MM Story Teller

Chapter 131

Viewers 11k

🌍Chapter 131

[["တင်းတောင်~ ကစားသမားဖူ၀မ်သော်နဲ့ ထန်မော့တို့က ထူးဆန်းထွေလာဆပ်ကပ်ပွဲညမစ်ရှင်ကို အောင်မြင်စွာရှင်းလင်းလိုက်ပြီး စိတ်ကြိုက် အကူပစ္စည်း အဆင့်မြှင့်တင်ခြင်း ပက်ကေ့ကို ဆုအဖြစ်ရရှိသွားခဲ့ပါပြီ"]]

မှောင်မည်းကျဥ်းမြောင်းသောတွင်းပေါက်ထဲတွင် တမဟုတ်ချင်းတိတ်ဆိတ်သွားခဲ့သည်။

အနက်ရောင်မျှော်စင်၏ ၃ကြိမ်၃ခါကြေညာသံက ၄င်းတို့၏ တုံးအမှုကို လှောင်ရယ်နေသည့်နှယ် ကစားသမား၁၀ဦး၏နားထဲ ပဲ့တင်ထပ်နေခဲ့သည်။

မျက်မှန်နှင့်လူ၏အသင်းတွင် သူနှင့်အသင်းဖော်၄ဦးမှာ လုံး၀ကြောင်အသွားခဲ့သည်။ မျက်မှန်နှင့်လူပင်လျှင် မယုံနိုင်ချေ။ သူ၏ပါးစပ်မှာ ပွင့်ဟလျက် အမူအယာမှာ အလွန်ရယ်စရာကောင်းနေခဲ့လေသည်။ ဤသည်မှာ သူကမ္ဘာကြီးအွန်လိုင်းပေါ်တက်လာသည်မှစ၍ ပါ၀င်ဖူးသမျှဂိမ်းထဲတွင် ပထမဆုံးအကြိမ်ဤကဲ့သို့အမူအယာမျိုး ပြဖူးခြင်းပင်။

လင်းရီ သူမခေါင်းဆောင်၏ အမူအယာကိုမြင်လျှင် လက်မခံနိုင်မှုနှင့် ဒေါသများထောင်းခနဲထွက်လာခဲ့ပြီးအော်ဟစ်လိုက်သည်။

"ဘယ်လိုလုပ်ဖြစ်နိုင်မှာလဲ... မွန်းစတားကြီးကဒီမှာလေ ကျွန်မတို့အောင်အောင်မြင်မြင် ခိုးနိုင်လိုက်တာပဲကို အဲဒီကစားသမားအသစ်၂ယောက်က ဘယ်တုန်းကရောက်လာပြီး ဘယ်လိုခိုးသွားတာလဲ မွန်းစတားကြီးကကျွန်မတို့ရှေ့မှာပဲ မဟုတ်ဘူးလား"

သူမတင်မဟုတ်ပဲ ကျန်ကစားသမားများကလည်းဆိုလာခဲ့သည်။

"ဘာကြီးလဲ ငါတို့မွန်းစတားကြီးကို အောင်အောင်မြင်မြင်ခိုးလိုက်တာပဲလေ အဲဒီကစားသမား၂ယောက်က ၃ရက်၃ညတောင် မွန်းစတားကြီးဆီမှာ နှိပ်စက်ခံခဲ့ရတာမဟုတ်ဘူးလား"

၀မ်ရင်းကွေ့ ရှုပ်ထွေးနေပြီး ဘာကိုမျှ မတွေးတောနိုင်တော့ချေ။

"ဒါပဲလေ"

သူ၏အသင်းဖော်ကိုဆွဲလျက် ၂ဦးသား လှောင်အိမ်အနီးသို့လျှောက်လာခဲ့ကြသည်။ ၀မ်ရင်းကွေ့ လှောင်အိမ်အထဲမှ ကြီးမားသော အမြှီးရှည်နှင့်ကြွက်မည်းကြီးကို ထိုးပြလိုက်သည်။ ၄င်းမှာ အလွန်ရှည်ပြီး ထူးဆန်းလှသည်။ လတ်တလောတွင် ထိုကြွက်ကြီးက ၀မ်ရင်းကွေ့ကို မျက်တောက် ပုတ်ခတ်ပုတ်ခတ်ဖြင့် စိုက်ကြည့်နေခဲ့လေသည်။

