MM Story Teller

Chapter 89

Viewers 4k

👻Chapter 89

အပျက်မတွေက သေကိုသေရမှာ....(3)

ဗီလာ၏ ဒုတိယမြောက်အထပ် စင်္ကြလမ်းတစ်လျှောက် နံရံပေါ်၌ ပန်းချီကားခုနစ်ချပ်ကို အလျားရော အနံရော အကွာအဝေး ညီညီထားပြီး ချိတ်ထားလေသည်။ ပန်းချီကားတစ်ချပ်စီက လူပုံများ ဆွဲထားလေသည်။

ချူဟွိုက်က အနီးကပ် ကြည့်နေသော်လည်း ရှင်းရှင်းလင်းလင်း မမြင်ရသေးပေ။ သူက ထိုပန်းချီကားထဲမှ တစ်ခုခု လိုနေသလို ခံစားရသည်။

သူက ရေရွတ်လိုက်ရင်း ဖုန်းထုတ်ပြီး ဒုတိယအထပ်က မြေပုံကို ကြည့်လိုက်မိသည်။ သူက နည်းနည်းချင်းစီ ပုံကြီးချဲ့ကြည့်လိုက်ရာ ပန်းချီကားများကို ပိုပြီး ရှင်းရှင်းလင်းလင်း တွေ့လိုက်ရသည်။ ရုတ်တရက် သူ့မျက်ဆံများ ကျုံ့ဝင်သွားရလေသည်။

သူက ပြသနာကို သိလိုက်ရပြီ ဖြစ်သည်။

ပြဿနာက မျက်လုံးပင်။

အခန်းတွင်းမြေပုံထဲတွင် ပန်းချီကားထဲမှ လူများက မျက်လုံးပါသော်လည်း နံရံပေါ်က ပန်းချီကားများတွင်ဖြင့် မျက်လုံးမပါပေ။

ကျင်းထျန်းယိက ချူဟွိုက်အကြည့်အတိုင်း လိုက်ကြည့်မိသည်။ အခန်းတွင်း မြေပုံကို သူလည်း ကြည့်ထားခဲ့၍ တစ်စက္ကန့်မျှ အံ့သြသွားပြီးနောက် ချက်ချင်း သဘောပေါက်သွားသည်။

အတည်ပြုချင်၍ ချူဟွိုက်က လူတိုင်းကို လှည့်ပြောလိုက်သည်

" နောက်ကျနေပြီ.....အထုပ်ယူပြီး အပေါ်တက် အခန်းရွေးကြရအောင်....ပြီးရင် နားကြတာပေါ့....ကျွန်မတို့ အားပြည့်နေမှ မနက်ဖြန်ကျရင် ပျော်နိုင်မှာလေ...."

ဗီလာ၏ အောက်ထပ်တွင် ဧည့်ခန်းကြီးတစ်ခုရှိပြီး တီဗွီကြီးကြီးနှင့် ကာရာအိုကေဆိုရင်း ဂိမ်းကစားပြီး ရုပ်ရှင်ကြည့်နိုင်သော နေရာတစ်ခုလည်း ရှိသည်။ အပေါ်ထပ်က တည်းမည့် နေရာဖြစ်သည်။

ရုတ်တရက် သွေးစာတန်းကြီးက လူတိုင်း၏ခေါင်းထဲ ရောက်လာသည် [ကျေးဇူးပြုပြီး ဒုတိယထပ်မှာ ကိုယ့်အခန်းကို ရွေးပေးကြပါ]

ချူဟွိုက်က အသိစိတ်ပြန်ဝင်လာပြီး သူ့အိတ်ထဲမှ အခန်းသော့တစ်ချောင်း ထုတ်လိုက်သည်။ " အခန်းတွေအားလုံးက အတူတူပဲ....ကြိုက်တာသာရွေးလိုက်...."

