MM Story Teller

Chapter 90

Viewers 5k

Chapter 90

• June 19 at 07:58 AM

👥️Chapter 90

"အင်း သမီးက မျက်မမြင်ပါ... မွေးကတည်းက မမြင်ရတာ..."

ခဲ့မုန့်အိုက်က အေးဆေးတည်ငြိမ်စွာပြောလာပြီး သူမ၏အမူအရာမှာ အပြောင်းအလဲများစွာမရှိပေ။ ခြောက်နှစ်ခုနစ်နှစ်ခန့်သာ ရှိသေးသော်လည်း သူမက ကျင့်သားရနေသည်မှာ ကြာပြီဖြစ်လေသည်။

ယန်အန်းယု အနည်းငယ်စိတ်မကောင်းဖြစ်ဘဲ မနေနိုင်ဘဲ သူမကို အလျင်စလို ပြုံးပြကာအားပေးလိုက်၏။

"ခယ့်အိုက်က ချစ်စရာကောင်းလိုက်တာ... ဒီနေ့ တွေ့ဆုံတဲ့ နည်းလမ်းက နည်းနည်းလေး ထူးခြားနေပေမဲ့ မင်းကို တွေ့ရတာ အရမ်းပျော်တယ်...လက်စသတ်တော့ ကောကောမှာ မင်းလိုမျိုး ချစ်ဖို့ကောင်းတဲ့ ဖန်လေးတစ်ယောက်ရှိနေတာပဲ"

ယန်အန်းယုက ထိုသို့ပြောသည်ကိုကြားသောအခါ ခဲ့မုန့်အိုက်က အနည်းငယ် ရှက်သွားပြီး ခေါင်းငြိမ့်လိုက်လေသည်။

"အိုး ဟုတ်သားပဲ...မင်းရဲ့မျိုးရိုးနာမည်က ခဲ့လား ...ဒါဆိုမင်းရဲ့ဖေဖေက..."

"သူက ခဲ့ချင်းလို့ခေါ်တယ်"

"..."

ယန်အန်းယု၏ အတွေးများ ပြောင်းသွားသည်။သေချာပြီ ဒါကဒီလိုကိုး...

ဒါပေမဲ့ ခဲ့ချင်းက ခြေထောက်မကောင်း ရုံတင်မကဘူး သူ့သမီးကလည်း မျက်မမြင်ဖြစ်လိမ့်မယ်လို့ မမျှော်လင့်ထားဘူး...အဲလိုဆိုရင်တော့ သူတို့မိသားစုဘဝက အရမ်းခက်ခဲမှာပဲ...

"မုန့်အိုက်က ထန်းရှောင်ကို သိလောက်မယ်ထင်တယ်"

"အွန်း"

ခဲ့မုန့်အိုက်က အကြိမ်ကြိမ် ခေါင်းညိတ်သည်။

"တကယ်တော့ အားရှောင်ကောကြောင့် ရှောင်ယုကောကောကို စပြီးသဘောကျခဲ့တာ...ကောကောတို့ပါတဲ့ 'Challenge First Time' ဆိုတဲ့ အစီအစဉ်ကို သမီးကြည့်လိုက်ရတယ်"

"မင်းက...ကြည့်တာလား"

"အတိအကျပြောရရင် တစ်ခုလုံးကိုနားထောင်တာ...ရှောင်ယုကောကော သမီးပြောပြမယ်နော်..."

