

ချူဟွိုက်က သူ နားလည်သွားပြီမှန်း သိလိုက်၍ စနောက်လာသည်

" ပရောဂျက်အရေအတွက်က အရေးမကြီးဘူး.....အရေးကြီးတဲ့ အရာက ရှင်သာ တစ်ခုမှားရွေးမိရင် ရှုံးသွားနိုင်ပြီးတော့ ဖြစ်နိုင်ချေက ၂၅ခုမှာ ၁ခုပဲ ရှိတော့တယ်...."

ကျင်းထျန်းယိက စာရွက်လေးကို တိတ်တဆိတ် ခေါက်လိုက်ပြီး ချူဟွိုက်တွင် အိပ်ကပ်မရှိ၍ ချူဟွိုက်၏ စာရွက်ကိုပါ သိမ်းထားပေးလိုက်သည်။

" တကယ်တော့ ကျွန်မမှာ အကြံမရှိတာတော့ မဟုတ်ပါဘူး...." ချူဟွိုက်က လော့ဇီယန်၏ ပထမဆုံး VCRကို ကြည့်နေရင်း ဆိုလာသည်

" ပထမဆုံးအနေနဲ့ စကားစုသုံးခုကို ခေါင်းစဥ်နှစ်ခုအဖြစ် အကြမ်းဖျင်း ခွဲထားလို့ရတယ်...ခေါင်းစဥ်တစ်ခုက စုံတွဲနဲ့ဆိုင်တာပေါ့....'ငါ့ကို ချစ်တယ်လို့ ပြောပါ....' တို့ ' အနမ်း...'တို့ ဘာတို့ပေါ့.... ဒါဆို စာလုံးကျုံ့သွားပြီ ... သေချာပေါက် ဒါက အစမ်းခန့်မှန်းကြည့်ရုံပါပဲ...."

“ရှင်လည်း အဲ့ဒါကို တွေ့မှာပဲလေ....."

"ဒမ်မိုကလစ်ရဲ့ ဓါးသွားရယ်....ပြန်လှည့်မကြည့်နဲ့ ဆိုတာရယ် အဲ့ဒီစကားစုတွေကတော့ ဂရိဒဏ္ဍာရီတွေနဲ့ တစ်ခုခု ဆက်စပ်နေမယ်လို့ ထင်တယ်....ပြီးတော့ တစ်ချို့စာလုံးတွေမှာ နတ်သမီးပုံပြင်နဲ့ ဆိုင်တာလည်း ပါတယ်...ကစားကွင်းမှာ ဆက်တိုက်လုပ်ရမယ့် ပရောဂျက်တွေ ရှိနိုင်တယ်...."

ချူဟွိုက်က လက်တစ်ဖက် ကိုက်ပြီး ဆက်ပြောရန် ပြင်လိုက်စဥ် ပိတ်ကားထက်မှ မီးပိတ်သံများ ထွက်လာပြီး မြင်ကွင်းကလည်း သူ့ထက်ပိုပြီး ခမ်းနားနေသည်။

ချူဟွိုက်က အံ့သြတကြီး ရယ်လိုက်မိပြီး ကျင်းထျန်းယိကလည်း မော့ကြည့်လာသည်။

VCRထဲတွင် လော့ဇီယန်က သူ့၏ အိမ်ထောင်စုစာရင်းကို ပြောပြနေပြီး သူ့မျိုးရိုး၏ ကြီးမြတ်ပုံနှင့် ဘုရင်လော့ပင်း၏ မျိုးဆက်ဖြစ်ကြောင်း စိတ်လှုပ်ရှားစွာ ပြောနေသည်။

ချူဟွိုက်နှင့် ကျင်းထျန်းယိတို့ တစ်ယောက်ကိုတစ်ယောက် ကြည့်လိုက်မိသည်

" ....ဒါကြောင့် သူက တစ်ကိုယ်တည်းသမား ဖြစ်နေရတာပဲ...."

