Chapter 37

👥️Chapter 37

 ကြင်နာတတ်သည့် နှလုံးသားပိုင်ရှင် လူငယ်လေးက သူ့ကို ဝေ့ရှင်းကျင်းယွမ်၏ ဝင်ပေါက်အထိ လိုက်ပို့ခဲ့လေ၏။

"ဒါနဲ့ အခုထိ ဒီဘက်က လူကြီးမင်းရဲ့ နာမည်ကို မသိရသေးဘူးနော် ..." 

ယန်အန်းယုက စကားစလိုက်သည်။ ထိုလူငယ်လေး၏ မျက်နှာနှင့် စိတ်နေသဘောထားမှာ အနုပညာရှင်တစ်ဦးအဖြစ် ပွဲဦးထွက်ရန် အင်မတန် သင့်လျော်သည်ဟု ခံစားမိနေဟ။ 

လူငယ်လေး၏ နှုတ်ခမ်းထောင့်စွန်းတို့ ကွေးညွတ်သွားတော့သည်။ 

"ကျွန်တော့်မျိုးရိုးက "ကု" ပါ ..." 

"မစ္စတာကု .. ဒီနေ့ တွေ့ရတာ ဝမ်းသာပါတယ် ..." 

"ကျွန်တော်လည်း ထပ်တူပါ ..." 

****

သုံးရက်အကြာ .. ရှန်းဟွမ်မီဒီယာရုံးချုပ်ရှိ ယန်ကျွယ့်၏ ရုံးခန်းထဲ၌ ... 

"ကော .. ကျွန်တော်က ဇာတ်လိုက်အဖြစ် သရုပ်ဆောင်ရမှာလို့ ပြောလိုက်တာလား ..." 

ယန်အန်းယု၏ မျက်လုံးတို့ ပြူးကျယ်သွားသည်။ 

ဘေးနားရှိ ချီစန်းက သူ့ကို စိုက်ကြည့်ကာ သတိပေးလိုက်၏။ 

"ရှောင်ယု စိတ်ကို အေးအေးထား မင်းရဲ့ ပုံရိပ်ကို ဂရုစိုက်ဦး ..." 

ယန်ကျွယ့်က ခေါင်းငြိမ့်ပြလိုက်သည်။ 

“အင်း .. ဒါရိုက်တာရော မူရင်းစာရေးဆရာရော ဇာတ်ညွှန်းရေးတဲ့သူရော အကုန်လုံးက မင်းကိုပဲ ‌ရွေးချယ်ခဲ့ကြတာ လန်ရှစ်ကုမ္ပဏီကလည်း အဲဒီ့မှာ ရင်းနှီးမြှုပ်နှံမှုလုပ်ဖို့ အစီအစဉ်ရှိနေတယ်တဲ့ .. တစ်ခုပဲ .. ဥက္ကဌလန်က “သောင်ရှင်း” ရဲ့ အဓိက ဇာတ်လိုက်က မင်းပဲ ဖြစ်ရမယ်လို့ အဆိုပြုလာတယ် ...”

ယန်ကျွယ့်က ပြောလိုက်သည်။ 

“လန်ရှစ် ကော်ပိုရေးရှင်းလား ...”

ယန်အန်းယုက အနည်းငယ် ရှုပ်ထွေးသွားဟန်ဖြင့် မျက်တောင်တဖျတ်ဖျတ်ခတ်ကာ မေးလိုက်သည်။ 

သူသည် ကောလီရှုထံမှတစ်ဆင့် .. ကုရှင်း၏ နောက်တွင် လန်ရှစ်ကုမ္ပဏီ ရှိနေကြောင်း ကြားထားခဲ့ဖူးသည်။ 

အခုပုံစံအရဆို ... သူမက သူ့အပေါ် အမြဲတမ်း ဂရုစိုက်ပေးနေတဲ့ စီနီယာတစ်ယောက်ဆိုတော့လေ ... သူမက တိတ်တဆိတ် ကူညီပေးနေတာများလား ...

