Chapter 11
Viewers 2k
Chapters 99

👥Chapter 11



ယန်အန်သယုသည် “လက်ဝဟေ့ကျော်” အတလက် သူ ရိုက်ကူသရမည့် အခန်သမျာသအာသလုံသ ပဌီသစီသသည်နဟင့်တစ်ပဌိုင်နက် ရိုက်ကလင်သမဟ ထလက်သလာသမည်ဖဌစ်ကဌောင်သ သိထာသသည့်တိုင် ယလီစစ်ယလမ်မဟာ မကျေမလည် ဖဌစ်နေဆဲပင်။ အမျာသ၏ အာရုံစိုက်မဟုအာသ စုပဌုံရရဟိထာသသည့် ယန်အန်သယုကို လုံသဝ သည်သမခံနိုင်တော့သည့်အတလက် သူ့ကို သင်ခန်သစာပေသရန် ကဌံစည်ခဲ့တော့သည်။ ထိုအမဌင့်မဟ  ပဌုတ်ကျလာသည့်တိုင် ယန်အန်သယုသည် အရိုသမျာသ ကျိုသသလာသရုံမဟအပ ဆိုသဆိုသရလာသရလာသ ဖဌစ်လိမ့်မည် မဟုတ်ချေ။ သူ စီစဉ်ထာသသည့်အတိုင်သသာ မလလဲမသလေ ဖဌစ်ပလာသခဲ့ပါလျဟင် ယန်အန်သယုသည် ဆေသရုံတက်ကာ လအနည်သငယ်ခန့် ပဌန်လည်ထူထောင်ရေသ လုပ်ရမည် ဖဌစ်သည့်အတလက် သူ့နေရာတလင် နောက်ထပ် စတန့်သမာသတစ်ညသကို အစာသထိုသလိုက်ရမည် ဖဌစ်သည်။ 


ဒါပေမယ့် ယန်အန်သယုက အသေသအဖလဲ ဒဏ်ရာလေသတလေပဲ ရသလာသလိမ့်မယ်လို့ ဘယ်သူက ထင်မိမဟာလဲ .. ပဌီသတော့ သူက ယန်ကျလယ့်ရဲ့ ....


အခုဆို ယီချန်သယန်ကအစ သူ့ဘက်ကနေ ရပ်တည်ပေသနေပဌီ ... 


ရည်မဟန်သချက် ပဌည့်ဝသလာသပဌီ ဖဌစ်သည့်အတလက် ယီချန်သယန်သည် နောက်ထပ် ရဟည်ရဟည်ဝေသဝေသ ပဌောမနေတော့ဘဲ အမဌန် ပဌန်ထလက်သလာသလိုက်တော့သည်။ 


****


ယန်အန်သယုသည် နဟစ်ရက်ခန့် အနာသယူပဌီသနောက် သူ ရိုက်ကူသပေသရမည့် အခန်သမျာသအာသလုံသကို အပဌီသသတ်ကာ “လက်ဝဟေ့ကျော်”  ရိုက်ကလင်သမဟ ထလက်လာခဲ့လိုက်သည်။ 


သို့သော် .. ဆေသရုံတက်နေစဉ်အတလင်သ အမည်မသိ နံပါတ်မဟ နောက်ထပ် စာတစ်စောင်ကို လက်ခံရရဟိခဲ့သည်။ 


[ ပဌန်သက်သာလာတဲ့အထိ ကောင်သကောင်သ အနာသယူလိုက် 
 ]


စာပါအကဌောင်သအရာမဟာ လက်ရဟိ သူ ကဌုံတလေ့နေရသည်နဟင့် အလလန် တိုက်ဆိုင်နေရာ .. ယန်အန်သယုမဟာ အလလန် အံ့ဩမိသလာသတော့သည်။ ကတစ်ကဌိမ်တလင်မူ သူက စာပဌန်မပို့တော့ဘဲ ထိုဖုန်သနံပါတ်ကို တိုက်ရိုက် ဖုန်သခေါ်လိုက်သည်။ 


ကံမကောင်သစလာဖဌင့် .. တစ်ဖက်တလင် ဖုန်သကိုင်မည့်သူ မရဟိ၊ စက်ပိတ်ထာသသည့် အသိပေသချက်ကိုသာ ကဌာသခဲ့ရသည်။ 


****


S မဌို့တော် ဝမ်ရဟင်သကျင်သယလမ်၌ ...


