MM Story Teller

Chapter 52

Viewers 19k

👻Chapter 52

လက်မှတ်ဝယ်ယူခြင်း (2)

နှစ်ရက်ခန့် ကြာပြီးနောက် ည၈နာရီအချိန်တွင် လူတစ်စုက ဘတ်စ်ကားစီးပြီး ၂၈၈rmbဆုနှင့်အတူ ကြောက်မက်ဖွယ်ရာ ကစားကွင်းသို့ သွားခဲ့ကြလေသည်။

ဘတ်စ်ကားထဲတွင် ချူဟွိက်က သူ့ရှေ့တွင် ရယ်ရယ်မောမော စကားပြောနေကြသည့် လော့ဇီယန်နှင့် ယဲ့ယွမ်တို့ကို တွေးတွေးဆဆကြည့်လိုက်ရင်း ကျင်းထျန်းယိနားကပ်ပြီး တိုးတိုးပြောလာသည်

" သရဲက လူတွေကို သိပေမယ့် လူက သရဲကို မသိတာက ဘယ်လိုအခြေအနေမျိုးကြောင့်လဲ...."

ထိုမေးခွန်းက ဤနှစ်ရက်အတွင်း သူ့စိတ်ထဲ ရောက်ရောက်နေသည့် အရာပင်။ အတိတ်တုန်းက ယဲ့ယွမ်က လော့ဇီယန်ကို သိခဲ့မှန်း သိသာသော်လည်း လော့ဇီယန်အတွက်က ယဲ့ယွမ်နှင့်ဆုံဖူးသည့် ပထမဆုံးအကြိမ် ဖြစ်နေသည်။

ကျင်းထျန်းယိက တုံ့ခနဲဖြစ်သွားသော်လည်း ချူဟွိုက်၏ အကြည့်စူးစူးကြောင့် မျက်နှာအမူအရာတစ်ခုမှ ပြမလာချေ။

ကျင်းထျန်းယိက ချူဟွိုက် အရမ်းစိတ်ဝင်စားနေမည်ဟု မထင်ထားခဲ့၍ အမှန်တစ်ဝက်နှောပြီး ပြောလာသည်

" သူတို့က အရင်တုန်းက ချစ်သူတွေ ဖြစ်ခဲ့တာ ဖြစ်နိုင်တယ်....နောက်တော့ ယဲ့ယွမ်က မတော်တဆ သေသွားရတယ်...လော့ကလည်း ဒဏ်ရာရသွားလို့ ယဲ့ယွမ်ကို မေ့သွားတာ ဖြစ်နိုင်တယ်..."

ချူဟွိုက်က ပြုံးပြလာသည် " အဲ့ဒါ ဘယ်လိုလုပ် ဖြစ်နိုင်မှာလဲ...."

ယဲ့ယွမ်၏ နားရွက်ရှေ့ပိုင်းများက တွန့်လိမ်နေပြီး သူ့မျက်လုံးတွင် ဝမ်းနည်းမှုတို့ ဖြတ်ဝင်နေသည်။ ကျင်းထျန်းယိ ပြောသည့်အတိုင်း မှန်နေပါက လော့ဇီယန်တွင် မှတ်ဥာဏ်ပြန်ရရန် အနည်းဆုံး နည်းလမ်းတစ်ခုတော့ ရှိနိုင်ဦးမည်။ သို့သော်လည်း ထိုအရာက လုံးဝမဖြစ်နိုင်ချေ။

“ဟေ့...." လော့ဇီယန်က ယဲ့ယွမ်ပုခုံးကို ကိုင်လိုက်ရင်း နားမလည်ဟန် မေးလာသည် " မင်းဘာလို့ မှိုင်နေရတာလဲ....ငါ့ရဲ့ ညစ်ညစ်ပတ်ပတ် ဟာသက မရယ်ရဘူးလား...."

ဘတ်စ်ကားက အမှောင်ထဲ ထိုးရပ်သွားပြီး အသစ်လေးများက ရုတ်တရက် ပေါ်လာကြသည်။ ချူဟွိုက်က ကိုယ်အနည်းငယ် ကြွလိုက်ရင်း ရှေ့ကို ကြည့်မိသည်။

"များလှချည်လား...." လော့ဇီယန်ကလည်း အံ့အားသင့်သွားရသည် " ပုံမှန်ဆို ဒါက အဆင့်၃ဖြစ်ရပ် ဖြစ်ရမှာကို...."

အသစ်လေးများက အိပ်ပျော်နေ၍ ကျင်းထျန်းယိက ပြောလာသည် "ဘေးချင်းကပ် ထိုင်ခုံနှစ်ခုံက ယောကျ်ားလေးနဲ့ မိန်းကလေးကို သတိထားမိလား..."

