Chapter 59

👥️Chapter 59

B မြို့တော် ၊ မြို့တော်ဆေးရုံ၌ ...

“Challenge First Time” ၏ သတ္တအပိုင်း နောက်ဆုံးအခန်းကို ရိုက်ကူးစဉ်အတွင်း .. မြင်းစီးကာ မြားပစ်ရသည့် ပြိုင်ပွဲ၌ ယွီစစ်ယွမ်သည် အလွန်အမင်း လျင်မြန်စွာဖြင့် ပြေးထွက်သွားလိမ့်မည်ဟု မည်သူမှ ထင်မထားမိခဲ့ချေ။ ထိုမျှသာမက သူသည် အနီးအနားရှိ အသင်းဖော် ထန်းရှောင်ထံသို့ပင် တစ်ဟုန်ထိုး ပြေးဝင်သွားလိုက်သေးသည်။ ပြင်းလွန်းလှသည့် အရှိန်ကြောင့် သူ စီးနင်းထားသည့် မြင်းမှာ ကြောက်လန့်ကာ အထိန်းအကွပ် မဲ့သွားသည့်အတွက် သူ့ကို ကျောပေါ်မှ ခါချလိုက်သောကြောင့် ခြေထောက်တွင် ထိခိုက်ဒဏ်ရာ ရသွားတော့သည်။ 

ယွီစစ်ယွမ်ကို အရေးပေါ်ခန်းထဲသို့ ပို့လိုက်ပြီးနောက် ဒါရိုက်တာသည် သူတို့၏ အလေးနက်ဆုံးသော ပူပန်မှုကို ပြသရန်အလို့ငှာ ဝန်ထမ်းများနှင့် ရိုက်ကူးရေးအဖွဲ့သားအားလုံးကို ဆေးရုံသို့ ခေါ်လာခဲ့လိုက်သည်။ ဟုန်ယဲ့နှင့် ပါဝင်သူ ငါးဦးအပြင် ရှန်းဟွမ်မီဒီယာမှ တာဝန်ရှိသူများကပါ ထိုနေရာသို့ ရောက်ရှိနေခဲ့ကြသည်။ 

ယန်အန်းယုနှင့် ချင်နွော်ရှီတို့ကလည်း အတူတူ ရောက်လာခဲ့ကြကာ မြေအောက်ကားပါကင်တွင် ထန်းရှောင်နှင့် ဆုံတွေ့မိလိုက်ကြသည်။ 

“ထန်းရှောင် မင်းလုပ်ခဲ့တာလား ...”

ယန်အန်းယုက မေးလိုက်သည်။ 

ထိုနေ့က ယွီစစ်ယွမ်သည် ယန်အန်းယုအပေါ် ညစ်ပတ်သည့် လှည့်ကွက်များ အသုံးပြုရန် ကြံစည်ထားခဲ့ခြင်း ဖြစ်သည်။ ယန်အန်းယုက အနောက်တွင် ရှိနေသည့် ထန်းရှောင်၏ တမင်တကာ နှောင့်ယှက်မှုကြောင့် ယွီစစ်ယွမ်၏ မြင်း ရုတ်တရက် ထိတ်လန့်သွားသည်ကို မြင်တွေ့ခဲ့သည်။ နောက်ဆုံးတွင်မူ ယွီစစ်ယွမ်၏  အခြားလူကို ဒဏ်ရာရအောင်လုပ်မည့် အကြံအစည် ပျက်စီးသွားကာ သူကိုယ်တိုင်သာ ထိခိုက်ဒဏ်ရာရပြီး ဆေးရုံ အရေးပေါ်ခန်းသို့ ရောက်သွားခဲ့ရသည်။ 

“မတော်တဆပါ ...”

“တကယ်ကို မတော်တဆပါပဲ .. လူလုပ် မတော်တဆမှုပေါ့ ...”

ယန်အန်းယုက ပွင့်ပွင့်လင်းလင်း ထုတ်မပြောသည့်တိုင် သံသယစိတ်များ ရှိနေဆဲ ဖြစ်သည်။ 

“ထန်းရှောင် .. မင်း ဘာလို့ ငါ့ကို ကူညီခဲ့တာလဲ ...”