“လူကြိုက်အများဆုံး ဝတ္ထုဖြစ်တဲ့ “သောင်ရှင်း” ကို မူပိုင်ခွင့်ဝယ်ပြီးနောက်ပိုင်း ကဏ္ဍတစ်ခုချင်းစီရဲ့ ကုန်ကျစရိတ်တွေက တော်တော်လေးကို မြင့်မားလို့ ငါတို့နဲ့ ပူးပေါင်းနိုင်မယ့် ရင်းနှီးမြှုပ်နှံသူကိုတောင် မရှာနိုင်ခဲ့တော့ဘူး ဒါပေမယ့် ဥက္ကဌလန်က ငါတို့ကို သူ့ဘက်ကနေစပြီး ဆက်သွယ်လာတယ်လေ .. အရိုးသားဆုံး ပြောရရင် သူ ဒီလို ဆက်သွယ်လာလိမ့်မယ်လို့ ငါတို့တွေ စိတ်တောင် မကူးခဲ့ဖူးဘူး ...”

“အမှန်ပဲ ...”

ချီစန်းကလည်း ခေါင်းငြိမ့်ပြလိုက်သည်။ 

လန်ရှစ်ကော်ပိုရေးရှင်းသည် နာမည်ကြီး စီးပွားရေးလုပ်ငန်းတစ်ခု ဖြစ်ကာ ဟော်တယ်လုပ်ငန်း၊ ခရီးသွားလုပ်ငန်းနှင့် ဈေးဆိုင်ကြီးများတွင် အဓိက ရင်းနှီးမြှုပ်နှံထားခဲ့သည်။ ၎င်း၏ လက်အောက်တွင် အခြား အမျိုးမျိုးသော ကုမ္ပဏီအခွဲလေးများလည်း အများအပြား ရှိနေသေးသည့်တိုင် ရုပ်ရှင်နှင့်အနုပညာလောကထဲတွင်မူ ပါဝင်ပတ်သက်ခြင်း မရှိခဲ့ချေ။ 

“ကော .. ဒါတွေအကုန်လုံးရဲ့ နောက်ကွယ်မှာ အကြောင်းအရင်းတစ်ခုခု ရှိနေတယ် မဟုတ်လား ...”

ယန်အန်းယုက မေးလိုက်သည်။ 

“ကြည့်ရတာ အခုတလော မင်းက တအားကို နာမည်ကြီးလာတဲ့အပြင် မူရင်းစာရေးသူကလည်း အဓိကဇာတ်လိုက်နေရာက မင်းနဲ့ တော်တော်လေး သင့်လျော်တယ်လို့ မြင်မိလို့ နေမှာပေါ့ .. အသေးစိတ် အကြောင်းအရင်းကိုတော့ ငါလည်း ကွဲကွဲပြားပြား မသိသေးဘူး ဥက္ကဌလန်ကို တစ်ခါမှ လူချင်း မတွေ့ဖူးဘူးလေ ဒါပေမယ့် ဖုန်းပြောရသလောက်တော့ သူ့လေသံနဲ့ သဘောထားက ...”

ထိုသို့ ပြောနေရင်းတန်းလန်းမှာပင် ယန်အန်းယုကို လှမ်းကြည့်လိုက်သည့် ယန်ကျွယ့်၏ အကြည့်များသည် အနည်းငယ် ထူးဆန်းသွားတော့သည်။ 

“ဘာဖြစ်လဲ ....”

ယန်ကျွယ့်က ချောင်းဟန့်လိုက်သည်။ 

“အဟမ်း .. ဥက္ကဌလန် ပြောတာတော့ သူ့ဇနီးလေးက အခုဆို မင်းရဲ့ သစ္စာရှိ ပရိသတ် ဖြစ်နေပြီးတော့ မင်းရဲ့ ရုပ်ရှင်တွေကို အများကြီး ထပ်ကြည့်ချင်မိလို့တဲ့ ...”

ယန်အန်းယု “...”

လူချမ်းသာတွေကတော့ တကယ်ကို ဆုတောင်းပြည့်တာပဲ ...

