MM Story Teller

Chapter 68

Viewers 5k

👥️Chapter 68

ယန်ကျွယ့်၏အတွေးများကို ထွင်းဖောက်မြင်နေရသော လီယဲ့က သူ့ကိုနှစ်သိမ့်ပေးလိုက်၏။

"ဥက္ကဋ္ဌယန်...စိတ်မပူပါနဲ့... သခင်လေးယန် သေချာပေါက် အန္တရာယ်ကင်းမှာပါ"

"အင်း"

ယန်ကျွယ့်က ခေါင်းအသာညိတ်လေသည်။

Vasovagal syncopeကို ကုသရန် နလမ်းများစွာရှိပေမဲ့ တစ်ယောက်နှင့်တစ်ယောက်မတူ၊လူပေါ်မူတည်ပြီး ကွဲပြားသည်ဟု ဆရာဝန်ကဆို၏။လူနာအများစုက အထူးလေ့ကျင့်ရေးကနေ သက်သာပျောက်ကင်းနိုင်သော်လည်း တချို့က ဆေးသောက်ခြင်းနှင့် နှလုံးခုန်နှုန်းထိန်းအီလက်ထရွန်းနစ်ကိရိယာကဲ့သို့သော ကိရိယာပစ္စည်းနှင့်ကုသမှုလိုအပ်လေသည်။

ဤသည်က ယန်အန်းယုအတွက် ပထမဆုံးအကြိမ်ပြန်ဖြစ်ခြင်းဖြစ်၍ သူ့အခြေအနေက အတော်လေး မပြင်းထန်သည့်အဆင့်မှာရှိ၏။သူ့စိတ်အခြေအနေကြောင့်ဖြစ်သွားခြင်း ဖြစ်ဖို့ရာ ရာနှုန်းအလွန်များသည်။ဆရာဝန်က သခင်လေးလင်းကို ရက်အနည်းငယ်အကြာ ဆေးရုံမှာကုသမှုခံယူခိုင်းရန်ပြင်ဆင်ထားပြီး သူ ထူထူထောင်ထောင်ပြန်ဖြစ်လာသည်နှင့်အဆင်ပြေမှာ သေချာသလောက်ဖြစ်လေသည်။

ယန်ကျွယ့်တို့ လီယဲ့တို့နှင့်မတူပါဘဲ ယီချန်းယန်၏အမူအရာက ဘာပြောင်းလဲမှုမှမပြပေ။သို့ပေမဲ့ သူ့မျက်လုံးများက တခြားအရာများပေါ်တွင် အာရုံစိုက်နေသလိုမျိုး မည်းမှောင်နေသည်။

ယီချန်းယန်က အနှီအခြေအနေမှာပဲရှိနေပြီး အစကနေအခုအထိ စကားတစ်ခွန်းမှ မပြောသေးသည်ကိုမြင်လျှင် ယန်ကျွယ့်၏မျက်ခုံးများ ကျုံ့သွားပြီး မထိန်းနိုင်တော့ဘဲ ပြောလိုက်၏။

"ယီချန်းယန်"

ယီချန်းယန်က ချက်ချင်းမော့ကြည့်လာပြီး သူ့အကြည့်များက ယန်ကျွယ့်၏မျက်လုံးများနှင့်ဆုံသွားသည်။

"ငါက ရှောင်ယုရဲ့ အစ်ကိုကြီးဖြစ်ပေမဲ့

ကိစ္စတစ်ခုချင်းစီတိုင်းမှာ စေ့စေ့စပ်စပ် မတွေးပေးနိုင်ဘူး...မျက်စိလျှမ်းသွားတာတွေမဖြစ်ဖို့လည်းခက်တယ်...အဲဒီအဖေနဲ့တုန်းက..."