လူတိုင်းက သော့ကိုယ်စီ ယူလိုက်ကြပြီး အပေါ်ထပ် တက်သွားလိုက်သည်။ အပေါ်ထပ်တွင် အခန်းခုနစ်ခန်း ရှိပြီး အခန်းတစ်ခန်းစီ၏ ရှေ့တွင် ပန်းချီကားတစ်ချပ်စီ ချိတ်ထားလေသည်။

လော့ဇီယန်က ခေါင်းကုတ်လိုက်ပြီး မေးလာသည် " ရှန်....ဒီသော့က ဘယ်အခန်းလဲ...."

သူက သူ့သော့နှင့် အခြားသူ၏ သော့များကို နှိုင်းယှဥ်လိုက်ရင်း အံ့သြသွားသလို ပြောလာသည် " သော့တွေအကုန်လုံးက အတူတူတွေချည်းပဲ...."

ချူဟွိုက်လည်း အံ့သြသွားပြီး ကျင်းထျန်းယိကို တိတ်တိတ်လေး ကြည့်လိုက်သည်။ သူက မရေမရာ ပြောလာသည် " ကျွန်မလည်း မသိဘူး....ဒီအတိုင်း သော့ခုနစ်ချောင်း ရထားတာ....အကုန်လုံးကို စမ်းကြည့်လိုက်ပါလား....နောက်ဆုံး မှန်တဲ့အချောင်းကို တွေ့သွားမှာပေါ့...."

သူက ပြောလိုက်ရင်း နံရံပေါ်က ပန်းချီကားများဆီ သွားလိုက်ပြီး သေချာ စစ်ဆေးကြည့်လိုက်သည်။

သူ့ရှေ့က ပန်းချီကားက အမျိုးသားတစ်ယောက်ပုံ ဆွဲထားလေသည်။ ပန်းချီကားထဲရှိ အမျိုးသားက မျက်နှာနီနီ ဆံပင်ထူထူနှင့် စိတ်ကူးယဥ်ဆန်ဆန် ရေးခြစ်ထားသည်။

မျက်လုံးမပါသည့် ပန်းချီကားက ကြောက်စရာမကောင်းပဲ ဗလာမျက်လုံးအိမ်ကြောင့်သာ အနည်းငယ် ထူးဆန်းနေသည်။

“ ဘယ်လိုလုပ် မျက်လုံးမပါရတာလဲ...." ချူဟွိုက်က အခြားသူများ၏ သတင်းအချက်အလက်ကို သိချင်၍ တမင်သက်သက် အံ့သြသွားသလို လုပ်လိုက်သည်။

" မျက်လုံးမပါဘူး ဟုတ်လား...." လူတိုင်းက ချက်ချင်း စပ်စုချင်ယောင်ဆောင်လိုက်ရင်း အနားကို ဝိုင်းအုံလာသည်။

ချူဟွိုက်က သူ့ဖုန်းကို လှမ်းပေးလိုက်သည်။

အသစ်ကောင်မလေးနှစ်ယောက်က ဖုန်းမျက်နှာပြင်ပေါ်ရှိ ပန်းချီကားထဲမှ မျက်လုံးနက်နက်များကို ကြည့်လိုက်ရင်း ခြေထောက်များ ပျော့ခွေသွားသော်လည်း တည်ငြိမ်အောင် ကြိုးစားလိုက်ရသည်။

"ကြည့်ရတာ အိမ်ပိုင်ရှင်က စနောက်ထားတာ ဖြစ်နိုင်တယ်....ဟုတ်တယ်နော်...." လော့ဇီယန်က ရယ်မောလိုက်သည်။

ကျင်းထျန်းယိက စိုးရိမ်သွားသလို ချူဟွိုက်လက်ကို ဖျစ်ညစ်လိုက်ရင်း အခြားသူများကလည်း ဘာမှမဖြစ်သလို ဟန်ဆောင်နေရသည်။

အသစ်လေးများထဲမှ နှာဘူးကောင်နေရာတွင် သရုပ်ဆောင်ရသည့် ကောင်လေးက သူ့ရှေ့က ပန်းချီကားကို ညွှန်ပြလိုက်ရင်း ပြီတီတီအသံနှင့် ပြောလာသည် " ဟေ့....ဒီပန်းချီကားက ကိုယ်တုံးလုံးကြီး....အကုန်လုံးကို ဖော်ထားတာ....စိတ်ပျက်စရာပဲ...."

