Chapter 56

👥️Chapter 56

“Challenge First Time” ကို ရိုက်ကူးမည့်  B မြို့၌ ... 

ယန်အန်းယု ယွီစစ်ယွမ်နှင့် တွေ့ခဲ့သည်မှာ လွန်ခဲ့သော တစ်နှစ်က နောက်ဆုံးဖြစ်သည်။ 

ထိုစဉ်ကစ၍ တစ်ဦးနှင့်တစ်ဦး မဆုံဖြစ်ကြတော့သည့်တိုင် သူတို့အကြားတွင် မြောက်များစွာသော “မကောင်းသည့် ပတ်သက်မှုများ” ရှိနေခဲ့သည်။ 

“လက်ဝှေ့ကျော်” ၌ စတန့်သမား မောင်ငယ်လေးအဖြစ် ပါဝင်ခဲ့သည့် ကိစ္စအပြင် .. နောက်ပိုင်းတွင် ယွီစစ်ယွမ်ထံ၌ အနုပညာလှုပ်ရှားမှုတစ်ခု ရှိလာချိန်တိုင်း ဥပမာအားဖြင့် ကုန်ပစ္စည်းအမှတ်တံဆိပ်တစ်ခုအတွက် ပြောရေးဆိုခွင့်ရ ပုဂ္ဂိုလ်အဖြစ် ဆောင်ရွက်ရန် သို့မဟုတ် ရှိုးအသစ်တစ်ခုကို ပရိုမိုးရှင်းဆင်းရန် ရှိလာလေတိုင်း .. ယန်အန်းယုနှင့် ပတ်သက်သည့် အကြောင်းအရာတစ်ခုခု ဖြစ်ပေါ်ကာ hot topic ထဲသို့ ရောက်သွားပြီး သူ၏ အနုပညာလှုပ်ရှားမှုများကို ဖိနှိပ်ခဲ့ပေသည်။ 

အနုပညာသတင်းများကို တင်ပေးသည့် ဝဘ်ဆိုဒ်များက ရံဖန်ရံခါတွင် လန်းဆန်းတက်ကြွကာ ချောမောခန့်ညားသည့် နတ်ဘုရားနေရာအတွက် မဲပေးမှုများ ပြုလုပ်လေတိုင်းလည်း ယန်အန်းယုသည် ယွီစစ်ယွမ်ထက် မဲရရှိမှု  ပိုမို များပြားခဲ့ပေသည်။ 

သူသည် ပွဲဦးထွက်သည်ပင် မကြာသေးသည့် လူသစ်လေးတစ်ဦးမျှသာ ဖြစ်သော်ငြား လူထုအား လှုပ်ခတ်စေနိုင်စွမ်းမှာမူ ကြီးမားလှပေသည်။ ထို့ကြောင့် ယွီစစ်ယွမ်၏ ရင်ထဲတွင် တစ်ကြိမ်ပြီးတစ်ကြိမ် ဒေါသများ စုပုံကာ အစိုင်အခဲကြီးကြီးမားမား ဖြစ်ပေါ်လာတော့သည်။ 

သို့သော် .. သူသည် ယန်အန်းယုကို ပျက်စီးသွားစေရန် နောက်ကွယ်မှ အမျိုးမျိုး ကြံစည်ခဲ့သည့်တိုင် အသေးအဖွဲ ပြဿနာလေးများကိုသာ ဖန်တီးနိုင်ခဲ့၏။ မည်သို့ပင်ဖြစ်စေ ယန်အန်းယု၏ အစ်ကိုမှာ ရှန်းဟွမ်မီဒီယာ၏ ဥက္ကဌဖြစ်သူ ယန်ကျွယ့် ဖြစ်နေပေရာ လူထုတစ်ရပ်လုံး တုန်လှုပ်သွားစေနိုင်မည့် သတင်းအကြောင်းအရာမျိုး မဟုတ်သရွေ့ မည်သူကမှ သူ့ကို ထင်တိုင်းကြဲကာ ရန်စရဲလိမ့်မည် မဟုတ်ချေ။ 

ပထမဆုံးအကြိမ်က သူသည် ယန်အန်းယု၏ သရုပ်မှန်ကို သိမထားသည့်အတွက် အရှုံးနှင့်သာ ရင်ဆိုင်ခဲ့ရသည်။ ထိုအချိန်မှစ၍ ယွီစစ်ယွမ်သည် စိတ်ရှည်သည်းခံနိုင်စွမ်းကို မွေးမြူကျင့်ကြံထားလေ၏။  

“ကြိုဆိုပါတယ် .. စစ်ယွမ် ...”