“သောင်ရှင်း” ဝတ္ထုကို စိတ်ကူးယဉ် မင်းဆက်တစ်ခုတွင် အခြေခံကာ ရေးသားထားခြင်း ဖြစ်သည်။ အဓိကဇာတ်လိုက် လောရွှင်ရှင်းသည် အပေါ်ယံတွင်မူ လောအိမ်တော်၏ သာမန် အစေခံငယ်လေး တစ်ဦးမျှသာ ဖြစ်သော်ငြား ၎င်း၏ သရုပ်မှန်မှာ ရုံးတော်အမတ်မင်းများအား အင်မတန် ခေါင်းခဲစေသည့် ပြောင်မြောက်လှစွာသော ကိုယ်ခံပညာကို ပိုင်ဆိုင်ထားသည့် “ငတက်ပြား” တစ်ဦး ဖြစ်ပေသည်။ သူသည် ဆင်းရဲသူကို ကူညီပေးသည့် စံပြသူခိုးကောင်းတစ်ဦးလည်း ဖြစ်ပေ၏။ 

နာမည်ကျော် ဝူရှအချစ်ဝတ္ထုတစ်ပုဒ်ကို ပြန်လည်ရိုက်ကူးခြင်း ဖြစ်သည့်အလျောက် ဝတ္ထုကို တီဗီဇာတ်လမ်းတွဲအဖြစ် ပြန်လည်ရိုက်ကူးမည်ဟု စတင်ကြေငြာလိုက်ကတည်းက လူပေါင်းများစွာ၏ အာရုံစိုက်မှုကို ရရှိပိုင်ဆိုင်နေရပြီ ဖြစ်သည်။ မူရင်းဇာတ်ကြောင်းနှင့် ပိုမိုကာ လိုက်ဖက်ညီစေရန် အလို့ငှာ သရုပ်ဆောင် ရွေးချယ်ခြင်းနှင့် ဇာတ်ညွှန်းဖတ်ခြင်းတို့တွင် မူရင်းစာရေးသူကိုယ်တိုင် ပါဝင်ခဲ့သည်။ 

အရေးကြီး ဇာတ်ကောင်ဖြစ်သည့် အဓိကဇာတ်လိုက် လောရွှင်ရှင်း၏ နေရာတွင် သရုပ်ဆောင်မည့် ယန်အန်းယု၏ အလှဓာတ်ပုံများကို အွန်လိုင်းပေါ်သို့ တင်လိုက်သည်နှင့် တစ်ပြိုင်နက် အင်တာနက်တစ်ခွင်လုံး ပရိသတ်များ၏ ဆွေးနွေးမှုဖြင့် ဆူညံပွက်လောရိုက်သွားတော့သည်။ သူ၏ နေရောင်ခြည်သဖွယ် တောက်ပဝင်းလက်သည့် ဗီဇသဘာဝက လူအများ၏ နှစ်လိုသဘောကျမှုကို အလိုလို သိမ်းပိုက်ရယူနိုင်သွားကာ သူ၏ ပရိသတ်များသည်သာ အပြင်းအထန် စိတ်လှုပ်ရှားသွားကြသည်မဟုတ်၊ မူရင်းဝတ္ထုပရိသတ်များ၏ ပူပန်နေသော နှလုံးသားများသည်လည်း ငြိမ်သက်အေးချမ်းသွားရတော့သည်။ အပြင်အဆင်အနေအထားကို အကဲခတ်ရပါလျှင် ရိုက်ကူးရေးအဖွဲ့သည် မူရင်းဝတ္ထု၏ အနှစ်သာရကို မပျက်စီးအောင် ဂရုစိုက်ထားသည့်ဟန်ပင်။ ‘

သုံးရက်ကြာပြီးနောက် ပေရှင်းခရိုင်၌ .. လီယဲ့သည် ယီချန်းယန်ကို သူ့ဗီလာသို့ ပြန်ပို့ပေးလိုက်သည်။ 

“ငါ ခဏလောက် အနားယူလို့ ရမလား ...”

ယီချန်းယန်က မေးလိုက်သည်။ သူ့လေသံတွင် မောဟိုက်မှုတို့ မသိမသာ ရောစွက်နေ၏။ 

လီယဲ့က ခေါင်းငြိမ့်ပြလိုက်သည်။ 

“အင်း .. လောလောဆယ်တော့ ဘာအချိန်စာရင်းမှ မရှိသေးတော့ တစ်ပတ်လောက် အေးအေးဆေးဆေး နားလိုက်လေ  ပြီးမှပဲ မင်းအတွက် ဇာတ်ကောင်အသစ်တွေ လက်ခံဖို့ စီစဉ်ပေးမယ် ...”

