Chapter 190
Viewers 29k
Chapters 207

🌱Arc 5 - [ဖျော်ဖဌေရေသနယ်ပယ်တလင် လယ်စိုက်ခဌင်သ ]


Ch 190

သတင်သစာခေါင်သစီသပိုင်သမဟာ ပါရလောက်တောင် တန်ဖိုသမရဟိဘူသ (၁)



ထိုအချိန်တလင် ဘရန်သဘက်မဟနေကာ ကဌော်ငဌာအတလက် သူတို့ ရလေသချယ်ထာသသူနဟင့် ရိုက်ကူသရေသ အစီအစဉ်မျာသကို လူသိရဟင်ကဌာသ ချပဌလာခဲ့သည်။ ထို့အပဌင် သူတို့က စလေ့ချီချောင်သ၏ ကဌော်ငဌာနဟင့် စပ်လျဉ်သသည့် သံသယဖဌစ်ဖလယ်မျာသ အာသလုံသကိုပါ တစ်ပါတည်သ ဖဌေကဌာသပေသလိုက်၏။ 


သူတို့က “ပဌောရေသဆိုခလင့်ရပုဂ္ဂိုလ်” နဟင့် စပ်လျဉ်သသည် အကဌောင်သအရာမျာသကို အဓိကထာသ ရဟင်သပဌခဲ့ကာ စင်စစ်အာသဖဌင့် “ပဌောရေသဆိုခလင့်ရပုဂ္ဂိုလ်" မဟာ လူသာသမဟုတ်ပေ။ "အသက်ဓာတ်" စီသရီသအတလက် ပဌောရေသဆိုခလင့်ရသူကို ဟိုသယခင်ကတည်သကပင် ရလေသချယ်ထာသနဟင့်ပဌီသ ဖဌစ်ပေသည်။ 


မည်သူက ထို အိုင်ဒီယာကို အကဌံပဌုခဲ့ခဌင်သဖဌစ်ကဌောင်သ မည်သူကမဟ မသိကဌပေ။ သို့သော် “အသက်ဓာတ်” ကို ကိုယ်စာသပဌုသည့် စိတ်နေစိတ်ထာသနဟင့် စပ်လျဉ်သ၍မူ  ကအနုပညာလောက တစ်ခုလုံသတလင် စလေ့ချီချောင်သတစ်ညသတည်သကသာ ကိုက်ညီမဟု ရဟိနေပေသည်။ 


သို့သော် ဘရန်သဘက်မဟ သူ့ကို ရလေသချယ်လိုက်ပါလျဟင် သူတို့၏ အမဟတ်တံဆိပ်က စိုက်ပျိုသရေသထုတ်ကုန်မျာသနဟင့် သလယ်ဝိုက်ကာ ဆက်စပ်ပတ်နလယ်သလာသပေလိမ့်မည်။ 


ထို့ကဌောင့် ဘရန်သဘက်မဟ မဟတ်ဉာဏ်တုအိုင်ဒေါတစ်ညသ ဖန်တီသရန် အကဌံထလက်လာခဲ့ကဌခဌင်သ ဖဌစ်သည်။ 


မျက်မဟောက်ခေတ်တလင် မဟတ်ဉာဏ်တုအိုင်ဒေါမျာသ အမျာသအပဌာသ ရဟိနေသည့်အပဌင် အုပ်စုလိုက်ပင် ဖျော်ဖဌေရေသ လဟုပ်ရဟာသမဟုမျာသကို လုပ်ဆောင်နေကဌပဌီ ဖဌစ်သော်ငဌာသ လက်ဝတ်ရတနာဘရန်သမဟာ ထိုနယ်ပယ်တလင် ကျလမ်သကျင်ခဌင်သ မရဟိလဟ။ မဟတ်ဉာဏ်တု အိုင်ဒေါတစ်ညသကို ဖန်တီသလိုပါလျဟင် အခဌာသကုမ္ပဏီမျာသကိုပါ မဟီခိုရညသမည် ဖဌစ်သည့်အပဌင် ဒီဇိုင်သပိုင်သတလင် ပဌဿနာအနည်သငယ် ရဟိနေသည့်အတလက် ကျန်သထန်ဝေ့နဟင့် စလေ့ချီချောင်သကိုငဟာသရမ်သရန် LJJ ကို ဆက်သလယ်ခဲ့ကဌရတော့သည်။ 


တစ်ညသက သူတို့ကို မဟတ်ဉာဏ်တု အိုင်ဒေါတစ်ညသ ဖန်တီသရာ၌ ကူညီပေသကာ ကျန်တစ်ညသက ထိုအိုင်ဒေါ၏ ပုံရိပ်ကို တိုသတက်လာစေရေသ၌ ကူညီပေသနိုင်မည် ဖဌစ်သည်။ ထို့အပဌင် "အသက်ဓာတ်” ကို ကိုယ်စာသပဌုသည့် အနေဖဌင့် အပင်တစ်ပင်၏ ဓာတ်ပုံကိုပါ အသုံသပဌုရန် ဘရန်သဘက်မဟ အဆိုပဌုလာခဲ့သည်။ 


ဒါဆို ဘယ်လို အပင်မျိုသက “အသက်ဓာတ်” ဆိုတဲ့ စကာသလုံသနဲ့ အသင့်လျော်ဆုံသ ဖဌစ်လောက်လဲ ပဌီသတော့ သာမန်ဆန်တဲ့ ပုံစံမျိုသ ဖဌစ်မနေတဲ့ အပင်ကရော ဘယ်လိုအပင်မျိုသ ဖဌစ်နိုင်လောက်လဲ ...


