Chapter 53

👥️Chapter 53

ချင်နွော်ရှီ၏ မျက်ဝန်းထက်တွင် အံ့ဩမင်သက်မှုနှင့် မယုံနိုင်သည့် အရိပ်အယောင်တို့ ဖြတ်သန်းသွားတော့၏။ သူက ဝန်ခံခြင်း မပြုသလို ငြင်းဆန်ခြင်းလည်း မပြုခဲ့ပေ။ ထိုကဲ့သို့ အသံတိတ်နေခြင်းကပင်လျှင် ရှန်သုန်းဟောင့်၏ စကားများကို ထောက်ခံသည့်သဘော သက်ရောက်နေတော့သည်။ 

“ဘာလို့ ငါ့ကို မပြောခဲ့တာလဲ ငါ့ကို အဲဒီ့လောက်တောင် မယုံခဲ့တာလား ...”

ရှန်သုန်းဟောင့်က မျက်ခုံးနှစ်ဖက်လုံး ထိကပ်တော့မတတ် စုတွန့်ကာ ပြောလိုက်သည်။ 

ချင်နွော်ရှီက သူ့ကို တည်ငြိမ်စွာဖြင့် စိုက်ကြည့်ရင်း ပြန်ဖြေလိုက်သည်။ 

“မင်းကို ယုံပါတယ် ...”

သို့သော် ရှန်သုန်းဟောင့်ကမူ အေးစက်စွာသာ လှောင်ရယ်လိုက်၏။ သူ့အတွက်မူ ထိုစကားမှာ ယုံချင်ဖွယ် မကောင်းသည့် ပြက်လုံးတစ်ခုအလားပင်။ 

“ပြောရမှာတော့ အားနာပါတယ် ..  ဒါပေမယ့် .. ချင်နွော်ရှီ ငါကတော့ မင်းရဲ့ ယုံကြည်မှုကို နည်းနည်းလေးတောင် မခံစားမိဘူး မင်း အခုအတိုင်းပဲ ဘာတစ်ခွန်းမှ မပြောဘဲ ဆက်ပြီး ဖုံးကွယ်ထားချင်လည်း ရတယ် ထွက်သွားချင်တယ်ဆိုလည်း ငါတို့မျက်စိရှေ့ကို ပြန်ရောက်မလာဘဲ ပျောက်သွားလေ ဒါပေမယ့် အခုကျ ...  မင်း ဘာလုပ်ခဲ့လဲ ပြန်ပေါ်လာရုံတင် မကဘူး ယန်ကျွယ့်ကို မှီခိုပြီးတော့ပါ ...”

“သူ့ကို အပုပ်မချနဲ့ .. ဒီကိစ္စက မင်းနဲ့ငါ့ကြားက ပြဿနာ ...”

ချင်နွော်ရှီက တစ်ဖက်လူ၏ စကားများကို အညှာအတာမဲ့စွာဖြင့် ဖြတ်ပြောလိုက်သည်။ 

ရှန်သုန်းဟောင့်က သူ့အပေါ် မည်မျှပင် အထင်အမြင် လွဲမှားနေပါစေ အခြားသူကိုပါ ဆွဲထည့်သည့် လုပ်ရပ်ကို လုံးဝ လက်သင့်ခံမည် မဟုတ်ချေ။ အထူးသဖြင့် ယန်ကျွယ့်အား ဆွဲထည့်ခြင်းကို လုံးဝ လက်မခံလိုပေ။ 

“ဟမ့် .. ယန်ကျွယ့်လို့ ကြားလိုက်တာနဲ့ကို ခံစားချက်တွေ ဖြစ်လာလိုက်တာများ .. ထင်ထားသလိုပဲ မင်းနဲ့ သူက ...”

ထိုစဉ် ထွက်ပေါ်လာသည့် တံခါးခေါက်သံက ရှန်သုန်းဟောင့်၏ စကားများကို နောက်တစ်ကြိမ် ကြားဖြတ်လိုက်ပြန်သည်။  

“နွော်ရှီ .. မင်း အထဲမှာလား ...”

ဤတစ်ကြိမ် ရောက်လာသူမှာ ယန်အန်းယု ဖြစ်ပေသည်။ 

တံခါးကို ဖွင့်ကာ ဝင်လာပြီးနောက် အထဲတွင် ရှန်သုန်းဟောင့်လည်း ရှိနေကြောင်း သိလိုက်ရသည့်အခါ ယန်အန်းယု သိသိသာသာပင် အံ့ဩသွားမိ၏။ 

အနေရခက်သည့် အခြေအနေကို ရှောင်လွှဲရန် အလို့ငှာ သူက ရှန်သုန်းဟောင့်ကို လက်ဝှေ့ယမ်း၍ နှုတ်ဆက်လိုက်သည်။ သို့သော် ရှန်သုန်းဟောင့်ကမူ သူ့ကို အကြည့်တစ်ချက်ပင် မပေးဘဲ အခန်းထဲမှ ထွက်သွားတော့သည်။ 

“နွော်ရှီ .. မင်းတို့တွေ စကားပြောနေကြမှန်း သိထားရင် ငါ မလာလိုက်ပါဘူး ...”