ချူဟွိုက်က ရေကြည့်လိုက်ရာ အသစ်လေးများတွင် အမျိုးသား၆ယောက် အမျိုးသမီး၆ယောက် ရှိနေ၍ သူတို့တိုက်ခန်းမှ လူ၆ယောက်ပါ ပေါင်းလိုက်လျှင် စုစုပေါင်းလူ၁၈ယောက် ရှိသည်။

ကျင်းထျန်းယိက သူတို့၏ ဘယ်ဘက်ကို လှည့်ကြည့်လိုက်သည်။ ကောင်မလေးက ကောင်လေးပုခုံးပေါ် ခေါင်းမှီပြီး အိပ်နေသည့် နှစ်ယောက်လုံးက စုံတွဲအင်္ကျီ ဝတ်ထားကြသည်။

လော့ဇီယန်က လျှာလိပ်လိုက်ပြီး ပြောလိုက်သည်

" အခုခေတ် စုံတွဲတွေများ ဝတ်လိုက်ကြတာ ထိန်းမနိုင်သိမ်းမရပဲ...."

ကောင်လေး၏ အင်္ကျီကျောဘက်တွင် သခွားသီးစိမ်းပုံလေး ထိုးထားပြီး ကောင်မလေး၏ အင်္ကျီနောက်ကျောတွင် ရွှေရောင်ပန်းပွင့်လေး ထိုးထားသည်။

လော့ဇီယန်က အံ့သြသွားရသည် "....မဟုတ်သေးပါဘူး....ဘာလို့ ဂန္ဓမာပန်းပုံကြီးလဲ...."

ကျင်းထျန်းယိက သူ့ကို ထူးဆန်းသည့် အကြည့်နှင့် ကြည့်လိုက်၏။

ချူဟွိုက်က အနည်းငယ် တုံ့သွားပြီးမှ နှုတ်ခမ်းဆွဲစေ့လိုက်ရရင်း ကြင်ကြင်နာနာ သတိပေးလိုက်ရသည်။

" ...အဲ့ဒါက ဂန္ဓမာပန်း မဟုတ်ဘူး....သခွားသီးရဲ့ ထိပ်မှာပွင့်တဲ့ ပန်းပွင့်..."

ယဲ့ယွမ်က ဖွဖွရယ်လိုက်ရာ လော့ဇီယန်၏ မျက်နှာကလည်း အလိုလို နီရဲသွားသည်။

သူတို့ဘေးတွင် ထိုင်နေသည့် တုန့်အန်ယာနှင့် ကျိုးရှို့ဝမ်တို့ကလည်း အနည်းငယ် ရှက်သွားကြသည်။ သူတို့က ငယ်ရွယ်ပြီး လက်ခံနှုန်းမြင့်မားသော်လည်း အရေပါးသည့်သူများ ဖြစ်ကြသည်။ လော့ဇီယန်က အမျိုးသားဧည့်သည်တစ်ယောက် ခေါ်ခဲ့ပြီး အတူသွားအတူလာ အတူစားနေကြသည်ကို တွေ့ခဲ့ရ၍ သူတို့စိတ်ထဲ သဘောပေါက်ပြီးသား ဖြစ်သည်။

စနောက်နေကြရင်း ဘတ်စ်ကားက ရုတ်တရက် ရပ်သွားရာ အသစ်လေးများက တစ်ယောက်ပြီးတစ်ယောက် နိုးလာကြသည်။

အသစ်လေးများကို ပရလောကသို့ မဝင်ခင် သွေးစာတန်းက သတိပေးထားပြီး ဖြစ်သောကြောင့် သူတို့က ရူးရူးမိုက်မိုက် ပြုမူလာမည် မဟုတ်သလို မေးခွန်းတွေ မေးလာကြပြီး ပြန်ပေးဆွဲခံရသည်ဟုလည်း တွေးလိမ့်မိမည် မဟုတ်ပေ။

တစ်မိနစ်မပြည့်ခင် အချိန်အတွင်း လူတိုင်းက နိုးလာကြပြီး ပတ်ပတ်လည်ကို သတိထားပြီး ကြည့်နေကြသည်။

လော့ဇီယန်က သူလုပ်နေကျအတိုင်း စကားအနည်းငယ် ရှင်းပြပေးပြီးနောက် ကျယ်ကျယ်လောင်လောင် မေးလာသည် " မင်းတို့တွေ အကုန်လုံးက အတွဲတွေလားကွ...."

