Chapter 191

🌱Arc 5 - [ဖျော်ဖြေရေးနယ်ပယ်တွင် လယ်စိုက်ခြင်း ]

Ch 191

သတင်းစာခေါင်းစီးပိုင်းမှာ ပါရလောက်တောင် တန်ဖိုးမရှိဘူး (၂)

အရာအားလုံးမှာ မျက်စိတစ်မှိတ်အတွင်း ဖြစ်ပျက်သွားခြင်း ဖြစ်သည့်အတွက် စွေ့ချီချောင်းမှာ အသိစိတ် ပြန်မကပ်နိုင်သေးချေ။ ကျန်းထန်ဝေ့မှအပ သူနှင့် ထိုကဲ့သို့ နီးနီးကပ်ကပ် နေခဲ့ဖူးသူ အရေအတွက်မှာ လက်ချိုးရေ၍ ရသည်အထိ နည်းပါးလှရာ ကျန်းထန်ဝေ့၏ ယခု အပြုအမူများမှာ အလွန် ဉာဏ်နီဉာဏ်နက်များကာ ပညာသားပါသည်ဟု ဆိုနိုင်ပေသည်။ 

ဤဖြစ်ရပ်အပြီးတွင် စွေ့ချီချောင်းက ထိုနေ့က ကျန်းထန်ဝေ့နှင့် နမ်းခဲ့သည့် အနမ်းကို ပြန်စဉ်းစားမိလေတိုင်း တွေဝေမိန်းမောသွားခဲ့တော့သည်။ 

ပြီးခဲ့သည့်အခေါက်က ကြားဖြတ်နှောင့်ယှက်ခြင်းကို မခံခဲ့ရပါလျှင် သူတို့က ထိုထက် ပိုမိုရှည်ကြာ ပြင်းပြစွာ နက်နက်ရှိုင်းရှိုင်း နမ်းရှိုက်မိခဲ့ကြမည် ဖြစ်သည်။ စွေ့ချီချောင်းက ချက်ချင်း မတ်တပ် ထရပ်လိုက်လိုသည့်တိုင် ထိုခံစားချက်မှာ အတော်လေး ကောင်းမွန်လွန်းလှသည်ဟုလည်း ခံစားမိနေခဲ့သည့်အတွက် ချက်ချင်း မတ်တပ်ထရပ်ရန်ကို တုံ့ဆိုင်းနေမိခဲ့သည်။ များမကြာမီ ထိုသူမှာ သူ့အိမ်တံခါးကိုပင် မဝင်နိုင်သည့် ရှောင်ပိုင် မဟုတ်ခဲ့ပါလျှင် မည်လို့လုပ်ရမည်ဟူသော အတွေးများအား ရပ်တန့်လိုက်တော့သည်။ 

“မြောင် ...”

ကျန်းထန်ဝေ့က အသာအယာ အော်လိုက်သည်။ ထိုအသံတစ်ခုတည်းကိုသာ အကဲဖြတ်ရပါလျှင် ၎င်းအသံက ကြောင်အသံ အစစ် ဟုတ်မဟုတ် ခွဲခြားသိနိုင်လိမ့်မည် မဟုတ်ချေ။ စွေ့ချီချောင်းက သူ့အသိစိတ်များ ပို၍ပင် ပျောက်ဆုံးလာပြီဟု ခံစားမိနေ၏။ ကျန်းထန်ဝေ့၏ အသံမှာ အလွန် ချွဲနွဲ့ကလူသည့် အသံမျိုး ဖြစ်နေသည့်တိုင် သူ့ခါးကို ခပ်တင်းတင်း ဆုပ်ကိုင်ကာ လည်တိုင်တစ်လျောက် အနမ်းခြွေလျက် နှုတ်ခမ်းနှင့် လျှာတို့ကို ပြတ်ထွက်လုမတတ် စုပ်ယူနေသည့် အပြုအမူများမှာမူ ညှို့ဓာတ်ပြင်းပြလွန်းနေတော့သည်။ 