ထို့နောက် ခဲ့မုန့်အိုက်မှ အကြောင်းနှင့် အကျိုးများကို ဖြစ်ကြောင်းကုန်စင် စတင်ပြောပြသည်။

သူမ၏အဖေ ခဲ့ချင်း၏နောက်ကလိုက်ကာ ခဲ့မုန့်အိုက်သည် သူမဘဝ၏နှစ်အများစုကို ပြင်သစ်တွင်နေထိုင်ခဲ့ပြီး ထန်းရှောင် နှင့်တွေ့ဆုံခဲ့သည်။အလဲအလှယ်ကျောင်းသားတစ်ဦးအနေဖြင့် သူသည် စေတနာ့ဝန်ထမ်းပွဲတစ်ခုအတွင်း မျက်မမြင် ညီမလေးခဲ့မုန့်အိုက်ကို ကူညီခဲ့သည်။ ထိုအချိန်မှစ၍ သူတို့၏ကံကြမ္မာများက ချည်နှောင်သွားခဲ့သည်။

ခဲ့မုန့်အိုက်ကြောင့် ထန်းရှောင်က မျက်မမြင်ကလေးမလေး၏ မိသားစုနှင့် တဖြည်းဖြည်း အဆက်အသွယ်ရှိလာခဲ့ပြီး သူမ၏အဖေက မမျှော်လင့်ဘဲ ဂီတလောကမှ နှစ်ထွက်ခဲ့သည်မှာ နှစ်ပေါင်းများစွာရှိပြီဖြစ်သော အဆိုတော်ခဲ့ချင်းဖြစ်နေကြောင်းကိုလည်း သိရှိခဲ့ရသည်။

နောက်ပိုင်းတွင် ထန်းရှောင်က အနုပညာရှင်တစ်ဦးအဖြစ် ပွဲဦးထွက်ခဲ့ပြီး ပြည်တွင်း၌ လူကြိုက်များသောရသစုံရှိုးတစ်ခုဖြစ်သည့် 'Challenge First Time' တွင်ပင် ပါဝင်ခဲ့ကြောင်း ခဲ့မုန့်အိုက် သိလာသောအခါ ကလေးမလေးက အလွန်စိတ်ဝင်စားလာပြီး ကြည့်ရှုချင်လာသည်။

သူမသည် မူလက ထန်းရှောင်အတွက် သွားခဲ့သော်လည်း ချက်ချင်းပင် ယန်အန်းယု၏ ဖန်အဖြစ်သို့ ပြောင်းလဲသွားခဲ့သည်။

ခဲ့မုန့်အိုက်က မျက်မမြင်ဖြစ်ပြီး ဗီဒီယိုများကို မကြည့်နိုင်သော်လည်း နားထောင်နိုင်သည်။အထူးသဖြင့် ယန်အန်းယု၏ အသံကို နားထောင်ရသည်အား သဘောကျပြီး အထူးသဖြင့် သူ၏ဟက်ဟက်ပက်ပက်ရယ်မောသံကိုဖြစ်၏။ယန်အန်းယုက ပါဝင်ခဲ့သော အစီအစဉ်အမျိုးမျိုးတွင် ယန်အန်းယု လျှောက်စနောက်နေသည်ဖြစ်စေ၊ဟာသပြဇာတ်အတိုလေးများသရုပ်ဆောင်ပြသည်ဖြစ်စေ၊သို့မဟုတ် ရံဖန်ရံခါ တေးသွားလေးညည်းနေသည်ဖြစ် ၎င်းတို့အားလုံးကို သူမအလွန်နှစ်သက်လေသည်။

မှန်ပေသည်၊ယန်အန်းယု ပါဝင်သရုပ်ဆောင်ထားသည့် ရုပ်ရှင်များနှင့် တီဗီဇာတ်လမ်းတွဲများကိုလည်း ခဲ့မုန့်အိုက်က 'ကြည့်ရှု' လိမ့်မည်ဖြစ်သည်။

သူမ၏ အဖေ ခဲ့ချင်းက ဇာတ်ဝင်ခန်းကို ပုံဖော်ပြောပြသည် နားထောင်ရင်း ကလေးမလေးက ဇာတ်ကြောင်းကို နားလည်ခဲ့သည်။ 'နှလုံးသား၌ထုဆစ်လေသော'က လူသတ်သမား အားခန်းအတွက် သူမ စိတ်မကောင်းဖြစ်ပြီး 'သောင်ရှင်း' က လူထူးလူဆန်း လော့ရွှင်ရှင်းကို လေးစားကိုးကွယ်ကာ 'Love Attack For 29 Days' က ပရောပရည်နိုင်သော သခင်လေးတုယီယင်ကို သဘောကျလေသည်။