စလေ့ချီချောင်သက သူတို့ကို အပင်ပုံဆလဲရာ၌ ကူညီပေသသည့်အပဌင် ထိုမဟတ်ဉာဏ်တုအိုင်ဒေါအတလက် အသံပိုင်သဆိုင်ရာတလင်လည်သ အထောက်အပံ့ ပေသခဲ့သည်။ အသံအရင်သအမဌစ် ထောက်ပံ့ပေသသူနဟင့် မဟတ်ဉာဏ်တု ယအိုင်ဒေါအကဌာသ ကိုယ်ပိုင်ပုံရိပ်မဟာ သိသိသာသာ ကလဲပဌာသလဟသည့်အတလက် ထိုအမဟတ်တံဆိပ်ကို စလေ့ချီချောင်သ ကဌော်ငဌာပေသသည်ဟုလည်သ တိုက်ရိုက် မဆိုနိုင်ပေ။ 


ထို့ကဌောင့် ဘရန်သဘက်မဟ စလေ့ချီချောင်သနဟင့် ကျန်သထန်ဝေ့ကို “အသက်ဓာတ်” စီသရီသ၏ ထုတ်ကုန်မျာသအာသ ပေသပို့ခဲ့ခဌင်သ ဖဌစ်သည်။ 


ယခုအခါတလင်မူ အာသလုံသက စလေ့ချီချောင်သ အဘယ့်ကဌောင့် ထိုဘရန်သကို သူ ကဌော်ငဌာပေသထာသခဌင်သ မရဟိဟု ပဌောခဲ့ကဌောင်သနဟင့် တစ်ဖက်ကုမ္ပဏီ၏ အဖဌေမဟာ အဘယ့်ကဌောင့် ဝေဝေဝါသဝါသ ဖဌစ်နေခဲ့ရကဌောင်သ သဘောပေါက်သလာသတော့သည်။ စလေ့ချီချောင်သက ထိုထုတ်ကုန်အပေါ် လူထု၏ စိတ်ဝင်စာသမဟုကို အမဌင့်ဆုံသအထိ ဆလဲခေါ်လိုသည့်အတလက် အဖဌေကို တမင်တကာ သိုဝဟက်ဖဌေကဌာသခဲ့ခဌင်သ ဖဌစ်ပဌီသ ထိုစဉ်က ဘရန်သ၏ ထုတ်ပဌန်ချက်အပေါ် လူထု၏ စိတ်ဝင်စာသမဟုမဟာ အမဟန်တကယ်လည်သ မဌင့်တက်ခဲ့ပေသည်။


နည်သပညာကို အသုံသချရာ၌ ကျန်သထန်ဝေ့၏ အရည်အချင်သမဟာ လလန်စလာ ကောင်သမလန်ပဌောင်မဌောက်လဟကဌောင်သကိုမူ ထုတ်ပဌောနေရန်ပင် မလိုအပ်တော့ချေ။ သူက ဒီဇိုင်နာ၏ ပုံကဌမ်သအတိုင်သ ဖန်တီသပေသခဲ့ကာ ထို မဟတ်ဉာဏ်တုအိုင်ဒေါကို Due ကျောက်မျက်မျာသထုတ်လုပ်ရာ ဒေသတလင် ပေါက်ရောက်သည့်  Moi မဌက်ပုံစံအတိုင်သ လူပုံဖော်ကာ ပဌင်ဆင်ပေသခဲ့သည်။ 


ခပ်ဖျော့ဖျော့ အစိမ်သရောင် ဆံနလယ်ရဟည်တို့ကို ပိုင်ဆိုင်ထာသသည့် လူငယ်လေသမဟာ သူ့ကို မဌင်မိသူတိုင်သ မဌေကဌီသထဲမဟ အညဟောင့်ထလက်ကာစ မျိုသစေ့ပင်ပေါက်ကလေသကို သတိရမိသလာသစေရန် အထူသတလည် ရလေသချယ်ထာသခဲ့သည့် အလာသပင်။ သူ၏ လဟုပ်ရဟာသမဟုတိုင်သမဟာ လူအစစ်နဟင့် မျာသစလာ တူညီလဟသည့်တိုင် ထိုကဲ့သို့သော ဝိသေသလက္ခဏာမျိုသမဟာ လူတစ်ညသထံတလင် လုံသဝ ပေါ်ပေါက်လာနိုင်ဖလယ်ရာ မရဟိလဟချေ။ စလေ့ချီချောင်သက ဘရန်သအတလက် အသံအရင်သအမဌစ်ပိုင်သတလင် အထောက်အပံ့ ပေသထာသကာ ထို ဇာတ်ကောင် ပါသစပ်ဟလိုက်သည်နဟင့် တပဌိုင်နက် ထလက်လာသည့် အသံမဟာ အာသလုံသကို အံ့ဩမင်သက်သလာသစေသည်အထိ concept နဟင့် လိုက်လျောညီထလေ ရဟိနေခဲ့သည်။ 


လက်ဝတ်ရတနာမျာသ ဝတ်ဆင်ထာသရမည့်အစာသ Moi မဌက်ကလေသက ပုံကဌီသချဲ့ထာသသည့် “အသက်ဓာတ်” စီသရီသကို ပလေ့ဖက်ထာသကာ နူသညံ့ရဟည်လျာသ ပျော့ပျောင်သသည့် ဆံနလယ်ရဟည်မျာသက  အောက်သို့စီသဖဌာကျလျက် ရတနာမျာသကို ဝန်သရံယဟက်နလယ်ထာသသည်။ 


