Chapter 38

👥️Chapter 38

ဒါရိုက်တာချူသည်လည်း အနည်းငယ် ခေါင်းခဲနေမိ၏။ မုယွင်ရွှင်းတွင် ရိုက်ကူးရမည့် ဇာတ်ကွက်ဟူ၍ များများစားစား မရှိ၊ ဇာတ်လမ်း၏ ပထမတွဲတွင် သူ ပေါ်လာသည့် အခန်းဟူ၍ မရှိသလောက် နည်းပါးကာ စာသားအနည်းငယ်ခန့်သာ ပြောရသည့် နောက်ခံဇာတ်ကောင်တစ်ခုမျှသာ ဖြစ်ပေသည်။ သို့သော် နောက်ပိုင်း အတွဲများတွင်မူ သူ့ဇာတ်ကောင်သည် အရေးပါသည့် နေရာသို့ တစ်ဖြည်းဖြည်း ရောက်ရှိလာတော့၏။ 

ဒါပေမယ့် အဲဒီ့နေရာမှာ သရုပ်ဆောင်မယ့်လူက ဘယ်သူလဲ ...

ထိုအဖြေကိုမူ ဒါရိုက်တာချူ ကိုယ်တိုင်ပင်လျှင် သိမထားချေ။ ရင်းနှီးမြှုပ်နှံသူနှင့် ထုတ်လုပ်ရေးအဖွဲ့က ထို သရုပ်ဆောင်၏ အရည်အချင်းမှာ ကျိန်းသေ ကောင်းမွန်ပါသည်ဟုသာ အာမခံထား၏။ 

ပဟေဠိဖြစ်ဖွယ်များနှင့် ခေါင်းခဲနေရစဉ်မှာပင် .. အားလုံး သိချင်နေကြသည့် အရေးကြီးဗီလိန်ဇာတ်ကောင် “မုယွင်ရွှင်း” ရိုက်ကွင်းသို့ ရောက်ရှိလာတော့သည်။ 

ယီချန်းယန် ထွက်ပေါ်လာချိန်တိုင်း အားလုံး၏ အာရုံစိုက်မှုများသည် သူ့ထံသို့သာ စုပြုံရောက်ရှိလာတတ်ကာ ဤတစ်ကြိမ်မှာလည်း ခြွင်းချက် မဟုတ်ချေ။ 

ဒါရိုက်တာချူ၏ အကြည့်တို့ ဝင်းလက်သွားတော့၏။ ထုတ်လုပ်ရေးအဖွဲ့သည် ဤကဲ့သို့သော အင်အားကြီး ဝှက်ဖဲတစ်ချပ်ကို အမှန်တကယ် ဖိတ်ခေါ်နိုင်လိမ့်မည်ဟု တွေးပင် တွေးမထားမိခဲ့ဖူးချေ။ 

အခြား သရုပ်ဆောင်များနှင့် ရိုက်ကူးရေးအဖွဲ့သားအားလုံးလည်း ကြောင်အသွားရှာတော့၏။

 ယီချန်းယန်သည် တီဗီဇာတ်လမ်းတွဲများ၌ ခေါင်းဆောင်မင်းသားအဖြစ် ရိုက်ကူးခြင်း မရှိတော့သည့်တိုင် ရံဖန်ရံခါတွင် ဧည့်သရုပ်ဆောင်အဖြစ် ပါဝင်တတ်ကာ သူ ပါဝင်သည့် ဇာတ်လမ်းတွဲတိုင်းသည်လည်း ကြည့်ရှုနှုန်း အဆင့်သတ်မှတ်ချက် ကောင်းမွန်ရန် ကျိန်းသေသည့် အနေအထားသို့ ရောက်ရှိတတ်ပေသည်။ 

ယန်အန်းယုသည်လည်း ကြောင်အသွားရကာ ဒါရိုက်တာချူအနားသို့ လှစ်ခနဲ ပြေးသွားပြီး တိုးတိုးလေး မေးလိုက်သည်။ 

“ဒါရိုက်တာချူ .. ယီချန်းယန် သူက ဘယ်ဇာတ်ကောင်အတွက် သရုပ်ဆောင်မှာလဲ ...”

“ဟားဟား ရှောင်ယုရေ မင်း အဖြေကို သိထားပြီးပြီ မဟုတ်ဘူးလား ...”

