Volume 3 : အမြန်ရထား
Chapter 77 (4 of Hearts – အမြန်ရထား ၁၀၊ ပြန်လည်စစ်ဆေးမေးမြန်းခြင်း)
ရှူဖျင်၏ ထွက်ဆိုချက်သည် ယုံနိုင်ဖွယ်မရှိပေ။ ယွီဟန်ကျန်းနှင့် ရှောက်လုံတို့မှ ဖယ်ထုတ်ခံရသော ပထမဆုံးလူမှာ ယခုအခါ သံသယအရှိဆုံးလူဖြစ်သည်။ ရှောက်လုံသည် ရုတ်တရက် တစ်စုံတစ်ခုကို သတိရသွားပြီး ရှူဖျင်၏ စာရင်းသွင်းဖောင်ကို အနီးကပ်ကြည့်လိုက်သည်။
သူမ၏ အိမ်ထောင်ရေး အခြေအနေ ကော်လံတွင် 'မုဆိုးမ' ဟူသော စာလုံးပါရှိပြီး သားသမီးများ ကော်လံတွင် သမီးဖြစ်သူ၏ အမည်ကို ဖြည့်သွင်းထားသည်။ သူမ၏အရေးပေါ်အဆက်အသွယ်ကတော့ သူမသမီးဖြစ်ပြီး သူမသမီးကို 'ရှူးရှောင်မုန်'လို့ခေါ်သည်။
ရှောက်လုံ အံ့သြသွားသည်။
နံပါတ် 4 ရထားတွဲပေါ်က အမျိုးသမီးအဖွဲ့ကို 'X ရှောင် X' လို့လည်း ခေါ်ကြသည်။ မိန်းကလေးတွေကို X ရှောင် X လို့ ခေါ်တာ များလွန်းပေမဲ့ ဒီအမျိုးသမီးအဖွဲ့က အလွန်ထူးခြားပါသည်။ ရှောက်လုံက သူတို့နာမည်တွေ ဘာကြောင့် ဆင်တူတာလဲလို့ မေးတော့ မိန်းကလေးတစ်ယောက်က သူတို့တွေ အတူတူကြီးပြင်းလာတာကြောင့်လို့ ပြန်ဖြေသည်။ ဒါဆို ရှူဖျင်၏သမီး ရှူးရှောင်မုန်က ဒီအမျိုးသမီးအဖွဲ့နဲ့ ပတ်သက်နေတာလား။
နံပါတ် 6 ရထားတွဲကိစ္စသည် နံပါတ် 4 ရထားတွဲနှင့်သက်ဆိုင်နေ၏။ ကျင်းဝေကွမ်းသည် ဆရာဝန်တစ်ဦးဖြစ်ပြီး အင်ဆူလင်ဖြင့်သတ်ခြင်းနိယာမကို မသိသော စိန်ခေါ်သူများကို ပြောပြနိုင်ခဲ့သည်။ ယွိရှင်းရှင်းသည် သက်ကြီးရွယ်အိုများ၏ မုသားများကို ဖောက်ထွင်းဝင်ရောက်ခဲ့သည့် အချိန်ဇယားအတွက် အဓိကသက်သေဖြစ်သည်။ ရှူးရှောင်မုန်၏အမည်သည် မိန်းကလေးသူငယ်ချင်းများအဖွဲ့နှင့် အလွန်ဆင်တူပြီး ယင်းသည် တိုက်ဆိုင်မှုမဟုတ်ပေ။
ယွီဟန်ကျန်းက အချက်အလက်စာရွက်ကို အသေအချာ ကြည့်လိုက်သည်။ ယခင်က ရှူဖျင်ကို သံသယရှိသူမှ ထုတ်ပယ်ခဲ့ပြီး သမီးဖြစ်သူကို ဂရုမစိုက်ခဲ့ပေ။ အခုတော့ သူမသမီးက အဓိကပဲ။
ရှောက်လုံက ပြောလိုက်သည်။ "ရှူးရှောင်မုန်က မိန်းကလေးသူငယ်ချင်းအဖွဲ့ရဲ့ အဖွဲ့ဝင်ဟုတ်၊မဟုတ် အတည်ပြုဖို့အတွက် ကျွန်တော် နံပါတ် 4 ရထားတွဲကို သွားလိုက်မယ်။"
ယွီဟန်ကျန်းက ခေါင်းငြိမ့်လိုက်သည်။ "ကောင်းပြီ၊ ကိုယ်မင်းကို ဒီမှာစောင့်နေမယ်။"
ရှောက်လုံက နံပါတ် 4 ရထားတွဲဆီသို့ ဦးတည်သွားခဲ့သည်။ အမျိုးသမီးအဖွဲ့မှ 15A က မိန်းကလေးသည် ဝတ္ထုဖတ်ရန် ခေါင်းငုံ့နေသည်။ B နှင့် C မှ လူနှစ်ယောက်သည် တီဗီစီးရီးကြည့်ရန် နားကြပ်ကို တပ်ထားသည်။ 15D နှင့် F တို့သည် တစ်ယောက်နှင့်တစ်ယောက် စကားစမြည်ပြောနေကြပြီး ချစ်သူနှင့် လမ်းခွဲလိုက်သည့် သူတစ်ယောက်အကြောင်း ထပ်မံပြောဆိုနေကြသည်။
