Chapter 60

👥️Chapter 60

“ကျွန်တော် မကြိုက်ဘူး ...”

ယန်အန်းယုက သူနှင့် အကြည့်ချင်းဆုံကာ ပြောလိုက်သည်။ သို့သော် မျက်နှာမှာ ပုံမှန်ကဲ့သို့ ရွှင်မြူးတက်ကြွသည့် အပြုံးမျိုး ရှိမနေသလို ချစ်စိတ်မွှန်နေသည့် အရိပ်အယောင်မျိုးလည်း မရှိ၊ ထိုအစား စုတွန့်နေသော မျက်ခုံးတို့နှင့်အတူ အနည်းငယ် တင်းမာနေသည်ကိုသာ တွေ့လိုက်ရသည်။ 

နှစ်ဦးသား တစ်ဦးနှင့်တစ်ဦး စိုက်ကာကြည့်နေလိုက်ကြ၏။ သို့သော် နှစ်ဦးအကြားတွင် အကွာအဝေးတစ်ခု ခြားနားနေကာ လေထုမှလည်း သိသိသာသာ လေးလံလာတော့သည်။ 

“...”

ယီချန်းယန်က တစ်ခဏမျှ အသံတိတ်နေပြီးကာမှ ပြောလိုက်သည်။ 

“သူက မင်းကို အနိုင်ကျင့်ထားတာ ...”

ယွီစစ်ယွမ် .. ထိုတစ်ယောက်သည် စိတ်မြန်လက်မြန် ရှိလှသည့်အပြင် ဆင်ခြင်တုံတရားလည်း ကင်းမဲ့လွန်းလှသည်။ “လက်ဝှေ့ကျော်” ရိုက်ကူးရေး စတင်ချိန်မှစကာ သူသည် ယန်အန်းယု အခက်တွေ့အောင် တမင်တကာ ကြံစည်ခဲ့ပြီး နောက်ကွယ်တွင် ညစ်ပတ်သည့် လှည့်ကွက်များဖြင့်ပင် အကွက်ချကြံစည်ခဲ့သည်။ ယီချန်းယန်က ၎င်းကို သည်းမခံနိုင်တော့သဖြင့် ယွီစစ်ယွမ်ကို ကိုယ်တိုင် သွားတွေ့ကာ သတိပေးခဲ့ဖူးပြီး ဖြစ်သည်။ 

သို့သော် ထိုယွီစစ်ယွမ်က သင်ခန်းစာ မရသေးဘဲ အသေးအဖွဲ ပြဿနာလေးများကို မကြာခဏ ဖန်တီးကာ သူ့ပရိသတ်များမှတစ်ဆင့် ယန်အန်းယုကို ပစ်မှတ်ထားခဲ့သည်။ “Challenge First Time” တွင် ပါဝင်ပြီးနောက်၌လည်း တမင်တကာ စောဒကတက်ရန် နည်းမျိုးစုံ ရှာဖွေခဲ့သည်။ 

ယီချန်းယန်သည် ယန်အန်းယုနှင့် ခံစားချက်များအကြောင်း ဖွင့်ဟပြီးချိန်မှစကာ ယန်အန်းယုသည် သူ၏ အောက်ဆုံးစည်း ဖြစ်လာတော့သည့်အတွက် အခြားလူများက ယန်အန်းယုအား ဤကဲ့သို့ အနိုင်ကျင့်ရန် ကြိုးစားနေကြသည်ကို မြင်တွေ့ရသည့်အခါ အလိုလိုပင် မပျော်မရွှင် ဖြစ်လာတော့သည်။ 

သူ၏ လက်ရှိဂုဏ်ပုဒ်နှင့် အဆင့်အတန်းအရ ယီချန်းယန်သည် သူသာ အလိုရှိပါလျှင် ယွီစစ်ယွမ်ကို သေလမ်းသို့ပင် တွန်းပို့နိုင်ပေသည်။ သူ့တွင် ယွီစစ်ယွမ်၏ အောက်ဖဲများ အများအပြား ရှိထားသည့်အပြင် ထိုသူ၏ ကျောထောက်နောက်ခံ ရွှေပေါင်လုံးကြီးအား အပြစ်ပြုမိမည်ကိုလည်း ကြောက်နေရန် မလိုအပ်ချေ။ 

“အင်း .. ကျွန်တော်သိတယ် .. ဒါပေမယ့် သူ့ကို မကြောက်ပါဘူး ...”