ထိုလူများက အချိန်တစ်ခုထိ တောင့်ခဲသွားပြီးမှ စုံတွဲနှစ်တွဲက ခေါင်းညိမ့်ပြလာပြီး ကျန်လေးတွဲက ခေါင်းခါပြလာကြသည်။

"မင်းတို့ အရင်ဆုံး ထိုင်လိုက်ကြပါဦး..." ချူဟွိုက်က ဆိုလိုက်သည်။

သူတို့က စကားဆိုလာသည့်သူက မျက်လုံးမျက်ခုံးလှလှနှင့် မိန်းမချောလေး တစ်ယောက်ဖြစ်နေမှန်း တွေ့လိုက်ရစဥ် အနည်းငယ် အကာကွယ်လျော့သွားပြီး တွန့်ဆုတ်တွန့်ဆုတ် ထိုင်လိုက်ကြသည်။

ချူဟွိုက်က ခုံအောက်ရှိ လွယ်အိတ်ထဲမှ A4စာရွက်တစ်ထပ်နှင့် ဘောပင်ကို ဆွဲထုတ်လိုက်ပြီး မတ်တပ်ရပ်လိုက်သည်။ သူက အသစ်လေးတစ်ယောက်စီတိုင်းကို ဗလာစာရွက်တစ်ရွက်နှင့် ဘောပင်တစ်ချောင်း ပေးလိုက်သည်။

လူတိုင်းက ပစ္စည်းများ ကိုင်ထားရင်း ဘာလုပ်ရမှန်း မသိသလို တစ်ယောက်နှင့်တစ်ယောက် ကြည့်နေကြသော်လည်း ဥာဏ်ကောင်းသည်သူများအတိုင်း အသံမထွက်ပဲ နေနေကြသည်။ သိသိသာသာပင် ဤအားနည်းပုံရသည့် ကောင်မလေးတွင် အသိပညာအချို့ ရှိနေသည်။

ချူဟွိုက်က စာရွက်ဝေပေးပြီးနောက် ကျင်းထျန်းယိက ရုတ်တရက် သူ့လက်ကောက်ဝတ်ကို ဆွဲကိုင်လာသည်။ သူက နားမလည်ဟန် ငုံ့ကြည့်လိုက်ရာ ကျင်းထျန်းယိက မျက်စိမှိတ်ပြလိုက်ရင်း ပြောလိုက်

" မစ္စချူ....ကိုယ့်ကို မပေးရသေးဘူးလေ...."

သူက ပုံမှန်လို အော်ပြောနေ၍ ချူဟွိုက်က တစ်ခဏမျှ အေးခဲသွားရပြီး တစ်စက္ကန့်ကြာမှ ဒေါသထွက်ထွက်နှင့် ကျန်သည့်ပစ္စည်းများအားလုံး ကျင်းထျန်းယိ လက်ထဲ ပြွက်သိပ်ထည့်ပေးလိုက်သည်။

ချူဟွိုက်က နာရီကို တစ်ချက်ကြည့်လိုက်ပြီး လည်ချောင်းရှင်းကာ စကားဆိုလိုက်သည်

" အချိန်က အကန့်အသတ် ရှိတာကြောင့် ကျေးဇူးပြုပြီး ဘောပင်ယူပြီး ပြောတာကို လိုက်မှတ်ပေးပါ....ဒီစကားလုံးတွေက မစ်ရှင်နဲ့ ဆက်စပ်နေတာမို့လို့ ပြောနေစဥ်အတွင်း ကြားဝင်မမေးပါနဲ့....မေးစရာတစ်ခုခုရှိရင် ပြီးတဲ့အထိ စောင့်ပြီးမှ မေးပေးပါ....တကယ်လို့ ရေးဖို့ အဆင်မပြေဘူး အဓိပ္ပါယ်ကို နားမလည်လို့ ဆိုရင် အချင်းချင်း ကူညီတိုင်ပင်လို့ ရပါတယ်...."

ချူဟွိုက်၏ ယခင်မြေအောက်ခန်းတွင် ပြိုင်ရသည့်အချိန်တွင် ရရှိခဲ့သည့် သဲလွန်စက သူ့စိတ်ထဲရောက်သွား၍ ပွဲမပြီးသည့် အချိန်ထိ အခြားသူများကို ပြောပြ၍မရချေ။ သို့သော်လည်း ယခုကစားကွင်း၏ သဲလွန်စအတွက်က တော်တော်လေး ထူးခြားလှသည်။ 'မင်းတစ်ယောက်တည်းသာ....' ဆိုသည့် သဲလွန်စပြိုင်ပွဲတွင် ရရှိခဲ့သည့် သဲလွန်စများက ထိတွေ့၍ရပြီး မျှဝေပေးလို့လည်း ရသည်။

