Chapter 66

👥️Chapter 66

အချိန်ကား ၁၁နာရီနီးပါး၊ ရှန်းဟွမ်ရုံးဌာန၏ ကားဂိုဒေါင်ဝင်ပေါက်မှာ​ဖြစ်သည်။

လူတိုင်းနီးပါး ပြန်ကုန်ကြပြီးဖြစ်ပေမဲ့ ယန်အန်းယုနှင့် ချင်နွော်ရှီက အဆုံးအထိ နေခဲ့သည်။

"နွော်ရှီ...အခုကနေစပြီး ထန်းရှောင်ကို ပိုသတိထားရမယ်နော်"

ယန်းအန်းယုက သတိပေးလိုက်၏။ဤညမှာ ရုတ်တရက်ကြီး စုံတွဲသီချင်းဆိုရန် ထအကြံပြုသည်က ချင်နွော်ရှီနှင့် ရှန်းသုန်းဟောင့်၏ အတိတ်ကဆက်ဆံရေးကို ဆွဲထုတ်ချင်သည့် ရည်ရွယ်ချက်နှင့်မှန်းသိသာလေသည်။

"အင်း"

ချင်နွော်ရှီက ခေါင်းညိတ်လိုက်၏။

"နွော်ရှီ...အချိန်တစ်ခုလောက်ရှာပြီး ရှန်းသုန်းဟောင့်နဲ့ စကားကောင်းကောင်းပြောကြည့်ပါလား"

ရှန်းသုန်းဟောင့်က ချင်နွော်ရှီ၏ အတိတ်က ဒဏ်ရာမှန်း ယန်အန်းယုကောင်းကောင်းသိသည်။သူငယ်ချင်းကောင်းတစ်ယောက်အနေဖြင့် သူ ချင်နွော်ရှီ၏ ကိုယ်ရေးကိုယ်တာကိုလေးစားပြီး အများကြီးမေးမှာမဟုတ်ပေ။သို့ပေမဲ့ နားလည်မှုတစ်ခုခုလွှဲနေ​ခြင်းဖြစ်စေ တခြားဘာကိစ္စပဲဖြစ်စေ သူတို့ကို တတ်နိုင်သမျှ အမြန်ဆုံးဖြေရှင်းစေချင်လေသည်။စင်စစ်အားဖြင့် သူတို့၏စုံတွဲသီချင်းကို နားထောင်ပြီးနောက် သူတို့က တစ်ခါကအလွန်ရင်းနှီးသော သူငယ်ချင်းများဖြစ်ခဲ့ဖူးကြောင်း သူ သေချာလေသည်။

"နွော်ရှီ...တကယ်တော့ ငါလည်း မင်းရဲ့အတိတ်ကို နည်းနည်းမှဂရုမစိုက်ဘူး...မင်းမှာ စိတ်ပူစရာတွေရှိရင် ငါ့ကိုပါပြောလို့ရမလား...ဒါမှမဟုတ် ...."

ယန်အန်းယု ခေါင်းကိုအလုပ်ပေးလိုက်ပြီး ညင်ညင်သာသာ  ပြောလိုက်သည်။

"ငါ့ကောကိုပြောရင်လည်း ရပါတယ်"

"..."

ချင်နွော်ရှီက အနည်းငယ်အံအားသင့်သွားပြီး အနည်းငယ်ရှက်သွားပုံရလေဘည်။

"ရှောင်ယု"

နတ်ဆိုးအကြောင်းပြောလျှင် နတ်ဆိုးရောက်လာသည်ဆိုသည့်စကားက အမှန်ပင်။ယနေ့ပွဲနှင့်ပတ်သက်ပြီး အလုပ်ရှူပ်နေပြီးနောက် ယန်ကျွယ့်က ဤအချိန်မှာ ရောက်လာလေသည်။

"ပင်ပန်းသွားပြီ ကော"

ယန်အန်းယုက ခပ်ရွရွပြေးသွားပြီး ယန်ကျွယ့်၏ပခုံးများကို နှိပ်ပေးလိုက်ကာ ချက်ချင်းကို သိတတ်၊လိမ္မာ၊ချစ်ချင်စရာကောင်းပြီး ဝတ္တရားကျေပွန်သော ညီလေးဖြစ်သွားသည်။