ချူဟွိုက်က မော့ကြည့်လိုက်ရင်း တမင်သက်သက် ပန်းချီကားကို အာရုံစိုက်ကြည့်နေလိုက်သည်။ ထို့နောက် သူရှေ့က သော့ခလောက်ဆီ သော့တံ ထိုးထည့်လိုက်သော်လည်း ပွင့်မသွားချေ။

ဒီအခန်း မဟုတ်ဘူး....

လူတိုင်းက ကြိုးစားလိုက်ကြရင်း သူတို့နှင့်ကိုက်သည့် အခန်းကို ရှာတွေ့သွားကြပြီ ဖြစ်သည်။

ချူဟွိုက်အခန်း၏ ပန်းချီကားတွင် စကပ်ဝဲဝဲလေး ဝတ်ထားသည့် မိန်းကလေးတစ်ယောက်ပုံ ဖြစ်ပြီး ကျင်းထျန်းယိအခန်း၏ ပန်းချီကားက အကြွေစေ့တစ်စေ့ ကိုင်ထားသည့် အမျိုးသားတစ်ယောက်ပုံ ဆွဲထားလေသည်။

ချူဟွိုက်က အာရုံစိုက်ကြည့်လိုက်ရာ ပန်းပွင့်ဖြူလေး ရှားယွီ၏ တံခါးပေါ်က ပန်းချီကားက အဝတ်အစားမပါသော အမျိုးသမီးတစ်ယောက်ပုံ ဖြစ်နေသည်။

ချူဟွိုက်က လက်ထဲက သော့ကို ကြည့်လိုက်ရင်း စိတ်က ယောက်ယက်ခတ်နေပြီ ဖြစ်သည်။ ရုတ်တရက် သူက ကျင်းထျန်းယိလက်ကို ဖမ်းဆွဲလိုက်ပြီး ညုတုတုပြောလိုက်သည် " အချစ်....ကျွန်မတို့ တစ်ခန်းတည်း အိပ်လို့မရဘူးလား...."

သူက လက်ချင်းထပ်လိုက်ပြီး ကျင်းထျန်းယိကို မှီလိုက်ရင်း မျက်လုံးချင်းဆုံအောင် ကြည့်ကာ ကျင်းထျန်းယိလက်ထဲက သော့နှင့် တိတ်တိတ်လေး လှဲယူလိုက်သည်။

" မမ....မမ ဒီလိုမျိုး လုပ်နေမယ်ဆိုရင် ကျွန်တော်လည်း ထိုင်လို့ရတော့မှာ မဟုတ်ဘူးနော်...." ကျင်းထျန်းယိက သော့ကို ယူလိုက်ရင်း ချိုချိုသာသာ ပြုံးလိုက်ကာ တိတ်တိတ်လေး သူ့အခန်းကို သော့ဖွင့်လိုက်သည်။

ချူဟွိုက်က ကျင်းထျန်းယိ အခန်းသော့ဖွင့်နေသည်ကို စိုက်ကြည့်နေပြီးနောက်....