ထန်းရှောင်က ပြုံးပြကာ သူ့ပုခုံးကို ရုတ်တရက် ဆွဲဖက်လိုက်သည်။ 

“မင်းကို ကူညီတာက ငါ့ကိုယ်ငါ ကူညီတဲ့ သဘောပဲလေ ရှောင်ယု ငါတို့က အကြွင်းမဲ့  သူငယ်ချင်းကောင်းတွေလေ ...”

ယန်အန်းယုမှာ ကြက်သီးမွှေးညှင်းများ ထကာ ချမ်းစိမ့်စိမ့် ဖြစ်သွားပြီး ထန်းရှောင်၏ လက်ကို ချက်ခြင်း ဖယ်ချလိုက်သည်။ သူက မျက်ခုံးနှစ်ဖက်ကို တွန့်ထားလျက် ပြောလိုက်၏။ 

“ဒီနားမှာ ဘယ်သူမှ မရှိဘူး သရုပ်ဆောင်တာတွေကို နောက်အခေါက်တွေအတွက် သိမ်းထား .. မင်းသာ ဒီထက်ပိုပြီး နည်းနည်းပါးပါး ရိုးသားခဲ့ရင် ပြီးတော့ လှည့်ကွက်တွေ သုံးတာလည်း လျော့နိုင်ရင်တော့ .. ငါတို့တွေ သူငယ်ချင်း ဖြစ်ကောင်းဖြစ်နိုင်ပါတယ် ...”

ထို့နောက် သူက ထန်းရှောင်ထံမှ စကားပြန်ကို မစောင့်ဘဲ ချက်ခြင်း လှည့်ထွက်လာလိုက်သည်။ 

B မြို့တွင် နောက်ထပ် နှစ်ရက်ခန့် ဆက်နေပြီးနောက် ယန်အန်းယုနှင့် ချင်နွော်ရှီတို့သည် S မြို့သို့ လေယာဉ်ဖြင့် ပြန်လာခဲ့လိုက်ကြသည်။ 

“အခု ဖြစ်သွားတဲ့ ကိစ္စကြောင့်နဲ့ .. ယန်ကျွယ့်တော့ နောက်တစ်ခါ ခေါင်းခဲရပြန်ဦးမှာပဲ ...”

ချင်နွော်ရှီက မသိလိုက်မသိဘာသာဖြင့် ရေရွတ်လိုက်သည်။ 

ယန်အန်းယုမှာလည်း အံ့ဩသွားရကာ .. နတ်ဆိုးဆန်စွာ  ပြုံးရင်း ပြောလိုက်၏။ 

“ဟီးဟီး .. နွော်ရှီ ငါတစ်ခုခုကို သတိပြုမိသွားပြီ ..."

“ဘာကိုလဲ ...”

“အရင်ကဆို မင်းက “ဥက္ကဌယန်” ဆိုပြီး အေးစက်စက်ကြီး ခေါ်တာလေ ဒါပေမယ့် အခုနောက်ပိုင်းကျ ငါ့ကောရဲ့ နာမည်ကို ခေါ်တာ တစ်ဖြည်းဖြည်း အကြိမ်ရေ စိပ်လာပြီနော် .. ပြီးတော့ သူနဲ့ ပတ်သက်ပြီး စိတ်ပူပန်တာလေးတွေလည်း တိုးလာသလိုပဲ ...”

ချင်နွော်ရှီက ကြောင်အသွားကာ ချက်ခြင်း စကားလမ်းကြောင်းပြောင်းလိုက်သည်။ 

“ရှောင်ယု .. ဘာလို့ ဒီလို အဓိပ္ပါယ်မရှိတဲ့ ကိစ္စတွေကိုပဲ လိုက်အာရုံစိုက်နေတာလဲ ...”

“အဓိပ္ပါယ် မရှိတဲ့ကိစ္စ မဟုတ်ပါဘူး ဒီလောက် အရေးကြီးနေတာကို ...”

ယန်အန်းယုက ကျယ်ကျယ်လောင်လောင် အော်ပြောကာ ရယ်မောလိုက်သည်။ 

“ဟားဟား .. ထားပါ ငါ မင်းကို မစတော့ပါဘူး ဒါပေမယ့် တစ်ခုတော့ မှတ်ထားနော် .. တစ်နေကုန် ကိစ္စမျိုးစုံနဲ့ အလုပ်များနေရတဲ့ ငါတို့ရဲ့ ဥက္ကဌကြီးယန်ကို ဂရုစိုက်ကြောင်း စိုးရိမ်ကြောင်း သေချာပေါက် ထုတ်ပြရမယ် ထုတ်ပြီလား ...”