ရှောက်လုံက သူတို့ဆီ ချဉ်းကပ်လာတော့ စကားပြောတာ ရပ်လိုက်ပြီး ရှောက်လုံကို မျက်လုံးနှစ်စုံက စိုက်ကြည့်နေသည်။ သူတို့ထဲက မိန်းကလေးတစ်ယောက်ဖြစ်သော စုန့်ရှောင်ယွီက သတ္တိရှိစွာ မေးလာသည်။ "ဟယ်လို၊ နံပါတ် 6 ရထားတွဲပေါ်မှာ တစ်ခုခုဖြစ်တာလား။ မနက် 7 နာရီလောက်က တစ်ယောက်ယောက်အော်သံကို ကြားလိုက်တယ်။"
ရှောက်လုံက ပြုံးလိုက်သည်။ "ဘာမှမဟုတ်ပါဘူး၊ အဘိုးအိုတစ်ယောက်က သူ့ပစ္စည်းပျောက်သွားပြီး ရှာနေတာပါ။ " သူက အကြောင်းအရာကို မြန်မြန်ပြောင်းလိုက်သည်။ "စကားမစပ်၊ မင်းတို့ ရှူးရှောင်မုန်ကို သိလား။"
စုန့်ရှောင်ယွီ၏ မျက်လုံးများ ပြူးကျယ်သွားသည်။ "အယ်… ညီမရှောင်မုန်ကိုသိတာလား။"
ရှူဖျင်၏သမီးလည်း ဒီအမျိုးသမီးအဖွဲ့ထဲမှာ သေချာပေါက်ပါဝင်သည်။ ဒီအချိန်မှာ သူမ ဘာကြောင့် မလာတာလဲမသိဘူး။
ရှောက်လုံက ညင်သာစွာ ပြုံးပြသည်။ "ငါမသိပေမဲ့ နံပါတ် 6 ရထားတွဲပေါ်မှာ ရှူဖျင်လို့ခေါ်တဲ့ ဒေါ်လေးတစ်ယောက်ရှိတယ်။ သူမသမီးက ရှူးရှောင်မုန်လို့ခေါ်ပြီး မင်းတို့နာမည်တွေနဲ့ တော်တော်ဆင်တူတာတွေ့လို့ လာမေးကြည့်တာပါ။ မင်းတို့သူမကို တကယ်သိမယ်လို့ ငါမထင်ထားဘူး။"
သူမဘေးနားက တီဗီကြည့်နေသော လူနှစ်ယောက်သည် ဒါကိုကြားတော့ အံ့အားသင့်စွာ မော့ကြည့်လိုက်သည်။ "ဒေါ်လေးရှူက နံပါတ် 6 ရထားတွဲမှာလား။ တိုက်ဆိုင်လိုက်တာ။"
အခြားလူက အကြံပြုသည်။ "ဒေါ်လေးရှူကို သွားတွေ့ကြမလား။ ငါ သူမကို မတွေ့ဖူးသေးဘူး။ သူမအမေက အရမ်းလှတယ်လို့ ရှောင်မုန်ပြောတာ ကြားဖူးတယ်။"
"သူမက လူတချို့နဲ့ ကတ်ကစားနေတာ။ သူမကို အနှောင့်အယှက်သွားမပေးပါနဲ့။" ရှောက်လုံသည် စိတ်လှုပ်ရှားနေသော အမျိုးသမီးအဖွဲ့ကို ရပ်တန့်ရန် အကြောင်းပြချက်ကို ပေါ့ပေါ့ပါးပါး ပြုလုပ်ခဲ့ပြီး ဆက်လက်မေးမြန်းခဲ့သည်။ "စကားမစပ်၊ ရှောင်မုန်လည်း မင်းတို့အဖွဲ့ရဲ့ တစ်စိတ်တစ်ပိုင်းမလား။ ဒီတစ်ခေါက် သူမဘာလို့မလာတာလဲ။"
လျှိုရှောင်ယန့်သည် လူငါးယောက်အဖွဲ့တွင် အတည်ငြိမ်ဆုံးအဖွဲ့ဝင်ဖြစ်ပြီး သူမက ရှင်းပြသည်။ "မူလက ဖျော်ဖြေပွဲအတွက် လက်မှတ်ခြောက်စောင်ကို ကြိုတင်မှာယူထားခဲ့တာ။ ဒါပေမဲ့ ရှောင်မုန်က အသေးစားခွဲစိတ်မှုတစ်ခုပြုလုပ်ခဲ့ရပြီး ပြန်လည်သက်သာလာဖို့အတွက် အိမ်မှာနေဖို့ လိုအပ်တယ်။ သူမကြည့်ရတာ သနားစရာကောင်းပြီး စိတ်မကောင်းဖြစ်နေတာကို ကျွန်မတို့တွေ့ခဲ့ရတယ်။ ဒါကြောင့် သူမကို အတင်းအကျပ်မခေါ်ခဲ့ဘူး။"
သူမဘေးမှာ ကျန်းရှောင်ကျုက ထပ်ပေါင်းပြောသည်။ "သူမ နေမကောင်းမဖြစ်ခဲ့ရင် သေချာပေါက်သွားမှာ။ ဒီဖျော်ဖြေပွဲက သူမအကြိုက်ဆုံး အဆိုတော်ဖြစ်ပြီး သုံးနှစ်မှတစ်ကြိမ်သာ ကျင်းပတာ။ နောက်တစ်ကြိမ်အတွက် သုံးနှစ်စောင့်ရလိမ့်မယ်။"
သူမဘေးနားက မိန်းကလေးတွေက ထောက်ခံသည်။ "ဟုတ်တယ်၊ စိတ်မကောင်းစရာပဲ။" "ကိစ္စမရှိပါဘူး၊ ဗီဒီယိုတွေ မှတ်တမ်းတင်ပြီး သူမကို ပြတာပေါ့။"
ရှောက်လုံက မေးလိုက်သည်။ "ဒေါ်လေးရှူက အရမ်းလှတယ်ဆိုပြီး သူမက သူမအမေအကြောင်း မင်းတို့ မကြာခဏပြောလေ့ရှိတာလား။"