ယနေ့အတွက် အထူးဧည့်သည်တော်ကို တွေ့လိုက်ရသည်နှင့်တစ်ပြိုင်နက် ဟုန်ယောင်က ဦးဆောင်ကာ ကြိုဆိုနှုတ်ဆက်လိုက်သည်။ ဖန်ယိရှန်၊ ရှဲ့ယန်နှင့် အခြားလူများကလည်း ခပ်ဖျော့ဖျော့ ပြုံးကာ နှုတ်ဆက်လိုက်ကြ၏။ သို့သော် ယန်အန်းယုနှင့် ယွီစစ်ယွမ်အကြားရှိ ပြဿနာအစိုင်အခဲများအကြောင်းကို အားလုံးက သိထားကြနှင့်ပြီး ဖြစ်ပေသည်။ 

အပေါ်ယံ အသွင်အပြင်အရ ယန်အန်းယုနှင့် ယွီစစ်ယွမ်တို့ နှစ်ဦးလုံးမှာ ရွှင်မြူးတက်ကြွကာ ချောမောခန့်ညားသည့် ရုပ်ရည်ကို ပိုင်ဆိုင်ထားကြသည့်အပြင် သူတို့နှစ်ဦး၏ စမှတ်များမှာလည်း တူညီလုနီးပါးပင် ဖြစ်ပေသည်။ 

သို့သော် ယန်အန်းယုသည် ပွဲဦးထွက်ပြီး မကြာမီတွင်ပင် နာမည်ကြီး ဒါရိုက်တာ ရှုဟောက်ကျန်း၏ မျက်စိကျခြင်းကို ခံခဲ့ရကာ “နှလုံးသား၌ ထုဆစ်လေသော” ၌ ပါဝင်ခွင့် ရသည်အထိ ကောင်းမွန်သော ကံကြမ္မာကို ပိုင်ဆိုင်ထားသည့်အတွက် သူ၏ ပွဲဦးထွက်ပြီးနောက်ပိုင်း အနုပညာလမ်းခရီးမှာ အထူးတလည်ပင် ချောမွေ့ခဲ့ပေသည်။ 

ယွီစစ်ယွမ်သည်လည်း ပြီးခဲ့သည့် ၂ နှစ်ကျော်ခန့်က အလျင်အမြန် အောင်မြင်ကျော်ကြားခဲ့ပေသည်။ သို့သော် ထို့နောက်ပိုင်းတွင်မူ တစ်ဖြည်းဖြည်း တိတ်ဆိတ်သွားခဲ့ရသည်။ သူသည် ကျောထောက်နောက်ခံအပေါ် အလွန် မှီခိုကာ အပြောင်းအလဲမြန်ပြီး စိတ်မရှည်တတ်သည့်အပြင် သရုပ်ဆောင်စွမ်းရည် တိုးတက်မှုမှာလည်း အလွန် နှေးကွေးလှပေသည်။ ပြီးခဲ့သည့်နှစ်အတွင်း သူ ရိုက်ကူးခဲ့သမျှမှာလည်း ကြီးကြီးမားမား အောင်မြင်မှု မရခဲ့ပေ။ ထိုသို့ဖြင့် သူသည် ရုပ်ရည်နှင့် ငယ်ရွယ်မှုကို အခွင့်ကောင်းယူကာ “idol drama” အမျိုးအစားကိုသာ နောက်တစ်ကြိမ် ထပ်မံရိုက်ကူးရပြန်တော့သည်။ 

ယန်အန်းယုမှာလည်း တိတ်တခိုး အတွေးလွန်နေမိ၏။ 

လတ်တလော၌ “Challenge Firt Time” သည် အလွန် နာမည်ကြီးနေကြောင်း အားလုံးက သိရှိထားပေသည်။ အစီအစဉ်တွင် ပါဝင်သည့် သရုပ်ဆောင်ခြောက်ဦးသာမက သီးသန့် ဖိတ်ကြားထားသည့် အထူးဧည့်သည်တော်များသည်ပင်လျှင် ထိုအစီအစဉ်တွင် ပါဝင်ပြီးနောက်ပိုင်း ပရိသတ်အရေအတွက် တိုးများကာ အနည်းနှင့်အများ လူသိများသွားကြပေသည်။ 

အခုတစ်ပတ်မှာ ယွီစစ်ယွမ် ပါလာတာကလည်း .. ပရိုဂရမ်အဖွဲ့ကပဲ ပွဲဆူအောင် လုပ်ချင်လို့ တမင် ဖိတ်ခဲ့တာလား ဒါမှမဟုတ် သူ့ရဲ့ ကျောထောက်နောက်ခံကြီးကပဲ လှည့်ကွက်လေး နည်းနည်းပါးပါး သုံးပြီး တမင် ထိုးထည့်ခဲ့တာလား ...