"လူအိုကြီးနျောင် ဒီကောင်ပဲလေ... သူကငါတို့လှောင်ချိုင့်ကို တချိန်လုံး ဘောလုံးလို ကန်နေခဲ့တာလေ ငါတို့ဘ၀မှာ ဒီကောင်ကြီးကို ဘယ်တော့မှ မေ့မှာမဟုတ်ဘူး...ဟုတ်တယ်မလား"

လူအိုကြီးနျောင်ကဆိုလိုက်သည်။

"ဟုတ်တယ်လေ ဒီဟာကမွန်းစတားကြီးပဲ"

သူတို့က ကျန်ကစားသမား၈ဦးကို ရှင်းပြရန်ကြိုးစားလိုက်သည်။

လှောင်အိမ်ထဲ၌ ကြွက်ကြီးက ခေါင်းကိုစောင်းလျက် နားမလည်သောအမူအယာမျိုးပြုလုပ်နေခဲ့သည်။

ဆူညံနေသော မြေတွင်းမှာ တဖြည်းဖြည်းငြိမ်ကျသွားခဲ့သည်။

သူတို့၀န်မခံလိုလျှင်တောင် ဂိမ်းမှာ ရှုံးနိမ့်သွားချေပြီ။ ဤကြွက်ကြီးက မွန်းစတားကြီးမဟုတ်ဘဲ သူတို့မှားယွင်းကာ ခိုးယူခဲ့ကြခြင်းပင်။

လုရှင်း လက်သီးကိုတင်းတင်းဆုပ်လျက် စိတ်ငြိမ်ငြိမ်ထားကာ လက်ရှိအခေုအနေကို ခွဲခြမ်းစိတ်ဖြာရန်ကြိုးစားလိုက်သည်။

"ဖြစ်နိုင်ချေ၂မျိုးရှိတယ်... ပထမတစ်ခုက မွန်းစတားကြီးကလမ်းမှာအခိုးခံလိုက်ရပြီးတော့ ဆင်တူတဲ့ ကောင်ကို ခင်များတို့နဲ့ လဲပြီးထည့်ပေးလိုက်တာ.. ခင်များတို့ပြောသလိုဆိုရင် မွန်းစတားကြီးကအလင်းရောင်ကို ကြောက်ပြီးတော့ မစ်စတာAနဲ့ Bကအမြဲတမ်း အ၀တ်စနဲ့ အုပ်ထားတတ်တယ်... ခင်များတို့ကလည်း သူ့ပုံစံကိုသေချာမမြင်လိုက်မိပဲ အမှတ်မှားသွားတာလည်းဖြစ်နိုင်တယ်"

၀မ်ရင်းကွေ့ကအော်လိုက်သည်။

"မဖြစ်နိုင်ဘူး ငါဒီကောင်ကြီးရဲ့ပုံစံကို နောက်နှစ်၁၀၀ဆိုရင်တောင် မေ့မှာမဟုတ်ဘူး အော်သံကအစအတူတူပဲ"

ကြွက်ကြီးက ထပ်အော်လာခဲ့သည်။

လုရှင်းသက်ပြင်းချကာ ထပ်မဆိုလာချေ။ သူ၏ဘေးတွင် မျက်မှန်နှင့်လူက အေးစက်စွာပင်ဆိုသည်။

"ဒုတိယဖြစ်နိုင်ချေလည်းရှိသေးတယ်... အစကတည်းက ဒီကြွက်ကြီး က ဆပ်ကပ်မှာပြမယ့် မွန်းစတားကြီးမဟုတ်ဘူး"