ဤနေရာအရောက်တွင် ယန်ကျွယ့် တန့်သွားခဲ့သည်။ဤသည်က သူ့ဆီကို မကောင်းသောမှတ်ဉာဏ်များကိုပြန်ခေါ်ဆောင်လာသည်။

"ထားလိုက်ပါတော့... လက်ရှိအခြေအနေအရ ငါ မင်းကိုစျေးဆစ်မနေချင်တော့ဘူး"

ယန်ကျွယ့်က ခေါင်းစဥ်ပြောင်းလိုက်ပြီး ခပ်မာမာပြောလိုက်လေသည်။

"မင်းတို့တွေအတူတူရှိတာကို ငါဆန့်ကျင်ချင်ဆန့်ကျင်ခဲ့မယ်...ဒါပေမဲ့ ရှောင်ယုရဲ့စိတ်က မင်းမှမင်းဖြစ်နေတယ်...ယီချန်းယန် တစ်နေ့နေ့မှာ ရှောင်ယုက မင်းကြောင့်နာကျင်ရရင် ငါမင်းကိုလွှတ်ပေးမှာမဟုတ်ဘူးနော်"

ယီချန်းယန်၏အကြည့်က ပြောင်းသွားလေသည်။လူကမူ တစ်ခွန်းမှမဆိုဘဲရှိနေဆဲဖြစ်၏။

"..."

လီယဲ့ မနေနိုင်ဘဲ နှုတ်ခမ်း ခပ်တင်းတင်းစုဝိုင်းလိုက်သည်။

ယန်ကျွယ့်က ယီချန်းယန်ကို ဘယ်တုန်းကမှ အမြင်မကြည်ခဲ့ပေ။ယန်ဖန်း၏လက်လက်ထဲကနေ သူရှန်းဟွမ်မီဒီယာကို လွှဲပြောင်းယူပြီးကတည်းက အပေါ်ယံမှာ ယဥ်ယဥ်ကျေးကျေးဖြစ်အောင် အားစိုက်ထုတ်မှုအပြည့်ထည့်ခဲ့ပေမဲ့ နှစ်ယောက်တည်းဆိုလျှင် ယီချန်းယန်ကို လျစ်လျူရှူထားသလောက်နီးနီးဖြစ်လေသည်။

အလုပ်ကိစ္စများကြောင့် ယန်ကျွယ့်

ရွေးချယ်စရာမရှိ၍ မဟုတ်ပါက ရိုးရိုးသားပြောရလျှင် သူယီချန်းယန်ကို ဘယ်တော့မှ ထပ်မတွေ့ချင်သလို အသိအမှတ်ပြုမှာလည်းမဟုတ်ပေ။

သို့ပေမဲ့ ယခု ယန်ကျွယ့်၏သဘောထားကအနည်းငယ်နွေးထွေးလာပုံရလေသည်။

သို့ရာတွင် ယောက်ဖဖြစ်သူ ယန်ကျွယ့်နှင့် တခြားယန်မိသားစုဝင်များ ယီချန်းယန်ကို လက်ခံစေချင်လျှင် ယီချန်းယန်အနေဖြင့် အများကြီး ကြိုးစားရဦးမှာဖြစ်ပြီး အလျင်လို၍မရပေ။

"ယီချန်းယန်...အရင်တုန်းက အဖေကမင်းကိုရွေးချယ်ခဲ့တယ်...အခုလည်း ရှောင်ယုက မင်းကိုရွေးချယ်နေပြန်တယ်...သူတို့ရဲ့ရွေးချယ်မှုတွေကို စိတ်မပျက်စေဘူးဆိုတာသက်သေပြဖို့နဲ့ မင်းကသူတို့ရဲ့ရွေးချယ်မှုတွေနဲ့ ထိုကိတန်တယ်ဆိုတာကိုသက်သေပြဖို့ အခုကနေစပြီး မင်းပိုလက်တွေ့ကျတဲ့လုပ်ရပ်တွေကို သုံးရမယ်"

ယန်ကျွယ့်က ယီချန်းယန်၏ မျက်လုံးများထဲကို စူးစူးစိုက်စိုက် စိုက်ကြည့်ရင်းဆိုလေသည်။

သူအစက ယီချန်းယန်က အဖြေပြန်ပေးရန် အင်တင်တင်ဖြစ်နေဦးမည်ထင်ခဲ့သော်လည်း မမျှော်လင့်ပါဘဲ ယီချန်းယန်က ခေါင်းညိတ်လာခဲ့သည်။