အစ်မကြီး လျှိုရှောင်ယန့်က ပြန်ဖြေသည်။ "ဟုတ်တယ်၊ သူမအမေနဲ့ သူမကဆက်ဆံရေးကောင်းတယ်။ နေ့တိုင်း သူမအမေကို ဖုန်းဆက်တယ်။ ရှောင်မုန်ရဲ့ အဆိုအရ သူမအမေက သူမကို အရမ်းချစ်တာ။ သူမငယ်စဉ်ကတည်းက အကောင်းဆုံးအစားအစာကိုပဲ စားခဲ့ရပြီး သူမအမေကလည်း သူမအိပ်ထောင်ပြုရင်နေဖို့ အိမ်ဝယ်ဖို့အတွက် ပိုက်ဆံစုခဲ့တာ။ သူမမှာ ဒီလိုအမေမျိုး ရှိတာကို အားလုံးက မနာလိုဖြစ်နေကြတယ်။"
ရှောက်လုံက ပေါ့ပေါ့ပါးပါးဟန်ဆောင်သည်။ "သူမအဖေကကော။"
လျှိုရှောင်ယန့်: "သူကမရှိတော့တာကြာပြီထင်တယ်။ သူ့အကြောင်းပြောတာ ကျွန်မ တစ်ခါမှ မကြားဖူးဘူး။"
သူမဘေးရှိ ဝူရှောင်ဖေးက ပြုံးပြသည်။ "ရှင်က ဘာလို့ ရှောင်မုန်အကြောင်း မေးနေရတာလဲ။ သူမရဲ့ဓာတ်ပုံကိုမြင်ပြီး သူမကို စိတ်ဝင်စားသွားလို့လား။ ရှောင်မုန်က အရမ်းလှပြီး သူမကိုလိုက်ပိုးနေတဲ့ ကောင်လေးတွေမှ တန်းစီနေတာပဲ။"
ရှောက်လုံက အဆင်မပြေစွာ ချောင်းဆိုးလိုက်သည်။ "အခု သူမမှာ ရည်းစားရှိလား။"
အမျိုးသမီးတွေက ချက်ချင်းဆိုသလို 'ငါနားလည်တယ်၊ နင် ရှောင်မုန်ကို လိုက်ချင်နေတာပါ။' ဆိုသော အမူအရာကို ပြလိုက်ကြသည်။
ဝူရှောင်ဖေးက ပြန်ဖြေသည်။ "လွန်ခဲ့တဲ့ သုံးလလောက်က သူမချစ်ရတဲ့ ကောင်လေးနဲ့ လမ်းခွဲရလို့ အချိန်အတော်ကြာအောင် ငိုကြွေးခဲ့တာ။ ရှင့်မှာ အခွင့်အရေးမရှိတော့ဘူးလို့ ကျွန်မထင်တယ်။ ရှင်က အရမ်းချောပြီး ရှောင်မုန်က တစ်ကိုယ်ရေဖြစ်နေပေမဲ့ သူမရဲ့အရင်ဆက်ဆံရေးက မပြီးပြတ်သေးဘူး။"
ရှောက်လုံက ရယ်ရမလား ငိုရမလား မသိချေ။ သူတို့ကို ကျေးဇူးတင်စကားပြောပြီး နံပါတ် 6 ရထားတွဲကို ပြန်လှည့်သွားသည်။
ယွီဟန်ကျန်းက သူ့ကို ရုံးခန်းထဲမှာ စောင့်နေပြီး ရှောက်လုံက ရိုးရိုးရှင်းရှင်း ပြောပြခဲ့သည်။ "ရှူးရှောင်မုန်က အမျိုးသမီးအဖွဲ့ရဲ့ အဖွဲ့ဝင်တစ်ဦးဖြစ်ပြီး သူမက ဒီလူတွေနဲ့ ကောင်းမွန်တဲ့ ဆက်ဆံရေးရှိတယ်။ သူမအမေက အရမ်းချစ်ကြောင်း သူမက မကြာခဏ ပြောလေ့ရှိတယ်။ မကြာသေးမီက သူမက ချစ်သူနဲ့ လမ်းခွဲခဲ့ပြီး ခွဲစိတ်မှုကနေ အနားယူနေရတာကြောင့် ဒီဖျော်ဖြေပွဲကို မသွားနိုင်တာ။"
ယွီဟန်ကျန်းက ခေါင်းငြိမ့်လိုက်သည်။ "ဒါဆို ရှူဖျင်ရဲ့စကားတွေက ပုံဖော်ထားတာပဲ။ သူမသမီးကို လီကျယ်မင်ရဲ့သားနဲ့ မိတ်ဆက်ပေးခဲ့တာက မမှန်ဘူး။"
ရှောက်လုံက ထပ်ပေါင်းပြောသည်။ "ဒါ့အပြင် သူတို့ကလည်း ရှူးရှောင်မုန်က အရမ်းလှပြီး ချစ်သူတစ်ယောက်ရှာဖို့ စိတ်ပူစရာမလိုဘူးလို့ ပြောတယ်။ ရှူဖျင်က သူမသမီးကို အရမ်းချစ်တာ။ လီကျယ်မင်ရဲ့သားက ပိုက်ဆံရှိရင်တောင် သူမသမီးကို မီးတွင်းထဲတွန်းချမှာမဟုတ်ဘူး။ ဒါ့အပြင် ဌာနမှာ လီကျယ်မင်ရဲ့ဂုဏ်သတင်းက ဆိုးရွားလွန်းတယ်။"
လူနှစ်ယောက်က တစ်ယောက်ကိုတစ်ယောက် တစ်ချက်ကြည့်လိုက်ပြီး ဖြစ်နိုင်ခြေတစ်ခုအကြောင်း တွေးနေမိသည်။