"အင်း"

ယန်ကျွယ့်က ပြန်တုံ့ပြန်လိုက်ပြီး စိတ်သက်သာရာရသွား၏။

ရုတ်တရက် ယန်အန်းယုက သူ့နောက်မနီးမဝေးက ချင်နွော်ရှီကို လက်ညှိုးထိုးလိုက်ပြီး လေသံက​ပြောင်းသွားသည်။

"ကော နွော်ရှီပြုံးလိုက်တယ်...မြင်လိုက်လား"

ယန်ကျွယ့် အံဩသွားသည်။

"ဟမ်"

"ခုနလေးတင် စက္ကန့်ပိုင်းလောက်...နွော်ရှီက ကောကိုကြည့်ပြီး အရမ်းကို ကြင်ကြင်နာနာပြုံးနေတာ ..."

ယန်အန်းယုက မျက်စာပစ်လိုက်ပြီး ၎င်းနောက် ခပ်တိုးတိုးရယ်လေသည်။

"ကော ပြန်ရောက်ရင်ကောင်းကောင်းနားလိုက်...ကောရဲ့လိင်မှုဘဝပိုပိုပြီး သဟဇာတဖြစ်ပါ​စေလို့ ဆုတောင်းပေးတယ်နော်"

"ကောင်စုတ်လေး...တည်တည်တံ့တံ့နေစမ်း"

ယန်ကျွယ့်က ချက်ချင်း မျက်မှောင်ကြုတ်ကာပြောလိုက်၏။

"တချို့ကိစ္စတွေမှာ တည်တည်တံ့တံ့ကြီးနေလို့မရဘူးလေဗျာ...ဟီးဟီး ကော ဒါ ကျွန်တော် ချန်းယန်ဆီကသင်ထားတာ"

ယန်ကျွယ့်:"..."

ဟိုနှာပူး အိုကြီးအိုမ လူရမ်းကားကောင်က သူ့ရဲ့ဖြူဖြူစင်စင်ညီလေးကို ကမ်းကုန်အောင် ဖျက်စီးပစ်လိုက်ပြီ...

****

Sမြို့တော် ပေရှင်းခရိုင်၊ယီချန်းယန်၏ သစ်တောဗီလာ၌

နေ့ရက်များက လျင်မြန်စွာ ကုန်ဆုံးသွားခဲ့ပြီး နှစ်ကုန်ဖြစ်နေခြင်းကျေးဇူးကြောင့် မိသားစုတိုင်း စတင်အလုပ်များလာခဲ့သည်။နှစ်သစ်ကို ကြိုဆိုရန် ယန်အန်းယုနှင့် ယီချန်းယန်တို့ နှစ်ယောက်လုံး ယနေ့'နွေဦးသန့်ရှင်းရေး'လုပ်ကြသည်။

သေချာသည်ပင်၊ဤနေရာကို သန့်ရှင်းရေးလုပ်ရန် တာဝန်ယူထားသည့် အန်တီကြီးတစ်ယောက်လည်း ရှိသဖြင့် ထိုမျှမညစ်ပတ်ပါချေ။ဤတစ်ခေါက်မှာ  မျက်နှာကျက်ကနေကြမ်းပြင်အထိရောက်သည့် ဖန်ပြတင်းပေါက်များကို သန့်ရှင်းလုပ်နေသော လင်လင်နှစ်ယောက်က သည်းမခံနိုင်လောက်အောင် သက်သက်ကလူကျီစယ်နေကြသည်။

သူတို့နှစ်ဦးကို ထွင်းဖောက်မြင်နေရသောမှန်တစ်ချပ်ကခြားထားသည်။သူတို့က မှန်ပေါ်မှာ 'ဟား'ခနဲလေမှုတ်ထုတ်ပြီး ထိုအပေါ်တွင် လက်ညှိုးနှင့် တစ်ယောက်နာမည်တစ်ယောက်ရေးကာ အသဲပုံများဆွဲကြသည်။သူတို့၏ မျက်ဝန်းများထံတွင် အချစ်များပြည့်နေ၏။

