Chapter 92

Chapter 92

 • June 19 at 07:59 AM

👥️Chapter 92

"ချန်ယန် တောင်းပန်ပါတယ် ကျွန်​တော် ...နောက်ကျသွားတယ်"

 ယီချန်းယန်၏ အနာကျင်ဆုံးအချိန်၌ အတူမရှိ​ပေးနိုင်ခဲ့သည့်အတွက် သူ အလွန်ဝမ်းနည်းမိလေသည်။ သူ စောစောလေး ပေါ်လာနိုင်လျှင် ကောင်းမည်။

"ကိစ္စမရှိပါဘူး...ဘယ်လိုပဲဖြစ်ဖြစ် ရောက်လာခဲ့တုန်းပဲ​လေ...အခုကနေစပြီး နေ့တိုင်း အမြဲရှိနေဖို့ပဲလိုတယ်"

သူ့မိဘများ၊ယန်ဖန်း ၊ခဲ့ချင်းနှင့်နဥ်ရှင်းဝေတို့နှင့်မတူပါဘဲ ယန်အန်းယုက ရောက်လာပြီးသည်နှင့် သူ့ဘေးမှာ အမြဲရှိနေမည်က အလွန်သေချာလေသည်။

အချိန်အတော်ကြာပြီးနောက် ယန်အန်းယု ရူးကြောင်ကြောင်မေးခွန်းတစ်ခုကို ရုတ်တရက်မေးလိုက်မိသည်။

"ချန်းယန် ကျွန်တော့်ကို ဘာလို့ ချစ်မိသွားတာလဲဟင်"

၎င်းကိုကြားသောအခါ ယီချန်းယန် သူ့အိမ်မက်ထဲမှာ အမြဲပေါ်လာသည့် ရှေးခေတ်က သက်တော်စောင့်​လေးကို မတွေးဘဲမနေနိုင်ခဲ့ပေ။သူက ထိုလူငယ်ကို အမြဲစောင့်မျှော်နေပုံရသည်။ အချိန်အတော်ကြာအောင် စောင့်ပြီးမှ နောက်ဆုံးမှာ ဤလက်ရှိ 'ယန်အန်းယု' ကို တွေ့နိုင်ခဲ့သည်။

ရှောင်ယုကို သူ သူ့အရင်ဘဝကတည်းက ကြိုက်ခဲ့ခြင်း ဖြစ်နိုင်သည်။

"ဘယ်လိုလုပ်အကြောင်းပြချက်ရှိမှာလဲ"

ယီချန်းယန်က သူ၏ပါးပြင်ကို ကိုင်လိုက်ပြီး ပြုံးကာပြောလိုက်၏။

"ကိုယ် မင်းကို သဘောကျတယ်... မင်းနဲ့ပတ်သက်တဲ့ အရာအားလုံးကို ကိုယ်သဘောကျတယ်"

သူပြောနေစဥ်မှာ ယီချန်းယန်၏ မျက်နှာက ရေကဲ့သို့ ညင်သာပြီး သူ့အပြုံးက နူးညံ့​နေသည်။ ပထမဆုံး ဆုံတုန်းကနှင့် လုံးဝမတူပေ။

"..."

ထို့ကြောင့် megadere​လေးယန်အန်းယုသည် ကြည့်နေရာမှ မှင်တက်သွားသည်။ မျှော်လင့်ထားသည့်အတိုင်း၊ သူ၏ချန်းယန်က ဤကမ္ဘာပေါ်တွင် အချောဆုံးဖြစ်ပြီး သူ့နှလုံးသားထဲတွင် အစားထိုးမရနိုင်ဆုံး၊ ထူးခြားသော​ဖြစ်တည်မှုလည်းဖြစ်သည်။

နေ့ရက်တိုင်းတွင် ပျော်ရွှင်မှုနှင့် ချိုမြိန်မှုများရှိရုံသာမက ဝမ်းနည်းမှုနှင့် နာကျင်မှုများလည်း ရှိနေမှာ သေချာ​ပေသည်။သို့ပေမဲ့ သူနှင့်အတူရှိနေသရွေ့ သူ မဖြတ်သန်းနိုင်သော ချိုင့် ကျင်းဆိုသည်က တစ်ခုမှ မရှိပါချေ။