ခဲ့မုန့်အိုက်က သူနှင့်သက်ဆိုင်သောလူတိုင်းကို ချစ်မြတ်နိုးပြီး ယန်အန်းယု၏အသံသရုပ်ဆောင်များကိုပင် အာရုံစိုက်ခဲ့သည်။ အသံကို သူမကြားသည်နှင့် အလွယ်တကူ ခွဲခြားနိုင်သည်။

'ယွီနိရှန်းပန်း' ကို သူမကြားလိုက်ရသောအခါ၊ခဲ့မုန့်အိုက် အမြင့်ဆုံးထိကို ကြည်နူးပျော်ရွှင်သွားသည်။ ကလေးမလေး၏အတွေးများက ဖြူစင်ပြီး ရိုးရှင်းလေကာ သူမ သူ့ကို အလွန်ကို ရူးရူးမိုက်မိုက် သဘောကျလေသည်။

"ရှောင်ယုကောကော သမီးမျက်လုံးတွေက မမြင်ရပေမဲ့ ကြားနိုင်တယ်၊ တွေးနိုင်တယ်...အဖေနဲ့အားရှောင်ကော ပြောပြတဲ့ ကမ္ဘာကြီးကိုကြည့်ဖို့ သမီးနှလုံးသားထဲက မျက်လုံးတွေကို သုံးနိုင်ပါတယ်"

ဤအရာအားလုံးကိုကြားပြီး ယန်အန်းယု သူ့ရင်ထဲမှာ နာကျင်မှုလှိုင်းတစ်ခု ထပ်မံခံစားလိုက်ရ၏။ သူက ပြုံးပြီး ခေါင်းညိတ်လိုက်သည်။

"မုန့်အိုက် မင်းပြောတာ တကယ်မှန်တယ်"

သန်မာပြီး အကောင်းမြင်တတ်သော မိန်းကလေး၏ နှလုံးသားထဲတွင် ပို၍ပင် လှပသော ကမ္ဘာတစ်ခု ရှိနေလိမ့်မည်မှာ သေချာပေသည်။

ယန်အန်းယုက သူမကို ထပ်ပြီး ချီးကျူးလိုက်သောအခါ ခဲ့မုန့်အိုက်က ရှက်ကိုးရှက်ကန်းနှင့် ပြုံးလိုက်လေသည်။

ထိုအချိန်တွင် ယန်အန်းယုက သူ့လက်ကောက်ဝတ်များကို ထပ်မံရွှေ့ရန် ကြိုးစားလိုက်သည်။ ကံမကောင်းစွာဖြင့်၊ ကြိုးများက အကြိမ်ပေါင်းများစွာ ချည်နှောင်ထားပြီး အမှန်တကယ်ပင် တင်းကျပ်လွန်းလှသည်။ သူ့အတွက် ချက်ချင်း လွတ်မြောက်ရန် မလွယ်ပေပ။

သာမန်အချိန်များမှာဆိုလျှင် ခဏလောက် ဤဖန်လေးနှင့်လိုက်ပြီးကစားပေးမှာဖြစ်ပေမဲ့ လက်ရှိမှာ ထန်းရှောင်က ယီချန်းယန်ကို ခြိမ်းခြောက်ရန် သူ့ကိုအသုံးပြုနေခြင်းဖြစ်နိုင်၏။ သူက ယီချန်းယန်ကို စိတ်မပူစေချင်သောကြောင့် ထွက်သွားရန် နည်းလမ်းကို တွေးနေရသည်။

"မုန့်အိုက် ဒါက ထန်းရှောင်ရဲ့အိမ်လား"

ယန်အန်းယုက ခေါင်းကိုအလုပ်ပေးပြီး မေးလိုက်သည်။

"အင်း ဒီတစ်ခါ သမီးက ဖေဖေနဲ့ ပြန်လာတာလေ...နောက်ရက်နည်းနည်းလည်းကြာရော အားရှောင်ကောက ရှောင်ယုကောကောကို သမီးဆီ ခေါ်လာပေးတယ် ...သမီး အရမ်းပျော်တာပဲ"

"ဒါပေမဲ့..."

