MM Story Teller

Chapter 100

Viewers 6k

🌍Chapter 100

လော့ဖုန်းချန်းကဆိုလိုက်သည်။

"အခုလောလောဆယ် တိုက်အဖွဲ့ရဲ့သန်မာမှုက မလုံလောက်သေးဘူး မျှော်စင်ကိုတိုက်ခိုက်ဖို့ဆို စွန့်စားရာကျလွန်းတယ်... ငါသူတို့ကို အရင်ဆုံးပြင်ဆင်ခိုင်းထားပြီး ဖေဖော်၀ါရီမှာမှ ကြိုးစားကြည့်ခိုင်းလိုက်မယ်။

သူက ထန်မော့အား တိုက်အဖွဲ့မှ ဤတစ်ကြိမ်မကူညီနိုင်သေးကြောင်း အသိပေးနေခြင်းပင်။

"အိုကေ"

ထန်မော့သည်လည်း မျှော်စင်တိုက်ခိုက်ရန် တိုက်အဖွဲ့၀င်များကို ခေါ်လိုခြင်းမရှိခဲ့ချေ။ သူကဒုတိယထပ်ကို တိုက်ခိုက်ရမည်ဖြစ်ကာ တိုက်အဖွဲ့၀င်များမှာ ပထမထပ်တွင်သာရှိသေးသည်။ အကယ်၍သူတို့အတူအသင်းဖွဲ့ခဲ့ပါက မည်သို့ကြုံရမည်ကို မပြောနိုင်ချေ။ ထန်မော့ကြောင့် ဂိမ်း၏ခက်ခဲမှုအဆင့်တိုးလာကာ တစ်ဦးကိုတစ်ဦး ပြန်သတ်ရမည့်အခြေအနေများလည်း ရှိလာနိုင်သည်။

လော့ဖုန်းချန်းမှာထန်မော့ကိုကြည့်နေရာမှ ရုတ်တရက်ပြုံးလိုက်သည်။

"မသေစေနဲ့"

တစ်စုံတစ်ဦးမှာလည်း ထန်မော့၏ပထမဆုံးမျှော်စင်တိုက်ခိုက်ဂိမ်းတုန်းက ထိုသို့ဆိုခဲ့ဖူးသည်။ အခုထိုစကားကိုကြားလိုက်ရတော့ ထိုအမျိုးသား၏ မျက်နှာကို မမြင်ယောင်မိပဲ မနေနိုင်ခဲ့ချေ။

အခုဖူ၀မ်သော် မည်သို့အခြေအနေရှိနေလဲ သူမသိချေ။

ထန်မော့ကအပြုံးတစ်ပွင့်ဖြင့်ဆိုလိုက်သည်။

"အင်း"

နောက်တစ်နေ့တွင် ထန်မော့ ပုရှီသို့ရောက်လာခဲ့သည်။ သူသည်ခြေစုံရပ်လျက် ကောင်းကင်ပေါ်မှ အနက်ရောင်မျှော်စင်ကြီးကိုမော့ကြည့်လိုက်မိသည်။

နေ၀င်ချိန်ဖြစ်၍ ဟွမ်ဖူမြစ်ရေပြင်မှာ တလက်လက်တောက်ပလျက်။ သူက သာမာန်ကာလျှံကာပုံပေါက်သော်လည်း သူ၏ခြေထောက်တွင်၀ှက်ထားသော ဓါးလေးချောင်းရှိကာ ဓါးမြှောင်၂ချောင်းနှင့် သေနတ်တစ်လက်ကိုလည်း သယ်လာသေးသည်။

သူ အနက်ရောင်မျှော်စင်ရှေ့တွင်ရပ်လျက် တိုက်ခိုက်ရန်အသင့်ဖြစ်နေခဲ့သည်။

ထိုစဥ် ကျယ်လောင်သော ကြေညာသံတစ်ခုကို ကြားလိုက်ရလေသည်။

"တင်းတောင်~ တရုတ်ပြည် ခရိုင်၂ ခိုး၀င်သူ ဖူ၀မ်သော် အနက်ရောင်မျှော်စင်ဒုတိထပ်ကို အောင်မြင်စွာရှင်းလင်းလိုက်ပါပြီ"