သူသည် ရှန်သုန်းဟောင့်နှင့် ချင်နွော်ရှီ၏ အတိတ်အကြောင်းကို တချို့တစ်ဝက်ခန့် ကြားလိုက်သည့်တိုင် ချင်နွော်ရှီအား အခက်တွေ့အောင် လုပ်မိမည်ကို စိုးရိမ်စိတ်ကြောင့် ပြုံးရုံသာ ပြုံးပြလိုက်တော့သည်။ ထိုအကြောင်းကို ချင်နွော်ရှီဘက်မှ ထုတ်မပြောသရွေ့ သူကလည်း စတင်ကာ ပြောလိမ့်မည် မဟုတ်ချေ။

“ကိစ္စမရှိပါဘူး ...”

ချင်နွော်ရှီက ခေါင်းကိုသာ ယမ်းပြလိုက်သည်။ 

“နောက်ကျနေပြီ .. အမြန် သိမ်းဆည်းပြီး လီရှုကို သွားတွေ့ကြရအောင်လေ ...”

ယန်အန်းယု “အင်း ...”

ယခုလက်ရှိ အချိန်များတွင် ယန်အန်းယုနှင့် ကောလီရှုတို့ နှစ်ဦးစလုံးသည် အလုပ်သင်ဆင်းသည့် အဆင့်သို့ ရောက်နေကြပြီ ဖြစ်သည့်အတွက် ကျောင်းစာပမာဏမှာလည်း သိသိသာသာ နည်းပါးသွားသည်။ ဖျော်ဖြေရေးမေဂျာကို အထူးပြုယူထားသူများအနက် အနည်းအကျဉ်းသော ပမာဏမှအပ ကျန်ကျောင်းသားများသည် အနုပညာလောကသို့ ဝင်ရောက်ရန် ရည်ရွယ်ထားကြသူများ ဖြစ်သည့်အတွက် ပွဲဦးထွက်နိုင်မည့် အခွင့်အရေးကို အမိအရ ဖမ်းဆုပ်ရန် အလို့ငှာ အမျိုးမျိုးသော လူရွေးပွဲနှင့် အဆိုပြိုင်ပွဲများကို ဝင်ရောက်ယှဉ်ပြိုင်ရန် အသည်းအသန် ကြိုးစားနေကြပေသည်။ 

ကောလီရှု၏ နောက်ခံမှာ မဆိုးလှသည့်အပြင် "မနက်ဖြန်များ၏အသံ" ပြိုင်ပွဲ၌ ထိပ်ဆုံးပြိုင်ပွဲဝင် ဆယ်ဦးစာရင်းထဲ၌လည်း ပါဝင်ခဲ့ဖူးသည့်အတွက် သူသည် ရွယ်တူများအကြားတွင် အနည်းငယ် နာမည်ကြီးသူဟုပင် သတ်မှတ်နိုင်သည်။ ရှန်းဟွမ်ကဲ့သို့သော နာမည်ကြီး ကုမ္ပဏီသို့ မဝင်ရောက်နိုင်ခဲ့သည့်တိုင် သူနှင့် ပိုမိုသင့်လျော်သည့် စီမံခန့်ခွဲရေးကုမ္ပဏီတစ်ခုနှင့် ချောချောမွေ့မွေ့ လက်တွဲနိုင်ခဲ့သည်။ 

ယန်အန်းယုက ရသစုံရှိုး ရိုက်ကူးရင်း အလုပ်များနေခဲ့စဉ်တွင် ကောလီရှုသည်လည်း အားလပ်မနေခဲ့ချေ။ ကုမ္ပဏီ၏ လေ့ကျင့်ရေး သင်တန်းသားတစ်ဦးအနေဖြင့် အကလေ့ကျင့်ရေး ခန်းမထဲတွင်သာ အချိန်အများစုကို ကုန်ဆုံးခဲ့ရကာ ပွဲဦးထွက်ရန် လိုအပ်သည့် အဆိုအကစွမ်းရည်များအား အခြေခံခိုင်မာအောင် ကြိုးစားလေ့ကျင့်နေခဲ့ရသည်။ 

*****

S မြို့တော် အနောက်ဘက်ခရိုင်ရှိ .. ချင်နွော်ရှီ အလုပ်လုပ်ခဲ့ဖူးသော ဘား၌ .. 