ယန်အန်းယု ဝမ်းနည်းနေဟန်ဖြင့် မျက်မှောင်ကြုတ်ကာ ပြောလိုက်လေ၏။

"ကောကောတို့ ပိတ်လှောင်ခံထားရပုံပဲ"

ယန်အန်းယု နေရာတိုင်းကို လှမ်းကြည့်လိုက်သည်။ ဤအခန်းတွင် တင်းတင်းကျပ်ကျပ်ပိတ်ထားသည့် ပြတင်းပေါက်ငယ်တစ်ခုသာရှိပြီး အနက်ရောင် လိုက်ကာကချထားသည်။ သူတို့ကို ထပ်ခိုးမှာ ပိတ်လှောင်ထားခြင်းဖြစ်နိုင်သည်။

"အဆင်ပြေပါတယ်...အားရှောင်ကောက ကောကော ထွက်ပြေးသွားမှာကို ကြောက်လို့တဲ့...သမီးကို ကောကောနဲ့ စကားပြောခိုင်းထားတယ်... မကြာခင် သူရောက်လာမှာပါ"

ထန်းရှောင် အဲဒီကောင်က တကယ်ကို...

ယန်အန်းယု၏ နှုတ်ခမ်းများ တွန့်သွားပြီး သူ့မျက်ခုံးများအကြားနေရာက ပိုနက်လာသည်။

"ဒါပေမဲ့ ကောကောက ကြိုးနဲ့အချည်ခံထားရတယ်...ဒီလိုမျိုး..."

"တောင်းပန်ပါတယ် ရှောင်ယုကောကော အရမ်းနေရအဆင်မပြေဘူးလား"

ခဲ့မုန့်အိုက်လည်း မကြားရက်နိုင်တော့ပေ။

"အိုင်း... ဒီလို အချည်ခံထားရတာက သေချာပေါက် အဆင်မပြေဘူးပေါ့...မုန့်အိုက် ဧည့်သည်တွေကို ဒီလိုမျိုး ဆက်ဆံတာက မှားတယ်လို့ သမီးကို ဆရာမက သင်ပေးထားတယ်မဟုတ်ဘူးလား ...ကောကောကို ကူညီပေးနိုင်မလား "

"ဒါပေမဲ့..."

ခဲ့မုန့်အိုက်က အနည်းငယ် ချီတုံချတုံ ဖြစ်နေသည်။

"ဒါပေမဲ့ အားရှောင်ကောက သမီးပြန်ဖြေပေးရင် ကောကောကထွက်ပြေးသွားလိမ့်မယ်တဲ့"

"စိတ်မပူပါနဲ့...တံခါးကသော့ခတ်ထားတာ ကောကောမှာသော့မရှိဘူး...ထွက်သွားလို့မရဘူး"

ယန်အန်းယု၏ မျက်လုံးများက လှုပ်ခတ်သွားပြီး ပြုံးကာပြောလိုက်၏။

"မုန့်အိုက် ပြီးတော့ မင်းက ကောကောကို အရမ်းသဘောကျတော့ ကောကောမင်းကို လက်မှတ်ထိုးပေးချင်တယ်"

"တ...တကယ်လား"

ကလေးမလေး၏ နှလုံးသားက လှုပ်ရှားသွားသည်။

ယန်အန်းယုက မျက်ခုံးပင့်လိုက်သည်။

"ဒါပေါ့ တကယ်...လက်မှတ်ထိုးပေးရုံတင်မကဘူး ဓာတ်ပုံပါအတူတူ ရိုက်လို့ရတယ်...ဘယ်လိုပဲဖြစ်ဖြစ် မင်းကကောကောရဲ့ ဖန်လေ"

