Chapter 179

🌱Arc 5 - [ဖျော်ဖြေရေးနယ်ပယ်တွင် လယ်စိုက်ခြင်း ]

Ch 179

ကျွန်တော်က ဧကရာဇ် လုပ်ရတဲ့နေရာမှာကျွမ်းကျင်တယ် (၁)

“မင်း ...တကယ့်ကို ...”

စွေ့ချီချောင်းက ရှောင်ပိုင်မှာ အလွန်ရယ်ဖွယ်ရာကောင်းလှလွန်းသည်ဟု ထင်မြင်မိလာတော့သည်။ 

“ကျန်းထန်ဝေ့ ... မင်း ...”

စွေ့ချီချောင်း၏ အလွန်ပြောစရာမဲ့နေသော ပုံစံမှာ အလွန် ရှားပါးလွန်းလှသည်။ သူက ရှောင်ပိုင်၏ နောက်စေ့ကို မရိုက်ဘဲပင် မနေနိုင်တော့။ 

သို့သော် သူ့လက်က ရှောင်ပိုင်၏ခေါင်းကို ထိလိုက်မိသည်နှင့်တစ်ပြိုင်နက် ရှောင်ပိုင်က ချက်ချင်းအော်ပြောလာသည်။

“ကျွန်တော့်ကိုရိုက်လိုက်ရင် သေချာပေါက် တာဝန်ယူရမှာနော် ...”

စွေ့ချီချောင်းက သူ့ကို လွန်စွာ ကျိုးကြောင်းမဆီလျော်လှသူတစ်ဦးဟူသည့် အကြည့်မျိုးဖြင့်ကြည့်ကာ လျစ်လျူရှုထားလိုက်သော်ငြား ရှောင်ပိုင်က အသည်းအသန် ဆက်ပြောနေဆဲပင်။ သူက နောက်ထပ် ချဉ်းကပ်နည်းတစ်မျိုးဖြင့် ပြောင်းလဲချဉ်းကပ်ရန်ပင် ဆုံးဖြတ်လိုက်သေးသည်။ 

“အချစ်ခန်းတွေ တကယ်ကြီး ပါနေတာလား ...”

“ချစ်ခန်းကြိုက်ခန်း ပါလား မပါဘူးလားဆိုတာ မင်းက မသိသေးဘူးပေါ့  ...”

စွေ့ချီချောင်းက ပြန်မေးလိုက်သည်။ 

“မင်းအရည်အချင်းနဲ့သာဆို ဒီလို အချက်အလက်မျိုးကို ရနိုင်ဖို့ဆိုတာ အလွယ်လေးပဲ မဟုတ်ဘူးလား ...”

ရှောင်ပိုင်က ခေါင်းတဆတ်ဆတ်ညိတ်ကာ သဘောတူလိုက်သည်။

“အမ်း .. ကျွန်တော်က တော်တော်လေး အင်အားကြီးတာပဲနော် ...”

စွေ့ချီချောင်း “...”

LJJ ၏ “ပြဇာတ်တို” ဟူသည့် စကားအနက် “တို” ဟူသော စကားလုံးမှာ အစီအစဉ် တစ်ခုလုံးကို ခြုံငုံကာ ပြောခြင်းမဟုတ်ဘဲ အပိုင်းတစ်ပိုင်း၏ အရှည်ကိုသာ ဆိုလိုခြင်း ဖြစ်သည်။ မည်သို့ပင်ဖြစ်စေ ကုမ္ပဏီ၌ သရုပ်ဆောင် အရေအတွက် အများအပြား ရှိနေရာ အပိုင်းအရေအတွက်မှာလည်း မည်သို့မျှ နည်းပါးလိမ့်မည် မဟုတ်ချေ။ 

ထိုပြဇာတ်တို၏ နောက်ခံဇာတ်လမ်းမှာ လူအပြည့် သယ်ဆောင်ထားသော အာကာသယာဉ်တစ်စီး ရှေးဦးဂြိုဟ်တစ်ခုပေါ်သို့ ပျက်ကျသွားသည့်အကြောင်း ဖြစ်သည်။ ပြင်ပကမ္ဘာသို့ အကူအညီ တောင်းခံနိုင်သည့် စွမ်းရည် မရှိတော့သည့်အတွက် ထိုလူများက ကိုယ်ပိုင် အဖွဲ့အစည်းတစ်ခုတည်ထောင်ရန် ဆုံးဖြတ်လိုက်ကြတော့သည်။ ထိုသို့ တည်ထောင်ရာ၌ တစ်ဦးချင်းစီ၏ အားသာချက်များကို ကိုယ်စီ အသုံးချခဲ့ကြကာ ၎င်းက သရုပ်ဆောင်အသီးသီး၏ သက်ဆိုင်ရာဇာတ်ရုပ်များပင် ဖြစ်ပေသည်။ 