သူက အစပိုင်းတွင် သဲလွန်စများကို ကော်ပီကူးပြီး အသစ်လေးများကို ဝေပေးမည်ဟု ကြံထားခဲ့သော်လည်း မအောင်မြင်ချေ။ သူ ကော်ပီကူးပြီးမကြာခင် စာရွက်များအကုန် ဗလာဖြစ်ကုန်၍ ဤသဲလွန်စ၏ ထူးခြားချက်ကို ပြောပြနေသည်။

ကော်ပီကူးခြင်းက အလုပ်မဖြစ်၍ ချူဟွိုက်က နည်းလမ်း ပြောင်းရတော့သည်။ နှုတ်တိုက်ချပေးခြင်း....

အသစ်လေးများက ဖြစ်ရပ်နှင့်ဆိုင်သည်ဟုလည်း ကြားလိုက်ချိန် ချက်ချင်း ဘောပင်ကောက်ကိုင်ပြီး စာရွက်ကို ပေါင်ပေါ် ဖြန့်ကာ တစ်ခုခုလွဲသွားမည်စိုး၍ နားစွန့်နေကြသည်။

အားလုံးအဆင်သင့်ဖြစ်နေပြီမှန်း တွေ့လိုက်၍ ချူဟွိုက်က လှည့်သွားရင်း ကျင်းထျန်းယိအိပ်ကပ်ထဲမှ စာရွက်များကို ကုန်းယူလိုက်ပြီး တစ်လုံးချင်းစီ ဖြေးဖြေးချင်း ဖတ်ပြလိုက်သည်။

သူက ကျောင်းသိပ်မတက်ခဲ့ရသော်လည်း သူ၏ မန်ဒရင်းအသံက နည်းစနစ်ကျပြီး စကားလုံးများက မှန်ကန်လေသည်။

ကျင်းထျန်းယိက သူ၏ ခြေတံသွယ်သွယ်လေးများကို ကြည့်နေရင်း သက်တောင့်သက်တာပုံစံနှင့် သူ့အသံကို နားထောင်နေသည်။

လော့ဇီယန်က ရယ်မောလိုက်၏

" အရင်တုန်းက ကျွန်တော့်ရဲ့ တရုတ်ဆရာမကလည်း အခုလို ပုံစံမျိုးပဲ....ဒါကြောင့် စာကြိုးစားပြီး ဆရာတပည့်ဆက်ဆံရေး တိုးတက်အောင် လုပ်မယ်ဆိုပြီး ဆုံးဖြတ်ခဲ့တာ...."

ကျင်းထျန်းယိက ပေါ့ပေါ့ပါးပါး ကြည့်လာသည်

" စိတ်ဝင်စားစရာပဲ....."

ချူဟွိုက်၏ ကိုယ်ပေါ်ကို အကြည့်ရောက်နေကြသည့် လူငယ်က တစ်ယောက်စ နှစ်ယောက်စ ရှိနေသည်။ သူတို့က လူအစစ်လားဆိုပြီး ခဏခဏကြည့်နေကြသော်လည်း ကျင်းထျန်းယိက အနည်းငယ် မပျော်မရွှင်ဖြစ်သွားကာ သူ့မျက်နှာရှိ အပြုံးကလည်း တဖြေးဖြေး မှေးမှိန်လာ၏။

ချူဟွိုက်က ပြောပြပြီးသည်နှင့် အဘွားကြီးလို ခေါင်းဖြူဖြူနှင့် ကောင်လေးတစ်ယောက်က ချူဟွိုက်နား ရောက်လာပြီး စကားဆိုလာသည်

" အလှလေး...ကိုယ် မေးချင်တာ ဗောဓိဓမ္မရယ် ခရစ်တော်ရဲ့ ဓါးသွားရယ်က ဘယ်လိုအဓိပ္ပါယ်ရလဲ...

ဗောဓိဓမ္မက ဘုရင်ရဲ့ ဂုဏ်သရေကို ပြောတာ မဟုတ်ဘူးလား...." သူက ဇဝေဇဝါ ဖြစ်နေသည့်ပုံပင်။

ချူဟွိုက်က ရှင်းပြရန် ပြင်လိုက်စဥ် ကားတံခါးက ပွင့်သွားလေသည်။

ချူဟွိုက်က မျက်မှောင်ကြုတ်လိုက်ရင်း နှိုးဆော်လိုက်သည် " အရင်ဆုံး ကားပေါ်က ဆင်းလိုက်ကြရအောင်....."