"ဒါဆို...ဒါဆိုလည်း အိုကေ"

ခဲ့မုန့်အိုက်က ခေါင်းညိတ်ပြပြီး စမ်းတဝါးဝါးလျှောက်လာလေသည်။ ယန်အန်းယု၏အနောက်ဘက်ကို သူမ မမြင်နိုင်သဖြင့် အထိအတွေ့ကိုပဲအားကိုးပြီး လက်သေးသေးလေးများဖြင့် ကြိုးကို နည်းနည်းချင်းဖြေလေသည်။

အနည်းငယ် လျော့ရဲသွားချိန်မှာ မထင်မှတ်ဘဲ တံခါးသော့ဖွင့်သံကို ကြားလိုက်ရသည်။တစ်ယောက်ယောက် ဝင်လာတော့မည်...

ချက်ချင်းပင် ယန်အန်းယ မျက်ခွံများလှုပ်သွားသည်။ သူ့ပင်ကိုယ်သိစိတ်က အတော်လေးမကောင်းတော့ဟု ပြောနေသည်။

"မုန့်အိုက် ရပ်လိုက်... မြန်မြန်သွားပြီးတော့ ဆိုဖာပေါ်မှာ လိမ်လိမ်မာမာထိုင်နေ"

ယန်အန်းယုက ကမန်းကတန်း အော်လိုက်သည်။

"အိုကေ... အိုကေ"

ခဲ့မုန့်အိုက်က လန့်ဖျပ်သွားသော်လည်း အတော်လေး နာခံမှုရှိပြီး ဆိုဖာပေါ် အလျင်အမြန် ပြန်ထိုင်လိုက်သည်။

တံခါးဖွင့်ပြီးနောက် ဝင်လာသည့်သူမှာ ဝူရှောက်ဖြစ်သည်။ သူ့နှုတ်ခမ်းတွင် ရက်စက်သော အပြုံးတစ်ခု ရှိနေသည်။

"ပြန်တွေ့ကြပြန်ပြီနော် ယန်အန်းယု"

"..."

ယန်အန်းယုက စကားတစ်ခွန်းမှ မပြောဘဲ သူ့ကိုသာ စိုက်ကြည့်နေသည်။ထန်းရှောင် နှင့်မတူဘဲ၊ ဝူရှောက် အတွက် သူ့တွင်ရှိသမျှက ရေမရောသော ရွံရှာမှုစစ်စစ်ဖြစ်လေသည်။

ရွံရှာမှုများ ပြည့်နှက်နေသော သူ့မျက်လုံးများကို မြင်လိုက်ရသော် ဝူရှောက်က လုံးဝ ဂရုမစိုက်ပေ။ သူက တံခါးကို ပြန်သော့ခတ်ပြီး တစ်လှမ်းပြီးတစ်လှမ်း ယန်အန်းယု အနားကိုကပ်လာရင်း သရော်လေသည်။

"ဟမ့် လက်ရှိမင်းမျက်လုံးတွေက အဲဒီနှစ်က ယီချန်းယန်နဲ့တူတယ်"

"ဝူရှောက် အဲဒီအချိန်တုန်းက ခင်ဗျား ချန်းယန်ကိုအသုံးချခဲ့တယ်..ခင်ဗျား သူ့ကို ငွေရှာစက်အနေနဲ့ ဆက်ဆံခဲ့တာမဟုတ်ဘူးလား"

"မှန်ပါတယ်... ဒါကြောင့် သူသီချင်းမဆိုနိုင်ဘဲ အသုံးမဝင်တော့တဲ့ အချိန်ကျ ခဲ့ချင်းကို သွားကူညီခဲ့တာလေ... အကြောင်းပြချက်က ရိုးရှင်းပါတယ်"