တံခါးက အမှန်တကယ် ပွင့်သွားလေသည်။

သူက ရုတ်တရက်ဆိုသလို နားလည်သွားပြီ ဖြစ်သည်။

အခန်းနှင့် နေမည့်သူက တွဲပြီးသားဖြစ်၍ အခြားသူများက လာဖွင့်၍ မရချေ။ ထို့အတွက်ကြောင့် သော့တံတွင် အထူးစွမ်းရည်မျိုး မပါရှိပဲ ဖွင့်သည့်သူနှင့်သာ သက်ဆိုင်လေသည်။

ဤပန်းချီကားများကလည်း တစ်ခုခုကို အရိပ်အမြွက်ပေးထားခြင်း ဖြစ်နိုင်သည်။

ရုပ်ရှင်၏ အချိန်ဇယားအတိုင်းဆိုပါက အဓိကဇာတ်ကြောင်းက နောက်လာမည့် နှစ်ရက်အတွင်း ဖြစ်လာနိုင်သည်။ ဇာတ်ကြောင်းက အချိုးမကျအောင် လုပ်ဖို့ အချိန်လိုသေး၍ ယနေ့ညတွင်ဖြင့် အနည်းငယ် ခြိမ်းခြောက်မှုများသာ ရှိနိုင်သည်။

ချူဟွိုက်က မကြောက်သော်လည်း အချင်းချင်းဆက်သွယ်၍ မရသဖြင့် စိတ်ညစ်လာရသည်။

ကင်မရာမီးရောင်အောက်တွင် သရုပ်ဆောင်များက စောင့်ကြည့်စစ်ဆေးခံနေရပြံး သူတို့လုပ်သမျှအရာတိုင်း ပြောသမျှ စကားလုံးတိုင်းက ဇာတ်ကောင်အတိုင်း လုပ်ရမည်ပင်။

ဇာတ်ညွှန်းတွင် ဇာတ်ကောင်အတိုင်း မလုပ်လျှင် အပြစ်ပေးခံရနိုင်သည်ဟု မပြောထားသော်လည်း စည်းမျဥ်းများကို အတင့်ရဲပြီး မလုပ်ရန် ပြင်းပြင်းထန်ထန် တားမြစ်ထားသည်။ သူ စဥ်းစားမိတာ တစ်ခုရှိတယ်....သရုပ်ဆောင်တွေက အမှားလုပ်မိသွားတာနဲ့ ချက်ချင်း လူစားလဲခံရတော့မှာလား....အဲ့လိုဆိုရင်ရော ဘယ်လိုပုံစံမျိုး အစားထိုးမှာလဲ.....

ဒါမှမဟုတ် သူတို့ဇာတ်ကောင်နေရာလေး လျော့သွားပြီးတော့ အမြှောက်စာဇာတ်ကောင် ဖြစ်သွားမှာလား...

တကယ်တမ်းကျ အဖြတ်ခံလိုက်ရတဲ့ အပိုင်းတွေကို အခြားသရုပ်ဆောင်တွေနဲ့ ပြန်ဖြည့်လို့ရတယ်လေ...

ဘယ်သူမှတော့ စွန့်စားရဲမှာ မဟုတ်ဘူး...

အခြားပြိုင်ပွဲဝင်များက သူတို့၏ အခန်းအသီးသီးသို့ ဝင်သွားကြ၍ ချူဟွိုက်က သူသိလိုက်ရသည့် သတင်းအချက်အလက်ကို ပြောပြ၍မရနိုင်တော့ပေ။ သူက အခြားသူများ နိုးနိုးကြားကြားနေကြရန်သာ ဆုတောင်းမိသည်။

အတွေးတို့နစ်နေသည့်အချိန် ချူဟွိုက်ခေါင်းထဲ သွေးစာတန်းတစ်ခုက ပေါ်လာသည်။

[သရုပ်ဆောင်ချူဟွိုက်က ရိုက်ကူးရေးလုပ်နေစဥ်အတွင်း မူလဇာတ်ညွှန်းအတိုင်း လိုက်လုပ်ခဲ့ခြင်း မရှိပါဘူး....]