ထန်မော့အံ့အားသင့်သွားမိသည်။

ထို့နောက်ရယ်မောလျက် သူ့ကိုယ်သူတီးတိုးရေရွတ်လိုက်သည်။

"သူကဂိမ်းသိမ်းမှတ်ကိုတောင် ဖွင့်စရာမလိုခဲ့ဘူး ငါလည်း အဆင်ပြေမှာပါ"

အနက်ရောင်မျှော်စင်၏ကြေညာမှုပြီးဆုံးသွားပြီး ၃စက္ကန့်အကြာတွင် ထပ်မံကြေညာလာခဲ့သည်။

"တင်းတောင်~ ဥရောပ ခရိုင်၁ တရား၀င်ကစားသမား လီနာဂျိုဖို့စ် အနက်ရောင်မျှော်စင် ဒုတိယထပ်ကို အောင်မြင်စွာရှင်းလင်းလိုက်ပါပြီ"

ထိုအချိန်တွင် ထန်မော့မှာမျှော်စင်တိုက်ခိုက်ဂိမ်းထဲသို့၀င်ရန် စိတ်ထဲမှ ရွေးချယ်ပြီးဖြစ်ကာ အံ့အားသင့်ရန်အချိန်မရှိလိုက်ခင်မှာပင် နောက်ထပ်ကြေညာမှုတစ်ခုကို ထပ်မံကြားလိုက်ရလေသည်။

"တင်းတောင်~ အနက်ရောင်မျှော်စင် ဒုတိယထပ်(ရိုးရိုးအဆင့်)ကိုဖွင့်လှစ်လိုက်ပါပြီ... အသင်းအဖွဲ့ဂိမ်းကို ပြင်ဆင်နေပါသည်..."

"အချက်အလက်များကိုစစ်ဆေးနေပါသည်"

"အသင်းဖော်များ၏အချက်အလက်များကို စစ်ဆေးနေပါသည်"

"အနီရောင်ဘုရင်မရဲ့ ရတနာရဲတိုက်ကနေကြိုဆိုလိုက်ပါတယ်"

တောက်ပသောအဖြူရောင်အလင်းတစ်ခုက လွှမ်းခြုံသွားပြီး သူမျက်လုံးများကိုပြန်ဖွင့်လိုက်ချိန်တွင် မှောင်မည်းနေသော ကော်ရစ်တာတစ်ခု၌ ရောက်ရှိနေခဲ့လေသည်။

ဤသည်မှာ အလယ်ခတ် ဥရောပစတိုင် ကော်ရစ်တာမျိုးဖြစ်သည်။ ကော်ရစ်တာ၏တစ်ဖက်ခြမ်းအား ဆေးရောင်ခြယ် မှန်ချပ်ရှည်ကြီးများနှင့် ကာရံထားသည်။ ထိုမှန်မှဖြတ်လျက် အပြင်ဘက်ကောင်းကင်တွင် ချိတ်ဆွဲနေသော အသည်းပုံသဏ္ဍာန်လကိုတွေ့ရသည်။

ကော်ရစ်တာ၏တဖက်ခြမ်းတွင် လက်ရာမြောက်ဆီဆေးပန်းချီများကို ချိတ်ဆွဲထားလေသည်။ ဟော်ပင်၏ Darmstadt Madonna၊ ရာဖေး၏ လှပသောဥယျာဥ်မှူးနှင့် တခြားပျောက်ကွယ်သွားပြီဖြစ်သော အဖိုးတန်ပန်းချီကားများကို ၏ကော်ရစ်တာ၏ နံရံပေါ်တွင်ချိတ်ဆွဲထားခဲ့သည်။

ထန်မော့မျက်လုံးကို ဖွင့်လိုက်ချိန်မှစ၍ ပန်းရောင်ထီးကလေးကို တင်းတင်းဆုပ်ကိုင်ထားခဲ့လေသည်။ သူပတ်၀န်းကျင်ကိုအလွန်သတိအပြည့်ဖြန့်ထားခဲ့သော်လည်း ပတ်၀န်းကျင်မှာမူ အလွန်တိတ်ဆိတ်ငြိမ်သက်နေခဲ့လေသည်။ သူ ဘေးပတ်ပတ်လည်ကိုကြည့်နေစဥ် သူ၏မျက်လုံးများမှာ လူ၂ဦးထံတွင် ရပ်တန့်သွားခဲ့သည်။

အဖြူရောင်ကော်လာအင်္ကျီကို၀တ်ဆင်ထားသော မိန်းကလေးက နံရံကိုမှီရပ်လျက် သူမ၏မျက်လုံးများကို ပွတ်နေခဲ့သည်။