​​ဖြစ်ရပ်အပြီးတွင် ဝူရှောက်က အထိန်းသိမ်းခံထားရပြီး အပြင်မထွက်နိုင်ပေ။ထွက်နိုင်လျှင်ပင် သူ့ကံကြမ္မာကို ပြောင်းလဲရန် အခွင့်အရေး ရှိမည်မဟုတ်ပေ။ချန်းယန်ဖြစ်စေ၊ကျန့်ယန်ကော်ပိုရေးရှင်းမှလူများဖြစ်စေ မည်သူကမှ သူ့ကို လွတ်​ပေးရန် မရည်ရွယ်ဘဲ ဆက်လက်အနိုင်ကျင့်မှာ သေချာ​ပေသည်။

ထန်းရှောင်အတွက်မူ သူက ရှန်းဟွမ်နှင့် စာချုပ်ကို ရုတ်တရက် ရပ်စဲလိုက်သည်။ လျော်ကြေးပေးပြီးနောက် စီမံခန့်ခွဲရေးကုမ္ပဏီများကို ပြောင်းလဲခဲ့သည်။သူက 'အိပ်တစ်ဝက်နိုးတစ်ဝက်' ကို တစ်ဝက်တစ်ပျက်ပဲ ရိုက်ကူးထားသောကြောင့် ဒါရိုက်တာမှာ ကူကယ်ရာမဲ့ဖြစ်ပြီး နောက်ဆုံးအခိုက်အတန့်တွင် သရုပ်ဆောင်များကို ပြောင်းလဲရန်မှလွဲ၍ ရွေးချယ်စရာမရှိပေ။ နောက်ပိုင်းတွင် ပျက်စီးဆုံးရှုံးမှုများစွာရှိခဲ့သည်။

ယန်ဦးလေးများ သယ်ဆောင်လာသူမှာ ဤကဲ့သို့ ထွက်ခွာသွားခဲ့သည်။ သူတို့ စိတ်တိုလွန်း၍ သေချင်လောက်အောင် ခံစားခဲ့ရသော်လည်း သူတို့၏မျက်နှာကို ထည့်သွင်းစဉ်းစားကာ အပေါ်ယံမှာ ထုတ်ဖော်ပြသခဲ​လေသည်။ တစ်ချိန်တည်းမှာပင်၊ ၎င်းတို့၏လက်ထဲမှာဝန်ထမ်းများသည် ယခုနှစ်တွင် ဆိုးရွားသောလုပ်​ဆောင်ချက်များရှိခဲ့​လေသည်။

ယန်ကျွယ့်က လျင်မြန်စွာနှင့် ပြတ်ပြတ်သားသား တုံ့ပြန်ခဲ့သည်။ သူက ရဲရင့်သော ဝန်ထမ်းတစ်ယောက်အနေဖြင့် ဆက်လက် တာဝန်ထမ်းဆောင်ခဲ့ပြီး စီမံခန့်ခွဲမှုအဆင့်ရှိသော်လည်း လစာပဲယူနေသော အကြီးတန်းဝန်ထမ်းအချို့ကို ဖိအားပေးကာ လမ်းပျောက်စေသည့်အတွက် ယန်ဦးလေးများကို ထပ်မံ ဒေါသထွက်စေခဲ့သည်။

ကုမ္ပဏီ၏ပုံမှန်အစည်းအဝေးတွင် ယန်ကျွယ့်က လူအချို့အား ၎င်းတို့၏နေရာကို အတတ်နိုင်ဆုံးသိပြီး နောက်ကွယ်မှ​ပြဿနာမရှာရန် သတိပေးခဲ့သည်။ အမည်မဖော်ပြထားသော်လည်း အဓိပ္ပာယ်မှာ အလွန်ထင်ရှားလေသည်။