ထို့ကြောင့် အပိုင်းတစ်ပိုင်းချင်းစီတိုင်းတွင် ထိုသူများက ရှေးဦးဂြိုဟ်တစ်ခုတွင် လူမှုအဖွဲ့အစည်းတစ်ခု ဖြစ်ထွန်းလာအောင် မည်ကဲ့သို့ တည်ဆောက်ခဲ့ကြကြောင်း စိတ်ဝင်စားဖွယ်ရာဇာတ်ကြောင်းများဖြင့် ပြည့်နှက်နေပေသည်။ ပရိုဂရမ်ကို ထုတ်လွှင့်မည့် အပိုင်းတစ်ခုချင်းစီတိုင်း၌ ဦးတည်ချက်မတူညီသော စိတ်ကိုအပန်းပြေစေမည့် ဇာတ်ကြောင်းအသီးသီးကိုယ်စီ ရှိနေစေရန် စီစဉ်ထားရာ သရုပ်ဆောင်များအတွက်လည်း အရေးပါသော ဇာတ်ကောင်များ ရရှိနိုင်မည့် အခွင့်အရေးများ ပေါများလှပေသည်။ ထို့အပြင် ဇာတ်ကွက် အများဆုံး ရရှိထားသည့် သရုပ်ဆောင်များမှာ ယခုလက်ရှိ LJJ က ပရိုမိုးရှင်း ဆင်းပေးနေသည့် သရုပ်ဆောင်များ ဖြစ်ကြကြောင်းမှာမူ အားလုံးအသိ ဖြစ်ပေသည်။ 

စွေ့ချီချောင်းက ရိုက်ကူးရေးလုပ်ရန် ဆွဲခေါ်သွားခြင်း မခံရမီ ရှောင်ပိုင်ကို စကားအနည်းငယ်ခန့်သာ ပြောနိုင်လိုက်ခဲ့သည်။ 

ပါဝင်သရုပ်ဆောင်သူများအတွက်လည်း သရုပ်ဆောင်စွမ်းရည်ကို ထည့်စဉ်းစားနေရန် မလိုဘဲ ကင်မရာအရှေ့သို့ ရောက်သည့်အခါ ကြောင်အမနေသရွေ့ ပါဝင်သရုပ်ဆောင်နိုင်ပေသည်။ ထိုသို့သော ပင်ကိုယ် သရုပ်ဆောင်နိုင်စွမ်း သာမက ဒါရိုက်တာကလည်း ဘေးနားတွင် အမြဲလမ်းညွှန်ပြသနေသည့်အတွက် ရိုက်ကူးရေးလုပ်ငန်းစဉ်မှာ များစွာ ချောမွေ့နေခဲ့သည်။ ရိုက်ကူးရေး လုပ်ငန်းစဉ်တစ်လျောက် အလွန် မြန်ဆန်ချောမွေ့ခဲ့သည့်အတွက် ရုပ်သံလွှင့်ခြင်း လုပ်ငန်းစဉ်မှာလည်း ထပ်တူ မြန်ဆန်ခဲ့ပေတော့သည်။ 

ဇာတ်လမ်းတိုရိုက်ကူးရေးအတွက် ပြင်ဆင်ချက်များမှာလည်း အလွန်အသေးစိတ်လှသည်။ စွေ့ချီချောင်းက မထုတ်လွှင့်မီ သုံးပိုင်းရိုက်ကူးခဲ့ကာ ထိုသုံးပိုင်းစလုံးမှာ သူ့ဇာတ်ကောင်ကို အဓိကထားသည့် ဇာတ်ကွက်မျိုး မဟုတ်သည့်တိုင် ရုပ်သံလွှင့်ပြီးနောက် လူထု၏ တုန့်ပြန်ပုံမှာ ကောင်းမွန်လှဆဲပင် ဖြစ်ပေသည်။ 

ဇာတ်လမ်းအစပိုင်းတွင် ဂြိုဟ်ပေါ်သို့ ရောက်ရှိလာသူအုပ်စုက ကိုယ်စီကိုယ်စီ အလုပ်တာဝန် အသီးသီး ဝေခွဲယူလိုက်ကြသည့်တိုင် မကောင်းသည့် အကြံအစည် ရှိနေသူအချို့လည်း ပါဝင်နေခဲ့သည်။ ထိုလူများက ခေါင်းဆောင်သာ ဖြစ်လိုကာ အရင်းအမြစ်များအား ထိန်းချုပ်ခွင့် ရရှိခြင်း အစရှိသော အကျိုးအမြတ်များကို တစ်ကိုယ်တည်း ခံစားလိုကြသည်။ ပထမဆုံးသော ဇာတ်ဝင်ခန်းက လူတိုင်း သူတို့အဖွဲ့ထဲသို့ ပူးပေါင်းရန် အခြားသူများကို အပြင်းအထန် မဲဆွယ်စည်းရုံးနေကြသည့် အကြောင်း ဖြစ်ပေသည်။ 

“အောက်က အစ်ကိုလေး ...”

လူတစ်ယောက်က စွေ့ချီချောင်းကို မေးဆတ်ကာ မေးလိုက်သည်။ 

“ခင်ဗျားနာမည်က ဘာလဲ ပြီးတော့ ဘယ်လိုနယ်ပယ်မျိုးမှာ ကျွမ်းကျင်လဲ ...”