ထန်မော့ကျန်တစ်ဖက်ကို ကြည့်လိုက်သည်။

ကော်ရစ်တာ၏အခြားတစ်ဖက် ထန်မော့နှင့် ၃မီတာခန့်အကွာတွင် ကလေးမျက်နှာနှင့် ယောကျာ်းတစ်ယောက်မှာ မှန်နံရံပေါ်မှီလျက် ထန်မော့ကို ပြုံးပြနေခဲ့လေသည်။ အနီရောင်သန်းနေသော လရောင်မှာ မှန်ချပ်များမှတဆင့်ဖြာကျနေပြီး သူ၏မျက်နှာကို မှုန်ရီနေစေသည်။ ထိုသူမှာ ထန်မော့ကို စိုက်ကြည့်နေလျက် ထန်မော့ကသူ့ကိုပြန်ကြည့်နေသည်ကို မြင်လျှင် သူ၏မျက်နှာပေါ်မှ အပြုံးမှာ ပိုပို၍တောက်ပလာခဲ့လေသည်။

သူကခေါင်းကိုဖြည်းညင်းစွာစောင်းလျက် သူ၏ညာလက်ကိုမြှောက်ကာ သေနတ်သဏ္ဍာန်ပြုလုပ်၍ ထန်မော့ထံချိန်ရွယ်လိုက်သည်။

ဘန်း...

ထန်မော့မျက်မှောင်ကျုံ့လိုက်မိသည်။ ထိုကလေးမျက်နှာနှင့် လူရွယ်မှာ အပြုံးဖြင့်သူ့အား စိုက်ကြည့်နေဆဲဖြစ်ကာ သူ၏ကိုယ်မှာ အနီရောင်လရောင်နှင့် ရောယှက်နေသည့်နှယ်။

အဖြူရောင်ကော်လာနှင့် အမျိုးသမီးမှာ တစ်ခုခုကိုနားလည်သွားပုံဖြင့် သူမမှာ ထိုကလေးမျက်နှာနှင့်လူနှင့် ထန်မော့အား အထူးသဖြင့် သူတို့၏ခေါင်းပေါ်သို့ အပြန်အလှန်ကြည့်နေခဲ့သည်။ ထိုအမျိုးသမီးမှာ အသက်ကိုပြင်းပြင်းရှူလျက် ဆိုလာသည်။

"ရှင်တို့လည်း အနက်ရောင်မျှော်စင်ရဲ့ အသင်းဖော်တွေရဲ့ အချက်အလက်တွေကို စစ်ဆေးနေတယ်လို့ ကြေညာသံကို ကြားလိုက်မှာပါ... ဒီတော့ကျွန်မအတည်ပြုကြည့်ချင်လို့ ရှင်တို့က ကျွန်မရဲ့ အသင်းဖော်တွေလား"

ထန်မော့လည်း ကော်လံဖြူအမျိုးသမီး၏ ခေါင်းပေါ်နှင့် ထိုကလေးမျက်နှာနှင့် လူရွယ်၏ ခေါင်းပေါ်သို့ကြည့်လိုက်သည်။ ထို့နောက် အကြည့်ကိုပြန်ရုတ်လိုက်ကာ ဘာမှမဆိုခဲ့ချေ။ သို့သော် သူငြင်းလည်းမငြင်းခဲ့။

ကော်လံဖြူနှင့် အမျိုးသမီးမှာ ထန်မော့ကသဘောတူသည်ဟု မှတ်ယူလိုက်ကာ ကလေးမျက်နှာနှင့် လူကိုကြည့်လိုက်လေသည်။

ဤအရပ်ရှည်ရှည်နှင့် ပိန်ပါးသောလူရွယ်မှာ အစကတည်းက မှန်ပြတင်းများကို မှီ၍ရပ်နေခဲ့သည်။ ထို့နောက်သူက မတ်မတ်ရပ်လိုက်ပြီး ထန်မော့နှင့် ကော်လာဖြူအမျိုးသမီးကို ပြုံးပြလာသည်။ သူ၏ပြောင်စပ်စပ်အမူအယာကိုမြင်လျှင် မျက်မှောင်ကျုံ့လျက်

