Chapter 180

🌱Arc 5 - [ဖျော်ဖြေရေးနယ်ပယ်တွင် လယ်စိုက်ခြင်း ]

Ch 180

ကျွန်တော်က ဧကရာဇ် လုပ်ရတဲ့နေရာမှာကျွမ်းကျင်တယ် (၂)

စွေ့ချီချောင်းက တစ်ခဏမျှ စဉ်းစားကာ ပြောလိုက်သည်။ 

“ရှောင်ပိုင် မင်းက အရမ်းကို တော်တဲ့သူပါ... ဒါပေမယ့် မင်းရဲ့ စွမ်းရည်တွေကို ကောင်းကောင်း မထိန်းချုပ်နိုင်သေးဘူး မင်းအတွက်လည်း ကြောင်ဘဝရဲ့ သက်တောင့်သက်သာဖြစ်မှုကို ခံစားပြီးရပြီးနောက်ပိုင်း ပုံမှန်ဘဝကို ပြန်သွားနိုင်ဖို့ ခဲယဉ်းတယ်ဆိုတာ နားလည်ပါတယ် ဒါပေမယ့် မင်းကိုယ်မင်း ဘာလို့ ထိန်းချုပ်သင့်လဲ ဆိုတာနဲ့ ပတ်သက်ပြီး အကြောင်းပြချက်တွေ တစ်ခုမက ရှိနေတာလေ လက်တွေ့က လက်တွေ့ပဲ... အချက်အလက်တွေ ဒေတာတွေက ဘယ်လောက်ပဲ အစစ်အမှန်နဲ့ တူပါတယ်ပြောပြော နောက်ဆုံးမှာတော့ မင်းက ပုံရိပ်တစ်ခုသာသာပဲလေ ...”

သူ့လက်တို့က ရှောင်ပိုင်၏အစစ်အမှန်နှင့် တစ်ထပ်တည်းနီးပါး တူညီသည့်ပုံရိပ်ကို ဖြတ်သန်းသွားသည်။ 

“မင်းရဲ့ ဆန္ဒတွေနဲ့ ဒေတာအချက်အလက်တွေကို ထိန်းချုပ်တတ်အောင် လေ့လာထား အဲဒါတွေရဲ့ ထိန်းချုပ်မှုကို မခံရစေနဲ့ ...”

ကျန်းထန်ဝေ့၏ မျက်နှာထက်တွင် စိတ်ရှုပ်ထွေးနေသည့် အရိပ်အယောင်တို့ ဖြတ်သန်းသွားတော့သည်။ သူ့အတွေးကို ပြောင်းလဲနိုင်စေရန် ရည်ရွယ်ချက်ဖြင့် ထိုကဲ့သို့သော စကားမျိုးကို ပြောပေးခဲ့သူ မရှိဖူးသည် မဟုတ်ပေ။ ထိုလူများက စွေ့ချီချောင်း ဖြစ်မနေခြင်းသာ ဖြစ်ပေသည်။ 

စွေ့ချီချောင်း၏လက်က သူ့ပုံရိပ်ကို ဖြတ်သန်းလာကာမှ သူတို့၏ ဆက်ဆံရေးကို စိတ်ရှင်းရှင်းထား စဉ်းစားမိသွားတော့သည်။ 

စွေ့ချီချောင်းကလည်း ရှောင်ပိုင်မှာ အတွေးနွံထဲတွင် နစ်မြောနေကြောင်း မြင်နေရသည်။ ပါးနှစ်ဖက်ကို လက်ဖြင့် အုပ်ကာထိုင်နေသည့် ရှောင်ပိုင်ကို ကြည့်ရင်း စွေ့ချီချောင်းက တစ်ဖက်လူမှာ အနည်းငယ်  ကလေးဆန်လှသည်ဟု ခံစားမိလာ၏။ များမကြာမီ ရှောင်ပိုင်၏ ပုံရိပ်က တစ်ဖြည်းဖြည်း မှေးမှိန်ကာ ပျောက်ကွယ်သွားတော့သည်။ 

(လူကိုယ်တိုင်ရောက်လာတာမဟုတ်ဘဲ ဟိုတစ်ခါခိုးဝင်လာသလိုမျိုး ပုံရိပ်ပဲ ရောက်လာတာပါ )

သူ တကယ်ကြီး သဘောပေါက်သွားတာလား ...

ငါးစက္ကန့်ပင်  မကြာလိုက်ဘဲ စွေ့ချီချောင်းက အသိဉာဏ်တု၏ အချက်ပေးသံကို ကြားလိုက်ရသည်။ ၎င်းက အမည်မသိ ဒေတာအရင်းအမြစ်တစ်ခုက ခွင့်ပြုချက် တောင်းခံနေကြောင်း သတိပေးလာခြင်း ဖြစ်သည်။ 

စွေ့ချီချောင်း : “...”