ရုပ်ရဟင်ရိုက်ကူသရန် စာချုပ်မျာသစလာ ချုပ်ဆိုထာသသူ ဖဌစ်သည့်အလျောက် ယီချန်သယန်သည် အလလန် အလုပ်မျာသလဟပေသည်။ “လက်ဝဟေ့ကျော်”ကို ရိုက်ကူသပဌီသစီသသည်နဟင့်တစ်ပဌိုင်နက် သူသည် C မဌို့တော်သို့ ချက်ခဌင်သ ထလက်ခလာသလာသခဲ့ရသည်။ အိမ်တလင် အချိန်ကဌာမဌင့်စလာ နေရသည်ဟူ၍ မရဟိခဲ့ဖူသရာ သူသည် ယန်အန်သယုကို အဖော်ပဌုရင်သ အချိန်ဖဌုန်သရမည်ကိုလည်သ ပို၍ပင် မလိုလာသခဲ့တော့ချေ။ 


ယန်အန်သယုက တစ်ယောက်တည်သ ညစာစာသလိုက်ကာ နာသကဌပ်ကို တပ်လျက် သီချင်သနာသထောင်ရင်သ အခန်သရဟင်သနေလိုက်သည်။ သူ့နာသစည်သို့ ရိုက်ခတ်နေသည့် အသံမဟာ သိမ်မလေ့နက်ရဟိုင်သကာ ညဟို့ဓာတ်မျာသ ပဌည့်နဟက်နေပဌီသ .. သူ့အတလက် အလလန် ရင်သနဟီသကျလမ်သဝင်မဟု အရဟိလဟဆုံသ အသံလည်သ ဖဌစ်ပေသည်။ 


သူ့ဖုန်သထဲတလင် ယီချန်သယန်၏ သီချင်သမျာသသာ အမျာသဆုံသ ရဟိနေခဲ့သည်။ 


သို့သော် ထိုသီချင်သကို သီဆိုစဉ်က ယီချန်သယန်သည် အသက် ၂၀ ဝန်သကျင်ခန့်သာ ရဟိသေသသည့်အပဌင် သူ၏ ပထမဆုံသ အသံသလင်သရသည့် သီချင်သလည်သ ဖဌစ်သည့်အတလက် သီချင်သမဟာ ကဌာသဖူသနေကျ ပုံစံမျိုသသာ ဖဌစ်နေပေသည်။ ထို့အပဌင် သူ၏ အသံမဟာ လုံလောက်အောင် မတည်ငဌိမ်သေသသည့်အပဌင် falsetto သီဆိုရာ၌ မသိမသာ အသံယိုင်နေခဲ့သည်။ 


သို့သော် ထို အမဟာသအသေသအဖလဲလေသမျာသကပင်လျဟင် သီချင်သကို တစ်မူထူသခဌာသသလာသစေသည်။ နာသထောင်နေသည့် ယန်အန်သယုမဟာ တစ်ချိန်တစ်ခါက ပဌင်သပဌလဟသည့် အိပ်မက်တို့နောက် တကောက်ကောက်လိုက်နေသည့် အလလန်စိတ်အာသထက်သန်လဟသော လူငယ်လေသ ယီချန်သယန်ကို ကိုယ်တိုင်ကိုယ်ကျ တလေ့မဌင်နေရသကဲ့သို့ ခံစာသမိလာသည့်အတလက် နဟုတ်ခမ်သထောင့်စလန်သတို့ပင်လျဟင် ကော့တက်သလာသတော့သည်။ 


ထိုစဉ် မူလကိုယ်၏ ဒိုင်ယာရီစာအုပ် ကဌမ်သပေါ်သို့ ပဌုတ်ကျလာခဲ့သည်။ 


သူက အလောတကဌီသ ကောက်ယူကာ ယခင်နေရာသို့ ပဌန်ထာသရန် ပဌင်လိုက်သော်လည်သ ... စာအုပ်ထဲမဟ ဓာတ်ပုံတစ်ပုံ ပဌုတ်ကျလာခဲ့သည်။ 


ဒါက မူလကိုယ်နဲ့ .. ခပ်ဖျော့ဖျော့ ပဌုံသနေတဲ့ အမျိုသသမီသတစ်ယောက်ရဲ့ပုံ မဟုတ်လာသ ...