ဝူရှောက်က ပခုံးတွန့်ကာ ယီးတီးယားတားလုပ်လေသည်။

"ဒါပေမဲ့ နောက်ပိုင်းမှာ ယီချန်းယန်က နာမည်ကြီးလာတဲ့အခါ သူက ငါတို့ကို ပစ်မှတ်ထားပြီး လက်တုံ့ပြန်ဖို့ လာခဲ့တယ်...သူက ငါ့ကို ဘာမှကုန်းကောက်စရာမရှိတဲ့သူ ဖြစ်သွားစေရုံတင်မကဘူး...ရှင်းဝေကိုလည်း သေသွားစေခဲ့သေးတယ်... "

ထိုနေရာသို့ရောချိန်မှာ ဝူရှောက်၏အမူအရာမှာ နာကျင်လာသည်။

ထိုအချိန်တွင် ထိုစကားလုံးကို ဖမ်းမိသွားသော ခဲ့မုန့်အိုက်က ကြောင်တောင်တောင် ရေရွတ်လိုက်၏။

"မေမေ...မေမေ့နာမည်..."

"မေမေလား"

ယန်အန်းယု လန့်သွားသည်။

"ခဲ့ချင်းနဲ့ နဥ်ရှင်းဝေက..."

"ဟုတ်တယ် သူတို့တကယ်တွဲနေခဲ့ကြတာ ဟားဟား"

ဝူရှောက်က ရယ်နေပေမဲ့ သူ့မျက်နှာပေါ်က အမူအရာက ယုတ်မာလွန်းလေသည်။

"အဲဒီတုန်းက နဥ်ရှင်းဝေက ခဲ့ချင်းနဲ့ကိုယ်ဝန်တောင်ရသွားသေးတယ်... သူတို့က ယီချန်းယန်ဆီက ဖုံးကွယ်ထားတယ်၊ ငါ့ဆီကနေလည်း ဖုံးကွယ်ထားတယ် တခြားသူတွေ အကုန်လုံးဆီကနေ ဖုံးကွယ်ထားတယ်"

ယန်အန်းယု တစ်ခုခုမှားနေပြီဆိုသည်ကို သိလိုက်သည်။

"ခင်ဗျား... ခင်ဗျားက နဥ်ရှင်းဝေကို ချစ်နေတာလား"

"..."

ဝူရှောက်က တိတ်ဆိတ်စွာပဲ ဝန်ခံလိုက်၏။

သူတို့ကြားက ဆက်ဆံရေးက တကယ်ကို ရှုပ်ထွေးလွန်းပေမဲ့ အတိတ်က အချစ်က အမုန်းနှင့် စွဲလမ်းမှု ကလွဲ၍ ဘာမှမရှိတော့သည်မျိုး ဖြစ်ကောင်းဖြစ်နိုင်လေသည်။

"ယန်အန်းယု ငါ ရှင်းဝေကို ငါ့ကိုပြန် သဘောကျဖို့ မတောင်းဆိုခဲ့ဘူး ဒါပေမဲ့... သူကသေသွားတယ်"

ဝူရှောက်က စိတ်လှုပ်ရှားစွာ အော်လိုက်သည်။

"ဒါကြောင့် ငါ ယီချန်းယန်ကိုမုန်းတယ် ခဲ့ချင်းကိုလည်း မုန်းတယ်...သူတို့က ရှင်းဝေကိုသတ်ခဲ့တဲ့သူတွေပဲ"

ယန်အန်းယု၏ နှလုံးသားထဲတွင် မသက်မသာမှုများ ပြင်းထန်လာသည်။ဝူရှောက်၏ စိတ်ခံစားမှုများက ပိုပိုမှားယွင်းလာသလို သူခံစားလိုက်ရပြီး ယင်းက ရုတ်တရက် ရူးသွပ်သွားခြင်းမျိုး ဖြစ်နိုင်၏။