တံခါးဖွင့်သည့်အချိန်က အကန့်အသတ်ရှိ၍ အချိန်ကာလတစ်ခုအတွင်း ကားပေါ်က မဆင်းမိလျှင် အရှုံးပေးသည်ဟု အလိုလို သတ်မှတ်သွားမည် ဖြစ်သည်။

ဘတ်စ်ကားအပြင်ဘက်တွင် မှောင်မည်းနေပြီး တံခါးကို ကျယ်ကျယ် ဖွင့်ထားသော်လည်း အလင်းရောင် တစ်ခုမှ ဝင်မလာချေ။ စုံတွဲက တစ်ခဏမျှ တွန့်ဆုတ်နေသေး၏။

ချူဟွိုက်နှင့် အခြားသူများ အရင်ဆုံး ဆင်းသွားပြီးမှ တစ်ယောက်ပြီးတစ်ယောက် နောက်ကလိုက်ဆင်းလာကြသည်။

ကားပေါ်က ဆင်းလိုက်သည်နှင့် အားလုံး အံ့သြသွားကြရသည်။

ကြီးမားလှသော ကစားကွင်းကြီးက မျက်စိရှေ့တွင် ပေါ်လာ၍ပင်။

မစ်ရှင်က ည၈နာရီတွင် စတင်မည်ဖြစ်၍ မှောင်နေပြီဖြစ်သည်။ ကံကောင်း၍ လပြည့်ဝန်းကြီးက ထိန်ထိန်သာပေးနေသည်။

နောက်ဆုံးဖြစ်ရပ်ကတည်းက ချူဟွိုက်မှာ လအပေါ် အမြင်မကြည်တော့ချေ။ လှည့်ပတ်ကြည့်လိုက်ချိန် ကစားကွင်းကြီးက ဧရိယာကျယ်ဝန်းလှပြီး နေရာတစ်ခုလုံးကို ဘောင်ခတ်ထားသည်။ ချားရဟတ်ကြီးက ဖြေးဖြေးချင်း လည်နေပြီး jumping machineနှင့် big pendulumကို မှုန်ဝါးဝါး မြင်နေရသည်။

[jumping machine က ထိုင်ခုံအတန်းလိုက်စီထားပြီးတော့ အပေါ်မြောက်လိုက် အောက်ရောက်သွားလိုက် စီးရတဲ့ ရဟတ်ကြီးပါ....big pendulumက ချိန်သီးကို ဆွဲသလိုမျိုး အဝိုင်းကြီး ယမ်းနေတဲ့ ရဟတ်ပါ....]

အပြင်ဘက်မှ ကြည့်လျှင် ကစားကွင်းကြီးက ပုံမှန်ကစားကွင်းတစ်ခုနှင့် သိပ်မကွာလှပေ။ သို့သော် လူသံများ ဆူဆူညံညံ မရှိ၍ ချောက်ချားဖွယ်ကောင်းလှသည်။

ကစားကွင်းကြီးထဲတွင် တံခါးအပြင်ဘက်တွင် ရပ်နေသည့် ပြိုင်ပွဲဝင်များမှလွဲ၍ အခြားတစ်ယောက်မှ ရှိမနေချေ။

"ကြည့်ရတာ ကြောက်စရာကောင်းမယ့်ပုံလည်း မရှိပါဘူး...."

မီးခိုးရောင် ဆံပင်နှင့် လူငယ်က တိုးတိုးပြောလာသည်။

စုံတွဲနှစ်တွဲက အချင်းချင်း ဖက်နေကြရင်း လူတိုင်းက အလိုလို စုမိသွားကြပြီး အချို့က ချူဟွိုက်နောက် ရပ်နေကြကာ အခြားသူများအား မှီခိုအားကိုးလိုသည့် ပုံစံပြနေကြသည်။

“ဘယ်အချိန်ရှိပြီလဲ...." ချူဟွိုက်က အနည်းငယ် မျက်မှောင်ကြုတ်မိသွားသည်။

ကျင်းထျန်းယိက ၈နာရီထိုးတော့မည်ဟု ပြောရန် ပြင်လိုက်စဥ် မြေကြီးက ရုတ်တရက် ကြွလာပြီး ထူးဆန်းသည့် အစိမ်းရောင် မီးရောင်တစ်ခု ပေါ်လာ၍ မိန်းကလေးတစ်ယောက်က ကြောက်ပြီး စူးစူးဝါးဝါး အော်မိသွားသည်။

မြှားတစ်ခုပဲ....ချူဟွိုက်က မြှား၏ ဦးတည်ချက်ကို ကြည့်လိုက်ရာ လက်မှတ်ရောင်းသည့် မဏ္ဍပ်ဆီ ညွှန်ပြနေသည်။

လက်မှတ်ဝယ်ဖို့ လိုတာလား.....