ယန်အန်းယုက ပြောလိုက်ပြီးနောက် သူ့အမူအယာမှာလည်း သိသိသာသာ ပြေလျော့လာခဲ့၏။ 

ကျန်းကျီချမ်နှင့် စကားပြောခဲ့သည့်နေ့က သူသည် အပြန်ပြန်အလှန်လှန် စဉ်းစားသုံးသပ်ပြီးနောက် တစ်စုံတစ်ခုကို ခပ်ရေးရေး သဘောပေါက်သွားခဲ့သည်။ ယွီစစ်ယွမ်နေရာသို့ အစားထိုး ဝင်ရောက်ကာ “Love Attack For 29 Days” ၏ အဓိကဇာတ်လိုက်နေရာကို ရရှိခဲ့ခြင်းမှာ သူ မြင်နေရသလောက် မရိုးရှင်းနိုင်ဟု အမြဲ ခံစားမိနေခဲ့သည်။ 

ကိစ္စများအားလုံးကို ဇစ်မြစ်အထိ သိရှိပြီးနောက် သူသည် ယီချန်းယန်က အနုပညာလောက၏ စည်းမျဉ်းများကို အသုံးချကာ သူ့အား အကျိုးအမြတ်အများဆုံး ရရှိသူအဖြစ် ပြောင်းလဲပေးခဲ့ခြင်း ဖြစ်ကြောင်း သဘောပေါက်သွားတော့သည်။ 

“ချန်းယန် ကျေးဇူးတင်ပါတယ် ...”

သူ့မျက်လုံးထဲတွင် အလင်းရောင်တန်းများ ထွက်ပေါ်လာခဲ့သည်။ 

“ခင်ဗျားက ကျွန်တော့်ကို ကာကွယ်ပေးချင်တယ် အမြဲတမ်း အလိုလိုက်ပေးချင်တယ်ဆိုတာကို ကျွန်တော် သိပါတယ် ဒါပေမယ့် တစ်ချို့အရာတွေမှာ ကျွန်တော် ကိုယ့်ခြေထောက်ပေါ်ကိုယ်ပဲ ရပ်တည်ချင်တယ် .. ဒီလိုပြောတာက နည်းနည်း ကလေးဆန်ပြီး နုံအတဲ့ပုံ ပေါ်တယ်ဆိုပေမယ့်...”

ရှေ့ဆက်ပြီး ဘာပြောရမှန်း မသိတော့သောကြောင့် ယန်အန်းယုသည် ခါးသီးစွာသာ ရယ်မောလိုက်တော့သည်။ 

သူက ယီချန်းယန်မှာ ကောင်းသောသဘောဖြင့် လုပ်ပေးခဲ့ခြင်းဖြစ်ကြောင်း သိထားသည့်တိုင် ... ကမ္ဘာကူးပြောင်းလာကာ ယန်မိသားစု သခင်လေး၏ ခန္ဓာကိုယ်အတွင်းသို့ ဝင်ရောက်နေထိုင်နေခြင်းကပင်လျှင် သူ့အတွက် လိပ်ပြာမလုံစဖွယ် ဖြစ်နှင့်နေပြီး ဖြစ်ပေသည်။ ထိုကဲ့သို့သော သရုပ်မှန်နှင့် နောက်ခံကို ပိုင်ဆိုင်ထားရသည့်အတွက် သူသည် မည်သည့်အရာကိုမှ ထပ်မံကာ မမှီခိုလိုတော့ချေ။ ထိုသို့ဖြင့် သူ့နှလုံးသားထဲတွင် ဒွိဟစိတ်နှင့် ဖိအားတို့က ပိုမိုကာ ကြီးထွားလာတော့သည်။ 

“စိတ်ဆိုးသွားတာလား ...”

ယီချန်းယန်က မေးလိုက်သည်။ 

“မဆိုးပါဘူး .. တကယ်ကို မဆိုးတာ ...”

ယန်အန်းယုက ခေါင်းကို အမြန် ယမ်းပြလိုက်၏။ 

“ချန်းယန် ဒါမျိုး နောက်တစ်ခါ ထပ်မလုပ်နဲ့တော့နော် .. ခင်ဗျား ကျွန်တော့်ကို အမြဲ အလိုလိုက်နေလို့ မရဘူးလေ ...”

သူ့စကား မဆုံးသေးခင်မှာပင် ယီချန်းယန်၏ မျက်ဝန်းတို့ မည်းမှောင်သွားကာ ရှေ့တစ်လှမ်းတိုး၍ သူ့ကို တင်းကြပ်စွာ ပွေ့ဖက်လိုက်သည်။ လက်မောင်းနှစ်ဖက်လုံးကို အားကုန်သုံးကာ တင်းတင်းကြပ်ကြပ် ဖက်တွယ်ထားသည်မှာ ယန်အန်းယုက သူ့ကို နောက်တစ်ကြိမ် တွန်းထုတ်၍ သူ့ရင်ခွင်ထဲမှ ထွက်သွားမည်ကို ကြောက်ရွံ့နေသည့်အလားပင်။ 

“ကောင်းပါပြီ .. ကိုယ် မင်း စကားကို နားထောင်ပါ့မယ် ...”