ဇာတ်ကောင်အသစ်အကြောင်း ကြားလိုက်သည်နှင့်တစ်ပြိုင်နက် ချက်ခြင်း ဝင်းလက်သွားသည့် ယီချန်းယန်၏ မျက်ဝန်းများကြောင့် လီယဲ့၏ လေသံမှာ တစ်ဖြည်းဖြည်း တိုးဝင်သွားတော့သည်။ 

“သောင်ရှင်း ...”

ရှင်းလင်းတိုတောင်းလှသည့် စကားတစ်ခွန်းမျှသာ ဖြစ်သော်ငြား သူ့ကို ကောင်းစွာ နားလည်ထားသည့် လီယဲ့က ဆိုလိုရင်းကို ချက်ခြင်း သဘောပေါက်လိုက်ပေသည်။ 

“အဲဒီ့ထဲမှာ သရုပ်ဆောင်ချင်လို့လား ...”

သူက ခေါင်းငြိမ့်ပြလိုက်သည်။ 

“ငါ သိသလောက်ဆို “သောင်ရှင်း” ရဲ့ အဓိကဇာတ်လိုက်က ...”

လီယဲ့က ထုတ်ပြောရ ခက်နေဟန်ဖြင့် စကားကို ရပ်တန့်လိုက်သည်။ သို့သော် သူသည် ရုပ်ရှင်ဧကရာဇ်၏ အတွေးများအား တစ်စွန်းတစ်စလေးပင် မဖော်ထုတ်နိုင်ခဲ့ချေ။ 

နှစ်ပေါင်းများစွာ အတူတူ အလုပ်တွဲလုပ်ခဲ့ဖူးသည့်အလျောက် သူသည်လည်း ယီချန်းယန်၏ အကျင့်စရိုက်ကို အနည်းနှင့်အများ တီးမိခေါက်မိပေသည်။ 

အဆိုတော်အဖြစ်သာ ရှိနေစဉ်က ယီချန်းယန်ထံတွင် ငယ်ရွယ်နုပျိုသည့် စိတ်ထားတို့ ရှိနေခဲ့သေးသည်။ သို့သော် ယခုမူ သူ၏ သရုပ်ဆောင်မှုစွမ်းရည် ပိုမိုကာ ကောင်းမွန်လာသည်နှင့်အမျှ ဇာတ်ကောင်ရွေးချယ်ရာ၌လည်း ပိုမိုကာ စဉ်းစားဆင်ခြင်ရတော့သည်။ အကျိုးအပြစ်တို့ကို ချိန်ဆကာ အရာရာတိုင်းကို တည်တည်ငြိမ်ငြိမ်ဖြင့် စဉ်းစားတတ်သည့် သဘောထားကြောင့် ယီချန်းယန်သည် တစ်ခါတစ်ရံတွင် "နှလုံးသားကင်းမဲ့သူ" ဟုပင် အမည်တပ်ခံရလေ့ ရှိပေသည်။ 

သူသာ ယန်အန်းယုအပေါ် စိတ်ရှိနေလို့ မဟုတ်ရင် ဒီလိုမျိုး အရေးမပါတဲ့ ကိစ္စတွေ တစ်ခုပြီးတစ်ခု လုပ်နေမှာတဲ့လား ...

လီယဲ့မှာ တွေးရင်းတွေးရင်း ရယ်ရွှင်မြူးလာမိသည်။ 

“ထားပါ .. ခဏလောက်စောင့် ...”

ရုပ်ရှင်ဧကရာဇ်အား စနောက်ရမည်ကို အင်မတန် ပျင်းရိလှသည့်အတွက် လီယဲ့သည် တစ်နေရာသို့ သွားကာသာ ဖုန်းဆက်လိုက်တော့သည်။ 

မိနစ်အနည်းငယ် ကြာပြီးနောက် ... သူ ဖုန်းပြောပြီး၍ ပြန်ရောက်လာချိန်တွင် .. ယီချန်းယန်သည် မျက်လုံးများကို မှိတ်ထားလျက်ပင် ဆိုဖာပေါ်၌ လှဲလျောင်းနေပြီ ဖြစ်သည်။ 

“မေးလိုက်ပြီ “သောင်ရှင်း” အတွက် ဇာတ်ကောင်တွေ အကုန်လုံးနီးပါးက ရွေးပြီးသွားပြီတဲ့ တစ်နေရာပဲ ကျန်တော့တယ် ...”