ပြတင်းမှန်သုတ်ပြီးနောက် ယန်အန်းယုက အခန်းကိုစပြီးသန့်ရှင်းရေးလုပ်လေသည်။

သူ့အရပ်ကြောင့် ယန်အန်းယု နည်းနည်းမှ မမှီသောဗီရိုထိပ်ဖျားတချို့ရှိလေသည်။ခြေဖျားထောက်ပြီးရပ်လျှင်ပင် အနည်းငယ် ခက်ခဲနေဆဲဖြစ်၏။သို့ပေမဲ့ ယီချန်းယန်က တစ်ခါတည်း သူ့ကိုနောက်ကနေပွေ့ချီပြီး ဤပြဿနာကို လက်တစ်ဖက်မြှောက်ကာကူညီဖြေရှင်းပေးလိုက်သည်။

ယန်အန်းယုက ယီချန်းယန်၏၁၈၅cmခန့်အရပ်ကို မော့ကြည့်ကာ အနည်းငယ် မနာလိုဖြစ်နေသည်။

"ချန်းယန်...ကျွန်တော်လည်း ခင်ဗျားလောက်ရှည်ချင်လိုက်တာ...လုံခြုံတဲ့ခံစားချက်ကောင်းကောင်းရတယ်...အခုချိန် ကျွန်တော် အရပ်ရှည်နိုင်ဦးမလားမသိဘူးနော်"

ထိုသို့ပြောပြီးနောက် ယန်အန်းယုက ခုန်ရန်ပင်ကြိုးစားလိုက်ပြီး ယီချန်းယန်ကိုပြုံးသွားစေ၏။

"ရှောင်ယု...မင်းက ဒီလိုမျိုးလည်း အရမ်းအဆင်ပြေတယ်"

ယီချန်းယန်က သူ့ခေါင်းကို ပုတ်လိုက်လေသည်။အကယ်၍ တစ်​နေ့မှာ ယန်အန်းယုသာ သူ့ထက်ပိုအရပ်ရှည်လာလျှင်၊တစ်ယောက်သောရုပ်ရှင်ဧကရာဇ်ကြီး ထိုမြင်ကွင်းကိုတွေးပြီး သိပ်မကောင်းဟုခံစားရသည်။

"မှန်တယ်... ရှည်လွန်းတာလည်းမကောင်းဘူး"

ယန်အန်းယုက အာရုံပြောင်းသွားပြီးပြုံးကာပြောလိုက်သည်။

"ချီကောကိုပဲကြည့်လေ...သူက အရပ်ရှည်ပေမဲ့ ဘက်စကတ်ဘောလည်းမကစားတတ်သလို သက်တော်စောင့်လည်းဖြစ်မလာဘူး...မထင်မှတ်ဘဲ မန်နေဂျာဖြစ်နေတယ် ဟားဟား"

အနှီစကားထွက်လာသည်နှင့် အဝေးရှိ မစ္စတာချီလည်း နှာချေနေလောက်သည်။

ထို့နောက်မှာ ယီချန်းယန်က မီးဖိုချောင်ထဲဝင်သွားသည်။ထိုအချိန်မှာ ယန်အန်းယုက သီချင်းတညည်းညည်းနှင့် ဧည့်ခန်းကို ကြမ်းတိုက်နေ၏။သို့ပေမဲ့ ရုတ်တရတ် ကြမ်းတိုက်တုတ်က ဘန်းခနဲ့​ပြုတ်ကျသွားသည်။

ခေါင်းထဲမှာ စူးခနဲအောင့်သွားသဖြင့် ယန်အန်းယု နားထင်များကိုဖိလိုက်မိလေသည်။

နာကျင်မှုက ခဏလေးသာဖြစ်ပြီး ဖြစ်သည်ကမြန်သလို ပျောက်သည်ကလည်းမြန်သည်။ယန်အန်းယု ခေါင်းခါလိုက်သည်။ယခုနက ပုံရိပ်အပိုင်းအစများ ခေါင်းထဲဖြတ်ပြေးသွားသလိုပင်။

အမှန်တွင် လွန်သောရက်အနည်းငယ်က သူ ခေါင်းမတရားကိုက်ခဲ့သည်။ရုတ်တရုတ်ကြီး ဒီနေ့ပြန်ဖြစ်လာလိမ့်မယ်လို့ ဘယ်သူကထင်ပါ့မလဲ...