လော့ဇီယန်က တစ်ယောက်ပြီးတစ်ယောက် မီးပိတ်ကုန်ကြသည်ကို စင်ပေါ်က ကြည့်နေရင်း သူ့မျက်လုံးက မယုံနိုင်သည့်ပုံစံနှင့် ပြူးကျယ်လာရသည်။

ချူဟွိုက် ကြားလိုက်သည့်အတိုင်းဆိုလျှင် လော့ဇီယန်က ကမ္ဘာအစစ်တွင် သရုပ်ဆောင်တစ်ယောက် ဖြစ်သော်လည်း သူ့စကားပြောပုံအရ အရမ်းကြီး နာမည်ကြီးသည့်အထဲက မဟုတ်လောက်ပေ။

သရဲဒါရိုက်တာကြီးက ဆက်မကြည့်နိုင်တော့၍ထင် VCRက တိခနဲ ရပ်သွားသည်။ မီးနှစ်ခုသာ ကျန်နေသည်။ နံပတ်၂၃နှင့် နံပတ်၂၄.....

၂၄နေရာရှိ ယဲ့ယွမ်က သူ့အတွက် မီးချန်ပေးထားခဲ့သည်။

ကင်မရာက နံပတ်၂၃ဆီ ထိုးပြလာသည်။ နံပတ်၂၃က ကျပ်တိုက်ထားသလို မည်းတူးနေသည့် အသားအရေနှင့် သရဲမတစ်ယောက် ဖြစ်နေသည်။ သူမရုပ်ရည်က သာမန်ဆန်သော်လည်း သူမလက်ထဲရှိ ကလေးက ကြောက်စရာကောင်းလှသည်။ ကလေးဟု ပြောရမည်ထက် ၁လပင် မပြည့်သေးသည့် သန္ဓေသားနှင့် ပိုတူနေသည်။ ကလေးသရဲလေးက စင်တီမီတာ ၃၀ ၄၀လောက်သာ ရှိသေးသော်လည်း မတ်တပ်ရပ်နိုင်နေသည်။ သူ၏ လက်ချောင်းခြေချောင်းလေးများက ဖောက်ထွင်းမြင်နေရပြီး ကောင်းကောင်း မဖွံ့ဖြိုးသေးချေ။ သူ၏ ဦးခေါင်းက ကြီးမားလှကာ မျက်လုံးများကလည်း အေးစက်ပြီး တိမ်ထူနေသည်။

တင်ဆက်သူက သူမအား လော့ဇီယန်အတွက် မီးဖွင့်ပေးထားသည့် အကြောင်းရင်းကို မေးလိုက်ချိန် သူမဘေးရှိ နံပတ်၂၂ သရဲက ကြားဝင်ပြီး အသံဆိုးကြီးနှင့် ပြောလာသည် " သူမက သူမနဲ့ သူ့ကလေးကို တာဝန်ယူပေးမယ့် တစ်ယောက်ကို ရှာချင်နေတာလေ...."

သရဲမက စိတ်ဆိုးသွားပြီး အေးစက်စက် ပြောလာသည် " အစ်ကိုယဲ့ယွမ်(နံပတ်၂၄)က ရှင် မျက်နှာပန်းမလှမှာ စိုးလို့ ကျွန်မကို မီးချန်ထားပေးဖို့ ပြောခဲ့တာ...အခု ရှင်သိသွားပြီဆိုတော့ ကျွန်မလည်း မီးပိတ်ဖို့ကလွဲ ရွေးစရာမရှိတော့ဘူး...."

သူမက ပြောပြီးသွားသည်နှင့် ယဲ့ယွမ်ကို တောင်းပန်သလို ကြည့်လိုက်ပြီး "ကလစ်" ဆို မီးပိတ်သွားသည်။

စင်နောက်က ချူဟွိုက်နှင့် ကျင်းထျန်းယိ "....."

ပရိသတ်ဘက်ကလည်း မည်းမှောင်နေပြီး ယဲ့ယွမ်တစ်ယောက်တည်း မီးဖွင့်ထား၍ သရဲမျက်လုံး၂၃စုံက သူ့ကို ကြည့်နေကြသည်။

ယဲ့ယွမ်က လော့ဇီယန်ကို နှစ်တော်တော်ကြာ မမြင်လိုက်သည်နှင့် အရမ်းတုံးနေလိမ့်မည်ဟု မထင်ထားခဲ့ချေ။ ယင်းက ရှက်စရာကောင်းလှသည်။ သူက အံတင်းတင်းကြိတ်ပြီး ပြောလာသည်

" ငါ့ကို မကြည့်ကြနဲ့....ငါက စကားပြောချင်ရုံပဲ...."