ယွီဟန်ကျန်းက တိုးတိုးပြောသည်။ "ရှူဖျင်ရဲ့သမီးက သူမရဲ့တုံ့ပြန်ချက်အတိုင်းအတာပဲ။"
ရှောက်လုံက ခေါင်းငြိမ့်လိုက်သည်။ "ရှူဖျင်သာ လီကျယ်မင်ကို တကယ်သတ်ခဲ့ရင် သတ်ပစ်ရတဲ့ အကြောင်းရင်းက သူမရဲ့ပျက်ကွယ်နေတဲ့ သမီးနဲ့ ဆက်စပ်မှု ရှိကောင်းရှိနိုင်တယ်။"
ရှူဖျင်သည် ခင်ပွန်းဆုံးပါးသွားပြီးနောက် သမီးဖြစ်သူကို တစ်ဦးတည်း ပြုစုပျိုးထောင်ခြင်းအတွက် ဂုဏ်ယူခဲ့ပြီး သမီးဖြစ်သူမှာ လှပပြီး ထူးချွန်သည်။ ရှူဖျင်သည် လီကျယ်မင်ကို ရိုးရှင်းစွာ အငြိုးထားမည်ဆိုပါက သူမသည် ယခုအချိန်အထိ စောင့်ဆိုင်းနေမည်မဟုတ်ပေ။ လီကျယ်မင်က သူမသမီးကို ထိခိုက်စေမည့်အရာ တစ်ခုခုလုပ်ခဲ့ပြီး သားသတ်သမား၏ဓားကို ကိုင်ဖို့ သူမ မစောင့်နိုင်ခဲ့ဘူး။
လီကျယ်မင်နဲ့ သူမသမီးကြားက ဆုံချက်က ဘာလဲ။
ယွီဟန်ကျန်းသည် မျက်မှောင်ကြုတ်ပြီး ခဏလောက်စဉ်းစားကာ ရုတ်တရက် ပြောလာသည်။ "ဒီခရီးစဉ်ကို လီကျယ်မင်ရဲ့သားက စီစဉ်ခဲ့တာ။ သက်ကြီးရွယ်အိုအဖွဲ့ရဲ့ မကျေနပ်ချက်တွေကို ကိုယ်တို့ အာရုံစိုက်ထားပေမဲ့ လျစ်လျူရှုထားမိတာက… သူတို့ရဲ့သားသမီး နာကျည်းစရာတွေဖြစ်နိုင်တယ်။"
ရှောက်လုံက ရုတ်တရက် လန့်သွားသည်။ "ဟုတ်တယ်။ အဲဒါကို အရင်ကထွက်ဆိုချက်တွေမှာ ဖော်ပြခဲ့တယ်။ နျိုတဖန်ရဲ့သားကို လီကျယ်မင်ရဲ့သားက အထက်တန်းကျောင်းမှာ မျက်လုံးဒဏ်ရာရအောင်လုပ်ခဲ့တယ်။ ရှူဖျင်ရဲ့သမီးက လီကျယ်မင်ရဲ့သားကြောင့် စိတ်ထိခိုက်ခဲ့တာ ဖြစ်ကောင်းဖြစ်နိုင်တယ်။ မကြာသေးမီက သူမက လူတစ်ယောက်နဲ့လမ်းခွဲခဲ့တယ်လို့ သူမသူငယ်ချင်းတွေပြောခဲ့တယ်။ ရှူးရှောင်မုန်က လီကျယ်မင်ရဲ့သားနဲ့ လမ်းခွဲခဲ့တာလား။'
ယွီဟန်ကျန်း: "…"
ပရော်ဖက်ဆာရှောက်၏ထင်မြင်ယူဆချက်မှာ ထိတ်လန့်စရာကောင်းသော်လည်း ၎င်းတွင် ကျိုးကြောင်းဆီလျော်မှုတချို့ရှိသည်။
သူက မျက်မှောင်ကြုတ်လိုက်သည်။ "မစ္စစ်မိန်၊ နျိုတဖန်၊ ကျန့်ဝေ့ကော်၊ လျှိုယွီမင်နဲ့ ရှူဖျင်၊ သူတို့အားလုံးက သူတို့ရင်ထဲမှာ ဖုံးကွယ်ထားတဲ့ အကြောင်းရင်းတွေရှိတယ်။ သူတို့က အချင်းချင်းကိုက်ပြီး အလိမ်အညာပြောကြပေမဲ့ သက်ကြီးရွယ်အိုအုပ်စုမှာ အခြားလူတွေရှိသေးတယ်။ သူတို့မှာ သဲလွန်စတွေ ရှိကောင်းရှိနိုင်တယ်။ ကိုယ်တို့ သူတို့ကို ပြန်ပြီး စစ်ဆေးမေးမြန်းဖို့လိုတယ်။"
ရှောက်လုံက ခေါင်းငြိမ့်ကာ သဘောတူလိုက်သည်။
ယွီဟန်ကျန်းက ရှူဖျင်နှင့် အတူနေသော အခန်း 3 က အဘွားအိုသုံးယောက်ကို လာဖို့တောင်းဆိုလိုက်သည်။ သူသည် သူတို့၏အတိတ်အကြောင်းနှင့် ရှူဖျင်၏ခင်ပွန်းနှင့် သမီးတို့ကို မေးမြန်းခဲ့သည်။