"ဒီတစ်ခါကျ ခင်ဗျားက ထန်းရှောင်ကို အသုံးချချင်တာလား"

ယန်အန်းယု သူ့အတွက် အချိန်ပိုရအောင်လုပ်ရင်း သူ့နောက်ကျောတွင် ချည်ထားသောလက်များကို တိတ်တဆိတ်ရွှေ့လိုက်ပြီး စိတ်မရှည်စွာဖြင့် ကြိုးများကိုဖြည်ချင်ခဲ့သည်။

"မှန်တယ်...ငါ ထန်းရှောင်ကို သွားရှာခဲ့တယ်...သူ့ကို လှည့်စားပြီး အမှန်တစ်ဝက်၊ အမှားတစ်ဝက် သတင်းအချက်အလက်တွေ အများကြီး ပေးခဲ့တယ်...ရှစ်နှစ်ကြာခဲ့ပြီ...ငါ ယီချန်းယန်ကို ဘာမှပိုင်ဆိုင်မှုမှမရှိတော့အောင်လုပ်ချင်တယ်...ခဲ့ချင်းရဲ့နာကျင်လွန်းလို့ အသက်မရှင်ချင်တော့တဲ့ အကြည့်ကို မြင်ချင်တယ်"

ခဲ့မုန့်အိုက်က ငိုတော့မလိုဖြစ်နေ၏။သူမက ဝူရှောက်၏ ရှပ်အင်္ကျီထောင့်ကို လှမ်းဆွဲလိုက်သည်။

"ဦးဦးဝူ ဘာတွေပြောနေတာလဲ"

"ပါးစပ်ပိတ်ထား"

ဝူရှောက်က ဟောက်လိုက်ပြီး ခဲ့မုန့်အိုက်ကို ဘေးသို့ တွန်းထုတ်လိုက်သည်။

ကလေးမလေးက အငိုက်မိပြီး ချက်ချင်း ကြမ်းပြင်ပေါ် လဲကျသွားခဲ့လေသည်။ မျက်ရည်များ ချက်ချင်း ကျလာ၏။

"ဝူးဝူး ... ဖေဖေ..."

"ဝူရှောက် ခင်ဗျား တကယ်ရူးသွားပြီလား"

ယန်အန်းယု မယုံလောက်အောင် အံ့အားသင့်သွားပြီး ဝူရှောက်ကို မုန်းတီးစွာ စိုက်ကြည့်လိုက်သည်။

"ယန်အန်းယု ယီချန်းယန်က မင်းကို တကယ်ကြိုက်တာလား"

ဝူရှောက်ကလည်း ယန်အန်းယုကို လှောင်ပြောင်သလို ကြည့်သည်။

"အခုချိန်မှာ သူ လူတစ်ယောက်ကို သိပ်ချစ်မိသွားလိမ့်မယ်လို့ မထင်ခဲ့မိဘူး"

"ထန်းရှောင်က မင်းကို ဘယ်တုန်းကမှ မထိချင်ခဲ့ဘူး...သူက အမြဲတမ်း စိတ်ပျော့တယ် ဒါပေမဲ့ ငါက မတူဘူး ...."

ထိုသို့ပြောကာ ဝူရှောက်က ယန်အန်းယု၏ လည်ပင်းကို ချက်ချင်း ညှစ်လိုက်လေသည်။

"အဟွတ် အဟွတ် ဝူရှောက် ခင်ဗျား... ခင်ဗျား..."