တစ်ဦးနှင့်တစ်ဦး မတွေ့ဆုံဖြစ်သည်မှာ အလွန် ကြာမြင့်နေပြီ ဖြစ်သည့်အတွက် ယန်အန်းယု၊ ချင်နွော်ရှီနှင့် ကောလီရှုတို့သည် အားလပ်ချိန်တစ်ခု သတ်မှတ်ကာ ထိုဘားတွင် တွေ့ဆုံရန် ချိန်းဆိုလိုက်ကြသည်။ 

သူတို့ကို တွေ့လိုက်သည်နှင့် တစ်ပြိုင်နက် ချင်နွော်ရှီနှင့် မတွေ့ဖြစ်သည်မှာ အလွန် ကြာနေပြီဖြစ်သည့် အဖျော်ဆရာ ခိုင်လီက သူတို့ကို ဝမ်းသာအားရ နှုတ်ဆက်ကာ ကြိုဆိုသည့်အနေဖြင့် တစ်ခွက်စီ အခမဲ့ ဧည့်ခံလိုက်သည်။

ဖြတ်သွားဖြတ်လာများက သတိပြုမိသွားမည်ကို မလိုလားသည့်အတွက် သုံးဦးစလုံးသည် သာမန် ထသွားထလာဝတ်စုံများကို ဝတ်ဆင်ကာ ရုပ်ဖျက်လာခဲ့ကြသည်။ ကောလီရှုက ချင်နွော်ရှီ၊ ယန်အန်းယုတို့နှင့် ခွက်ချင်း တိုက်ကာ ခပ်ပြုံးပြုံး မေးမြန်းလိုက်၏။ 

“မင်းတို့နှစ်ယောက်က အခုဆို နာမည်ကြီးတွေ ဖြစ်နေကြပြီနော် .. ငါ မင်းတို့ပေါင်ကို ဖက်ထားချင်လို့ ခွင့်ပြုပေးမှာလား ...”

ယန်အန်းယုက မျက်ခုံးကို ပင့်ပြကာ ဂုဏ်ယူဝံ့ကြွားစွာဖြင့် ပြောလိုက်သည်။ 

“လာ ..လာ .. လာ ငါလည်း ခြေထောက်တင်ဖို့ ခုံ လိုနေတာနဲ့ အတော်ပဲ ...”

“လစ်လိုက်စမ်း ...”

“ဒီသခင်လေးက မင်းကို ဝတ္တရားအရ ချီးကျူးပေးတာကို တကယ်ကြီး သွေးနားထင် ရောက်ပြနေတယ်ပေါ့လေ ...”

“သခင်လေးကောရေ ကျွန်တော်ကလည်း နည်းနည်းလေးပဲ ထုတ်ကြွားရသေးတာပါနော် .. ဟားဟား ...”

အားရပါးရ ရယ်မောနေသူနှစ်ဦးကို ငေးကြည့်ရင်း ချင်နွော်ရှီ၏ နှုတ်ခမ်းများသည်လည်း သိသိသာသာ ကော့တက်လာတော့သည်။ 

“လီရှုတောင် ဟာသတွေ ပြောတတ်နေပြီပဲ ကြည့်ရတာ မင်းတို့တွေ အကုန်လုံး တော်တော်လေး အဆင်ပြေနေကြတယ် ထင်တယ် ...”

“အင်း ..  လီရှုရေ ငါတို့ကို အပေါ်ယံလေးပဲ ကြည့်မနေနဲ့ကွ တကယ်တမ်းကျလေ နာမည်ကြီးလာလေ ပြဿနာ များလာလေပဲ ...”

ထိုစကားကို ကြားလိုက်သည့်အခါ ကောလီရှုသည် အံ့ဩမိသွားကာ သိလိုစိတ် အပြည့်ဖြင့် မေးလိုက်သည်။ 

“အိုး . ဘယ်တုန်းကမှ မစိုးရိမ်ခဲ့ဖူးတဲ့ ရှောင်ယုလေးတောင် ပြောင်းလဲသွားပြီပဲ .. တစ်ခုခု ဖြစ်ခဲ့လို့လား ငါတို့အားလုံးက ညီအစ်ကိုကောင်းတွေပဲဟာ ပွင့်ပွင့်လင်းလင်း ပြောလိုက် ...”

“ဟီးဟီး .. မင်းတို့လည်း လက်တွဲဖော် ရှာတွေ့သွားရင် နားလည်လာလိမ့်မယ် ...”

