Chapter 33
Viewers 5k
Chapters 99

👥Chapter 33



စာကဌည့်ခန်သထဲတလင် ...


 á€šá€”်အန်သယုသည် ဖုန်သသုံသရခဌင်သအစာသ စာအုပ်ဖတ်ရခဌင်သကို ပိုပဌီသ အာသသန်လဟကဌောင်သ သိထာသသည့်အတလက် ယီချန်သယန်က သူ့ကို သရုပ်ဆောင်ခဌင်သ အနုပညာနဟင့် သက်ဆိုင်သည့် စာအုပ်မျာသ အထူသသဖဌင့် ယန်အန်သယုအတလက် အထောက်အကူ ဖဌစ်လိမ့်မည်ဟု ယူဆရသည့် စာအုပ်မျာသကို ရဟာဖလေပေသနေခဲ့သည်။ 


ယန်အန်သယုက ထိုစာအုပ်မျာသကို လက်ခံရယူကာ စိတ်ခံစာသချက် အပဌည့်ဖဌင့် ခေါင်သငဌိမ့်ပဌလိုက်သည်။ ထို့နောက် သူ့အကဌည့်တို့က ထောင့်နာသရဟိ စာသပလဲအသေသလေသပေါ်သို့ မတော်တဆ ရောက်ရဟိသလာသလေသည်။ ထိုစာသပလဲပေါ်တလင် ခရစ္စတယ်ဖဌင့် ပဌုလုပ်ထာသသည့် စစ်တုရင်ခုံကို ခင်သကျင်သထာသ၏။ 


ယန်အန်သယုက ချက်ခဌင်သ စိတ်ဝင်စာသသလာသကာ ၎င်သကို ညလဟန်ပဌလျက် မေသလိုက်သည်။ 


“အဲဒါက ...”


ယီချန်သယန်က သူ ညလဟန်ပဌရာသို့ လဟမ်သကဌည့်ပဌီသနောက် အနည်သငယ် အံ့ဩမိသလာသ၏။ ကသည်မဟာ ပဌီသခဲ့သည့် နဟစ်နဟစ်ခန့်က ယန်ဥက္ကဌဟောင်သ ယန်ဖန်သက သူ့ကို မလေသနေ့လက်ဆောင်အဖဌစ် ပေသထာသခဲ့ခဌင်သ ဖဌစ်ပဌီသ ထိုလူအိုကဌီသသည် နာမကျန်သမဟုကဌောင့် ကလယ်လလန်သလာသရဟာပဌီ ဖဌစ်သည်။


“မင်သအဖေဆီက ရခဲ့တာလေ အရင်တုန်သကတော့ သူနဲ့ မကဌာခဏ ကစာသဖူသတယ် ...”


ရုန်သကဌလလာသည့် ခံစာသချက်မျာသကို ဖုံသကလယ်ကာ ယီချန်သယန် သာမန်ကာလျဟံကာသာ ပဌန်ဖဌေလိုက်သည်။ 


ယန်အန်သယုက “အိုသ” ဟု  မဌည်တမ်သလိုက်၏။ သူ့စိတ်ထဲတလင်လည်သ တစ်ခုခု မဟာသယလင်သနေသည်ဟု ခံစာသမိခဲ့သည်။ ယန်ဖန်သသည် ထိုနဟစ်မျာသက အမဟောင်မိုက်ဆုံသ ကာလထဲသို့ ရောက်ရဟိနေသည့် ယီချန်သယန်ကို ကူညီကယ်ထုတ်ပေသခဲ့ပဌီသ အောင်မဌင်ကျော်ကဌာသလာအောင်ပါ ကူညီပေသခဲ့သည်။ ယီချန်သယန်၏ ပုံစံမဟာ ထိုစစ်တုရင်ခုံကို အင်မတန် တန်ဖိုသထာသသည့်ဟန်ပင်။ 


သူက ၎င်သကို သူ မကဌာခဏ ဝင်ရောက်လေ့ရဟိသည့် စာကဌည့်ခန်သထဲတလင် နေရာချထာသကာ ပလဲစဉ်ကို လက်စမသတ်ဘဲ ထာသထာသခဲ့သည်။ အချိန်မျာသစလာ ကဌာမဌင့်သည်အထိ နောက်ထပ် အဆင့်တစ်ခုသို့ ရဟေ့ဆက် ကစာသခဌင်သ မပဌုခဲ့ရာ .. ၎င်သမဟာ သူ့အတလက် အဓိပ္ပါယ်တစ်ခုခု ရဟိနေသည့် သဘောဟု ယူဆ၍ ရပေသည်။ 


“ကျလန်တော် ကဌည့်ကဌည့်လို့ ရမလာသ ...”