မည်သို့ပင်ဖြစ်စေ အနုပညာလောက၌ ထုတ်ပြော၍ မရသည့် စည်းမျဉ်းစည်းကမ်းများ ရှိနေကြောင်းကို အားလုံးက ကောင်းစွာ သိထားကြပေသည်။ သူတို့၏ ပရိသတ်များမှာ အချင်းချင်း မတည့်ကြသည့်တိုင် ယန်အန်းယုကမူ ယွီစစ်ယွမ်ဘက်မှ သူ့နေရာသူ သိကာ တမင်တကာ ရန်လာမစသရွေ့ သူ့ကို စိတ်အနှောင့်အယှက် ပေးလိမ့်မည် မဟုတ်ချေ။ 

“အားလုံးပဲ မင်္ဂလာပါ .. ဒီအစီအစဉ်မှာ ပါဝင်ခွင့် ရတဲ့အတွက် တကယ်ကို ဝမ်းသာမိပါတယ် ...”

ယွီစစ်ယွမ်က ဟုန်ယောင်၊ ရှဲ့ယန်နှင့် အားလုံးကို ရိုးရှင်းစွာ နှုတ်ဆက်လိုက်သည်။ သူက ယန်အန်းယုကိုလည်း ဖျော့ဖျော့လေး ပြုံးပြလိုက်သေး၏။ သို့သော် သူ့အပြုံးတွင် အခြားအဓိပ္ပါယ်များ ပါဝင်နေကာ ဓားတစ်လက် ဖွက်ထားကြောင်းမှာမူ သိသာနေပေသည်။ 

“မတွေ့ရတာတောင် ကြာပြီနော် ရှောင်ယု .. မင်းကို ဒီလောက်အထိ တိုးတက်လာလိမ့်မယ်လို့ ထင်ကို မထင်ထားခဲ့မိဘူး .. အိုက်ယား မင်းကို မနာလိုဖြစ်နေတဲ့သူတွေ ဘယ်လောက်တောင် များနေလိုက်မလဲ ...”

သူက ယန်အန်းယု၏ လက်ကို ဆွဲကာ စတင်နှုတ်ဆက်လိုက်သည်။ 

ဟီးဟီး .. ယန်အန်းယု မင်းလိုကောင်က ယန်မိသားစုရဲ့ သခင်ငယ်လေးဆိုတဲ့ ဂုဏ်ပုဒ်ကို မှီခိုနေရတဲ့အဆင့်ပဲ ရှိပါတယ်ကွာ ပြီးတော့ ချန်းယန်ကောရဲ့ ပေါင်ကိုလည်း အသေအလဲကို ဖက်ထားတာ မဟုတ်လား အဲဒါကြောင့်သာ ဒီနေ့ ဒီလိုနေရာမျိုးမှာ ရပ်နေနိုင်တာပေါ့ ...

ယန်အန်းယု၏ မျက်လုံးထဲရှိ အရိပ်အယောင်တို့မှာလည်း ပြောင်းလဲသွားခဲ့သည်။ သဘာဝကျစွာပင် သူသည်လည်း အားနည်းချက်ကို ပြလိုခြင်း မရှိသည့်အတွက် ချက်ခြင်းဆိုသလို အပြုံးတစ်ပွင့်ဖြင့် ပြန်လည်တုန့်ပြန်လိုက်တော့သည်။ 

“ကျွန်တော်က ကံကောင်းလို့ပါ .. စစ်ယွမ်ကော .. ကောကတော့ ပွဲဦးထွက်တာ ကြာပေမယ့် .. အမြဲတမ်းကို လန်းဆန်းတက်ကြွနေတာပဲနော် ...”

ဟမ့် .. ယွီစစ်ယွမ် .. အခုထိကို မောက်မာတတ်တဲ့ စရိုက်ကို မပြင်နိုင်သေးဘူးနော် ရိုက်ကူးရေးအဖွဲ့တွေကြားမှာလည်း ခင်ဗျားရဲ့ မကောင်းသတင်းတွေ ပျံ့နေတာ ကြားမိပါရဲ့ .. သတိတော့ ထားနေပေါ့ တော်ကြာ ကျောထောက်နောက်ခံပုဂ္ဂိုလ်ကြီးကပါ ကာကွယ်မပေးနိုင်လောက်တဲ့ လူစားမျိုးကို အပြစ်ပြုမိကာမှ .. ဘာတက်လမ်းမှ မကျန်အောင်ကို ပိတ်ဆို့ခံနေရလိမ့်မယ် ...