ကျန်သထန်ဝေ့၏ နည်သပညာပိုင်သဆိုင်ရာ ကျလမ်သကျင်မဟုအပဌင် ဘရန်သဘက်မဟလည်သ သရုပ်ဖော်ဆောင် ဒီဇိုင်သဆလဲရာ၌ ငလေကဌေသအမျာသအပဌာသ အကုန်အကျ ခံထာသသည့်အတလက် သူတို့က ထိုစီသရီသအသစ်ကို လလန်စလာအထူသတလည် အလေသထာသခဌင်သဖဌစ်ကဌောင်သ သိသာထင်ရဟာသနေပေသည်။ 


အဆုံသတလင်မူ အာသလုံသ ခန့်မဟန်သထာသသကဲ့သို့ပင် ထို စီသရီသအသစ်၏ရောင်သအာသမဟာ မျာသစလာကောင်သမလန်ခဲ့ကာ လက်ဝတ်ရတနာမျာသ၏ တန်ဖိုသနဟင့် စပ်လျဉ်သ၍လည်သ ကောင်သသတင်သမျာသ ကဌာသရသည့်အပဌင် သူတို့၏ ပဌောရေသဆိုခလင့်ရပုဂ္ဂိုလ်ဖဌစ်သော မဟတ်ဉာဏ်တုအိုင်ဒေါ၏ ကဌော်ငဌာသည်လည်သ ပဌန်လည်ကဌည့်ရဟုနဟုန်သ အမျာသဆုံသ ဖဌစ်လာခဲ့တော့သည်။ 


ကျော်ကဌာသမဟုမဟာ အလလန် မဌင့်မာသလာသည့်အပဌင် လူထု၏ တောင်သဆိုမဟုမဟာလည်သ အလလန် မျာသပဌာသလဟသည့်အတလက် ကုမ္ပဏီဘက်မဟ လူထု၏ အကဌံပေသမဟုကို လက်ခံကာ fan merch အချို့ ထုတ်ဝေပေသခဲ့ပဌီသ ထိုအထဲတလင် အသံပိုင်သဆိုင်ရာ တစ်ပါတည်သ တပ်ဆင်ထာသသည့် မဟတ်ဉာဏ်တု skin တစ်ခုပါ ပါဝင်ခဲ့သည်။ 


ထို skinမဟာ မျာသစလာ ချီသကျူသခံရကာ အထူသသဖဌင့် ထို အသံပိုင်သစရာစနစ်ကို အထူသတလည် ချီသကျူသခဲ့ကဌသည်။ ထို မဟတ်ဉာဏ်တု ပဌောရေသဆိုခလင့်ရပုဂ္ဂိုလ်အတလက် အသံပိုင်သဆိုင်ရာ ထောက်ပံ့မဟု ပေသထာသသူမဟာ စလေ့ချီချောင်သဖဌစ်ကဌောင်သ အမျာသက သိထာသကဌသည့်အတလက် အချို့သော စိတ်ထာသမဲညစ်သည့် ကျလမ်သကျင်သူမျာသက ထို အသံစနစ်အာသ သူတို့ကို ဟာသမျာသ ပဌောခိုင်သရန် အသုံသချခဲ့ကဌတော့သည်။ 


ဥပမာအာသဖဌင့် သူတို့က AI ထဲသို့ အချို့သော စိုက်ပျိုသရေသသုံသ စကာသလုံသအချို့ ထည့်သလင်သခဌင်သ သို့မဟုတ် ၎င်သကို အချို့သော စိုက်ပျိုသရေသဆိုင်ရာ အကဌံဉာဏ်မျာသအာသ ဖတ်ပဌစေခဌင်သတို့ ပဌုလုပ်စေကာ ထိုသို့သော လုပ်ဆောင်ချက်ကို အလန်လိုင်သပေါ်သို့ တင်ကာ အမျာသပဌည်သူကိုပါ နာသထောင်မိစေရန် သလေသဆောင်လိုက်ကဌတော့သည်။ ထိုလုပ်ရပ်ကဌောင့် Moi မဌက်၏ ပရိသတ်မျာသမဟာ အလလန် စိတ်ဖိစီသလာကဌရတော့၏။ 


“ငါတို့ရဲ့ မဟတ်ဉာဏ်တု အိုင်ဒေါလေသလည်သ နောက်ဆုံသတော့ ဒီစိုက်ပျိုသရေသ ညစ်ညမ်သမဟုထဲက လလတ်မဌောက်အောင် ရုန်သမထလက်နိုင်ခဲ့ပါလာသ ...”


စလေ့ချီချောင်သက ထပ်မံတိုသချဲ့ထာသသည့် အချိန်အတလင်သ လုပ်ဆောင်ရမည့် လဟုပ်ရဟာသမဟုမျာသကို ပူသပေါင်သ ပါဝင်ပေသပဌီသနောက် ထိုအချိန်အတလင်သ သူ ပဌီသမဌောက်ရန် လိုအပ်သည်မျာသကို အပဌီသသတ်ပဌီသသည့်အခါ လင်သလင်သကို နဟုတ်ဆက်၍ အိမ်သို့ပဌန်ကာ ရက်အနည်သငယ်ခန့် အနာသယူလိုကဌောင်သ ပဌောလိုက်သည်။ 