"ရှောင်ယု ဘာဖြစ်တာလဲ"

ဆူညံသံကိုကြားပြီး ယီချန်းယန်ပြေးလာလေသည်။

သူတအားစိတ်ပူနေမှာစိုး၍ ယန်အန်းယုက အပြုံးတစ်ပွင့်ဖြင့်ဖုံးကွယ်လိုက်သည်။

"အာ အဆင်ပြေပါတယ်... လက်ကချော်ပြီး ကောင်းကောင်းမကိုင်မိလိုက်တာ"

ယီချန်းယန် စိတ်သက်သာရာရသွားပြီးသက်ပြင်းချကာ သူ့မျက်နှာကိုထိလိုက်၏။

"မင်းအဆင်ပြေလို့တော်သေးတာပေါ့"

"စိတ်မပူပါနဲ့ ချန်းယန်...ကျွန်တော့်ကျန်းမာရေးကကောင်းပါတယ်"

ယန်အန်းယုက သူ့ရင်ဘက်သူပုတ်ကာ ကြမ်းတိုက်သုတ်ဖတ်ကိုကုန်ကောက်ပြီး ဆက်ကြမ်းတိုက်မည်ပြင်သည်။သို့ပေမဲ့ ယီချန်းယန်က လက်မြှောက်ကာ သူ့ကိုတားလိုက်၏။

"ကိုယ်လုပ်လိုက်မယ် ရှောင်ယု...မင်းသွားနားချေတော့နော်"

ယီချန်းယန်က ခပ်ဖျော့ဖျော့ပြုံးကာဆိုသည်။

"ဟီးဟီး ချန်းယန်...ပြောတော့ ခင်ဗျားက ညစာအတွက်တာဝန်ယူမယ်ဆို...အခုကျ ကျွန်တော့်ကိုပါသန့်ရှင်းရေးကူလုပ်ပေးနေပြီ...ခင်ဗျားက တကယ် ပိုပိုပြီးခင်ပွန်းကောင်းပီသလာတယ်ရော"

ယန်အန်းယုက မျက်လုံးတစ်ဖက်မှိတ်ကာသူ့ကိုစလေသည်။

တစ်ယောက်သောသူ၏သတ္တိက ပိုပိုကောင်းလာနေပြီး ယခုဆိုလျှင် သူ့ကိုပင် မဆိုင်းမတွ စနောက်ကျီစယ်နိုင်နေပြီဖြစ်၏။သို့ပေမဲ့ ယန်အန်းယုတစ်ယောက် သူ့ဘေးကနေ နှာခေါင်းကိုထိကာ  သဘောတကျရယ်နေသည်နှင့် ပတ်သက်ပြီး သူလုပ်နိုင်သည့်အရာ ဘာမှမရှိပါချေ။

ဆောင်းရာသီ၏တစ်နေ့သောနေ့လည်ခင်းမှာ အပူပေးစက်ကဖွင့်ထားသည်။'ခင်ပွန်းကောင်းပီသသော'ရုပ်ရှင်ဧကရာဇ်ကြီးက အလုပ်ရှုပ်နေပြီး ယန်အန်းယုက ဆိုဖာပေါ်မှာ Cocoကိုပိုက်ပြီး နားနေလေ၏။

Cocoက ယန်အန်းယု၏ပေါင်ပေါ်တွင်လှဲရင်း မျက်လုံးများကိုမှေးစင်းကာ သူ၏အပွတ်အသပ်ကိုကျေကျေနပ်နပ်ကြီး ခံနေသည်။အလွန်ကို သက်တောင့်သက်သာရှိလွန်း၍  တဖြည်းဖြည်းနှင့် ကောင်ငယ်လေးမှာ မသိလိုက်ပါဘဲ အိပ်ပျော်သွားခဲ့သည်။

နောင်ပိုင်းမှာ ယန်အန်းယုလည်း မျက်လုံးများပိတ်သွားသည်။သို့ပေမဲ့ သူက အာရုံစူးစိုက်မှုအပြည့်နှင့် ရှာဖွေနေခြင်းသာဖြစ်လေသည်။သူ့စိတ်ထဲမှာ ပေါ်လာတဲ့ပုံရိပ်အပိုင်းအစတွေက ဘာတွေလဲ...