ဒါရိုက်တာချူက ပြုံးကာ ပြောလိုက်သည်။ 

“မုယွင်ရွှင်းက ဒုတိယမင်းသား “မုရုန်ယွင်ရွှင်း” ပဲလေ ...”

ယန်အန်းယုမှာ စိတ်ထဲတွင် အလွန် ရှုပ်ထွေးသွားရတော့သည်။ 

သေချာပါပြီ .. ဒီဇာတ်လမ်းမှာ ယီချန်းယန်က သူ့ရဲ့ သန်မာတဲ့ ပြိုင်ဖက် ဖြစ်လာတော့မှာပဲ ...

ထို့နောက်တွင် ဒါရိုက်တာချူက သူ့ပုခုံးကို ပုတ်လျက် အကြီးအကျယ် အားပေးလိုက်သည်။ 

“ရှောင်ယုလေး အကောင်းဆုံး လုပ်နော် ငါ မင်းကို အမြင့်ကြီး မျှော်မှန်းထားတာ ...”

ယန်အန်းယု “...”

သွားပါပြီ .. သရုပ်ဆောင်တစ်ယောက်ရဲ့ ဘဝက တကယ်ကို ခက်ခဲတာပဲ ...

စုချင်ကျားမှာ မျက်လုံးများ ဝင်းလက်တောက်ပလျက် တိတ်တခိုး ကျေနပ်ပျော်ရွှင်နေမိတော့သည်။ 

ဘုရားရေ ငါ့သင်္ဘောလေးက အချိုတွေ ကြဲချပြီး အတူတူ နောက်တစ်ခါ သရုပ်ဆောင်ကြဦးမှာတဲ့လား ...

ဒုတိယမင်းသား မုယွင်ရွှင်း၏ မျိုးရိုးနာမည် အစစ်အမှန်မှာ “မုရုန်” ဖြစ်ပေသည်။ အပြင်ပန်းအရ အကဲခတ်ရပါလျှင် နူးညံ့ကာ ညင်သာသည့် ရုပ်ရည်ကို ပိုင်ဆိုင်ထားသော်လည်း စင်စစ်အားဖြင့် သူ့နှလုံးသားမှာ အင်မတန် ဆိုးညစ်မည်းမှောင်ကာ နှာဘူးတစ်ယောက်ဟုပင် သတ်မှတ်၍ ရသူ ဖြစ်ပေသည်။ 

အစပိုင်းတွင် မုယွင်ရွှင်းသည် သူ၏ သရုပ်မှန်ကို ဖုံးကွယ်ကာ အဓိကဇာတ်လိုက်နှစ်ဦးအား သူသည် အမတ်ကြီးလော၏ ဂုဏ်သရေရှိ ဧည့်သည်တော်ဟုသာ ပြောထားခဲ့သည်။ သံသယကင်းမဲ့သည့် အဓိကဇာတ်လိုက်ကလည်း သူ့ကို အဆင့်မြင့် အမတ်ကြီးတစ်ဦးဦး၏ သားဖြစ်လိမ့်မည်ဟုသာ မှတ်ယူထားခဲ့၏။ 

နှစ်ပေါင်းများစွာ ရုပ်ရှင်ရိုက်ကူးခဲ့စဉ်တစ်လျှောက် ယီချန်းယန်သည် ဗီလိန်ဇာတ်ကောင်နေရာများတွင်လည်း သရုပ်ဆောင်ခဲ့ဖူးသော်ငြား ရှေးခေတ်ဇာတ်လမ်းများတွင် “လူအရေခြုံထားသည့် သားရဲတစ်ကောင်” အဖြစ် သရုပ်ဆောင်ခဲ့ခြင်းမျိုးမှာမူ မရှိသလောက် နည်းပါးလှပေသည်။ 

မုယွင်ရွှင်းနှင့် လောရွှင်ရှင်းတို့၏ ပထမဆုံး တွေ့ဆုံမှုသည် လောချီချင်း ရေချိုးနေသည်ကို တမင်တကာ ချောင်းကြည့်လိုသည့် မုယွင်ရွှင်း၏ အကြံအစည်များကြောင့် စတင်ခဲ့ခြင်း ဖြစ်သည်။ သူ ကြိုတင်ကာ စုံစမ်းထားသည့် နေရာသို့ ရောက်သွားသည့်ခါ ရေချိုးနေသူမှာ ဇာတ်လိုက်မင်းသမီး မဟုတ်ဘဲ လောရွှင်ရှင်း ဖြစ်နေကြောင်း တွေ့လိုက်ရတော့သည်။ 