သူ ခွင့်ပြုချက်ကို လက်ခံလိုက်သည့်အခါ ရှောင်ပိုင်၏ ပုံရိပ်က အခန်းထဲတွင် နောက်တစ်ကြိမ် ထပ်မံ ပေါ်ထွက်လာပြန်တော့သည်။ ထို့နောက် သူက စကားအနည်းငယ်ကို တရစပ် ပြောလာခဲ့၏။

“ကျွန်တော် တံခါးခေါက်တယ်နော် ...”

စွေ့ချီချောင်းက ခပ်ဖျော့ဖျော့ ပြုံးမိသွားတော့သည်။ 

ထားပါ ဒါကလည်း စဉ်းစဉ်းစားစား လုပ်တယ်လို့ ပြောလို့ ရနေတာပဲဟာ ...

“မင်းကို ဒီည အာကာသယာဉ်ပေါ်မှာ ညစာ လိုက်ကျွေးမယ် ...”

သူက ပြောလိုက်သည်။ 

ကျန်းထန်ဝေ့က အလွန် တုန်လှုပ်ခြောက်ခြားသွားတော့သည်။ 

“ကျွန်တော်နဲ့ ဒိတ်လုပ်ဖို့ ဆန္ဒရှိလာပြီလား ...”

စွေ့ချီချောင်းက နောက်တစ်ကြိမ် ထပ်ပြောလိုက်သည်။ 

“မင်းကို ညစာ ဖိတ်ကျွေးမလို့ ... လာမှာလား ...”

ကျန်းထန်ဝေ့က အလွန် စိတ်လှုပ်ရှားစွာဖြင့် ပြန်ဖြေလိုက်သည်။ 

“သေချာပေါက်ကို လာရမှာပေါ့ ဘာပဲဖြစ်ဖြစ် နောက်ဆုံးတော့ မင်းလည်း ကျွန်တော်နဲ့အတူ ညစာစားချင်တဲ့ ဆန္ဒလေး ရှိလာပြီလေ ...”

စွေ့ချီချောင်းက ရှောင်ပိုင် ရိုက်ကွင်းတွင် ရှိနေချိန်တိုင်း သူ့ကို နေ့လည်စာ အတူတူ စားရန် အတင်း တိုက်တွန်းနေလေ့ ရှိကာ သူ့တိုက်ခန်းတွင် ရှိနေသည့် အခါတွင်လည်း ပေါင်မုန့်အတူတူစားရန် အတင်း တိုက်တွန်းနေသည်မှာ အနည်းငယ် ထူးဆန်းလှသည်ဟု ခံစားမိနေခဲ့သည်။ 

သူက သူ့ကိုယ်သူ ရှောင်ပိုင်ကို အပြစ်ပေးနေသည်ဟု မထင်ခဲ့ပေ။ သို့သော် ရှောင်ပိုင်အနေဖြင့် သူ့လုပ်ရပ်များအား ပြန်လည် သုံးသပ်နိုင်စေရန် မျှော်လင့်မိနေခဲ့ပေသည်။ 

အာကာသယာဉ်ပျံက ဂြိုဟ်နှင့် ကြယ်အစုအဝေးများကို အပေါ်စီးမှ မြင်နေရသည့် အာကာသ၏ အပြင်ဘက်တွင် ရှိနေကာ စွေ့ချီချောင်းက ထိုနေရာတွင် စားပွဲတစ်ခု ကြိုတင်ဘိုကင်တင်ထားလိုက်သည်။ 

သူ ရောက်သည့်အခါ စားသောက်ဆိုင်ပိုင်ရှင်က သူ့ကို ကိုယ်တိုင်ကိုယ်ကျ လာရောက်တွေ့ဆုံလိုက်သည်။ ထိုသို့ တွေ့ဆုံခြင်းမှာလည်း အရေးကြီးကိစ္စ ရှိနေ၍ မဟုတ်ဘဲ ဧည့်ခံရေးစက်ရုပ်က သူ့မျက်နှာကို သတိပြုမိလိုက်၍ ဖြစ်သည်။ ဆိုင်ရှင်က LJJ ၏ ဇာတ်လမ်းတိုကို နေ့စဉ်မပြတ် စောင့်ကြည့်သူဖြစ်သည့်အတွက် သူ့ကို လာရောက်နှုတ်ဆက်ခြင်း ဖြစ်ပေသည်။ 

စွေ့ချီချောင်းနှင့် စကားပြောနေစဉ် ဆိုင်ရှင်က ကြိုတင်မှာယူထားသော စားပွဲကို အခြားတစ်ယောက်က နေရာဝင်ယူသွားကြောင်း တွေ့လိုက်ရ၏။ ထိုသူက ပြတင်းပေါက် အပြင်ဘက်ရှိ ကြယ်အစုအဝေးများကို ငေးကြည့်နေပေသည်။ 