လော့ဇီယန်က ခေါင်းငုံ့ထားသော်လည်း ထိုစကားကြားသောအခါ မျင်လုံးပင့်ကြည့်လာသည်။

ကင်အရာက ယဲ့ယွမ်ကို ညွှန်ပြလာချိန် သူက စိတ်အေးသွားသလို သက်ပြင်းချလိုက်ပြီး ရှက်ကိုးရှက်ကန်း ပြောလာသည် " ကျွန်တော်က တစ်ယောက်တည်း နေရတာကို ကြောက်တယ်....တိတ်တိတ်ဆိတ်ဆိတ်လည်း မနေနိုင်ဘူး....သူက စကားပြောရတာ သဘောကျတယ် ဆိုရင် ကျွန်တော်လည်း သက်တောင့်သက်တာ ရှိတာပေါ့....."

လော့ဇီယန်က စိတ်လှုပ်ရှားသလို အမူအရာနှင့် မိုက်ကရိုဖုန်းကို ကိုင်လာသည် " အစ်ကိုကြီး...အစ်ကိုကြီးမှာ တကယ် အမြင်ကောင်းကောင်းရှိတာပဲ...."

ယဲ့ယွမ် "........"

VCR၏ ဒုတိယအပိုင်းဖြစ်သည့် ခံစားချက် အတွေ့အကြုံကို စတင်ထုတ်လွှင့်တော့မည် ဖြစ်၍ သူ၏ အပြစ်ရှိသလို ခံစားချက်က မျက်နှာထက် အထင်းသားပေါ်နေသည်။ သူက ပထမဆုံးအပိုင်းကို ကောင်းကောင်း အပြီးသတ်ပြီးသည်နှင့် ဒုတိယအပိုင်းအတွက် ပြင်ဆင်နိုင်မည်ဟု တွေးထားခဲ့သော်လည်း ယခုတွင်ဖြင့်...

ချူဟွိုက်က "ကာလတို ဆက်ဆံရေးပေါင်းများစွာထက်သာလွန်၍...." ဆိုသည့် စကားစုကို ကြားဖူး၍ ကျင်းထျန်းယိကို ကြည့်လာသည် " ဒီကလေးက ဘာလို့ တအား ရိုးသားရတာလဲ...."

ကျင်းထျန်းယိက အပြုံးလေးနှင့် မေးလာသည် " မင်းက အဲ့လိုပြောတယ်ဆိုတော့ VCRမှာ မင်းလိမ်ခဲ့တယ်ဆိုတာ သွယ်ဝိုက်ပြီးတော့ ဝန်ခံနေတာပဲ မဟုတ်လား...."

ချူဟွိုက်က သူ အရမ်းသိနေမည်ဟု ထင်မထား၍ ဖုံးကွယ်မနေတော့ချေ။

သူက မျက်ခုံးပင့်ပြီး မေးလာသည် " ရှင်ရော မဟုတ်လို့လား...."

“တစ်ချို့တစ်လေလောက်ပါ...." ကျင်းထျန်းယိက စကားရပ်သွားပြီး အောက်စိုက်ကြည့်နေရင်း ဖြေလာသည် " ဒါပေမယ့် စာကြောင်းတစ်ခုကတော့ မှန်ပါတယ်...."

“ဘယ်စာကြောင်းလဲ..." ချူဟွိုက်က ပြန်စဥ်းစားနေစဥ် ကျင်းထျန်းယိက မျက်နှာလှည့်လာပြီး တည့်တည့်ကြည့်လာ၍ သူ့မျက်လုံးထက် သေချာနေသော အရိပ်အရောင်တို့ ထင်ဟပ်နေသည် " ကိုယ်ချစ်တဲ့သူနဲ့ပဲ အတူတူရှိချင်တာ ဆိုတာလေ...."