ထိုစကားကို ကြားသည့်အခါ ယီချန်းယန်က မျက်လုံးဖွင့်ကြည့်ကာ မေးလိုက်သည်။ 

“ဘယ်ဇာတ်ကောင်လဲ ...”

လီယဲ့ “နှာဘူးကောင်နေရာ ...”

*****

ထိုသို့ဖြင့် နောက်ထပ် ရက်သတ္တပတ်တစ်ခု ကုန်လွန်သွားခဲ့ပြန်သည်။ ဖွင့်ပွဲအခမ်းအနား၌ ပါဝင်ဆင်နွှဲပြီးချိန်ကတည်းက ယန်အန်းယုသည် ရိုက်ကူးရေးအဖွဲ့ထဲသို့ ဝင်ရောက်ခဲ့သည့်အတွက် “သောင်ရှင်း” ရိုက်ကူးရေးကို S မြို့တွင် စတင်ရိုက်ကူးနေသည်မှာ ရက်အနည်းငယ်ခန့်ပင် ရှိနေပေပြီ။ 

ယန်အန်းယု သရုပ်ဆောင်ထားသည့် အဓိကဇာတ်လိုက် လောရွှင်ရှင်းသည် အများနှင့်မတူ တစ်မူထူးခြားကာ အကောင်းမြင်တတ်သည့် အကျင့်စရိုက်ကို ပိုင်ဆိုင်ထားသူ ဖြစ်သည်။ သို့သော် သူသည် ငယ်စဉ်ကတည်းက မိဘနှစ်ပါးကို ဆုံးရှုံးခဲ့ရကာ ကြင်နာတတ်သည့် သခင်ကြီးလောနှင့် သခင်မလောတို့က သူ့ကို ကယ်တင်ပေးခဲ့ခြင်း ဖြစ်သည်။ လောရွှင်ရှင်းဟူသည့် အမည်သည်ပင်လျှင် သခင်ကြီးလောကိုယ်တိုင် ပေးထားခဲ့ခြင်း ဖြစ်သည်။ 

သူသည် အစေခံငယ်လေးတစ်ဦးမျှသာ ဖြစ်သော်ငြား သခင်ကြီးလောတွင် သားတစ်ဦးမှ မရှိသည့်အတွက် သူ့ကို သားအရင်းသဖွယ် သဘောထားကာ ခက်ထန်ခြင်းမရှိ၊ ကောင်းမွန်စွာ ဆက်ဆံပေးခဲ့သည်။ 

အဂတိကင်းမှု၊ မျှတမှု၊ ခြိုးခြံချွေတာကာ လုံ့လဝီရိယရှိမှုတို့ကြောင့် ကျော်ကြားသည့် သခင်ကြီးလောသည် မြို့နေပြည်သူအများ၏ ချစ်ခင်လေးစားခြင်းကို ခံရသည့် ဒေသခံ ကောင်တီတရားသူကြီးလည်း ဖြစ်ပေသည်။ သို့သော် ကံမကောင်းစွာဖြင့် .. ရိုးသားဖြောင့်မတ်ကာ ဘက်လိုက်ခြင်း ကင်းရှင်းပါသည့် ထိုအမတ်ကြီးသည် အမြဲလိုလို အကွက်ချကြံစည်ခြင်းကို ခံခဲ့ရသည်။ သူခိုး “သောင်ရှင်း” အရေးကိစ္စသည် တရားရုံးတော်ကို အကြီးအကျယ် သက်ရောက်စေကာ မင်းသားသုံးပါးအကြား တိုက်ပွဲကို ရှောင်ရှားရန်မှာလည်း ခက်ခဲလှပြီး ရိုးသားဖြောင့်မတ်ပါသည့် အရာရှိနှင့် အမတ်များသည်ပင်လျှင် ပါဝင်ပတ်သက်လာရသည့်အတွက် အမတ်လောသည်လည်း ခြွင်းချက်မဟုတ်ခဲ့ချေ။ 