ယန်အန်းယုက တစ်ကိုယ်တည်းခွေးလေး ကောလီရှုကို ပုခုံးပုတ်ပေးရင်း ပြောလိုက်သည်။ 

“အင်း ...”

ချင်နွော်ရှီကလည်း ထောက်ခံလိုက်၏။ 

“ဟမ် .. ဘာကြီး ..  မင်းတို့ကောင်တွေ နှစ်ယောက်စလုံး ...”

ကောလီရှု အလွန်အမင်း တုန်လှုပ်သွားရ၏။ သူတို့ ရောက်နေသည့် နေရာအကြောင်း တွေးမိသည့်နောက်တွင် ထိုကိစ္စနှင့် ပတ်သက်၍ များများစားစား မပြောရဲတော့သည့်အတွက် ဒေါသတကြီးသာ ဆူပူလိုက်သည်။ 

“မုန်းစရာ ကောင်းလိုက်တာ .. ငါ မင်းတို့ကောင်တွေကို .. အသေကို သတ်ပစ်ချင်နေပြီ ...”

“အချစ်စစ်ကို မီးနဲ့ ရှို့ပစ်လို့ မရဘူးကွ ...”

“အချစ်စစ်ဆိုတာ သေချာလို့လား ...”

ကောလီရှုက အသံကို အတတ်နိုင်ဆုံး တိုးစေကာ မေးလိုက်သည်။ 

“ရှောင်ယု မင်းပြော .. တစ်ဖက်လူက ဘယ်သူလဲ ဘယ်ကတည်းက စတွဲနေကြတာလဲ .. လိင်ကိစ္စအရှုပ်အရှင်းထဲ မပါအောင်လည်း ဂရုစိုက်ဦးနော် ...”

“အင်း ..  အင်း ငါ သေချာ ဂရုစိုက်မှာပါ .. ဒါက လျှို့ဝှက်ချက်နော် ...”

“မင်းက နည်းနည်းလေးမှကို မရိုးသားဘူးပဲ ...”

ကောလီရှုက နှုတ်ခမ်းကို တွန့်ကွေးကာ လက်ကိုသာ ယမ်းပြလိုက်တော့သည်။ 

“ထားပါ ဘာပဲဖြစ်ဖြစ် ဒီသခင်လေးကလည်း ဒါမျိုး အတင်းအဖျင်းတွေကို စိတ်မဝင်စားပါဘူးနော် ...”

ချင်နွော်ရှီမှာ မျက်ဝန်းများပင် ကွေးညွတ်သွားတော့၏။ 

“ကြည့်ရတာ သခင်လေးကောကတော့ နယ်ပယ်ပေါင်းစုံမှာကို ကြိုးစားရတော့မှာပဲ ...”

“...”

ကောလီရှု ပို၍ပင် မွန်းကြပ်သွားရရှာ၏။ 

****

ပရိုဂရမ်တွင် ပါဝင်မည့် တင်ဆက်သူအချို့တွင် အရေးကြီး ကိစ္စများ ရှိနေသည့်အပြင် ထုတ်လုပ်ရေးအဖွဲ့၌လည်း အရေးပေါ် ပြင်ဆင်စရာများ ရှိနေသည့်အတွက် “Challenge First Time” ၏ ထုတ်လွှင့်ပြသမှုမှာ တစ်ပတ်ခန့် နှောင့်နှေးသွားကာ အစီအစဉ်၏ သတ္တမအပိုင်းကို နောက်တစ်ပတ်မှသာ ထုတ်လွှင့်ပြသရန် ဖြစ်လာလေသည်။ 

ထို့အပြင် “သောင်ရှင်း” ဇာတ်လမ်းတွဲမှာလည်း ထုတ်လွှင့်ပြသရန် လက်တစ်ကမ်းအလိုသို့ ရောက်ရှိလာတော့သည်။ အမျိုးမျိုးသော ပရိုမိုးရှင်းအစီအစဉ်များကိုလည်း မကြာမီ ပြုလုပ်ဆောင်ရွက်တော့မည် ဖြစ်သည့်အလျောက် ယန်အန်းယုသည် ရသစုံရှိုး ရိုက်ကူးရေး နှောင့်နှေးသည့် အချိန်တွင် ရုပ်ရှင်ပရိုမိုးရှင်းအတွက် အချိန်ပေးလိုက်သည်။

*****

S မြို့၏ ပင်မစုဝေးရေး ဧရိယာတွင် ..  