တစ်ဖက်တွင် .. ယွီစစ်ယွမ်၏ မန်နေဂျာဖြစ်သူ ယန်ဖုန်းကလည်း ချီစန်းနှင့် စကားပြောနေခဲ့သည်။ 

“ချီကော .. ကော ယန်အန်းယုကို ဂရုစိုက်ပေးနေတာ .. ၂ နှစ်တောင် ရှိသွားပြီနော် ...”

“အင်း ...”

ချီစန်းက စိတ်မပါလက်မပါဖြင့် တုန့်ပြန်လိုက်သည်။ 

“ဒါဆို အချိန်တော်တော်လေး ကြာနေပြီလို့တောင် ပြောလို့ရနေပြီ ...””

ယန်ဖုန်းက မချိတင်ကဲဖြစ်ဟန်ဖြင့် ပြုံးကာ ပြောလိုက်သည်။ သူ့အကြည့်တို့မှာလည်း ချက်ခြင်းဆိုသလို ပြောင်းလဲသွားသည်။ 

“ဒါပေမယ့် ... ကောက အနာဂတ်မှာရော ဒီလိုပဲ ဆက်လုပ်နိုင်ပါ့မလား ဆိုတာတော့ ဘယ်သူမှ မသိနိုင်ဘူးနော် ...”

“...”

ထိုစကားကို ကြားလိုက်သည့်အခါ ချီစန်း၏ မျက်နှာ ပျက်ယွင်းသွားတော့သည်။ မူလက တည်ကြည်လေးနက်နေသည့် မျက်နှာထက်တွင် ထိတ်လန့်သည့် အရိပ်အယောင်တို့ စွန်းထင်းသွားတော့၏။ 

ယန်ဖုန်းသည် သဲလွန်စ အရိပ်အယောင်ပါသည့် စကားများကို ဆိုတတ်သည့် လူစားမျိုး ဖြစ်ပေသည်။ ချီစန်းသည် အနုပညာရှင် များစွာကို တာဝန်ယူခဲ့ဖူးသည့်တိုင် အားလုံးက သူ့ကို စည်းကမ်းတင်းကြပ်ကာ သုန်မှုန်သည့် စိတ်ထားပိုင်ရှင်ဟုသာ ယူဆကြသည်။ သူနှင့် အချိန်တစ်ခုကြာ လက်တွဲပြီးလေတိုင်း အားလုံးက မန်နေဂျာပြောင်းရန်သာ စိတ်ကူးခဲ့ကြသည်။ 

“ချီကောကလည်း .. အရမ်းကြီး အတည်မယူလိုက်ပါနဲ့ ကျွန်တော်က ဒီတိုင်း စိုးရိမ်လို့ ပြောလိုက်တာပါ ...”

ယန်ဖုန်း၏ မျက်နှာမှာ သံသယဖြစ်ဖွယ် ကောင်းလောက်အောင်ပင် ပြုံးဖြီးဖြီး ဖြစ်နေပေသည်။ သူတို့နှစ်ဦးမှာ အသက်မွေးဝမ်းကြောင်း တူညီသူများ ဖြစ်ကြသည့်အတွက် တစ်ဦးနှင့်တစ်ဦး မသိမသာ ကြိတ်ပြိုင်နေခဲ့ကြပေသည်။ 

ချီစန်းသည် စကားနှင့် အပြုံးများအား ဖောဖောသီသီ ထုတ်ပြတတ်သူ မဟုတ်၊ သူ့စိတ်ထားမှာလည်း ပြောင်းလွယ်ပြင်လွယ် မဖြစ်သည့်တိုင် .. အရည်အချင်းမှာမူ သိသိသာသာ ထူးချွန်ပြောင်မြောက်လှပေသည်။ မျက်လုံးပါသူတိုင်း သူ့အရည်အချင်းကို ရှင်းလင်းစွာ မြင်နိုင်သည့်အတွက် ယန်ဖုန်းသည် ချီစန်းကို အမြဲ မနာလို မုန်းတီးနေခဲ့ပေသည်။ 

ချီစန်းက နှုတ်ခမ်းကို တင်းတင်းစေ့ကာ စကားတစ်ခွန်းမှ ပြန်မပြောဘဲ သူ့ကို အမှုမထားဟန် သဘောထားကို သိသိသာသာ ထုတ်ပြလာသည့်အတွက် ယန်ဖုန်းသည် နောက်ထပ် စိတ်မကောင်းဖြစ်လေဟန်တစ်ခုကို ထုတ်ပြကာ တမင်တကာ ထပ်ပြောလိုက်တော့သည်။ 

“ဒါပေမယ့် ယန်အန်းယုက ပြုံးပြုံးလေးနဲ့ သည်းခံတတ်တဲ့ လူစားမျိုးဆိုတော့ .. အနာဂတ်မှာလည်း ကောရဲ့ နောက်ကိုပဲ ဆက်လိုက်မယ်ထင်တယ်နော် .. ဒါပေမယ့် ...”