ထို့နောက်တွင် အမတ်လောမှာ အကျဉ်းချခံလိုက်ရတော့သည်။ လောရွှင်ရှင်းက လောအိမ်တော်၏ သခင်မလေး တစ်ဖြစ်လဲ အမျိုးသမီးဇာတ်လိုက်ဖြစ်သည့် လောချီချင်းကို သူနှင့်အတူ ခေါ်ကာ ထွက်ပြေးသွားခဲ့သည်။ 

“သောင်ရှင်း” ၏ အစပိုင်း ဇာတ်ကြောင်းများမှာ ပျော်ရွှင်ဝမ်းမြောက်ဖွယ်များဖြင့် ပြည့်နှက်နေပေသည်။ ၎င်းက ယန်အန်းယု၏ ဟာသဉာဏ်ရွှင်ကာ ရဲစွမ်းသတ္တိနှင့် ပြည့်စုံသည့် အကျင့်စရိုက်နှစ်ခုလုံးကို မိတ်ဆက်ဖော်ပြခဲ့ပြီး သူကိုယ်တိုင်နှင့် သူ့အနားရှိ အခြားလူများ၏ စရိုက်ကို ကွက်ကွက်ကွင်းကွင်း မြင်သာစေရန်အတွက် ဟာဒယရွှင်မြူးဖွယ် အရန်ဇာတ်ကြောင်းများကိုပါ စိတ်ဝင်စားဖွယ်ကောင်းစွာ ရေးသားထားသည်။

 ထို့နောက်ပိုင်း .. လောမိသားစုတစ်ခုလုံး ရှုပ်ထွေးလှသည့် ဆူပူအုံကြွမှုထဲ၌ ပါဝင်ပတ်သက်မိသည့်အခါတွင် .. ဇာတ်ကြောင်းမှာ ပိုမိုကာ နာကျင်ဝမ်းနည်းစဖွယ် ဖြစ်လာပြီး ကျန်းဟူ(သိုင်းလောက) ၏ လက်ချက်ကြောင့် ရုံးတော်နှင့် တော်ဝင်နန်းတော်အကြား သဘောထားကွဲလွဲမှုများမှာလည်း ပိုမိုကာ မြင့်တက်လာတော့သည်။

ယနေ့တွင် ရိုက်ကူးရေးအဖွဲ့သည် C မြို့ရှိ ရှုခင်းသာ တောင်တန်းတစ်နေရာသို့ ရောက်ရှိကာ ပြင်ပရိုက်ကူးရေး ပြုလုပ်ရန် ပြင်ဆင်နေကြသည်။ 

“ဒီနေရာရဲ့ ရှုခင်းတွေက တကယ်ကို လှလိုက်တာ ...”

စုချင်ကျားက ပတ်ဝန်းကျင်သို့ လှည့်ပတ်ကြည့်ရှုလိုက်ပြီးနောက် ထိုနေရာမှာ မျှော်လင့်ထားသည့် အတိုင်းပင် စိမ်းလန်းစိုပြည်သော တောတောင်၊ ကြည်လင်အေးမြသည့် စိမ့်စမ်းရေတို့ဖြင့် ပြည့်နှက်နေကာ လေထုအငွေ့အသက်ကပင်လျှင် လန်းဆန်းတက်ကြွဖွယ် ဖြစ်နေကြောင်း သိလိုက်ရသည့်အတွက် ယန်အန်းယုဘက်သို့ လှည့်ကာ ခပ်ပြုံးပြုံး ပြောလိုက်သည်။ 

စုချင်ကျားသည် ဇာတ်လမ်း၏ အဓိကဇာတ်လိုက်မင်းသမီး ဖြစ်သည်။ သူမသည် ချိုမြိန်ကာ ချစ်စဖွယ်ကောင်းသည့် ရုပ်ရည်ကို ပိုင်ဆိုင်ထားသူ ဖြစ်ကာ ဖုရှင်းနှင့် တစ်ချိန်တည်းနီးပါး ပွဲဦးထွက်ခဲ့သည့် ညီအစ်မကောင်းများလည်း ဖြစ်ပေသည်။ ခေတ်သစ်နောက်ခံ ဇာတ်လမ်းများနှင့် နှိုင်းယှဉ်ပါလျှင် သူမသည် ခေတ်ဟောင်းနောက်ခံ ဇာတ်လမ်းတွဲများနှင့် ပိုမိုသင့်လျော်လှသည်။ ထို့အပြင် ယခင်က သူမ ရိုက်ကူးခဲ့သည့် ဇာတ်ကောင်အချို့မှာလည်း ရှေးခေတ်ဇာတ်လမ်းပုံစံများ ဖြစ်သည့်အတွက် လူအများ၏ အကောင်းမြင်မှုကို များစွာ ရရှိခဲ့ပေသည်။ 

“အင်း ...”