ချူဟွိုက်က ထိတ်လန့်သွားရသည်။

ဒါဆို သူ့ကို အပြစ်ပေးတော့မှာလား....အမှန်တွင်လည်း ယခင်က ပို့ခဲ့သည့် မက်ဆေ့ချ်တွင် "ပြိုင်ပွဲဝင်များက ကိုယ်ပိုင်အခန်းကို ရွေးရမည်" ဟု ပြောသွားခဲ့သည်။ သူနဲ့ ကျင်းထျန်းယိသာ အတူနေမယ်ဆိုရင် မူလဇာတ်ကြောင်းကို ချိုးဖောက်သလို ဖြစ်သွားမလား....

မက်ဆေ့ချ်က ဆက်ပြောလာသည် [ သရုပ်ဆောင်ချူဟွိုက်ရဲ့ ထင်မှတ်မထားတဲ့ ထိထိမိမိ ဇာတ်ကြောင်းအပြောင်းအလဲကြောင့် တချို့ဒါရိုက်တာတွေရဲ့ သဘောကျမှုကို ရရှိသွားပါတယ်....သတိပေးချက်.....ဒါရိုက်တာသုံးယောက်ရဲ့ သဘောကျတာကို ခံရရင် ပစ်မှတ်Nအတွက် အလှဲအလှယ် လုပ်လို့ရမှာ ဖြစ်ပါတယ်....]

ချူဟွိုက်က အောက်ငုံ့ကြည့်လိုက်ရင်း အံ့သြသွားသည့်ပုံစံကို ဖုံးကွယ်ထားလိုက်သည်။

ဒါရိုက်တာက သဘောတွေ့တာ ဟုတ်လား..

ပစ်မှတ်Nကရော....ဘာတွေလဲ....

ရုပ်ရှင်က ဇာတ်ကောင်တွေကနေ စရိုက်တာ မဟုတ်ဘူးလား....သူတို့က အဓိကဇာတ်ကြောင်းကို သွေဖယ်မသွားတာနဲ့ လက်ခံလို့ရနေပြီ မဟုတ်ဘူးလား....

ဒီလိုဆိုရင် ကြည့်ရတာ သူလုပ်လိုက်တဲ့ကိစ္စက အဓိကဇာတ်ကြောင်းကို နည်းနည်းသက်ရောက်မှု ရှိသွားတဲ့ပုံပဲ....မဟုတ်ရင် လောကကြီးက ဖျက်ချပြီး အမှန်ပြင်တော့မှာပေါ့....

အဲ့ဒီအဓိပ္ပာယ်မျိုးဆိုရင် ဒီညအတွက်တော့ သူတို့ ဘေးကင်းပါသေးတယ်....

စဥ်းစားရင်း နားလည်သွားသည့်အချိန် ချူဟွိုက်က ယာယီစိတ်အေးသွားရပြီး နှေးတိနှေးတုံ့ အဝတ်လှဲနေသည့် ကျင်းထျန်းယိကို ကြည့်နေလိုက်သည်။ သို့သော်လည်း သူ့မှာ မတွေးပဲ မနေနိုင်ချေ။ တကယ်လို့ အဓိကဇာတ်ကြောင်းမှာ သူတို့က တစ်ခုခု "လုပ်" ဖို့ လိုလာပြီဆိုရင်ရော....

သေစမ်း....

သူက ခေါင်းတွင်တွင်ယမ်းလိုက်ရင်း စိတ်အနှောင့်အယှက်ဖြစ်စရာ အတွေးများကြောင့် လူးလွန့်နေမိသည်။

ကျင်းထျန်းယိက သူ့ရှပ်အင်္ကျီကို ချွတ်လိုက်ပြီဖြစ်၍ ကျစ်လျစ်သိပ်သည်းသော သူ့ကျောပြင်က လှစ်ခနဲ ပေါ်လာသည်။ သူ့ကြွက်သားများက အမြောင်းမြောင်းနှင့် ပုံစံလှလှလေး ခွဲဖြာသွား၍ ပေါက်ကွဲမည့် စွမ်းအင်တို့ ပါဝင်နေသလား မှတ်ထင်ရသည်။