“တစ်ဆိတ်လောက်ပါ .. အားနာပါတယ် ...”

ထိုစဉ် ထန်းကော်က သူ့စကားများကို ဖြတ်ပြောလိုက်သည်။ 

“မင်းက ဘယ်သူလဲ ...”

ယန်ဖုန်းက မျက်မှောင်ကြုတ်ကာ မေးလိုက်သည်။ သူ့စိတ်ထဲတွင်လည်း အနည်းငယ် အနှောင့်အယှက် ဖြစ်သွားတော့၏။ 

“ထန်းကော်ပါ .. သက်တော်စောင့်တစ်ယောက်ပေါ့ ...”

ထို့နောက် သူက ချီစန်း၏ အရှေ့တွင် ရပ်လိုက်သည်။ သူ့ခန္ဓာကိုယ်က နောက်တွင် ရှိနေသည့် ၁၉၀ စင်တီမီတာကျော် အမျိုးသားကို လုံးဝဥဿုံ မကာပေးနိုင်ကြောင်း သိထားသည့်တိုင် မကောင်းသည့် အကြံအစည် ရှိနေသည့် ယန်ဖုန်းက ချီစန်းအနားသို့ ချဉ်းကပ်ကာ တမင်တကာ ရန်စနေကြောင်း သိလိုက်ရသည်နှင့် တစ်ပြိုင်နက် အနားသို့ အပြေးအလွှား ရောက်လာမိတော့သည်။ 

“ထန် .. ဟားဟား ...”

ယန်ဖုန်းမှာ ဟန်မဆောင်နိုင်အောင်ပင် ရယ်မောမိသွားတော့၏။ ထိုနာမည်မှာ များစွာ ရယ်စရာ ကောင်းလှပေသည်။ ထိုလူငယ်လေးမှာ ယန်အန်းယု၏ ဘေးတွင် အချိန်ပြည့် ရှိနေတတ်သူ ဖြစ်ရမည်ဟုလည်း တိတ်တခိုး ကောက်ချက်ချလိုက်၏။

သူက ထန်းကော်ကို စုန်ချည်ဆန်ချည် စိုက်ကြည့်ကာ အကဲခတ်လိုက်သည်။ တစ်ဖက်လူ၏ အရပ်အမောင်းမှာ သူနှင့် ချီစန်းထက် များစွာ ပိုပုသည့်အတွက် ပျမ်းမျှ ၁၇၀ စင်တီမီတာ ကျော်ကျော်ခန့်သာ ရှိလိမ့်မည်ဟု ခန့်မှန်းလိုက်သည်။ ထိုသူမှာ သူ တွေ့ဖူးသည့် သမားရိုးကျ သက်တော်စောင့်များနှင့် များစွာ ကွဲပြားလှပေသည်။ 

ထန်းကော်မှာ အသက်အရွယ်အားဖြင့်လည်း ကြီးသေးဟန်မတူ၊ ၂၅ နှစ် ဝန်းကျင်ခန့်သာ ရှိပေလိမ့်ဦးမည်။ သို့သော် နုနယ်ကြည်စင်သည့် ကလေးမျက်နှာလေးကို ပိုင်ဆိုင်ထားသောကြောင့် ..မည်သို့ပင် အကဲခတ်ပါစေ သူ့ပုံစံမှာ အားကိုးရသည့် ဖြုံလောက်စရာ သက်တော်စောင့်ပုံစံနှင့် လားလားမျှပင် မဆင်တူလှချေ။ ထိုအစား ဟိုဟိုဒီဒီ ပြေးလွှားကာ ရေနှင့် လက်ဖက်ရည် သယ်ပေးရသည့် လက်ထောက်လေးနှင့်သာ ပိုပြီး တူလှသေးသည်။ 

“ဟမ့် .. မင်းလိုလူကလည်း သက်တော်စောင့် ဖြစ်နိုင်သေးတယ်ပေါ့ ...”

“ယန်ဖုန်း .. တော်လောက်ပြီ ...”

ချီစန်းက မျက်မှောင်ကြုတ်ကာ ဝင်ပြောလိုက်သည်။ 

“ဟားဟား .. စိတ်မဆိုးပါနဲ့ ချီကောရဲ့ .. ကျွန်တော်က ဒီသက်တော်စောင့်ညီလေးက တော်တော်လေး ထူးခြားတယ်လို့ တွေးမိရုံလေးတင်ပါ ...”