ချင်နွော်ရှီ “...”

ဤတစ်ခေါက် ယွီစစ်ယွမ် ဒဏ်ရာ ရသွားသည့် ကိစ္စကြောင့် ဆူညံမှုများ များစွာ ထွက်ပေါ်လာခဲ့သည်။ ဤတစ်ကြိမ်တွင် “မစ္စတာအရူးယွီ” သည် သူ အလိုရှိသည့် သက်ရောက်မှုမျိုးကို ပိုင်ဆိုင်လိုက်ရကာ ယန်အန်းယု၏ ဝင်ရောက်နှောင့်ယှက်မှု မရှိဘဲ အမျိုးမျိုးသော မီဒီယာများနှင့် ဝဘ်ဆိုဒ်များ၏ ထိပ်သီးသတင်းတစ်ပုဒ်အဖြစ် အပြည့်အဝ အာရုံစိုက်ခြင်းကို ခံလိုက်ရတော့သည်။ 

သတ္တမအပိုင်းကို ထုတ်လွှင့်ပြသပြီးသည့် အခါတွင်လည်း သူ၏ ဒဏ်ရာအပေါ်သို့သာ အားလုံးက အကြီးအကျယ် အာရုံစိုက်နေကြသည့်အတွက် ယန်အန်းယုနှင့် တံငါရွာတွင် ဖြစ်ခဲ့သည့် အသေးအဖွဲ ကိစ္စလေးများမှာ အလိုလို မျက်ကွယ်ပြုခြင်း ခံလိုက်ရတော့သည်။

ယန်အန်းယုအား မြင်းစီးသည့် ကိစ္စနှင့် ပတ်သက်၍ ဝေဖန်ပြစ်တင်ကြသည့် anti များကမူ ရှိနေဆဲ ဖြစ်ကာ ထန်းရှောင်ပင်လျှင် ဆွဲထည့်ခံလိုက်ရသေးသည်။ သို့သော် ယန်အန်းယုက ထိုကဲ့သို့သော ရန်ပွဲအသေးစားလေးများကို စိတ်မဝင်စား၊ ကောင်းကောင်းအိပ်၊ ကောင်းကောင်းစားကာ anti များကို သူတို့အချင်းချင်း ဆူညံပွက်လောရိုက်နေခွင့် ပေးထားလိုက်သည်။ အနုပညာလောကမှာ တစ်ခါတစ်ရံတွင် တည်ငြိမ်အေးဆေးလှသည့်တိုင် ဖီလာအားဖြင့် ပျင်းရိငြီးငွေ့ဖွယ်လည်း ကောင်းလွန်းလှပေသည်။ 

တစ်ပတ်ခန့် ကြာပြီးနောက် .. “Challenge First Time” ၏ သတ္တမမြောက်အပိုင်းကို ရုပ်သံထုတ်လွှင့် ပြသခဲ့သည်။ မြူးထူးတက်ကြွသည့် နောက်ခံသီချင်းသံနှင့်အတူ ယန်အန်းယုနှင့် အခြား ဧည့်သည်တော်များသည် စိတ်ပါလက်ပါ ကခုန်ရင်း ကြည့်ရှုသူများအား လက်ဝှေ့ယမ်းကာ နှုတ်ဆက်လိုက်ကြသည်။ ဤသို့ဖြင့် "Challenge First Time” ၏ ဒုတိယ season ကို အောင်မြင်စွာ အဆုံးသတ်နိုင်ခဲ့၏။ 

ထို့နောက်တွင် လျှို့ဝှက်သည်းဖို အချစ်ဇာတ်ညွှန်းတစ်ခုဖြစ်သည့် “Love Attack for 29 days” ၏ တရားဝင်အကောင့်မှ သတင်းအချို့ကို တင်လာခဲ့သည်။ မူလက ရွေးချယ်ထားသည့် သရုပ်ဆောင် ယွီစစ်ယွမ်သည် မတော်တဆ ထိခိုက်ဒဏ်ရာ ရသွားသည့်အတွက် ဒါရိုက်တာနှင့် ဇာတ်ညွှန်းရေးသူတို့သည် အချိန်ကြာမြင့်စွာ ဆွေးနွေးခဲ့ကြပြီးနောက် အဘက်ဘက်မှ စဉ်းစားကာ ယန်အန်းယုကို ဖိတ်ခေါ်ရန်သာ ဆုံးဖြတ်လိုက်ကြလေသည်။ 