တစ်ဖက်သို့ ပြန်လှည့်လာသည်နှင့်တစ်ပြိုင်နက် ထိုလူမှာ ရှောင်ပိုင်ဖြစ်ကြောင်းကို စွေ့ချီချောင်းက သတိပြုမိလိုက်သည်။ သူက ဝတ်စုံပြည့် ပြောင်းလဲဝတ်ဆင်ကာ ဆံပင်ကို အနောက်သို့ လှန်ဖီးထားပြီး ချောမွတ်တောက်ပြောင်သော နဖူးပြင်ကို အပြည့်အဝ ဖော်ပြထားသည်။ ထိုကဲ့သို့ ဝတ်ဆင်လိုက်သည့်အတွက် သူ့ပုံစံမှာ အနည်းငယ် ရင့်ကျက်သည့်ဟန် ပေါ်သွားတော့သည်။ 

သို့သော် စွေ့ချီချောင်းကို ကြည့်ကာ ပြုံးပြလိုက်သည်နှင့်တစ်ပြိုင်နက် ယခင် ရှောင်ပိုင်ပုံစံသို့ ပြန်လည်ရောက်ရှိသွားမြဲပင်။ သူက စွေ့ချီချောင်းကို လက်ယမ်းပြလိုက်သည်။

စွေ့ချီချောင်းကလည်း သူ့ကို ခေါင်းညိတ်ပြကာ စားသောက်ဆိုင်ပိုင်ရှင်နှင့် စကားစဖြတ်၍ အနားသို့ လျှောက်သွားလိုက်သည်။ 

“မင်းကို ကူပြီး မှာပေးရမလား ...ဒီက မီနူးတွေက ဘုံဘာသာစကားကို သုံးထားတာ မဟုတ်ဘူး ပြီးတော့ ဘာသာပြန်စနစ်လည်း မထည့်ထားရသေးဘူးလေ ...”

သူက မေးလိုက်သည်။ 

“ကောင်းပါပြီ ...”

ကျန်းထန်ဝေ့က သိလိုစိတ်အပြည့်ဖြင့် ဆက်မေးလိုက်သည်။ 

“ဘာလို့ မထည့်ထားတာလဲ ...”

စွေ့ချီချောင်းက အကျယ်တဝင့် ရှင်းပြလိုက်သည်။ 

“ ဘိုးဘွားပိုင်စားသောက်ဆိုင်ဆိုတော့ သူဌေးက အရင်ပုံစံကို ပြောင်းလဲမပစ်ချင်လို့ ထင်တာပဲ ...”

စက်ရုပ်စားပွဲထိုးက ရှောင်ပိုင်အား မီနူးကို ဘာသာပြန်ပြကာ ဟင်းလျာမှာယူရာ၌ ကူညီပေးနိုင်သော်ငြား စွေ့ချီချောင်းကိုယ်တိုင် ကူညီမှာယူပေးသည်လောက် အကျိုးမရှိလှပေ။ 

သူက ရှောင်ပိုင်၏အကြိုက်များနှင့် ရင်းနှီးနေပြီး ဖြစ်သည့်အတွက် ဟင်းလျာများကို အမြန်မှာယူနိုင်ခဲ့သည်။ ထို့နောက် ရှောင်ပိုင်ဘက်မှ စကားမစမီ သူက ဦးစွာပြောလိုက်သည်။ 

“CU မှာ ကြောင်ဖြစ်တာ ပထမဆုံးအကြိမ် မလား ...”

ကျန်းထန်ဝေ့က နောက်တစ်ကြိမ် ကြောင်အသွားပြန်တော့သည်။ ယခင်က စွေ့ချီချောင်းမှာ အမြဲလိုလို “အတိတ်အကြောင်း ပြန်ပြောင်းပြောရန်”ကို ငြင်းဆန်လေ့ ရှိခဲ့သည်။ သို့သော် ရှောင်ပိုင်၏ ထက်သန်လှသော စောဒကတက်မှုများကြောင့် သူ့ဘက်မှ ထိုအကြောင်းအရာကို အရင် စပြောလိုက်ရတော့သည်။ 

ကျန်းထန်ဝေ့ကမူ စွေ့ချီချောင်း၏ ရည်ရွယ်ချက်ကိုပင် မှန်းဆမနေအားဘဲ အတိတ်အကြောင်းများကို ပြန်စဉ်းစားကာ ပြောလိုက်သည်။ 

“ဟုတ်တယ် အရင်ကလည်း လျှောက်ကစားရအောင်ဆိုပြီး LJJ ရဲ့ မှတ်ဉာဏ်တုလေယာဉ်ထဲကို ခဏခဏ ဝင်ခဲ့ဖူးသေးတယ် ဒါပေမယ့် ကြောင်အဖြစ် နေတာကတော့ အဲဒါ ပထမဆုံးပဲ ကြောင်တွေရဲ့ သမိုင်းကြောင်းကိုလည်း သေချာ မလေ့လာခဲ့မိဘူးလေ မင်းက 'မင်းက တကယ်ရော ကြောင် ဟုတ်လို့လား ဘယ်လို ထိုင်ရမလဲ ဆိုတာကိုတောင် မသိဘဲနဲ့' လို့ ပြောလိုက်တော့ တော်တော်လေးကို ပူထူပြီး ပျာယာခတ်သွားတာ ...”