ခန္ဓာကိုယ်နှစ်ခုက အံဝင်ခွင်ကျဖြစ်စွာ ပူးကပ်သွားပြန်ကာ ယီချန်းယန်၏ ညှို့ဓာတ်ပြင်းသည့် အသံက သူ့နားစည်ထဲသို့ နောက်တစ်ကြိမ် ရိုက်ခတ်လာပြန်တော့သည်။ ယန်အန်းယုမှာ ထိုသူ၏ လေငွေ့နွေးနွေးနှင့် နိမ့်ချည်မြင့်ချည်ဖြစ်နေသော ရင်အုပ်ကျယ်တို့ကိုသာ ခံစားမိနေကာ တရစပ် ခုန်ပေါက်နေသော နှလုံးသားနှင့်အတူ ယီချန်းယန်ကို ဖြေးဖြေးချင်း ပြန်လည်ကာ ပွေ့ဖက်လိုက်သည်။ 

သူက ယီချန်းယန်သည် စိတ်လုံခြုံမှု အနည်းငယ်ပင် ရှိမနေသူတစ်ဦး ဖြစ်နေနိုင်ကြောင်း ရုတ်တရက် သဘောပေါက်လိုက်မိတော့သည်။ 

ထင်ထားသည့်အတိုင်းပင် ထိုသူနှင့် နီးကပ်လာလေလေ သူ့ကို ပိုပြီး နားလည်နိုင်လေ ဖြစ်သည်။ ယခင်က သတိမပြုမိခဲ့သည့် အချက်လေးများကိုပါ စတင်ကာ သတိပြုမိလာတော့၏။ 

“ချန်းယန် နည်းနည်းလေး ပြုံးလိုက်ပါဦး ...”

ယီချန်းယန် “ဟမ် ...”

“ချန်းယန် ခင်ဗျားကလေ ဘယ်လိုနေနေ အရမ်းကို ချောတာ ဆိုပေမယ့် ကျွန်တော်ကတော့ ပြုံးနေတဲ့ပုံစံကို အကြိုက်ဆုံးပဲ ...”

ထိုစကားကို ကြားလိုက်သည့်အခါ ယီချန်းယန်၏ နှလုံးသားတစ်ခုလုံး နွေးထွေးသွားရကာ သူ့နှလုံးသားထဲရှိ အဖြေနှင့် စပ်လျဉ်း၍လည်း ပိုမိုကာ သေချာသွားတော့သည်။ 

ဒီကလေးက တကယ်ကို အတိတ်က ကြုံခဲ့တဲ့သူတွေနဲ့ နည်းနည်းမှကို မတူဘူးပဲ .. ခြွင်းချက်တစ်ခု... ပိုပြီး သဘောကျဖို့ကောင်းတဲ့ ရင်တသိမ့်သိမ့် ဖြစ်စရာ ခြွင်းချက်လေး ...

ယီချန်းယန်၏ မျက်နှာထက်တွင် ခပ်ဆိုးဆိုး အပြုံးတစ်ပွင့် ထွက်ပေါ်လာကာ ယန်အန်းယုကို ချက်ခြင်း ပွေ့ချီကာ အိပ်ခန်းထဲသို့ ခေါ်သွားလေတော့သည်။ 

****

 ရက်ပိုင်းခန့် ကြာပြီးနောက် .. ယန်အန်းယုသည် “Love Attack For 29 Days” ရိုက်ကွင်းသို့ ဝင်ရောက်လိုက်သည်။ ထိုဇာတ်လမ်းတွဲကို S မြို့တွင် အဓိက ရိုက်ကူးမည်ဖြစ်ကာ အနီးအနားရှိ C မြို့နှင့်  Z မြို့တို့သို့လည်း သွားရောက်ရမည် ဖြစ်သည်။ ဇာတ်ညွှန်း၏ နောက်ဆက်တွဲ တိုးတက်မှုများကို ဆွေးနွေးပြီးနောက် ရိုက်ကူးရေးအဖွဲ့သည် အမေရိကန်နှင့် ပြင်သစ်သို့ သွားရောက်ကာ တစ်ပတ်ခန့် ရိုက်ကူးရေး လုပ်ရန်ပင် ဆုံးဖြတ်ခဲ့ကြသေးသည်။ 

“Love Attack For 29 Days” ၏ သရုပ်ဆောင်များအနက် .. ယန်အန်းယု သရုပ်ဆောင်ရမည့် အဓိကမင်းသားဖြစ်သော တုယီယင် ဇာတ်ကောင်မှာ ပုံမှန် တွေ့လေ့တွေ့ထရှိသည့် အလွန် မောက်မာထောင်လွှားသော ဒုတိယမျိုးဆက် သူဌေးသားတစ်ဦး ဖြစ်ပေသည်။ ထိုသခင်လေးတုသည် ကြွယ်ဝချမ်းသာသည့်အပြင် ရုပ်ရည်မှာလည်း ချောမောလှပြီး သောက်စားပျော်ပါးနေတတ်သူတစ်ဦး ဖြစ်သည်။ ထိုမျှသာမက အပြောင်းအလဲ မြန်ဆန်သည့် ဆက်ဆံရေးကို ပိုင်ဆိုင်ထားကာ မိန်းကလေးများကို တစ်နေ့တစ်ဦး ထည်လဲတွဲတတ်သူလည်း ဖြစ်၏။ 