ဤအခန်းတွင် ယန်အန်းယုသည် သူ၏ အပေါ်ပိုင်း အဝတ်များကို ချွတ်ချကာ အဝတ်မပါသည့် နောက်ကျောပြင်ကို ကင်မရာအရှေ့တွင် ပြသရမည် ဖြစ်သည်။ အနုပညာလောကတွင် ဤသို့သော ဖြစ်ရပ်မျိုးကို ရှောင်ကြဉ်နိုင်ရန် ခဲယဉ်းလှသည့်အပြင် သူသည် မိန်းကလေးလည်း မဟုတ်သည့်အတွက် ဒါရိုက်တာက အဝတ်များကို ချွတ်ရမည်ဟု ပြောလာသည့်အခါ စိတ်ကို အရှင်းဆုံးထား၍ လက်ခံရန်သာ ရှိပေသည်။

ထို့အပြင် သူက အအေးကြောက်သူလည်း မဟုတ်သည့်အတွက် များမကြာမီတွင် နူးညံ့ကာ ပြစ်ချက်ကင်းမဲ့သည့် ခန္ဓာကိုယ်ကို လှစ်ဟပြလိုက်တော့သည်။ ယန်အန်းယု၏ ပုံစံမှာ ပိန်ပါးသည်ဟု ထင်ရလောက်သည့်တိုင် လှပကာ ညှို့ဓာတ်ပြင်းသည့် ဗိုက်ကြွက်သားနှင့် ရေသူမကောက်ကြောင်းကို ပိုင်ဆိုင်ထားရာ အပေါ်ပိုင်း ဗလာဖြစ်နေသည့် သူ့ပုံစံကြောင့် ရိုက်ကွင်းတွင် ရှိနေသည့် အမျိုးသမီးအားလုံး၏ ပါးများ ရဲရဲနီသွားကြလေသည်။

ယန်အန်းယုက ပွင့်လင်းလွတ်လပ်စွာဖြင့် အဝတ်များကို ချွတ်ချလိုက်သည့်တိုင် ယီချန်းယန်မှာမူ .. အကြည့်များ မည်းမှောင်နက်ရှိုင်းသွားလျက် မပျော်မရွှင် ဖြစ်လာ၏။ 

“အက်ရှင် ...”

ဒါရိုက်တာ၏ အော်သံနှင့်အတူ ရိုက်ကူးရေးကို စတင်လိုက်ကြသည်။ 

လောရွှင်ရှင်း၏ နူးညံ့ချောမွေ့ကာ အဝတ်ဗလာဖြစ်နေသည့် နောက်ကျောပြင်ကို တွေ့လိုက်ရသည့်အခါ မုယွင်ရွှင်း၏ အကြည့်ထဲတွင် အံ့ဩမင်သက်မှုတို့ ရုတ်တရက် ပေါ်ထွက်လာလေသည်။ သို့သော် သူက ချက်ခြင်း မူလအခြေအနေသို့ ပြန်လည်ရောက်ရှိအောင် ထိန်းသိမ်းနိုင်ခဲ့၏။ 

“မင်းကို အနှောင့်အယှက် ပေးမိသွားပြီ နှုတ်ဆက်ပါတယ် ...”

“ဟမ့် ...”

လောရွှင်ရှင်းက သူ့ကို နောက်ကျောပေးထားလျက် အေးစက်စွာဖြင့် သရော်လိုက်သည်။ စင်စစ်အားဖြင့် သူသည် ဤ သခင်လေးမု၌ မကောင်းသည့် အကြံအစည်များ ရှိနေကြောင်း ဟိုးယခင်ကတည်းက သိထားခဲ့ပြီး ဖြစ်သည်။ ထို့ကြောင့်လည်း လောချီချင်းအစား ဤနေရာသို့ ရေချိုးရန် ရောက်နေခဲ့ခြင်းပင်။

“ဒီအတိုင်း ပြန်ထွက်သွားတော့မလို့လား နည်းနည်းလေးတောင် ဆက်မကြည့်တော့ဘူးပေါ့ ...”