ယန်အန်းယုက ခပ်ဖျော့ဖျော့ ပြုံးပြလိုက်သည်။ 

သူ့အပြုံး၏ ဖမ်းစားခြင်းကို ခံလိုက်ရရှာသည့် စုချင်ကျားသည် ချက်ခြင်းဆိုသလို သူ့လက်မောင်းကို ဆွဲလျက် ဖုန်းကို ထုတ်ကာ ပြောလိုက်သည်။ 

“လာ ရှောင်ယု ရှုခင်းက တအားကို လှနေမှတော့ နောက်ထပ် ဓာတ်ပုံတစ်ပုံလောက် ရိုက်လိုက်ကြရအောင်လေ ...”

“အာ .. ကောင်းပါပြီ ...”

ယန်အန်းယုသည် ကူကယ်ရာမဲ့နေလေတော့သည်။ ရိုက်ကူးရေး  စတင်ချိန်ကတည်းက စုချင်ကျားသည် သူနှင့်အတူ  ကြိမ်ဖန်များစွာ ဓာတ်ပုံတွဲရိုက်ထားပြီး ဖြစ်သည်။ သူမ၏ စကားများအရ သူမသည် ယန်အန်းယုကို အလွန် သဘောကျသူဖြစ်ကာ “လက်ဝှေ့ကျော်” ထွက်လာချိန်ကတည်းက သူ့ပရိသတ် ဖြစ်ခဲ့သည်ဟု သိရသည်။ 

သို့သော် စုချင်ကျားသည် အမှန်တရား အစစ်အမှန်ကိုမူ ဖုံးကွယ်ဖျောက်ဖျက်ထား၏။ သူမသည် “ဖူဂျိုရှီ” တစ်ဦး ဖြစ်ကာ “ရှီယု” CP သည် အင်မတန် ကျော်ကြားလူကြိုက်များနေသည့်တိုင် သူမကမူ ယန်အန်းယုနှင့် ယီချန်းယန်၏ CP ဖြစ်သော “ယန်ယု” ကိုသာ တိတ်တဆိတ် ထောက်ခံအားပေးခဲ့သူ ဖြစ်ပေသည်။ 

(“ရှီယု” က ချင်နွော်ရှီနဲ့ ယန်အန်းယုရဲ့ CP name ပါ )

“အခု သူတို့နှစ်ယောက်က တအားကို ဆက်ဆံရေး ကောင်းနေတော့ .. နောက်ပိုင်း အပြင်းအထန် ပြဿနာဖြစ်တဲ့ အခန်းတွေကို ရိုက်တဲ့အခါကျ အဆင်ပြေပါ့မလား ...”

ဘေးနားတွင် အကဲခတ်နေသည့် ဒါရိုက်တာချူက တအံ့တဩ ရေရွတ်လိုက်သည်။ 

ထိုစကားကို ကြားလိုက်သည့် စုချင်ကျား၏ မန်နေဂျာဖြစ်သူ ကျိုးကျဲက သူ့ကို ခပ်ပြုံးပြုံးဖြင့် ပြန်ဖြေလိုက်သည်။ 

“ဒါရိုက်တာချူ မစိုးရိမ်ပါနဲ့ ချင်ကျားက သေချာပေါက်ကို ကောင်းကောင်း လုပ်နိုင်ပါတယ် ...”

“ကျွန်တော်တို့ ရှောင်ယုလည်း အတူတူပါပဲ ...”