ချူဟွိုက်က ခေါင်းလှည့်လိုက်ပြီး သူ့အတွက်သူ ရယ်လိုက်မိသည်။ ပုံရိပ်ယောင်ခံစားချက်များ ပြင်းထန်နေ၍ မကောင်းတော့ပေ။ ကျင်းထျန်းယိက သူ့ကို မဟုတ်ပဲ ချူကျောင်းကို ချစ်စကားပြောနေခြင်းပင်။ သူ့မှာ အသိစိတ်ရှိပါသေးသည်...။

သူက သူ....ချူကျောင်းက ချူကျောင်း....

လော့ဇီယန်က မျှော်လင့်ချက် မထားတော့သော်လည်း ဒုတိယပိုင်းပြီးသည်ထိ မီးလင်းနေဆဲဖြစ်ပြီး ယဲ့ယွမ်၏ ထည်ဝါလှသော မျက်နှာက မီးရောင်အောက်တွင် တစ်မျိုးလှပနေသည်။

ချူဟွိုက်က ယဲ့ယွမ်ကို တစ်ခဏကြာအောင် စိုက်ကြည့်လိုက်ပြီး မျက်မှောင်ကြုတ်မိသွားသည်။ လော့ဇီယန်ကို ယဲ့ယွမ်ကြည့်နေသည့်ပုံစံက သတိမထားမိပဲ မနေချေ။ သူက လော့ဇီယန်ကို သိနေတာလား....

တင်ဆက်သူ " အခုက ကျွန်မတို့ ပြိုင်ပွဲဝင်ရဲ့ ရွေးချယ်မှုကို ကြေညာပေးမှာပါ...."

ယဲ့ယွမ်က လော့ဇီယန် ရွေးထားသည့် သရဲမကို သိချင်မိသော်လည်း "နံပတ်၂၄" ဟု ကြားလိုက်၍ တစ်ဒင်္ဂစာ တောင့်ခဲသွားရသည်။

သူ့နှုတ်ခမ်းထောင့်များ ကွေးညွတ်မလာခင် လော့ဇီယန်က ရှက်ကိုးရှက်ကန်း ပြုံးပြလာသည် " အစ်ကိုကြီး....ကျွန်တော်က ကြုံရာရွေးလိုက်တာပါ...အစ်ကိုကြီးက ကြည့်ကောင်းလို့လေ...."

ယဲ့ယွမ်၏ နာဖူးကြောများ တွန့်လိမ်သွားရသည်။

သူက အထက်တန်းကျောင်းသားလေးလိုမျိုး တီရှပ်အဖြူနှင့် ဘောင်းဘီအနက်ကို ဝတ်ဆင်ထားရင်း နူးနူးညံ့ညံ့မျက်နှာနှင့် အသားရေလည်း ကောင်းမွန်လှသည်။

စင်ပေါ်က လော့ဇီယန်က အားကြိုးမာန်တက် ခေါ်လာသည် " လာပါ....လာပါ...."

ယဲ့ယွမ်က အံ့သြသွားပြီး သူ့မျက်နှာတွင် အမည်းကြောင်းတို့ ပြည့်နေသည်။ သူက လော့ဇီယန်က အနည်းငယ် တိုးတက်လာနိုင်သည်ဟု တွေးမိသော်လည်း ယခုပုံစံကို ကြည့်ခြင်းဖြင့် သူ မပြောင်းလဲသေးမှန်း သိလိုက်ရသည်။

ယဲ့ယွမ် " တစ်ခါတုန်းက လူနှစ်ယောက်က ကိစ္စရှိလို့ တောထဲက တဲအိမ်တစ်ခုဆီ ပြေးသွားကြတယ်...သူတို့က တဲထဲမှာ သရဲရှိနေမှန်း မသိခဲ့ကြဘူး....အဲ့ဒီသရဲက သူ့နာမည်အခေါ်ခံရတဲ့အချိန်မှသာ လူသတ်တာ ဖြစ်တယ်....ဒါပေမယ့် အမျိုးသမီးက အဆုံးမှာ သေသွားခဲ့တယ်...အဲ့ဒါ ဘာကြောင့်လဲ..."