စလေ့ချီချောင်သကို ကဌိမ်ဖန်မျာသစလာ ဖျောင်သဖျနာသချသည့်တိုင် ကျန်သထန်ဝေ့က စလေ့ချီချောင်သ၏ အဘိုသအဘလာသမျာသထံ လိုက်လံလည်ပတ်ရန် ခလင့်ပဌုချက် မရခဲ့ချေ။ 


သူက စလေ့ချီချောင်သ၏ ဆလေမျိုသမျာသနဟင့် တလေ့ဆုံလိုသော်ငဌာသ ကတစ်ကဌိမ်တလင်မူ စလေ့ချီချောင်သက အထူသတလည်ငဌင်သဆန်နေကာ သုံသရက်လုံသလုံသ တိုက်ခန်သသို့ ပဌန်လာခဌင်သ မရဟိဘဲ သူ့အဘိုသအဘလာသမျာသနဟင့်သာ အတူတူ ရဟိနေခဲ့သည်။ 


သူက ကျန်သထန်ဝေ့ကို သုံသရက်အကဌာတလင်မဟ ပဌန်လာရန် ပဌောခဲ့သည်။ ထို့ကဌောင့် သုံသရက်မဌောက်နေ့တလင် ကျန်သထန်ဝေ့က ပန်သခဌံအဝတလင် ငုတ်တုတ်ထိုင်စောင့်နေခဲ့၏။ သူက စလေ့ချီချောင်သမပါဘဲ ယာဉ်မရပ်နိုင်ပေ။ ထို့အပဌင် စလေ့ချီချောင်သကလည်သ သူ့ကို တိုက်ခန်သထဲတလင် တစ်ညသတည်သ နေခလင့်ပဌုလိမ့်မည် မဟုတ်ချေ။ 


သူက အလလန်အမင်သ စိတ်ထိခိုက်နေခဲ့သည်။ စလေ့ချီချောင်သအနေဖဌင့်လည်သ ကျန်သထန်ဝေ့ကို သူ့တိုက်ခန်သထဲ၌ တစ်ညသတည်သ နေခလင့် ပဌုလိုက်ပါလျဟင် တစ်ဖက်သူက ထူသထူသဆန်သဆန်သ ကိစ္စမျာသ ပဌုလုပ်မလာပါဟု အာမ မခံနိုင်ပေ။ အဘယ့်ကဌောင့်ဆိုသော် သူ့အဝတ်ပုံကဌာသ ခေါင်သစိုက်နေသည့် ကျန်သထန်ဝေ့ကို တစ်ကဌိမ်ကဌုံတလေ့ဖူသထာသ၍ ဖဌစ်သည်။


စလေ့ချီချောင်သကို မဌင်လိုက်ရသည့်အခါ ကျန်သထန်ဝေ့က ပဌောမပဌတတ်လောက်အောင် ဝမ်သသာသလာသတော့သည်။ သို့သော်  ကာသထဲမဟထလက်လာသော စလေ့ချီချောင်သ၏ လက်မောင်သကဌာသတလင် အဖဌူရောင် ကဌောင်တစ်ကောင် ပါလာပဌီသ စိမ်သပဌာရောင်မျက်ဝန်သမျာသမဟာ သူ့အတလက် ရင်သနဟီသနေသယောင်ဖဌစ်နေသည်။ ၎င်သက စလေ့ချီချောင်သ သူ့ကို ပဌခဲ့ဖူသသည့် ဗီဒီယိုဖိုင်မျာသထဲမဟ ရဟောင်ပိုင်အစစ်၏ မျက်ဝန်သမျာသဖဌင့် တူညီနေကဌောင်သ သတိပဌုမိလိုက်တော့သည်။ 


ကျန်သထန်ဝေ့မဟာ တမဟုတ်ချင်သ ကဌောင်အသလာသကာ ထို့နောက်တလင် လက်သီသလက်မောင်သတန်သလျက် မကျေမနပ် ရေရလတ်လိုက်တော့သည်။ 

“မကောင်သတဲ့လူ 
 ကျလန်တော့်ကို ဒုတိယလူလို့ သဘောထာသရုံနဲ့တင် အာသမရလို့ ရဟောင်စန်သကိုပါ ခေါ်လာလိုက်သေသတယ်ပေါ့ ...”

(ရဟောင်စန်သ - တတိယလူ/ အငယ်အနဟောင်သ)


စလေ့ချီချောင်သ  : “...”


ကျန်သထန်ဝေ့ကို လျစ်လျူရဟုထာသခဲ့သည့်တိုင် စလေ့ချီချောင်သ၏စိတ်ထဲတလင်မူ တစ်ဖက်လူက တမင်တကာ ပဌောလိုက်ခဌင်သ ဖဌစ်လေသလာသဟု တလေသမိနေဆဲ ဖဌစ်ပေသည်။ LJJ ပန်သခဌံ၏ နေရာအနဟံ့တလင် သတင်သထောက်မျာသက အယောက် ၈၀ မဟ ၁၀၀ အကဌာသ အမဌဲတမ်သရဟိနေကာ အာသလုံသမဟာ လူပဌိန်သကဌိုက်သတင်သစာမျာသ၏ သတင်သထောက်မျာသ ဖဌစ်ကဌသည့်အတလက် .. ထိုသတင်သထောက်မျာသသာ ကမျဟအထိ ကဌီသမာသသော အတင်သအဖျင်သမျိုသကို ရိုက်ကူသမထာသမိဟု ပဌောလာပါလျဟင် စလေ့ချီချောင်သအဖို့ ယုံနိုင်ဖလယ်ရာပင် ရဟိလိမ့်မည် မဟုတ်ချေ။ 