"အင်း"

ယီချန်းယန်က ပွင့်ပွင့်လင်းလင်းနှင့်ရိုးရိုးစင်းစင်း ပြန်ဖြေခဲ့လေ၏။

ချက်ချင်းပဲ ယန်ကျွယ့်နှင့်လီယဲ့ စိတ်ထဲမှာ အံ့ဩသွားကြ၏။ယန်အန်းယုက ယီချန်းယန်အတွက် အမှန်တကယ် အရေးပါပုံရလေသည်။သူက ယန်အန်းယုအတွက် သူ့ကိုယ်သူ ဖြည်းဖြည်းချင်း ပြောင်းလဲပေးရန်ဆန္ဒရှိနေသည်။

ထို့နောက်မှာ ယန်အန်းယုအနားယူနေသည်အား အနှောက်အယှက်မဖြစ်စေရန် ယန်ကျွယ့်ကလည်းအလုပ်ရှိသဖြင့် လီယဲ့ ယန်ကျွယ့်ကို အရင်လိုက်ပို့လိုက်သည်။

လူနာဆောင်ထဲတွင် ယန်အန်းယုက ကုတင်ပေါ်တွင် လဲလျောင်နေပြီး နိုးမလာသေးပေ။ယီချန်းယန်က သူ့ဘေးမှာတစ်ယောက်တည်းနေပြီး သူ့ကိုဂရုစိုက်ပေးနေသည်။

ယန်အန်းယုက အမြဲလေ့ကျင့်ခန်းကိုအာရုံစိုက်၍လုပ်ပြီး သိုင်းပညာအခြေခံလည်း ရှိသည်။အသက်နှစ်ဆယ်အရွယ် အားမာန်ပြည့်ဝသောလူငယ်လေးက ယခုလိုမူးလဲမသွားသင့်ကြောင်း လူတိုင်းသိပေသည်။

ကံမကောင်းစွာဖြင့် အရာရာတိုင်းမှာခြွင်းချက်ဆိုသည်ကရှိလေသည်။

ယီချန်းယန် ယန်အန်းယု၏လက်၏ညင်သာစွာဆုပ်ကိုင်ပြီး အိပ်ပျော်နေသည့်မျက်နှာလေးကို တိတ်တိတ်လေးကြည့်နေခဲ့သည်။ဤမျက်နှာက သိမ်မွေ့သောမျက်နှာအစိတ်မပိုင်းများနှင့်လှပပြီး အတော်လေးနှစ်သက်ချင်စဖွယ်ရှိလေသည်။သို့တိုင် ယန်အန်းယု အားပါးတရရယ်နေချိန်မျက်နှာလေးကို သူပို၍နှစ်သက်ဆဲဖြစ်လေသည်။ထိုအချိန်များမှာဆို ပါးပေါ်မှာ ချစ်စရာကောင်းသော ပါးချိုင့်လေးနှစ်ဖက်ပေါ်လာပြီး မျက်လုံးများကလည်း ကြယ်များထွက်ပြူကျလာတော့မည့်အတိုင်းတောက်ပနေတတ်သည်။

ပြီးတော့ ရုပ်ရည်အကြောင်းပြောရရင် အတိတ်က ယန်အန်းယုကလည်းဒီလိုမျိုးပဲမဟုတ်လား...

ယီချန်းယန်၏မျက်လုံးများက တဖြည်းဖြည်းနှင့် နက်သထက်နက်မှောင်လာခဲ့သည်။ခုခံနေမှုနှင့်ကြောက်ရွံ့မှုအရိပ်အယောင်တစ်ခု သူနှလုံးသားထဲမှာ ပေါ်လာ၏။သူ့အကြည့်တို့က အောက်သို့ရွှေ့သွားပြီး ယန်အန်းယု၏အပြစ်အနာအဆာတို့ကင်းမဲ့သော လက်ကောက်ဝတ်ဖြူဖြူပေါ်ကိုရောက်ရှိ၍ သွားကာ မထိန်းနိုင်ဘဲ လက်ချောင်းများဖြင့်ပွတ်သပ်လိုက်မိ၏။