သို့သော် သူက ထိုမိန်းကလေးများတွင် စစ်မှန်သည့် စိတ်ရင်းမရှိဟု ခံစားမိသည့်အတွက် သူတို့နှင့် ချိန်းတွေ့ရာ၌ များစွာ စိတ်မပါ၊ ရုပ်ပိုင်းဆိုင်ရာ ထိတွေ့ပတ်သက်မှု တစ်ခုမျှပင် မပြုလုပ်ခဲ့ချေ။ 

တုယီယင်နှင့် အမျိုးသမီးဇာတ်လိုက် ချိုးယွင်ရှန့်တို့၏ ပထမဆုံး တွေ့ဆုံမှုမှာ သူ့ကို သံသယတရားခံအဖြစ် ဖမ်းဆီးစဉ်အတွင်း ဖြစ်သည်။ နားလည်မှု လွဲမှားခြင်းများစွာကို ကျော်ဖြတ်ပြီးနောက် တုယီယင်သည် သူ တွေ့ဖူးနေကျ မိန်းကလေးများနှင့် ကွဲပြားလှသည့် ရဲမေချိုးကို စိတ်ဝင်စားစ ပြုလာတော့သည်။ ထိုသို့ဖြင့် သူ၏ ထူးကဲသာလွန်လှသော ဉာဏ်ရည်ကို အမှီပြုကာ အမျိုးမျိုးသော မှုခင်းများအား ကူညီဖြေရှင်းပေးရင်း ချိုးယွင်ရှန့်ကို ပိုးပန်းမှုစတော့သည်။ 

သို့သော် ချိုးယွင်ရှန့်၏ ပင်ကိုယ်စိတ်ထားမှာ အလွန် အေးစက်လှသည့်အပြင် သူမသည် သခင်ငယ်လေးများ၏ အပြုအမူများကို ရွံရှာမုန်းတီးသူလည်း ဖြစ်သည့်အလျောက် တုယီယင်ကို အမြဲ အထင်အမြင် လွဲမှားနေခဲ့သည်။ ထို့ကြောင့် တုယီယင်သည် ပိုးပန်းခြင်းအား လက်လျော့ရန် တွေးလိုက်လေသည်။ 

ထိုနှစ်မှာ ရက်ထပ်နှစ် ဖြစ်သည့်အတွက် တုယီယင်သည် ဖေဖော်ဝါရီလ ၂၉ ရက်နေ့အား နောက်ဆုံးထားကာ စိတ်ဖြတ်ရန် သူ့ကိုယ်သူ အချိန်သတ်မှတ်လိုက်၏။ 

သို့သော် အမှုတစ်မှုပြီးတိုင်း တိုးတက်လာသည့် ဇာတ်ကြောင်းနှင့်အတူ သခင်လေးတုသည် အစောပိုင်းက လတ်ဆတ်လှသည့် ရင်ဖိုမှုများ ပျောက်ဆုံးသွားကာာ ပထမဆုံးအကြိမ် “အချစ်” နှင့် ထိတွေ့မိစ ပြုလာတော့သည်။ သူ့ကိုယ်သူ သတိပြုမိသွားသည့်အချိန်တွင် သူသည် အမျိုးသမီးဇာတ်လိုက် ချိုးယွင်ရှန့်ကို နင့်နင့်သည်းသည်း ချစ်မိစ ပြုနေလေပြီ။ 

တစ်ပတ်ခန့် ရိုက်ကူးရေး လုပ်ပြီးသွားပြီးနောက် ရိုက်ကူးရေးအဖွဲ့သားများက ပစ္စည်းများကို ထုပ်ပိုးသိမ်းဆည်းနေကြစဉ် ဟဲလောယင်းသည် သူ့ကို တစ်ယောက်တည်း သီးသန့် လာတွေ့ခဲ့သည်။ 

ဟဲလောယင်းသည်လည်း လူသစ်တစ်ဦးပင် ဖြစ်ကာ သူမ၏ ပွဲဦးထွက်ချိန်မှာလည်း ယန်အန်းယုနှင့် တစ်ချိန်တည်းနီးပါး ဖြစ်သည်။ သို့သော် သူမသည် ယန်အန်းယုထက် ၂ နှစ်ခန့် ပိုငယ်ကာ နူးညံ့ကာ ချစ်စရာကောင်းသည့် ရုပ်သွင်နှင့် ချိုသာသည့် အသံကို ပိုင်ဆိုင်ထားသူ ဖြစ်သည်။ 