ထိုသတင်းကြောင့် ယွီစစ်ယွမ်၏ ပရိသတ်များမှာ ဒေါသများ ပေါက်ကွဲသွားကြသည်။ ရွေးချယ်စရာ သရုပ်ဆောင်များ အများအပြား ရှိနေသည့်တိုင် ရိုက်ကူးရေးအဖွဲ့သည် ယန်အန်းယုကိုမှ ရွေးချယ်ခဲ့ပေသည်။ 

****

S မြို့တော် အနောက်ဘက်ခရိုင် ဝမ်ရှင်းကျင်းယွမ်၌ ...

“ချီကော .. ကျွန်တော် .. ကျွန်တော်က တကယ်ကြီး လူငယ်အချစ်ဇာတ်လမ်းတွဲထဲမှာ သရုပ်ဆောင်ရမှာလား ပြီးတော့ .. ဒါကြီးက ယွီစစ်ယွမ် သရုပ်ဆောင်ဖို့ လုပ်ထားတဲ့ ဇာတ်ကောင်ကြီးလေ ...”

ယန်အန်းယုက ဇာတ်ညွှန်းကို လှန်လှောကြည့်ပြီးနောက် အလွန် အံ့ဩသွားမိသည်။ 

အခေါက်တိုင်းလိုလိုကို တိုက်ဆိုင်နေတော့တာပဲ ...

“အင်း ...”

ချီစန်းက လေသံဖြင့်သာ ပြန်တုန့်ပြန်လိုက်သည်။ 

“ဟားဟား .. ဒါ ကျွန်တော့်အတွက် အချစ်ဇာတ်လမ်းတွဲထဲမှာ ပထမဆုံးအကြိမ် သရုပ်ဆောင်ဖူးတာပဲ ...”

ယန်အန်းယုက ချက်ခြင်း စိတ်ဝင်စားသွား၏။ 

“အေးစက်ခက်ထန်ပြီး အာဏာရှင်ဆန်တဲ့ ဥက္ကဌနေရာကနေ သရုပ်ဆောင်ရမှာလား ဇာတ်လိုက်မိန်းကလေးကို အတင်း ဖိအားပေးပြီး ခန္ဓာကိုယ် ရောင်းစားဖို့ စာချုပ်ချုပ်ခိုင်းတာမျိုးလေ .. စကား တစ်ခွန်းချင်းစီတိုင်းက အရမ်းကို အေးစက်ခက်ထန်နေပေမယ့် .. အကြည့်တွေကတော့ တုန့်ဆိုင်းမှုနဲ့ ပြည့်နေတာမျိုးလား ...”

“အာ ...”

ထန်းကော်မှာ မျက်ခုံးပင် လှုပ်မိသွားသည်။ 

“ဒီလောက်ကြီးအထိ အလွန်အကျူးကြီးတော့ မဟုတ်ပါဘူး သခင်လေးရဲ့ .. ဇာတ်ညွှန်းကိုရော ဖတ်ပြီးပြီလား ...”

“သခင်လေးက ဉာဏ်ရည်မြင့်မားပြီး အောင်မြင်ကျော်ကြားပေမယ့် စိတ်အပြောင်းအလဲမြန်တဲ့ သခင်လေး နေရာကနေ သရုပ်ဆောင်ရမှာ .. အစပိုင်းမှာ လူသတ်မှုထဲ ပတ်သက်မိလို့ ရဲအရာရှိဖြစ်တဲ့ အမျိုးသမီး ဇာတ်လိုက်ရဲ့ လူသတ်သမားဆိုပြီး သံသယဝင်တာကို ခံရလိမ့်မယ် အဲဒီ့ကနေမှ ဇာတ်ကြောင်းက တစ်ဖြည်းဖြည်း ဇာတ်ရည်လည်သွားမှာ ချစ်ခန်းကြိုက်ခန်းတွေပဲ မဟုတ်ဘူး လျှို့ဝှက်သည်းဖို အမှုအခင်းတွေကို ဖြေရှင်းရတဲ့ အပိုင်းတွေလည်း အများကြီး ပါတယ် ...”