စင်စစ်အားဖြင့် ရှောင်ပိုင်၏ စိတ်အခြေအနေမှာ အလွန် ကြံ့ခိုင်သည်ဟု သတ်မှတ်နိုင်သည်မှာ နှိုင်းယှဉ်ချက်တစ်ခုမျှသာ ဖြစ်ပြီး သူက အဆင့်တစ်ခုကို ထိန်းထားရာ၌ စွေ့ချီချောင်းထက်ပင် ပိုပြီး အခြေအနေ ဆိုးနေပေသေးသည်။ မည်သည့်အခြေအနေတွင်ဖြစ်စေ သူ့ကို ရှာတွေ့သွားပြီဟု သိလိုက်ရသည်နှင့်တပြိုင်နက် ရှောင်ပိုင်က အလွန် စိတ်ဖိစီးလာတတ်ပေသည်။ ထို့အပြင် ထိုအချိန်က သူ့သရုပ်မှန်ကို သံသယဝင်သူနှင့် ပထမဆုံးအကြိမ် ကြုံတွေ့ရခြင်းလည်း ဖြစ်နေပေသေးသည်။ 

သို့သော် ထိုအချိန်က စွေ့ချီချောင်းသည်လည်း ရှောင်ပိုင်မှာ ကြောင်အစစ် ဟုတ်မဟုတ် အသေအချာ ခွဲခြားသိခဲ့ခြင်း မဟုတ်ပေ။ CU တွင် ရှောင်ပိုင် ခံစားခဲ့ရသည့် တင်းအားမှာလည်း စိတ်လှုပ်ရှားမှုဟုသာ သတ်မှတ်နိုင်ပေသည်။ 

“ငါလည်း အမှားလုပ်ခဲ့မိတယ် သေချာ ဂရုတစိုက်နဲ့ စုံစမ်းကြည့်လိုက်ကာမှ လမ်းပြကြောင်က အဲဒီ့အချိန်မှာ တကယ်ပဲ ထွက်လာခဲ့တယ် ဆိုပေမယ့် တိတိကျကျ ထွက်လာရမယ့်အချိန်က နောက်ပိုင်းမှတဲ့လေ ...”

စွေ့ချီချောင်းက ပြောလိုက်သည်။ 

ထိုသို့ဖြင့် သူတို့နှစ်ဦးက အတိတ်အကြောင်းများကို ပြန်လည်ကာ စားမြုံ့ပြန်လိုက်ကြတော့သည်။ ဤသည်မှာ အင်တာနက်သုံးစွဲသူနှစ်ဦး တွေ့ဆုံသည့်အခါ ဖြစ်လေ့ရှိသည့် ဖြစ်ရပ်မျိုးပင် ဖြစ်ပေသည်။ သူတို့နှစ်ဦးမှာ ယခင်ကလည်း အခြားသော ပုံရိပ်ယောင်ကမ္ဘာတွင် တွေ့ခဲ့ဖူးသည်ဆိုသည့်တိုင် သူတို့အတွက် ဤသို့ တွေ့ဆုံနိုင်ရန် အလွန် နောက်ကျနေပြီဟု ပြောနိုင်သည့်အတွက် ကောင်းမွန်စွာ စကားလက်ဆုံကျနေလိုက်ကြတော့သည်။ 

CU၏ ငရုတ်သီးဖြစ်စေ၊ အလယ်ခေတ်မှ အုတ်ဂျုံဖြစ်စေ၊ အမည်မဲ့ဂြိုဟ်၏ ဆလပ်ရွက်ဖြစ်စေ ကျင့်ကြံရေးလောက၏ စိတ်စွမ်းအင်စက်ပင်ဖြစ်စေ သူတို့နှစ်ဦးက ထိုအရာများအားလုံးကို အတူတူ ကြုံတွေ့ဖြတ်သန်းခဲ့ကြရာ စွေ့ချီချောင်းအနေဖြင့် ရှောင်ပိုင်နှင့် စကားပြောလိုစိတ် ရှိပါလျှင် ပြောစရာ အကြောင်းအရာ ရှားပါးခြင်း မရှိသည့်အတွက် ဤစကားဝိုင်းတွင် တစ်ဦးနှင့်တစ်ဦး အနေရခက်နေစရာ မလိုချေ။ 

“တကယ်တမ်း ပြောရရင် ငါ အခုအချိန်အထိ မင်းကို ရှောင်ပိုင်လို့ပဲ ခေါ်မိနေတုန်းပဲ ...”