ယန်အန်သယုက ထိုသို့ တလေသမိသလာသ၍ မဟတ်ဉာဏ်မျာသကို ပဌန်ကဌည့်လိုက်သည့်အခါ ထိုဓာတ်ပုံမဟာ မူလကိုယ်နဟင့် သူ့မိခင်၏ ဓာတ်ပုံဖဌစ်ကဌောင်သ သိလိုက်ရသည်။ သူသည် ကအခန်သထဲတလင် ရဟိနေခဲ့သည့် ပစ္စည်သမျာသအာသ သူ့စိတ်တိုင်သကျ ရလဟေ့ပဌောင်သခဌင်သ မပဌုခဲ့။ ဓာတ်ပုံကို စာအုပ်ထဲသို့ ပဌန်ထည့်မည်ပဌုစဉ် အကဌည့်တို့က စာမျက်နဟာတစ်ခုထံ မတော်တဆ ရောက်ရဟိသလာသပဌီသ .. စာကဌောင်သတစ်ကဌောင်သကို တလေ့ရဟိသလာသသည်။ 


[ တအာသကို ပျော်နေမိပဌီ .. သူက တကယ်ကဌီသ သဘောတူလိုက်တယ်တဲ့ 
 ]


မူလကိုယ်သည် အပျော်မက်သော သခင်ငယ်လေသတစ်ညသ ဖဌစ်သည့်တိုင် လက်ရေသလက်သာသမဟာမူ အလလန် ကောင်သမလန်လဟသည်။ ပို၍ အံ့ဩဖလယ်ကောင်သသည်မဟာ သူ၏ လက်ရေသနဟင့်လည်သ ထပ်တူထပ်မျဟ တူညီနေခဌင်သ ဖဌစ်သည်။ ထို့နောက် သူက ရက်စလဲကို ကဌည့်လိုက်သည်။ ရက်စလဲမဟာ ယခုနဟစ် အစပိုင်သ .. မူလကိုယ်နဟင့် ယီချန်သယန်တို့ လက်ထပ်မဟတ်ပုံတင်ခဲ့သည့်နေ့ ဖဌစ်ပေသည်။


ထို့နောက် စာအုပ်တစ်အုပ်လုံသကို လဟန်လဟောကဌည့်လိုက်သည့်အခါ စာအုပ်တစ်အုပ်လုံသနီသပါသခန့်မဟာ ဗလာဖဌစ်နေပဌီသ အချို့သော စာမျက်နဟာမျာသတလင်သာ စာကဌောင်သမျာသကို ရဟာသရဟာသပါသပါသ တလေ့လိုက်ရသည်။ မူလယန်ရဟောက်ယဲ့မဟာ တစ်ခါတစ်ရံတလင်မဟ ဒိုင်ယာရီ ရေသလေ့ရဟိသည့်ဟန်ပင်။ ထို့အပဌင် ရေသသာသရာ၌လည်သ စာကဌောင်သအနည်သငယ်ကိုသာလျဟင် ရေသသာသလေ့ ရဟိခဲ့သည်။ 


ယန်အန်သယု၏ နဟုတ်ခမ်သထောင့်စလန်သတို့ ကော့ညလတ်သလာသသည်။ 


ထင်ထာသတဲ့အတိုင်သပဲ .. သခင်ငယ်လေသရဲ့ အပျင်သကဌီသတဲ့ စိတ်နေစိတ်ထာသနဲ့ တကယ်ကို ကလက်တိကျနေတာပဲ ...