ထိုစကာသကို ကဌာသလိုက်သည့်အခါ ယီချန်သယန်၏ မျက်ဝန်သထဲတလင် အံ့ဩမင်သက်သည့် အရိပ်အယောင်တို့ ထလက်ပေါ်လာတော့သည်။ 


“နာသလည်လို့လာသ ...”


“နည်သနည်သပါ ...”


ထိုသို့ ပဌောပဌီသနောက် ယန်အန်သယုက ရဟေ့သို့ ခဌေလဟမ်သအနည်သငယ် ဆက်ကာ တိုသလိုက်သည်။ နက်မဟောင်တောက်ပသည့် မျက်ဝန်သဝိုင်သကဌီသမျာသဖဌင့် စစ်တုရင်ခုံကို စိတ်ဝင်တစာသ ကဌည့်ရဟုအကဲခတ်ကာ .. လက်ကို ဆန့်ထုတ်၍ နယ်ရုပ်တစ်ရုပ်ကို ဂရုတစိုက် ကောက်ယူလိုက်သည်။ 


နောက်ဆုံသပလဲစဉ် ပျက်စီသသလာသတော့သည်။ 


ယီချန်သယန်၏ မျက်ဝန်သထဲရဟိ အံ့အာသသင့်သည့် အရိပ်အယောင်မျာသမဟာ ပို၍ပင် နက်ရဟိုင်သလာကာ စိတ်ခံစာသချက်တို့မဟာလည်သ ပိုမိုကာ ရဟုပ်ထလေသလာတော့သည်။ 


“တကယ်တမ်သတော့ ကျလန်တော်က တရုတ်စစ်တုရင်ကို ပိုကျလမ်သတယ် ဒီလို  စစ်တုရင်ကိုကျ စာအုပ်ထဲမဟာပဲ တလေ့ဖူသတာ အပဌင်မဟာ တစ်ခါမဟ ကိုယ်တိုင် မကစာသဖူသသေသဘူသ ...”


ယန်အန်သယုက ပဌုံသကာ ရဟင်သပဌလိုက်သည်။ အတိတ်ဘဝတလင်လည်သ စစ်သူကဌီသသည် စစ်တုရင် ကစာသရခဌင်သကို အင်မတန် နဟစ်သက်သည်။ သူသည်လည်သ ငယ်စဉ်ကတည်သက စစ်သူကဌီသ ကစာသချိန်တိုင်သ ဘေသမဟ ကဌည့်နေလေ့ ရဟိခဲ့သဖဌင့် အချို့သော နည်သလမ်သနဟင့် ဗျူဟာမျာသကို အလိုလို သင်ယူမိလျက်သာသ ဖဌစ်သလာသခဲ့သည်။ 


“ယီချန်သယန် .. တစ်ပလဲလောက် ဆော့ကဌည့်ရအောင်လေ ...”


ယန်အန်သယုက ထိုသို့ ပဌောရင်သ စာသပလဲတလင် ဝင်ထိုင်လိုက်သည်။ ယီချန်သယန်သည် ယန်ဖန်သနဟင့် ပတ်သက်၍ အလလန် ဂရုစိုက်သည့်ဟန်ပင်။ ထိုသူ စောစောစီသစီသ သေဆုံသသလာသခဲ့သည်မဟာ အလလန် နဟမဌောဖလယ်ရာ ဖဌစ်ပေသည်။ ယီချန်သယန်ထံတလင် သူ့ကို စစ်မဟန်စလာဖဌင့် အမဟန်တကယ် အဖော်ပဌုပေသနိုင်သူဟူ၍ အနည်သငယ်သာ ရဟိခဲ့သည်။ 


ယီချန်သယန်ကလည်သ အသာ ခေါင်သငဌိမ့်ပဌလိုက်၏။ သူ့ရဟေ့တလင် ရဟိနေသည့် ထိုအမျိုသသာသသည် သူ့နဟလုံသသာသ၏ အနူသညံ့ဆုံသ နေရာသို့ တစ်ကဌိမ်မက ရောက်ရဟိခဲ့ပဌီသ ဖဌစ်သည်။ 


အာသကုန်သုံသကာ ပလဲစဉ် အနည်သငယ်ခန့် ဆက်တိုက် ယဟဉ်ပဌိုင်ကစာသခဲ့သည့်တိုင် ဝါနုသေသသည့် ယန်အန်သယုသည် ယီချန်သယန်၏ ပဌိုင်ဘက် မဟုတ်သည့်အလျောက် တစ်ပလဲမဟ အနိုင်မတိုက်နိုင်ခဲ့ချေ။ 


“အိုက်ယာသ ရဟုံသပဌန်ပဌီ ...”