စွေ့ချီချောင်းက အဓိပ္ပါယ်များ ပြည့်နှက်နေသည့် အပြုံးတစ်ပွင့်ဖြင့် ပြောလိုက်သည်။ 

ထိုအပြုံးကို မြင်လိုက်သည့် ကျန်းထန်ဝေ့က သူ့ကိုယ်သူ မူးမေ့လဲတော့မတတ်ပင် ခံစားမိလာခဲ့သည်။ ဤသည်မှာ သူ သောက်နေသည့် ဝိုင်နှင့်လည်း မသက်ဆိုင်ပေ။ ထိုကဲ့သို့သော အလားတူ ခံစားချက်မျိုးကို ယခင်ကလည်း ကြုံတွေ့ခဲ့ရဖူးသည့်ဟန်ပင်။ စွေ့ချီချောင်းက သူ့ကို အကြိမ်များစွာ ထိတွေ့ပွေ့ဖက်ချိန်တိုင်း ခံစားရသည့် ခံစားချက်များနှင့် များစွာ ဆင်တူလှသည်။ 

သို့သော် သူက ကျိုးကြောင်းဆင်ခြင်နိုင်စွမ်းကို လုံးဝဥဿုံ မဆုံးရှုံးသေး၍ ပြောလိုက်သည်။ 

“ကျွန်တော်ကို ရှောင်ပိုင်လို့ ခေါ်လည်း ကိစ္စမရှိပါဘူး ကျွန်တော့်ရဲ့ မျိုးရိုးနာမည်က ဘာလဲဆိုတာ သိရင် ရပြီ ...”

သူက ကြောင်တစ်ကောင် ဖြစ်ပေးနိုင်သော်ငြား စွေ့ချီချောင်း တစ်ဦးတည်းအတွက်သာ ဖြစ်ပေးနိုင်မည် ဖြစ်သည်။ လက်တွဲဖော်တစ်ဦးအပေါ် စွေ့ချီချောင်း၏ လိုလားချက်များကို ဖြည့်တင်းနိုင်ရန် အလို့ငှာ သူက စွေ့ချီချောင်း၏စိတ်ထဲတွင်  ပိုမိုစစ်မှန်ကာ အရေးပါသည့် နေရာတစ်ခု ယူထားရမည်ဖြစ်ကာ သူက ကျန်းထန်ဝေ့ဖြစ်ကြောင်း စွေ့ချီချောင်း၏ စိတ်ထဲသို့ တဖြည်းဖြည်း ပျံ့နှံ့စေခြင်းဖြင့် သိစေမည် ဖြစ်သည်။ 

စွေ့ချီချောင်းကလည်း သူက ရှောင်ပိုင်၏ မျိုးရိုးနာမည်ကို နှစ်ကြိမ်တိုင်တိုင် မှားခေါ်ခဲ့မိကြောင်း သတိရသွားသည့်အတွက် နောက်တစ်ကြိမ် ထပ်ပြုံးလိုက်ပြန်သည်။ 

“ကောင်းပါပြီ မစ္စတာကျန်း ...”

စွေ့ချီချောင်းက ရှောင်ပိုင်၏ မိသားစုအကြောင်းနှင့် သူ ကြီးပြင်းခဲ့ရာ ပတ်ဝန်းကျင်အကြောင်းကို အနည်းငယ် သိရှိခဲ့ရသည်။ ရှောင်ပိုင်က အသက် ၁၂ နှစ်အရွယ်ကတည်းက မိဘများနှင့် ခွဲနေခဲ့ရကာ မိဘများကလည်း မွေးဖွားပြီးနောက် သူ့ကို များစွာဂရုမစိုက်ခဲ့ကြချေ။ သူတို့က အပြင်လောကသို့ အပျော်ခရီးထွက်မည်ဟု ပြောကာ ထွက်သွားပြီးချိန်မှ၍ ပြန်မလာခဲ့ကြတော့ချေ။ ရှောင်ပိုင်က သူတို့၏ ဘဏ္ဍာရေးအခြေအနေကို စစ်ဆေးကြည့်လိုက်မှ ထိုသူများက အပြင်လောကတွင် ကောင်းမွန်စွာ နေထိုင်နေကြကြောင်း သိလိုက်ရတော့သည်။ 

ကောင်းမွန်သော ငွေကြေးထောက်ပံ့မှုများ ရရှိခဲ့သည့်အတွက် ရှောင်ပိုင်က သူ့ခြေထောက်ပေါ်သူ ရပ်တည်နိုင်ခဲ့ကာ အခြားသူများ၏ စနစ်အတွင်းသို့ ချိုးဖောက်ဝင်ရောက်နိုင်သည်အထိ နည်းပညာတွင် ဆရာတစ်ဆူ ဖြစ်လာခဲ့တော့သည်။ 

“မင်း တကယ်ပဲ အသက်ပြည့်ပြီးတာလား အသက်ကို လိမ်ထားတာတော့ မဟုတ်ပါဘူးနော်  ...”