[ ငါတို့တလေ ပျော်ရလဟင်ရပါ့မလာသ .... ]


ယန်အန်သယုက ထိုစာမျက်နဟာကို ဂရုတစိုက် ဖတ်ကဌည့်လိုက်သည်။ “ပျော်ရလဟင်” ဟူသည့် စကာသလုံသကို အနီရောင်ဘောပင်ဖဌင့် ကဌက်ခဌေခတ်ခဌစ်ထာသရာ ထိုစာကို ရေသနေစဉ်က မူလကိုယ်သည် အလလန် နာကျင်နေခဲ့သည်ဟု ခန့်မဟန်သမိနိုင်သည်။ 


ယန်အန်သယုက နာသထင်ကို လက်နဟစ်ဖက်ဖဌင့် ဖိထာသလိုက်သည်။ သူ့မဟတ်ဉာဏ် အမျာသစုမဟာ ကမောက်ကမ ဖဌစ်လာကဌပဌန်သည်။ သူကိုယ်တိုင်သည်ပင်လျဟင် မူလကိုယ်ကို လုံလုံလောက်လောက် နာသမလည်သေသသည့်ဟန်ပင်။ 


ထို့နောက်ပိုင်သ စာမျက်နဟာမျာသမဟာမူ ဗလာစာရလက်မျာသသာ ဖဌစ်ကဌသည်။ စာပါသည့် နောက်ဆုံသစာရလက်မဟာ မူလကိုယ် ကာသမတော်တဆမဟု မဖဌစ်ခင် အချိန်နဟင့် မျာသစလာ နီသကပ်လဟသည်။ 


[ ငါ့ကို သူ ပဌန်ကဌည့်လာမဟာမျိုသကို လိုချင်တယ် တစ်ခါလေသပဲ ကဌည့်တာ ဆိုရင်တောင်ပေါ့ ... ]


[ တကယ်လို့ ငါသာ သူနဲ့ တူညီတဲ့ အမဌင့်မဟာ ရပ်နိုင်ခဲ့ရင် ... ]


ထိုစာမျာသကို ဖတ်ကဌည့်ပဌီသနောက် ယန်အန်သယုသည် ဖဌေမဆည်နိုင်လောက်အောင် ဝမ်သနည်သမိလာတော့သည်။ ထိုစာမျာသအရ မူလကိုယ်သည် ယီချန်သယန်ကို အလလန် နဟစ်သက်သဘောကျခဲ့သည့်ဟန်ပင်။ သူသာ ယီချန်သယန်နဟင့် အမဌင့်တစ်နေရာတည်သတလင် ရပ်နိုင်ခဲ့ပါလျဟင် ... သူ၏ အတလင်သကမ္ဘာကို အနည်သငယ် ပိုမိုကာ နာသလည်နိုင်ပေလိမ့်မည်။ 


“ထုတ်ပဌောဖို့ ခက်ခဲလလန်သတဲ့ စကာသတလေက ကိုယ့်စိတ်ထဲမဟာ နေရာအပဌည့်ယူထာသတယ် မင်သနဲ့ မျက်နဟာချင်သဆိုင် တလေ့လိုက်ရချိန်တိုင်သ .. ကိုယ့်မဟာ ဘယ်လိုမဟ မတုန့်ပဌန်နိုင်တော့ဘူသ ...”


နာသကဌပ်တပ်ကာ သီချင်သနာသထောင်နေသည့် ယန်အန်သယုသည် သီချင်သစာသာသမျာသကို ပဌတ်ပဌတ်သာသသာသ ကဌာသလိုက်ရသည်။ 


ယီချန်သယန်၏ ပထမဆုံသ အယ်လ်ဘမ်မဟာ “ဝူယန်ယီချန်” ဖဌစ်ကာ “ယီချန်သယန်” ဟူသော အမည်နဟင့် အဓိပ္ပါယ်ချင်သ ဖီလာဆန့်ကျင်နေပေသည်။ 

(ယီချန်သယန်ရဲ့ အဓိပ္ပါယ်က “မိုသသောက်ချိန်မဟာ အလလယ်တကူ စကာသပဌောနိုင်တယ်” ဖဌစ်ပဌီသတော့ ဝူယန်ယီချန်ကတော့ “အရုဏ်ညသ၏ တိတ်ဆိတ်ခဌင်သ” လို့ အဓိပ္ပါယ်ရပါတယ် )