အမျိုးမျိုးသော အကြောင်းများကြောင့် ဇာတ်ကောင်များ၏ အမည်ကို သရုပ်ဆောင်များ၏ အမည်အရင်းကိုသာ အသုံးပြုခဲ့ကြသည်။ 

စွေ့ချီချောင်း : “နာမည်က စွေ့ချီချောင်းပါ ပြီးတော့ ဧကရာဇ် လုပ်ရတဲ့နေရာမှာ ကျွမ်းကျင်တယ် ...”

ထိုနေရာတွင် ရှိနေသူအားလုံး “...”

ထိုသို့သော စကားတစ်ခွန်းတည်းကပင်လျှင် အားလုံးအကြား တင်းမာနေမှုများကို ဖျက်ဆီးနိုင်ခဲ့သည်။ အခြားလူများက သူတို့၏ စွမ်းဆောင်ရည်နှင့် ပတ်သက်၍ လျှို့ဝှက်ထားကြစဉ် ထိုလူငယ်လေးက အားလုံး၏ စိတ်ကူးယဉ်ပူဖောင်းများကို တိုက်ရိုက် ဖျက်ဆီးပစ်ခဲ့သည်။ သူပြောခဲ့သည့် ပထမဆုံး စကားကပင်လျှင် "ဧကရာဇ် လုပ်ရတဲ့နေရာမှာ ကျွမ်းကျင်တယ်” ဟူသည့် စကားမျိုး ဖြစ်နေပေသည်။ 

အချို့က သူ့ကို ဒေါသတကြီး လှောင်ရယ်လိုက်ကြသည်။ 

“ညီအစ်ကို မင်းက အတော်လေး ရည်မှန်းချက် ကြီးတာပဲ မင်းက မြေရှင်ပဒေသရာဇ်စနစ်ကို တွေးနေတာ ထင်တယ် ...”

စွေ့ချီချောင်း၏ဇာတ်ကောင်ကို သူ၏လက်တွေ့ဘဝနှင့် အလွန် တူညီအောင် သရုပ်ဖော်ထားသည်။ သို့သော် သူ သရုပ်ဆောင်နေသည့် ဇာတ်ကောင်မှာ လက်တွေ့ဘဝနှင့် တစ်ထပ်တည်း မတူညီနိုင်ပေ။ သို့မဟုတ်ပါလျှင် LJJ အနေဖြင့် ထိုဇာတ်လမ်းတိုကို ရိုက်ကူးခြင်းပင် ပြုနိုင်လိမ့်မည် မဟုတ်ချေ။ 

ထိုအခိုက်အတန့်တွင် စွေ့ချီချောင်းက အမူအယာ ကင်းမဲ့စွာဖြင့်ပင် ဆက်ပြောလိုက်သည်. 

“ကျွန်တော်က ဧကရာဇ်သွေးမျိုးဆက်ကို နိုးထနိုင်ခဲ့တဲ့သူ သက်သေလည်း ရှိတယ် ...”

ထို့နောက် သူက နိုင်ငံပိုင်ဌာနမှ ထုတ်ပေးသည့် နိုးထခြင်း အသိအမှတ်ပြုလက်မှတ်ကိုပါ ထုတ်ပြလိုက်သည်။ 

အားလုံး  “...”

ဖာ့ခ် .. သူ ပြောနေတာ တကယ်ကို အမှန်ကြီးဟ ...

သူက ဆက်ပြောလိုက်သည်။ 

“အခုလောလောဆယ်တော့ ကျွန်တော့်မှာ ဧကရာဇ်လုပ်ဖို့ အတွေးမျိုး မရှိသေးပါဘူး ဘာပဲဖြစ်ဖြစ် အားလုံးက ဒီနေရာကို အတူတူ ရောက်လာပြီး မကြုံချင်တဲ့ အခြေအနေမျိုးကို အတူတူ ကြုံတွေ့နေကြရတာပဲဟာ တစ်ယောက်နဲ့ တစ်ယောက် အဆင့်အတန်းတွေသာ ခွဲခြားလိုက်မယ်ဆိုရင် အားလုံး အသက်ရှင်သန်နိုင်မယ့် ပတ်ဝန်းကျင်ကောင်းတစ်ခု ဖြစ်လာနိုင်တော့မှာ မဟုတ်ဘူး အဲဒါကြောင့် အခုလတ်တလောမှာတော့ ကျွန်တော်တို့ရဲ့ အစားအစာ ပြဿနာကို ဖြေရှင်းဖို့ တစ်ခြားစွမ်းရည်တစ်မျိုးကိုပဲ အသုံးပြုလိုက်ပါ့မယ် ...”