ယန်အန်းယုက မသက်မသာ ချောင်းဆိုးလိုက်သည်။ထိုအသံကိုကြားပြီး ခဲ့မုန့်အိုက် ပို၍ပင် အထိတ်ထိတ်အလန့်လန့်ဖြစ်သွားပြီး အားကိုးရာမဲ့ဖြစ်သွားသည်။

"ရှောင်ယု...ရှောင်ယုကောကော ဘာဖြစ်နေတာလဲ"

ယန်အန်းယုက သူ့အောက်နှုတ်ခမ်းကို ပြင်းပြင်းထန်ထန် ကိုက်လိုက်ပြီး သူ့အတွင်းအားများကို စုစည်းကာ ကြိုးများကို ချက်ချင်းဖြတ်လိုက်ပြီး ဝူရှောက်ကို ခေါင်းချင်း ဆောင့်တိုက်လိုက်၏။

"ချီးတဲ့"

နာကျင်နေသော ဝူရှောက်က ခြေလှမ်းများစွာ နောက်ပြန်ဆုတ်သွားသည်။ယန်အန်းယုက ဤမျှ သန်မာမည်ဟု မသူမျှော်လင့်ထားပေ။ဒေါသကြီးစွာဖြင့် သူ့အိတ်ကပ်ထဲမှ စစ်တပ်သုံးဓားတစ်ချောင်းကို ချက်ချင်းထုတ်လိုက်သည်။

ဓါးရောင်လက်သွားသည်နှင့် ယန်အန်းယုက ခေါင်းငုံ့ပြီး ရှောင်လိုက်၏။ သူ့လှုပ်ရှားမှုများက လျင်မြန်ပြီး နောက်တစ်စက္ကန့်မှာပဲ ဝူရှောက်၏လက်ကောက်ဝတ်ကို ဖမ်းကိုင်ကာ ရက်စက်စွာ လိမ်ချိုးလိုက်သည်။ ချက်ချင်းပင်၊ အရိုးကျိုးသံ ဂျွတ်ခနဲ ထွက်ပေါ်လာသည်။

"အား"

ဝူရှောက်က မချုပ်တည်းနိုင်အောင် ထအော်လိုက်ပြီး တန်ပြန်တိုက်ခိုက်ချင်နေဆဲဖြစ်၏။ သို့သော်လည်း ယန်အန်းယုက သူ့ကို လုံးဝအခွင့်အရေးမပေးခဲ့ပါချေ။စူးရှသောအကြည့်တစ်ချက်နှင့် သူ့ခြေထောက်ကို ကွေးလိုက်ကာ ဝူရှောက်၏ဗိုက်ကို ဒူးနှင့်တိုက်လိုက်ပြီး ချက်ချင်းပင် သူ့ကို ကြမ်းပြင်ပေါ်သို့ လဲကျသွားစေသည်။

သူ၏ လှုပ်ရှားမှုများက အလွန်လျင်မြန်ပြီး အစွမ်းထက်သည်။ဝူရှောက်လို တစ်စုံတစ်ယောက်အတွက် ယန်အန်းယု သူ့ကို သက်တောင့်သက်သာဖြေရှင်းနိုင်သည်မှာ သဘာဝဖြစ်သည်။

"မုန့်အိုက်"

နောက်တစ်စက္ကန့်တွင် ခဲ့ချင်းက ထိတ်လန့်တကြား တံခါးကိုဖွင့်လိုက်သည်။

...

ပင်မဧည့်ခန်းတွင် ထန်းရှောင်က ယီချန်းယန်ကို မေးခွန်းထုတ်နေဆဲဖြစ်သည်။

"ယီချန်းယန် မင်း အဲဒီနှစ်တုန်းက မင်းရဲ့ သူငယ်ချင်းကောင်း ခဲ့ချင်းကို ပြန်ပေးဆွဲပြီး သူ့ခြေထောက်တွေကို ဖျက်ဆီးပစ်လိုက်တယ်... နဥ်ရှင်းဝေကိုတောင် မီးဖွားရခက်ပြီး သေသွားစေပြီး သူများမိသားစုကို ကြေကွဲစရာအဖြစ်ဆိုးကို ဖြစ်စေခဲ့တယ်...မင်း ဘယ်လိုများ လိပ်ပြာလုံယောင်ဆောင်နေနိုင်သေးတာလဲ"

👥️

Prev Next