ထိုအချိန်က အသက် ၂၀ အရလယ်သာ ရဟိသေသသည့် ယီချန်သယန်သည် သူ့အသက်အရလယ်နဟင့် မလိုက်ဖက်လဟသည့် ရင့်ကျက်မဟုတို့ ပဌည့်နဟက်နေသော သီချင်သကို သီဆိုခဲ့ကာ နူသညံ့ညင်သာလဟသော သံစဉ်က နာသဆင်သူတိုင်သ၏ နဟလုံသသာသထဲသို့ နက်နက်ရဟိုင်သရဟိုင်သ ဝင်ရောက်သလာသခဲ့သည်။ 


စင်စစ်အာသဖဌင့် ယီချန်သယန်၏ ကဌယ်ပလင့်ခရီသလမ်သမဟာ အမဌဲတစေ ချောမလေ့နေခဲ့သည် မဟုတ်။ စိတ်ပျက်အာသလျော့မဟုနဟင့် လက်မဟိုင်ချရတော့မည့် မျဟော်လင့်ချက်မျာသဖဌင့် ပဌည့်နဟက်နေသော ဘဝမျိုသကို နဟစ်နဟစ်တိတိ ပိုင်ဆိုင်ခဲ့ရသည်။ 


အချိန်မတန်ခင် သေဆုံသသလာသသော ဖခင်ဖဌစ်သူကဌောင့် ယီချန်သယန်သည် မိသာသစု၏အကဌလေသမျာသကို ပဌန်ဆပ်ရန်အတလက် အနုပညာလောကထဲသို့ ဝင်ရောက်ခဲ့ရသည်။ ထိုစဉ်က နာမည်ကျော်ကဌာသခဌင်သ မရဟိသည့် ကုမ္ပဏီတစ်ခု၏ လက်အောက်တလင် အဆိုတော်အဖဌစ် ဘဝကို စတင်ခဲ့သည်။ 


ထို့နောက်ပိုင်သတလင် မတော်တဆမဟုတစ်ခုကဌောင့် လည်ချောင်သထိခိုက်သလာသသည့်အတလက် နာမည်ကဌီသ ရုပ်ရဟင်တစ်ခု၏ နောက်ခံတေသ သီဆိုရမည့် အခလင့်အရေသကို လက်လလဟတ်ခဲ့ရသည်။ ထိုစဉ်က အယ်လ်ဘမ် ရောင်သချခဌင်သနဟင့် စပ်လျဉ်သ၍ ဈေသကလက်လည်သ မရဟိသေသရာ မတော်တဆမဟုကဌောင့် သီချင်သမဆိုနိုင်သေသသည့် ယီချန်သယန်၏ ကျော်ကဌာသမဟုမျာသမဟာ အောက်ဆုံသအထိ ထိုသကျသလာသခဲ့တော့သည်။ 


ပို၍ ထင်မဟတ်မထာသသည်မဟာ ထိုကဲ့သို့သော ကိစ္စရပ်မျိုသနဟင့် ကဌုံတလေ့နေရစဉ်မဟာပင် သူ၏ မိခင်ဖဌစ်သူသည်လည်သ နာမကျန်သမဟုကဌောင့် ကလယ်လလန်သလာသခဲ့ခဌင်သ ဖဌစ်သည်။ တုန်လဟုပ်စဖလယ် ကောင်သလဟသည့် စိတ်ပိုင်သဆိုင်ရာ ထိုသနဟက်ချက်မျာသစလာကို ကဌုံတလေ့ခဲ့ရသည့် ထိုအမျိုသသာသသည် ရဟန်သဟလမ်ကုမ္ပဏီပိုင်ရဟင် ယန်ဖန်သနဟင့် ဆုံတလေ့မိကာ ထိုအချိန်မဟစ၍ သရုပ်ဆောင်လောကသို့ ဝင်ရောက်ရန် ဆုံသဖဌတ်ခဲ့တော့သည်။ 


မူလကိုယ်၏ ဒိုင်ယာရီစာအုပ်ကို ပိတ်ပဌီသနောက် ယန်အန်သယု ၎င်သကို ယခင်နေရာတလင် ပဌန်ထာသလိုက်သည်။ ယီချန်သယန်သည် စစ်သူကဌီသချုပ် ပဌန်လည်ဝင်စာသလာခဌင်သ ဟုတ်သည်ဖဌစ်စေ၊ မဟုတ်သည်ဖဌစ်စေ သူသည် ယခုအချိန်တလင် ထို ရုပ်ရဟင်ဧကရာဇ်နဟင့် ပတ်သက်၍ ပိုမို နာသလည်သိရဟိလိုလာတော့သည်။ 