သူမသည် တီဗီထဲတွင် နှစ်ခါသုံးခါမျှသာ ပါဝင်ဖူးသေးကာ ပါဝင်ထားသမျှ ဇာတ်ကောင်တိုင်းမှာလည်း အသေးစား ဇာတ်ကောင်လေးများသာ ဖြစ်ပေသည်။ သူမအနေဖြင့် ဤဇာတ်လမ်း၌ ဒုတိယဇာတ်လိုက်နေရာကို အရယူနိုင်ခဲ့ခြင်းမှာ အလွန် အံ့ဩဖွယ်ကောင်းသည့် ကိစ္စရပ် ဖြစ်ပေသည်။ 

“အန်းယုကော .. ခဏနေရင် အားလား မသိဘူး ...”

“ဘာဖြစ်လို့လဲ ...”

ယန်အန်းယု အနည်းငယ် မရေမရာ ဖြစ်သွားသည်။ 

ဟဲလောယင်း၏ ဇာတ်ကောင်မှာ သူမ၏ ချိုမြိန်သော ရုပ်သွင်နှင့် လွန်စွာ လိုက်ဖက်ညီသည့် ဒုတိယအမျိုးသမီးဇာတ်လိုက်နေရာ ဖြစ်ပြီး ဒုတိယဇာတ်လိုက် ချန်ယင်းရှန်သည် ဇာတ်လိုက် တုယီယင်ကို ငယ်စဉ်ကတည်းက တိတ်တခိုး ချစ်ခဲ့ရသည့် သူဌေးသမီးတစ်ဦး ဖြစ်ပေသည်။ သူမ၏ ရုပ်ရည်မှာ အပေါ်ယံအားဖြင့် အလွန် ရိုးသားဖြူစင်သည့် ပုံစံမျိုး ဖြစ်နေသည့်တိုင် အတွင်းစိတ်မှာမူ “လူငယ်အချစ်ဇာတ်လမ်းတွဲ” ထဲတွင် မြင်တွေ့နေကျ ဒုတိယဇာတ်လိုက်များအတိုင်း ရက်စက်ကောက်ကျစ်သော လှည့်ကွက်များဖြင့် ပြည့်နှက်နေပေသည်။ 

ယန်အန်းယုသည် သူမကို ရိုက်ကူးရေး မစတင်မီ ဇာတ်ကားသစ် မိတ်ဆက်ပွဲ ကျင်းပစဉ်ကမှ စတင် တွေ့ဆုံဖူးခြင်း ဖြစ်ကာ ပထမဆုံးအကြိမ် မြင်တွေ့လိုက်စဉ်က သူမ၏ ပုံစံမှာ ချစ်စရာကောင်းသည်ဟု ထင်မြင်ခဲ့ဖူးသေးသည်။ သို့သော် ရိုက်ကူးရေးအဖွဲ့သို့ ဝင်ရောက်ကာ နှစ်ရက်မျှ ရိုက်ကူးရေး လုပ်ပြီးသည့်နောက်တွင်မူ ထိုအတွေးမှာ အစအနပင် မကျန်အောင် ပျောက်ကွယ်သွားတော့သည်။ 

ဟဲလောယင်းက သူ့ကို အလွန် သဘောကျကြောင်း ဝန်ခံကာ ဖုန်းနံပါတ် တောင်းသွားသည့်အပြင် WeChat တွင်ပါ add ပေးရန် တောင်းဆိုခဲ့သည်။ အစပိုင်းတွင်မူ သူမက ရိုက်ကူးရေးနှင့် ပတ်သက်၍ ယန်အန်းယုထံမှ အကြံဉာဏ်များ တောင်းခံရုံမျှသာ လုပ်ခဲ့သော်ငြား နောက်ပိုင်းတွင်မူ သူမသည် ယန်အန်းယု၏ ဝါသနာနှင့် စိတ်ဝင်စားမှုများအကြောင်းပါ မေးမြန်းကာ နေ့စဉ်နေ့တိုင်း စကားစမြည်ပြောသည့် အဆင့်သို့ ဦးတည်လာတော့သည်။ 

“ဘာမှ အရေးတကြီးတော့ မဟုတ်ပါဘူး ဒီတိုင်း ကောကို ထမင်းတစ်နပ်လောက် လိုက်ကျွေးချင်လို့ပါ ...”