ယန်အန်းယု အကောင်းဆုံးကြိုးစားပြီးရှာချင် သိချင်သော်လည်း သူ့မှာ ကြောက်ရွံ့စိုးထိတ်မှုများနှင့်လည်း ပြည့်နေခဲ့သည်။

"ရှောင်ယု..."

ထိုအချိန်တွင် တစ်ယောက်ယောက်က သူ့ကိုခေါ်နေသံကိုကြားလိုက်သလိုရှိလေသည်။

"ယန်အန်းယု..."

နောက်တစ်ကြိမ်။သူ့စိတ်ထဲမှာ တစ်စုံတစ်ယောက်က သူ့နာမည်ကိုခေါ်နေသည်။

ယန်အန်းယု သူ့စိတ်ထဲကို သူကိုယ်တိုင်လမ်းလျှောက်ဝင်သွားသည်ကိုခံစားလိုက်ရသည်။သူအနည်းငယ် ပိုပြီးနီးကပ်အောင်သွားချင်ခဲ့ပြီး အသံကို ပိုရှင်းရှင်းလင်းလင်းကြားချင်ခဲ့ပေမဲ့ ခုခံမှုတစ်ခုရှိနေသည်။

ထို့နောက် ချက်ချင်းပဲ ရှေးခေတ်နှင့်မော်ဒန်ခေတ်မှ သူ့မှတ်ဉာဏ်များက ပလုံစီ၍တက်လာကာ နီးနီးကပ်ကပ် ​ရောယှက်သွားပြီး သူ့ကိုဖြည်းဖြည်းချင်းမြုပ်သွားလေသည်။

ယန်အန်းယု မှတ်ဉာဏ်ဝဲကြီးထဲမှာမြုပ်နေခဲ့သည်။အရှေ့အနောက်တောင်မြောက် သူရှာမတွေ့သလို ရှေ့ဆက်၍လည်းမတိုးနိုင်ခဲ့။သူ့ခြေလှမ်းများက တဖြည်းဖြည်းနှင့် နှေးကွေး လေးလံလာပြီး သူ့ခန္ဓာကိုယ်ကလည်း စတင်၍ ခြေကုန်လက်ပန်းကျလာခဲ့လေသည်။

မေ့ပစ်ချင်တယ်...ဒါတွေအကုန်လုံးကိုမေ့ပစ်ချင်တယ်...

ညနေလေးနာရီလောက်မှာ ယီချန်းယန်

အလုပ်ပြီးပြီးချင်း နောက်တစ်ကြိမ် ထပ်လျှောက်လာသည့်အခါ လူတစ်ယောက်နှင့်ခွေးတစ်ကောင်က အိပ်ပျော်နေသည်ကိုသာတွေ့လိုက်ရလေသည်။

ယန်အန်းယု၏ လှပပြီးရှင်းသန့်နေသော အိပ်ပျော်နေသည့်မျက်နှာလေးကိုကြည့်ပြီး ယီချန်းယန်၏နှုတ်ခမ်းတို့ ကွေးတက်သွားပြီး ဘေးမှာအသာလေးဝင်ထိုင်လိုက်၏။

အကြိမ်ပေါင်း များစွာ များစွာ သူမြင်ဖူးပြီးသားဖြစ်ပေမဲ့သူ ယန်အန်းယု၏မျက်နှာကို ထပ်ပြီး အသေးစိတ်ကြည့်ရှုလိုက်သည်။ဤမျက်လုံးများ၊ဤနှာခေါင်း၊ဤနှုတ်ခမ်းတို့ကို သူ့နှလုံးသားထဲမှာ ထင်းနေအောင်ထွင်းပြီးသားဖြစ်လေသည်။ပုံစံများက အကုန်အတူတူဖြစ်ပေမဲ့...