"အခုကျွန်မတို့ရဲ့ ခေါင်းတွေပေါ်မှ ဒီသင်္ကေတတွေရှိနေတယ်...တခြားပြဿနာမရှိသ၍ ကျွန်မတို့က အသင်းဖော်တွေဖြစ်ရမယ်... ရှင်ရောသိလား"

ထန်မော့ထိုကော်လာဖြူအမျိုးသမီးကို ကြည့်လိုက်မိသည်။

ထို့နောက် သူမကလက်ဦးမှုရယူလျက် မိတ်ဆက်လာခဲ့သည်။

"ကျွန်မမျိုးရိုးနာမည်က ၀မ်"

ထို့နောက် ထန်မော့ကို ကြည့်လာခဲ့သည်။

ကမ္ဘာကြီးအွန်လိုင်းပေါ်တက်လာပြီးနောက် ထန်မော့ကြုံခဲ့ရသမျှ အများဂိမ်းထဲတွင် တစ်ဦးနှင့်တစ်ဦး အပြန်အလှန်နားလည်မှုရယူရေးအတွက် မိတ်ဆက်ကြလေ့ရှိသည်။ စုပေါင်းဂိမ်းမျိုးတွင် အချင်းချင်းပူးပေါင်းလုပ်ဆောင်ရန်လိုအပ်သည့်အတွက် ရင်းနှီးရန်လိုအပ်လေသည်။ အစပိုင်းတွင် ကစားသမားများမှာ မိမိအကြောင်းကိုထုတ်ဖော်ခံရမည်ကို မစိုးရိမ်ကြပဲ အကြောင်းစုံပြောပြတတ်ကြသည်။ အချိန်ကုန်လွန်လာသည်နှင့်အမျှ ထန်မော့ကြုံရသမျှ ကစားသမားများမှာ ပိုပို၍ သံသယများထားတတ်လာကြသည်။ မိမိအကြောင်းကို သိပ်မဖော်ပြကြတော့ချေ။ ၄င်းမှာ မျိုးရိုးအမည်ပဲ ဖြစ်စေကာမူ သူ့အနေနှင့် ဤအမျိုးသမီးမှာ သူမ၏အမည်ကို မိတ်ဆက်လာမည်ဟုအမှန်တကယ် မမျှော်လင့်ထားခဲ့ချေ။

ဤသည်မှာ မျှော်စင်၏ ပထမထပ်ကစားသမားဖြစ်နိုင်သည်။

ထန်မော့တွေးတောလျက် မူလက သူ၏မျိုးရိုးအမည်မှာ မော့ဖြစ်ကြောင်း မိတ်ဆက်လိုခဲ့သည်။ ထိုစဥ် မျှော်စင်ပထမထပ်ကို ကျော်လွန်ပြီးသော ကစားသမားများမှာ ပထမထပ်၏ခက်ခဲမှုအဆင့်ကိုရှင်းသွားသော မော့မော့ဟူသော အမည်ကို ကြားဖူးသည်ဟူသော စကားကို သတိရသွားမိသည်။

ထန်မော့ခတ္တတန့်သွားပြီးနောက်ဆိုလိုက်သည်။

"မျိုးရိုးနာမည်က ကျောက်"

သူသည်ဖက်တီးလေး၏အမည်အား ယူလျက် အတုအယောင်သရုပ်တစ်ခုကို ဖန်တီးလိုက်သည်။

ကော်လာဖြူအမျိုးသမီးမှာ ခေါင်းညိတ်လိုက်ပြီး ကလေးမျက်နှာနှင့် လူကိုကြည့်လိုက်သည်။

တိတ်ဆိတ်နေသော ကော်ရစ်တာတွင် လူ၃ယောက်မှာ ပို၍နီးကပ်စွာ ရပ်နေခဲ့ကြသည်။ ၄င်းမှာ တြိဂံပုံစံအနေအထားပင်။

ထန်မော့က ကော်ရစ်တာ၏ အလယ်တွင်ရပ်နေခဲ့ပြီး အမျိုးသမီးမှာတော့ ပန်းချီကားများအနီးတွင်ရပ်နေကာ ကလေးမျက်နှာနှင့်လူကတော့ မှန်ပြတင်းများအနီးတွင် ရပ်နေခဲ့သည်။

လူ၂ဦးက သူ့ကိုကြည့်နေသည်အားမြင်လျှင် ထိုလူကမျက်လုံးပင့်လျက် အပြုံးဖြင့်ဆိုလာသည်။

"ဘရုစ်"

