MM Story Teller

Chapter 99

Viewers 8k

🌍Chapter 99

ထန်မော့ စာအုပ်ကိုဆောင့်ပိတ်ချလိုက်တော့သည်။

သူ အပေါစားစာအုပ်ကိုကြည့်လျက် သံဖိနပ်ချုပ်သမားကြီးဂိမ်းထဲတွင် သူအဘယ်ကြောင့် ရှင်းဖုန်းအပေါ်အလွန် သည်းခံနိုင်ခဲ့သည်ကို နားလည်သွားခဲ့သည်။

ထန်မော့ဂိမ်းထဲသို့၀င်လာပြီးကတည်းက ရှင်းဖုန်းမှာ အမှန်ကို ဘယ်တော့မပြောခဲ့ပေ။ ထန်မော့ ရှေ့ကစားသမားနှစ်ယောက်က ရှင်းဖုန်းလက်ထဲတွင် သေသွားမှန်းမသိသော်လည်း သူ၏နဂိုစရိုက်အရ ပီနိုကီယိုဂိမ်းပြီးကတည်းက ၀က်လိုအသင်းဖော်များအပေါ် သည်းခံစိတ်ကုန်ဆုံးနေခဲ့ပြီးဖြစ်သည်။

ရှင်းဖုန်းမှာသိသိသာသာကိုပင် ဂိမ်းစည်းမျဥ်းများကို မပြောပြခဲ့ချေ။ ထန်မော့ ထိုသူ၏လည်ပင်းကိုဓါးထောက်လျက် ပြောရင်ပြော မပြောရင်သေဟု လုပ်ခဲ့သင့်သည်။ သို့သော် မလုပ်ခဲ့ချေ။

"ဘာလို့ဆို ဒီစွမ်းရည်ကြောင့်ပေါ့"

'ငါ့ရဲ့ အရည်လဲ့နေတဲ့ မျက်လုံး၀ိုင်းကြီးတွေကိုကြည့်စမ်း'ဟူသည့်စွမ်းရည်မှာ အသုံးပြုသူကို အန္တရာယ်မရှိပုံပေါ်စေကာ ကျန်သူများ၏ ယုံကြည်မှုကို အလွယ်တကူရရှိစေသည်။ ထိုလူမှာ ဤစွမ်းရည်ကို အသုံးမပြုပဲတောင် တဖက်လူကို ယုံကြည်လာအောင် ပြုလုပ်နိုင်ဆဲပင်။ ၄င်းမှာ တိမ်မြုပ်နေသော စွမ်းရည်၏ သဘာ၀ကျကျသက်ရောက်မှုကြောင့်ဖြစ်သည်။

ချန်ရှန်းရှန်း၏စွမ်းရည်က တဖြည်းဖြည်းပိုပိုပြီး ဥာဏ်ကောင်းလာခြင်းဖြစ်သည်။ ရှင်းဖုန်း၏စွမ်းရည်မှာမူ ပြောင်းလဲနေကာ သူ့အား ပိုပို၍ အားနည်းကာ အန္တရာယ်မရှိပုံပေါ်စေသည်။ ဤစွမ်းရည်ကိုအသုံးပြုမနေလျှင်တောင် သူကတခြားသူများထက် ပိုယုံကြည်စရာကောင်းနေဆဲပင်။ ထိုလူမှာ ဤစွမ်းရည်ဖြင့် ကျန်ကစားသမားများကို သတ်ခဲ့ခြင်းဖြစ်လိမ့်မည်။

ရှင်းဖုန်းက တရား၀င်ကစားသမားဖြစ်ကာ ဖူ၀မ်သော်မှာ ခိုး၀င်သူဖြစ်သည်။ ကြည့်ရသည်မှာ အနက်ရောင်မျှော်စင်က လူကဲခတ်ပုံအတော်လေး ညံ့ဖျင်းပုံပင်။

ထန်မော့တွေးတောရင်း စာအုပ်ကိုဖွင့်ကာ ထိုစွမ်းရည်ကိုတဖန်လှန်ကြည့်လိုက်ပြန်သည်။ သူ၏လက်ချောင်းများမှာ ကစားသမား၏အမူအကျင့်ပြောင်းလဲသွားသည်ဟူသောနေရာကို အသာပွတ်သပ်နေခဲ့လေသည်။