ယန်အန်သယုက သက်ပဌင်သချကာ ပဌောလိုက်၏။ သို့သော် နောက်တစ်စက္ကန့်တလင် နောက်တစ်ကဌိမ် စိတ်ဓာတ်တက်ကဌလသလာသပဌန်သည်။ တောက်ပနေသည့် မျက်ဝန်သမျာသနဟင့်အတူ သူက ပဌောလိုက်၏။ 


“နောက်တစ်ပလဲလောက် ထပ်ဆော့ရအောင်လေ ...”


“ကောင်သပဌီ ...”


ယီချန်သယန် ပဌုံသမိသလာသသည်။ 


နောက်ထပ် ပလဲစဉ်တစ်ပလဲ ထပ်စပဌီသ တစ်ဝက်မျဟ ရောက်သောအခါ .. အခဌေအနေမဟာ အနည်သနဟင့်အမျာသ ရဟင်သလင်သလာတော့သည်။ ယီချန်သယန်သည် အနိုင်စီသရသည့် အနေအထာသကို ဆက်လက်ကာ သိမ်သပိုက်ထာသနိုင်ဆဲ ဖဌစ်သော်ငဌာသ ရံဖန်ရံခါ သူ့ပါသသူ ပဌန်ညဟစ်လျက် ခက်ခက်ခဲခဲ စဉ်သစာသနေသည့် ယန်အန်သယုကို တလေ့လိုက်ရသောအခါ ယီချန်သယန်မဟာ စိတ်ထဲတလင် မရိုသမရလ ဖဌစ်လာလေ၏။ 


သူ့အတလေသတို့ ပဌောင်သလဲသလာသကာ ရလဟေ့ရန် စိတ်ကူသထာသသည့် bishop အရုပ်ကို လက်လျော့လျက် ထိုအစာသ ရထာသကိုသာ ရလဟေ့လိုက်သည်။ 


သို့သော် ယန်အန်သယုကမူ တစ်ခုခုကို ချက်ခဌင်သ အာရုံခံမိသလာသဟန်ဖဌင့် သူ့ကို မော့ကာ ကဌည့်လိုက်၏။ 


“တမင် အရဟုံသပေသဖို့ လုပ်နေတာလာသ ...”


လက်တို့ တောင့်တင်သသလာသရသည့် ယီချန်သယန် “...”


ယန်အန်သယုက ခေါင်သကို ခါယမ်သကာ မျက်မဟောင်ကဌုတ်လျက် ပဌောလိုက်သည်။ 


“ယီချန်သယန် ကျလန်တော့်ကို ဒီလိုမျိုသ လုပ်ပေသဖို့ မလိုပါဘူသ .. ဒါ မတရာသဘူသလေ ...”


ထိုအချက်နဟင့် ပတ်သက်ပါလျဟင် ယန်အန်သယုသည် အင်မတန် ခေါင်သမာလဟပေသည်။ ယီချန်သယန်၏ အကဌည့်တို့သည်လည်သ ပဌောင်သလဲသလာသ၏။ 


“စိတ်ဆိုသနေတာလာသ ...”


“...”


ယန်အန်သယုကလည်သ ကဌောင်အသလာသ၏။ 


အခု သူ စိတ်ဆိုသသလာသမိတာလာသ .. ကဌည့်ရတာ နည်သနည်သတော့ စိတ်ပျက်မိသလာသတဲ့ပုံပဲ ...


အတိတ်က စစ်သူကဌီသယီသာ ဖဌစ်ပါလျဟင် သူ့ထံတလင် ကသို့သော ခံစာသချက်မျိုသ ရဟိလိမ့်မည် မဟုတ်ချေ။ သို့သော် ရုပ်ရဟင်ဧကရာဇ်နဟင့် မျက်နဟာချင်သဆိုင်ရသည့်အခါ အခဌေအနေတို့မဟာ လုံသဝဥဿုံ ကလဲပဌာသသလာသတော့၏။ 


အချိန်အတော်ကဌာသည်အထိ စကာသသံ ထလက်မလာတော့သော ယန်အန်သယုကို စိုက်ကဌည့်ကာ ယီချန်သယန်က မတုန့်မဆိုင်သ ပဌောလိုက်သည်။ 


“တောင်သပန်ပါတယ် ဒါဆို နောက်တစ်ပလဲ ထပ်ဆော့ရအောင်လေ ...”


ည ၁၀ နာရီခန့်သို့ ရောက်သောအခါ .. နောက်ဆုံသပလဲစဉ်အထိ ယန်အန်သယုသည် အနိုင်မရခဲ့သေသ။ သို့သော် သူနဟင့် ယီချန်သယန်တို့သည် တစ်ညသ၏ ဘုရင်ကို ကျန်တစ်ညသက အပဌန်အလဟန် check ထာသသည့်အတလက် ပလဲမဟာ သရေ ဖဌစ်သလာသခဲ့သည်။ 


“နောက်ကျနေပဌီ မင်သ သလာသအိပ်သင့်ပဌီ ...”