ကော်လာဖြူအမျိုးသမီးမှာ အံ့အားသင့်သွားလျက်

"ရှင်က နိုင်ငံခြားသားလား"

တရုတ်ပြည်တွင် နိုင်ငံခြားသားများ အများအပြားရှိလေသည်။ တိုက်အဖွဲ့အစည်းတွင် ဂျက်နှင့် လစ်ဇ်တို့၂ဦးရှိသည်။ ထိုနိုင်ငံခြားသားများမှာ ဂိမ်းစတင်ချိန်တွင် တရုတ်ပြည်တွင်ရှိနေခဲ့သည်။ ထို့နောက် မိမိတို့၏မွေးရပ်မြေကို အလွယ်တကူမပြန်နိုင်တော့ချေ။ တရုတ်ပြည်တွင်သာ ဂိမ်းကိုဆက်၍ ပါ၀င်ရသည်။

သို့သော် ကလေးမျက်နှာနှင့် လူမှာ နိုင်ငံခြားသားနှင့် တူမနေခြင်းဖြစ်ကာ သူ၏မန်ဒရင်းစကားမှာ အလွန်ပြောင်မြောက်နေခဲ့သည်။

ကလေးမျက်နှာနှင့်လူက ကော်လာဖြူအမျိုးသမီးအား ထူးဆန်းသော အပြုံးမျိုးပြုံးပြလိုက်ပြီး ပြန်မဖြေခဲ့ချေ။ သူ၏အကြည့်ဦးတည်ရာကို လိုက်ကြည့်လိုက်လျှင် ထိုပန်းချီကားများချိတ်ဆွဲထားသော ကော်ရစ်တာဖက်၏ မျက်နှာကျက်တွင် သုံးဖက်မြင် ပန်းပုတစ်ခုကို တွေ့လိုက်ရလေသည်။ ၄င်းမှာ အလွန်လက်ရာမြောက်သော အနက်ရောင်လင်းနို့ပန်းပုတစ်ခုဖြစ်ကာ သူ၏ပါးလှပ်လှပ်အတောင်လေးများကို ဖြန့်လျက် မျက်နှာကျက်တွင် တွဲလွဲခိုနေခဲ့သည်။

ထိုလင်းနို့လေးမှာ လက်တစ်၀ါးစာခန့်သာဖြစ်ပြီး ထိုနေရာတွင် တိတ်ဆိတ်စွာ တွဲလွဲခိုလျက်။ ထန်မော့၄င်းကိုကြည့်မိလျှင် ခေါင်းအစခြေအဆုံး ကြက်သီးများ ထသွားမိသည်။

၀ှစ်...

ထိုလင်းနို့လေး၏အနက်ရောင်မျက်လုံးလေးများမှာ ရုတ်ချည်း ထန်မော့ကို ကြည့်လိုက်သည့်နှယ်။ ထန်မော့ချက်ချင်း၄င်းကို ပြန်ကြည့်လိုက်လျှင် ၄င်းမှာ သူစိတ်ထင်နေခြင်းသာဖြစ်ပုံရကာ အသက်မရှိသော ကျောက်ပန်းပုတစ်ခုနှယ် ငြိမ်သက်နေဆဲပင်။

၄င်းကို ခတ္တမျှကြည့်ရှုနေပြီးနောက် ထန်မော့ ကလေးမျက်နှာနှင့် လူထံအကြည့်လွှဲလိုက်ကာ မေးလိုက်သည်။

"Bruce Wayne လား" (batman မင်းသား)

ကလေးမျက်နှာနှင့်လူမှာ အံ့အားသင့်ယောင်ဆောင်လျက် မေးလာသည်။

"ကျွန်တော့်ကိုသိတာလား"

၄င်း၏သရုပ်ဆောင်မှုမှာ သံဖိနပ်ချုပ်သမားကြီးထက်ပင် ဆိုးရွားလှသည်။ ၄င်းမှာ သူ၏မျက်နှာပေါ်တွင် 'ဟိုင်း ငါသရုပ်ဆောင်နေတာရယ်' ဟုချိတ်ဆွဲထားသည့်အလား။

ကော်လာဖြူအမျိုးသမီးမှာ ဤရင်းနှီးနေသော အမည်ကို မည်သို့မျှမတုန့်ပြန်လာချေ။ သူမ၏အကြည့်များမှာ ထန်မော့နှင့် ကလေးမျက်နှာနှင့်လူထံ အပြန်အလှန်ကြည့်လိုက်သည်။