စင်ပေါ်က လော့ဇီယန်က စိတ်ရှုပ်သွားသည့် မျက်နှာနှင့် တွေဝေသွားပုံရသည်။

ချူဟွိုက်က တစ်စက္ကန့်မျှ အံ့သြသွားပြီး ထူးဆန်းသလို ကြည့်လာ၍ သူ့ပုံစံက သိသာနေသည်။

ကျင်းထျန်းယိက အပြုံးလေးနှင့် မေးလိုက်သည် " မင်း အဖြေကို သိတာလား...."

ချူဟွိုက်က ခေါင်းတဆတ်ဆတ် ငြိမ့်ပြလာပြီး မလိမ့်တပတ်လုပ်ရန် ဆုံးဖြတ်လိုက်သည်။ သူ၏ လက်ချောင်းသွယ်သွယ်လေးများက ကျင်းထျန်းယိ၏ ရင်ဘတ်ပေါ် စောင်းတင်လာ၍ ကျင်းထျန်းယိက ထူးဆန်းသလို ခံစားမိပြီး သူ့လက်ကို ဆွဲယူလိုက်စဥ် ချူဟွိုက်က မြူဆွယ်သည့် အသံနှင့် ပြောလာသည်

"လူယုတ်မာကြီး...."

သူက ထိုအခါမှသာ လက်ရပ်သွားရင်း ဗိုက်နာသည်ထိ ရယ်နေမိသည်။

ထိုသရဲက "sexသရဲ"ဟု ခေါ်ပြီး ထိုအမျိုးသမီးက အမျိုးသားနှင့် အီနေသည့်အချိန် ထိုနာမည်(လူယုတ်မာကြီး)ကို ခေါ်မိသွား၍ သေသွားခြင်းဖြစ်၏။

ကျင်းထျန်းယိက သူ့ကို ကြည့်လာပြီး ချစ်ရည်ရွှမ်းသည့် အပြုံးနှင့် ပြုံးပြလာသည်။

စင်ပေါ်က လော့ဇီယန်နှင့် ယဲ့ယွမ်တို့၏ မျက်လုံးကြီးကြီးနှင့် မျက်လုံးသေးသေးတို့က အချိန်အတော်ကြာအောင် စိုက်ကြည့်နေကြပြီး ယဲ့ယွမ်က စိတ်မရှည်သလို သွားယားနေပြီ ဖြစ်သည်။

မင်းဖြေချင်တာ ဖြေလိုက်လို့ ရတယ်...

တင်ဆက်သူ " အချိန် ပြည့်တော့မှာ....."

"မလုပ်နဲ့ မလုပ်နဲ့ မလုပ်နဲ့...." လော့ဇီယန်က စိုးရိမ်တကြီး ပြောလာပြီး ပြန်ဖြေလာသည် " ဘာလို့လဲဆိုတော့ အမျိုးသမီးက သရဲတွေ့လိုက်လို့ 'သရဲ' လို့ အော်လိုက်တယ်....ပြီးတော့ အဲ့ဒီသရဲကလည်း သရဲလို့ ခေါ်တယ်လေ...."

လော့ဇီယန်က ပြောပြီးသည်နှင့် သူ့ကိုယ်သူ ဥာဏ်ကောင်းလှပြီး သူ့အဖြေကလည်း ကျိုးကြောင်းသင့်နေသလို ခံစားရသည်။

သူက ယဲ့ယွမ်ကို မျှော်လင့်သည့် အကြည့်လေးနှင့် ကြည့်လာသည်။ ယဲ့ယွမ်က သူ့အိုင်ကျူနှင့် ပတ်သတ်ပြီး ကူကယ်ရာမဲ့သလို ခံစားရသည်။ သူက အံ့သြနေသည့် မျက်နှာနှင့် တင်ဆက်သူဘက် ခေါင်းလှည့်ကြည့်လိုက်၏ " မမ...သူက အဖြေမှန်ရသွားတာပဲ....ဥာဏ်ကောင်းလိုက်တာ..."

တင်ဆက်သူ"...." ယဲ့ယွမ်...မင်းဘာလို့ အရမ်း စော်ကားသလို ပြောရတာလဲ....