သူမက ပြုံးကာ ပြောလိုက်သည်။  ယန်အန်းယု၏ မျက်လုံးထဲတွင် အေးစက်သည့် အမှောင်ရိပ်တို့ ဖြတ်သန်းသွားတော့သည်။ 

ပြီးခဲ့သည့် ရက်ပိုင်းကမှ ရုပ်ရှင် စတင်ရိုက်ကူးသည့် အထိမ်းအမှတ်အနေဖြင့် ရိုက်ကူးရေးအဖွဲ့သားအားလုံး စုစည်းကာ ညစာစားပွဲ ကျင်းပခဲ့ပြီး ဖြစ်သည်။ ထို့အပြင် နေ့ခင်းအချိန် ရိုက်ကူးရေး လုပ်နေစဉ်အတွင်း၌လည်း သရုပ်ဆောင်များသည် အုပ်စုလိုက် စုဖွဲ့၍ နေ့လည်စာ မကြာခဏ စားသောက်တတ်ကြကာ တစ်ခါတစ်ရံတွင် ဒါရိုက်တာကိုပင် ဆွဲခေါ်လာလေ့ရှိသည်။ အားလုံး အတူတကွ ဝိုင်းဖွဲ့စားသောက်ကြသည့်အတွက် လေထုအနေအထားမှာလည်း အထူးတလည် ကောင်းမွန်လှပေသည်။ သို့သော် .. ယခုလက်ရှိတွင် ဟဲလောယင်းသည် ယန်အန်းယုတစ်ဦးတည်းကိုသာ အထူးတလည် ဖိတ်ခေါ်နေခြင်း ဖြစ်သည်။ 

ဒါက ဘယ်လိုလုပ် “ဘာမှ အရေးတကြီး မဟုတ်ပါဘူး” ဖြစ်မှာလဲ ...

ယန်အန်းယုက ကူကယ်ရာ မဲ့နေဟန်ဖြင့် ပြုံးပြလိုက်သည်။ 

“အားနာလိုက်တာ .. ဒီနေ့ညအတွက်က ချိန်းထားပြီးသားကိစ္စတစ်ခု ရှိနေလို့ .. နောက်တစ်ခါ အားမှပဲ စားကြတာပေါ့ ...”

“ကောင်းပါပြီ ...”

ဟဲလောယင်းက အနည်းငယ် စိတ်ပျက်သွားဟန်ပင်။ 

“အန်းယုကော.. ဒါဆို နောက်တစ်ခါ အားတဲ့အချိန်ကျရင်တော့ သေချာပေါက်ကို လက်ခံရမယ်နော် ...”

ယန်အန်းယု၏ မျက်ဆန်တို့ လှုပ်ခတ်သွားသော်လည်း သူ အသာအယာ ခေါင်းငြိမ့်ပြလိုက်သေးသည်။ 

နောက်ရက်များတွင်လည်း ယန်အန်းယုသည် နေ့စဉ်ဆက်တိုက် အလုပ်များနေခဲ့သည်။ ထို့အပြင် သူသည် ဤကမ္ဘာပေါ်တွင် သူ အလေးစားရဆုံး၊ အကြိုက်ရဆုံး၊ အချစ်ရဆုံး .. မစ္စတာရုပ်ရှင်ဧကရာဇ်ကိုလည်း အဖော်ပြုပေးရဦးမည် ဖြစ်သည်။ 

အိပ်ယာပေါ်တွင် ပင်ပန်းနွမ်းနယ်စွာ လဲလျောင်းရင်း ဖုန်းကြည့်နေသူကို မြင်လိုက်သည်နှင့်တစ်ပြိုင်နက် ယန်အန်းယုသည် ချက်ခြင်း ခုန်အုပ်လိုက်တော့သည်။ သူက ယီချန်းယန်၏ ရင်ဘက်ပေါ် လှဲကာ မျက်တောင် ပုတ်ခတ်ပုတ်ခတ် လုပ်ပြလိုက်သည်။ 

“ချန်းယန်.. ကျွန်တော် အိပ်ယာပေါ်က အခန်းတစ်ခုကို သရုပ်ဆောင်ရမှာ ...”

“အိုး ...”

ယီချန်းယန်က စိတ်မပါလက်မပါ တုန့်ပြန်ကာ ဖုန်းကိုသာ ဆက်ကြည့်နေလိုက်သည်။ သူ့ပုံစံမှာ ထိုစကားအပေါ် မည်သို့မှ မခံစားမိသည့်ဟန်ပင်။ 

ယန်အန်းယုက အနည်းငယ် မကျေမနပ် ဖြစ်သွားကာ လှဲနေရာမှ ထထိုင်ပြီး ဆက်ပြောလိုက်သည်။ 

“အစပိုင်းမှာ အမျိုးသမီး ဇာတ်လိုက်ရဲ့ လက်ထိပ်ခတ်တာကို ခံရမှာလေ အဲဒါက ကျန်းကျီကျဲက သရုပ်ဆောင်မှာတဲ့ အဲဒါ သူမကို အကြံအဖန်တွေ လုပ်ပြီး လက်ထိပ်ကို ဖြည်ခိုင်း ပြီးတာနဲ့ .. အိပ်ယာပေါ်ကို ဖိချပြီး ရသင့်တဲ့ အခွင့်အရေးတွေ အကုန်လုံးကို ယူပစ်ရမှာ ...”