ယန်ဖုန်းက သရော်လိုက်သည်။ ချီစန်းက ထန်းကော်ကို ကာကွယ်နေခြင်းဖြစ်ကြောင်း သူလည်း သဘောပေါက်လိုက်ပေရာ ထို သက်တော်စောင့်ငယ်လေး၏ ခေါင်းကို ပုတ်ရန် လက်ကို ဆန့်ထုတ်လျက် မခံချင်စဖွယ် စကားများကို တမင်တကာ ပြောလိုက်သည်။ 

မထင်မှတ်ထားစွာဖြင့် ... ထန်းကော်၏ အကြည့်တို့မှာ ချက်ခြင်းဆိုသလို အေးစက်သွားတော့သည်။ သူက ဆန့်ထွက်လာသည့် ယန်ဖုန်း၏ လက်ကို ရိုက်ချကာ သူ့စွမ်းရည်အကြောင်း မသိသည့် ထိုသူအား ပိတ်ဆို့ထားလိုက်သည်။ 

“မင်း ...”

ယန်ဖုန်းမှာ အရှက်တကွဲ ဖြစ်သွားတော့သည်။ သူက ရုန်းထွက်ရန် ကြိုးစားလိုက်သေးသော်ငြား သူ့လက်ကို အနည်းငယ် လှုပ်လိုက်လေတိုင်း ထန်းကော်၏ ခွန်အားတို့က ပိုမိုကာ တင်းကြပ်လာတော့သည်။ မယုံနိုင်စရာပင်။ ထို သက်တော်စောင့်လေးက ဤမျှအထိ ခွန်အားရှိလိမ့်မည်ဟု သူ စိတ်ပင် ကူးမထားခဲ့ဖူးချေ။ 

ထန်းကော်က သူ့လက်ကောက်ဝတ်ကိုသာ ဆွဲလိမ်ထားခဲ့၏။ သူသာ ဆန္ဒရှိပါလျှင် ပုခုံးရိုးတစ်ခုလုံးကို ရိုက်ချိုးကာပင် ကိုင်ပေါက်လိုက်နိုင်သော်ငြား လက်ရှိအခြေအနေက ထိုသို့လုပ်ရန် အခွင့်မသာချေ။ 

“မစ္စတာယန် .. ကျွန်တော်က သက်တော်စောင့်ပုံစံနဲ့ မတူဘူး ဆိုပေမယ့် အရည်အချင်းပိုင်းအရတော့ .. သက်တော်စောင့်တစ်ဦးမှာ ရှိသင့်ရှိထိုက်တာအကုန် ရှိပါတယ် ..."

“ပြီးတော့ ကျွန်တော်က ဘယ်သူ့ကို ကာကွယ်ပေးရမယ် ဆိုတာကိုလည်း ကောင်းကောင်းကြီး သိထားတယ် .. သခင်လေးယန် တစ်ယောက်တည်းတင် မဟုတ်ဘဲ မစ္စတာချီကိုပါ ကာကွယ်ပေးရမယ် ဆိုတာကိုရောပေါ့ ...”

ချက်ခြင်းဆိုသလို ချီစန်း၏ မျက်ဝန်းများ အောက်ခြေမှလည်း တစ်စုံတစ်ခု ထွက်ပေါ်လာသည့်အတွက် ယန်ဖုန်းသည် ကြောင်အမိသွားတော့သည်။ 

“မစ္စတာယန် ကျေးဇူးပြုပြီး စိတ်ထဲမှာ မှတ်ထားပေးပါ ချီကောက အရမ်းကို ကောင်းတဲ့ လူကောင်းတစ်ယောက်ပါ ...”

သူက ယန်ဖုန်းကို စူးစူးရဲရဲ စိုက်ကြည့်ကာ ဂုဏ်ယူဝံ့ကြွားစွာဖြင့် ပြောလိုက်သည်။ 

“ချီကောက အရမ်းကို ကောင်းတာ သူက အရမ်းကို သိုသိပ်ချုပ်တည်းတတ်တယ်...ဘယ်လို အတင်းပြောရမယ် ဆိုတာကို မသိဘူး...တစ်ခါတစ်လေမှာ တအားကို စည်းကမ်းကြီးပေမယ့် ခင်ဗျားထက်တော့ အဆတစ်ရာ .. အဆတစ်ထောင်မကကို ပိုပြီး သာတယ် ...”

“...”