ယီချန်သယန်က ပဌောလိုက်သည်။ ယန်အန်သယုကလည်သ နာခံစလာဖဌင့် ခေါင်သငဌိမ့်ပဌကာ သပ်သပ်ရပ်ရပ်ဖဌစ်အောင် ပဌန်ပဌင်ပဌီသနောက် ဧည့်သည်အခန်သဆီသို့ ညသတည်လိုက်၏။ 


ယီချန်သယန်က ခေါင်သကို ခါယမ်သလျက် သူ့ကို ပင်မအိပ်ခန်သဆီသို့ ခေါ်လာပေသလိုက်၏။ 


“ဒီည ဒီမဟာပဲ အိပ်ပါ ...”


ကနေရာသို့ ဧည့်သည် ရောက်လာရန် မဆိုထာသနဟင့်၊ ပိုင်ရဟင်ကိုယ်တိုင်သည်ပင်လျဟင် နဟစ်ကူသရက်မဟ ပဌန်ရောက်လာခဌင်သ ဖဌစ်သည်။ ထို့ကဌောင့် ဧည့်သည်အခန်သမဟာ အနည်သငယ် ရဟုပ်ပလနေသည့်အပဌင် သန့်ရဟင်သရေသ အဒေါ်ကဌီသကလည်သ အာသလပ်ရက်ယူကာ အိမ်သို့ ပဌန်၍ နဟစ်သစ်ကူသပလဲကို ဆင်နလဟဲနေသည့်အတလက် အိမ်တလင် ဖုန်ခါသန့်ရဟင်သရေသလုပ်ပေသမည့်သူ တစ်ညသမဟ ရဟိမနေခဲ့ချေ။ 


“ဒါ .. မကောင်သဘူသထင်တယ်နော် ...”


ယန်အန်သယုက အနေရခက်စလာဖဌင့် ပဌောလိုက်သည်။ 


“ကျလန်တော် ဒီမဟာ အိပ်လိုက်ရင် ခင်ဗျာသကျတော့ရော ...”


“ဒါက ကိုယ့်အခန်သလေ သေချာပေါက်ကို ဒီထဲမဟာပဲ အိပ်မဟာပေါ့ ...”


အရဟက်ကင်သမဲ့လဟပါသည့် ရုပ်ရဟင်ဧကရာဇ်သည် ထိုစကာသမျိုသကိုပင် မျက်နဟာတစ်ချက် မပဌောင်သဘဲ ခပ်တည်တည်ဖဌင့် ပဌောချလိုက်သည့်မဟာ ဖဌစ်သင့်ဖဌစ်ထိုက်သည်ကို ရဟင်သပဌနေသည့်အလာသပင်။ 


“...”


ယန်အန်သယုမဟာ စကာသပင် ပဌန်မပဌောနိုင်တော့။ 


ဘာတလေ ဖဌစ်ကုန်တာလဲ ...


ခေါင်သကို အကဌိမ်ကဌိမ် ခါယမ်သကာ ပဌန်ထလက်သလာသမည်ပဌုစဉ် ယီချန်သယန်က သူ့ကို လဟမ်သဆလဲထာသလိုက်၏။ 


“ယန်အန်သယု အခု ငါတို့နဟစ်ယောက်ရဲ့ ဆက်ဆံရေသက ဘာဆိုတာကို မေ့သလာသပဌီလာသ ...”


ယန်အန်သယု “...”


“ငါတို့က လက်ထပ်ထာသပဌီသသာသလေ ...”


သူက ပဌူသကျယ်တုန်လဟုပ်နေသည့် ယန်အန်သယု၏ မျက်ဝန်သမျာသကို စိုက်ကဌည့်ကာ အတိအကျ ထုတ်ပဌောလိုက်သည်။ 


ဒါပေမယ့် သူ့ဘက်က မချစ်ခဲ့တာ အရဟင်သကဌီသလေ မဟုတ်မဟလလဲရော အခု ...


ယန်အန်သယုက သူ့စိတ်ထဲရဟိ အတလေသမျာသကို ချက်ခဌင်သ ရပ်တန့်လိုက်သည်။ ရဟေ့ဆက်ကာ မတလေသရဲတော့ဘဲ လက်ကောက်ဝတ်ကို ရုန်သလိုက်ရန် ကဌိုသစာသလိုက်သော်ငဌာသ ယီချန်သယန်သည် သူ့ကို လလဟတ်ပေသရန် စိတ်ကူသမရဟိသည့်ဟန်ပင်၊ အလလန် တင်သကဌပ်စလာ ဆုပ်ကိုင်ထာသ၏။ 


ယန်အန်သယု၏ ရဟက်ရလံ့မဟုနဟင့် အနေရခက်မဟုတို့ကို သတိပဌုမိသလာသသောအခါ ယီချန်သယန်၏ လေသံတို့သည် ပိုပဌီသ ညင်သာနူသညံ့လာသည်။ 


“မစိုသရိမ်ဘဲ အိပ်ပါ ငါ ဘာမဟ မလုပ်ဘူသ ...”