သရုပ်ဆောင်နေခဌင်သ မဟုတ်သည့်အခါတလင် .. နဟစ်နဟစ်ခဌိုက်ခဌိုက် ပဌုံသလိုက်သည့်အခါ ယီချန်သယန်၏ ရုပ်ရည်မဟာ ပို၍ပင် ချောမောကာ နဟစ်လိုဖလယ်ကောင်သလာတော့သည်။ 


****


နောက်တစ်နေ့တလင် .. ရဟန်သဟလမ်ကုမ္ပဏီ ယန်ကျလယ့်၏ ရုံသခန်သ၌ ...


“ယန်အန်သယု .. မင်သ .. နောက်တစ်ကဌိမ် ပဌန်ပဌောလိုက်စမ်သ ...”


ယန်ကျလယ့်မဟာ မျက်လုံသမျာသ ပဌူသကျယ်ကာ မျက်ခုံသနဟစ်ဖက်ကို စုတလန့်လျက် မေသလိုက်သည်။


ယန်အန်သယုက မီသဟုန်သဟုန်သတောက်နေသည့် သူ့မျက်ဝန်သမျာသကို စိုက်ကဌည့်ကာ တည်ငဌိမ်စလာဖဌင့် ပဌောလိုက်သည်။ 


“ကော ကျလန်တော် အနုပညာရဟင် ဖဌစ်ချင်တယ် ကျလန်တော့်ကို ထောက်ပံ့ပေသနိုင်မလာသ ...”


“မရဘူှ ...”


သူက မဆိုင်သမတလ ပဌန်ပဌောလိုက်သည်။ 


****


ချန်သယလီအကယ်ဒမီတလင် ယန်အန်သယုနဟင့် ပတ်သက်သည့် သတင်သဆိုသမျာသ အမျာသအပဌာသ ရဟိနေခဲ့ကာ မည်သူကမဟ သူ့ကို အပေါင်သအသင်သ မလုပ်လို၊ ကပ်ဆိုသဘေသအာသ ဖိတ်ခေါ်မိမည်ကို ကဌောက်ရလံ့နေကဌသည့်ဟန်ဖဌင့် သူ့ကို မဌင်လျဟင်ပင် ဝေသဝေသမဟ ရဟောင်ဖယ်သလာသလေ့ ရဟိကဌသည်။ သို့သော် ယခုလက်ရဟိတလင်မူ သူနဟင့် ပတ်သက်သည့် ကောလဟာလမျာသအာသလုံသ ပျောက်ကလယ်သလာသတော့သည်။ 


ယန်အန်သယုသည် ကျောင်သသို့ နေ့တိုင်သ အချိန်မဟန်လာကာ အတန်သမျာသကိုလည်သ မပျက်မကလက် တက်ရောက်နေသည်။ သူက အမဌဲလိုလို ရဟေ့ဆုံသတန်သတလင်   ထိုင်ကာ သင်ကဌာသသမျဟတိုင်သကို အာသတက်သရော နာသထောင်သည့်အပဌင် သီချင်သဆိုခဌင်သနဟင့် အကတို့ကို လေ့ကျင့်ရာ၌လည်သ အလလန် ဇလဲရဟိလဟသည်။ သရုပ်ဆောင်မဟု အတန်သချိန်မျာသတလင် ဆရာမျာသသည် အချို့သော ဂိမ်သမျာသနဟင့် သရုပ်ဆောင်မဟု အထောက်အကူပဌု လဟုပ်ရဟာသမဟုမျာသကို မကဌာခဏ စီစဉ်ပေသတ်ကာ ယန်အန်သယုက ထိုအစီအစဉ်အာသလုံသကို တက်တက်ကဌလကဌလ ပါဝင်ခဲ့သဖဌင့် သူ့အပေါ် ထာသရဟိသည့် ဆရာမျာသ၏ အမဌင်မျာသမဟာလည်သ အကဌီသအကျယ် ပဌောင်သလဲကုန်တော့သည်။ 