ထိုအချိန်တွင် ခဲ့ချင်းက သူ့သမီး ခဲ့မုန့်အိုက်ကို ပြင်သစ်သို့ ပြန်ခေါ်သွားခဲ့သည်။ယန်အန်းယုက ကလေးမလေးအား Wechatအပ်ပြီး သူမကို အသံမက်ဆေ့ချ်များပို့ကာ သီချင်းဆို​ပြခြင်း၊ နောက်ပြောင်ခြင်းများ ပြုလုပ်လေ့ရှိသည်။

ယီချန်းယန်နှင့် ခဲ့ချင်းတို့၏ ကျေးဇူးတရားများနှင့်အာဃာတများက မည်သို့ပင်ဖြစ်နေပါစေ ဤကလေးက အပြစ်ကင်းပေသည်။

****

နောက်ထပ်သုံးလကြာသောအခါ ဆောင်းဦး-ဆောင်းရာသီကို ရောက်လာပေပြီ။

'မြေခွေးနတ်ဆိုး၏ ဒဏ္ဍာရီ' ကို အချိန်အတော်ကြာ ရိုက်ကူးပြီးသွားခဲ့သည့် ယန်အန်းက လက်ရှိအချိန်မှာ နောက်ထပ် ဇာတ်ရုပ်တွေကို လက်မခံချင်တော့ဘဲ ထောက်ခံချက်များနှင့်ပရိုမိုးရှင်း လှုပ်ရှားမှုများပဲ လုပ်နေသည်။ 

မကြာခင်မှာပဲ ယီချန်းယန်ကလည်း 'အိပ်တစ်ဝက်နိုးတစ်ဝက်' ဇာတ်ကားအတွက် ရိုက်ကူးရေး ပြီးစီးသွားခဲ့သည်။လင်လင်နှစ်​ယောက်အတွက် အားလပ်ချိန်ရှားပါးသောကြောင့် နှစ်သစ်အတွက် ပြင်ဆင်ကြပြန်သည်။

နှစ်သစ်နှင့်အတူ ယီချန်းယန်နှင့် ယန်အန်းယုတို့သည် အလုပ်များကိုဘေးပို့ပြီး နိုင်ငံရပ်ခြားသို့ နှစ်ပတ်ကြာ ခရီးထွက်ခဲ့ကြသည်။သူတို့ပြန်လာ​သောအခါ သူတို့၏အချိန်ဇယားက ဆံ့သောပမာဏအထိ ပြည့်ကျပ်သွားခဲ့သည်။တစ်ချိန်တည်းမှာပင် ယန်အန်းယု ပါဝင်သရုပ်ဆောင်ထားသည့် 'ဝါး' ကိုလည်း တရားဝင်ထုတ်လွှင့်ခဲ့သည်။

အကြောင်းအရာ နှင့် အမျိုးအစားကြောင့် 'ဝါး' အတွက် ရုံတင်ငွေသည် 'နှင်းဝံပုလွေတော' နှင့် 'ပေချန်းမှတ်တမ်းများ' ကဲ့သို့သော တချိန်တည်းတွင် ပြသခဲ့သည့် ဇာတ်ကားများလောက် မကောင်းသော်လည်း ၎င်း၏ လူထုအမြင်မှာ အလွန်ကောင်းမွန်​ပြီး ဝေဖန်သူများကလည်း တမူထူးကာ အကဲဖြတ်ပေးကြသည်။

စိတ်​လေးဖွယ်ရာလေထုနှင့် နောက်ခံဇာတ်ကြောင်းထဲမှာ ဇာတ်ကွက်ကို လက်တွေ့ဘဝအရ သင့်လျော်စွာ ချဲ့ထွင်ထားကာ၊ ဇာတ်ကောင်များမှာ လေးနက်သောအကူအညီမဲ့မှုများရှိကြပြီး တစ်ဦးစီတိုင်းတွင် ပျော်ရွှင်မှုအသေးအမွှားများရှိသည်။