ထန်းကော်က စကားလုံးများစွာကို အသက်မရှူစတမ်း တရစပ် ပြောသွားလိုက်သည်။ အသာတကြည် နားထောင်နေသည့် ယန်အန်းယုမှာလည်း ကြောင်အသွားရကာ ဇာတ်ညွှန်းကို ချက်ခြင်း ပြန်ဖတ်လိုက်မိ၏။ 

ချီစန်းက မျက်မှောင်ကြုတ်ကာ အနည်းငယ် စိတ်တိုနေဟန်ဖြင့် ပြောလိုက်သည်။ 

“ထန်းကော် ပြောသလောက်လည်း အလေးအနက်ကြီးတော့ မဟုတ်ပါဘူး ယန်အန်းယု ဒီရက်ပိုင်းအတွင်း ဇာတ်ညွှန်းကို ခဏခဏ ပြန်ဖတ်ထား  အပြင်လည်း မထွက်ရဘူး မစ္စတာယီနဲ့လည်း မတွေ့ရဘူး ...”

“အိုး ...”

ယန်အန်းယုက နာခံမှု အပြည့်ဖြင့် လက်ခံလိုက်သည်။ ခင်ပွန်းဖြစ်သူနှင့် မတွေ့ရဟု တားမြစ်ခံရခြင်းမှာ အလွန် ရက်စက်သည့် တားမြစ်ချက် ဖြစ်သည့်တိုင် ဤနှစ်ရက်အတွင်း ယီချန်းယန်သည် အခြားပြည်နယ်တစ်ခုတွင် ရှိနေရမည် ဖြစ်သည့်အတွက် .. တစ်ဦးနှင့်တစ်ဦး တွေ့နိုင်လိမ့်မည် မဟုတ်ချေ။ 

“ချီကော .. ကောက အခုတလော ထန်းကော်ကို ပိုပိုပြီး ချီးကျူးလာသလိုပဲနော် ...”

ယန်အန်းယုက သာမန်ကာလျှံကာ မှတ်ချက်ပြုလိုက်သည်။ 

“ဟမ် .. သူလား ...”

တုန့်ပြန်ရာ၌ နှေးကွေးတတ်သူ ထန်းကော်မှာမူ အလွန် အံ့အားသင့်သွားတော့သည်။ 

“တကယ်ပါဆို ...”

ယန်အန်းယုက ထပ်တလဲလဲ ခေါင်းငြိမ့်ပြလိုက်သည်။ 

ချီစန်းက သူ့ကို စူးစူးရဲရဲ စိုက်ကြည့်လိုက်၏။ 

“ဇာတ်ညွှန်းကို ကောင်းကောင်းဖတ်ထား ကိုယ့်ကိုယ်ကိုယ်လည်း သေချာ ဂရုစိုက်ဦး ...”

“အိုး ...”

ယန်အန်းယုက အံ့ဩသွားသည်။ 

ချီကောက လျှို့ဝှက်ချက် အဖော်ထုတ်ခံရလို့ ရှက်သွားတာများလား ...

****

နှစ်ရက်ခန့် ကြာပြီးနောက် .. ယန်အန်းယုသည် ဒါရိုက်တာနှင့် ဇာတ်ညွှန်းရေးဆရာကို တွေ့ဆုံရန် စတူဒီယိုသို့ ချီစန်းနှင့်အတူ ထွက်လာခဲ့သည်။ ထိုစတူဒီယိုသို့ ရောက်သည့်အခါ ကျန်းကျီချမ်ကို တွေ့လိုက်ရ၏။

“Shawn ကော ...”

သူက ဝမ်းသာအားရ နှုတ်ဆက်လိုက်သည်။ 

ကျန်းကျီချမ်က ခပ်ဖျော့ဖျော့ ပြုံးပြကာ ပြန်နှုတ်ဆက်လိုက်၏။

တစ်ခဏမျှ စကားလက်ဆုံ ကျပြီးနောက် ယန်အန်းယုသည် ကျန်းကျီချမ်မှာ “Love Attack For 29 Days” ကို ရိုက်ကူးမည့် ဒါရိုက်တာနှင့် သူငယ်ချင်း ဖြစ်နေသည့်အတွက် ဇာတ်လမ်းအတွက် ဇာတ်ဝင်တေးကို ရေးသားရန်နှင့် သီဆိုရန်အတွက် သူ့ကို တာဝန်ပေးထားကြောင်း သိလိုက်ရသည်။ 

ထို့နောက်တွင် ကျန်းကျီချမ်က သူ့အား သူငယ်ချင်းတစ်ဦး ဖွင့်ထားသည့် ကော်ဖီဆိုင်သို့ သွားရန် ဖိတ်ခေါ်ကာ ရှေးဟောင်းနှောင်းဖြစ်များ ပြောနေလိုက်ကြသည်။ 

“‌ရှောင်ယု .. မင်းနဲ့ ချန်းယန်က  အတူတူ ရှိနေကြပြီပဲ ...”