စွေ့ချီချောင်းက မေးလိုက်သည်။ 

ရှောင်ပိုင်က သူနှင့် ချိန်းတွေ့နိုင်ရန်အတွက် အသက်လိမ်ထားလိမ့်မည်ဟု မတွေးမိသည့်တိုင် အရွယ်ရောက်ပြီးမှသာ လုပ်ဆောင်နိုင်သည့် ကိစ္စများ အများအပြား ရှိနေသည့်အပြင် ရှောင်ပိုင်ကလည်း သူ့စိတ်ဆန္ဒကို ကောင်းစွာ မထိန်းချုပ်နိုင်ရာ ...

သူက အသက်ကို တကယ်ကြီး လိမ်ထားတာတော့ မဟုတ်လောက်ပါဘူးနော် ...

ကျန်းထန်ဝေ့မှာ ဒေါသထွက်ရလွန်း၍ မျက်ဖြူလှန်ပြမိလုမတတ်ပင် ဖြစ်သွားတော့သည်။ 

“ကျွန်တော်က အသက်ပြည့်ပြီးသား .. အရွယ်ရောက်ပြီးသားလို့ ....”

သူက သူ့မျက်နှာကို ဖျစ်ညှစ်ပြကာ ခွကြားကိုပါ လက်ညှိုးထိုးပြလိုက်သည်။ 

“ကျွန်တော့်ရုပ်က အသက်မပြည့်သေးတဲ့သူနဲ့ တူနေလို့လား ....”

စွေ့ချီချောင်း : “...”

ခွကြားကိုပါ ပြနေစရာတော့ မလိုပါဘူးနော် ဟုတ်ပြီလား ...

သူက တီးတိုး ပြောလိုက်သည်။ 

“တောင်းပန်ပါတယ် ငါက ဒီတိုင်းပဲ မေးလိုက်တာပါ ...”

“အို လာလာလာလာ... အို လာလာလာလာ …”

အရုပ်ဝတ်စုံ ဝတ်ဆင်ထားသည့် စက်ရုပ်တစ်ရုပ်က လက်ထဲတွင် ကိတ်မုန့်တစ်လုံးကို သယ်ဆောင်ကာ ကလေးချော့တေးတစ်ပုဒ်ကို ဆိုလျက် သူတို့အရှေ့သို့ ရောက်လာသည်။ ထို့နောက် သူတို့၏ အရှေ့တွင် ရပ်တန့်ကာ မွေးနေ့သီချင်းကို ဆိုလိုက်၏။ 

“ပျော်ရွှင်ဖွယ်ရာ မွေးနေ့လေး ဖြစ်ပါစေ ဒါက ကလေးလေး ကလေးလေးအတွက်ပါ... ပြီးတော့ အခမဲ့နော် ...”

စွေ့ချီချောင်း : “...”

ကျန်းထန်ဝေ့ : “...”

မျက်နှာဖြတ်ရိုက်တဲ့ ဇာတ်ကွက်က ချက်ခြင်းကြီးကို ရောက်လာတာပါလား ...

စွေ့ချီချောင်းက မျက်ခုံးနှစ်ဖက်ကို စုတွန့်ကာ သူ့ကို စူးစူးရဲရဲ စိုက်ကြည့်လိုက်သည်။ 

“မင်း တကယ်ပဲ အသက်မပြည့်သေးတာလား ...”

စောစောက ကျန်းထန်ဝေ့ တအား ဒေါသထွက်နေတဲ့ပုံစံကို မြင်လိုက်ရတော့ သူ့စကားတွေကို တကယ်ကြီး ယုံမိသွားတော့မလို့...

ကျန်းထန်ဝေ့ကလည်း အလွန် ထိတ်လန့်သွားရသည့်ဟန်ဖြင့် သူ့ကိုယ်ရေးအချက်အလက်များကိုပင် ထုတ်ပြကာ ရေးကြီးသုတ်ပျာ ရှင်းပြလိုက်သည်။ 

“ဖာ့ခ် ... ကျွန်တော် မဟုတ်ဘူး မင်းကို မလိမ်ဘူးလို့ ...”

စွေ့ချီချောင်း : “သူက မင်းကို ကလေးလေးလို့ ခေါ်လိုက်တယ်လေ ...”

ကျန်းထန်ဝေ့ : “ကျွန်တော်က အသက်မပြည့်သေးတဲ့သူ ဖြစ်ခဲ့ရင်တောင် ကလေးလေးလို့ ခေါ်ရလောက်တဲ့အထိတော့ မဟုတ်ပါဘူးနော် ဟုတ်ပြီလား ...”