ယီချန်းယန် ခေါင်းအသာငုံ့ကာ ယန်အန်းယု၏လက်ကောက်ဝတ်ကို ကြည့်လိုက်၏။ယင်းကလည်း ဖြူဖွေးရှင်းသန့်နေပြီး ဘာအမာရွတ်မှမတွေ့ရပေ။

ခဏလောက် ငြိမ်ငြိမ်လေး ကြည့်နေပြီးနောက် ယီချန်းယန် မထိန်းနိုင်ဘဲ အနားသို့ထပ်ပြီးတိုးကပ်ကာ နဖူးလေးနှင့်မျက်ခွံလေးများကို နမ်းလိုက်မိသည်။

ယန်အန်းယု အနည်းငယ် တုန်သွားပြီး မိန်းမောရင်းပဲ မျက်လုံးများပွင့်လာသည်။

"ချန်း...ချန်းယန်"

ယန်အန်းယု မျက်လုံးများကိုပွတ်သပ်နေပြီး အူကြောင်ကြောင်ဖြစ်နေသည်အားကြည့်ပြီး သူကမေးလိုက်၏။

"နိုးလာပြီပေါ့...နေတောင်ဝင်နေပြီ"

"ဟမ်...ကျွန်တော် တကယ်ကြီး ဒီလောက်ကြာအောင်အိပ်လိုက်တာလား"

ယန်အန်းယု အံ့ဩသွားလေသည်။သူလှုပ်လိုက်သည်နှင့် သူ့ပေါင်ပေါ်ကCocoလည်းနိုးလာ၏။ကောင်လေးက လှုပ်လှုပ်ရွရွနှင့် လူးလွန့်နေသည်။

သူ ဘယ်လိုလုပ်အိပ်ပျော်သွားတာလဲ...

သူ မအိပ်ချင်မှန်းအသိသာကြီးဖြစ်၏။တစ်စုံတစ်ခုကိုတွေးနေခဲ့သလိုလိုရှိပေမဲ့ သူ ဘာကိုအထူးလည်တွေးနေမှန်း ယန်အန်းယုပြန်စဥ်းစားမရပေ။

"အင်း...ညစာစားဖို့ အသင့်ပြင်ရအောင်"

ယီချန်းယန်က ညင်သာစွာ ပြောလိုက်လေသည်။

"ခဏလေး"

ယန်အန်းယုက သူ့ကို ဆွဲထားပြီး အကြည့်များက ဟိုဟိုသည်သည်ရွေ့လျားသွားသည်။

"ကျွန်တော် အိပ်နေတုန်း ထပ်ပြီး တိတ်တိတ်လေး  ခိုးနမ်းသေးလား"

"အင်း"

မျက်နှာအရေထူသည့် ရုပ်ရှင်ဧကရာဇ်ယီက ၎င်းကို တိုက်ရိုက် ဝန်ခံလိုက်သည့်အပြင် သူ့နှာခေါင်းကိုပါ နမ်းလိုက်သေးသည်။

"ဘယ်သူက မင်းကို ဒီလောက်ချစ်စရာကောင်းပါလို့ပြောလို့လဲ"

"ဒါဆို ကျွန်တော်က အခုရုပ်လိုမဟုတ်ရင်ရော...ကျွန်တော်မျက်နှာက ပြောင်းသွားပြီး ဝတုတ်တုတ်ရုပ်ဆိုးဆိုး​ဖြစ်သွားရင်ရော"