ယန်အန်းယုက လက်ဟန်ခြေဟန်များ ပြကာပင် စိတ်အားထက်သန်မှု အပြည့်ဖြင့် ပြောနေလိုက်သည်။ သူက အမျိုးသားဇာတ်လိုက်အဖြစ် တစ်မျိုး၊ အမျိုးသမီးဇာတ်လိုက်အဖြစ်တစ်ဖုံ သရုပ်ဆောင်ပြရင်း တစ်ဖြည်းဖြည်း ဇာတ်ရှိန်တက်လာလေသည်။ 

ထိုသို့ဖြင့် သူကိုယ်တိုင်ပင် မသိလိုက်ပါဘဲ ရုပ်ရှင်ဧကရာဇ်၏ အာရုံစိုက်မှုကို ဆွဲဆောင်မိသွား၏။ 

ယီချန်းယန်က ဖုန်းကို အောက်ချကာ နှုတ်ခမ်းထောင့်စွန်းတို့ကို တွန့်ကွေးလျက် ပြောလိုက်သည်။ 

“မင်း သရုပ််ဆောင်ပြတာက တအားကြီး ချဲ့ကားလွန်းနေပြီ .. ပြီးတော့ ဒါမျိုးကို အိပ်ယာပေါ်က အခန်းလို့ သတ်မှတ်တယ်ပေါ့ ...”

“ဒီအခန်းကို ထည့်မတွက်ဘူး ဆိုရင်တောင် နောက်ထပ် ပူးပူးကပ်ကပ် ရိုက်ရမယ့်အခန်းတွေ အများကြီး ရှိသေးတယ် ဇာတ်ညွှန်းထဲမှာတောင် ပွင့်ပွင့်လင်းလင်း ရေးပြထားတာ ...”

ယန်အန်းယုက ဇာတ်ညွှန်းစာရွက်ကိုပါ ထုတ်လာကာ ထိုစာမျက်နှာအား လှန်ပြလိုက်သည်။

ယီချန်းယန်က သူ့ကို စိုက်ကြည့်ရုံသာ ကြည့်နေလိုက်၏။ စကားတစ်ခွန်းမျှ မပြောဘဲ အကြည့်တို့မှာသာ ပိုမိုနက်မှောင်လာသည်။ “Love Attack For 29 Days” တွင် ယန်အန်းယုသည် မိန်းမလိုက်စားသူတစ်ဦး အနေဖြင့် သရုပ်ဆောင်ရမည် ဖြစ်သည့်အတွက် သူသည် အမျိုးသမီးသရုပ်ဆောင်များစွာနှင့် တွဲဖက်ကာ သရုပ်ဆောင်ရမည် ဖြစ်သည်။ ပြီးခဲ့သည့် ရက်ပိုင်းကပင် သူသည် ပူလောင်ပြင်းပြသည့် အနမ်းခန်းတစ်ခုကို ရိုက်ကူးခဲ့ရပြီး ဖြစ်သည်။ 

ရုပ်ရှင်ဧကရာဇ်ယီခမျာမှာတော့ .. တကယ်ကို မပျော်တော့ရှာပါ ...

“လူငယ်အချစ်ဇာတ်လမ်းတွေမှာ နမ်းတဲ့ဖက်တဲ့အခန်းတွေက အမြဲတမ်း ပါနေကျပဲလေ ကျွန်တော့်အထင်တော့.. အိပ်ယာပေါ်က အခန်းကို ရိုက်တဲ့အခါကျ NG တွေ ခဏခဏ ရမယ်ထင်တယ် ...”  

ယန်အန်းယုက သက်ပြင်းချကာ ပြောလိုက်သည်။ သူ့ပုံစံမှာ များစွာ စိတ်ဖိစီးနေသည့်ဟန်ပင်။ 

“မစိုးရိမ်ပါနဲ့ .. ကိုယ် ဇာတ်ညွှန်းပြောင်းဖို့ ပြောထားပြီးပြီ ပြီးတော့ ဒါရိုက်တာစုန့်ကိုလည်း ဆက်သွယ်ထားပြီးသား သူက ဘာလုပ်ရမလဲဆိုတာ ကောင်းကောင်းသိပါတယ် .. ရိုက်ကွင်းကျ သူ အဲဒီ့ကိစ္စကို သင့်တော်သလို ကိုင်တွယ်လိမ့်မယ် .. ပန်းအိုးကွဲတာလောက်နဲ့ပဲ ပြီးသွားနိုင်ချေ များမယ်ထင်တယ် ...”

“ဟမ် .. ဘယ်တုန်းကလဲ ...”