"ဒီဟာက အလိုအလျောက်စွမ်းရည်ပဲ... ငါ့ပိတ်ချင်ရင်တောင် ပိတ်လိုက်လို့မရဘူး"

ထန်မော့ရေရွတ်လိုက်မိသည်။

သူ့အနေနှင့် ဤစွမ်းရည်က သူ၏အသွင်အပြင်နှင့်ပြုမူပုံကို မည်သို့သက်ရောက်မှုရှိစေမည်လဲ မသိချေ။ သို့သော် တခြားသူများမှ မိမိကို အန္တရာယ်မပေးနိုင်သော လူပျော့လေးအဖြစ် မြင်ကြမည်ကို တွေးမိလျှင် တစ်ကိုယ်လုံးအေးစက်သွားမိလေသည်။ သူသည်၀က်ယောင်ဆောင်သော ကျားလုပ်ရမည်ထက် သူ၏ခွန်အားနှင့် တိုက်ရိုက်စကားပြောရသည်ကိုသာ နှစ်သက်သည်။

သို့သော် မည်သို့ပင်ဆိုစေကာမူ ဤစွမ်းရည်မှာ သူ့အား လူကြားထဲ သိပ်ထင်ပေါ်ခြင်းမရှိစေရန် လုပ်ပေးနိုင်သည့်အတွက် အနည်းငယ်တော့ ကျေနပ်ပေးလိုက်လေသည်။

တစ်ညနားပြီးနောက် ထန်မော့ဆေးခန်းကို ထပ်ရောက်လာခဲ့သည်။ လော့ဖုန်းချန်းမှာ သူ့အား သုန်မှုန်နေသောအမူအယာဖြင့် ဆိုလာခဲ့သည်။

"ရှန်းရှန်းရဲ့ ကိုယ်က ပိုပြီးသန်မာလာအောင် လုပ်လို့မရဘူး"

ထန်မော့ အံ့အားသင့်စွာ လှည့်ကြည့်လိုက်သည်။

ကုတင်ပေါ်တွင် ကလေးမလေးမှာ သူမ၏လက်ထဲတွင် တောက်ပသောကြယ်ကလေးတစ်လုံးကို ကိုင်ထားခဲ့သည်။

ထန်မော့ထိုကြယ်ကိုမြင်လျှင် မှတ်မိသွားခဲ့သည်။ လွန်ခဲ့သော လ၀က်ခန့်က ချန်ရှန်းရှန်းနှင့် လျိုဖေးဖေးတို့ ခရစ်စမတ်ဂိမ်းတစ်ခုထဲ အတူ၀င်ခဲ့ကြသည်။ သူတို့မှာ ခရစ်စမတ်ဂိမ်းကိုရှုံးခဲ့သည့်တိုင် ခရစ်စမတ်သစ်ကိုင်းကိုသုံးလို့ရသေးသည်လော။

ထန်မော့၏ အတွေးကိုဖတ်မိသကဲ့သို့ လော့ဖုန်းချန်းကဆိုလာခဲ့သည်။

"အစကငါလည်း ဒီအကိုင်းကသုံးမရတော့ဘူးထင်ထားတာ... ဒါပေမယ့် ညတုန်းက ရှန်းရှန်းသစ်ကိုင်းက အလင်းလုံးအဖြစ်ပြောင်းသွားပြီး သူ့ဆီပျံလာတယ်လေ... ငါတို့လိုပဲ အဲဒီကြယ်လေးက သူ့ခန္ဓာကိုယ်ကို ပိုသန်မာအောင်လုပ်ပေးချင်တာ...ဒါပေမယ့်မရခဲ့ဘူး.. ကြယ်လေးကဒီတိုင်းကျန်နေပြီး ရှန်းရှန်းရဲ့ ခွန်အားကတိုးမလာဘူး"

ထန်မော့မှာ မနေ့ညက သူဖတ်ခဲ့သော စွမ်းရည်စာအုပ်ထဲမှ စာကြောင်းကိုသတိရသွားခဲ့သည်။

[စွမ်းရည်: ဥာဏ်ကြီးရှင်ရဲ့ တွေးခေါ်နိုင်စွမ်း]

...