ကံကောင်းထောက်မစွာဖြင့် ထိုအချိန်မှာပင် စက်ရုပ်က သူတို့နှစ်ဦးကို ဦးညွတ်ကာ အနူးအညွတ် ဆိုလာခဲ့သည်။ 

“အနှောင့်အယှက် ပေးမိတဲ့အတွက် တောင်းပန်ပါတယ် ...”

၎င်း၏ပုံစံကို ကြည့်ရသည်မှာ အမှားတစ်ခု လုပ်မိသွားသည့်ဟန်ပင်။ သူက ချက်ချင်း အခြားစားပွဲတစ်ခုသို့ ရွှေ့သွားတော့သည်။ 

ထိုအခါမှ ကျန်းထန်ဝေ့လည်း သက်ပြင်းချနိုင်သွားကာ ကုလားထိုင်ပေါ်သို့ အပုံလိုက် ထိုင်ချမိသွားတော့သည်။ 

“မင်းရဲ့ သံသယကို ရှင်းပြလို့ မရတော့မယ့် အဖြစ်မျိုး ဖြစ်တော့မလို့ ... အမှိုက်လိုစက်ရုပ် ...”

စက်ရုပ်များတွင် အမှားဖြစ်နိုင်ချေမှာ အလွန် နည်းပါးလှသော်ငြား အမှားလုပ်မိခြင်း လုံးဝမရှိသည် မဟုတ်ပေ။ ထိုကိစ္စ ဖြစ်သွားခြင်းမှာလည်း တိုက်ဆိုင်မှု တစ်ခုမျှသာ ဖြစ်ပေသည်။ 

စွေ့ချီချောင်းက နောက်တစ်ကြိမ် တောင်းပန်လိုက်ရပြန်သည်။

“တောင်းပန်ပါတယ် ...”

ကျန်းထန်ဝေ့က ထိုစကားကို အခွင့်အရေးယူကာ ဆက်ပြောလိုက်သည်။ 

“ဒါဆို မနက်ဖြန်ကျ မင်းရဲ့တိုက်ခန်းမှာ ထမင်းဖိတ်ကျွေး ကျွန်တော် ငါးစားချင်တယ် ...”

စွေ့ချီချောင်းက ငြင်းဆန်လိုက်သည်။ 

“မနက်ဖြန် ရိုက်ကွင်းကို သွားရမှာ ...”

“အိုး ဟုတ်သားပဲ ...”

ကျန်းထန်ဝေ့က စိတ်ပျက်လက်ပျက်ဖြင့် ပြောလိုက်သည်။ သို့သော် ချက်ခြင်း ပျော်မြူးသွားပြန်၏။ 

“ရိုက်ကွင်းမှာလည်း တွေ့ရဦးမှာပဲဟာ ...”

အစောပိုင်းက လုပ်ခဲ့မိသည့် အမှားအတွက် စက်ရုပ်က နောက်တစ်ကြိမ် သနားစဖွယ်ကောင်းစွာ တောင်းပန်လိုက်ပြန်သည်။ ၎င်းက သူ့လက်ထဲရှိ ဗန်းထဲတွင် ပန်းစည်းနှစ်ခုကိုလည်း တင်ထား၏။ ကလေးများအတွက် မွေးနေ့လက်ဆောင်မှာ အလှဆင်ထားသည့် လက်ဆောင်များ ဖြစ်နေပါလျှင် ၎င်းကမူ သူတို့ ဝတ်ဆင်ထားသည့် အဝတ်အစားကို အခြေခံကာ သီးသန့် ပြင်ဆင်ထားခြင်း ဖြစ်ပေလိမ့်မည်။ 

“ကိစ္စမရှိပါဘူး ...”

စွေ့ချီချောင်းက ပြန်ပြောလိုက်သည်။ သူက ထိုပန်းများကို လက်ခံရန်လည်း အကြံမရှိချေ။ 

သို့သော် ကျန်းထန်ဝေ့က ပန်းများကို အမြန် လက်ခံလိုက်သည်။ ပန်းများမှာ ဂြိုဟ်၏ ထူးခြားပစ္စည်းများ ဖြစ်ကြကာ အရောင်မှာ အပြာရောင်ခပ်ဖျော့ဖျော့ ဖြစ်သည်။ သူက သူ့အင်္ကျီအိတ်ကပ်ထဲသို့ တစ်ပွင့် ထည့်ပြီးနောက် နောက်တစ်ပွင့်ကို စွေ့ချီချောင်း၏ အိတ်ကပ်ထဲသို့ ထည့်ပေးရန် အရှေ့သို့တိုးလာလိုက်သည်။ 