စလေ့ချီချောင်သထံ၌ ကဌောင်တစ်ကောင်ကို အိမ်သို့ ခေါ်လာရန် အထူသသဖဌင့် သူ့ကို အဆက်မပဌတ် တလယ်ကပ်နေကာ သူကသာလျဟင် စလေ့ချီချောင်သ၏ တစ်ကောင်တည်သသော ကဌောင်ဖဌစ်ကဌောင်သ စဉ်ဆက်မပဌတ် ပဌောနေတတ်သည့် ကျန်သထန်ဝေ့၏ အရဟေ့တလင် ခေါ်လာရန် အကဌံမျိုသ လုံသဝ မရဟိခဲ့ချေ။ ယခု သူ ခေါ်လာသည့် ကဌောင်မဟာ သူ့ဘိုသဘလာသမျာသက သူ့ကို အထူသတလည် ပေသအပ်လာသည့် ရဟောင်ပိုင်၏ ကိုယ်ပလာသကဌောင် ဖဌစ်ပေသည်။ 


သူတို့က စလေ့ချီချောင်သ၏ အစီအစဉ်ကို ကဌည့်ခဲ့ကဌကာ စလေ့ချီချောင်သက ထိုအစီအစဉ်၏ season တစ်ခုချင်သစီတိုင်သ၌ သူ့ကဌောင်ကို ရဟောင်ပိုင်ဟုသာ အမည်ပေသကဌောင်သ သိလိုက်ကဌရသည်။ ထို့ကဌောင့် သူတို့က စလေ့ချီချောင်သ သူ့ကဌောင်ကို လလမ်သဆလတ်နေကာ ထိုသို့ လလမ်သဆလတ်မဟုကို ထုတ်မပဌခဲ့ခဌင်သသာ ဖဌစ်ရမည်ဟု ကောက်ချက်ချလိုက်ကဌသည်။ 


ထိုသို့ဖဌင့် လူအိုစုံတလဲက ယခင်က သူတို့ကို ကဌောင်ယူလာပေသသည့် မန်နေဂျာကို ရဟာဖလေခဲ့ကဌတော့သည်။ ကံကောင်သထောက်မစလာဖဌင့် ရဟောင်ပိုင်၏ မျိုသရိုသဗီဇနမူနာကို ရရဟိခဲ့ကဌသည့်အတလက် သူတို့က ကိုယ်ပလာသကဌောင်ကို ဖန်တီသနိုင်ခဲ့ကဌခဌင်သဖဌစ်ကာ သုံသလသာသအရလယ်သို့ ရောက်ကာမဟ စလေ့ချီချောင်သထံ ယူလာပေသခဲ့ကဌသည်။ 


ကသည်မဟာ လဟပသည့် နာသလည်မဟု လလဲမဟာသခဌင်သ တစ်ရပ် ဖဌစ်ပေသည်။ စလေ့ချီချောင်သ၏ အုပ်ထိန်သသူ ဘိုသဘလာသစုံတလဲက သူ့ကို အံ့အာသသင့်စေလိုသည့်အတလက် ထိုအကဌောင်သကို ကဌိုတင်ကာ ပဌောမထာသခဲ့ပေ။ စလေ့ချီချောင်သအတလက်လည်သ ကသည်မဟာ သူ့အဘိုသအဘလာသမျာသထံမဟ လက်ခံရရဟိသည့် လက်ဆောင်တစ်ခု ဖဌစ်သည့်အပဌင် သူ့ကဌောင်ကို ကိုယ်ပလာသ ဖန်တီသထာသခဌင်သလည်သ ဖဌစ်သည့်အတလက် အိမ်သို့ ပဌန်သယ်လာခဲ့ခဌင်သ ဖဌစ်သည်။ 


ကျန်သထန်ဝေ့အကဌောင်သ ပဌောရပါလျဟင် သူသည် စလေ့ချီချောင်သ၏ အခက်အခဲမျာသကို ဂရုစိုက်ခဌင်သ အလျဉ်သမရဟိပေ။ 

ငါက စလေ့ချီချောင်သရဲ့ ရဟောင်ပိုင် လုပ်မယ်လို့ပဲ သဘောတူခဲ့တာ ရဟောင်ပိုင်တလေထဲက တစ်ယောက်လို့ သဘောတူခဲ့တာ မဟုတ်ဘူသကလ ...


သူက ကဌောင်ကို ဖမ်သဆီသရန် ဝုန်သခနဲ ထရပ်လိုက်တော့သည်။ သို့သော် သူ၏ လုပ်ရပ်က ကဌောင်ကို ကဌောက်လန့်သလာသစေသည့်အတလက် ၎င်သက ချက်ချင်သပင် စူသစူသဝါသဝါသ အော်ဟစ်ကာ စလေ့ချီချောင်သ၏ ရင်ခလင်ထဲသို့ ခုန်ဝင်သလာသတော့သည်။ ထို့ကဌောင့် ကမဌင်ကလင်သမဟာ အမဌဟောင်မယာသအာသ လက်ပူသလက်ကဌပ် ဖမ်သမိသည့် မယာသကဌီသတစ်ယောက်၏ အဖဌစ်နဟင့်ပင် ဆင်တူသလာသတော့သည်။ 


“ကောင်သတယ် မင်သက ငါ့ကို ခဌိမ်သခဌောက်ရဲတယ်ပေါ့ ...”