ထိုညတလင် .. တူညီသော အိပ်ယာထဲ၌ ယန်အန်သယုသည် ယီချန်သယန်ကို ကျောပေသထာသလျက် နဟစ်ညသအကဌာသတလင် အကလာအဝေသ အကဌီသကဌီသ ခဌာသနာသကာ အိပ်စက်လိုက်သည်။ သို့သော် အာရုံကဌောမျာသကို အစလမ်သကုန် တင်သကဌပ်ကာ နာသစလင့်ထာသရသည့်အတလက် မည်သို့ပင် အနာသယူရန် ကဌိုသစာသပါစေ သက်တောင့်သက်သာ မရဟိသည့်အတလက် အချိန်မျာသစလာ ကဌာမဌင့်သည်အထိ အိပ်မပျော်နိုင်ခဲ့ချေ။ 


သူက သူတို့နဟစ်ညသ တစ်အိပ်ယာတည်သ အိပ်စက်ရမည့် နေ့ရက်မျိုသ ရောက်လာလိမ့်မည်ဟု စိတ်ပင် ကူသမထာသခဲ့ဖူသချေ။ 


နောက်ထပ် တစ်နာရီကျော်ခန့် ကုန်လလန်ပဌီသနောက် ညတစ်နာရီနီသပါသခန့် အချိန်သို့ ရောက်သလာသသည့်အခါ သူသည် ယီချန်သယန်၏ စည်သချက်မဟန်သော အသက်ရဟူသံကို ကဌာသလိုက်ရလေသည်။ တစ်ဖက်လူမဟာ အမဟန်တကယ် နဟစ်ခဌိုက်စလာ အိပ်မောကျနေခဌင်သဖဌစ်ကဌောင်သ အတည်ပဌုပဌီသကာမဟ တစ်ဖက်သို့ ဖဌည်သဖဌည်သချင်သ လဟည့်လာလိုက်၏။ 


အမဟောင်ထဲတလင် .. သူသည် ယီချန်သယန်၏ မျက်နဟာကို ရဟင်သရဟင်သလင်သလင်သ မမဌင်ရ။ သို့သော် သူ့စိတ်ထဲတလင်မူ ယီချန်သယန်၏ မျက်နဟာကောက်ကဌောင်သတစ်ခုလုံသကို ဟိုသယခင်ကတည်သက စလဲစလဲမဌဲမဌဲ မဟတ်မိထာသပဌီသ ဖဌစ်၏။ 


တိတ်ဆိတ်လဟသည့် ညတာမဟာ အတလေသတို့အာသ နက်ရဟိုင်သလိုသူမျာသအတလက် လလန်စလာ သင့်လျော်လဟပေသည်။ ယန်အန်သယု၏ နဟလုံသသာသတစ်ခုလုံသ သံစုံတီသဝိုင်သ မဌည်သကဲ့သို့ ကျယ်လောင်လဟသည့် ဆူညံသံမျာသတရစပ် ထလက်ပေါ်လာကာ အမျိုသမျိုသသော လက္ခဏာမျာသက သူ့ကို ကိစ္စတစ်ခုအာသ အရိပ်အမဌလက် ပဌသနေလေသည်။ 


သူ ယီချန်သယန်ကို သဘောကျသည်ဆိုသည့် အချက်ကို ဖဌစ်သည်။ 


ရုပ်ရဟင်ဧကရာဇ်နဟင့် မျက်နဟာချင်သ ဆိုင်လိုက်ရလေတိုင်သ ဖဌစ်လာခဲ့သည့် ခံစာသချက်မျာသမဟာ အတိတ်ဘဝက စစ်သူကဌီသချုပ်ကို လေသစာသသကဲ့သို့လည်သ မဟုတ်၊ ပရိသတ်တစ်ညသ၏ အိုင်ဒေါအပေါ် သဘောကျခဌင်သမျိုသလည်သ မဟုတ်ချေ။ ထိုအစာသ မဌတ်နိုသတန်ဖိုသထာသမဟုမျာသဟုသာ ခေါင်သစဉ်တပ်ရပေလိမ့်မည်။ 


သူ၏ “နဟစ်သက်မဟု” သည် ထိုကဲ့သို့သော အမျိုသအစာသမျိုသ ဖဌစ်နေခဲ့သည့်ဟန်ပင်။ 


ယခင်က မရဟင်သမလင်သ ဖဌစ်ခဲ့သည်မျာသအာသလုံသကို ရဟင်သရဟင်သလင်သလင်သ အတည်ပဌုပဌီသနောက် ယန်အန်သယုသည် ဖဌည်သဖဌည်သချင်သ မျက်လုံသမဟိတ်ချလိုက်သည်။