ယီချန်းယန်တွင် အလုပ်ရှိနေသည့်အတွက် ယနေ့ ပရိုမိုးရှင်း အစီအစဉ်များကို ပါဝင်နိုင်တော့မည် မဟုတ်၊ သို့သော် ကျန်သရုပ်ဆောင်များကမူ တစ်ယောက်မကျန် စုံညီစွာ ရောက်ရှိနေကြပေသည်။ 

နှစ်လနီးပါးခန့် မတွေ့ခဲ့ရသည့်အတွက် စုချင်ကျားသည် ယန်အန်းယုကို တွေ့လိုက်သည်နှင့်တစ်ပြိုင်နက် နွေးနွေးထွေးထွေး ပွေ့ဖက်နှုတ်ဆက်ကာ စိတ်ဝင်စားဖွယ် ပုံတိုပတ်စများစွာကို တရစပ် ပြောပြလာတော့သည်။ သူမသည် ယန်အန်းယုကို အလွန် သဘောကျသူ ဖြစ်သည့်အလျောက် သူငယ်ချင်း အရင်းအချာတစ်ဦးနှယ် ခင်ခင်မင်မင် ဆက််ဆံတတ်ပေသည်။ 

“သောင်ရှင်း” ရိုက်ကူးရေးအဖွဲ့၏ ဝန်ထမ်းများနှင့် သရုပ်ဆောင်များ၊ ကြော်ငြာကိုယ်စားလှယ်များသာမက လန်ရှစ်ကုမ္ပဏီ၏ အဆင့်မြင့် မန်နေဂျာ ပါဝင်သည့် ရင်းနှီးမြှုပ်နှံသူ အဖွဲ့ကပါ ထိုနေရာတွင် ရောက်ရှိနေခဲ့သည်။ 

ကင်မရာမီးရောင်တို့က တရစပ် ထွက်ပေါ်နေကာ အခမ်းအနားကျင်းပရာ နေရာတစ်ခုလုံးမှာလည်း များစွာ သက်ဝင်လှုပ်ရှားနေခဲ့သည်။ အဓိကဇာတ်လိုက်နှစ်ဦးဖြစ်သည့် ယန်အန်းယုနှင့် စုချင်ကျားတို့၏ ဘေးချင်းယှဉ်လျက် ရပ်နေသည့် ပုံမှာ အလွန် မျက်စိပသာဒဖြစ်ဖွယ် ကောင်းလှ၏။ 

ဒါရိုက်တာချူက အလွန်ကြင်နာဖော်ရွေတတ်ကာ ကျန် အရန်သရုပ်ဆောင်များမှာလည်း သဘောကောင်းသူများ ဖြစ်ကြသည်။ သတင်းထောက်များ၏ ရင်းနှီးဖော်ရွေသော မေးခွန်းများကို ဖြေကြားရင်း သူတို့ကို အခါအားလျော်စွာ တုန့်ပြန်ကျီစယ်မှုကြောင့် အခမ်းအနားသို့ ရောက်နေသူအားလုံး ရွှင်မြူးတက်ကြွနေကြတော့သည်။ 

ထိုစဉ် စင်မြင့်၏ အနောက်ဘက်ရှိ အနားယူရာ နေရာ၌ ကုရှင်းကို ရုတ်တရက် တွေ့လိုက်ရသည်။ 

ယန်အန်းယုမှာ သိသိသာသာပင် အံ့ဩသွားတော့၏။ 

“ကု .. ကုရှင်းကျဲ ...”

မိတ်ကပ်အထူကြီး လိမ်းခြယ်ကာ ခန္ဓာကိုယ်နှင့် ကွက်တိကျနေသည့် ပွဲတက်ဂါဝန်ရှည်ကို ဝတ်ဆင်ထားသည့် ကုရှင်း၏ ပုံစံမှာ အလွန် ညှို့ဓာတ်ပြင်းလွန်းနေပေသည်။ သူမက ခပ်ဖျော့ဖျော့ ပြုံးပြလိုက်သည်။ 

“ရှောင်ယုလေး .. တို့တွေ မတွေ့ဖြစ်တော့တာ ဘယ်လောက်တောင် ကြာသွားပြီလဲ ဒီကျဲကျဲကို သတိရနေရဲ့လား ...”

“အင်း .. သေချာပေါက်ကို သတိရတာပေါ့ ...”

ယန်အန်းယုက ခေါင်းငြိမ့်ပြလိုက်သည်။ 

“ဒါနဲ့ .. ကုရှင်းကျဲ ဘယ်လိုဖြစ်လို့ ရောက်လာတာလဲ ...”

“ငါလား .. ပြောရရင် ကျဲက ချင်ကျားရဲ့ သူငယ်ချင်းကောင်းလေ ပြီးတော့ သူမကို အားပေးဖို့အတွက် အထူးဧည့်သည်တော်အနေနဲ့ ရောက်လာခဲ့တာ အဲဒါအပြင် ...”