[ကန့်သတ်ချက်: ခန့်မှန်းချက်မှန်ကန်နိုင်စွမ်းက ၅၀ရာခိုင်နှုန်း ခွန်အားတိုးလာနိုင်စွမ်းက သုညရာခိုင်နှုန်း]

သူမမှာ ဥာဏ်ကြီးရှင်တစ်ဦးကိုတွေးခေါ်နိုင်စွမ်းမျိုးကို ပိုင်ဆိုင်ခဲ့သော်လည်း ပြင်ပခွန်အားများကို လုံး၀လက်လွှတ်ခဲ့ရသည်။

ထန်မော့ ခတ္တမျှတိတ်ဆိတ်သွားခဲ့လျက် ကုတင်ပေါ်မှ ကလေးမလေးကို ကြည့်လိုက်သည်။ ထို့နောက် သူသည်အနီးသို့လျှောက်သွားကာ တီးတိုးဆိုလိုက်သည်။

"တစ်ခုခုရရင် တစ်ခုခုကိုလက်လွှတ်ရမှာပဲလေ... အားနည်းတာကိုပြင်လို့မရဘူးဆိုရင် မင်းရဲ့ဥာဏ်ရည်မြင့်မြင့်နဲ့ ပိုသန်မာလာအောင်လုပ်"

လော့ဖုန်းချန်းနှင့် ချန်ရှန်းရှန်းမှာ ထိုစကားကိုကြားလျှင် အံ့အားသင့်သွားခဲ့ကြသည်။ လူ၂ဦးမှာ ထန်မော့အား အတွေးကိုယ်စီဖြင့်ကြည့်လိုက်ကြသော်လည်း ဘာမျှတော့မဆိုခဲ့ကြချေ။

မကြာခင်မှာပင် လော့ဖုန်းချန်းနှင့် ထန်မော့ ဆေးခန်းမှ ထွက်လာခဲ့ကြသည်။

လော့ဖုန်းချန်းကဆိုလာသည်။

"ငါမင်းကို ဂျက်ပြန်လာတဲ့အခါ အသိပေးမယ်"

"ကောင်းပြီ"

သူတို့၂ရက်ခန့်စောင့်ခဲ့ရသည်။

ဇန်န၀ါရီ ၆ရက်နေ့ နေ့လည်တွင် ဂျက် ကျောက်ကျန်းနှင့် ထန်ရှောင်းတို့ မောလ်သို့အလျင်အမြန်ပြန်ရောက်လာကြသည်။ လော့ဖုန်းချန်းက ဂျက်အား ထန်မော့ကိုရှာရန် လွှတ်လိုက်လေသည်။

ထန်မော့ရုံးခန်းထဲသို့ရောက်လာလျှင် ဂျက်နှင့် ကျောက်ကျန်းကိုသာတွေ့လိုက်ရသည်။

လော့ဖုန်းချန်းကရှင်းပြလာသည်။

"ထန်ရှောင်းနဲ့ ကျန်တဲ့သူတွေကဒဏ်ရာရနေလို့ အခုလစ်ဇ်က ကုပေးနေတယ်...အခုက ငါတို့တွေသဘောတူထားတာကိုလုပ်ဖို့ ခေါ်လိုက်တာ... ဖက်တီးလေးက မင်းကိုပြောပြလိမ့်မယ်... ပြီးတော့ ထန်မော့ ဒါကချန်ရှန်းရှန်းပြောခဲ့တာ...ကစားသမားတွေကအခုတကယ်ပဲ မျှော်စင်ကို ဆန္ဒအလျောက်တိုက်ခိုက်လို့ရပြီ"

ထန်မော့တန့်သွားမိလေသည်။

ထို့နောက် ကျောက်ကျန်းမှ သူ့အား ငှက်ပျောဘုံဆိုင် စုဝေးခြင်းဂိမ်းထဲကို ၀င်သွားပြီးနောက် ဘာဖြစ်ခဲ့သည်ကို ပြောပြခဲ့သည်။ ထန်မော့မျှော်လင့်ထားသလိုပင် မတူညီသောကစားသမားများမှာ မတူညီသော ခက်ခဲမှုအဆင့်နှင့် မစ်ရှင်များကို လက်ခံရသည်။ ဖက်တီးလေးတို့အုပ်စုက ရှန်ဟိုင်းတွင် အသန်မာဆုံးဟု ဆိုနိုင်သည်။ သူတို့၏မစ်ရှင်မှာ ငှက်ပျောသီး ဘုံဆိုင်အတွက် ၀ိုင်ဖျော်စပ်ကာ ဤနှစ် ငှက်ပျောသီး၀ိုင်ပွဲတော်ကို ပြည့်စုံစေရန်ဖြစ်သည်။