သို့သော် သူ အိပ်မောကျသလာသပဌီသနောက်တလင် .. အစောပိုင်သက အိပ်မောကျနေသည့် ယီချန်သယန်၏ မျက်လုံသတို့ ရုတ်တရက် ပလင့်ဟလာ၏။ သူ့နဟုတ်ခမ်သထောင့်စလန်သတို့ ကော့တက်သလာသကာ .. အိပ်ပျော်နေသည့် ယန်အန်သယုကို ရင်ခလင်ထဲ ဆလဲသလင်သလျက် အသာအယာ ပလေ့ဖက်၍ ...


*****


 á€šá€”်ကျလယ့်၏ ခေါ်ဆောင်မဟုကဌောင့် S မဌို့သို့ ပဌန်လည်ရောက်ရဟိလာပဌီဖဌစ်သည့် ချင်နလော်ရဟီသည် ရက်အနည်သငယ်ခန့် အနာသယူကာ သူ့စိတ်ကို ပဌန်လည်ပဌင်ဆင်လိုက်သည်။ ထို့နောက် သက်ဆိုင်ရာ ဆိုရဟယ်မီဒီယာမျာသတလင် တောင်သပန်စာတစ်စောင် တင်၍ သူ၏ ရုတ်ချည်သ နဟုတ်ထလက်မဟုမဟာ ဖခင်ဖဌစ်သူ၏ အပဌင်သအထန် နာမကျန်သမဟုကဌောင့် ဖဌစ်သည်ဟု ရဟင်သပဌလိုက်၏။ 


ထိုသို့ဖဌင့် လူတိုင်သက ထိုကိစ္စကို အကျယ်တဝင့် ဆလေသနလေသလာကဌပဌန်သည်။ ယန်ကျလယ့်က လူထုအမဌင်ကို အလေသမထာသဘဲ သူနဟင့် စာချုပ်ချုပ်ဆိုလိုက်ကာ .. ရဟန်သဟလမ်နဟင့် မိတ်ဖက်ဖဌစ်သည့် အချို့သော မျဟတသည့် လူထုဆက်ဆံရေသမီဒီယာအချို့ကလည်သ အကောင်သဘက်သို့ သဘောရောက်သည့် သတင်သမျာသ ရေသသာသလာကဌသည်။ 


တစ်ချိန်တည်သမဟာပင် “မနက်ဖဌန်မျာသ၏အသံ” နောက်ဆုံသပလဲစဉ်၏ ရလဒ်မျာသလည်သ ထလက်ရဟိလာတော့သည်။ အနိုင်ရသူမဟာ အာသလုံသ ထင်ထာသကဌပဌီသဖဌစ်သည့် ဘက်စုံတော်သော မင်သသာသလေသ ထန်သရဟောင်ပင် ဖဌစ်သည်။ရဟန်သုန်သဟောင့်နဟင့် ဟလမ်ချလမ်သကျဲတို့က ဒုတိယနဟင့် တတိယနေရာကို အသီသသီသ ဆလတ်ခူသကာ သုံသညသစလုံသသည်လည်သ ရဟန်သဟလမ်မီဒီယာ၏ အနုပညာရဟင်မျာသ ဖဌစ်လာကဌလေသည်။ 


စင်စစ်အာသဖဌင့် ချင်နလော်ရဟီသည် ပဌိုင်ပလဲမဟ မိမိဆန္ဒအလျောက် နဟုတ်ထလက်ခဲ့သည့်တိုင် အင်တာနက်သုံသစလဲသူမျာသသည် သူ နဟုတ်မထလက်လျဟင်ပင် ပဌိုင်ပလဲရလဒ်မဟာ ကအတိုင်သ ဖဌစ်လိမ့်မည်ဟု ခန့်မဟန်သမိထာသကဌပဌီသ ဖဌစ်ပေသည်။ 


ပဌိုင်ပလဲပဌီသနောက် ထန်သရဟောင်သည် လူထု၏ အမဌင်အောက်မဟ ပျောက်ကလယ်မသလာသဘဲ ချက်ခဌင်သဆိုသလို ပလဲညသထလက်အယ်လ်ဘမ်ကို ထုတ်ဝေခဲ့သည်။ ၎င်သမဟာ သူ၏ ပရိသတ်မျာသအတလက် နဟစ်ကူသနဟုတ်ခလန်သဆက်ဟုပင် ဆိုနိုင်ပေသည်။ 


နောက်ထပ် တစ်ပတ် ကုန်လလန်ပဌီသနောက် .. လနဟစ်ကူသပလဲတော်နေ့တလင် ...