"ရှင်သူ့ကို သိတာလား"

လူ၃ယောက်အဖွဲ့တွင် ၂ယောက်က တစ်ယောက်ကို တစ်ယောက်သိနေသည်ဆိုပါက သူမအတွက်ပိုသတိထားရန်လိုအပ်လေသည်။ ထိုလူ၂ဦးမှာ ပူးပေါင်းပြီး သူမကို အချိန်မရွေး ရှင်းထုတ်ပစ်နိုင်သည်။

ထန်မော့မှာမူ ကလေးမျက်နှာနှင့်လူကိုအေးစက်စွာ ကြည့်လျက်

"လင်းနို့လူသားပေါ့လေ"

ကလေးမျက်နှာနှင့်လူမှာရယ်လိုက်သည်။

"မင်းက ငါ့ရဲ့နာမည်ပြောင်ကိုတောင်သိနေတာပဲလား"

သူကအမည်အစစ်ကိုမပြောလိုလျှင်တောင် လင်းနို့လူသားအမည်ကိုသုံးလျက် လာပြောင်နေသည်က အလွန် ရူးကြောင်ကြောင်နိုင်လှသည်။

ကော်လာဖြူအမျိုးသမီးမှာလည်း ၄င်းကို သတိထားမိကာ လှည့်စားခံလိုက်ရသဖြင့် မပျော်ရွှင်သောအမူအယာမျိုးပြုလုပ်လာခဲ့သည်။

သူမကထိုကလေးမျက်နှာနှင့်လူကို အေးစက်စွာကြည့်လိုက်သည်။

"ကျွန်မတို့သူငယ်ချင်းဖြစ်စရာမလိုရင်တောင်မှ လောလောဆယ် အသင်းဖော်တွေဖြစ်နေတုန်းပဲ"

သူမကလူတိုင်း၏ ခေါင်းပေါ်ကို ညွှန်ပြလိုက်သည်။ သူတို့၏ခေါင်းပေါ်မှ ၃စင်တီမီတာခန့်တွင် သေးငယ်သော အစိမ်းရောင်ပုံစံလေးတစ်ခုရှိနေခဲ့သည်။

၄င်းမှာ လူသေးသေးမှ လက်နှစ်ဖက်ကိုဖွင့်ကာ ဖက်ရန်ဖိတ်ခေါ်နေသော ပုံစံပင်။ ၄င်းမှာ ကမ္ဘာကြီးအွန်လိုင်းပေါ်မတက်ခင်ကပင် အသုံးများသော မိတ်ဖွဲ့ အီမိုဂျီဖြစ်သည်။ ထန်မော့သည်လည်း ၄င်းကို အကြိမ်ပေါင်းများစွာ သုံးဖူးလေသည်။ ၄င်းအပြင် အနက်ရောင်မျှော်စင်၏ကြေညာချက်ဖြစ်သော ကစားသမားအချက်အလက်ကို စီစစ်နေပါသည်ဟူသော စာကြောင်းလည်းရှိလေသည်။ သို့နှင့် ဤလူ၃ဦးမှာ အသင်းဖော်ဖြစ်နိုင်ချေ အင်မတန်များလေလေသည်။

ကော်လာဖြူအမျိုးသမီးမှာ သူမ၏လက်ကို ပြန်ချလိုက်ပြီး

"ဘယ်သူမှ တစ်ယောက်ကိုတစ်ယောက် မသိချင်မှတော့ ဂိမ်းကိုပဲတိုက်ရိုက်ဆော့ကြတာပေါ့"

ထန်မော့ ထိုအကြံပေးချက်ကို မငြင်းဆန်ခဲ့ချေ။ ကလေးမျက်နှာနှင့် ဘရုစ်ဆိုသူကသူတို့ကိုသာ အပြုံးဖြင့်ကြည့်နေခဲ့သည်။ တစ်ခွန်းမှ၀င်မပြောချေ။

'ငါရဲ့အရည်လဲ့နေတဲ့ မျက်လုံး၀ိုင်းကြီးတွေကိုကြည့်စမ်း စွမ်းရည်ကြောင့်လားမဆိုနိုင် အမျိုးသမီးမှာ ထန်မော့အား ထူးခြားနေတာဘာမှမရှိဟုမြင်နေခဲ့သည်။ လူ၃ယောက်သည် အချိန်ထပ်၍မဖြုန်းချင်ကြတော့ချေ။ ကော်လာဖြူအမျိုးသမီးကဆိုလာသည်။