ချီစန်း၏ အကြည့်တို့ ပြောင်းလဲသွားကာ မူလက တွန့်စုနေသည့် မျက်ခုံးများလည်း ပြန်လည်ကာ ပြေလျော့သွားတော့သည်။ 

“ငါ .. ငါ သိပါပြီ အဲဒါကြောင့် လွှတ်ပေးပါတော့ ...”

ယန်ဖုန်းမှာ ဒေါသဖြစ်ရလွန်း၍ မျက်နှာတစ်ခုလုံးပင် ခရမ်းရောင် သမ်းနေပြီ ဖြစ်သည်။ 

၎င်းကို မြင်လိုက်ကာမှ ထန်းကော်လည်း လုံလောက်ပြီဟု ခံစားရကာ လွှတ်ပေးလိုက်တော့သည်။ ယန်ဖုန်းက သူနှင့် ချီစန်းကို စူးစူးရဲရဲစိုက်ကြည့်ကာ အမြန် ပြန်ပြေးသွားတော့သည်။ ယနေ့ ဖြစ်ခဲ့သမျှ အားလုံးကို သူ့နှလုံးသားထဲတွင် ကျိန်းသေ တေးမှတ်ထားတော့မည် ဖြစ်သည်။ 

“အနာဂတ်မှာ ဒီလိုလူစားတွေနဲ့ ဖက်မပြိုင်နဲ့ ...”

ချီစန်းက ပြောလိုက်သည်။ သူ့လက်များက ထန်းကော်၏ ပုခုံးကို ပုတ်ပေးလိုဟန်ဖြင့် ရှေ့သို့ တိုးလာမိကာ ခေါင်းကို ပွတ်ပေးလိုက်လိုစိတ်များပင် တဖွားဖွား ဖြစ်ပေါ်နေခဲ့သည်။ သို့သော် ထိုအကြံကို စွန့်လွှတ်ကာ လက်ကို ချက်ခြင်း နောက်ပြန်ဆုတ်လိုက်၏။ 

ထန်းကော်က ခေါင်းငြိမ့်ပြလိုက်သည်။ 

“အင်း .. ကျွန်တော်လည်း သူ့ရဲ့ ကံဆိုးမှုတွေ အကူးမခံချင်ပါဘူး ...”

“နေ့လည်စာ ဘာစားချင်လဲ ...”

ချီစန်းက ရုတ်တရက် ထမေးလိုက်သည်။ 

“ဟမ် ...”

ထန်းကော်က နားမလည်စွာဖြင့် ပြန်မေးလိုက်သည်။ 

“ချီကော ပြောတော့ကျ B မြို့ကို ရောက်တာနဲ့ တန်းပြီး အလုပ်ရှုပ်မှာမလို့ နေ့လည်စာကို  ရိုက်ကူးရေးအဖွဲ့သားတွေနဲ့ အတူတူ ထမင်းဘူးပဲ စားမှာဆို ...”

အဲဒါက အရင်ကလေ .. အခုက တူမှမတူတာ ...

ချီစန်းက စိတ်ထဲမှသာ ရေရွတ်လိုက်သည်။ သို့သော် တစ်ဖက်လူကို ရှည်ရှည်ဝေးဝေး ရှင်းမပြလိုသည့်အတွက် ခပ်တိုတိုသာ ပြောလိုက်တော့၏။ 

“မင်းကို လိုက်ကျွေးမလို့ ဘာစားချင်လဲ ...”

“တကယ်ကြီး လိုက်ကျွေးမလို့လား ..."

ထန်းကော်၏ မျက်လုံးတို့ ဝင်းလက်တောက်ပသွားတော့သည်။ အသေအချာ စဉ်းစားကြည့်လိုက်သည့်အခါ ချီစန်းသည် အမြဲလိုလို စကားကို အတည်အတံ့သာ ပြောတတ်သူတစ်ဦးဖြစ်ကြောင်း အမှတ်ရသွားသည့်အတွက် ဝမ်းသာအားရပြုံးကာ ပြောလိုက်တော့သည်။ 

“မာလာဟော့ပေါ့ ..   စပ်လေကောင်းလေပဲ ...”

ချီစန်း “အင်း ....”