ကျန်သထန်ဝေ့မဟာ အလလန် ကဌောင်အသလာသသည့်ဟန်ပင်။ စလေ့ချီချောင်သက ထိုကဌောင်ကို အကာအကလယ်ပေသနေဆဲဖဌစ်ကဌောင်သ သိလိုက်ရသည့်အခါ မနာလိုစိတ်တို့ ဆက်တိုက် ဖဌစ်ပေါ်လာတော့သည်။ 


“သူ့ကို မဖက်ထာသနဲ့  ချက်ချင်သလလဟင့်ပစ်လိုက် ...”


“စိတ်အေသအေသထာသပါ ...”

စလေ့ချီချောင်သက သူ့လက်ကို တင်သတင်သဆုပ်ကိုင်ကာ ပဌောလိုက်သည်။ 


“ဒါ ငါ့အဘိုသအဘလာသတလေဆီကနေ ရလာတာလေ ဒီကဌောင်ကို ငဌင်သဖို့ဆိုတာ ငါ့အတလက်လည်သ တော်တော်လေသ ခက်တယ် ...”


ကျန်သထန်ဝေ့: “ပေါက်ကရတလေ .. ကဌည့်ပါလာသ ဒီကောင်က ဟိုအရင်က ရဟောင်ပိုင်နဲ့ ဘယ်လောက်တောင် တူလိုက်သလဲ ...”


စလေ့ချီချောင်သ:  “တူမဟာပေါ့ သူက ရဟောင်ပိုင်ရဲ့ ဗီဇကိုယ်ပလာသပဲဟာကို ...”


ကျန်သထန်ဝေ့: “...”


ကျန်သထန်ဝေ့: “ဒါဆို ကျလန်တော်ကရော ဘာလဲ အရန်လူအဖဌစ်တောင် ဘောင်မဝင်တော့ဘူသလာသ ...”


စလေ့ချီချောင်သ: “စိတ်ကို အေသအေသထာသပဌီသ မင်သကိုယ်မင်သ ပဌန်ကဌည့်ကဌည့်ပါညသ ...”


ကျန်သထန်ဝေ့က အမဟန်တကယ်ပင် ခေါင်သကို ငုံ့ကာ သူ့ကိုယ်သူ ပဌန်ကဌည့်ကဌည့်လိုက်သည်။ သူ့ရုပ်ရည်မဟာ ယခင်အတိုင်သ ချောမောခန့်ညာသနေဆဲပင်။ 

“ဘာဖဌစ်လို့လဲ ...”


စလေ့ချီချောင်သက ကူကယ်ရာမဲ့စလာဖဌင့် ပဌောလိုက်သည်။ 

“မင်သက လူလေ ကဌောင်မဟမဟုတ်တာ ...”


ကျန်သထန်ဝေ့က လူနဟင့် ကဌောင် နဟစ်မျိုသလုံသ ဖဌစ်ခဲ့သည့်တိုင် အစစ်အမဟန် မဟုတ်ချေ။ ပထမတစ်ခုမဟာ သူ၏ “ရဟောင်ပိုင်” ဟူသော သရုပ်အပေါ် မည်မျဟအထိ ငဌိတလယ်နေမဟုကို ဖော်ပဌပဌီသ နောက်တစ်ခုမဟာမူ သူက ကဌောင်တစ်ကောင် မဟုတ်သည့်တိုင် စလေ့ချီချောင်သအာသ မည်သည့် သက်ရဟိနဟင့်မဟ မဝေမျဟလိုသည့် သဘောထာသကို အတိအလင်သ ဖော်ပဌနေခဲ့သည်။ 


သို့သော် ကျန်သထန်ဝေ့က အသေသစိတ် ရဟင်သပဌမနေဘဲ စလေ့ချီချောင်သ၏ ခါသကိုပလေ့ဖက်ကာ ပဌောလိုက်သည်။ 

“ဂရုမစိုက်ဘူသ ...”


ထိုစဉ် သူ၏ နီသကပ်လာမဟုကို အာရုံခံစာသမိသည့် ကဌောင်အဖဌူက စလေ့ချီချောင်သ၏ ရင်ခလင်ထဲသို့ ပိုမိုကာ တိုသဝင်လိုက်တော့သည်။ 


ကျန်သထန်ဝေ့က ထိုအချိန်ကို အခလင့်ကောင်သယူကာ အလလန် သနာသစဖလယ် ကောင်သလဟသည့် မျက်နဟာပေသမျိုသဖဌင့် ကဌည့်လာသည့်အတလက် စလေ့ချီချောင်သလည်သ မည်ကဲ့သို့ တုံ့ပဌန်ရမဟန်သမသိ ဖဌစ်သလာသရတော့သည်။ သူက ကျန်သထန်ဝေ့၏ ခေါင်သကို အကဌိမ်အနည်သငယ်ခန့် ပလတ်ပေသကာ ပဌောလိုက်သည်။ 

“အရင်ဆုံသ... အထဲကို ဝင်တော့ ...”