"လောလောဆယ် အနက်ရောင်မျှော်စင်ကကျွန်မတို့ကို မစ်ရှင်ပေးမလာသေးပေမယ့် ဒီတိုင်းထိုင်နေလို့မဖြစ်ဘူး...ဒီကော်ရစ်တာကအရင်ထွက်သွားရအောင်... ထွက်လမ်း ၃လမ်းရှိတယ်"

သူမက ဘယ်ဘက်ကိုညွှန်ပြလိုက်သည်။

"အဲဒီမှာ တံခါးတစ်ချပ်"

ထို့နောက်ညာဘက်ကိုထိုးပြလျက်...

"နောက်တံခါးတစ်ချပ်"

နောက်ဆုံး ကလေးမျက်နှာနှင့်လူကို ကြည့်လိုက်ကာ...

"ဒါမှမဟုတ် အဲဒီပြတင်းပေါက်ကနေခွဲပြီး ထွက်သွားလို့လည်းရတယ် ဒါပေါ့ နံရံကို ဖောက်ထွက်သွားလို့ရရင်လည်း ရတာပဲပေါ့...ဒါပေမယ့်ကျွန်မကတော့ ဒီတံခါးနှစ်ချပ်ကို အရင်ဖွင့်လို့ရမရ ကြည့်ကြည့်ပြီးမှ ဆုံးဖြတ်ချင်တယ်...ဘယ်လိုလဲ"

မည်သို့ပင်တွေးတွေး ကော်ရစ်တာမှ ထွက်ခွာသွားခြင်းက အသင့်တော်ဆုံးပင်။ မှန်ပြတင်းကိုဖြစ်စေ နံရံကိုဖောက်ထွက်သွားလျှင် ရလဒ်သိပ်ကောင်းမည်မထင်ချေ။ ထန်မော့ကခေါင်းညိတ်လိုက်သည်။

"ဒါဆို တံခါးကို အရင်စစ်ကြည့်ကြတာပေါ့"

အန္တရာယ်များသော မျှော်စင်တိုက်ခိုက်ခြင်းဂိမ်းထဲတွင် မည်သည့်ကစားသမားကမှ တစ်ဦးတည်း မလှုပ်ရှားလိုကြချေ။ တစ်ယောက်တည်းလှုပ်ရှားခြင်းက သရဲကားထဲတွင် အရင်သေသည့်လူဖြစ်သည်။ တံခါးကိုဖွင့်လိုက်သည်နှင့် ကြောက်စရာကောင်းသော မွန်းစတားတစ်ကောင်ထွက်လာမှာလည်း ဖြစ်နိုင်လေသည်။

ကော်လာဖြူအမျိုးသမီးမှာ ကလေးမျက်နှာနှင့်လူကို ကြည့်လိုက်သည်။

"မဆိုးပါဘူး"

ကလေးမျက်နှာနှင့်လူကဆိုလာသည်။

ကော်လာဖြူအမျိုးသမီးမှာ ခေါင်းညိတ်လျက် ဘယ်ဘက်ကိုလျှောက်သွားလိုက်ကာ

"ဒါဆို ဘယ်ဘက်တံခါးကို အရင်ကြည့်ရအောင်"

ဘန်း...

အသံကျယ်ကြီးတစ်ခုကိုကြားလိုက်ရပြီး ကော်ရစ်တာတစ်ခုလုံးလှုပ်ခါသွားခဲ့သည်။ ကော်လာဖြူအမျိုးသမီးမှာ တုန်လှုပ်သွားပြီး သူမ၏စကားကို အပြီးမသတ်နိုင်လိုက်ချေ။ သူမကဘေးပတ်ပတ်လည်ကို ကြောက်ရွံ့စွာ ကြည့်လိုက်သည်။ ထန်မော့သည်လည်း တုန်လှုပ်သွားလျက် ကလေးမျက်နှာနှင့်လူကို ကြည့်လိုက်မိလေသည်။ ဤတစ်ကြိမ်တွင် သူကပြင်ဆင်မထားမိပဲ ထိုကလေးမျက်နှာနှင့်လူ၏လုပ်ရပ်ကြောင့် ထိတ်လန့်သွားခဲ့ရသည်။

🪩

Prev Next