သူ့ကို ပြန်ဖြေလိုက်သည့်အတိုင်း "လက်မှတ်အရောင်းဌာန" ဆိုသည့် ဆိုင်းဘုတ်ကြီးက မီးအစိမ်းရောင်လင်းလာ၍ အမှောင်ယံညထဲ ထူးထူးခြားခြား တောက်ပနေသည်။

"ကလစ်" ဆိုသည့် အသံနှင့်အတူ "အရောင်းဖွင့်ပြီ" ဆိုသည့် ဆိုင်းဘုတ်က မှောင်မည်းနေသည့် ပြတင်းပေါက်ပေါ် ရုတ်တရက် ပေါ်လာသည်။

အဲ့ဒီဆိုင်းဘုတ်က.....ဘယ်သူ ဖွင့်လိုက်တာလဲ.....ထိုအတွေးက လူတိုင်း၏ ခေါင်းထဲ ပေါ်လာအချိန် အားလုံး ကြောက်လန့်သွားကြသည်။ အချို့က ပြတင်းပေါက် လမ်းကြောင်းဆီမှ ရှောင်ဖယ်သွားကြသည်။

ထူးဆန်းသည့် မြင်ကွင်းတစ်ခု ဖြစ်သွားခဲ့သည်။ ဆိုင်းဘုတ် မီးလင်းလာသည်နှင့် ကစားကွင်းတစ်ခုလုံးက သက်တန့်ရောင်စုံမီးများနှင့်အတူ လင်းထိန်လာ၍ လှပပြီး မျက်စိကျိန်းစရာကောင်းလှသည်။

ဆိုင်းဘုတ်ဘေးရှိ မီးလင်းဘုတ်ပြားပေါ်တွင် စာလုံးဝိုင်းဝိုင်းလေးများက လက်ခနဲ ပေါ်လာ၏။

" ကြောက်မက်ဖွယ်ရာ ကစားကွင်း....ည၈နာရီတွင် ဖွင့်သည်"

ကျင်းထျန်းယိက ချူဟွိုက်လက်ကို ဆွဲယူလိုက်သည်

" ဒါဆို အရင်ဆုံး လက်မှတ်သွားဝယ်ကြတာပေါ့..."

လက်မှတ်ရောင်းသည့်နေရာရှိ ပြတင်းပေါက်က အရမ်းနိမ့်နေပြီး အထဲတွင် မှောင်မည်းနေကာ မီးအလင်းရောင် အနည်းငယ်မျှပင် ထိုးဖောက်မဝင်ရောက်နိုင်ချေ။ ကျင်းထျန်းယိက အရပ်နည်းနည်း ပိုရှည်၍ ချူဟွိုက်က ပြတင်းပေါက်ထဲ ခေါင်းတိုးဝင်ရန် ပြင်လိုက်စဥ် မျက်လုံးတစ်စုံက ပြတင်းပေါက်အလယ်မှ ရုတ်တရက် ပေါ်လာလေသည်။

ချူဟွိုက်က နေသားကျနေပြီဖြစ်သော်လည်း သရုပ်ဆောင်ရမည်ဟု တွေးလိုက်ပြီး ကျင်းထျန်းယိခါးကို ဖက်လိုက်ရင်း ထိုမျက်လုံးများကို စိုက်ကြည့်လိုက်သည်။

ချူဟွိုက်က တစ်ခုခုပြောရန် ပြင်လိုက်သည့်အချိန် လက်ကြီးတစ်ဖက်က ပြတင်းပေါက်မှ ရုတ်တရက် ပြူထွက်လာပြီး လက်မှတ်နှစ်စောင် ထုတ်ပေးလာသည်။

ကျင်းထျန်းယိက ယူကြည့်လိုက်ရာ လက်မှတ်တစ်စောင်လုံးက မည်းနေသော်လည်း စာလုံးများက မီးလင်းရောင်များ သုံးထား၍ အားစိုက်ကြည့်နေစရာမလိုချေ။

ချူဟွိုက်က သူ့အတွက် လက်မှတ်တောင်းလိုက်ပြီးနောက် လက်မှတ်အောက်ခြေတွင် သင်္ကေတတစ်ခု တွေ့လိုက်ရသည်။ သူကိုင်ထားသည့် လက်မှတ်က ကျင်းထျန်းယိလက်မှတ် ဖြစ်နေ၏။

ရိုလာကိုစတာ....ကြောက်စရာ အိမ်ကြီး....ပင်လယ်ဓါးပြသင်္ဘော....