စွေ့ချီချောင်းက နောက်တစ်ကြိမ် မိန်းမောသွားရပြန်ကာ သူ့ခံစားချက်တို့မှာလည်း ရှုပ်ထွေးလာရပြန်တော့သည်။ သူ့စိတ်အာရုံများ ရှင်းလင်းကာ မည်သည့်အရာကို ခံစားရကောင်းလာကြောင်း နားမလည်သေးသည့်တိုင် သူ့အပြုအမူက ကျန်းထန်ဝေ့၏ လုပ်ရပ်ကို အားပေးရာ ရောက်နေကြောင်းကိုမူ သဲသဲကွဲကွဲ သိနေပေသည်။  ကျန်းထန်ဝေ့အား မည်သည့်လုပ်ရပ်ကို လုပ်သည်ဖြစ်စေ နှစ်ကြိမ်တိတိ ပြန်စဉ်းစားရန် သင်ပြခဲ့သူမှာလည်း သူကိုယ်တိုင်ပင် ဖြစ်ပေသည်။ 

သူက နှစ်ဦးအနက် အသက်ပိုကြီးသည့်သူ ဖြစ်ရာ သူသာ ကောင်းမွန်သည့် ဆုံးဖြတ်ချက်များကို မချနိုင်ခဲ့ပါလျှင်... 

အမှန်အတိုင်း ပြောရပါလျှင် စွေ့ချီချောင်းက သူ့ဆန္ဒနှင့် သွေဖီသည့် ဖြစ်ရပ်မျိုး ဖြစ်လာမည်ကို လုံးဝ မလိုလားတော့ချေ။ 

သူက ကျန်းထန်ဝေ့ကို ဖိချလိုက်ကာ အချိန်အတော်ကြာ ဖိပိတ်ထားသည့် မျက်ဝန်းတို့ကို ပြန်ဖွင့်ပြီး တစ်ဖက်သူကို စိုက်ကြည့်လိုက်သည်။ 

ကျန်းထန်ဝေ့မှာ ကျေနပ်သေးသည့်ဟန်မရပေ။ သူ ရှေ့သို့ ဆက်တိုးလာပြန်ကာ စွေ့ချီချောင်း၏ နှုတ်ခမ်းများကို ကိုက်ခဲလိုက်တော့သည်။ သို့သော် စွေ့ချီချောင်းက သူ့ကို ပြန်ဆွဲထားလိုက်၏။ ကျန်းထန်ဝေ့က ခေါင်းကို မသိမသာစောင်းကာ စွေ့ချီချောင်း၏ လက်ဖမိုးကို ပါးဖြင့် ပွတ်သပ်လျက် “အတူတူ နေလိုကြောင်း” အရိပ်အမြွက်များ ပြသလိုက်တော့သည်။ 

ရှောင်ပိုင်က အရမ်းကို ငယ်လွန်းနေသေးတယ် ...

စွေ့ချီချောင်း၏ အတွင်းစိတ်ထဲတွင် သူတို့နှစ်ဦးက နှစ်ရှည်လများ အတူရှိခဲ့ကြသူများဟု ခံစားမိနေကာ ရုပ်ပိုင်းဆိုင်ရာထိတွေ့မှုနှင့် ရှောင်ပိုင်၏စိတ်အားထက်သန်မှုများကြောင့် စိတ်ယိမ်းယိုင်သွားသည့်တိုင် ထိုခံစားချက်မှာ ရှောင်ပိုင်အတွက် တရားမမျှတလှပေ။ အထူးသဖြင့် ရှောင်ပိုင်က တစ်ဦးတည်းသောသူ ဟူသည့် စကားရပ်ကို အလွန်အမင်း အရေးထားသည့် အချိန်မျိုးတွင် ဖြစ်သည်။ 

သူ သက်ပြင်းချကာ ပြောလိုက်သည်။ 

“အရင်ဆုံး... မင်းခေါင်းကို နောက်ဆုတ်လိုက်ပါဦး ...”

သူက ကျန်းထန်ဝေ့ကို များစွာ အလိုလိုက်ခဲ့မိရာ တစ်ဖက်လူ လမ်းမှန်ပြန်ရောက်ရေးအတွက် ဤသို့သာ ပြောလိုက်ရပေတော့သည်။ သို့သော် တစ်ဖက်တွင်မူ ရှောင်ပိုင်အား သူ့စိတ်ကြိုက် လုပ်ခွင့်ပေးခြင်းက မမှားဟုလည်း ခံစားနေမိခဲ့သည်။ မည်သို့ပင်ဖြစ်စေ စွေ့ချီချောင်းအတွက် သင့်လျော်မှန်ကန်စွာ တွေးတောနိုင်ရန်မှာ များစွာခက်ခဲနေပေတော့သည်။ 