ပထမအဘွားအိုက ပြောသည်။ "ရှောင်ဖျင်ငယ်ငယ်တုန်းက သူမက ငါတို့ဌာနရဲ့ အလှဆုံးနဲ့ အရည်အချင်းအရှိဆုံးလူတစ်ယောက်ပဲ။ သူမက အကကိုလည်း လေ့လာတယ်။ သူမက လက်ရှိ အသက် 60 ရှိနေပေမဲ့ 40 လိုရုပ်ရည်ပဲ။ သူမက ကိုယ့်ကိုကိုယ်ကောင်းမွန်စွာ ထိန်းသိမ်းပြီး နေ့တိုင်း ဂါဝန်ဝတ်ဆင်တယ်။ သူမက သူမသမီးနဲ့ ခရီးသွားတဲ့အခါ အရမ်းခေတ်ဆန်ပြီးကြော့မော့တယ်။"
ယွီဟန်ကျန်းက မေးလိုက်သည်။ "သူမ ငယ်ငယ်တုန်းက ခင်ဗျားတို့ဌာနထဲက တစ်ယောက်ယောက်နဲ့ ချစ်ကြိုက်ဖူးလား။"
အဘွားအိုက ရုတ်တရက် အသံလျှော့ပြီး အတင်းပြောသည်။ "သူမက လီကျယ်မင်နဲ့တွဲနေတာလို့ ငါတို့အားလုံး ထင်ခဲ့ကြတာ။ အဲဒီအချိန်တုန်းက သူမနဲ့ လီကျယ်မင်က နေ့တိုင်း အတူသွား၊ အတူစားနဲ့ သူတို့ရဲ့ဆက်ဆံရေးက ကုမ္ပဏီမှာ အတော်လေးရင်းနှီးတယ်။ လီကျယ်မင်က မိန်းကလေးတွေကို အလွယ်တကူ ချော့မော့တတ်ပေမဲ့ သူက သူမကို တန်ဖိုးကြီးတဲ့ အလှကုန်ပစ္စည်းအစုံလိုက်တွေ ပို့ပေးတယ်… ဒါပေမဲ့ သူဌေးသမီးရောက်လာတော့ လီကျယ်မင်က ရုတ်တရက် သူဌေးသမီးနဲ့ အတူရှိသွားတယ်။"
ရှောက်လုံနှင့် ယွီဟန်ကျန်းတို့ အံ့သြသွားသည်။ ရှူဖျင်နှင့် လီကျယ်မင်တို့မှာ ခံစားချက်သမိုင်းကြောင်းရှိမည်ကို သူတို့ မမျှော်လင့်ထားခဲ့ကြပေ။
ယွီဟန်ကျန်းက တိုးတိုးပြောသည်။ "ရှူဖျင်နဲ့ သူဌေးသမီးတို့ရဲ့ ဆက်ဆံရေးကဘယ်လိုရှိလဲ။"
အဘွားအိုက ဆိုသည်။ "သူတို့ရဲ့ ဆက်ဆံရေးက အရမ်းရင်းနှီးတယ်။ သူမနဲ့ ရွေ့ရွေ့က ငယ်စဉ်ကတည်းက အတူတူကစားဖော်ကစားဖက်တွေ။ ရှူဖျင်က စာရင်းကိုင်ပညာကို သင်ယူခဲ့ပြီး ဘွဲ့ရပြီးနောက် ကုမ္ပဏီရဲ့ဘဏ္ဍာရေးဌာနကို တိုက်ရိုက်တက်နိုင်တဲ့ အကြောင်းရင်းက သူဌေးသမီးရဲ့ ထောက်ခံကြောင့်ပဲ။ သူဌေးသမီးက ဘွဲ့လွန်ကျောင်းတက်ခဲ့ပြီး သုံးနှစ်အကြာမှ ကုမ္ပဏီကို ရောက်လာတာ။ အဲဒီတုန်းက ရှူဖျင်က သူမအတွက် ကြိုဆိုပွဲကို အထူးစီစဉ်ပေးခဲ့တယ်။"
ယွီဟန်ကျန်းက တွေးဆသည်။ "လီကျယ်မင်လည်း ကြိုဆိုပွဲမှာ ပါခဲ့တာလား။ အဲဒါကြောင့် သူမက သူဌေးရဲ့ တစ်ဦးတည်းသော ကလေးမှန်း သိခဲ့တာလား။"
အဘွားအိုက ခေါင်းငြိမ့်သည်။ "ဟုတ်တယ်၊ ကုမ္မဏီတစ်ခုလုံးသွားကြတယ်။"
ယွီဟန်ကျန်းက ထပ်မေးပြန်သည်။ "လီကျယ်မင်ရဲ့ မွေးနေ့အကြောင်း ခင်ဗျားသိလား။"
အဘွားအိုက ခဏတာ ဂရုတစိုက် ပြန်လည်တွေးတောခဲ့သည်။ "ငါ ကောလဟာလတချို့တော့ ကြားတယ်။ လီကျယ်မင်က သူ့မွေးနေ့အတွက် လူငယ်လူရွယ်တွေအများကြီးကို သူ့အိမ်ဖိတ်ကြားခဲ့တယ်။ သူဌေးသမီးလည်း သွားခဲ့တယ်။ အဲဒီမွေးနေ့ပွဲမှာ လီကျယ်မင်နဲ့ သူဌေးသမီးတို့ ဆုံကြတာ။ ရှူဖျင်နဲ့ ဆက်ဆံရေးကောင်းတဲ့ တချို့လူတွေကတော့ သူမအတွက် ဒေါသထွက်ခဲ့တယ်။ လီကျယ်မင်က သူဌေးသမီးရဲ့ပိုက်ဆံကို စိတ်ဝင်စားတာလို့ သူတို့ထင်ခဲ့ကြပေမဲ့ ရှူဖျင်က သူမနဲ့ လီကျယ်မင်က သူငယ်ချင်းတွေပါပဲလို့ ပြောခဲ့တယ်။ စကားပြောရုံနဲ့ ပရမ်းပတာ ဖြန့်လို့မရဘူး။ အဲဒီနောက် လီကျယ်မင်နဲ့ သူဌေးသမီးက အမြန်လက်ထပ်လိုက်တယ်။ ရှူဖျင်က တက်ရောက်ခဲ့ပြီး ရွေ့ရွေ့ကို မင်္ဂလာဆောင်လက်ဖွဲ့အဖြစ် တန်ဖိုးကြီးတဲ့လက်ဝတ်ရတနာပေးခဲ့တယ်။"