စကားပြောနေသည့် လောရွှင်ရှင်း၏ မျက်နှာထက်တွင် စက်ဆုပ်ရွံရှာသည့် အမူအယာများ ထွက်ပေါ်လာကာ ခေါင်းကို တစ်ဖြည်းဖြည်း လှည့်လျက် ပြောလိုက်သည်။ 

“ဒါကို လုံးဝကို မျှော်လင့်မထားမိဘူး သခင်လေးမု .. လက်စသတ်တော့ ခင်ဗျားက ယောကျ်ားလေးတွေ ရေချိုးတာကို ချောင်းကြည့်ရတာ ကြိုက်တဲ့ နှာဘူးကောင် ဖြစ်နေတာကိုး ...”

ထို့နောက် ယီချန်းယန်ကို ရိုက်ကူးရမည့် အလှည့်သို့ မရောက်ခင်တွင် ဒါရိုက်တာချူက ခက်ထန်စွာဖြင့် အော်ပြောလိုက်သည်။ 

“cut …”

“ရှောင်ယု စိတ်ကို တင်းမထားနဲ့ စောစောက မင်းရဲ့ လေသံနဲ့ အမူအယာတွေက နည်းနည်း တောင့်တောင့်ကြီးနေတယ် နောက်တစ်ခေါက် ပြန်ကြိုးစားကြည့် ...”

ဒါရိုက်တာချူက မျက်မှောင်ကြုတ်ကာ ပြောလိုက်သည်။ ယန်အန်းယုနှင့် ယီချန်းယန်တို့ အတူတူ သရုပ်ဆောင်ခဲ့ဖူးသည်မှာ တစ်ကြိမ်တစ်ခါပင် မကတော့ရာ ထိုက်သင့်သည့် အတွေ့အကြုံများ ရှိနေရတော့မည် ဖြစ်သော်ငြား ယန်အန်းယု၏ သရုပ်ဆောင်ချက်အရ သူသည် စုချင်ကျားနှင့် သရုပ်ဆောင်စဉ်ကကဲ့သို့ သက်တောင့်သက်သာ ဖြစ်မနေပေ။ 

“ကောင်းပါပြီ ...”

သူက ရယ်သံတစ်ခုကို ဖျစ်ညှစ်ထုတ်ကာ နောက်တစ်ကြိမ် သရုပ်ဆောင်ရန် ပြင်လိုက်သည်။ 

“cut .. ရှောင်ယု စိတ်ကို လျော့ထား ငါလည်း “နှလုံးသား၌ ထုဆစ်လေသော” ကို ကြည့်ထားပြီးသား အဲဒါကြောင့် မင်းကို တကယ် ယုံကြည်တယ် မင်း ယီချန်းယန်နဲ့ အရင်တစ်ခေါက် တွဲရိုက်တုန်းက နားလည်မှုကို ပြန်ထုတ်သုံးလေ ...”

တည့်တိုးဆန်ကာ အဆိပ်ပြင်းသည့် လျှာပိုင်ရှင် ဒါရိုက်တာရှုနှင့် နှိုင်းစာပါလျှင် ဒါရိုက်တာချူ၏ သဘောထားမှာ  ပိုမိုကာ ပျော့ပြောင်းလှပေသည်။ 

သို့သော် ဒါရိုက်တာချူသည် အလုပ်နှင့် ပတ်သက်ပါလျှင် အလွန် အလေးအနက် ထားရှိကာ ဒါရိုက်တာရှုနှင့် တန်းတူပင် အလွန် အသေးစိတ်ကျပြီး မြင့်မားသည့် လိုအပ်ချက်စံနှုန်းများကို လက်ကိုင်ထားသည်။ 

သူက ယန်အန်းယု စမ်းချောင်းထဲတွင် ရေစိမ်သည့် အခန်းအား ယီချန်းယန်၏ နူးညံ့ညင်သာသည့် ရုပ်ရည်ကို ထောင်လွှားမောက်မာသည့် အကြည့်များဖြင့် တည့်တည့်စိုက်ကြည့်လျက် “နှာဘူးကောင်” ဟု ဝေဖန်လှောင်ပြောင်သည့်စကားကို ယန်အန်းယု၏ ပါးစပ်ဖျားမှ သက်တောင့်သက်သာ ထွက်လာနိုင်သည်အထိ ကြိမ်ဖန်များစွာ ပြန်လည်ရိုက်ကူးခဲ့သည်။ 