သူ၏ တည့်တိုးဆန်လှသော စကားများကြောင့် ကြားလိုက်ရသူတိုင်း ရယ်ရမလား ငိုရမလားပင် ဝေခွဲမရ ဖြစ်သွားတော့သည်။ သို့သော် ထိရောက်မှုကမူ ပြင်းထန်လှပေသည်။ အားလုံးက သူသည် ထိုစကားများကို မကောင်းသည့် အကြံအစည် ရှိနေသူများအား ရည်ရွယ်ပြောဆိုခြင်းဖြစ်ကြောင်း သိနေကြကာ သူတို့သာ ရှေးခေတ်ကာလများကကဲ့သို့ အဆင့်အတန်းအမျိုးမျိုး၊ အင်အားစုအမျိုးမျိုး ခွဲခြားထားလိုပါလျှင် နောက်ကွယ်တွင် ပုန်းအောင်းနေမည့် final boss တစ်ဦး ရှိနေမည့်အရေးကို အမြဲ ပူပန်နေကြရမည် ဖြစ်ပေသည်။ ယခုအချိန်တွင် ဧကရာဇ်သွေးကို နိုးထခဲ့သူအဖြစ် အသိအမှတ်ပြုလက်မှတ် ကိုင်ဆောင်ထားသည့် ဘော့စ်တစ်ဦး ရှိနေရာ ထိုသူကသာလျှင် နန်းတွင်းအကောက်ကြံမှုများကို ကိုင်တွယ်ရန် အရည်အချင်း အပြည့်မှီဆုံးသူ ဖြစ်ပေတော့သည်။ 

တစ်ခဏမျှ တိတ်ဆိတ်နေပြီးနောက် အားလုံးအကြားရှိ လေထုမှာ အနည်းငယ် ပြောင်းလဲသွားတော့သည်။ စွေ့ချီချောင်းကို ကြောက်ရွံ့စိတ်ကြောင့် အစောပိုင်းက ပြဿနာ ရှာလိုကြသူများသည်လည်း သူတို့ကိုယ်သူတို့ ထိန်းချုပ်လိုက်ကြတော့သည်။ 

ရှေးဦးဂြိုဟ်ပေါ်၌ ရွက်ဖျင်တဲများ ပြင်ဆင်နေရာချထားပြီးနောက် စွေ့ချီချောင်းက သူ ပြောခဲ့သည့် စကားများကို လက်တွေ့ အကောင်အထည်ဖော်လိုက်သည်။ ဂြိုဟ်တစ်ခုလုံးအနှံ့ဖြန့်ကျက်ကာ စားစရာ ရှာဖွေသည့် လုပ်ငန်းစဉ်ကို အဓိကထား လုပ်ဆောင်လိုက်သည်။ 

ဤသည်မှာ စွေ့ချီချောင်း၏ စရိုက်အစစ်အမှန်နှင့် အလွန် ကိုက်ညီလှသည့်အတွက် မည်သူကမှ ၎င်းနှင့် ပတ်သက်၍ ငြင်းခုန်ရန် မတွေးမိကြချေ။ ထို့ကြောင့် ယခင်ကတည်းက အလွန်အမင်း ရုပ်လုံးကြွနှင့်နေပြီဖြစ်သော သူ့ဇာတ်ကောင်မှာ ပို၍ပင် ကျော်ကြားလာတော့သည်။ သူသည် ဧကရာဇ်သွေးကိုနိုးထလာနိုင်သူ ဖြစ်သည့်တိုင် သူ့ကိုယ်သူ ဖုံးကွယ်ကာ “တံမြက်လှည်းကိုယ်တော်” ကဲ့သို့ မီးဖိုချောင်ထဲတွင်သာ ပုန်းအောင်းနေခဲ့သည်။ အားလုံးက စွေ့ချီချောင်းကို အာရုံစိုက်နေကြသည့်အတွက် ပထမဆုံး ထုတ်လွှင့်သည့် အပိုင်းအချို့မှာ ဟာသဇာတ်ကွက်များစွာလည်း ပါဝင်ခဲ့တော့သည်။ 

စွေ့ချီချောင်းက သူ့ခန္ဓာကိုယ်မှ ပျံ့လွင့်နေသည့် တော်ဝင်ဆန်သော အငွေ့အသက်များနှင့်အတူ ဇာတ်ကောင်စရိုက်ကို ပီပြင်အောင် သရုပ်ဆောင်နိုင်ခဲ့သည့်အပြင် ပရိသတ်၏ နှစ်သက်မှုကိုပါ ပိုင်ဆိုင်ခဲ့ရသည်။ ထိုသို့ အလွန်စိတ်အပန်းပြေကာ စိတ်ဝင်စားဖွယ် ကောင်းလှသည့် ဇာတ်လမ်းတိုတွင် ထူးခြားလှသည့် ဇာတ်ကောင်ကို အရယူနိုင်ခဲ့ရာ စွေ့ချီချောင်းသည် လင်းလင်းက သူ့ကို ဇာတ်ကောင်ကောင်းတစ်ခု ရရှိစေရန် အလွန်အမင်း အားစိုက်ထုတ်ထားသည်ဟု တွေးမိသွားခဲ့တော့သည်။ 

ရုပ်သံလွှင့်ပြီးနောက် ကြည့်ရှုသူများ၏ တုန့်ပြန်မှုမှာ အလွန် ကောင်းမွန်လှသည်။ အစပိုင်းများ၌ စွေ့ချီချောင်း၏ ဇာတ်ကွက်များမှာ မများပြားလှသည့်တိုင် ပရိသတ်၏ အကောင်းမြင်မှုကို များစွာ လက်ခံရရှိလိုက်ရပေသည်။ 