ဇာတ်သိမ်းသီချင်း ထွက်ပေါ်လာသောအခါတွင် အမျိုးသား ဇာတ်လိုက်၏ အမည်၏ 'မ​ဝေ့ဝါးပါစေနှင့်' ဟူသော အဓိပ္ပါယ်ကိုလည်း ဖော်ပြခဲ့သည်။ ရုပ်ရှင်ပြီးသွားသောအခါ ပရိသတ်က တိတ်တိတ်လေး ပြန်တွေးကြသည်။ဇာတ်လမ်းကိုယ်၌အပြင်ကို လွမ်းဆွေးခြင်း နှင့် စိတ်ဓာတ်ကျခြင်းတို့၏ နားမလည်နိုင်သော ခံစားမှုတစ်ခုလည်း ရှိသည်ဟု ခံစားခဲ့ကြရသည်။

(ET/N–莫要迷离မော့ယောင်မီလီ မော့က သူတို့ရဲ့မျိုးရိုးနာမည်ဖြစ်ပြီး မီလီကလည်း သူတို့နာမည်တွေပါ မီလီက ဝေ့ဝါးသည်/ရှုပ်ထွေးသည်လို့လည်း အဓိပ္ပါယ်ရပါတယ် စကားလုံးကစားထားတာ အများကြီးပါပါတယ်)

စာပေရုပ်ရှင်များသည် အကျိုးအမြတ်အတွက် ရင်းနှီးမြှုပ်နှံခြင်းမဟုတ်ပေ။ ၎င်းတို့သည် အချို့သော စိတ်တ္တဇအတွင်းသဘာဝကို ပို၍အာရုံစိုက်ကြပြီး ပရိသတ်ကို နိုးထရန်အတွက်နှင့် အိပ်မက်ထဲသို့ ရုတ်တရက် ရောက်သွားစေသည်။ အတော်လေး ဂနာမငြိမ်ဖြစ်နေသော လက်ရှိ လူ့အဖွဲ့အစည်းမှာ လူများ၏ စိတ်သဘောကလည်း တဖြည်းဖြည်း ဖောက်လွဲဖောက်ပြန် မူမမှန် ဖြစ်​နေနိုင်သလို ပုံမှန်မဟုတ်သော အခြေအနေတစ်ခုကို ဖြည်းဖြည်းချင်း ချဉ်းကပ်လာသည့်အတွက် တစ်ခါတစ်ရံမှာ အမှန်တကယ် တရားထိုင်ရန် လိုအပ်လေသည်။

'ဝါး' ရုပ်ရှင်က​နေတစ်ဆင့် လူများ၏ အမွှာညီအကို နှစ်ယောက် မော့မီနှင့်မော့လီအပေါ် အထင်အမြင်က နက်ရှိုင်းပြီး ယန်အန်းယု၏ သရုပ်ဆောင်မှုက ရုတ်ချည်း တိုးတက်လာသည်ဟု ခံစားခဲ့​ကြရ​လေသည်။ဆင်တူ စရိုက်နှစ်ခုနှင့်ဇာတ်ကောင်ဖြစ်သော ရှန်းရှဇာတ်လမ်းတွဲ 'မြေခွေးနတ်ဆိုး၏ဒဏ္ဍာရီ' ကို ပို၍ပင် အာရုံစိုက်လာကြ၏။

ရှန်းရှဇာတ်လမ်းတွဲ 'မြေခွေးနတ်ဆိုး၏ ဒဏ္ဍာရီ' ကို ရိုက်ကူးပြီးသောအခါ နောက်ပိုင်းတွင် အရည်အသွေးစစ်​​ဆေးမှုက လျင်မြန်စွာ ပြီးဆုံးသွားခဲ့ပြီး နွေရာသီအားလပ်ရက်အတွင်း၎င်းအား ထုတ်လွှင့်ရန် အလျင်အမြန် လုပ်ဆောင်နိုင်ခဲ့သည်။ ယခုဆိုလျှင် တစ်နေ့ အပိုင်းသုံးပိုင်း နေ့တိုင်းထွက်သောကြောင့် ပရိသတ်က စွဲလန်း​နေ​ကြသည်။

သို့သော်လည်း နောက်ဆုံး နိဂုံးချုပ်အရ ...