ချီစန်းက ယုံကြည်ချက်အပြည့်ဖြင့် ပြောလိုက်သည်။ 

ဘေးနားရှိ ကိုယ်ရံတော်အဖြစ် လိုက်ပါလာသည့် ထန်းကော်ကမူ ပြုံးကာသာ ရပ်နေခဲ့သည်။ 

ပုံမှန်အချိန်များတွင် ချီစန်းသည် သူ၏ အပြောအဆို အမူအယာများကို အင်မတန် ဂရုတစိုက် ရှိကာ ယန်အန်းယုကိုလည်း ချီးကျူးခဲသော်ငြား အပြင်လူများ၏ အ‌ရှေ့တွင်မူ သခင်လေးအပေါ် အလွန် ကာကွယ်ပေးတတ်သူဖြစ်ကြောင်း သဘောပေါက်သွား၏။ 

ယနေ့တွင် တောင်ခြေရှိ တောအုပ်ထဲ၌ အခန်းနှစ်ခန်း ရိုက်ကူးရမည် ဖြစ်သည်။ ဇာတ်ကွက်များမှာလည်း အလွန် လေးလံပင်ပန်းစဖွယ် အခန်းများ မဟုတ်၊ ဇာတ်လိုက်နှင့် ဇာတ်လိုက်မတို့ ရန်ဖြစ်စကားများကာ  တိုက်ခိုက်သည့် အခန်းနှင့် ... ဇာတ်လိုက် လောရွှင်ရှင်း၏ စမ်းချောင်းငယ်လေးတစ်ခုထဲတွင် ရေချိုးနေသည့် အခန်းတို့ သာ ဖြစ်ပေသည်။ 

မန်နေဂျာနှစ်ဦး အာမခံထားသည့် အတိုင်းပင် ထို တိုက်ခိုက်သည့် အခန်းကို NG များများစားစား မပါရှိဘဲ အလွယ်တကူ ရိုက်ကူးပြီးစီးသွားခဲ့သည်။ ရိုက်ကူးရေး ရလဒ်မှာ ဒါရိုက်တာ မျှော်မှန်းထားသည်ထက်ပင် ပိုမိုကောင်းမွန်နေသေး၏။ 

ထို့နောက်တွင်မူ စမ်းချောင်းထဲ၌ ရေချိုးသည့် အခန်းတစ်ခန်းသာလျှင် ရိုက်ကူးရန် ကျန်ရှိတော့သည်။ 

သို့သော် သူနှင့်အတူ ပူးပေါင်းကာ ရိုက်ကူးရမည့် ဗီလိန်ဒုတိယမင်းသား “မုယွင်ရွှင်း” နေရာတွင် သရုပ်ဆောင်မည့်သူကိုမူ အရိပ်အယောင်မျှပင် မတွေ့ရသေးချေ။ 

“သောင်ရှင်း” ရိုက်ကူးရေးအဖွဲ့သည် ထိုဇာတ်ကောင်နှင့် ပတ်သက်၍ စာနယ်ဇင်းမိတ်ဆက်ပွဲ ပြုလုပ်ချိန်မှစ၍ အမှန်တကယ် ရိုက်ကူးနေသည့် အချိန်အထိ အကြီးအကျယ် လျှို့ဝှက်ထားသည့်အတွက် ထိုဇာတ်ကောင်တွင် သရုပ်ဆောင်မည့်သူ၏ အကြောင်းကို မည်သူမှ မသိကြချေ။ ၎င်းမှာ လူထု၏ စိတ်ဝင်စားမှုကို လှုံ့ဆော်ရန်အတွက် တမင်တကာ လျှို့ဝှက်ထားခြင်းလေလား သို့မဟုတ် ထုတ်လုပ်ရေးအဖွဲ့ဘက်မှ ထိုဇာတ်ကောင်အတွက် သရုပ်ဆောင်ကို မဆုံးဖြတ်နိုင်၍လေလား မည်သူမှ မသိကြပေ။

 အတိုချုပ် ပြောရပါလျှင် ထိုနေရာတွင် သရုပ်ဆောင်မည့် သရုပ်ဆောင်သည် ရိုက်ကွင်းသို့ တစ်ရက်ပင်လျှင် ရောက်မလာသေးသည့်အတွက် မီဒီယာများ၏ ခန့်မှန်းချက်များသည်သာ အဆက်မပြတ် ထွက်ပေါ်နေလေသည်။

👥️