သူ့ပရိသတ်များ၏ မှတ်ချက်များကလည်း အခြား ကြည့်ရှုသူများအတွက် သန်မာလှသော ထင်မြင်ချက်ကောင်းတစ်ရပ် ဖြစ်စေခဲ့ပေသည်။ 

[ငါ စွေ့ချီချောင်းကိုကြည့်ဖို့ လာခဲ့တာပါ ဒါနဲ့ သူက ဘယ်အချိန်မှ စိုက်ပျိုးရေး စလုပ်မှာလဲ …]

[စွေ့ချီချောင်းက မျက်နှာဖြတ်ရိုက်တဲ့ နေရာမှာ ကျွမ်းကျင်အဆင့်ပဲဟေ့ ...]

[စွေ့ချီချောင်းက ပေါင်းသင်တာ၊ မျိုးစေ့ကြဲတာနဲ့ အပင်ပေါက်လေးတွေကို ပြုစုပျိုးထောင်တဲ့ နေရာမှာလည်း ကျွမ်းကျင်တယ် ...]

[ဧကရာဇ် လုပ်ရမယ့်အပိုင်းမှာလည်း ထိပ်သီးအဆင့်ပဲ ဟားဟားဟားဟား ဧကရာဇ် ဖြစ်လာပါစေဆိုပြီး အချိန်အကြာကြီး မျှော်နေခဲ့ရတဲ့ စွေ့ချီချောင်းက ဒီဇာတ်လမ်းထဲမှာ ဧကရာဇ်ဖြစ်လာမှာလို့တော့ မပြောနဲ့နော် သူက ထီးနန်းကို သစ်ငုတ်တိုပေါ်မှာ ဆက်ခံမှာများလား ...]

[သူ့အတွက်ကတော့ ဒီလို လုပ်ရမယ်ဆိုရင်တောင် ဘာပြဿနာမှ မရှိလောက်ဘူး ဒါက လယ်သမားနတ်ဘုရား အုပ်ချုပ်တဲ့ ပထမဆုံးနှစ်ပဲ ...]

[အဲဒီ့စာသားက ဘာကြီးလဲ ရယ်စရာ ကောင်းလိုက်တာ ဒါပေမယ့် အဲဒါက သူ့ကို ပိုပြီးတောင် ခန့်ညားသွားစေသလိုပဲနော် “အခုလောလောဆယ်တော့ ဧကရာဇ်လုပ်ဖို့ အကြံမရှိသေးဘူး” တဲ့ looooooool …]

[ငါ ထင်တာ မမှားဘူးဆို ဒါက စွေ့ချီချောင်းရဲ့ စရိုက်အစစ်အမှန် မဟုတ်ဘူးနော် သူက ဒီလောက်အထိ မကြင်နာတတ်ဘူး ဒါက သူ့ပရိုဂရမ်သာဆို တစ်ယောက်နဲ့တစ်ယောက် ချောက်တွန်းဖို့ ကြိုးစားနေကြတဲ့လူတွေ အကုန်လုံး ငါးမိနစ်အတွင်း ပေါင်းသင်ပျိုးကြဲဖို့ ဆွဲခေါ်ခံနေရလောက်ပြီ …]

....

LJJ ၏ နှစ်ပတ်လည်ပွဲကို ဆင်နွှဲရန် ရည်ရွယ်ချက်ဖြင့် ရိုက်ကူးထားသော ဇာတ်လမ်းတိုဖြစ်သည့်အတွက် မြောက်များစွာသော နာမည်ကြီး သရုပ်ဆောင်များ ပူးပေါင်းပါဝင်ကာ သရုပ်ဆောင်ထားကြသည့်အပြင် အသက်အရွယ်မျိုးစုံအတွက် သင့်လျော်သော စိတ်ကြည်နူးဖွယ် ဟာဒယအစီအစဉ်ဟု သတ်မှတ်နိုင်သည့်အတွက် ကြည့်ရှုနှုန်းမှာလည်း အလွန် မြင့်မားလှသည်။ 

ယခင်က ရသစုံရှိုးများကို တစ်ကြိမ်တစ်ခါမှ မကြည့်ဖူးသည့် အချို့သော ကြည့်ရှုသူများသည်လည်း ဤဇာတ်လမ်းတိုမှတစ်ဆင့် စွေ့ချီချောင်းကို သိရှိသွားကြတော့သည်။ ထိုပရိုဂရမ်ကို LJJ ဘက်မှ အကြီးအကျယ် ပရိုမိုးရှင်းဆင်းထားသည့်အပြင် ဇာတ်ကောင်အများစုမှာ သရုပ်ဆောင်များ၏ ပင်ကိုယ်စရိုက်ကို ပုံစံယူထားခြင်း ဖြစ်သည်ဟုပါ ဖော်ပြထားသေးသည့်အတွက် ပရိသတ်အသစ်များက သိလိုစိတ် အလွန်ပြင်းပြလာစေခဲ့သည်။ 

စွေ့ချီချောင်းက တကယ်ပဲ “ဧကရာဇ် လုပ်ဖို့ ကျွမ်းကျင်တဲ့သူ” လား နောက်အပိုင်းတွေမှာလည်း သူ့ဇာတ်ကောင်က ဘယ်လို ဖြစ်လာမှာလဲ ...