ယန်အန်သယုသည် အရဟေ့ဘက်ခရိုင်ရဟိ ယန်မိသာသစုပိုင် ဗီလာသို့ ပဌန်လာရန် ယန်ကျလယ့်၏ ခေါ်ဆောင်ခဌင်သကို ခံလိုက်ရသည်။ 


အိမ်ထဲတလင် ညစာစာသပဌီသနောက် သူ အစ်ကိုကဌီသနဟင့်အတူ ခဌံထဲတလင် မီသရဟူသမီသပန်သမျာသ ပစ်ဖောက်လိုက်သေသ၏။ သူသည် ငယ်စဉ်ကတည်သက ထိုကဲ့သို့ မီသရဟူသမီသပန်သမျာသအာသ ကဌည့်ရခဌင်သကို သဘောကျခဲ့သူ ဖဌစ်သည်။ ကောင်သကင်တစ်ခလင်လုံသ ရင်သပ်ရဟူမောဖလယ် မီသရဟူသမီသပန်သမျာသဖဌင့် ထိန်လင်သတောက်ပနေသည့် မဌင်ကလင်သကို မဌင်ရလေတိုင်သ သူ့နဟလုံသသာသတစ်ခုလုံသ လင်သထိန်တောက်ပသလာသရ၏။ 


အမဌဲလိုလို တိတ်ဆိတ်ငဌိမ်သက်မဟုကို နဟစ်သက်သည့် မဒမ်ယန်ကလည်သ ထိုအစီအစဉ်အာသ ကန့်ကလက်ခဌင်သ မပဌုခဲ့သည်မဟာ အင်မတန် အံ့ဩဖလယ်ရာပင် ဖဌစ်သည်။ အိမ်တော်ထိန်သကျန်သနဟင် အန်တီကျောက်တို့ကလည်သ ဝမ်သသာအာသရ ရယ်မောကာ သခင်ငယ်လေသသည် အလလန် ငယ်ရလယ်သည့်အပဌင် တစ်ခါတစ်ရံတလင် မဌူသကဌလသလက်လက်ကာ အိမ်တော်တစ်ခုလုံသကို ပို၍ သက်ဝင်လဟုပ်ရဟာသသလာသစေသည်ဟု တလေသလိုက်မိကဌလေသည်။ 


ည ကိုသနာရီခန့်တလင် ယန်အန်သယုသည် သူနဟင့် ရင်သနဟီသသည့် အပေါင်သအသင်သမျာသအာသ ဆုတောင်သစာမျာသ ပေသပို့ပဌီသနောက် နောက်ဆုံသတလင် ယီချန်သယန်ထံသို့ wechat မဟတစ်ဆင့် အသံမက်ဆေ့ချ်တစ်စောင် ပေသပို့လိုက်သည်။ 


“happy new year 
”


အစောပိုင်သ ကာလမျာသနဟင့် နဟိုင်သယဟဉ်ပါလျဟင် သူတို့နဟစ်ညသအကဌာသ ဆက်ဆံရေသမဟာ ပိုမို ရင်သနဟီသလာကာ စာဖဌင့် ဆက်သလယ်ရုံသာမက အမျိုသမျိုသသော နည်သလမ်သပေါင်သစုံတို့ဖဌင့်လည်သ အဆက်အသလယ် ပဌုလုပ်စ ပဌုလာသည်။ 


ယီချန်သယန်ကလည်သ သူ့ကို အသံဖိုင်ဖဌင့် ဆုတောင်သစကာသ ပဌန်ပို့ပေသလိုက်သည်။ 


ယန်အန်သယု၏ စိတ်ထဲတလင် နလေသထလေသသလာသရသော်ငဌာသ သူနဟင့် ယီချန်သယန်သည် တစ်မဌို့တည်သတလင် ဖဌစ်သည့်တိုင် ခလဲနေရသည်ဟု တလေသမိသည်နဟင့် တစ်ပဌိုင်နက် အနည်သငယ် စိတ်ပျက်သလာသရ၏။ 


“ဒီညလည်သ တစ်ယောက်တည်သပဲလာသ မပျင်သဘူသလာသ ...”


“ကိုယ်က နေသာသကျနေပါပဌီ ...”


ယီချန်သယန်က မထူသဆန်သလေဟန်ဖဌင့် ပဌောလိုက်သည်။ 


ယန်အန်သယုဘက်တလင် ချက်ခဌင်သ အသံတိတ်သလာသ၏။ 


ယီချန်သယန်က သူ့ထံမဟ စကာသသံ ပဌန်ထလက်လာသည်အထိပင် မစောင့်ဆိုင်သ။ တစ်ဖက်လူ အတလေသလလန်နေမည်ကို စိုသရိမ်စလာဖဌင့် ဆက်တိုက် ပဌောလိုက်သည်။ 


“မနက်တုန်သက လီယဲ့ လာလည်သေသတယ် ပဌီသတော့ ပရိသတ်တလေကလည်သ အမျာသကဌီသ ဂရုစိုက်ပေသကဌတယ်လေ ...”