စွေ့ချီချောင်းက ရှောင်တိမ်းလိုက်သော်ငြား သူ ရွေ့လျားနိုင်သည့်နေရာမှာ အကန့်အသတ်ရှိနေသည့်အပြင် ရှောင်ပိုင်မှာလည်း အလွန် စိတ်အားထက်သန်နေပေသည်။ သူက တစ်ဖက်လူ စားပွဲပေါ်သို့ ခုန်တက်လာမည်ကို စိုးရိမ်စိတ်ကြောင့် နောက်သို့ အနည်းငယ် ဆုတ်လိုက်မိတော့သည်။ 

စွေ့ချီချောင်းတွင် ‌ရွေးစရာ မရှိတော့၍ သူ့အိတ်ကပ်ထဲသို့ ပန်းထည့်ပေးနေသည့် ရှောင်ပိုင်၏ လုပ်ရပ်များကိုသာ ထိုင်ကြည့်နေလိုက်ရတော့သည်။ ထို့နောက် ရှောင်ပိုင်က သူ့ကို အောင်ပွဲခံသည့် အကြည့်ဖြင့် စိုက်ကြည့်ကာ နောက်ပြန်မဆုတ်ဘဲ သူ့မျက်နှာကို စွေ့ချီချောင်းအနီးသို့ တစ်ဖြည်းဖြည်း တိုးသွားလိုက်သည်။ 

ကျန်းထန်ဝေ့၏ တွေးခေါ်ပုံမှာ ဤသို့ပင်။ 

ဒီလောက်တောင် နီးနေပြီပဲဟာ .. သေချာပေါက်ကို နမ်းကြရမှာပေါ့ ...

စွေ့ချီချောင်းကလည်း အကြောင်းပြချက် မရှိဘဲ ဆူထွက်လာသည့် ကျန်းထန်ဝေ့၏ နှုတ်ခမ်းများကို တွေ့လိုက်ရသည်။ ကျန်းထန်ဝေ့၏ ပုံစံမှာ မစောင့်နိုင်တော့သည့်ဟန်ပင်။ သူက ပြုံးကာ တစ်ဖက်သူကို နောက်သို့ ပြန်တွန်းလိုက်သည်။ 

“စိတ်ကို အေးအေးထားပါဦး မစ္စတာကျန်းရဲ့ အသက်ပြည့်ပြီးသား လူတွေက ရေဘဝဲလိုမျိုး နှုတ်ခမ်းကို စူမထားဘူးနော် ...”

အလွန်အမင်း စိတ်ပျက်သွားမိသည့် ကျန်းထန်ဝေ့  “...”

သို့သော် စားသောက်ဆိုင်ဝန်ထမ်းများက သူတို့နှစ်ဦးကို ချစ်သူဟု ယူဆကြ၍သာ ပန်းများကို ဆင်တူ ပြင်ဆင်ပေးခြင်း ဖြစ်ရမည်ဟု တွေးလိုက်မိသည့်အခါတွင်မူ သူ၏ မကျေနပ်မှုအားလုံး လွင့်စင်ပပျောက်သွားရပြန်တော့သည်။ 

စွေ့ချီချောင်းက မတ်တပ်ထရပ်ကာ ပြောလိုက်သည်။ 

“နောက်ကျနေပြီဆိုတော့ ဒီမှာပဲ လက်စသတ်လိုက်ကြတာပေါ့ ...”

ကျန်းထန်ဝေ့ကလည်း သူ့ကိုယ်သူ နှုတ်ခမ်း မစူခဲ့သင့်ဟု ခံစားနေခဲ့မိသည်။ အားလုံး ပြီးပြည့်စုံသည်ဟု ခံစားရကာမှ တင့်တယ်စွာဖြင့် မတ်တပ်ရပ်ကာ ဖိအားပေးလိုသည့် လေသံဖြင့် ပြောလိုက်သည်။ 

” တိုက်ခန်းကို ပြန်လိုက်ပို့ပေးမယ် ...”

သူတို့နှစ်ဦးက သီးခြားစီ ရောက်လာခဲ့ကြခြင်း ဖြစ်သော်ငြား ကျန်းထန်ဝေ့က ယနေ့ စွေ့ချီချောင်း၏ အပြုအမူများကြောင့် ပုံမှန်ချန်နယ်များကို အသုံးပြုမှသာ သူနှင့် အဆက်အသွယ် လုပ်လိုသည်ဟု အတိုင်းသား ဖော်ပြနေသည်ဟု ကောက်ချက်ချလိုက်တော့သည်။ 

ဒီလိုဆိုမှတော့ .. စွေ့ချီချောင်းရဲ့ ကျော်ကြားမှု တိုးတက်လာအောင် ကူညီပြီး ဟိုးအရင်တုန်းက သူ့ကို သွားပုပ်လေလွင့် ပြောထားတဲ့ ပို့စ်တွေကို ဖျက်ပေးသင့်တယ် မဟုတ်လား ...

ကျန်းထန်ဝေ့က အတွေးများအကြား နစ်မြောသွားတော့သည်။ 

🌲🌲🌲