ယန်အန်းယုက ထိုအကြောင်းကို ကြားလိုက်ရသည့်အခါ အလွန် အံ့ဩတုန်လှုပ်သွားတော့သည်။ 

“ချန်းယန် .. ခင်ဗျား “အင်အားကို အသုံးချပြီး အနိုင်ကျင့်တာမျိုး” နောက်တစ်ခေါက် ထပ်လုပ်ပြန်ပြီလား ...”

ယီချန်းယန်၏ မျက်နှာထားက ပြောင်းလဲမသွားသေး။ 

“ဒီကိစ္စမှာတော့ ကိုယ် မင်းစကားကို နားမထောင်နိုင်ဘူး .. ကိုယ့်မှာလည်း ကိုယ့်ကိုယ်ပိုင် ထင်မြင်ချက်တွေ ရှိတယ် ...”

ယန်အန်းယု စိတ်ပြောင်းသွားလေသည်။ သူက တစ်ခုခုကို အတွေးလွန်နေဟန် ဖြစ်သွားကာ စကား ဆက်ပြောမလာတော့ချေ။ 

“မင်းပုံစံကို ကြည့်ရတာ နည်းနည်း စိတ်ပျက်သွားသလိုပဲ ...”

ယီချန်းယန်၏ အကြည့်တို့ မှောင်မည်းသွားသည်။ 

“ပြောရရင် ဒါကလည်း စိန်ခေါ်မှုတစ်ခုပဲလေ ပြီးတော့ ...”

“ပြီးတော့ ...”

“ကျန်းကျီကျဲက ကျွန်တော့်ကို ရိုက်ကွင်းမှာ အမြဲ ဂရုစိုက်ပေးတဲ့သူလေ သူမက သိမ်မွေ့နူးညံ့တဲ့ ပုံစံမျိုး ပြီးတော့ ကျွန်တော် လိုချင်ခဲ့တဲ့ ဇနီးပုံံစံမျိုးနဲ့လည်း တကယ်ကို တစ်ထပ်တည်းပဲ .. ဟမ်း ...”

ရေခဲရိုက် မျက်ဝန်းတစ်စုံဖြင့် အေးစက်စက် အခိုးအငွေ့များ ထုတ်လွှတ်နေသည်ကို ခံစားမိလိုက်သည့်အတွက် ယန်အန်းယုသည် ချက်ခြင်းဆိုသလို လေသံကို ပြောင်းလဲလိုက်၏။ 

“ဒါပေမယ့် ဒါတွေအကုန်လုံးက အတိတ်မှာ ကျန်ခဲ့ပါပြီ အဲဒါတွေက ငယ်တုန်းရွယ်တုန်း မရင့်ကျက်တုန်းက အတွေးတွေပါ ...”

ထိုအချိန်က ယန်အန်းယုသည် စစ်သူကြီး၏ သက်တော်စောင့်လေး ဘဝတွင်သာ ရှိနေသေးကာ သူ့ဘဝတွင် ယောကျာ်းတစ်ယောက်နှင့် ချစ်ကြိုက်မိလိမ့်မည်ဟု စိတ်ပင် မကူးခဲ့ဖူးချေ။ 

“ဒီနားလာခဲ့ ...”

ယီချန်းယန်က သူ့ကို လှမ်းခေါ်လိုက်သည်။ ယန်အန်းယုကလည်း နာခံစွာဖြင့် အနားသို့ တိုးလာကာ အိပ်ယာဘေးတွင် ဝင်ထိုင်လိုက်သည်။ 

ထိုအကွာအဝေးကိုပင် သဘောမကျဟန်ဖြင့် ယီချန်းယန်က သူ့ကို အနားအထိရောက်အောင် ဆွဲဖက်ပြီး နားနားကပ်ကာ တိုးတိုးလေး ပြောလိုက်သည်။ 

“ဒီလိုမျိုး အိပ်ယာပေါ်က အခန်းတွေအတွက်ကတော့ ... ကိုယ်ပဲ မင်းနဲ့အတူ သရုပ်ဆောင်ပေးမယ်လေ ...”

ထို့နောက် သူက ယန်အန်းယု၏ လက်နှစ်ဖက်ကို ခေါင်းပေါ်သို့ လှန်တင်ကာ လည်စည်းဖြင့် ချည်နှောင်ထားလိုက်သည်။ 

“ချန်းယန် .. ဘာ .. ဘာလို့ ချည်ထားတာလဲ ...”

“ဘာလို့လဲဆို အခုလောလောဆယ် ကိုယ့်မှာ လက်ထိပ် မရှိသေးလို့လေ ...”

သူက ရယ်သံစွက်လျက် ပြောလိုက်သည်။ 

“တကယ်တမ်းတော့ မင်းကို လက်ထိပ်ခတ် .. မျက်လုံးကိုပါ စည်းထားပြီးတော့ ...”

👥️