ရှုပ်ထွေးနေသော ၀မ်ရင်းကွေ့နှင့် လူအိုကြီးနျောင်တို့မျက်မှန်နှင့်လူကိုကြည့်လိုက်ကြသည်။

ထိုမျက်မှန်နှင့်လူက ပြန်လည်တည်ငြိမ်သွားခဲ့ပြီဖြစ်သော်လည်း အမူအယာမှာ ပျက်ယွင်းနေဆဲပင်။ ဂိမ်းမှာ ကျရှုံးသွားပြီမို့ သူစိတ်အေးအေးထားကာ စဥ်းစားရန်သာတတ်နိုင်လေသည်။

"မစ်စတာAနဲ့Bက ဆပ်ကပ်ရဲ့တကယ့်မွန်းစတားကြီးကို သိလောက်တယ် ငါတို့မွန်းစတားကြီးကို ဆိပ်ကမ်းမှာပဲ မြင်ဖူးခဲ့တာလေ အ၀တ်စနဲ့လည်းကာထားသေးတယ်"

လင်းရီချက်ချင်းနားလည်သွားခဲ့သည်။

"ခေါင်းဆောင်ပြောချင်တာက မစ်စတာAနဲ့Bက အစကတည်းက မွန်းစတားအစစ်ကြီးကို၀ှက်ထားပြီး ကစားသမားတွေကို လှည့်စားလိုက်တာပေါ့...သူတို့က ဒီလူ၂ယောက််ကို လှောင်ချိုင့်ထဲထည့်ပြီး ကြွက်ကြီးကို မွန်းစတားအစစ်လို့ထင်အောင်လုပ်လိုက်တာ ဒါပေမယ့် ကြွက်ကြီးက တကယ့်မွန်းစတားမဟုတ်ခဲ့ဘူး"

လင်းရီ၏စကားကြောင့် ကျန်ကစားသမားများမှာလည်း နားလည်သွားခဲ့သည်။

၀မ်ရင်းကွေ့မှာလည်း အတော်ကြာဆွံ့အနေပြီးမှ လှောင်ချိုင့်အား ဒေါသတကြီး ကန်လိုက်လေသည်။

"မစ်စတာAနဲ့Bကအတော်အကြံပက်စက်တာပဲ.. လူအိုကြီး နျောင်နဲ့ငါက ပထမနေ့မှာပဲ အဖမ်းခံလိုက်ရပြီးတော့ ငါတို့ကိုလှောင်ချိုင့်ထဲထည့်ပြီး လမ်းလွဲအောင်လုပ်တယ်။

ထို့နောက် ခတ္တမျှတန့်သွားလျက်ဆိုသည်။

"ဟင့်အင်း မစ်စတာ A နဲ့Bကလိမ်နိုင်တယ် ဒါပေမယ့် အနက်ရောင်မျှော်စင်ကတော့ လိမ်လို့မရဘူး.. အနက်ရောင်မျှော်စင်က ငါတို့ကို တည်နေရာကိုချပေးတာပဲဆိုမှတော့ဒီမွန်းစတားကြီးပဲ ဖြစ်ရမှာပေါ့"

အစ်ကိုဟောင်ကဆိုလာသည်။

"ခေါင်းဆောင် ကျွန်တော်၄ရက်မြောက်နေ့မစ်စတာAကို လိုက်ချောင်းတော့ သူကအိတ်တစ်အိတ်ကိုထမ်းလာတာ အထဲကကောင်းတကျွီကျွီမြည်နေတဲ့အသံနဲ့ ပုံစံက ဒီကြွက်ကြီးနဲ့အတူတူပဲ"

မျက်မှန်နှင့်လူမှာ အစ်ကိုဟောင်၏စကားကိုနားလည်ပြီး မျက်လုံးမှိတ်လျက် ၇ရက်အတွင်း ဖြစ်ပျက်ခဲ့သမျှတို့ကို ပြန်စဥ်းစားလိုက်သည်။ နောက်ဆုံးတွင် သူကသက်ပြင်းအသာချလျက် ခါးသီးစွာပြုံးလိုက်သည်။