ယန်အန်းယုကမူ သူ့မန်နေဂျာနှင့် သက်တော်စောင့် ဖြစ်သူတို့က သူ့အား စွန့်ပစ်ကာ တိတ်တိတ်လေး ခိုးထွက်၍ အရသာရှိသည့် စားစရာများကို သွားစားကြမည်ဖြစ်ကြောင်း လုံးဝ မသိသေးချေ။ 

“Challenge First Time” ၏ သတ္တမမြောက်အပိုင်း ရိုက်ကူးရေးကို တရားဝင် စတင်လိုက်တော့သည်။ လေထုအခြေအနေ မြူးကြွလာစေရန်အလို့ငှာ ပါဝင်သူ ခြောက်ဦးနှင့်အတူ လျှာခလုတ်တိုက်စကား(tongue twister) ပါဝင်သည့် ဂိမ်းအချို့ ကစားရင်း ရိုက်ကူးရေးကို အစပျိုးလိုက်သည်။ ထို့နောက်တွင်မူ အားလုံးက ယွီစစ်ယွမ်ကို လှိုက်လှိုက်လှဲလှဲ ကြိုဆိုလိုက်ကြသည်။

“စစ်ယွမ်ရေ ငါတို့ပရိုဂရမ်ကို ရောက်လာသမျှ လူတိုင်းကတော့ သတ္တိအရာမှာ ဂုဏ်ပြုထိုက်တဲ့ စစ်သူကြီးတွေချည်းပဲနော် ...”

အစ်ကိုကြီး ဟုန်ယောင်က သူ့အနားသို့ ရောက်လာကာ ပုခုံးကို ပုတ်၍ စနောက်ကျီစယ်လိုက်သည်။ 

“စစ်သူကြီးဆိုတာက ...”

ယွီစစ်ယွမ်က နားလည်ဟန် မတူ၊ သူ့အမူအယာမှာ ဗလာသက်သက် ဖြစ်နေပေသည်။ 

“လောင်ဟုန် ပြောချင်တာက .. မင်းအနေနဲ့ ဒီပရိုဂရမ်အဖွဲ့ရဲ့ အချိန်မရွေး ကျင်းတူးတတ်တဲ့ လုပ်ရပ်အတွက် ကြိုပြင်ဆင်ထားရမယ်လို့ ပြောတာ ..."

ဖန်ယိရှန်က ဝင်ရှင်းပြလိုက်သည်။ သူ ပြောပြီးသည်နှင့်တစ်ပြိုင်နက် ဝါးလုံးကွဲ ရယ်မောသံများ ထွက်ပေါ်လာတော့သည်။ 

“အိုက်ယား ဟုန်ကော . ဖန်ကော.. ကောတို့က စစ်ယွမ်ကို မခြောက်ကြပါနဲ့ သူသာ တအား ကြောက်လန့်သွားရင် သူ့ဖန်တွေက ကျွန်မတို့ကို ကမ္ဘာမကြေ ဖြစ်တော့မှာနော် ...”

ရှဲ့ယန်ကပါ ဝင်ရောက်စနောက်လိုက်သည်။ 

“ငါတို့က ဆယ်ကျော်သက် အနုပညာရှင်လေးတွေနဲ့ အများကြီးကို အလုပ်တွဲလုပ်နေရတာပဲ ကြည့်ပါလား ငါတို့တွေ ရှောင်ယုတို့ နွော်ရှီတို့ ထန်းရှောင်တို့ကို ဘယ်လောက်တောင် ကောင်းကောင်းကြီး ဂရုစိုက်ပေးထားလဲ ဆိုတာကို ...”

ဖန်ယိရှန်က ယန်အန်းယုနှင့် အခြားလူများကို ညွှန်ပြရင်း ပြောလိုက်သည်။ 

“ဒါပေါ့ ...”

ယန်အန်းယုက အထူးတလည် မျက်နှာချိုသွေးဟန်ဖြင့် ခေါင်းငြိမ့်ပြလိုက်သည်။ 

“ဖန်ကောနဲ့ ဟုန်ကောတို့ရဲ့ ကျေးဇူးကြောင့် ကျွန်တော်တို့မှာ နေ့တိုင်းကို ပျော်ရွှင်မြူးကြွနေကြရတာလေ ပြီးတော့ ကျွန်တော့်အမြင်အရတော့လေ ဒီပရိုဂရမ်မှာ ပါဝင်ခွင့်ရလိုက်တာကနေတစ်ဆင့် နေရာတွေ အများကြီးကိုလည်း ရောက်ဖူးသွားတယ် ပြီးတော့ လူနေမှုဘဝပုံစံမျိုးစုံကိုလည်း ခံစားဖူးသွားတယ် အဲဒါအပြင် ရှဲ့ယန်ကျဲနဲ့ အတူတူ အရသာရှိတာတွေ အများကြီးလည်း စားနိုင်တယ်လေ ဟားဟား ...”

“ဒါဆိုရင်တော့ .. စိတ်ပူပေးကြတဲ့အတွက် အားလုံးကို ကျေးဇူးတင်ပါတယ် ...”

ယွီစစ်ယွမ်က ရယ်ဟဟဖြင့် ပြောလိုက်လေသည်။ 

👥️