ရှာဖွေမှုတစ်ချက်မျှ ပြုလုပ်လိုက်ရုံဖြင့်ပင် အလွန် စိတ်ဝင်စားဖွယ်ရာ ကောင်းလှသည့် အကြောင်းအရာများကို ရှာတွေ့နိုင်ပေသည်။ 

ဟုတ်တယ် သူက ဧကရာဇ်ဖြစ်ဖို့အတွက် တကယ်ကို အရည်အချင်းရှိတာ...  တစ်ကမ္ဘာလုံးကို လွှမ်းမိုးစိုးစံနိုင်တဲ့ ဧကရာဇ်တစ်ပါး ဖြစ်လာနိုင်မယ့် ရသစုံရှိုးမှာ ပါဝင်နိုင်တဲ့ သရုပ်ဆောင်တစ်ယောက် ဖြစ်လာဖို့ LJJ ရဲ့ ရွေးချယ်မှုကိုတောင် ခံခဲ့ရတာလေ အဲဒီ့အချိန်ကတည်းက လယ်သမားနတ်ဘုရားသွေးနိုးထလာပြီး စိုက်ပျိုးရေးကိုပဲ စိတ်ဝင်စားတဲ့လူတစ်ယောက် ဖြစ်နှင့်နေပြီလေ ...

စွေ့ချီချောင်း၏ ပရိုဂရမ်ကို စတင်ထုတ်လွှင့်စဉ်ကတည်းက ကြည့်ရှုခဲ့ကြသည့် ပရိသတ်များ၏ ဘဝမှာ သနားဖွယ်ရာပင်။ သို့သော် ပရိသတ်အသစ်များက ထိုအပိုင်းများကို ပြန်ကြည့်ရှုကြသည့်အခါတွင်မူ ရယ်စရာ ကောင်းလွန်းလှသည်ဟုသာ ခံစားမိခဲ့ကြသည်။ ဇာတ်လမ်းတိုထဲတွင် စွေ့ချီချောင်း သရုပ်ဆောင်သည့် ဇာတ်ကောင်မှာလည်း သူနှင့် အလွန်လိုက်ဖက်ညီနေကာ စားရေးသောက်ရေးကို ဂရုပြုရသည့် တာဝန်မှာလည်း သူနှင့် အလွန် သင့်လျော်လှပေသည်။ 

စွေ့ချီချောင်း၏ ဇာတ်ကောင် ပါဝင်လာမည့်အကြောင်း နိမိတ်ပြမှုများမှာ ပင်မဇာတ်ကြောင်းထဲတွင် ဟိုးယခင်ကတည်းက ပါဝင်နှင့်နေပြီး ဖြစ်ပေသည်။ သို့သော် သူ ပါဝင်ထားသည့် အခြားအခန်းများမှာလည်း အလွန် စိတ်ဝင်စားဖွယ်ရာ ကောင်းလှသည်။ 

ရှေးဦးဂြိုဟ်သို့ ရောက်ရှိလာသူများက အခြေစိုက်စခန်းတစ်ခုကို တည်ဆောက်ပြီးစီးသွားကြကာ စွေ့ချီချောင်းနှင့် အခြားသော တောတွင်းစွန့်စားခန်း လုပ်ဆောင်ရခြင်းကို ဝါသနာပါသူများက အားလုံးအတွက် စားစရာ ရှာဖွေရန် တာဝန်ယူလိုက်ကြသည်။ သူက လယ်ယာစိုက်ပျိုးရေး လုပ်ဆောင်ရန် လိုအပ်သည့် ကိရိယာများကို ပြင်ဆင်ပေးပြီးနောက် မွေးမြူရေးလုပ်ရန်အတွက် တိရိစ္ဆာန်များကိုပါ ဖမ်းဆီးပေးလိုက်သည်။ 

အခြားလူများ၏ ကျွမ်းကျင်မှုများလည်း ထပ်လောင်း ပါဝင်ထားသည့်အတွက် အခြေစိုက်စခန်းက တစ်လအတွင်းမှာပင် ဖြုံလောက်ဖွယ်ရာ အနေအထားသို့ ရောက်ရှိလာတော့သည်။ ပတ်ဝန်းကျင်ကို စူးစမ်းရှာဖွေပြီးနောက် ဂြိုဟ်သားမျိုးနွယ်ဟု ခေါ်ကြသော ဉာဏ်ရည်မြင့် မျိုးနွယ်စုများ၏ ကျောက်ဖြစ်ရုပ်ကြွင်းများကိုပါ တွေ့လိုက်ရတော့သည်။ 