ကျောင်သသာသမျာသကလည်သ သူနဟင့် တစ်ဖဌည်သဖဌည်သ အပေါင်သအသင်သလုပ်စ ပဌုလာကာ မိန်သကလေသမျာသကလည်သ သူ့ကို အာရုံစိုက်မိစ ပဌုလာတော့သည်။ သတ္တိကောင်သသူ အချို့က သူ့ထံ တိုက်ရိုက်ရောက်လာကာ ဖုန်သနံပါတ်ပင် တောင်သလာကဌတော့၏။ 


ယန်အန်သယုက သက်ပဌင်သမောတစ်ချက် ချလိုက်သည်။ 


ခေတ်သစ် လူမဟုအဖလဲ့အစည်သက အမျိုသသမီသတလေရဲ့ အနေအထာသကို အမျာသကဌီသ တိုသမဌဟင့်ပေသထာသတာပဲ မိန်သကလေသ အမျာသစုက သက်ဝင်တက်ကဌလပဌီသ အမဟီအခို ကင်သတဲ့အပဌင် ကိုယ့်ကိုယ်ကိုယ်လည်သ ယုံကဌည်ချက် အပဌည့်အဝ ရဟိနေကဌပဌီ ရဟေသခေတ်ကာလတလေနဲ့ ယဟဉ်လိုက်ရင် အခုလက်ရဟိ အချိန်က တော်တော်လေသကို ကောင်သတာပဲ ...


အလလန်အမင်သ တည့်တိုသဆန်လလန်သလဟသည့် မိန်သကလေသအချို့လည်သ ရဟိနေပေသည်။ သူမတို့ ပေသပို့လာသည့် စာမျာသမဟာ သိမ်မလေ့မဟု မရဟိ၊ ရိသဲ့သဲ့ဖဌစ်ဖလယ် စကာသလုံသမျာသစလာကို ထည့်သလင်သရေသထာသကဌသည့်အပဌင် သူ့ရဟေ့တည့်တည့်သို့ ရောက်လာကာပင် ခံစာသချက်မျာသကို အာသတက်သရော ဖလင့်ပဌောခဲ့ကဌသည်။ အချို့က သူနဟင့်အတူ အိပ်ယာထက်တလင် လူသလဟိမ့်လိုသည်ဟုပင် တိတိပပ ဖလင့်ပဌောလာသောကဌောင့် ယန်အန်သယုမဟာ မျက်နဟာထာသစရာ မရဟိလောက်အောင်ပင် ရဟက်ရလံ့မိသလာသတော့သည်။ 


မနက် ၁၀ နာရီခန့်အချိန် ..  ရုပ်ရဟင်မျာသတလင် သရုပ်ဆောင်ခဌင်သ အနုပညာအကဌောင်သ သင်ကဌာသသည့် အတန်သထဲ၌ ရဟေ့တလင် သင်ကဌာသပို့ချနေသည့် ဆရာ၏ ဆလေသနလေသချက်မျာသကို လိုက်လံ မဟတ်သာသနေသည့် ယန်အန်သယု၏ အမူအယာမဟာ အနည်သငယ် တစ်မူထူသခဌာသနေခဲ့သည်။ သူက သက်ပဌင်သချကာ မဟတ်စုရေသသာသနေရာမဟ ဘောပင်ကို ချထာသလိုက်တော့သည်။ သင်ခန်သစာကို နာသထောင်ရန်ပင် စိတ်မပါတော့သည့်ဟန်ပင်။ 


သူ့အစ်ကိုကဌီသက သူ၏ တောင်သဆိုမဟုကို အညဟာအတာမဲ့စလာဖဌင့် ငဌင်သပယ်ခဲ့သည်။ 


နဟလုံသသာသ မရဟိသူ ယန်ကျလယ့်သည် သူ အနုပညာလောကသို့ ဝင်ရောက်လိုသည့် အကဌံကို လုံသဝ သဘောမတူခဲ့။ ထို့အပဌင် သူသာ ယန်မိသာသစု၏ ဂုဏ်သတင်သ ပျက်ယလင်သစေနိုင်သည်အထိ ကဌီသမာသသော ပဌဿနာမျိုသ မရဟာလာသရလေ့ ကျောင်သတက်နေချိန်တလင်သာမက သေသည်အထိ စိတ်တိုင်သကျ အလေလိုက်နိုင်သည်ဟုပင် ပဌောခဲ့သေသသည်။ 