ဒါရိုက်တာရှုက ကျေနပ်အားရမှုအပြည့်ဖြင့် ခေါင်းငြိမ့်ပြလိုက်သည့်အခါ ထန်းကော်နှင့် အခြား အမျိုးသမီးလက်ထောက်အချို့က ယန်အန်းယုအနားသို့ ချက်ခြင်း အပြေးသွား၍ အဝတ်အစား ပြန်ဝတ်ရန် ကူညီပေးလိုက်ကြတော့သည်။ 

ထန်းကော်က ယန်အန်းယုကို ကူတွဲပေးထားသည့်အတွက် တစ်ဖက်လူ၏ ခြေလှမ်းများမှာ ပုံမှန်နှင့် မတူဘဲ အနည်းငယ် အားပျော့ကာ ခွေယိုင်နေကြောင်း သတိပြုမိခဲ့သည်။ 

ထို့ကြောင့် သူသည် ချက်ခြင်းဆိုသလို စိုးရိမ်သွားရကာ ယန်အန်းယု၏ လက်ကို ဆွဲယူပြီး စစ်ဆေးကြည့်လိုက်သည့်အခါ လက်ဖဝါးနှစ်ဖက်လုံး ရေခဲသဖွယ် အေးစက်နေကြောင်း သိလိုက်ရလေသည်။ 

“သခင်လေး .. အဆင်ပြေရဲ့လား .. အေးနေတာလား ...”

နွေဦးဝင်စ ကာလဖြစ်သည့်အလျောက် ရာသီဥတုမှာ အနည်းငယ် ပူပြင်းသည်ဟုပင် ဆိုနိုင်ပေသည်။ သို့သော် တောင်များ ပတ်လည်ဝန်းရံထားသည့် ဒေသဖြစ်သည့်အလျောက် ရာသီဥတုမှာ နေ၍ ကောင်းနေဆဲပင်။ ထို့အပြင် ယန်အန်းယုသည် အပေါ်ပိုင်း အဝတ်ဗလာဖြင့် ရိုက်ကူးရေး လုပ်ထားရသည့်အတွက် ထန်းကော်သည် သူ့ကျန်းမာရေးအတွက် များစွာ စိုးရိမ်မိသွားတော့သည်။

“နှလုံးသားက ချမ်းစိမ့်စိမ့် ဖြစ်နေတာပါ ...”

ယန်အန်းယုက အားနည်းဖျော့တော့စွာဖြင့် ပြောလိုက်သည်။ ယီချန်းယန်အား “နှာဘူးကောင်” ဟု ခေါ်ရခြင်းမှာ အတိတ်ဘဝတွင်သာမက ဤဘဝတွင်ပင် တွေးမထားဖူးသည့် လုပ်ရပ်မျိုး ဖြစ်ပေသည်။ 

ရိုက်ကူးရေးအကြောင်းနှင့် .. ရိုက်ကူးနေစဉ် ကာလတစ်လျှောက် ရေခဲသဖွယ် အေးစက်ကာ အလေးအနက် ဖြစ်နေသည့် ယီချန်းယန်၏ မျက်နှာကို ပြန်လည်မြင်ယောင်ကြည့်ပြီးသည့်နောက် ထန်းကော်သည်လည်း ချက်ခြင်း သဘောပေါက်သွားတော့သည်။ သူက စာနာသနားမှုအပြည့်ဖြင့် သက်ပြင်းချကာ ပြောလိုက်သည်။ 

“အိုက်ယား သခင်လေးရဲ့ မစ္စတာယီက အစီအစဉ်တွေ အများကြီးကို ရိုက်ကူးဖူးတဲ့လူလေ သူ့ကို ဒီလို ဒိုင်ယာလော့ခ်မျိုး ပြောတာတော့ သခင်လေးက ပထမဆုံး ဖြစ်မယ်ထင်တယ် သေချာတယ် သူက သခင်လေး အပေါ်မှာ နက်ရှိုင်းတဲ့ ထင်မြင်ချက်တစ်ခု ရှိသွားလောက်ပြီ ...”

ယန်အန်းယု “...”

ဟေး .. မင်း အနာကို ဆားနဲ့ လာမပက်လို့ ရမလား ငါ့နှလုံးသားလေးက ဒီအတိုင်းဆိုရင်ကို စုတ်ပြတ်သပ်နေပြီကွ ...