ကျန်းကျီချမ်က အမေးမမည်သည့် အမေးစကားကို အားနည်းစွာ ဆိုလိုက်သည်။ အဖြေကိုမူ သူ့နှလုံးသားထဲတွင် ရှင်းရှင်းလင်းလင်း သိနှင့်နေပြီး ဖြစ်ပေသည်။ 

“...”

ယန်အန်းယုက ပြန်မဖြေဘဲ တိတ်ဆိတ်စွာဖြင့်သာ ဝန်ခံလိုက်၏။ 

“ပြီးခဲ့တဲ့ လတွေတုန်းက သူ သီချင်းရေးရင်းနဲ့ အလုပ်တွေ များနေခဲ့တာလေ ငါ့ကိုတောင် အကူအညီ လာတောင်းလိုက်သေးတယ် သီချင်းနာမည်က “ချန့်ယန်ဝမ်ယု” လို့ သိလိုက်ရကတည်းက အဲဒါ မင်းအတွက် ရေးတာလို့ ချက်ခြင်း သဘောပေါက်လိုက်တယ်လေ ...”

ပုံမှန်နှင့်မတူ၊  ကျန်းကျီချမ်၏ မျက်နှာထက်တွင် အပြုံးတို့ ထူးထူးခြားခြား  ပျောက်ကွယ်နေကာ လေသံမှာလည်း စိတ်ပျက်လက်ပျက် ဖြစ်မှုတို့ ကပ်ငြိနေပေသည်။ 

“ပြီးတော့ “Happy Alliance” ကိုလည်း ကြည့်လိုက်သေးတယ် မင်းနဲ့ ယီချန်းယန် ...”

“သူကလည်း မင်းကို တကယ်ကို သဘောကျမိသွားတာ ထင်တယ် ...”

ထို့နောက် သူက သက်ပြင်းတစ်ချက် ချလိုက်သည်။ 

“တောင်းပန်ပါတယ် Shawn ကော .. ကောလည်း ချန်းယန်ကို သဘောကျနေမှန်း ကျွန်တော် သိထားရဲ့နဲ့ .. ကျွန်တော်တို့အကြောင်းကို ဖုံးကွယ်ထားခဲ့မိတယ် ...”

“မင်းမှာလည်း ကိုယ်ပိုင်အခက်အခဲတွေ ရှိမှာပေါ့ .. ငါလည်း အမှားမကင်းပါဘူးလေ ...”

ကျန်းကျီချမ်က ထိုသို့ ပြောကာ ကော်ဖီကို တစ်ငုံ သောက်လိုက်သည်။ သူသည် ပုံမှန်အားဖြင့် ကော်ဖီသောက်လေတိုင်း သကြားထည့်လေ ရှိသော်ငြား ယခုမူ ခါးလေလေ ပိုပြီး အရသာရှိလေဟု ခံစားမိလာတော့၏။ သူ့နှလုံးသားမှာ ခါးသီးမှုကို နေသားကျနှင့်နေပြီး ဖြစ်ပေသည်။ 

ယီချန်းယန်၏ ဘဝတွင် သူ အရေးကြီးသည်ဟု သတ်မှတ်ထားသည့် အရာတိုင်းသည် အကြောင်းပြချက် အမျိုးမျိုးဖြင့် သူ့ကို စွန့်ခွါသွားခဲ့သည်။ ထိုအချိန်မှစကာ ယီချန်းယန်သည် သူ့ကိုယ်သူ ပိတ်လှောင်ထားပြီး မည်သူ့ကိုမှ သူ့ဘဝထဲသို့ အဝင်မခံတော့ပေ။ 