ချူဟွိုက်နှင့် ကျင်းထျန်းယိ "....." အစ်ကိုကြီး ဘာတွေများ ကြုံခဲ့ရလို့လဲ...

လော့ဇီယန်က ပေါင်ကို ပုတ်လိုက်ရင်း တုန်လှုပ်နေသည့် မျက်နှာအမူအရာ ဖြစ်နေသည်။

ယဲ့ယွမ်က နူးနူးညံ့ညံ့ မေးလာသည် " ကျွန်တော် မေးချင်တာ ကုန်ပြီဆိုတော့ မမ...သူနဲ့လိုက်သွားလို့ရမလား...."

တင်ဆက်သူ " လက်တွဲတာ အောင်မြင်သွားတဲ့အတွက် ပြိုင်ပွဲဝင်က နံပတ်၂၄သရဲကို ကစားကွင်းဆီ ခေါ်သွားဖို့ ဆန္ဒရှိပါသလား...."

ယဲ့ယွမ်က လော့ဇီယန်ကို လျှို့ဝှက်သည့် အကြည့်နှင့် ကြည့်နေသည်။ ငါ့ကို ခေါ်မသွားရင် မင်းတော့ အဆုံးသတ်ပြီပဲ....

လော့ဇီယန်က ရေဒီယိုလှိုင်းက အသံများကို မကြားရချေ။ သူက ကျင်းထျန်းယိမှာလိုက်သည်ကိုသာ စိတ်ထဲစွဲနေသည်။ ကျင်းထျန်းယိက ဖြစ်ရပ်တွင် သရဲတစ်ယောက်၏ ကဏ္ဍကို သိချင်၍ အိမ်ခေါ်ခဲ့ရန် မှာကြားခဲ့သည်။

“ဟုတ်....ကျွန်တော် ခေါ်သွားမှာပါ...."

သူက အမြန်ဖြေလိုက်သည်။ ယဲ့ယွမ်၏ နှုတ်ခမ်းထောင့်လေးများ ထိန်းထားမနိုင်ပဲ မြောက်တက်သွားသည်။ အနည်းဆုံးတော့ မင်းမှာ အသိဥာဏ်ရှိသေးသားပဲ.....

ကျင်းထျန်းယိနှင့် ချူဟွိုက်တို့ကို ပြချင်သည့်စိတ်လောနေ၍ လော့ဇီယန်က ယဲ့ယွမ်လက်ကို ပျော်ပျော်ရွှင်ရွှင် ဆွဲယူလာသည်။

ယဲ့ယွမ်၏ မျက်နှာအမူအရာက တစ်ခဏမျှ ရှုပ်ထွေးသွားရသည်။

" မင်းလက်တွေက ဘာလို့ အရမ်း အေးစက်နေရတာလဲ...." လော့ဇီယန်က ရေခဲတုံးကြီး ကိုင်ထားရသလို ခံစားမိ၍ ချက်ချင်း အေးခဲသွားကာ တုန်ယင်လာရသည်။

ယဲ့ယွမ်က သဘောကျရယ်မောလာသည် " ဘာလို့လဲဆိုတော့ ငါက အေးခဲပြီး သေသွားရလို့လေ...."

လော့ဇီယန်က လွှတ်ပေးမဘဲ ပြောလာသည် " အဲ့ဒါဆိုလည်း မင်းနွေးသွားအောင် ငါလုပ်ပေးမယ်...."

ယဲ့ယွမ်က နာနာခံခံလေး ပြုံးပြလိုက်၏

" ကျေးဇူးပါ....အစ်ကိုလော့...."

ချူဟွိုက် "......"

သူက ကျင်းထျန်းယိဘက် လှည့်ကြည့်လိုက်သည် "ကျွန်မ မကောင်းတဲ့ ခံစားချက်ကြီး ရနေတယ်...."

ကျင်းထျန်းယိ " တိုက်တိုက်ဆိုင်ဆိုင် ကိုယ်ရောပဲ...."

လော့ဇီယန်က ယဲ့ယွမ်ကို စင်ပေါ်မှ ဆွဲခေါ်လာခဲ့သည်။

👻

Prev Next