ချူဟွိုက်က မနေနိုင်ပဲ ပိုပိုသာသာလေး ကြည့်လိုက်မိသည်။

ရေချိုးလိုက်ပြီးနောက် အိပ်ရာပြင်ဆင်နေကြစဥ် ချူဟွိုက်က အိပ်ရာကြီးရှေ့ တွန့်ဆုတ်တွန့်ဆုတ် ဖြစ်နေပြီး စိတ်ညစ်သွားသလို အိပ်ရာပေါ် ခုန်တက်လိုက်သည်။

အမှန်တွင်ဖြင့် သူတို့က ယခင်ကလည်း အတူတူအိပ်ခဲ့ဖူးလေသည်။

ကျင်းထျန်းယိက မီးပိတ်လိုက်သည့်အချိန် ချူဟွိုက်က အိပ်မပျော်နိုင်သေး၍ ဟိုလှည့်သည်လှည့် လုပ်နေမိသည်။

ကျင်းထျန်းယိက သူ့ကို ဖက်အိပ်နေ၍ ချူဟွိုက်မှာ သူ၏ အသက်ရှူသံအကျယ်ကြီးနှင့် ဆူဆူညံညံ နှလုံးခုန်သံကြောင့် စိတ်တိုလာတော့သည်။

ဘာလို့ ရုတ်တရက်ကြီး သူ့မှာ ဆတ်ဆတ်

ထိမခံတဲ့ ပုံစံမျိုး ရှိလာရတာလဲ....သူက နှစ်နှစ်ခြိုက်ခြိုက် အိပ်ပျော်တတ်တဲ့သူမျိုးပါ....

ချူဟွိုက်က အငြိမ်မနေပဲ လှုပ်လှုပ်ရွရွ လုပ်နေ၍ ကျင်းထျန်းယိမှာ ထိန်းမထားနိုင်တော့ပဲ သြရှရှလေသံနှင့် မေးလာသည် " လှုပ်နေတာလေး ရပ်ပေးလို့ရမလား...."

ချူဟွိုက်က ထိုလူ့ကို နှောင့်ယှက်နေမိသည့်အကြောင်း တွေးမိသွားချိန် မကျေနပ်ကြောင်း ပြချင်၍ တမင်သက်သပ် လူးလိမ့်ပြလိုက်ရင်း အမှောင်ထဲမှ ညှို့ဓာတ်ပြင်းသည့် မျက်နှာလေးနှင့် စသလို ကြည့်လာသည်။

ကျင်းထျန်းယိက သူ့ကို လွှတ်ထားပေးလို့ မရနိုင်တော့သလို ခံစားမိ၍ ဒေါသထွက်ထွက်နှင့် ရယ်လိုက်မိသည်။

သူက ထိုလူ၏ လက်ကောက်ဝတ်ကို ထိန်းကိုင်လိုက်ပြီး အနမ်းနှင့် အပြစ်ပေးလိုက်သည်။

ချူဟွိုက်က မျက်လုံးအပြူးသားဖြစ်သွားရင်း တစ်ခဏမျှ တွန်းလှန်နေသော်လည်း သူ့အနမ်းက ဖမ်းစားထားနိုင်လွန်း၍ တိတ်တဆိတ် သက်ပြင်းချလိုက်ပြီး မူးမူးမေ့မေ့နှင့် ပြန်တုံ့ပြန်မိသည်။

“ကျွန်တော့်အလုပ်က သရုပ်ဆောင်ဖို့လေ...." ကျင်းထျန်းယိက အနမ်းရပ်လိုက်ပြီး သူ့နားရွက်နားကပ်လိုက်ရင်း ပြုံးတုံ့တုံ့နှင့် တိုးတိုးလေးပြောလာသည်။

သူ့လည်ပင်းနားရောက်နေသည့် ချူဟွိုက်၏ လက်များလည်း ချက်ချင်းရပ်သွားရကာ တစ်စက္ကန့်မျှ ရှက်သွေးဖြာသွားပြီးနောက် နူးနူးညံ့ညံ့အသံလေးနှင့် ပြောလာသည် " ကျွန်မရောပဲလေ...."