****

နောက်ထပ် ရက်အနည်းငယ်ခန့် ကြာသည်အထိ ယီချန်းယန်နှင့် ယန်အန်းယုတို့ နှစ်ယောက်အတူတူ ရိုက်ကူးရမည့် ဇာတ်ကွက်များမှာ အနည်းနှင့်အများ ထိုပုံစံအတိုင်းသာ ဖြစ်ပေသည်။ 

“သောင်ရှင်း” တွင် လန်ရှစ်ကုမ္ပဏီက ရင်းနှီးမြှုပ်နှံထားသည့်အတွက် ရိုက်ကူးရေးအဖွဲ့အနေဖြင့် ငွေကြေးအခြေအနေကို တွေးပူနေရန် မလိုအပ်ချေ။ သရုပ်ဆောင်တစ်ဦးချင်းစီ၏ အဝတ်အစားကိုပင်လျှင် သီးသန့် ပြင်ဆင်ပေးထားကာ အရေးပါသည့် အဓိကဇာတ်လိုက်များအတွက် အဝတ်အစားများမှာလည်း ဇာတ်ကြောင်း တိုးတက်မှုအပေါ် လိုက်၍ ဒါဇင်ပေါင်းများစွာ ကြိုတင်ပြင်ဆင်ပေးထားသည့်အတွက် ထို အဝတ်အစားအပြင်အဆင်များသည်ပင်လျှင် ဇာတ်လမ်းတွဲ၏ အဓိက ဆွဲဆောင်မှုတစ်ရပ် ဖြစ်လာလေသည်။

ယီချန်းယန် သရုပ်ဆောင်ထားသည့် မုယွင်ရွှင်းသည် အနက်ရောင်ဆံပင်တို့ကို သရဖူဖြင့် ထုံးဖွဲ့စည်းနှောင်ကာ အဖြူနှင့်အပြာ ရောနှောထားသည့် ဘရိုကိတ်ပိုးထည်ကို ဝတ်ဆင်ထား၏။ ဝတ်ရုံတစ်ထည်လုံးကို အတိတ်နိမိတ် ကောင်းမွန်လှသည့် တိမ်စိုင်တို့ဖြင့် ချည်ထိုးအလှဆင်ထားကာ ခါးထက်တွင်လည်း တိမ်စိုင်တို့ဖြင့် ပြည့်နှက်နေသည့် ပိုးကြိုးတစ်ချောင်းဖြင့် စည်းနှောင်ထားပြီး ရွှန်းစိုဝိုင်းစက်သည့် ကျောက်စိမ်းခါးချိတ်တစ်ခုကို ဆင်မြန်းထားသည်။ 

ချောမောခန့်ညားကာ ညင်သာသိမ်မွေ့လှသည့် သခင်လေးမု၏ ရုပ်ရည်သွင်ပြင်သည် မြို့ထဲရှိ မြောက်များစွာသော မိန်းကလေးများကို ဖမ်းစားနိုင်ခဲ့ကာ ထိုအထဲတွင် လောချီချင်းလည်း တစ်ဦးအပါအဝင် ဖြစ်သည်။ 

သို့သော် လောရွှင်ရှင်းကမူ မုယွင်ရွှင်း၏ စရိုက်အစစ်အမှန်ကို မြင်မြင်ချင်းပင် ခန့်မှန်းမိခဲ့သည့်အတွက် သူ့ကို ရွံရှာစက်ဆုပ်စွာဖြင့်သာ သရော်ခဲ့သည်။ သူက လောချီချင်းကို ဆွဲခေါ်ကာ တိတ်တဆိတ် သတိပေးလိုက်သည်။ 

“ချီချင်း မိန်းကလေး .. လူတစ်ယောက်က တစ်ခြားတစ်ယောက်ရဲ့ စရိုက်အမှန်ကို မသိဘဲနဲ့လည်း အချိန်အကြာကြီး အသိအကျွမ်း လုပ်လို့ရတယ် သူ့ရဲ့ ရုပ်ရည်ကြောင့် အာရုံ ထွေပြားမသွားစေနဲ့ ...”

“အဲဒီလိုလား ...””