ယန်အန်းယုက ခေါင်းစဥ်ပြောင်းသွားပြီး သူ့လေသံရောအမူအရာပါ ပြောင်းသွား​လေသည်။

ခုနလေးကမှ ယန်အန်းယု ရုတ်တရက် တစ်စုံတစ်ခုကို တွေးမိသည်။

သူ ပွဲဦးထွက်ခါစက ဒါရိုက်တာရှု၏'နှလုံးသား၌ထုဆစ်လေသော'ထဲမှာ ပါဝင်သရုပ်ဆောင်ခဲ့သည်။နေ့တိုင်း သူ ယီချန်းယန်နှင့် ရိုက်ကူးရေးအဖွဲ့တစ်ခုထဲမှာ အတူတူရှိခဲ့ပြီး ယီချန်းယန်၏သဘောထားက ယခင်ကလောက်မအေးစက်တော့ပေ။သူက သူ့ကို လမ်းညွှန်မှုအများအပြားပေးခဲ့ပြီး သူ့မျက်နှာက သူ့အကြိုက်နှင့် အလွန်ကိုက်ညီသည်ဟုဆိုခဲ့သည်။

၎င်းကိုကြားပြီး ယီချန်းယန်က တန့်သွားသည်။

"တွေ့လား...တကယ်ချီတုံချတုံဖြစ်နေတာ"

ယန်အန်းယု မပျော်မရွှင် ဖြစ်သွား၏။

"အမှန်ပဲ ...ကိုယ် ခဏလောက်တော့ စဥ်စားရတယ်"

ယန်အန်းယုက ပို၍ပင် မပျော်မရွှင်ဖြစ်သွားလေသည်။

"ချန်းယန်...လက်စသတ်တော့ ခင်ဗျားကလည်း ရုပ်ကိုကြည့်ပြီးအကဲဖြတ်တာပဲ...အိုင်း ဒီရုပ်ဝါဒီကမ္ဘာကြီးကို ကျွန်တော်တကယ်စိတ်ပျက်မိတယ်"

"မှားတယ်...ကိုယ်က ရုပ်ကိုပဲ ကြည့်တာမဟုတ်ဘူး...ခန္ဓာကိုယ်ကိုရော...အိပ်ရာထဲက....."

ယီချန်းယန်က ခပ်တိုးတိုးရယ်လိုက်ပြီး ယန်းအန်းယု၏နားရွက်နားကိုဖိကပ်ကာ စကားတစ်ခွန်းဆိုလိုက်၏။

ချက်ချင်းပဲ ယန်အန်းယု၏နားရွက် ပူတက်လာပြီး ယီချန်းယန်ကို အသာတွန်းဖယ်လိုက်တော့သည်။

သို့ရာတွင် ယီချန်းယန်က သူ၏လက်လေးကို တန်းပြီးဖမ်းလိုက်ကာ ဆက်၍မစတော့ပေ။သူ့အမူအရာကလည်း အလေးအနက်ဖြစ်လာသည်။

"ရှောင်ယု... ကိုယ်အရင်က မင်းကိုပြောဖူးပါတယ်...မင်းကကိုယ့်ရဲ့တစ်ယောက်တည်းသောသူပါလို့...ဒါကြောင့် မင်းရဲ့နာမည်၊ဘယ်သူဘယ်ဝါဆိုတာတို့ မင်းရဲ့ရုပ်ရည်တို့နဲ့ အကုန်ဘာမှမဆိုင်ဘူး...ကိုယ်သဘောကျတဲ့သူက ဟောဒီကမင်းတစ်ယောက်တည်းကိုပဲ"

"..."

ယန်အန်းယု မှင်တက်သွားပြီး သူ့နှလုံးသားလေးလှုပ်ရှားသွားသည်။အနှီ နူးညံ့ကြင်နာသော ယီချန်းယန်က သူ မခုခံနိုင်ဆုံးသော တစ်စုံတစ်ရာဖြစ်လေသည်။

"ရှောင်ယု... တစ်နေ့မှာ ဝတုတ်တုတ်ရုပ်ဆိုးဆိုးကြီးဖြစ်သွားတဲ့လူက ကိုယ်ဆိုရင်ရော...ကိုယ့်မှာ ဘာနာမည်ကျော်ကြားမှုဘာပိုက်ဆံမှမရှိတော့ရင် မင်းဘာလုပ်မလဲ"

"အဲဒါဆိုရင် သိပ်ကောင်းတာပေါ့"

ယန်အန်းယု၏မျက်လုံးများ တောက်ပ၍သွားသည်။

ယီချန်းယန်:"..."