အမှန်က သူ မျက်နှာပန်းအရှုံးမခံနိုင်၍ပင်။

ကျင်းထျန်းယိက လှောင်ပြုံးပြုံးလိုက်ပြီး မျက်လုံးထက် ရယ်မြူးရိပ်သန်းနေသည် " ကျွန်တော်က လိမ်ပြောနေတာပါ...."

ချူဟွိုက်က " ကျွန်မရောပဲ" ဟု ပြောရန်ပြင်လိုက်သော်လည်း ကျင်းထျန်းယိ၏ အကြည့်များနှင့် အတားခံလိုက်ရသည်။

ချူဟွိုက်က သူ့ကို တည့်တည့်ကြည့်လိုက်ပြီး အခိုင်အမာ ပြောလိုက်သည် " ကျွန်မလည်း တကယ် သရုပ်ဆောင်နေတာပါ...."

“ အမ်...." ကျင်းထျန်းယိက ခေါင်းညိမ့်ပြလိုက်ရင်း နားနားကပ်ကာ အဓိပ္ပါယ်ပါပါ ပြောလာသည် " ဒါဆိုရင် မမက အပေါ်ကထက် အောက်မှာနေပြီး သရုပ်ဆောင်ပေးရင် ပိုကောင်းမယ်လို့ ကျွန်တော်ထင်တယ်...."

ချူဟွိုက် " ....သောက်ကျိုးနည်း...."

သူ့မျက်နှာက နီရဲသွားပြီး ချက်ချင်း သူ့ကို တွန်းထုတ်ပစ်ရင်း တစ်ဖက်လှည့်ပြီး အိပ်နေလိုက်သည်။ ယခု သူက ယဥ်ယဥ်ကျေးကျေး ပြုမူလိုက်ခြင်း ဖြစ်သည်။

နောက်တစ်နေ့ မနက်တွင် လူတိုင်းက အောက်ထပ်ကို ဆင်းသွားလိုက်ပြီး တီဗွီဆင်ထားသည့် စားပွဲနား မနက်စာစားနေကြစဥ် သတင်းထဲမှ အမျိုးသားတစ်ယောက်၏ စူးစူးဝါးဝါးအော်သံကို ရုတ်တရက် ကြားလိုက်ရသည်။

လူတိုင်းက အနည်းငယ် ရင်တုန်သွားကြပြီး သတင်းကို စိတ်ဝင်စားမိသွားသည်။

သတင်းထဲတွင် အမျိုးသားတစ်ယောက်၏ ဇနီးဖြစ်သူက အငယ်ထားပြီး ဖောက်ပြန်နေခဲ့၍ တုံ့ပြန်သည့်အနေနှင့် ထိုလူက သူ့ဇနီးကို ညသန်းခေါင်ကြီး ဓါးထိုးသတ်ခဲ့ခြင်းပင်။

ရဲဖမ်းခံရသောအခါ ထိုလူက ကယောင်ချောက်ချား အော်ဟစ်နေသည် " အပျက်မတွေက သေကိုသေရမှာ..."

သူက စိတ်မငြိမ်တော့၍ သွေးရူးတန်းရူး ရယ်နေသည်

" သူမက အရင်ရှာတာမို့လို့ အရင်သေရမှာ....သူ့အကောင်လည်း နောက်ပိုင်း လာလိမ့်မယ်..."

ချူဟွိုက်၏ မျက်ဆံများ အနည်းငယ် ကျဥ်းမြောင်းသွားလေသည်။

👻

Prev Next