ရှောက်လုံက တွေးရင်း စာမှတ်နေခဲ့သည်။
သူ့ထင်မြင်ချက် မှန်ကန်ပါက ရှူဖျင်သည် လှပပြီး လီကျယ်မင်က သူမနှင့် အချိန်အတော်ကြာ လျှို့ဝှက်ဆက်ဆံရေးရှိနေကြောင်း မြင်နိုင်ဖွယ်ရှိသည်။ ရလဒ်အနေဖြင့် သူသည် သူဌေးသမီး၏ကုတင်ပေါ်တက်ကာ ရှူဖျင်ကို ကန်ထုတ်ခဲ့သည်။ သူသည် သူ့မွေးနေ့ပွဲကို အခွင့်ကောင်းယူ၍ သူဌေးသမီးနှင့် အိပ်ခဲ့သည်။
ရှူဖျင်သည် သူမ၏ရင်ထဲတွင် မကျေမချမ်း ခံစားရသော်လည်း ၎င်းမှာ သူမနှင့် ကြီးပြင်းလာသည့် သူငယ်ချင်းဖြစ်ပြီး သူမလည်း အလုပ်ဆက်လုပ်ချင်နေခဲ့သည်။ အတိုချုပ်ပြောရလျှင် သူမသည် ၎င်းကိုမျိုသိပ်လိုက်ပြီး သူမနှင့် လီကျယ်မင်တို့က သာမန်သူငယ်ချင်းများသာဖြစ်ကြောင်း ရှင်းပြခဲ့သည်။ သူမ၏ အချစ်ဆုံးသူငယ်ချင်းနှင့် ရည်းစားဟောင်း၏ မင်္ဂလာပွဲကို တက်ရောက်ရင်း ပြုံးနေခဲ့သည်။
ယွီဟန်ကျန်းက မေးသည်။ "သူမက ဘယ်သူနဲ့ လက်ထပ်ခဲ့တာလဲ။"
အဘွားအို: "ဆရာဝန်တစ်ယောက်နဲ့ပဲ။ ဆရာဝန်က သူမကို နှိပ်စက်ပုံရတယ်။ သူမလက်ထပ်ပြီးတဲ့အခါ သူမရဲ့ခန္ဓာကိုယ်က အမြဲလိုလို ဒဏ်ရာတွေရရှိနေတာကို တွေ့ခဲ့ရတယ်။ သူမက ချော်လဲတာလို့ပြောပေမဲ့ ဘယ်သူမှ မယုံဘူး။ ဒါပေမဲ့ မေးဖို့ကလည်း မလွယ်ကူဘူးလေ။ ရှူဖျင်က သူမမျက်နှာကို ထိန်းသိမ်းရတာကို သဘောကျတယ်။"
ယွီဟန်ကျန်းက တွေးဆသည်။ "သူမခင်ပွန်းက ဘယ်တုန်းက ဆုံးသွားတာလဲ။"
အဘွားအိုက ခေါင်းခါသည်။ "ငါမသိဘူး။ ကုမ္ပဏီမှာ သူမခင်ပွန်းအကြောင်း တစ်ခါမှ မပြောဖူးဘူး။ ဟုတ်သား၊ နင်တို့ လောင်ကျန်းကို မေးလို့ရတယ်။ သူမနဲ့ ရှူဖျင်တို့က ဆက်ဆံရေးကောင်းပြီး အငြိမ်းစားယူပြီးတော့ နေ့တိုင်း မာကျောက်ကစားကြတယ်။ သူမက ပိုရှင်းရှင်းလင်းလင်း သိနိုင်လိမ့်မယ်။"
ယွီဟန်ကျန်းက သူမကို ပြန်ပို့ပြီး ဒေါ်လေးကျန်းကို ခေါ်ခိုင်းလိုက်သည်။
ဒီအဘွားအိုက သိပြီး သက်ပြင်းချလိုက်သည်။ "သူမယောင်္ကျားက တကယ်ကြောက်စရာကောင်းတယ်။ မူးလာတဲ့အခါ သူမက ရိုက်နှက်ခံရပြီး ဝေဒနာ ခံစားခဲ့ရတယ်။ နောက်တော့ သုံးနှစ်အကြာမှာ သူမခင်ပွန်းသည်က အစာအိမ်ကင်ဆာနဲ့ ကွယ်လွန်သွားတယ်။ တစ်ယောက်ယောက်က သူမကို blind date လုပ်ဖို့ မိတ်ဆက်ပေးခဲ့ပေမဲ့ နောက်ထပ်အိမ်ထောင်မပြုတော့ဘူးလို့ ပြောခဲ့တယ်။"
ယွီဟန်ကျန်းက မေးလိုက်သည်။ "ရှူးရှောင်မုန်က သူမခင်ပွန်းနဲ့ရတဲ့ ရှူဖျင်ရဲ့သမီးလား။"
အဘွားအိုက ခေါင်းခါသည်။ "မဟုတ်ဘူး၊ သူမ တစ်ခါမှ ကလေးမမွေးဖူးဘူး။ သူမခန္ဓာကိုယ်မှာ ပြဿနာရှိပုံရတယ်။ ခင်ပွန်းဆုံးပြီးနောက်မှာ သမီးဖြစ်သူကို မွေးစားဖို့ မိဘမဲ့ဂေဟာကို သွားပြီး သူမသမီးဖြစ်သူက သူမမျိုးရိုးအမည်ကို ယူခဲ့တယ်။ ဒီအကြောင်းကို လူတော်တော်များများက မသိကြဘူး။ သူမသမီးလေးက ထက်မြက်တယ်၊ ချောမောလှပတယ်၊ အဓိကတက္ကသိုလ်တက်ခွင့်ရပြီး သားသမီးဝတ္တရားကျေပွန်တာ။ ရှူဖျင်က အရမ်းဂုဏ်ယူခဲ့တာ။"