ထိုအချိန်မှာ ယန်အန်းယု၏လက်ကတုန်သွားပြီး ဖြည်းညှင်းစွာ နိုးလာလေသည်။

"နိုးလာပြီလား...အားမရှိသလိုမခံစားရဘူးလား"

ယီချန်းယန်က ချက်ချင်းအနားကပ်လာပြီး ခပ်ဖျော့ဖျော့ပြုံးလိုက်လေ၏။ယခုနက ယန်းအန်းယုက ဆေးတစ်လုံးထိုးပြီး ဆေးသောက်ပြီးနောက် ခေါင်းမူးသည်ဟုဆိုကာ နာရီအနည်းငယ်အိပ်ခဲ့သည်။

ယန်အန်းယု၏နှုတ်ခမ်းများ တွန့်ကွေးသွားပြီး အပြုံးနှင့်အင်းဟုအသံပြုလိုက်၏။

"ဒီလောက်အကြာကြီး အိပ်ထားတာ...သေချာပေါက်ဗိုက်ဆာနေမှာပဲဟုတ်တယ်မလား"

ယီချန်းယန်က မေးလေသည်။

"အင်း"

"မင်း ဆေးရုံကအစားအသောက်ကို ကျင့်သားမရလောက်ဘူးထင်လို့ လီယဲ့ကိုကြိုပြီး ညွှန်ကြားထားတယ်...ခဏနေရင် သူစားစရာယူလာလိမ့်မယ်...နည်းနည်းလောက်ထပ်စောင့်ဦးနော်"

"အင်း"

ခဏနေသောအခါ ယီချန်းယန်က ထပြီး လိမ္မော်သီးတစ်လုံးခွာက ယန်အန်းယုကို တစ်စိတ်ချင်းခွံ့ကျွေးလေသည်။

ထိုအတောအတွင်းမှာ ယန်အန်းယု၏မျက်ဝန်းများတွင် အချစ်များဖြင့်ပြည့်နေပြီး သူ၏အရူးအမူးစွဲလမ်းနေသောအကြည့်များက ယီချန်းယန်အပေါ်မှာ သံမှိုစွဲသလိုမြဲနေခဲ့သည်။သူသွားရာတိုင်းကို ယန်အန်းယု၏အကြည့်များကလိုက်သွားလိမ့်မည်ဖြစ်ပြီး တစ်စက္ကန့်လေးပင် မခွာနိုင်ဖြစ်နေလေ၏။

"နေမကောင်းဖြစ်ပြီးတော့ ပိုလိမ္မာလာသလိုပဲ"

ထိုသို့ပြောပြီး ယီချန်းယန်က ယန်အန်းယု၏ပါးကိုဆွဲလိုက်လေသည်။

"ဟုတ်လား...ဒါပေမဲ့ ကျွန်တော်က အမြဲတမ်း အရမ်းလိမ္မာတာပါနော်ချန်းယန်"

ယန်အန်းယုက ချက်ချင်း ပြန်ပက်လိုက်၏။သို့ပေမဲ့ နောက်တစ်စက္ကန့်မှာပဲ သူ့မျက်လုံးများက နက်မှောင်သွားပြီး ယီချန်းယန်၏အင်္ကျီထောင့်စွန်းကို ဆွဲကာ အတော်လေး နောင်တရနေဟန်ဖြင့်ဆိုလေသည်။

"တောင်းပန်ပါတယ် ချန်းယန်...ကျွန်တော် ခင်ဗျားကို စိတ်ပူအောင်လုပ်မိသွားတယ်...ကျွန်တော်....."