ငှက်ပျောသီး ၀ိုင်ပွဲတော်မှာ မြေအောက်နိုင်ငံတွင် နှစ်ကုန်ပွဲတော်တစ်ခုဖြစ်သည်။ ကျေးလက်ဒေသများမှလူများနှင့် မွန်းစတားနိုင်ငံမှ မွန်းစတားများမှာ အရသာအရှိဆုံး နာမည်အကြီးဆုံး၀ိုင်ကို မြည်းစမ်းရန် ငှက်ပျောသီးဘုံဆိုင်သို့ရောက်လာကြသည်။

ငှက်ပျောသီးဘုံဆိုင်တွင် ငှက်ပျောသီး၀ိုင်ပွဲတော်ကို နှစ်စဥ် ကျင်းပလေသည်။ ကစားသမားအများစုက ထိုပွဲတော်၏ ဧည့်သည်အဖြစ်ရောနှောပါ၀င်ရန် တာ၀န်များကို လက်ခံရရှိခဲ့ကြသည်။ အသန်မာဆုံးဖြစ်သော တိုက်အဖွဲ့၀င်များမှာတော့ ငှက်ပျောဘုံဆိုင်အတွက် ၀ိုင်ချက်ပေးခြင်း သို့မဟုတ် ငှက်ပျောသီး၀ိုင်ပွဲတော်ကို ဖျက်ဆီးပစ်ခြင်းဟူသော တာ၀န်မျိုးကို လက်ခံခဲ့ရလေသည်။

အဆုံးတွင် ဂျက်တို့အုပ်စုမှ၄ယောက်မှာ ငှက်ပျောသီး၀ိုင်အစစ်ကို ဖျော်စပ်နိုင်ခဲ့သည်။

"ငှက်ပျောသီး၀ိုင်ရဲ့ အဓိကပါ၀င်ပစ္စည်းက လူသွေးပဲ...မွန်းစတားတွေနဲ့ မြေအောက်လူသားတွေက လူသားစားရတာကြိုက်ကြတယ်လေ...ဒီတော့ သူတို့က လူသွေးကို အရမ်းကြိုက်ကြတယ်"

ကျောက်ကျန်းမှာ ထိုရက်စက်သောဂိမ်းအကြောင်းကို ပြောနေစဥ် သူ၏မျက်နှာမှာ ဖြူဖျော့နေခဲ့သည်။

"မြေအောက်လူသားတွေက လူအရိုးပေါင်းစုံကို စည်ထဲပစ်ထည့်ပြီး ၀ိုင်လုပ်လိုက်တာပဲ...လူတွေရဲ့နံရိုးတွေက ငှက်ပျောသီးလိုကွေးနေလို့ ...ငှက်ပျောသီး၀ိုင်လို့ခေါ်တာ။"

စုဝေးခြင်းဂိမ်းအကြောင်းပြောပြီးနောက် ဂျက်ကဆိုလာခဲ့သည်။

"ငါတို့တွေပုရှီကထွက်လာတော့ ကစားသမားတွေက အနက်ရောင်မျှော်စင်ကို ဆန္ဒအလျောက်တိုက်ခိုက်လို့ရတယ်လို့ သတင်းရလိုက်တယ်လေ... ထန်ရှောင်းကလည်း ဒီသတင်းကအရမ်း အရေးကြီးတယ်ပြောတော့ ငါတို့အခြေအနေစောင့်ကြည့်ဖို့ဆုံးဖြတ်လိုက်တယ်... ငါတို့ဒီမနက်က စုဝေးခြင်းဂိမ်းထဲက ထွက်လာပြီး အနက်ရောင်မျှော်စင်နားမှာ ခဏနေခဲ့တယ်... မနက်၆နာရီလောက်မှာပဲ ကစားသမား၃ယောက် အနက်ရောင်မျှော်စင်နားကိုလျှောက်လာပြီး ပျောက်သွားတာကို တွေ့လိုက်ရတယ်...သူတို့မျှော်စင်တိုက်ခိုက်ခြင်းဂိမ်းကို စိန်ခေါ်ဖို့ ၀င်သွားတာဖြစ်မယ်"

ပို၍ အရေးကြီးသည်မှာ...