ယွီဟန်ကျန်းက ဆက်မမေးခင် ခဏလောက် နှုတ်ဆိတ်နေခဲ့သည်။ "သူမသမီးက လီကျယ်မင်းရဲ့သားကို သိလား။"
အဘွားအိုက တွေးကြည့်သည်။ "ငယ်ငယ်တုန်းကတော့ မသိဘူး။ လီကျယ်မင်က မြို့ရဲ့အနောက်ဘက်မှာ နေထိုင်ပြီး သူမက မြို့အရှေ့ဘက်မှာ နေထိုင်တာ။ ကလေးနှစ်ယောက်က အတူတူ ကျောင်းမသွားဘူး။ ဒါပေမဲ့ သူတို့ ကြီးပြင်းလာချိန်မှာတော့ ငါမသိဘူး။"
ယွီဟန်ကျန်းက ထပ်ပေါင်းပြောသည်။ "ဒေါ်လေးရှူက သူမသမီးမှာ ချစ်သူရှိတယ်လို့ ပြောဖူးလား။"
အဘွားအိုက ပြန်ဖြေသည်။ "ပြောတယ်၊ လွန်ခဲ့တဲ့ ခြောက်လလောက်က ငါတို့ မာကျောက်ကစားတဲ့အခါ သူမသမီးက အရမ်းကောင်းတဲ့ ချစ်သူကို ရှာတွေ့ထားတယ်လို့ ပြောခဲ့တယ်။ သူက ရုပ်ချောပြီး ချမ်းသာတယ်။ သူမရဲ့မွေးနေ့ကို သူမသမီးရဲ့ချစ်သူကသိပြီး သူ့အနာဂတ်ယောက္ခမအတွက် အရမ်းဈေးကြီးတဲ့ အိတ်တစ်လုံး ပေးခဲ့တယ်။ သူမက အဲဒါကို သဘောကျလို့ နေ့တိုင်းသယ်သွားတယ်။"
"သူမသမီးက လမ်းခွဲလိုက်ပြီဆိုတာ သူမပြောသေးလား။"
အဘွားအိုက အံ့သြစွာကြည့်သည်။ "နင်ဘယ်လိုသိတာလဲ။"
ယွီဟန်ကျန်းက မဖြေဘဲ မေးလိုက်သည်။ "သူမ တကယ်ပြောတာလား။"
အဘွားအိုက ဝမ်းနည်းစွာ ခေါင်းငြိမ့်သည်။ "လွန်ခဲ့တဲ့ သုံးလလောက်က စူပါမားကတ်မှာ ငါသူမကိုတွေ့တော့ ကြက်သား၊ ဘဲနဲ့ ငါးတွေ အများကြီးဝယ်တာတွေ့တယ်။ သူမဘာလို့ ဒီလောက်ပစ္စည်းတွေ အများကြီးဝယ်နေတာလဲလို့ မေးလိုက်တော့ သူမသမီးက သူမချစ်သူကိုအိမ်ကို အလည်လာဖို့ ခေါ်ထားတာကြောင့် ပြင်ဆင်ဖို့အတွက်လို့ သူမက ပျော်ပျော်ရွှင်ရွှင် ပြောခဲ့တယ်။ ရလဒ်ကတော့ ငါတို့တွေ နောက်ထပ်မတွေ့ဖြစ်တော့ဘူး။ နောက်နေ့ကျတော့ ငါသူမကို အဲဒီချစ်သူအကြောင်းမေးတော့ သူတို့နှစ်ယောက်က မသင့်တော်လို့ လမ်းခွဲလိုက်တာလို့ ပြောတယ်။ သူတို့က ရုတ်တရက် ဘယ်လိုလုပ်လမ်းခွဲလိုက်တာလဲဆိုတာ ငါလည်းသိချင်သွားတယ်။"
အဘွားအိုသည် ဒေါ်လေးရှူနှင့် ဆက်ဆံရေးကောင်းပြီး သူမသိသမျှ အတင်းအဖျင်းများကို ပြောပြသည်။
ဤနေရာ၌ အကြောင်းအရာများက ပိုမိုရှင်းလင်းလာသည်။
ယွီဟန်ကျန်းက အမှုကို အေးဆေးစွာ ခွဲခြမ်းစိတ်ဖြာသည်။ "ဒီကိစ္စမှာ ရထားပေါ်မပါတဲ့သူ နှစ်ယောက်ရှိတယ်။"
"တစ်ယောက်က လီမော့လို့ခေါ်တဲ့ လီကျယ်မင်ရဲ့သားပဲ။ နောက်တစ်ယောက်က ရှူဖျင်ရဲ့သမီး ရှူးရှောင်မုန်ပဲ။"
"လူငယ်နှစ်ယောက်က သူတို့မိဘတွေကြား ပြင်းထန်တဲ့ရန်ငြိုးရန်စကို မသိခဲ့ကြဘူး။ တစ်ယောက်နဲ့တစ်ယောက် မတော်တဆသိပြီး ချစ်မိသွားကြတယ်။ အဘွားအိုနဲ့ အမျိုးသမီးသူငယ်ချင်းအုပ်စုရဲ့ စကားတွေကို အခြေခံပြီး ယောင်္ကျားလေးက သူ့ရဲ့ရိုးသားမှုကို ပြသဖို့ အရမ်းစျေးကြီးတဲ့ အိတ်တစ်လုံးကို သူ့ကောင်မလေးရဲ့ အမေကို ပေးခဲ့တယ်။ သူတို့လမ်းခွဲပြီးနောက် မိန်းကလေးက သူမသူငယ်ချင်းတွေရဲ့နေရာကို သွားပြီး အကြာကြီး ငိုခဲ့တယ်။ သူတို့နှစ်ယောက်ကြားက ဆက်ဆံရေးက အရမ်းကောင်းတာတွေ့ရတယ်။"