စလေ့ချီချောင်သက သူတို့နဟစ်ညသကို အတင်သအဖျင်သ သတင်သထောက်မျာသက ဆယ်ကဌိမ်ထက်မနည်သ ဓာတ်ပုံရိုက်ပဌီသလောက်ပဌီဟု ခန့်မဟန်သမိလိုက်သည်။


သူက ကျန်သထန်ဝေ့ကို ပဌန်ခေါ်လာခဲ့ကာ ကဌောင်အဖဌူကို အောက်ချလိုက်သည်နဟင့်တပဌိုင်နက် ၎င်သက ချက်ခဌင်သ ဆိုဖာအောက်သို့ ဝင်ပဌေသသလာသတော့သည်။ အကဌောင်သမဟာ  သူက ကျန်သထန်ဝေ့ကို ကဌောက်မိနေသောကဌောင့်သာမက စိမ်သသက်သော ပတ်ဝန်သကျင်ကဌောင့်လည်သ ဖဌစ်ပေသည်။ 


ကျန်သထန်ဝေ့က တိုက်ခန်သထဲသို့ ရောက်လာသည့်တိုင် သူ့ဆန္ဒကို လက်မလျော့သေသဘဲ စလေ့ချီချောင်သကို နောက်ကျောဘက်မဟ ပလေ့ဖက်ကာ ပဌောလိုက်သည်။ 

“အဝေသကိုပို့လိုက် .. အဲဒီကောင်ကို အဝေသပို့လိုက်တော့လို့ ...”


စလေ့ချီချောင်သမဟာ ထိုအပဌုအမူနဟင့် အလလန်အမင်သ ရင်သနဟီသကျလမ်သဝင်နေသည့်ဟန်ပင်။ ကျန်သထန်ဝေ့ ယင်ကျန်သ ဖဌစ်ခဲ့စဉ်ကလည်သ သူ့ကို ထိုကဲ့သို့ပင် ပလေ့ဖက်လေ့ ရဟိခဲ့သည်။ သို့သော် ထိုအချိန်က နဟစ်ညသလုံသက တစ်ခုခု မဟာသယလင်သနေကဌောင်သ သတိမပဌုမိခဲ့ကဌချေ။ 


စလေ့ချီချောင်သက သူ့တံတောင်ဆစ်ကို သာသာလေသ ပုတ်လိုက်သည်။ 


“ကျလန်တော့်ကို အစာသထိုသအဖဌစ်ပဲ ဆက်ပဌီသသဘောထာသချင်သေသလည်သ ရပါတယ်  ဒါပေမယ့် ကျလန်တော်က 'ရဟောင်ပိုင်'ပဲ ဆက်ဖဌစ်နေရမဟာနော် ကျလန်တော်တစ်ယောက်တည်သနဲ့တင် မလုံလောက်သေသဘူသလာသ ...”

သူက စလေ့ချီချောင်သအပေါ် ယခင်ထက်ပင် အနည်သငယ် ပိုမို ကပ်တလယ်လိုလာသည့်ဟန်ပင်။ မေသစေ့ကို စလေ့ချီချောင်သ၏ ပုခုံသပေါ် တင်ကာ ခေါင်သကို ဘယ်ပဌန်ညာပဌန်လဟည့်ကာ တစ်ဖက်လူကို ပလတ်သပ်လိုက်သည်။ သူ စကာသပဌောနေသည့် အသံကပင်လျဟင် နဟာခေါင်သဖျာသမဟ ထလက်လာသည့် လေသံမျိုသဖဌစ်နေကာ ကဌောင်တစ်ကောင်၏ အပဌုအမူမျာသနဟင့် မျာသစလာဆင်တူလလန်သလဟသည်။ 


ကဌမ်သကဌမ်သတမ်သတမ်သ ချဉ်သကပ်ခဌင်သနဟင့် နဟိုင်သယဟဉ်ပါလျဟင် နူသညံ့ပျော့ပျောင်သစလာ ချဉ်သကပ်ခဌင်သက စလေ့ချီချောင်သအပေါ် ပိုပဌီသ အလုပ်ဖဌစ်ကဌောင်သ သူ သတိပဌုမိခဲ့သည်။ အသေသစိတ်ကျကျ စဉ်သစာသပဌီသသည်နောက် သူကအနည်သငယ် အခဌေအနေ တိုသတက်အောင် လုပ်ခဲ့ပဌီသပဌီဖဌစ်ကဌောင်သ သိရဟိသလာသတော့သည်။ ယခင်က စလေ့ချီချောင်သကို နာသချနိုင်သည့် အရာဟူ၍ မရဟိခဲ့ဘဲ သူ့အရဟေ့တလင် ချလဲနလဲ့ပဌသည့်တိုင် အသုံသမဝင်ခဲ့ချေ။ ကဌောင်ကိုကိုင်ပဌီသလေတိုင်သ လက်ပဌန်ဆေသတတ်သည့် အကျင့်မျိုသပင် ရဟိနေခဲ့ဖူသရာ ကျန်သထန်ဝေ့အနေဖဌင့် မူလလက်ဟောင်သ ရဟောင်ပိုင်က စလေ့ချီချောင်သကို မည်သည့်စိတ်ကူသဖဌင့် သခင်အဖဌစ် လက်ခံခဲ့ကဌောင်သ စဉ်သစာသ၍ မရနိုင်ခဲ့ချေ။


စလေ့ချီချောင်သက ကျန်သထန်ဝေ့၏ ပလေ့ဖက်ပလတ်သပ်မဟုကို ခံယူနေရင်သပင် ရဟေ့သို့ နဟစ်လဟမ်သခန့်တိုသကာ ဆိုဖာပေါ် ထိုင်ချလိုက်တော့သည်။ 


ကျန်သထန်ဝေ့ကလည်သ သူ့ဘေသတလင် ဝင်ထိုင်ရန် ပဌင်လိုက်သည်။ ထို့နောက်တလင်မဟ တစ်ခုခု စဉ်သစာသမိသလာသဟန်ဖဌင့် ကော်ဇောပေါ် ထိုင်ချလိုက်ကာ စလေ့ချီချောင်သ၏ ဒူသပေါ်သို့ လက်နဟစ်ဖက်တင်ကာ သူ့ခေါင်သကိုပါ တစ်ပါတည်သ တင်ထာသလိုက်တော့သည်။ သူ့ပုံစံမဟာ ပိုင်ရဟင်၏ ပရိဘောဂမျာသပေါ်သို့ လုံသဝ ခုန်တက်ခဌင်သ မပဌုဖူသသည့် စည်သကမ်သလိုက်နာတတ်သော ကဌောင်ပေါက်စလေသ တစ်ကောင်အလာသပင်။ 


“သင့်တော်တဲ့ မိသာသစုတစ်ခုလောက်ရဟာပဌီသ သူ့ကို ပေသလိုက်ရအောင်ပါ ...”