"ကစားသမား၃ယောက်ကအတူ၀င်သွားတာလား"

ထန်မော့ကမေးလိုက်သည်။

ဂျက်မှာ ထန်မော့အဘယ်ကြောင့် ဤမေးခွန်းကို မေးရသည်ကို နားမလည်ချေ။ သူကခေါင်းကိုကုတ်လျက် ခေါင်းညိတ်လာခဲ့သည်။

လော့ဖုန်းချန်းမှာ ထန်မော့ကိုကြည့်လိုက်သည်။

"ငါမနက်ဖြန် ဂျက်နဲ့ ပုရှီကိုသွားပြီး အခြေအနေကိုစောင့်ကြည့်ဖို့လုပ်ထားတယ်...အနက်ရောင်မျှော်စင်က ပုရှီမှာရှိတာဆိုတော့ ပုရှီက ကစားသမားတွေက ပိုသိမှာပဲ"

သူကထန်မော့ကို ဖိတ်ခေါ်နေခြင်းဖြစ်ကာ ထန်မော့လည်းပဲ စိတ်၀င်စားလေသည်။ သို့သော် သူတစ်ခုခုပြောရန်ပြင်လိုက်စဥ်မှာပင် ကျယ်လောင်စူးရှသော ကလေးသံက သူ၏ခေါင်းထဲတွင် ကြေညာလာသည်ကို ကြားလိုက်ရလေသည်။

("တင်းတောင်~ တရုတ်ပြည် ခရိုင်၂ တရား၀င်ကစားသမား ထန်မော့ဟာ အနက်ရောင်မျှော်စင်ရဲ့ ဒုတိယထပ်အဆင့်ကို ရောက်ရှိသွားပါပြီ...၅ရက်အတွင်း မျှော်စင်ကို တိုက်ခိုက်ဖို့ ပြင်ဆင်ထားပါနော်")

ထန်မော်၏အမူအယာ အေးခဲသွားခဲ့လေသည်။

ဂျက်နှင့် ဖက်တီးလေးမှာမူ ဘာကိုမှ သတိမထားမိခဲ့။ သူတို့က ထန်မော့ကို တုံးတုံးအအနှင့်ကြည့်လျက် အဖြေကိုစောင့်နေခဲ့ကြသည်။ လော့ဖုန်းချန်းမှာမူ ထန်မော့၏အမူအယာကိုကြည့်လျက် မျက်လုံးများ မှေးကျဥ်းသွားခဲ့လေသည်။ အတော်လေးကြာပြီးနောက် သူကမေးလာခဲ့သည်။

"ဘာမှားလို့လဲ"

ကလေးသံမှာ ထန်မော့၏ခေါင်းထဲတွင် ၃ကြိမ်တိုင်တိုင် ကြေညာနေခဲ့သည်။ လွန်ခဲ့သည့်၂လခန့်ကလိုပင် အနက်ရောင်မျှော်စင်က သူ့အားမျှော်စင်တိုက်ခိုက်ရတော့မည်ဖြစ်ကြောင်း ပျော်ရွှင်စွာ အကြောင်းကြားနေခဲ့သည်။ သို့သော် အချိန်ကန့်သတ်ချက်မှာ ၁၀ရက်အစား ၅ရက်သာဖြစ်နေခဲ့လေသည်။

ထိုကြေညာသံရပ်တန့်သွားပြီးနောက် ထန်မော့ လော့ဖုန်းချန်းတို့ သုံးယောက်ကိုလှည့်ကြည့်လိုက်သည်။

လော့ဖုန်းချန်း၏မျက်နှာတွင်မူ စိုးရိမ်မှုနှင့် သတိထား နေမှု တစွန်းတစကို မြင်လိုက်ရလေသည်။