"ချန်းယန်...အဲဒီလိုဆိုရင် နေ့တိုင်း ခင်ဗျားကို 'အမျိုးသားနတ်ဘုရား'တို့'လောင်ကုန်း'တို့ခေါ်နေတဲ့လူတစ်အုပ်ရှိတော့မှာမဟုတ်ဘူး...တစ်နေကုန်'ချစ်တယ်'လို့လည်းကုန်းအော်နေကြတော့မှာမဟုတ်ဘူး ဟားဟား...အဲဒီအခါကျ တစ်နေ့မှာ ခင်ဗျားကို တစ်ယောက်ယောက်က အလစ်သုတ်သွားမှာကို စိတ်ပူစရာမလိုတော့ဘူးပေါ့"

ယန်အန်းယုက ပြုံးရယ်လိုက်ပြီး သူ့မျက်ဝန်းများက ကြယ်ရောင်စုံကောင်းကင်ကြီးကဲ့သို့ ရွှန်းလဲ့တောက်ပနေခဲ့သည်။

"ခင်ဗျားက ရုပ်ဆိုးဆိုး၊ဝတုတ်တုတ်နဲ့ငမွဲဖြစ်သွားရင်တောင် ကျွန်တော် ခင်ဗျားကိုချစ်နေဦးမှာပဲ...ခင်ဗျားက အမြဲတမ်း ကျွန်တော့်အတွက် ကြည့်အကောင်းဆုံးလူဖြစ်နေမှာ...အချိန်ကျလာရင် ကျွန်တော်က ပိုက်ဆံရှာပြီး မိသားစုကိုထောက်ပံ့ဖို့တာဝန်ယူမယ်...ချန်းယန်က လှနေဖို့ပဲတာဝန်ယူ...ကျွန်တော်တို့ အွန့်"

သူ့စကားမဆုံးခင်မှာ ယီချန်းယန်၏နှုတ်ခမ်းများက သူ့နှုတ်ခမ်းများပေါ်ကိုဖိကပ်လာပြီး နင့်နင့်သည်းသည်း နမ်းရှိုက်လေတော့သည်။

"ဝုတ် ဝူး"

Cocoလေးခဗျာ လင်လင်နှစ်ယောက်၏ လူရှေ့သူရှေ့(ခွေးရှေ့)မရှောင်ချစ်ပြမှုကို အစကနေအဆုံးအထိ ပွဲကြည့်ပရိတ်သတ်လုပ်လိုက်ရရှာလေသည်။မုန်းစရာအကောင်းဆုံးအရာက သူတို့နှစ်ယောက်က ထပ်ပြီး သူ့ကိုအလယ်မှာထားပြီး ပြွတ်ပြွတ်လုပ်တမ်းကစားနေကြခြင်းပင်။

ဝုတ်ဝုတ်...အကောင်ငယ်လေးရဲ့ အသဲနှလုံးကို နာကျင်အောင်လုပ်နေတယ်လို့...

နောက်တစ်ပတ်ကုန်ဆုံးသွားပြီးနောက် နှစ်သစ်ကူးအကြိုနေ့ကိုထပ်မံရောက်လာလေပြီ။

ဤနှစ်မှာ ယန်းအန်းယုက မနှစ်ကလို ယန်ကျွယ့်နောက်ကလိုက်ပြီး ယန်မိသားစုအိမ်မှာ နှစ်သစ်ကူးပွဲဆင်နွှဲရန်ပြန်မသွားခဲ့ပေ။ထိုအစား ပေရှင်းခရိုင်မှာပဲနေပြီး ယီချန်းယန်ကိုအဖော်ပြုပြီး နှစ်သစ်ကိုကြိုဆိုရန် ရွေးချယ်ခဲ့လေသည်။

ဤသည်က ပထမဆုံးအကြိမ်ဖြစ်ပေမဲ့

ယခုကနေစပြီး နှစ်တိုင်း ယီချန်းယန်၏ဘေးမှာ သူရှိနေမည်ဟုယုံကြည်သည်။

👥️