ယီချန်းယန်က မဆိုင်းမတွပဲ လက်ညှိုးတစ်ချောင်းကို ယန်အန်းယု၏နှုတ်ခမ်းမှာဖိကပ်ကာ ဆက်မပြောအောင်တားလိုက်သည်။

" 'တောင်းပန်ပါတယ်'လို့မပြောနဲ့...ကိုယ်ကမှ မင်းကိုကောင်းကောင်းဂရုမစိုက်ခဲ့တဲ့သူပါ"

ယန်အန်းယု ကြောင်အသွား၏။သူက ကြောင်တက်တက်ဖြင့် ယီချန်းယန်ကို ငေးကြည့်မိလိုက်သည်။သူ တကယ် ဤယောကျာ်းဘေးမှာနေချင်သည်၊သည်ထက်နည်းနည်းဖြစ်ဖြစ် ပိုကြာကြာ နေချင်သည်...နည်းနည်းလေးပါပဲ...

နှစ်သစ်ကူးကိုဆင်နွှဲပြီးနောက်လူတိုင်းက ဘဝသစ်နှင့်အလုပ်ထဲကို ခြေစုံပစ်ဝင်နေကြစဥ်မှာ ယီချန်းယန်နှင့် ယန်ကျွယ့်က ယန်အန်းယု၏ ကျန်းမာရေးကိုစိတ်ပူပြီး သူ့ကိုတစ်ပတ်နားခိုင်းလေသည်။

တစ်ပတ်ကြာပြီးနောက် ယန်အန်းယု အချိန်ဇယားက အပုံလိုက်ကြီးဖြစ်နေပြီဖြစ်၏။

ချီစန်းတစ်ယောက် မျက်ခုံးများကိုနှိပ်လိုက်မိသည်။သူက သင့်လျော်သည့်အစီအစဥ်တစ်ခုကို အမြန်ဆုံးရေးဆွဲလိုက်သည်။လအနည်းငယ် ငြိမ်နေပြီးနောက် ယန်အန်းယုအနေဖြင့် သူ၏သရုပ်ဆောင်စွမ်းရည်ကိုသွေးရန် ရိုက်ကူးရေးအလုပ်အသစ်များ လုပ်ရန်လိုလေသည်။

ထောက်ခံချက်တချို့အပါအဝင် များစွာသော TVဒရာမာဒါရိုက်တာများက ယန်အန်းယုကို မျက်စိကျနေပြီး သူနှင့်ဆက်သွယ်ချင်နေကြသည်။ရုပ်ရှင်ကားဖိတ်ကြားချက်နှစ်ခုရှိနေပြီး ဘယ်တစ်ခုကိုရွေးရမလဲ မေးရသည်အထိ။

" 'အရိပ်ဝံပုလွေတော'နဲ့'ဝါး' ဘယ်ဟာကိုရိုက်ချင်လဲ စဥ်းစားပြီးပြီလား..."

ယနေ့မှာ ယီချန်းယန်က သူ့ကိုခေါ်ပြီး စိုးရိမ်စိတ်နှင့်မေးလာသည်။

"မစဥ်းစားရသေးဘူး"

ယန်အန်းယုက ရိုးရိုးသားသားပြန်ဖြေလိုက်ပြီး သူ့အမူအရာက အနည်းငယ် ရှုပ်ထွေးနေ၏။

" 'အရိပ်ဝံပုလွေတော'ကို စမ်းကြည့်ပါ့လား...အဲလိုဆို မင်း မုန့်ယာနဲ့တွဲရိုက်ဖို့အခွင့်အရေးရလိမ့်မယ်...သူ့ကိုသိလား"

"အင်း"

ယန်အန်းယုက ခေါင်းညိတ်လိုက်သည်။

"သရုပ်ဆောင်အရမ်းကောင်းတဲ့ ရုပ်ရှင်ဧကရာဇ်အသစ်မုန့်ယာ...သူ့သားက ကလေးသရုပ်ဆောင် မုန့်နွော်...အရမ်းချစ်စရာကောင်းတာနော်...ဒါပေမဲ့ မုန့်နွော်လေးရဲ့အမေကတော့...ဖျော်ဖြေရေးလောကရဲ့အဖြေမရှာနိုင်တဲ့ လျှို့ဝှက်ဆန်းကြယ်မှုတွေထဲကတစ်ခုပဲ"

"မင်းက ဒီလိုမျိုး အတင်းအဖျင်းအကြောင်း အတော်လေး ကောင်းကောင်းသိတာပဲ"