သို့သော် ဂျက်နှင့် ကျောက်ကျန်းတို့မှာမူ စိုးရိမ်မှုတို့သာရှိနေခဲ့သည်။

ထန်မော့သက်ပြင်းချလျက် ပြုံးလိုက်သည်။

"မင်းတို့သွားနှင့်ပါ... ငါရက်နည်းနည်းနေရင်သွားကြည့်လိုက်မယ်...အနက်ရောင်မျှော်စင်က ငါ့ကို မျှော်စင်တိုက်ခိုက်ဖို့ အသိပေးလိုက်ပြီ"

ထန်မော့ ပြင်ဆင်ချိန်၅ရက်အတွင်း ၃ခုကို လုပ်ခဲ့သည်။

ပထမဦးဆုံး သူလက်နက်များကို ပြင်ဆင်ခဲ့သည်။ မွန်းစတားတောင်ကြားထဲမှ ဂိမ်းပြီးကတည်းက ထန်မော့တွင် အနက်ရောင်မျှော်စင်၏ မွန်းစတားများ၏ သန်မာမှုကို ပိုပို၍ နားလည်လာခဲ့လေသည်။သူ၏လက်ရှိသန်မာမှုနှင့်ဆိုလျှင် ဘွားဘွား၀ံပုလွေကြီး၏ ပြိုင်ဘက်မဟုတ်သေးချေ။ သူလက်နက်များပိုပြင်ဆင်ထားရန်လိုအပ်သည်။ ဥပမာ ရှင်းဖုန်းကဲ့သို့ အရေးပေါ်လက်နက်ပုန်းများ ပြင်ဆင်ထားရန်လိုအပ်လေသည်။

ဒုတိယအချက်မှာ သူ၏သန်မာမှုကို ပိုတိုးရန်လိုအပ်သည်။

သန်မာမှုဆိုသည်က စွမ်းရည်များကို ပို၍စုဆောင်းခြင်းမဟုတ်သလို သူ့ခန္ဓာကိုယ်၏ သန်မာမှုကို တိုးမြှင့်ခြင်းသက်သက်ပဲ မဟုတ်ချေ။ ကောင်းမွန်သော စွမ်းရည်များမှာ စုဆောင်းရန်ခက်ခဲကာ သူ အခုထိ ဖက်တီးလေး၏ စွမ်းရည်ကို မရရှိခဲ့ချေ။ သူ၏ခွန်အားကိုတိုးရန်တော့ အလျင်မလိုချေ။ သူအခုတိုးမြှင့်ရန်လိုအပ်နေသည်က သူ၏တိုက်ခိုက်စွမ်းရည်ဖြစ်သည်။

ဖိနပ်တိုက်၀ံပုလွေများနှင့် တိုက်ခိုက်ခဲ့ပြီးနောက် ခွန်အားချည်းသက်သက်က မလုံလောက်သည်ကို ထန်မော့နားလည်သွားခဲ့သည်။ သူ့သည်သန်မာသော်လည်း ၄င်းမှာ ကလေးငယ်က ဓါးကြီးတစ်လက်ကို ကိုင်ထားပြီး ဝေ့ယမ်းနေသလိုပင်။ ကောင်းစွာအသုံးမပြုနိုင်ချေ။

သူ တစ်ခါက မြေအောက်ကားပါကင်တွင် ဖူ၀မ်သော်နှင့် တိုက်ခိုက်ခဲ့ဖူးသည်။ ထန်မော့သည် ဖူ၀မ်သော်က သူ့အား တမင်အလျော့ပေးခဲ့သည်ကို ခံစားမိသည်။ သို့မဟုတ်ပါက တိုက်ခိုက်ခြင်းတွင် သူ ဖူ၀မ်သော်ကို လုံး၀မယှဥ်နိုင်ချေ။

တိုက်အဖွဲ့အစည်းထဲတွင် ထန်ရှောင်းတစ်ယောက်သာ လက်ဝှေ့ထိုးသင်ဖူးလေသည်။ သို့သော် သူမက လောလောဆယ်ဒဏ်ရာရနေပြီး ထန်မော့ကို သင်မပေးနိုင်ချေ။ ထို့အပြင်သူမမှာ အခုမှ အခြေခံအဆင့်မျှသာရှိသေးသည်။ သူမအနေနှင့် ထန်မော့ထက်အားနည်းကာ သင်ပေးနိုင်သည်မှာ များများစားစားမရှိချေ။