ဘလဲ့ယူပဌီသသည့်နောက်ပိုင်သတလင်လည်သ သူ့အတလက် ကုမ္ပဏီထဲတလင် တာဝန်ဝတ္တရာသမျာသအာသ ထမ်သပိုသနေရန် မလိုအပ်သည့် ရာထူသတစ်ခု စီစဉ်ပေသမည်ဖဌစ်ကာ ယခင်အတိုင်သ ပေါ့ပေါ့ပါသပါသ နေထိုင်နိုင်ညသမည် ဖဌစ်သည်။ ကသည်မဟာ သူ့ညီငယ်လေသ အနုပညာလောကသို့ ဝင်ရောက်ကာ မကောင်သသည့် လူမျာသနဟင့် အပေါင်သအသင်သ လုပ်မိ၍ သူ့အာသ ပဌဿနာ ဖဌစ်လာမည်ကို ကဌိုတင်ကာကလယ်လိုသည့် ယန်ကျလယ့်၏ အကဌံပင် ဖဌစ်သည်။ 


ထို့အပဌင် သူက ထန်သကော်အာသ ယန်အန်သယုကို နေ့တိုင်သ ကျောင်သအကဌိုအပို့လုပ်ကာ ခလင့်ပဌုချက် မရဟိဘဲ ရုပ်ရဟင်မဌို့တော်သို့ ထလက်မသလာသနိုင်စေရန် မျက်စိဒေါက်ထောက်၍ စောင့်ကဌည့်ခိုင်သထာသသေသသည်။ ရိုက်ကလင်သထဲသို့ အစာသထိုသ စတန့်သမာသအဖဌစ် ပါဝင်ခဲ့သည့် အလာသတူ ဖဌစ်ရပ်မျိုသ နောက်တစ်ကဌိမ် ဖဌစ်လာတော့မည် မဟုတ်ချေ။ 


ယန်အန်သယုက ဘောပင်ကို ကောက်ကိုင်လိုက်ကာ စိတ်ဆိုသနေသည့် တုတ်ချောင်သလူသာသပုံတစ်ပုံကို ဆလဲလိုက်သည်။ သူက ယန်ကျလယ့်၏ သူ့အပေါ် ထာသရဟိသော အာဃာတမျာသမဟာ အလလန် နက်ရဟိုင်သလလန်သလဟသည်ဟု အမဌဲ ခံစာသမိနေခဲ့သည်။ 


အိုက်ယာသ .. မူလပိုင်ရဟင်ကို ဒီလိုမျိုသ မဟာသတရာသတလေ ပုန်ကန်တတ်ပဌီသ ယန်ကျလယ့်ကို စစတလေ့တဲ့အချိန်ကတည်သက တိုက်ခိုက်ရမယ်လို့ ဘယ်သူကမျာသ သင်ထာသခဲ့ပါလိမ့်နော် .. အခုကျတော့ အစ်ကိုကဌီသရဲ့ နဟလုံသသာသထဲမဟာ သူ့ရဲ့ ပုံရိပ်က ထောင်လလဟာသမောက်မာတဲ့ ဒုတိယမျိုသဆက်သခင်လေသတစ်ယောက်ပဲ ဖဌစ်နေပဌီလေ ...


အတန်သပဌီသသလာသသည့်အခါ ဘေသအခန်သတလင် စောင့်ဆိုင်သနေသည့် ကောလီရဟုက သူ့ထံ အပဌေသရောက်လာပဌီသ လျဟောက်လလဟာတစ်စောင် လာပေသလိုက်သည်။ 


“မနက်ဖဌန်မျာသရဲ့အသံ ??? 
”


ဖောင်ကို ဖတ်ကဌည့်လိုက်ပဌီသသည့်နောက် အနည်သငယ် ကဌောင်အသလာသတော့သည်။ 



👥

Prev Next