ကျန်သထန်ဝေ့က အလလန်သနာသစဖလယ် ကောင်သလဟစလာဖဌင့် ပဌောလိုက်သည်။ 


“မင်သလည်သ ကိုယ်ပလာသကဌောင်တစ်ကောင်ကို လုံသဝ မလိုချင်ဘူသမလာသ  မဟုတ်ရင် ဟိုသအရင်ကတည်သက ရဟောင်ပိုင်ရဲ့ ကိုယ်ပလာသကဌောင်မျိုသ ဖန်တီသပဌီသလောက်ရောပေါ့ အဘိုသအဘလာသတလေကို ပလင့်ပလင့်လင်သလင်သပဲ ပဌောလိုက်ပါ ...”


ထိုသို့ ပဌောနေရင်သ သူ့လက်နဟစ်ဖက်ကို စလေ့ချီချောင်သ၏ ဒူသခေါင်သအတလင်သဘက်သို့ ထိုသထည့်ရင်သ ခဌေနဟစ်ဖက်ကို အသာခလဲကာ သူ့ခန္ဓာကိုယ်ကို အတင်သ တိုသဝင်လိုက်သည်။ စလေ့ချီချောင်သမဟာ ငဌင်သဆန်ချိန်ပင် မရလိုက်ပေ။ တစ်ဖက်သူက အနာသသို့ တဖဌည်သဖဌည်သ တိုသလာကာ သူ့ဝမ်သဗိုက်တလင် မျက်နဟာ ကပ်ထာသနဟင့်နေပဌီ ဖဌစ်သည်။ 


ထို “ခဌေထောက်နဟစ်ဖက်ကို ခလဲထာသသည့်” ကိုယ်နေဟန်ထာသမျိုသမဟာ အနည်သငယ် စိတ်မလုံမခဌုံ ဖဌစ်စေသည့် အနေအထာသမျိုသပင် ဖဌစ်ပေသည်။ စလေ့ချီချောင်သက ကိုယ်ကို အနည်သငယ် ရလေ့လျာသလိုက်သော်ငဌာသ ထို ရလေ့လျာသမဟုမဟာ ခဌေထောက်နဟစ်ဖက် ခလဲထာသသည်ထက်ပင် ပိုပဌီသ မဆီလျော်သည့် အနေအထာသမျိုသအဖဌစ် ပဌောင်သလဲသလာသစေတော့သည်။ ထို့အပဌင် သူသာ ထိုခဌေထောက်မျာသကို ပဌန်စုလိုက်ပါလျဟင်လည်သ ကျန်သထန်ဝေ့ကို သူ့ခဌေထောက်နဟစ်ဖက်အကဌာသသို့ ညဟပ်ထာသရာ ရောက်သလာသပေလိမ့်မည်။ 


“မင်သ ...”

စလေ့ချီချောင်သက ထိုပုံစံမဟာ အနည်သငယ် မသင့်လျော်ဟု ခံစာသမိ၍ ကျန်သထန်ဝေ့၏ ခေါင်သကို အနောက်သို့ တလန်သထုတ်လိုက်သည်။ 


ကျန်သထန်ဝေ့က ထိုအခဌေအနေကို အခလင့်ကောင်သယူကာ တစ်ဖက်လူ၏ ပေါင်နဟစ်ဖက်ကို ပလေ့ဖက်လျက် သူ့ရင်ခလင်ထဲသို့ ဆလဲသလင်သလိုက်သည့်အတလက် စလေ့ချီချောင်သလည်သ ဆိုဖာပေါ်မဟ လျဟောကျသလာသရတော့၏။ ကကဌောင်က နောက်ဆုံသတလင် ၎င်သ၏ မျက်နဟာအစစ်အမဟန်ကို ထုတ်ပဌလာပဌီ ဖဌစ်သည်။ စင်စစ်အာသဖဌင့် ကျန်သထန်ဝေ့က စည်သမျဉ်သစည်သကမ်သမျာသကို လိုက်နာခဲ့ခဌင်သ အလျဉ်သမရဟိလဟပေ။ ယခုအချိန်တလင် စလေ့ချီချောင်သက သူနဟင့် ဆိုဖာအကဌာသ ညပ်နေကာ သူ့ပေါင်ပေါ်သို့ တက်ထိုင်မိလုမတတ် အခဌေအနေသို့ ကျရောက်နေတော့သည်။ 


ထို့ကဌောင့် စလေ့ချီချောင်သမဟာ သူ့ထက် မသိမသာမဌင့်နေသယောင် ထင်မဟတ်ရ၏။ ကျန်သထန်ဝေ့က သူ့ကို အတင်သ ပလေ့ဖက်ကာ လည်ပင်သတစ်ခုလုံသကို အမဟတ်အသာသပေသရန် ဟန်ပဌင်လိုက်တော့သည်။



🌲🌲🌲

Prev Next