ယီချန်းယန်က အကူအညီမဲ့စွာရယ်လိုက်၏။

"အဲဒါတွေထက်ပိုအရေးကြီးတာက မုန့်ယာက အငိုခန်းတွေမှာ တကယ်ကိုအရမ်းတော်တယ်... သူနဲ့ တစ်ခန်းလောက်တွဲရိုက်ရရင် မင်းအတွက် ထိုက်သင့်သလောက်အကူအညီဖြစ်မှာ သေချာပေါက်ပဲ"

"အင်း"

ယန်အန်းယုက ပြန်ဖြေလိုက်ပြီးနောက် ခေါင်းစဥ်ပြောင်းလိုက်လေသည်။

" 'အရိပ်ဝံပုလွေတော'က အရမ်းပေါက်တဲ့စာအုပ်...ချန်းယန် ခင်ဗျားက ဒါအတွက် ကြားခံလုပ်ပေးနေတာလား"

မုန့်ယာက ခေါင်းဆောင်မင်းသားအနေဖြင့်ပါပြီး တခြားအကောင်ကြီးကြီးများလည်း ပါသည့် ဤကဲ့သို့သော ဝက်ဝက်ကွဲအောင်ပေါက်သည့် 3Dမျိုးအတွက် ဒါရိုက်တာက သူ့လိုတက်သစ်စတစ်ယောက်ကို တန်းစဥ်းစားမိမှာမဟုတ်ဟု ယန်အန်းယုယုံကြည်သည်။ထို့ကြောင့် ယီချန်းယန်က သူ့ကိုကူပြီးမိတ်ဆက်ပေးခဲ့ခြင်းဖြစ်မည်ဟု သူခန့်မှန်းရခြင်းဖြစ်လေသည်။

ယီချန်းယန် မှင်တက်သွားပြီး ၎င်းနောက် ချက်ချင်း ဝန်ခံလိုက်၏။

"အင်း...တစ်ခါတစ်လေ ကိုယ့်အားကိုယ်ကိုးတာက မလုံလောက်ဘူးရှောင်ယု...တချို့လူတွေအတွက် မင်းက ကိုယ့်ရဲ့အလိုလိုက်ခံလေးဖြစ်တဲ့အကြောင်း၊မင်းရဲ့ ကျောထောက်နောက်ခံက ယန်မိသားစုတစ်ခုတည်းမဟုတ်တဲ့အကြောင်းသိဖို့

လိုတယ်"

ဤအသိုင်းအဝိုင်းက မသန့်ရှင်းပေ၊ယခုဆိုလျှင် တချို့လူတွေက ယန်အန်းယုကိုစတင်၍ အာရုံစိုက်နေကြပြီဖြစ်သည်။သူတို့အသီးသီးမှာ သူတို့မှီခိုနိုင်သည့် အရာအမျိုးမျိုးရှိကြသည်။သူတို့ပြောင်ပြောင်တင်းတင်းလုပ်နိုင်သည့် ကိစ္စများရှိပြီး နောက်ကွယ်ကလူများက အဖော်ခံရမှာမဟုတ်ပေ။နည်းလမ်းများနှင့်လှည့်ကွက်များ အများကြီးရှိသေးလေသည်။

ယန်အန်းယု စိတ်ဆိုးသွားနိုင်မှန်းသူသိပေငြား ယီချန်းယန်အနေဖြင့် သူ၏သဘောထားကို အတိအလင်းကြေညာထားရမည့် တချို့အရာများရှိလေသည်။

သို့ပေမဲ့ ဤတစ်ကြိမ်၌ ယန်အန်းယုက စိတ်မဆိုးပေ။ယီချန်းယန်ကို နားလည်နိုင်ပေမဲ့ သူ အနည်းငယ်စိုးရိမ်နေဆဲဖြစ်လေသည်။

"ကျွန်တော့်ကို ဒီလိုမျိုးအရမ်းကောင်းပေးနေတာက တအားကြီးထင်ထင်ပေါ်ပေါ်ဖြစ်မနေဘူးလား ချန်းယန်"