စွေ့ချီချောင်းက မကောင်းသော အကြံအစည်များအား တစ်ဖြည်းဖြည်းချင်း လက်တည့်စမ်းလိုသူများကို ခြောက်လှန့်ရန် မကြာခဏ ထွက်ပေါ်လာလေ့ ရှိခဲ့သည်။ ထို့ကြောင့် အခြားသော အတူတူ သရုပ်ဆောင်ကြသူများက သူ့ကို meme များပင် ဖန်တီးလာကြတော့သည်။ 

ဥပမာအားဖြင့် အခြားသူများ တိတ်တဆိတ် တိုက်ခိုက်ကြလေတိုင်း ထိုသူများက အချင်းချင်း ခြိမ်းခြောက်လေ့ ရှိကြသည်။ 

“ဒါက ကိစ္စကြီး မဟုတ်ဘူးနော် ငါက စွေ့ချီချောင်းကို ထီးနန်းဆက်ခံပါလို့ မြှောက်ပေးလိုက်ရင် မင်းတို့တွေ သူ့ကို ဒူးထောက်ပြီး  အရိုအသေပေးနေကြရလိမ့်မယ် ...”

ကြည့်ကောင်းလှသော ရုပ်ရည်နှင့် ကောင်းမွန်လှသော စွမ်းဆောင်ရည်များကြောင့် စွေ့ချီချောင်း၏ ကျော်ကြားမှုမှာ အချိန်တိုအတွင်း များစွာ တိုးမြင့်လာတော့သည်။

ယခင်က သူ၏ပရိုဂရမ်မှာ ကျော်ကြားသည်ဟု ဆိုနိုင်သည့်တိုင် အနုပညာလောကတွင် အခြားသော ရွေးချယ်ဖွယ်ရာများလည်း များစွာရှိနေသေးပေသည်။ ထို့အပြင် အမျိုးအစား မတူညီသော ပရိုဂရမ် အမျိုးမျိုးနှင့် ထုတ်လုပ်ရေးကုမ္ပဏီများစွာ ရှိကြသည့်အတွက် သူ့အတွက် ပိုပြီး ကျော်ကြားလာရန် များစွာလိုအပ်နေခဲ့သည်။ 

ထိုဇာတ်လမ်းတိုကို နေ့စဉ် ထုတ်လွှင့်ပြသသည့်အပြင် ၎င်း၏ လွှမ်းမိုးနိုင်စွမ်းမှာ စိုက်ပျိုးရေးနှင့် စစ်ရေး အစီအစဉ်များထက်လည်း ပိုမို သာလွန်သေးသည့်အတွက် သူနှင့် အချိန်အတော်ကြာ အဆက်အသွယ် ပြတ်တောက်နေသည့် မိတ်ဆွေဟောင်းနှင့် အတန်းဖော်များကပင်လျှင် နောက်တစ်ကြိမ် ဆက်သွယ်လာကြတော့သည်။ 

သူတို့အားလုံးက ထိုအဖြစ်အပျက်များမှာ အလွန် စိတ်ကူးယဉ်ဆန်လွန်းလှသည်ဟု ခံစားမိခဲ့ကြသည်။ အရိုးသားဆုံး ဝန်ခံရပါလျှင် စွေ့ချီချောင်း နာမည်ကြီးသရုပ်ဆောင် ဖြစ်လာခြင်းမှာ အံ့ဩဖွယ်ရာ မရှိလှပေ။ သူက နယ်ပယ်မျိုးစုံအနှံ့ (အိမ်ထောင်ပြု သားမွေးသည့် နယ်ပယ်မှလွဲ၍) အောင်မြင်ခဲ့ပေသည်။ အံ့အားသင့်စရာ ဟူ၍ သူ၏ အသက်မွေးဝမ်းကြောင်း ရွေးချယ်မှုမှာ အားလုံး၏ ထင်မြင်ချက်နှင့် လုံးဝဥဿုံ ကွဲပြားနေသည့်အချက် တစ်ခုတည်းသာ ရှိပေသည်။ 

ထိုနေ့ သူ့အခန်းထောင့်စွန်းတစ်နေရာ၌ ရှောင်ပိုင် တိတ်တဆိတ် ထွက်ပေါ်လာချိန်တွင် စွေ့ချီချောင်းက သူ၏ နည်းပြဟောင်းကို သုံးဖက်မြင် ပလက်ဖောင်းမှတစ်ဆင့် စကားပြောနေခဲ့သည်။ ရှောင်ပိုင်က သူ့တည်ရှိမှုကို စွေ့ချီချောင်း သတိပြုမိလာစေရန် အချိန်အတော်ကြာ စောင့်ဆိုင်းလိုက်ရသည်။ 

“အာ ... ဒါက ...”