ကျင်းထျန်းယိတွင် စုစုပေါင်း ပရောဂျက်၆ခု ရှိသည်။

ချူဟွိုက်က သူ့လက်မှတ်ကို ကြည့်လိုက်ချိန် သူ့မျက်နှာက ချက်ချင်း မည်းမှောင်သွားသည်။

တိုက်ကား..... မြင်းကမ္ဘာ....စပရင်ဝိုင်းပြား....

ကျင်းထျန်းယိလည်း မျက်မှောင်ကြုတ်မိသွား၏ " တစ်ခုမှလည်း မတူဘူး...."

ချူဟွိုက်က ကျင်းထျန်းယိကို ကပ်တွယ်မနေပဲ သူကိုယ်တိုင် သွားနိုင်သည်ဟု တွေးမိသော်လည်း စိတ်ပျက်သွားသည့် မျက်နှာကို ပြခဲ့သေးသည်။

သူ့လက်မှတ်ကို ပြန်ယူပြီးနောက် ချူဟွိုက်က ထွက်သွားရန် ပြင်သော်လည်း ကျင်းထျန်းယိက ဆွဲထားလေသည်။ ချူဟွိုက်က အံ့သြသလို လှည့်ကြည့်လိုက်စဥ် မီးလင်းဘုတ်ပြားတွင် နောက်ထပ်စာကြောင်းတစ်ခု ပေါ်လာသည်

" စုံတွဲလုပ်ဆောင်ချက်တစ်ခုအတွက် ပရောဂျက်နှစ်ခုကို လှဲလို့ရပါတယ်...."

ကျင်းထျန်းယိက ရုတ်တရက် သူ့ကို ဆွဲဖက်လာရင်း ဖုံးကွယ်ထားသည့် အပြုံးတစ်ခုနှင့် ကြည့်လာပြီး မဝံမရဲ မေးလာသည်။

" မင်းကိုယ်နဲ့အတူတူ ပရောဂျက်တွဲလုပ်ချင်လား...."

ချူဟွိုက်က မျက်လွှာချလိုက်ပြီး အံတင်းတင်းကြိတ်ကာ ရှက်ရိပ်စွန်းနေသည့် အသံနှင့် ပြောလိုက်သည်

" ရတာပေါ့...."

သူတို့က ပြတင်းပေါက်ဆီ ပြန်သွားလိုက်ကြ၏။

စုံတွဲပရောဂျက် သုံးခုအတွက် ပရောဂျက်ခြောက်ခု လှဲ၍ရသည်။ အရေအတွက် ပိုနည်းသွားနိုင်သော်လည်း ခက်ခဲမှုက မလျော့သွားလောက်ပေ။

ဤတစ်ကြိမ်တွင်ဖြင့် လက်ကြီးက ကားချပ်စက်ဝိုင်းတစ်ခုကို ထုတ်ပေးလာသည်။

ချူဟွိုက်က အံ့သြသွားရသည် " ကျွန်မက လိုချင်တဲ့အရာနဲ့ လှဲလို့ရမယ် ထင်ထားတာ...အခုတော့ ကံကို အားကိုးရတော့မှာပေါ့...."

ကျင်းထျန်းယိက ဤအရာကို အာရုံစိုက်မနေပဲ ပြုံးပြလာပြီး ကားချပ်ကို အနောက်တွင် နေရာချလိုက်ရင်း စည်းရုံးလာသည် " အကုန် လှဲလိုက်ကြတာပေါ့...."

ချူဟွိုက်က တောင့်ခဲသွားပြီး အသံတိတ်သွားကာ ကားချပ်စက်ဝိုင်းကို ကြည့်လိုက်မိသည်။ ကားချပ်မျက်နှာပြင်တွင် ပရောဂျက် ရှစ်ခု၏ အမည်များရှိသည်။ နတ်သမီးနန်းတော်....escape room....ချားရဟတ်.....ရှင်သန်ခြင်းနှင့် သေဆုံးခြင်း...လိင်ပိုင်းဆိုင်ရာ စိတ်ပညာရပ် စာအုပ်.....

တစ်ခုခုများ မှားနေသလားလို့....

"မင်းလှည့်ကြည့်လေ...."ကျင်းထျန်းယိက ဆိုလိုက်သည်။

ချူဟွိုက်က ပြုံးလိုက်ပြီး ကားချပ်စက်ဝိုင်းကို လှည့်လိုက်သည် " လိင်ပိုင်းဆိုင်ရာ စိတ်ပညာရပ် စာအုပ်ပေါ် ကျချင်တယ်...." အဲ့ဒါ ဘာလည်း မသိပေမယ့် တခြားဟာတွေထက် စိတ်ဝင်စားစရာကောင်းမယ့်ပုံပဲ......