သူ၏ချစ်လှစွာသောတပည့် အားချယ်ကို ကာကွယ်ရန်အတွက် ခေါင်းဆောင်ချင်းဟွမ်က ပြင်းထန်သော ဒဏ်ရာများဖြင့် သေဆုံးသွားခဲ့သည်။အားချယ်က ကြီးကြီးမားမား လှုံ့ဆော်ခံရပြီး နောက်တစ်ကြိမ် နတ်ဆိုးအသွင်ပြောင်းသွားကာ သူ၏ တပည့်အပေါင်းအသင်းများကို အန္တရာယ်ပြုပြီး နတ်ဆိုး​​လောကသို့ အမြန်ပြေးသွားခဲ့သည်။

လင်းယွမ်ဂိုဏ်းသည် ကြီးမားသော အပြောင်းအလဲများကို ကြုံတွေ့ခဲ့ရသည်။ အမျိုးသမီးဇာတ်လိုက် မုရှီးကလည်း သူမ၏ပခုံးပေါ်ရှိ ကြီးလေးသောတာဝန်ကို နားလည်ခဲ့ပြီး သူမ၏ သံ​ယော​ဇဥ်များအားလုံးကို စွန့်လွှတ်ကာ စီနီယာအစ်ကိုနှစ်ယောက်နှင့်အတူ အခြေအနေအရပ်ရပ်ကို နောက်တစ်ကြိမ် တာဝန်ယူခဲ့သည်။ နောက်ဆုံးတွင် သူမသည် ဂိုဏ်း၏ဆေးလုံးသန့်စင်ရေးဆရာဖြစ်လာခဲ့သည်။

လုံးလုံးလျားလျား နတ်ဆိုးအသွင်ပြောင်းသွားသော အားချယ်က သေမျိုးလောက၏ ကျင့်​ကြံ​ရေးဂိုဏ်းများအားလုံးမှ နှင်ထုတ်ခံရပြီး လူ့ဘုံအတွက် လုံးဝ မသင့်လျော်တော့ပေ။အလွမ်းသင့်ရင်းပဲ သူသည် လူ့ဘုံနှင့် နတ်ဆိုးဘုံကြားရှိ ဝင်ပေါက်တစ်ဝိုက်တွင် မကြာခဏ ပျံဝဲနေ၏။နှစ်အတော်ကြာအောင် သူသည်နေရာမှာ စောင့်ကြပ်ရန် ရွေးချယ်ခဲ့လေသည်။

အားချယ် နှင့် မုရှီး တို့သည် ရာစုနှစ်တစ်ခုအကြာမှာ တွေ့ဆုံရန် သဘောတူထားခဲ့ကြသည်။ ထိုနေ့တွင် သူတို့နှစ်ဦး နောက်တစ်ကြိမ် ပြန်လည်ဆုံတွေ့ကြမည်ဖြစ်သည်။

နှစ်တစ်ရာကြာပြီးသောအခါ နတ်ဆိုးဖြစ်လာပြီးနောက် အားချယ်၏ နှင်းနှင့်တူသော ငွေရောင်ဆံပင်နှင့် မျက်လုံးများက အနီရောင်ပြောင်းသွားပြီဖြစ်ပြီး သူ့ဂျူနီယာငယ်​လေး​ဖြစ်တုန်းကလိုမျိုး သိမ်မွေ့ပြီး လှပသောအသွင်အပြင်နှင့် မတူတော့ပေ။သူက ဖြည်းညင်းစွာ လျှောက်လာနေသော ခရမ်းရောင်ဝတ်အမျိုးသမီးကို စိုက်ကြည့်နေခဲ့သည်။ သူမ၏မျက်နှာမှာ လုံးဝ မပြောင်းလဲသွား​ပေ။သူမက သူတို့နှစ်ယောက် ပထမဆုံးစတွေ့တုန်းကလိုမျိုး ချိုချိုသာသာပြုံးနေခဲ့သည်။