သူမက စကားကို တမင်တကာ ရပ်တန့်လိုက်တာ ဘေးဘီသို့ ဝေ့ဝဲကြည့်လိုက်သည်။ 

“ရင်းနှီးမြှုပ်နှံသူတွေရဲ့ ကိုယ်စားလှယ်အနေနဲ့ရောပဲ ...”

“ဟမ် ...”

ယန်အန်းယုက နောက်တစ်ကြိမ် အံ့ဩသွားရပြန်၏။ 

ကုရှင်းက လျှို့ဝှက်ဆန်းကြယ်စွာဖြင့် ပြုံးပြပြီး သူ့အနားသို့ ပိုတိုးလာကာ ခပ်တိုးတိုး ပြောလိုက်သည်။ 

“တကယ်တော့ .. ဥက္ကဌလန်က ကျဲရဲ့ အစ်ကိုကြီးရဲ့ ယောက်ျားလေ ...”

အစ်ကိုကြီးရဲ့ ယောကျ်ား ???? 

ယန်အန်းယု၏ မျက်လုံးတို့ ပြူးကျယ်သွားတော့၏။ 

ဒီဖရဲသီးက တအားကို အကြီးကြီးပဲဟ ... 

သူသည်လည်း အလိုလိုပင် အသံကို တိုးလိုက်မိတော့သည်။ 

“ကုရှင်းကျဲ .. ဥက္ကဌလန်က ကျဲရဲ့ အစ်ကိုကြီးနဲ့ လက်ထပ်ထားတာလို့ ပြောချင်တာလား ...”

ကုရှင်းက ခပ်ပြုံးပြုံးဖြင့် ခေါင်းငြိမ့်ပြလိုက်သည်။ 

“ရှောင်ယုလေး .. ကျဲရဲ့ ကောကောက မင်းရဲ့ ပရိသတ်လေ “သောင်ရှင်း”ကို အမြဲတမ်းကို စောင့်ကြည့်နေတာ ပြီးတော့ မင်းကို အပြင်မှာ တွေ့လိုက်ရပြီးကတည်းက တအားကို ပိုပြီး သဘောကျသွားလို့ သူ့ချစ်ချစ် ဥက္ကဌလန်ခမျာ ရှာလကာရည်တွေ အိုးလိုက်ကြီး သောက်လိုက်ရသေးတယ်လေ ...”

“အမ် .. ကျွန်တော်က ကျဲရဲ့ အစ်ကိုကြီးနဲ့ တစ်ခါမှ မတွေ့ဖူးပါဘူး ...”

ယန်အန်းယုက ခေါင်းကိုကုတ်ကာ စိတ်ရှုပ်ထွေးဟန်ဖြင့် ပြောလိုက်သည်။ 

“မင်းရဲ့ ခွေးလေး နေမကောင်းဖြစ်တုန်းကလေ ဆေးရုံကနေ ပြန်ထွက်လာတဲ့ အချိန်မှာ samoye အမျိုးအစား ခွေးတစ်ကောင်နဲ့ လမ်းလျှောက်နေတဲ့ မစ္စတာကုနဲ့ တွေ့ခဲ့တယ် မဟုတ်လား ..."

“လက်စသတ်တော့ မစ္စတာကုက ...”

ယန်အန်းယုက ချက်ခြင်းဆိုသလို သဘောပေါက်သွားကာ ပြုံးမိသွားတော့သည်။ 

“ဟားဟား တိုက်ဆိုင်လိုက်တာ .. သူက ကျဲလိုပဲ အရမ်းကို ကြည့်ကောင်းနေတာ မထူးဆန်းတော့ပါဘူး ...”

“ရှောင်ယုလေး .. မင်းကတော့လေ တစ်နေ့ထက်တစ်နေ့ကို နှုတ်ချိုလာတာပဲနော် ...”

ယန်အန်းယု၏ ပါးနှစ်ဖက်ပေါ်ရှိ ပါးချိုင့်လေးများကို ငေးကြည့်ရင်း ကုရှင်းသည်လည်း အလိုလိုပင် စိတ်အားတက်ကြွလာရတော့သည်။ 

“အိုကေ .. ဒီအတိုင်းပဲ အကောင်းဆုံးဖြစ်အောင် ဆက်ပြီး ကြိုးစားနေရမယ်နော် ...”

“ဟုတ်ကဲ့ .. ကျေးဇူးတင်ပါတယ် ကုရှင်းကျဲ ...”