လောချီချင်းသည် သူ့စကားများကို ယုံကြည်ခြင်း အလျဉ်းမရှိ၊ စနောက်ကာသာ ပြန်ပြောလိုက်သည်။ 

“ဟီးဟီး ရွှင်ရှင်း သခင်လေးမုက နင့်ထက် ပိုချောလို့ မနာလို ဖြစ်နေတာ မဟုတ်လား ...”

ထိုစကားကို ကြားသည်နှင့်တစ်ပြိုင်နက် လောရွှင်ရှင်းက အေးစက်စွာဖြင့်သာ ပြန်လည်ချေပလိုက်သည်။ 

“ဘယ်လိုလုပ် ဖြစ်နိုင်မှာလဲ သူက နည်းနည်းပါးပါးပဲ ကြည့်ကောင်းတာပါ ဘယ်လိုလုပ် ငါ့လို ချောမောခန့်ညားပြီး ကိုယ့်ကိုယ်ကိုယ် ယုံကြည်ချက်ရှိတဲ့ အမျိုးကောင်းသားနဲ့ ယှဉ်နိုင်မှာလဲ ...”

“ဟားဟား .. ကြီးကြီးကျယ်ကျယ်တွေ ပြောနေပြန်ပြီ ...”

ထိုအချိန်တွင် မုယွင်ရွှင်က အနားသို့ ခပ်ပြုံးပြုံးဖြင့် ရောက်လာသည်။  သူက နှစ်ဦးလုံးကို ဦးညွတ်နှုတ်ဆက်ကာ လောရွှင်ရှင်းကို စိုက်ကြည့်၍ မေးလိုက်၏။ 

“သခင်လေးလော .. ကြည့်ရတာ ကျွန်တော်နဲ့ ပတ်သက်ပြီး နားလည်မှု လွဲနေတာ တစ်ခုခု ရှိနေတယ်ထင်တယ် ...”

အရိုးသားဆုံး ဝန်ခံရပါလျှင် ချောင်းသွယ်ဘေးရှိ ရေချိုးဆောင်၌ အထင်လွဲမှု ဖြစ်ပွားပြီးကတည်းက လိမ္မာပါးနပ်သော မုယွင်ရွှင်းသည် ဤ လောရွှင်ရှင်းကို တိတ်တဆိတ် အာရုံစိုက်မိနေခဲ့ခြင်း ဖြစ်ပေသည်။ 

သူက ထို လောရွှင်ရှင်းသည် အင်မတန် ဉာဏ်ကောင်းကာ ပါးနပ်လွန်းသည်ဟု ခံစားမိနေကာ ထိုသူသည် သူ ထီးနန်းအတွက် တိုက်ခိုက်ရာ၌ ခြိမ်းခြောက်မှုတစ်ခု ဖြစ်သည့် သူခိုးဓားပြ “သောင်ရှင်း” ဖြစ်နေလိမ့်မည်ဟုပင်  သံသယဝင်နေမိခဲ့သည်။ 

လောယွင်ရှင်းက မျက်ခုံးကို ပင့်ပြလိုက်သည်။ 

“ဒီလိုမျိုးကြီး ယဉ်ကျေးမနေပါနဲ့ ကျွန်တော့်အနေနဲ့ သခင်လေးလို့ အခေါ်မခံဝံ့ပါဘူး ကျွန်တော်က လက်ဖက်ရည်ငှဲ့ပေးဖို့ တာဝန်ရှိတဲ့ သာမန် အစေခံလေးတစ်ယောက်ပါပဲ ...”

မုယွင်ရွှင်းကမူ ခပ်ဖျော့ဖျော့ အပြုံးတစ်ပွင့်ကို ဆက်လက်ကာ ဆင်မြန်းထားမြဲပင်။ 

“တကယ်တမ်းတော့ သာမန်ဘဝလေးနဲ့ နေနိုင်တယ်ဆိုတာကလည်း တကယ်ကို ကောင်းတဲ့အချက်ပါ သခင်လေးလောအနေနဲ့ ဒီလို ပျော်စရာဘဝလေးအတိုင်း အမြဲတမ်း နေသွားနိုင်ဖို့ မျှော်လင့်မိပါတယ် ..."