ထန်မော့ ဖူ၀မ်သော်အား သတိရသွားမိသည်။ သူ၏ခြေထောက်မှ ဖိနပ်ကို ငုံ့ကြည့်ကာ ဖူ၀မ်သော်ဆီသွားရန်ဆုံးဖြတ်လိုက်သည်။

သို့သော် ထိုအမျိုးသားကို ရှာမတွေ့ခဲ့ချေ။

ဖူ၀မ်သော်က ပျောက်ကွယ်သွားခဲ့ပုံပေါ်သည်။

ထိုညပြီးကတည်းက ထန်မော့သူ့ကို ထပ်မတွေ့ရတော့ချေ။ လော့ဖုန်းချန်းဆိုခဲ့သည်မှာ သူနှင့် ဖူ၀မ်သော်တို့ သဘောတူညီမှုတစ်ခုပြုလုပ်ခဲ့သည် ဟုပင်။ သူတို့သည် စုဝေးခြင်းဂိမ်း၏အချက်အလက်များကို မူလတွင်ဖူ၀မ်သော်ကို ပြောပြရန်ပြင်ထားခဲ့သည်။ သို့သော်တိုက်အဖွဲ့၀င်များမှာ ဖူ၀မ်သော်အားမောမောလ်ထဲတွင် ရှာမတွေ့ခဲ့ချေ။

ဖူ၀မ်သော် မောလ်ထဲမှထွက်သွားကာ...

"သူမျှော်စင်တိုက်ခိုက်ဖို့သွားတာလား"

ထန်မော့၄င်းကိုတွေးမိလျှင် ကြက်ဆင်ဥကိုထုတ်လျက် ၃ကြိမ်ခေါက်လိုက်သည်။ ကြက်ဆင်ဥမှာ အလင်းရောင်ဖျော့ဖျော့လင်းလာလျှင် ထန်မော့မှာ လေသံတိုးတိုးဖြင့်ဆိုလိုက်သည်။

"ဖူ..."

ထို့နောက်သူ၏အသံမှာ တန့်သွားခဲ့လေသည်။

ကြက်ဆင်ဥ၏တစ်ဖက်ခြမ်းတွင် ပြင်းထန်သော သတ္တုခြင်းထိခတ်မိသံတို့ အဆက်မပြတ်ထွက်လာခဲ့သည်။ ထို့နောက်လေးလံသောတစုံတစ်ခုက လဲကျသွားပုံပင်။ ထို့နောက် စက္ကန့်ပိုင်းအတွင်း ကျယ်လောင်သောအသံတစ်ခုကိုကြားလိုက်ရပြန်သည်။

တိုက်ခိုက်နေစဥ်မှာပင် ဖူ၀မ်သော်မှာ သူ၏အသံကိုကြားလျှင့် အံ့အားသင့်သွားခဲ့သည်။

"ထန်မော့လား"

သူကလျှင်မြန်စွာဆိုလိုက်သော်လည်း သူ၏အသံမှာ ဖိအားများရှိမနေချေ။

ထန်မော့ခတ္တမျှတွေးလိုက်ပြီးနောက်မေးလိုက်သည်။

"ခင်များ မျှော်စင်တိုက်ခိုက်နေတာလား"

ဖူ၀မ်သော်ကတုန့်ပြန်လာသည်။

"အင်း"

"ဒါဆို မနှောင့်ယှက်တော့ပါဘူး...ခင်များ ဂိမ်းသိမ်းမှတ်ဖွင့်ဖို့လိုရင် ကျွန်တော့်ကိုပြောပါ"

"ကောင်းပြီ"

တိုတောင်းသောခေါ်ဆိုမှုမှာ အဆုံးသတ်သွားခဲ့သည်။

ထန်မော့မှာ ဖူ၀မ်သော်ထံမှ လိုအပ်သောအရာ၂ခုရှိလေသည်။ ပထမတစ်ခုမှာ သူ့အား တိုက်ခိုက်ရေးနည်းတချို့သင်ပေးရန်ဖြစ်ကာ ဒုတိယတစ်ခုမှာ မျှော်စင်တိုက်ခိုက်ခြင်းနှင့် သက်ဆိုင်သည်။ သူက ဖူ၀မ်သော်ကို မျှော်စင်အတူတိုက်ခိုက်ရန် ခေါ်ချင်ခဲ့သည်။