"စိတ်မပူပါနဲ့...ကိုယ်က စည်းမျဥ်းစည်းကမ်းတွေကိုသိပါတယ်...ဉာဏ်ကောင်းတဲ့လူတွေလည်း ဒါကိုနားလည်ကြမှာပါ"

ယီချန်းယန်က ထိုသို့ပြောပြီးနောက် ရုတ်တရက် ထမေးသည်။

"ရှောင်ယု...အနာဂတ်မှာ ကိုယ်က ပိုပြီးတောင်ထင်ထင်ပေါ်ပေါ်ဖြစ်တဲ့အရာကိုလုပ်မယ်ဆိုရင်ရော"

ပိုပြီးတောင် ထင်ထင်ပေါ်ပေါ်ဖြစ်တာ...ယန်အန်းယု ခေါင်းကိုအလုပ်ပေးပြီး သူတို့၏လက်ရှိအထောက်အထားများနှင့်သူတို့၏ဆက်ဆံရေးတွေးကာ

သူ အကြမ်းဖျင်းနားလည်သွား၏။

"အဆင်ပြေပါတယ်...ကျွန်တော် မကြောက်ဘူး...ချန်းယန်ဆန္ဒရှိသရွေ့ ကျွန်တော် ချန်းယန်ဘေးမှာရှိနေမှာ"

ယန်အန်းယုက ယုံကြည်မှုရှိရှိပြောလိုက်လေသည်။

ယန်အန်းယု၏ ယုံကြည်မှုရှိသောလေသံက ယီချန်းယန်၏နှလုံးသားကိုနွေးထွေးသွားစေခဲ့၏။

"လိမ္မာလိုက်တာ"

"ချန်းယန်...ခင်ဗျားက ကျွန်တော့်ကို 'အရိပ်ဝံပုလွေတော'ရိုက်စေချင်မှန်းသိပေမဲ့...'ဝါး'က တကယ်ထူးခြားတယ်လို ကျွန်တော်ထင်တယ်"

ဝက်ဝက်ကွဲအောင်ပေါက်သည့်'အရိပ်ဝံပုလွေတော'နှင့်မတူပါဘဲ 'ဝါး'က ပို၍မှောင်မိုက်သည့်ဘက်ကို(Darker theme) သွေဖွယ်သွားသော စာပေရုပ်ရှင်ဖြစ်လေသည်။ဒါရိုက်တာ ဖူချန်းယွမ်ကလည်း အလွန်ငယ်ပြီး ယခုနှစ်တွင် ၂၆နှစ်သာရှိသေးလေသည်။သူ၏ပထမဆုံးရုပ်ရှင်က လူကြိုက်များသောအကြောင်းအရာများနှင့် လက်ရှိခေတ်၏ပြဿနာများကို အမိအရရိုက်ကူးထားပြီး အလွန်ပေါက်ခဲ့လေသည်။တန်ဖိုးနည်းရုပ်ရှင်ဖြစ်ပေငြါး ရုံတင်ငွေမြင့်သလို အများပြည်သူထံမှလည်း ချီးမွမ်းမှုများစွာရရှိခဲ့ပြီး အောင်မြင်မှုများ ရရှိခဲ့သည်။ 'ဝါး'က သူ၏ တတိယမြောက်ဇာတ်ကား

ဖြစ်ပြီး သူ့မှာ စိတ်ကူးသစ်များနှင့် ဖောက်ထွက်နိုင်စွမ်းရှိလေသည်။

"ချန်းယန်...ဒါရိုက်တာဖူက ဒီနေ့လည်မှာ ကျွန်တော်နဲ့စကားလာပြောလိမ့်မယ်... သူအရင်ဆုံးဘာပြောမလဲ ပြောကြားချင်တယ်"

ယန်အန်းယုက ဆက်ပြောလိုက်၏။

"ကောင်းပြီ မင်းရဲ့ရွေးချယ်မှုကို ကိုယ်လေးစားမှာပါ"