ကျန်းထန်ဝေ့ကလည်း အလွန်တုန်လှုပ်သွားကာ ဝမ်းနည်းပက်လက်ဖြင့် ရေရွတ်လိုက်တော့သည်။ 

“ကျွန်တော့်ရဲ့ လမ်းကြောင်းပေါ်ကို ရောက်လာအောင် နည်းနည်းလေးကိုမှ နည်းနည်းလေးပဲ တွန်းအားပေးရသေးတယ်… ဒါကလည်း ပုံမှန် တုံ့ပြန်မှုတစ်ခုပဲလေ ဒီလို ဖြစ်လာတာနဲ့ပဲ ကျွန်တော့်ကို တွန်းထုတ်ချင်နေပြီပေါ့… မင်းက တကယ်ကို ကြောက်ဖို့ကောင်းတာပဲ ... ထားပါ .. ကျွန်တော့်ကို အချိန်နည်းနည်းလောက် ထပ်ပေး ...”

စွေ့ချီချောင်း : “...”

သူက မတ်တပ်ထရပ်ကာ ကျန်းထန်ဝေ့၏ ကော်လာနောက်ဘက်ကို ဆွဲပြီး တွန်းထုတ်လိုက်သည်။ 

“ငါ သွားပြီး အနားယူလိုက်ဦးမယ် ...”

“ကျွန်တော့်ကို ဒီလို နည်းလမ်းမျိုးသုံးပြီး လာမကိုင်တွယ်နဲ့ အဲဒီ့ကြောင်နဲ့ ပတ်သက်ပြီးတောင် ရှင်းရှင်းလင်းလင်း မပြောရသေးဘူး ...”

ကျန်းထန်ဝေ့က မကျေနပ်မှုအပြည့်ဖြင့် တရစပ် ပြောလာတော့သည်။ 

“အဲဒီ့ကောင်အတွက် အိမ်ရှာပေးဖို့ မင်းကို အချိန်သုံးရက် ထပ်ပေးလိုက်မယ် ...”

ထိုသို့ ရက်စက်စွာ ပြောလိုက်ပြီးနောက် ကျန်းထန်ဝေ့က တံခါးပေါက်ကို ချက်ချင်း ပိတ်လိုက်တော့သည်။ 

.....

နောက်တစ်နေ့သို့ ရောက်သည့်အခါ စွေ့ချီချောင်းက ကြောင်ကိုပါ ရိုက်ကွင်းသို့ ခေါ်သွားခဲ့လိုက်သည်။ အကြောင်းမှာ ထို ကြောင်ပေါက်စလေးက အိမ်၌ လူရိပ် မမြင်လေတိုင်း ဆက်တိုက် အော်ဟစ်နေတတ်၍ ဖြစ်သည်။ ၎င်းအနေဖြင့်လည်း ထိုတိုက်ခန်းနှင့် အသားကျသွားရန် အချိန်အချို့ခန့် လိုအပ်နေဆဲ ဖြစ်သည်။ 

အိမ်မွေးတိရိစ္ဆာန်ကို အလုပ်သို့ ခေါ်လာခြင်းမှာ ထူးဆန်းလှသည့် ကိစ္စရပ် မဟုတ်လှချေ။ သူက ရှောင်ပိုင်ကို အိမ်မွေးတိရိစ္ဆာန်များ ထည့်သည့်အိတ်ထဲထည့်ကာ သယ်လာလိုက်သည်။ 

၎င်းကို မြင်သည်နှင့် တပြိုင်နက် ကျန်းထန်ဝေ့က အော်ပြောလိုက်သည်။ 

“ဘယ်သူများ ကြောင်မွေးချင်ကြလဲ ...”

ရိုက်ကူးရေး အဖွဲ့သား အားလုံးက သိလိုစိတ် အပြည့်ဖြင့် လှမ်းကြည့်လိုက်ကြသည်။ 

“ဟေး ကြည့်ကြည့်လိုက်ဦး အဲဒါက Bagley shepherd အမျိုးအစားနဲ့ တူတယ်နော် မျက်လုံးတွေက တအားကို လှတာပဲ ...”