ယီချန်းယန်သည် အခြားပြည်နယ်တစ်ခုသို့ ရောက်နေသည့်အတွက် ယနေ့ ကျင်းပသည့် ပရိုမိုးရှင်း အစီအစဉ်များတွင် မပါဝင်နိုင်ခဲ့ချေ။ သို့သော် နောက်ထပ် နှစ်ရက်ခန့်အကြာတွင် “Happy Alliance” အမည်ရ ပရိုဂရမ်တစ်ခုက “သောင်ရှင်း” ရုပ်ရှင်၏ အဖွဲ့သားအားလုံးကို သူ့အစီအစဉ်တွင် ပါဝင်ရန် ဖိတ်ကြားလိုက်လေသည်။ 

အဖွင့်ကကွက်အပြီးတွင် .. အဓိကသရုပ်ဆောင် ငါးဦးစလုံးသည် အံ့ဩမင်သက်ဖွယ် ပြကွက်နှင့်အတူ စင်ပေါ်သို့ တက်လာလိုက်ကြသည်။ ပရိသတ်များသည်လည်း ဒုတိယမင်းသား မုယွင်ရွှင်းအဖြစ် သရုပ်ဆောင်ထားသည့် ယီချန်းယန်ကိုပါ တွေ့လိုက်ရတော့သည်။ 

ကြည့်ရှုရန် ရောက်ရှိနေကြသူများအနက် သရုပ်ဆောင်တစ်ဦးချင်းစီတိုင်း၏ ပရိသတ်များလည်း ရောနှောပါဝင်နေပေသည်။ အားလုံးက မီးလင်းဘုတ်ပြားများနှင့် နဖူးစည်းစာတန်းများကို ကိုင်ဆောင်ကာ အနှစ်သက်ဆုံး အိုင်ဒေါ၏ နာမည်ကို အော်ခေါ်ရင်း အသည်းအသန် အားပေးနေကြသည်။ ယီချန်းယန်က ပရိသတ်ဧရိယာတစ်ခုလုံးကို  ခြုံငုံကာ အကဲခတ်လိုက်ပြီးနောက် သူ့ပရိသတ်များသာမက “ယန်ယုကမှ လမ်းကြောင်းအစစ်အမှန်” ဟူသော စာတန်းကို ကိုင်ဆောင်ထားသူများပါ ရောက်နေကြောင်း တွေ့လိုက်ရသည့်အတွက် နှုတ်ခမ်းထောင့်စွန်းတို့ပင် မသိမသာ ကော့တက်သွားသည်အထိ ကျေနပ်အားရသွား၏။ 

ယန်အန်းယုကလည်း ထိုအုပ်စုကို တွေ့မြင်လိုက်ကာ ယီချန်းယန်ကဲ့သို့ပင် ထပ်တူ ကျေနပ်သွားပေသည်။ 

“Happy Alliance” သည် လတ်တလော နာမည်ကြီးနေသည့် သရုပ်ဆောင်များ၊ အဆိုတော်များနှင့် ဒါရိုက်တာများကို ဧည့်သည်အဖြစ် ဖိတ်ကြားသည့် အစီအစဉ်တစ်ခု ဖြစ်ပေသည်။ ထိုအစီအစဉ်သည် ဗဟုသုတ၊ ပျော်ရွှင်မှုနှင့် ပူးပေါင်းပါဝင်ခြင်းတို့အား မျှခြေညီအောင် ထိန်းထားနိုင်သည့် အစီအစဉ်တစ်ခုဖြစ်ကာ နှစ်ပေါင်းများစွာ ထုတ်လွှင့်ပြသခဲ့ပြီး ဖြစ်သည့်တိုင် ပရိသတ်၏ နှစ်သက်မှုကို သိမ်းပိုက်ထားနိုင်ဆဲ ဖြစ်ပေသည်။ 

ဂိမ်းကစားသည့် အစီအစဉ်၏ အဓိကရည်ရွယ်ချက်မှာ ပရိုဂရမ်အဖွဲ့က “သောင်ရှင်း”၏ သရုပ်ဆောင်များအကြား တစ်ဦးနှင့်တစ်ဦး မည်မျှအထိ သဘောပေါက်နားလည်ထားကြောင်း စမ်းသပ်လို၍ ဖြစ်သည်။ သူတို့က အဓိကဇာတ်လိုက်နှစ်ဦးကို အရင်ဆုံး တွဲပေးကာ ကစားစေလိုက်သည်။ 