ထို့နောက်တွင်မူ မုယွင်ရွှင်းနှင့် လောချီချင်းတို့သည် အပြုံးကိုယ်စီ ချိတ်ဆွဲလျက် ဘေးတစ်ဖက်တစ်ချက်စီသို့ ထွက်ခွာသွားလိုက်ကြတော့သည်။ လောရွှင်ရှင်းကမူ မုယွင်ရှင်း၏ နောက်ကျောကို စူးစူးရဲရဲ စိုက်ကြည့်နေဆဲပင်။ 

“ကျစ် .. လူအရေခြုံထားတဲ့ သားရဲကောင် .. ဘယ်လောက်ပဲ ကြည့်ကောင်းကောင်း နှာဘူးကောင်ကတော့ နှာဘူးကောင်ပါပဲ …”

“cut …”

ရိုက်ကွင်းအပြင်ဘက်တွင် ထိုင်နေသည့် ဒါရိုက်တာချူက သူ့အနားသို့ ရောက်လာကာ ခပ်ပြုံးပြုံးဖြင့် ပုခုံးကို ပုတ်ပေးလိုက်သည်။ 

“အရမ်းကောင်းတယ် ရှောင်ယု ဆက်ပြီး ကြိုးစားထား ...”

ထိုအခါမှ ယန်အန်းယုလည်း သက်ပြင်းချနိုင်သွားကာ ခါးသီးစွာ ပြုံးရင်း ခေါင်းငြိမ့်ပြလိုက်သည်။ 

“အင်း ...”

ထို့နောက်တွင် .. သူသည် ယီချန်းယန်၏ မျက်နှာကို စေ့စေ့ပင် မကြည့်ရဲတော့ဘဲ သန့်စင်ခန်းထဲသို့သာ လှစ်ခနဲ ပြေးသွားလိုက်တော့သည်။ 

ဤရက်ပိုင်းအတွင်း ရိုက်ကူးရသည်များသည် ယခင်ထက်ပင် ပိုမိုကာ ပင်ပန်းဖွယ်ကောင်းသည်ဟု ခံစားမိနေ၏။

သူ သဘောကျနေသည့်သူနှင့် မျက်နှာချင်းဆိုင် ရပ်ကာ စကားပြောရသည့်အပြင် .. တစ်ဖက်လူသည် ရှေးခေတ်ဝတ်စုံကိုပါ ဝတ်ဆင်ထားသေး၏။ သို့သော် အလွန်အမင်း ရွံရှာစက်ဆုပ်သည့် မျက်နှာထားမျိုးကို ဆင်မြန်းရင်း သရော်လှောင်ပြောင်သည့် စကားမျိုးကိုသာ ပြောနေရခြင်းမှာ ... သူ့အဖို့ အလွန် ခက်ခဲလှသည့် စမ်းသပ်ချက်တစ်ခုပင် ဖြစ်ပေသည်။ 

အိုက်ယား .. သရုပ်ဆောင်တစ်ယောက် ဖြစ်ဖို့ဆိုတာ တကယ်ကို မလွယ်ပါလားနော် ...

ထို့နောက် ညပိုင်းရောက်သည့်အခါ သူသည် ဟိုတယ်သို့ ပြန်ကာ အနားယူရင်း ယန်ကျွယ့်နှင့် video call ပြောနေလိုက်သည်။

“ကော ကျွန်တော် coco ကို သတိရလို့ ...”

သူက မျက်တောင်တဖျတ်ဖျတ်ခတ်ကာ ပြောလိုက်၏။

👥️

မူရင်းစာရေးသူမှာ ပြောစရာရှိပါတယ် 

ကျွဲကောသီး : အဟမ်း အပြင်ပန်းက ကြည့်ရင် ရေခဲတောင်ကြီးလို့ ထင်ရတဲ့ မစ္စတာ ရုပ်ရှင်ဧကရာဇ်က တကယ်တမ်းတော့ စိတ်ထဲမှာ တအားကို စိတ်ထအားထက်သန်နေတာပါ့လား ရှောင်ယုလေးကို တိတ်တိတ်လေး တို့ဖူးစား(အသားယူ) ဖို့ ဘယ်လောက်တောင် မျှော်လင့်နေသလဲ မသိဘူး 

ရုပ်ရှင်ဧကရာဇ်ယန် : တောင်းပန်ပါတယ် ဒီအသီးက ဘာတွေ ပြောနေလဲဆိုတာ တကယ် နားမလည်ဘူး 

ကျွဲကောသီး : _(:з)∠)_