ရှောက်လုံက သူ့စကားတိုင်း လိုက်ခဲ့သည်။ "လွန်ခဲ့တဲ့သုံးလလောက်က လီမော့က သူ့ယောက္ခမဆီ အလည်လာခဲ့ပြီး ရုတ်တရတ် ပွက်လောရိုက်သွားတာလား။"
ယွီဟန်ကျန်းက ခေါင်းငြိမ့်လိုက်သည်။ "သူမသမီးရဲ့ချစ်သူက သူမကို စွန့်ပစ်ပြီး သူမသူငယ်ချင်းကို နာကျင်စေခဲ့တဲ့ လီကျယ်မင်ရဲ့သားဖြစ်တာကို ရှူဖျင်သိလိုက်ရတယ်။ ဒါက လုံးဝမထင်မှတ်ထားတဲ့ဖြစ်ရပ်ပဲ။ သူမက လူယုတ်မာတစ်ယောက်ရဲ့သားနဲ့ သူမသမီးကို သေချာပေါက် သဘောတူမှာမဟုတ်ဘူး။ ဒါပေမဲ့ လမ်းခွဲတာက ရှူဖျင်ရဲ့အကြံအစည်လား၊ လီကျယ်မင်က သူတို့ကို တမင်တကာ လမ်းခွဲခိုင်းတာလား မသေချာသေးဘူး။"
ယွီဟန်ကျန်းက သူ့မေးစေ့ကို ထိလိုက်သည်။ "လွန်ခဲ့တဲ့ သုံးလလောက်က သူတို့ လမ်းခွဲခဲ့တာတွေက အတိတ်ကအကြောင်းအရာတွေအများကြီးပါဝင်နေတယ်ဆိုတာ ကိုယ်တို့သေချာသိနိုင်တယ်။ အဲဒီကိစ္စကြောင့် လီမော့က သူ့အမေဟာ သူ့မိထွေးဖြစ်နေပြီး သူ့အမေအရင်းကို သူ့အဖေက အဓမ္မပြုကျင့်ခဲ့တယ်ဆိုတာ သိသွားနိုင်တယ်။"
"လီမော့က သူ့အဖေရဲ့ ကုမ္ပဏီကို အရှိန်အဟုန်နဲ့ မြင့်တင်နိုင်ပြီး ငွေရှာဖို့အတွက် အိမ်ခြံမြေမှာလည်း ရင်းနှီးမြုပ်နှံနိုင်တယ်။ သူက အမြော်အမြင်ကြီးပြီး ဉာဏ်ရည်ထက်မြက်တဲ့ လူငယ်တစ်ယောက်ဆိုတာ သိသာတယ်။ သူက ငုတ်တုတ်ထိုင်ပြီး ဘာမှမလုပ်ဖို့ဆိုတာ သေချာပေါက် မဖြစ်နိုင်ဘူး။"
ရှောက်လုံက စက္ကန့်အနည်းငယ်မျှ တိတ်ဆိတ်သွားသည်။ "သူပြန်သွားတဲ့အခါ အဲဒီနှစ်ရဲ့ အမှန်တရားကို အမြန်သိလိုက်နိုင်တယ်။ သူ့အမေနဲ့ အဘိုး သေဆုံးတာက မရိုးရှင်းဘူးဆိုတာ သူရှာတွေ့ကောင်းရှာတွေ့နိုင်တယ်။ အခြားအဖြစ်အပျက်တွေနဲ့ သူ့အဖေအပေါ် ရွံရှာမှုနဲ့ အမုန်းတရားတွေက အဆုံးစွန်ကို တွန်းပို့ခဲ့တယ်။ သူက လီကျယ်မင်ကို ရှင်းပစ်ဖို့ စိတ်ပိုင်းဖြတ်ထားတာကြောင့်… ဒီခရီးစဉ်ကို စီစဉ်ခဲ့တယ်။"
ယွီဟန်ကျန်းသည် ရှောက်လုံ၏ခန့်မှန်းချက်ကို ခေါင်းငြိမ့်လိုက်သည်။ သူတို့နှစ်ယောက်က အဲဒါကို တွေးပြီး အခုလက်ရှိ သဲလွန်စတွေကို ပေါင်းစပ်လိုက်သောအခါ ဒါက အသင့်လျော်ဆုံး ခန့်မှန်းချက်ပါပဲ။
လီကျယ်မင်သည် လူယုတ်မာဖြစ်နိုင်သော်လည်း သူက လီမော့၏အဖေဖြစ်နေဆဲဖြစ်သည်။ သူသည် ဖခင်သတ်သူအဖြစ် ပြစ်မှုမကျူးလွန်နိုင်သောကြောင့် ဒီလူကိုသတ်ရန် ဓားငှားပေးခဲ့သည်။ သူသည် လီကျယ်မင်နှင့် အမုန်းပွားနေသူအားလုံးကို တစ်အုပ်စုတည်းတွင် စီစဉ်ခဲ့သည်။
အေမလုပ်ရင် ဘီလုပ်မည်၊ ဘီမလုပ်ဘူးဆိုရင် စီနှင့်ဒီရှိသည်။ လီကျယ်မင်က သူ့ကို ထားသွားသည့်အချိန်ဖြစ်ကောင်းဖြစ်နိုင်သလို လီမော့က သူ့အဖေ၏ခရီးစဉ်သည် ငရဲပြည်သို့ ရထားဖြစ်မယ်ဆိုတာ သိသည်။ ပြန်လမ်းမရှိဘူး။
#TK