“ဒီလို ကြောင်အမျိုးအစားမျိုးက ထိန်းကျောင်းဖို့ ခက်တယ်တဲ့ တအားကို ဉာဏ်ကောင်းလွန်းတဲ့အပြင် နာခံမှုလည်း သိပ်မရှိဘူးတဲ့… ဒါပေမယ့် ငါ ကြားဖူးတာတော့လေ ဒီကောင်တွေက သေချာသာ လေ့ကျင့်ပေးထားရင် ပိုင်ရှင်ရဲ့ ကလေးတွေကိုတောင် ကူထိန်းပေးနိုင်တယ်တဲ့ ဟားဟား ...”

“ဒါက စွေ့ချီချောင်း ခေါ်လာတဲ့ကြောင် မဟုတ်လား သူက ဘာလို့ ကြောင်တစ်ကောင် မမွေးချင်ရတာလဲ ...”

စွေ့ချီချောင်း :  “ မဟုတ်ဘူး သူက ဒီတိုင်း နောက်နေတာပါ ...”

ကျန်းထန်ဝေ့က နှစ်ကြိမ်တိုင်တိုင် အသံပြုကာ မကျေနပ်မှုကို ထုတ်ပြလိုက်ပြီးကာမှ တစ်ခုခုကို အတွေးပေါက်သွားတော့သည်။ 

ဒီလူတွေက ဘာလို့ ဒီနေ့ သူ့ကို ထူးဆန်းတဲ့ အကြည့်တွေနဲ့ ကြည့်မနေကြတာလဲ… မနေ့က ပန်းခြံအပြင်ဘက်မှာ တော်တော်လေး ရုတ်ရုတ်သဲသဲ ဖြစ်ထားတာလေ… ဒါက ယုတ္တိမှ မရှိတာ သူတို့နဲ့ အတူတူ အလုပ်လုပ်နေတဲ့ လုပ်ဖော်ကိုင်ဖက်တွေက အဲဒီ အတင်းအဖျင်းသတင်းတွေကို မယုံဘူးဆိုရင်တောင် နည်းနည်းလေး ဖြစ်ဖြစ်တော့ တုံ့ပြန်မှုလေးတွေ ရှိရမယ်မလား ...

ကျန်းထန်ဝေ့က အခြေအနေမှာ အလွန် ထူးဆန်းလွန်းလှသည်ဟု ခံစားမိနေခဲ့သည်။ သူက အင်တာနက်ကို စစ်ဆေးကြည့်လိုက်သည့်အခါ LJJ ၏ လက်အောက်ခံ ဖိုရမ်တစ်ခုတွင် ဖြတ်သွားဖြတ်လာတစ်ဦးက ပို့စ်တင်ထားကြောင်း တွေ့လိုက်ရသည်။ 

သတင်းခေါင်းစဉ် : ဒီနေ့ LJJ ရဲ့ ပန်းခြံကို ဖြတ်သွားရင်း စွေ့ချီချောင်းကို ယောကျ်ားတစ်ယောက်နဲ့အတူ တွေ့လိုက်ရတယ် 

အကြောင်းအရာ : ဓာတ်ပုံနှစ်ပုံတော့ ရိုက်ခဲ့ပေမယ့် အဲဒီအချိန်တုန်းက တော်တော်လေး အလျင်လိုနေခဲ့တော့ ဓာတ်ပုံကိုလည်း ဖျတ်ခနဲပဲ ရိုက်လိုက်မိတာ… ငါ့အထင်တော့လေ အဲဒီ့ယောကျ်ားက စွေ့ချီချောင်းကို စောင့်နေတဲ့ ပုံပဲ… စွေ့ချီချောင်းလည်း ရောက်လာရော သူက ချက်ချင်းကို အနား ပြေးသွားပြီး အော်ပြောတော့တာပဲ “မကောင်းတဲ့လူ ဆန်ကုန်မြေလေးကောင်” လို့ အော်လိုက်သလားတောင် မသိဘူး… သိပ်တော့ သဲသဲကွဲကွဲ မကြားလိုက်ရလို့ ပြီးတော့ ဘာတွေ ဘယ်လိုဖြစ်သွားလဲတော့ မသိဘူး နှစ်ယောက်သား ထဖက်လိုက်ကြပြန်ရော အဲဒီနောက်ပိုင်း သူ့တိုက်ခန်းထဲကို အတူတူ ဝင်သွားကြတာ .. သူတို့က ဘာတွေလဲ ...