ကြုံရာကျပန်း မဲနှိုက်ရမည့်အတွက် ယန်အန်းယုနှင့် စုချင်ကျားတို့သည် “ခင်မင်မှုအတွက် စာလုံး ၃၀” ခေါင်းစဉ်ကို ရရှိသွားတော့သည်။ ယန်အန်းယုက လက်ဟန်ခြေဟန်ဖြင့် သရုပ်ပြရမည်ဖြစ်ပြီး စုချင်ကျားက အဖြေကို ခန့်မှန်းရမည် ဖြစ်သည်။ သူတို့သည် သုံးမိနစ်အတွင်းတွင် မေးခွန်း ၁၁ ခုကို မှန်ကန်အောင် ဖြေဆိုနိုင်ခဲ့ကြသည်။ 

“နောက်တစ်ပွဲကို ချန်းယန်ကောနဲ့ ရှောင်ယုတို့ စမ်းကြည့်ရင်ရော ဘယ်လိုနေလဲ ...”

စုချင်ကျားက အကြံပြုလိုက်သည်။ 

သူမ၏ စကားသံ မဆုံးခင်မှာပင် ပရိသတ်နေရာမှာ မိုးထိလုမတတ် အော်ဟစ်အားပေးသံများကို ကြားလိုက်ရတော့သည်။ 

တင်ဆက်သူက ကြောင်အသွားခဲ့သော်ငြား အားလုံးက တစ်ခဲနက် အားပေးနေကြသည့်အပြင် ယီချန်းယန်ကလည်း သဘောတူဟန်ဖြင့် ခေါင်းငြိမ့်ပြခဲ့သည့်အတွက် ပြုံးကာသာ လက်ခုပ်တီးလိုက်သည်။ 

“ဒါဆိုလည်း .. ယီချန်းယန်ကို ကြိုဆိုလိုက်ကြရအောင်ပါ ...”

ကြီးမားသည့် စခရင်ကြီး နောက်တစ်ကြိမ် ပြန်လင်းလာပြန်ကာ ယန်အန်းယုနှင့် ယီချန်းယန်တို့က “ရပ်တော့” ဟု ပြိုင်တူ အော်လိုက်ကြသည်နှင့် တစ်ပြိုင်နက် “ချစ်မှုရေးရာ မေးခွန်း ၃၀” ဟူသော ခေါင်းစဉ်ကို မြင်တွေ့လိုက်ရတော့သည်။ ပရိသတ်ထဲတွင် ထိုင်နေသည့် “ယန်ယု” ပရိသတ်များ၏ စိတ်လှုပ်ရှားမှု အပြည့်ဖြင့် အော်ဟစ်သံများကိုပါ တစ်ပြိုင်တည်း ကြားလိုက်ရတော့၏။ 

စင်ပေါ်ရှိ တင်ဆက်သူ အမျိုးသားမှာလည်း တိတ်တခိုး ကြောင်အမိသွားသည်။ အစီအစဉ်၏ အရည်အသွေးနှင့် ကိုက်ညီစေရန်အတွက် .. ထိုကဲ့သို့သော အကြောင်းအရာမျိုးမှာ အမျိုးသားဇာတ်လိုက်နှင့် အမျိုးသမီးဇာတ်လိုက်တို့ကိုသာ တွဲဖက်ပေးသင့်ပေသည်။ သို့သော် ပရိုဂရမ်အစီအစဉ်များကို မည်မျှပင် အသေးစိတ် စီစဉ်ထားပါစေ နောက်ဆုံးမိနစ်သို့ ရောက်ကာမှ ပြောင်းလဲသွားတတ်သည်များ ရှိသည့်အပြင် ဤသည်မှာ သူတို့ လုံးဝ မျှော်လင့်မထားသည့် အလှည့်အပြောင်းတစ်ခုလည်း ဖြစ်ပေသည်။ 

ဘေးနားတွင် ရပ်နေသူနေရာ၌ ယီချန်းယန် ပြောင်းလဲသွားသည့်အပြင် ယှဉ်ပြိုင်ရမည့် အကြောင်းအရာမှာလည်း ဒွိဟဖြစ်ဖွယ် အကြောင်းအရာသို့ ပြောင်းလဲသွားသည့်အတွက် ယန်အန်းယုသည် အနည်းငယ် ရှက်ရွံ့မိသွားသည်။ သို့သော် ယီချန်းယန်ကမူ မျက်နှာတစ်ချက်ပင် ပြောင်းလဲမသွားဘဲ ပရိသတ်များကိုပင် လက်ဝှေ့ယမ်းပြကာ နှုတ်ဆက်နေလိုက်သေးသည်။ 

“အားလုံးပဲ .. ကျွန်တော်တို့တွေ မေးခွန်း ဘယ်နှခုလောက် မှန်မယ်လို့ ထင်ကြလဲ ...”

👥️