"စီ...စီနီယာမုရှီးလား"

အဆုံးမရှိသောနှစ်များအတွင်း အားချယ် မည်သို့ပြုံးရမည်ကို မသိတော့ဘဲ သူနောက်ဆုံးစကားပြောခဲ့သည်မှာ မည်မျှကြာခဲ့ပြီဖြစ်သည်ကို မေ့နေပြီဖြစ်သောကြောင့် သူ့အသံမှာ ကြောက်စရာကောင်းလောက်အောင် အက်ရှနေခဲ့​သည်။

မထင်မှတ်ပဲ ထိုအမျိုးသမီးက ဝမ်းနည်းစွာ ခေါင်းခါလိုက်သည်။

 "စိတ်မကောင်းပါဘူး...ဆရာသခင်က ဆုံးပါးသွားတာကြာပါပြီ"

ချက်ချင်းဆိုသလိုပင်၊ ရာစုနှစ်တစ်ခုတာရှည်လျားသော အထီးကျန်မှုသည်ပင် ဤအခိုက်အတန့်ရှိ ကြေကွဲဝမ်းနည်းမှုနှင့် စိတ်ပျက်အားငယ်မှုတို့နှင့် မညီမျှခဲ့ပေ။

"သူမထွက်သွားခင်မှာ ဆရာသခင်က ကျွန်မကို သူ့အစား သူငယ်ချင်းတစ်ယောက်နဲ့ တွေ့နိုင်မယ်လို့ မျှော်လင့်ခဲ့တယ်...သူက ကျွန်မကို စကားတစ်ခွန်းနဲ့ ပါးခဲ့တယ်"

"ဘာလဲ"

"သူကပြောတယ် 'ချစ်တယ် အားချယ်' "

'မြေခွေးနတ်ဆိုး၏ဒဏ္ဍာရီ' ၏ အလယ်အပိုင်းတွင် အလွန်ပျော်စရာကောင်းပြီး ရယ်စရာကောင်းသော အခြေအနေများ ရှိသော်လည်း လူများကို အဆုံးမရှိ ငိုကြွေးစေသည့် ဤအဆုံးသတ်မျိုးကို ကြိုဆိုခဲ့ကြရသည်။

တကယ်ကို ရင်ကွဲစရာကောင်းလွန်း၍

ပရိတ်သတ်က ဝမ်းနည်းပက်လက်ကြေကွဲခဲ့ကာ မချိတင်ကဲဖြစ်ခဲ့ရသည်။လူတိုင်းက အထူးသဖြင့် ဇာတ်ညွှန်းရေးဆရာဆီ ဓားများပို့ချင်ကြပြီး ဘဝအကြောင်းပြောဖို့ လိုက်ရှာချင်​နေသည်။ နောက်ထပ် HE ထုတ်ဝေမှုတစ်ခု ရိုက်ကူးနိုင်မည်ဟု မျှော်လင့်ကာ လူအများအပြားက ဒါရိုက်တာကို ဒူးထောက်ကာ တောင်းပန်ခဲ့ကြသည်။

နောက်ဆုံး ဇာတ်သိမ်း ထွက်ပေါ်လာပြီးနောက်၊ဒါရိုက်တာက ဇာတ်ညွှန်းရေးဆရာကို အလွန်စာနာမိပြီး အမြန်ထွက်ပြေးဖို့ ပြင်ဆင်ရန် အကြံပေးခဲ့သည်။

"ဇာတ်ညွှန်းမှာ BE ပါတာကို ပထမဆုံးမြင်တုန်းကတည်းက နည်းနည်းဆိုးတယ်လို့ ခံစားရတယ်...နောက်ဆုံးရလဒ်က ပိုလို့တောင် ဆိုးရွားမယ်လို့ မထင်ခဲ့မိဘူး" 