နည်းပြက ရှောင်ပိုင်ကို သတိပြုမိလိုက်သည်။ သူက အသံတစ်သံမှ မထွက်ခဲ့သည့်တိုင် သူ့ပုံရိပ်မှာ သုံးဖက်မြင် ပလက်ဖောင်းမှတစ်ဆင့် မြင်နေရသည်အထိ ကြီးမားလှပေသည်။ နည်းပြက စွေ့ချီချောင်းမှာ သူ၏ ကိုယ်ပိုင်အချိန်နှင့်ပတ်သက်၍ အလွန်အလေးအနက်ထားသူ ဖြစ်သည့်အပြင် သူ့အခန်းထဲသို့ လွတ်လွတ်လပ်လပ် ဝင်ထွက်သွားလာခွင့် ပေးထားသူဟူ၍လည်း ရှားပါးလှကြောင်း သိထားသည့်အတွက် သူတို့နှစ်ဦးအကြား ဆက်ဆံရေးမှာ မရိုးရှင်းနိုင်ဟု ခန့်မှန်းမိလိုက်သည်။ 

“အိုး .. ဒါက မင်းရဲ့ ညီလေးလား တူလေးလား ...”

ကျန်းထန်ဝေ့ :  “ဟင်...”

ညီလေးလား တူလေးလားတဲ့လား .. ငါတို့က ဒီလောက်အထိတောင် အသက်ကွာတဲ့ပုံမျိုး ပေါက်နေပြီလား ဒီလူအိုကြီးက ငါ့ကို ကလေးဆန်တယ်လို့ ပြောချင်နေတာလား သူက ဘယ်သူလဲ စိတ်ပျက်စရာ ကောင်းလိုက်တာ ...

“မဟုတ်ပါဘူး ...”

စွေ့ချီချောင်းက ရှောင်ပိုင်ထံ အကြည့်တစ်ချက် ပို့လွှတ်လိုက်သည်။ 

“သူငယ်ချင်း တစ်ယောက်ပါ ... ဆရာ ဒါဆို နောက်မှ ထပ်ပြီး ဆက်သွယ်လိုက်ပါ့မယ် ...”

နည်းပြက ပြုံးကာ ခေါင်းညိတ်ပြလိုက်သည်။ 

“သေချာတာပေါ့ ငါနဲ့ ငါ့ဇနီးက မင်းကို အမြဲ အားပေးနေတယ်နော် ငါတို့က မင်းအစီအစဉ်ကို နေ့တိုင်း ကြည့်နေကြတာ ...”

စွေ့ချီချောင်းက တစ်ခဏမျှ ပြောစရာ ကင်းမဲ့သွားတော့သည်။ 

ကျန်းထန်ဝေ့က အနားသို့ ရုတ်တရက် ပြေးဝင်လာသည်။

“ဆရာ ကျွန်တော်လည်း နောက်တစ်ခေါက် ထပ်တွေ့ချင်ပါသေးတယ် ...”  

လက်စသတ်တော့ စွေ့ချီချောင်းရဲ့ ဆရာ ဖြစ်နေတာကိုး .. ဒါဆို ငါ့ဘက်ကလည်း နည်းနည်းပါးပါး လေးစားပြရမယ်လေ ...

နည်းပြက ခပ်တိုးတိုး ရယ်မောကာ ကျန်းထန်ဝေ့ကို စိုက်ကြည့်လိုက်သည်။ ထို့နောက် အဓိပ္ပါယ်များ ပြည့်နှက်နေသည့် လေသံဖြင့် ပြောလိုက်၏။ 

“ကောင်းပါပြီ... ချီချောင်း နောက်တစ်ခေါက် ငါတို့ တွေ့တဲ့အခါ မင်းသူငယ်ချင်းကိုပါ ခေါ်လာခဲ့လိုက် ...”

စွေ့ချီချောင်း :  “...”

သူ့ဘက်မှ စကား ပြန်မပြောရသေးမီမှာပင် နည်းပြက ဆက်သွယ်မှု ဖြတ်တောက်လိုက်သဖြင့် အခန်းထဲမှ ပျောက်ကွယ်သွားတော့သည်။ 

ထားလိုက်ပါတော့ ...

သူက ရှောင်ပိုင်ဘက်သို့ လှည့်ကြည့်ကာ မေးလိုက်သည်။ 

“ရှေ့တံခါးကနေ ဝင်လာရမယ်ဆိုတာကို မင်း ဘယ်တော့မှ သိမှာလဲ ...”

ကျန်းထန်ဝေ့က သူ့ကို အလွန် အပြစ်ကင်းစင်သည့် အကြည့်တို့ဖြင့် ကြည့်လိုက်သည်။ 

“မင်းပဲ ကျွန်တော့်ကို အိမ်ထဲဝင်ရင် ပြတင်းပေါက်ကနေ ဝင်လာဖို့ သင်ပေးခဲ့တာ မဟုတ်ဘူးလား ...”

သူ ကြောင်ဘဝတွင် ရှိနေစဉ်က ပြတင်းပေါက်မှသာ ဝင်ခဲ့ထွက်ခဲ့ရကာ အလယ်ခေတ် မှတ်ဉာဏ်တုလေယာဉ်ပေါ်ရှိ စွေ့ချီချောင်းပိုင် မြေယာများတွင် အလုပ်လုပ်ကြသူများအား လှည့်ဖျားရန်လည်း ကူညီပေးခဲ့ရပေသည်။ 

🌲🌲🌲

Shameless Gongအဖွဲ့ဝင်သစ် ကျန်းထန်ဝေ့😭