ယီချန်းယန်က ပေါ့ပေါ့ပါးပါးပြောလိုက်လေသည်။ယန်အန်းယုက စာပေရုပ်ရှင် ရိုက်ကူးချက်သည်ကို သူစိတ်မကွက်ပါချေ။မည်သို့ပင်ဖြစ်စေ 'အရိပ်ဝံပုလွေတော'လောက် လူကြိုက်များလောက်မည်မဟုတ်သော်လည်း သူက ယန်အန်းယုကို သူနှစ်သက်ရာကိုရွေးချယ်ပြီး ပျော်ရွှင်စွာ သရုပ်ဆောင်နိုင်ရန်လိုလားလေသည်။

နေ့လယ် နှစ်နာရီမှာ ဖူချန်းယွမ်က အချိန်မီရောက်လာသည်။

ထိုဒါရိုက်တာအသစ်က ဘာမော်ကြွားမှုမှမရှိပေ။မျက်မှန်တစ်လက်ကိုပဲဝတ်ထားပြီး ယဥ်ကျေးသိမ်မွေ့လေသည်။ အသက်အရွယ်အရ သူက ယန်အန်းယု၏အစ်ကိုနှင့် အတူတူလောက်ဖြစ်နေခြင်းတစ်ခုသာဖြစ်၏။

"စိတ်ပုံမှန်မဟုတ်ဘူး...ကိုယ့်ကိုကိုယ် သတ်သေချင်နေပြီး စရိုက်ခွဲနှစ်မျိုးရှိတဲ့ ဇာတ်လိုက်လား"

ဇာတ်လမ်းကို အကြမ်းဖျင်းနားလည်ပြီးနောက် ယန်အန်းယုက မျက်နှာချင်းဆိုင်မှာထိုင်နေသည့် ဖူချန်းယွမ်ကိုကြည့်ရင်းဆိုလိုက်သည်။

"ဒါရိုက်တာဖူက ဘာလို့ ကျွန်တော်နဲ့သင့်တော်တယ်လို့ထင်တာလဲ"

ဖူချန်းယွမ်က ပြုံး၏။

"ပထမဆုံးအနေနဲ့ မင်းရဲ့ အသွင်အပြင်နဲ့ စိတ်နေစိတ်ထားက အရမ်းသင့်တော်တယ်ရှောင်ယု ...ပြီးတော့ မင်းရဲ့အရင်ကဒရာမာတော်တော်များများကို ငါကြည့်ဖူးတယ်... မင်းရဲ့သရုပ်ဆောင်စွမ်းရည်က သိသိသာသာကို တိုးတက်လာတယ်...မင်း ငါ့ရဲ့ခေါင်းဆောင်မင်းသားအနေနဲ့သရုပ်ဆောင်နိုင်မယ်လို့ ငါယုံကြည်တယ်"

တစ်ဖက်လူက ကိုယ့်ကို အလွန်အလေးအနက်ထားပြီး ချီးကျူးသည်ကိုမြင်ပြီး ယန်အန်းယု ရှက်ရွံ့စွာ ပြုံးလိုက်သည်။ "ကျေးဇူးတင်ပါတယ်"

"နောက်ဆုံးအနေနဲ့က ငါ့ရဲ့အလိုလိုသိစိတ်ကြောင့်ဖြစ်မယ်"

ဖူချန်းယွမ်က နောက်ဆုံးအချက်ကို ပြောလေ၏။သူ့မျက်လုံးများက လေးနက်ပြီး ခိုင်မာ၍သွား၏။

"ယန်အန်းယု... ငါမင်းကို အရင်ကတကယ်တွေ့ချင်ခဲ့တာ... ဒီနေ့ နောက်ဆုံးမှာ မင်းကို လူချင်းတွေ့တဲ့အခါ မင်းမျက်လုံးထဲမှာ ကမ္ဘာနှစ်ခုရှိနေတဲ့ခံစားချက်ကို ပိုလို့တောင်ရတယ်"

ယန်အန်းယု ခဏတွင်းချင်း ကြက်သေသေ သွားသည်။

"..."

"ဆိုတော့ ယန်အန်းယု မင်းရဲ့နှလုံးသားထဲမှာရော ကမ္ဘာနှစ်ခုရှိနေလား"

👥️

Prev Next