အတိတ်တွင် .. ကျန်းကျီချမ်သည် နှစ်ဝက်နီးပါးခန့် နိုင်ငံခြားတွင် အလုပ်များနေကာ ယီချန်းယန်နှင့် အဆက်အသွယ် ပြတ်တောက်နေခဲ့သည်။ သူ ပြန်ရောက်လာပြီးနောက် .. ယီချန်းယန်မှာ တစ်ခုခု ပြောင်းလဲသွားကြောင်း သတိပြုမိလိုက်ပေသည်။ မည်သည့်အရာများ ပြောင်းလဲသွားပါသည်ဟု ရေရေရာရာ မပြောနိုင်သည့်တိုင် ယီချန်းယန်ထံ၌ နောက်တစ်ကြိမ် ဆုံးရှုံးမှုများစွာ ထပ်မံကြုံတွေ့ထားရသည်ဟု ခံစားမိနေခဲ့၏။ 

“ယန်ဖန်းရဲ့သား မဟုတ်လား ...”

ကျန်းကျီချမ်က သူ့ကို အကဲဖြတ်လိုက်သည်။ ဤတစ်ကြိမ် သူတို့၏ တွေ့ဆုံမှုမှာ "မနက်ဖြန်များ၏ အသံ" ၌ တွေ့ဆုံမှုနှင့် များစွာ ကွဲပြားပေသည်။ သူ၏ စိတ်အခြေအနေမှာလည်း ပြောင်းလဲသွားပြီဖြစ်ကာ ဂျူနီယာတစ်ဦး၊ မိတ်ဆွေတစ်ဦး ထို့အပြင် အချစ်ပြိုင်ဘက်တစ်ဦးအဖြစ်သာ ရှုမြင်လိုက်တော့သည်။ 

“အဲဒီ့နှစ်က ... မင်းအဖေက ချန်းယန်ရဲ့ အသက်မွေးဝမ်းကျောင်းကို ကူညီပေးခဲ့တယ် .. မင်းက ...”

သူ့နှလုံးသားကို ကယ်တင်ပေးတယ် ...

ကျန်းကျီချမ်သည် နောက်ဆုံးစကားကို အတည်မပြုရဲသည့်အတွက် .. စကားကို ပြီးအောင် မပြောလိုက်ချေ။ 

“Shawn ကော စိတ်ချပါ ကျန်တော် ချန်းယန်ရဲ့ ဘေးနားမှာ အမြဲတမ်း ရှိနေပြီးတော့ သူ့ကို ကောင်းကောင်းမွန်မွန် ဆက်ဆံပေးပါ့မယ် ...”

ယန်အန်းယုက လက်သီးကို ကျစ်ကျစ်ပါအောင် ဆုပ်ကာ ပြောလိုက်သည်။ 

ကျန်းကျီချမ်မှာ မတွေးဘဲပင် မနေနိုင်တော့။ 

ယန်အန်းယု .. ဒီကလေး .. သူ အခုတော့ ယီချန်းယန်ကို အဖော်ပြုဖို့ ရွေးချယ်ထားပေမယ့် တစ်ချိန်ချိန် သူလည်း ထွက်သွားရမယ်ဆိုရင် .. အကျိုးဆက်က တော်တော်လေးကို ကြောက်ဖို့ကောင်းမှာပဲ ...

“Shawn ကော ကျွန်တော့်ကို ချန်းယန်ရဲ့ အကြောင်းတွေ ပြောပြပေးလို့ ရမလား ...”

ယန်အန်းယုက မေးလိုက်သည်။ သူက ကျန်းကျီချမ်သည် ယီချန်းယန်ကို ကောင်းစွာ နားလည်သဘောပေါက်ကာ သူ မရှင်းလင်းသည့် ကိစ္စများကိုပါ သိနေသည်ဟု ခံစားနေမိခဲ့သည်။ 

ကျန်းကျီချမ်က ခေါင်းကိုသာ ယမ်းပြလိုက်သည်။ 

“ရှောင်ယု မင်းတို့တွေက အတူတူ ရှိနေကြပြီ မဟုတ်လား .. သူ့အကြောင်းကို မင်းကိုယ်တိုင်ပဲ ရှာဖွေသင့်တယ် ...”

“အင်း .. ကျွန်တော် လုပ်မှာပါ ..”

ယန်အန်းယု ပြန်တော့မည့်အချိန်တွင် ကျန်းကျီချမ်က သူ့ကို ရုတ်တရက် လှမ်းခေါ်လိုက်သည်။ 

“ရှောင်ယု .. မင်းကို နောက်ဆုံးအနေနဲ့ သတိပေးလိုက်မယ် .. ချန်းယန် သူကလေ ..  အဲဒီ့လောက်ကြီး ကောင်းနေတာတော့ မဟုတ်ဘူး ...”