ပထမထပ် : အိုး ဟိုး ပို့စ်ပိုင်ရှင်ရေ ပိုးသတ်ဆေး အတုတွေ ဝယ်မိသွားတာလား ...

ဒုတိယထပ် : တအားကို စိတ်လှုပ်ရှားဖို့ ကောင်းတာပဲ ဒီတစ်ယောက်ကို ကြည့်ရတာ ပိုးသတ်ဆေးအတုတွေ ဝယ်မိသွားတယ်နဲ့တူတယ်… အခုဆို ငါတို့စွေ့ရဲ့ ပုံရိပ်ကို မှားယွင်းတဲ့ နေရာမှာ အသုံးချဖို့ ကြံစည်နေတဲ့ စီးပွားရေးလုပ်ငန်း အသေးလေးတွေမှ အများကြီးလေ… ပြီးတော့ ငါတို့စွေ့ကိုပဲ အပြစ်တင်ကြမှာ ... ဒါပေမယ့် ငါတို့လူက အရမ်းကို ကြင်နာတတ်တော့ ဒီလို ပိုးမွှားကောင်မျိုးကို ခွင့်လွှတ်ပေးမှာပဲ ...

တတိယထပ် : မင်းတို့တွေ ... ဘယ်လို ဇာတ်လမ်းတွေ လုပ်ကြံနေကြပြန်ပြီလဲ ...

စတုတ္ထထပ် : ငါတို့က ဘာလုပ်နိုင်မှာတဲ့လဲ အရှင်းဆုံး ပြောရရင် ငါတို့ကလည်း မင်းတို့နဲ့ ဒီလိုမျိုး စွေ့ချီချောင်းနဲ့ တခြားယောကျ်ားတစ်ယောက်ကြားက ခွေးသွေးဇာတ်လမ်းမျိုးအကြောင်း ဆွေးနွေးမနေချင်ပါဘူး ...

ပဉ္စမထပ် : မဟုတ်သေးပါဘူး ဒီတစ်ယောက်က ဝန်ထမ်း မဟုတ်လား… ငါ သူ့မျက်နှာကို တခြားသတင်းတွေထဲမှာလည်း မြင်ဖူးတယ်… ကြည့်ရတာ သူတို့က အလုပ်နဲ့ ပတ်သက်တဲ့ဟာကို ဆွေးနွေးနေတဲ့ ပုံစံမျိုးပါဟ ...

ပဉ္စမထပ်ကတော့ တကယ်ကို ပဉ္စမထပ်ပါပဲ ...အပေါ်နှစ်ထပ်က ပေါက်ကရတွေပဲ ပြောနေကြတာ ...

ဖြစ်ပျက်ခဲ့သည်များကို ရှင်းရှင်းလင်းလင်း အဖြေထုတ်ပြီးသည့်နောက် ထိုပို့စ်က ဖိုရမ်၏ အောက်ခြေအထိ နစ်မြုပ်ပျောက်ကွယ်သွားတော့သည်။

ထိုကိစ္စ၏ နောက်ကွယ်တွင် လက်ဆုပ်လက်ကိုင် ပြစရာ သက်သေဟူ၍ မရှိဘဲ ဝေဝါးနေသော ဓာတ်ပုံနှစ်ပုံမှအပ အသံသွင်းထားသည့် မှတ်တမ်းပင်လျှင် မရှိခဲ့ချေ။ ကျန်းထန်ဝေ့သည်လည်း စွေ့ချီချောင်း၏ အချစ်ရေးသတင်းမှာ စိတ်ဝင်စားဖွယ် မကောင်းလှသည့်အပြင် ယခင်ကလည်း သတင်းများထဲတွင် များစွာ ပါဝင်ခဲ့ပြီး ဖြစ်သည့်အတွက် ပရိသတ်များသည် သူ့အချစ်ရေးသတင်းများမှာ အစစ်အမှန်မဟုတ်ဟုသာ ထင်နေကြမည်ဖြစ်ကြောင်း ခန့်မှန်းမိခဲ့ပေသည်။ ပျင်းရိဖွယ် အကြောင်းအရာတစ်ရပ် ဖြစ်သည့်အတွက် ထိုပို့စ်တွင် မှတ်ချက်ရေးသူများက