ထန်မော့သေချာတွေးတောပြီးမှ ဤဆုံးဖြတ်ချက်ကို ချခဲ့ခြင်းဖြစ်သည်။

ထန်မော့နှင့် ဖူ၀မ်သော်နှင့် တွဲလျက်ဆိုလျှင် ဂိမ်း၏ခက်ခဲမှုအဆင့် ပိုမြင့်သွားကြောင်း ပီနိုကီယိုနှင့် သံဖိနပ်ချုပ်သမားဂိမ်းတို့ကသက်သေပြခဲ့သည်။ ထို့အပြင်ဂိမ်းထဲတွင် ၂ယောက်ပေါင်းမှ ဂိမ်းသိမ်းမှတ်ကို ၁ကြိမ်သာဖွင့်နိုင်မည်။

သို့သော် ထန်မော့ဤဆုံးဖြတ်ချက်ကိုရွေးချယ်ချင်ဆဲဖြစ်သည်။ အဘယ်ကြောင့်မူ အသင်းဖော်ကောင်းတစ်ဦးက ဂိမ်း၏ခက်ခဲမှုအဆင့်ထက် ပိုအရေးကြီး၍ပင်။

မိမိနှင့်ဖူ၀မ်သော်တွင် တစ်ဦးကိုတစ်ဦး မြင့်မားသော နားလည်နိုင်စွမ်းရှိကြောင်း ၀န်ခံရပေမည်။ သူတို့အတူပူးပေါင်းသည့်အခါတွင် တစ်ဦးကိုတစ်ဦး ယုံကြည်ကာ အကောင်းမွန်ဆုံး ရလဒ်များကို ဆွတ်ခူးနိုင်သည်။ ဤကဲ့သို့အပြန်အလှန်နိုင်မှုမျိုးမှာ အလွန်ရှားပါးလှသည်။

သူ အနက်ရောင်မျှော်စင်ထံမှ မျှော်စင်တိုက်ခိုက်ရန် အသိပေးခံရသည်။ ထို့ကြောင့် ဖူ၀မ်သော်၏ အဆင့်နှင့်ဆိုလျှင် သူသည်လည်း ထိုအသိပေးမှုကို လက်ခံရလိမ့်မည်ဟု တွေးမိလေသည်။

မမျှော်လင့်စွာပင် ဖူ၀မ်သော်က အရင်ဆုံးဂိမ်းထဲ၀င်သွားခဲ့သည်။

"အင်း ကောင်းပါတယ်... ငါသူနဲ့အတူမသွားရဘူးဆိုမှတော့ ဂိမ်းကတော့ပိုလွယ်မှာပေါ့"

နောက်တစ်ညတွင် လော့ဖုန်းချန်းထံမှ မျှော်စင်တိုက်ခိုက်ရန်နည်းကို သိခဲ့ရသည်။

"အခုကစားသမားတွေက မျှော်စင်တိုက်ခိုက်ဂိမ်းကို ဖွင့်လို့ရနေပြီ... ကစားသမားတွေကမျှော်စင်အောက်ကိုလျှောက်သွားပြီး စိတ်ထဲကမျှော်စင်တိုက်ခိုက်ချင်တယ်လို့ တွေးလိုက်ရင် ကြေညာချက်တစ်ခုကျလာလိမ့်မယ်... သူကမင်းတစ်ယောက်တည်း၀င်မလား အသင်းနဲ့၀င်မလားဆိုတာကို ရွေးချယ်ခွင့်ပေးလိမ့်မယ်။"

သူကရပ်တန့်သွားကာ ထန်မော့ကို ကြည့်လိုက်သည်။

"မင်းဘယ်တော့သွားမှာလဲ အသင်းဖော်တွေရော"

ထန်မော့ တုန့်ပြန်လာသည်။

"မနက်ဖြန်...အသင်းဖော်မပါဘူး"

🪩

Prev Next