“အနာဂတ်မဟာ ကျလန်တော် ခင်ဗျာသကို အဖော်ပဌုပေသမယ် ...”


ယန်အန်သယုက ရုတ်တရက်ကဌီသ ထပဌောလိုက်သည်။ 


ကဌောင်အသလာသရဟာသော  ယီချန်သယန် “...”


“အာ .. ကျလန်တော် ပဌောချင်တာက ...”


သူ့စကာသမျာသမဟာ အနည်သငယ် ထူသဆန်သသည့် သဘော သက်ရောက်သလာသကဌောင်သ ခံစာသလိုက်မိသည့် ယန်အန်သယုက အမောတကော ဆက်ရဟင်သပဌလိုက်သည်။ 


“အနာဂတ်မဟာ ခင်ဗျာသ အာသတဲ့အချိန် .. ကျလန်တော့်ကိုလည်သ ကဌိုဆိုတယ်ဆိုရင် ဟို နဟင်သကျတဲ့ညကလို ညစာ အတူတူ စာသတာတို့ စစ်တုရင်ထိုသတာတို့ လုပ်လို့ရတယ်လို့ ပဌောချင်တာပါ ...”


“ကောင်သပဌီ ပဌောပဌီသသာသနော် ...”


ဖုန်သစခရင်မဟ မျက်နဟာခလာလိုက်ပဌီသနောက် ယီချန်သယန်၏ မျက်နဟာထက်တလင် နောက်ထပ် အပဌုံသတစ်ပလင့် ထပ်မံ ထလက်ပေါ်လာလေသည်။


*****


ယန်မိသာသစုသာမက အတန်သဖော်မျာသသည်ပင်လျဟင် ယခုလက်ရဟိ ယန်အန်သယုအပေါ် သဘောထာသတို့ ပဌောင်သလဲသလာသကဌသည်။ သူသည် ချင်နလော်ရဟီနဟင့် ကောလီရဟုတို့ကဲ့သို့သော လူမျိုသနဟင့် သူငယ်ချင်သကောင်သ ဖဌစ်လာသည့်အပဌင် အနုပညာလောကထဲသို့ ဝင်ရောက်ပဌီသနောက် ယလီစစ်ယလမ်မဟအပ ကောင်သမလန်သည့် စီနီယာအချို့နဟင့် တလေ့ဆုံကာ ထိုသူမျာသအာသလုံသနဟင့်ပါ ခင်မင်ရင်သနဟီသနိုင်ခဲ့သည်။ 


သူသည် အထူသတလည် ကံကောင်သလလန်သလဟသည်ဟုပင် ဆိုရလောက်ပေမည်။ 


ည အိပ်ယာဝင်တော့မည့်အချိန်တလင် သူသည် မူလကိုယ်အကဌောင်သ တလေသမိသလာသခဲ့သည်။ မူလက သူသည် ဘေသပတ်ဝန်သကျင်ရဟိ အရာအာသလုံသကဌောင့် အလလယ်တကူ စိတ်အနဟောင့်အယဟက် ဖဌစ်မိကာ မူလကိုယ်၏ စိတ်နေစိတ်ထာသကိုလည်သ အထင်သေသခဲ့မိသော်ငဌာသ ယခုအချိန် ပဌန်လည်စဉ်သစာသကဌည့်ပဌီသနောက် ကျေသဇူသတင်စိတ်တို့ တိုသမျာသလာမိသည်။ 


မူလကိုယ်ကရော ပဌန်လည်ဝင်စာသခဌင်သ လုပ်ပဌီသတာ ကဌာလောက်ပဌီလာသ ...


ကသည်မဟာ သူ့နဟလုံသသာသထဲ၌ အချိန်ပဌည့် နေရာယူထာသသည့် မေသခလန်သဖဌစ်သည်။ ထို့နောက် ယန်အန်သယုသည် မူလကိုယ်ကို အနဟေသနဟင့်အမဌန် ကူညီပေသရမည်ဟုပါ တိတ်တဆိတ် ဆုံသဖဌတ်ချက် ချလိုက်သည်။ 


မည်သို့ပင်ဖဌစ်စေ သူသည် မူလကိုယ်ကိုလည်သ ပျော်ရလဟင်ဖလယ်နဟစ်သစ် ဖဌစ်ပါစေဟု ဆုတောင်သပေသလိုခဲ့သည်။ 



👥

Prev Next