ယန်အန်းယုလည်း သက်ပြင်းမချဘဲမ​နေနိုင်ပေ။

ကုရှင်းကလည်း ခေါင်းညိတ်သည်။ 

"မှန်တယ်...ငါ့ကျဲက ငါ့ကို တစ်ညလုံး ဖက်ပြီး ငိုနေ​တော့ ငါ့ကျဲ့ စိတ်အ​ခြေအနေမကောင်းဘူး...ငါ့ကျဲ စိတ်အခြေအနေမကောင်းတော့ ထုံးစံအတိုင်း သူ့ယောက်ျားက မျက်နှာကြီးမည်းနေတယ်... အိုင်း အဲဒီတုန်းက သူ့ဇာတ်လမ်းကြောင့် စာဖတ်သူ ဘယ်နှစ်ယောက် အနှိပ်စက်ခံရသလဲ ဆိုတာ သူစဥ်းစားမိမှာတောင် မဟုတ်ဘူး"

"ဟမ်...ကုရှင်းကျဲ ဘာတွေပြောနေတာလဲ... ကျွန်​တော် ဘာလို့နားမလည်ရတာလဲ"

ယန်အန်းယုက ခေါင်းကုတ်လိုက်သည်။

ကုရှင်း မျက်တောင်တဖျပ်ဖျပ်ခတ်ပြီး ပြုံးလိုက်သည်။

"ရှောင်ယု ဝတ္ထုတွေဖတ်ရတာ ကြိုက်လား"

"ကျွန်တော်လား အဆင်ပြေပါတယ်... ဒါပေမဲ့ ချန်းယန်က စာဖတ်ရတာအ​တော်​လေးကြိုက်ပုံရတယ်"

"အိုး..အဲဒါဆို ဒီလိုကိုး...ဒါဆို ငါအခွင့်အရေးရရင်...စီနီယာယီကို စာရေးဆရာတစ်ယောက်ညွှန်းပေးလိုက်မယ်"

ကုရှင်းက ထူးခြားဆန့်ကြယ်စွာ ပြုံးလိုက်သည်။

ရှန်းရှဇာတ်လမ်းတွဲကို ယခု စိတ်အားထက်သန်စွာ ထုတ်လွှင့်နေပြီး ဇာတ်လမ်းတွဲ၏ သီချင်းအနည်းငယ်ကလည်း လိုက်လှဲစွာကြိုဆိုခံရလေသည်။ 

အဓိကအကြောင်းအရာမှာ ပါးစပ်ထဲစွဲ​စေ​ပြီး၊ လေးနက်ကာ လွန်စွာ စိတ်ထိခိုက်စရာကောင်းသည်။ဇာတ်သိမ်းသီချင်းကို ချင်နွော်ရှီကသီဆိုခဲ့ပြီး ၎င်း၏စာသားများသည် ဇာတ်လမ်းနှင့် လုံးဝလိုက်ဖက်​လေသည်။ သီချင်းက ထိထိမိမိနှင့် ရင်ထဲထိစေသည်။ ​​နားထောင်၍ အလွန်ကောင်း၏။

ထို့ကြောင့်၊ လူအများက ချင်နွော်ရှီကို သဘာဝအတိုင်း ​ပြန်အာရုံစိုက်လာ​​ကြသည်။

ထို့အပြင်၊ သူသရုပ်ဆောင်ထားသော မြေခွေးနီက ရိုက်ချက်အနည်းငယ်သာရှိသော်လည်း ပြုံးလိုက်ချိန် သူ၏လှပသောအသွင်အပြင်နှင့် မျက်လုံးကွေး​လေးများဖြင့် မိန်းမငယ်သန်းပေါင်းများစွာ၏နှလုံးသားကို ချက်ချင်းဖမ်းစားနိုင်ခဲ့သည်။ ရိုးရှင်းစွာပင် သူသည် မေ့နိုင်စရာမရှိပေ။