နှစ်မိနစ်ကြာပြီးနောက် သူတို့က "နတ်သမီးနန်းတော်" " ချားရဟတ်"နှင့် "လိင်ပိုင်းဆိုင်ရာ စိတ်ပညာရပ် စာအုပ်" ဆိုသည့် စုံတွဲလက်မှတ်များနှင့်အတူ ဂိတ်ပေါက်သို့ ပြန်သွားလိုက်ကြသည်။

သူတို့က အခြားသူများကို အကျဥ်းချုပ်ပြောပြလိုက်ရာ အများစုက တွန့်ဆုတ်နေကြပြီး လက်မှတ်များကို ချက်ချင်း လဲမလာကြချေ။

"ကျွန်မတို့ရော စုံတွဲလက်မှတ် ပြောင်းလိုက်သင့်လား...." တစ်ယောက်ယောက်က နောက်ဆုံးမှ မေးလာသည်။

လော့ဇီယန်က ပိုပြီး တည့်တိုးဆန်သေးသည်

" ရှောင်ယဲ့....စုံတွဲလက်မှတ် သွားပြောင်းကြရအောင်....မင်းမှာ လက်မောင်းပိန်ပိန်လေးတွေနဲ့ ခြေထောက်သေးသေးလေးတွေပဲ ရှိတာ....မကြောက်နဲ့...အစ်ကိုလော့က ကာကွယ်ပေးမယ်..."

ယဲ့ယွမ်က တိုးတိုးပြောလာသည် " အစ်ကိုကြီး....ကျွန်တော် သရဲဆိုတာ မေ့သွားပြီလား...."

ချူဟွိုက်က တစ်ခဏမျှ စဥ်းစားကြည့်လိုက်ပြီးသည်ထိ တစ်ယောက်တည်း ပရောဂျက်နှင့် စုံတွဲပရောဂျက်ရွေးရာတွင် ဘယ်ဟာ ပိုကောင်းသလဲ မဆုံးဖြတ်နိုင်သေးသော်လည်း ကမ္ဘာကြီးက သူတို့ကို စုံတွဲပရောဂျက် ရွေးစေချင်မှန်းကိုဖြင့် သေချာသိလေသည်။

ချူဟွိုက်က သူတို့ကို ကူပြီး ဆုံးဖြတ်မပေးပဲ သူတို့အတွက် ကောင်းကွက်ဆိုးကွက်များကိုသာ အကြံပေးလိုက်သည်။ လက်ရှိအခြေအနေအရ စုံတွဲလုပ်ဆောင်ချက်တွင် အချင်းချင်း ဂရုစိုက်ပေး၍ရသည်က အမှန်ပင်။

အသစ်လေးများ တုန့်အန်ယာနှင့် ကျိုးရှို့ဝမ်တို့က ကော်ပီကူးထားသည့် သဲလွန်စစာရွက်များကို ကိုင်ထားကြသည်။

သူတို့ခြောက်ယောက်က အချိန်တော်တော်များများ အကုန်ခံပြီး သဲလွန်စအကြောင်း အသစ်လေးများကို ရှင်းပြထား၍ ဝယ်ရမည့် လက်မှတ်အမျိုးအစားကို ဆုံးဖြတ်ရန်က သူတို့သဘောပင်။

အချို့က လက်မှတ်လှဲလိုက်ကြပြီးနောက် လူတိုင်းက လက်မှတ်ကိုင်ပြီး ဝင်သွားလိုက်ကြသည်။ ကစားကွင်းက ကြီးမားလှသည်။ တစ်ညတည်းနှင့် ကစားကွင်းတစ်ခုလုံး မဖြတ်နိုင်လောက်ဟု ခန့်မှန်းမိသော်လည်း လည်ပတ်ရန်အတွက် တံခါးနားတွင် ရှုခင်းကြည့်ကားတစ်ခု ရှိနေသည်။

“ဟေ့....တကယ်လို့ ကျွန်မက လက်မှတ်ထဲမှာ မပါတဲ့ ပရောဂျက်တွေ လုပ်ကြည့်ရင်ရော....ဘာဖြစ်သွားမှာလဲ...." ချူဟွိုက်က ရုတ်တရက် မေးလိုက်သည်။

သူက ထိုအကြောင်းကို အခုလေးတင် တွေးမိလိုက်ခြင်း ဖြစ်၏။

👻

Prev Next