ယန်အန်းယုက ကြောင်အသွားတော့၏။ ထိုစကားကို သူ နားမလည်၊ အနည်းဆုံး ယခုအချိန်တွင် နားမလည်သေးချေ။ 

*****

တနင်္ဂနွေနေ့တွင် ယီချန်းယန် ခရီးထွက်နေရာမှ ပြန်ရောက်လာခဲ့သည်။ ယန်အန်းယုကလည်း သူ့ထံ အပြေး လာတွေ့ခဲ့သည်။

“ တိတ်တိတ်လေး ခိုးထွက်လာပြန်ပြီလား ဘယ်နှစ်ခါ ရှိနေပြီလဲ  ...”

သူက ခပ်ဖွဖွ ရယ်မောကာ မေးလိုက်ပြီး မျက်ဝန်းထဲတွင် အလိုလိုက် ချစ်ခင်မှုတို့ဖြင့် ပြည့်နှက်နေ၏။ 

“ဆက်ပြီး မစောင့်နိုင်တော့လို့လေ ဘယ်သူကများ ခင်ဗျားကို အမြဲတမ်း လွမ်းနေခိုင်းလဲ မသိပါဘူး ...”

သူက ထိုသို့ ပြောကာ ယီချန်းယန်ကို ပွေ့ဖက်လိုက်သည်။ ယခုအချိန်တွင်မူ သူသည် ထိုကဲ့သို့သော အချစ်စကား ချိုချိုလေးများကို ပွင့်ပွင့်လင်းလင်း ထုတ်ပြောနိုင်နေပေပြီ။ 

ယီချန်းယန်ကလည်း သူ့ကို ပြန်လည်ကာ ပွေ့ဖက်လိုက်၏။ အချိန်တစ်ခုကြာ မတွေ့ရသည့်အတွက် ယန်အန်းယုကို များစွာ လွမ်းဆွတ်နေခဲ့ရသည်။ 

“ချန်းယန် .. ကျွန်တော် နောက်ထပ်ရုပ်ရှင်တစ်ခု ထပ်ရိုက်ရဦးမှာ “Love Attack For 29 Days” တဲ့ လူငယ်အချစ်ဇာတ်လမ်းတွဲတစ်ခုပဲ ...”

သူ့အသံထဲတွင် စိတ်လှုပ်ရှားမှုအချို့ ပါဝင်နေသည်။ 

“အင်း ..ကိုယ်သိတယ် ...”

“ချန်းယန် .. ဒါ ...”

“ဘာဖြစ်လို့လဲ ... ပြောနေတဲ့ပုံစံက မင်း မဟုတ်တဲ့အတိုင်းပဲ ...”

ယီချန်းယန်က သူ့ဆံပင်များကို သပ်တင်ပေးကာ နူးညံ့စွာဖြင့် ပြောလိုက်သည်။ 

“ကျွန်တော်က ယွီစစ်ယွမ်ရဲ့ နေရာမှာ ဝင်သရုပ်ဆောင်ရမှာ ဒါရိုက်တာချူက ကျွန်တော့်ကို အကြောင်းပြချက်တွေ အများကြီး ပြောပြခဲ့ပေမယ့် အဓိကအချက် မပါသေးဘူးလို့ ထင်နေတယ် အဓိကအချက်က ...” 

ယန်အန်းယုက စကားစကို ရပ်တန့်ကာ ယီချန်းယန်အား ပွေ့ဖက်ထားသည့် လက်များကို လျောချလျက် ထိုအမျိုးသား၏ ရင်ခွင်ထဲမှ ရုန်းထွက်လိုက်သည်။ 

“ချန်းယန် .. ခင်ဗျားကြောင့်လား ...”

ယန်အန်းယုက သူ့ကို မော့ကြည့်ကာ မေးလိုက်၏။ 

မဟူရာရောင် မျက်ဝန်းထဲတွင် ပြုံးရိပ်ပြုံးယောင်များနှင့် တောက်ပမှုများ ကင်းမဲ့နေပေသည်။ 

“...”

ယီချန်းယန်က ကြောင်အသွားကာ သူ့အမူအယာမှာလည်း ချက်ခြင်း ပြောင်းလဲသွား၏။ 

“ကျွန်တော် မကြိုက်ဘူး .. ချန်းယန် ...”

👥️