ချင်နွော်ရှီက တစ်ပြန်ထပ် လူကြိုက်များလာခဲ့ပြီး စင်နောက်ကိုပြောင်းသွားသော ရှန်းသုန်းဟောင့်သည်လည်း သူ့အတွက် ပျော်ရွှင်နေခဲ့သည်။ အကြောင်းတချို့ကြောင့် ဖျက်သိမ်းခဲ့ရသော Fanmeetingကို တစ်နှစ်ခြားပြီးနောက် ထပ်မံကျင်းပခဲ့၏။

၎င်းတို့၏သဘောတူညီချက်အရ ချင်နွော်ရှီက အနှီအထူးဧည့်သည် ယန်အန်းယု ယကို ဖိတ်ကြားထားဆဲဖြစ်သည်။ သူ့အပြင် ဤတစ်ခါမှာကောလီရှုလည်းပါ၏။သူငယ်ချင်းကောင်း သုံးယောက်က စည်းချက်အတိုင်းကပြဖျော်ဖြေပြီး အရာရာကို အသက်ဝင်တက်ကြွစေခဲ့သည်။

လှုပ်ရှားမှုပြီးဆုံးသွားသောအခါ၊ချင်နွော်ရှီ လေးနက်သောခံစားချက်များဖြင့် 'အဖော်' ကိုဆိုခဲ့သည်။ တက်ရောက်လာသူ သူငယ်ချင်းများအားလုံးသည် လက်ထဲတွင် အလင်းချောင်းများကို ဝှေ့ယမ်းကာ ကျယ်လောင်စွာ အော်ဟစ်သီဆိုနေကြသည်။နွေးထွေးပြီး သဟဇာတ​ဖြစ်သော ဒီမြင်ကွင်းက သူတို့မျက်လုံးများကို တကယ်မျက်ရည်ကျစေသည်။

ပွဲအပြီးမှာ ယန်အန်းယုနှင့် ချင်နွော်ရှီ တို့၏ ဆက်ဆံရေးက တကယ်ကို ကောင်းမွန်ပြီး ယန်အန်းယုက သူ့ကို ထားမသွားသလို ဘယ်တော့မှလည စွန့်မပစ်ဘဲ ဘယ်လောက်ပဲ ခက်ခဲနေသည့်အချိန်များမှာဖြစ်စေ ချင်နွော်ရှီကို အမြဲတမ်း ယုံကြည်နေသောကြောင့် ရှီယုဖန်များကို ထပ်ပြီးတက်ကြွလာ​စေခဲ့သည်။

ယခု​လိုအချိန်မျိုးမှာ များပြားလှသော ယန်ယုဖန်များက သဘာဝအတိုင်း အလျှော့ပေးရန် ငြင်းဆိုခဲ့ကြသည်။ ဘယ်သူက အချစ်စစ်လဲဆိုသည်နှင့် ပတ်သက်ပြီး CP အဖွဲ့နှစ်ဖွဲ့က အဆက်မပြတ် ငြင်းခုန်နေခဲ့ကြသည်။

ရှီယုအဖွဲ့ အလွန် တက်ကြွစည်ကား​နေသည်ကိုမြင်တိုင်း ရှန်းဟွမ်ရှိ ဥက္ကဋ္ဌယန် ခေါင်းကိုက်လာကာ တစ်​ယောက်သော ရုပ်ရှင်ဧကရာဇ်​ကြီးလည်း သုန်မှုန်သွားသည်...

ထို့အပြင်၊ fanmeetingများအကြောင်းပြောသောအခါ ကျန်းကျီချမ်က ၎င်း၏ဖျော်ဖြေပွဲအတွင်း ​ယောကျ်ား​လေးဖန်အချို့ကို စင်ပေါ်တွင် ဂိမ်းကစားရန်နှင့် စကားဘာညာပြောရန် ဖိတ်ကြားခဲ့သည်။ 

မထင်မှတ်ပဲ၊ ထိုယောကျ်ားလေးဖန်က ရုတ်တရက် မကြောက်မရွံ့ ဖွင့်ပြောခဲ့လေသည်။

👥️