 ထိုပို့စ်မှာ လုံလောက်သည့် မှတ်ချက်ပမာဏသို့ ရောက်ရှိနေပြီဖြစ်ကာ ပဉ္စမထပ်အထိ ရောက်လာသည်ကပင် မယုံနိုင်စရာ ကောင်းနေလှပြီဟု ခံစားမိခဲ့ကြသည်။ 

မှတ်ချက်ပဉ္စမထပ်အထိ ရောက်သည်မှအပ ထိုဖိုရမ်၌ သူနှင့် စွေ့ချီချောင်းအကြောင်း သတင်းများကို ကျန်းထန်ဝေ့မှာ တစ်ခုတစ်လေမှပင် မတွေ့တော့ချေ။ ထိုဖြစ်ရပ်မှာ လွန်စွာ ထူးဆန်းလွန်းနေခဲ့သည်။ 

“ဘာလို့ ငါးထပ်အထိပဲ ရောက်ရတာလဲ ...”

သူက ရေရွတ်ကာ အထပ်အရေအတွက် တိုးမြင့်လာစေရန် အလို့ငှာ reply များကို ထပ်ရေးလိုက်တော့သည်။ ထို့နောက်တွင် ရလဒ်ကို နောက်တစ်ကြိမ် ပြန်စစ်ဆေးကြည့်လိုက်သော်လည်း ယခင်အတိုင်းသာ မပြောင်းမလဲ ရှိနေဆဲဖြစ်ကြောင်း တွေ့လိုက်ရ၏။ 

ထိုစဉ် လင်းလင်းကလည်း ရိုက်ကူးရေး ပြုလုပ်ရာနေရာသို့ ရောက်ရှိလာသည်။ သူမက လက်နှစ်ဖက်ကို အိတ်ကပ်ထဲ ထည့်ကာ သူတို့ထံ တက်ကြွပျော်ရွှင်စွာဖြင့် လျှောက်လှမ်းလာ၏။ ရှောင်ပိုင်က မကောင်းသည့် ဘက်ခြမ်းကို စွန့်လွှတ်ကာ ကောင်းမွန်သည့် ကိစ္စများကို ပြုမူဆောင်ရွက်လာပြီး စွေ့ချီချောင်းကလည်း တက်ကြွလှုပ်ရှားမှုများတွင် ပါဝင်လာသည့်အတွက် သူမ၏ စိတ်အခြေအနေမှာလည်း ပိုမိုကောင်းမွန်လာကာ ဆံပင်ကျွတ်သည့်နှုန်းပင်လျှင် တစ်ဖြည်းဖြည်း လျော့နည်းသွားတော့သည်။ 

“တစ်ချက်လောက် လာကြည့်တာ ...”

သူမက ခပ်ပြုံးပြုံး ပြောလိုက်သည်။ 

“ဒါနဲ့ မင်းတို့နှစ်ယောက် မနေ့က ဘာဖြစ်ခဲ့ကြတာလဲ ကြားတာတော့ နှစ်ယောက်သား စကားများခဲ့ကြတယ်ဆို ...”

ကျန်းထန်ဝေ့က သူမကို တစ်ဖြည်းဖြည်း မော့ကြည့်ကာ မေးလိုက်သည်။ 

“ဘယ်လိုလုပ် သိတာလဲ ...”

လင်းလင်း : “ အိုး ဟုတ်သားပဲ ဒီအကြောင်း ပြောကာမှ .. မင်းတို့တွေ ဓာတ်ပုံအရိုက်မခံလိုက်ရဘူး မဟုတ်လား ငါလည်း အဲဒီ့သတင်း ရထားတယ်… အဲဒါက မင်းဆိုတာ သိလိုက်ရကတည်းက ဖြစ်ခဲ့သမျှကို ရှင်းလင်းလိုက်ပြီလေ… သူတို့ကလည်း ဒါက အတင်းအဖျင်း သတင်းတစ်ပုဒ် ဖြစ်ရလောက်အောင် တန်ဖိုးမရှိဘူးလို့ တွေးခဲ့ကြလို့ ငါ့ကို သတင်းဖုံးခွင့် ပေးလိုက်ကြတာ ...”

ကျန်းထန်ဝေ့ : “...”

သတင်းဖြစ်ရလောက်အောင် တန်ဖိုးမရှိဘူးဆိုတာ ဘာကို ဆိုလိုတာလဲ ...

🌲🌲🌲