"မြေအောက်နိုင်ငံရဲ့ အကြော်ကြားဆုံးစုံထောက်၂ယောက်...စုံထောက်များ၏ အထင်သေးခြင်းရောင်၀ါ...ငါနောက်ဆုံးတော့နားလည်ပြီ တကယ်တော့မစ်စတာAနဲ့Bက အဲဒီအ၀တ်စအောက်က မွန်းစတားကြီးကို ငါတို့ကိုပေးလိုက်ပါတယ်...သူတို့ကငါတို့ကို လမ်းလွဲအောင်လုပ်သွားတာ..."

*****

မြေအောက်နိုင်ငံ၏ မြို့တော် ထူးဆန်းထွေလာ ဆပ်ကပ်တွင်...

ညနေခင်း၆နာရီတွင် ထန်မော့နှင့်ဖူ၀မ်သော် တီကောင်ကြီးကို အိတ်ကြီးထဲတွင်ထည့်လျက် ဆွဲလာခဲ့ကြသည်။ ထို့နောက်ကစားသမား ၁၀ဦး၏ အမည်များနှင့် အနက်ရောင်မျှော်စင်၏ ကြေညာသံအား သူတို့၏နားထဲတွင် ကြားလိုက်ကြသည်။ သဲထိတ်ရင်ဖိုဆပ်ကပ်ညဖွင့်ပြီဟူသော ကြေညာမှုကိုကြားလျှင် ထန်မော့၏ အမူအယာပြောင်းလဲသွားခဲ့လေသည်။ ထို့နောက်သူနှင့် ဖူ၀မ်သော်တို့၏ မစ်ရှင်အား အနက်ရောင်မျှော်စင်မှ ထိုကစားသမားများကို ပြောပြလိုက်ပြီဖြစ်ကြောင်း နားလည်သွားခဲ့သည်။

ထင်ထားသလိုပင် အနက်ရောင်မျှော်စင်က ကစားသမားအပေါ်အရူးလုပ်ရန် ဘယ်တော့မှ စိတ်မပျက်စေရချေ။ အနက်ရောင်မျှော်စင်မှာ သူတို့ ၇ရက်ကြာဖုံးကွယ်ထားသော အမည်များကို ကြင်နာစွာထုတ်ဖော်ကြညာပေးခဲ့လေသည်။

ထန်မော့မှာ ရယ်ရအခက် ငိုရအခက်ဖြစ်နေချိန်တွင် ဖူ၀မ်သော်က တည်ငြိမ်စွာဆိုလာခဲ့သည်။

"အနည်းဆုံးတော့ ကိုယ်တို့ရဲ့မျက်နှာတွေကို မမြင်လိုက်ဘူးလေ ကိုယ်တို့နာမည်ကိုပဲ သိသွားတာပါ"

ထန်မော့သူ့အားလှည့်ကြည့်လျက် ပြုံးလိုက်မိသည်။

"ဗိုလ်ချုပ်ဖူ ခင်များရဲ့ နာမည်ကို တစ်ကမ္ဘာလုံးက ကြားဖူးပြီးသားဆိုတော့ ဘယ်ကြောက်မလဲ"

ထန်မော့မှာ အလွန်ယဥ်ကျေးစွာပြောလိုက်သော်လည်း သူ၏ဆိုလိုရင်းမှာ ဖူ၀မ်သော်အနေနှင့် ဆုံးရှုံးစရာမရှိဟု ဆိုလိုက်ချင်းပင်။ ထန်မော့ကတော့မတူချေ။ သူကနာမည်မကြီးလို။

ဖူ၀မ်သော်မှာ တီကောင်ကြီးကိုသယ်ရင်း ထန်မော့အား အဓိပ္ပါယ်ပါပါကြည့်လျက် ဆိုလိုက်သည်။

"သူတို့က ကိုယ်တို့ကိုမစ်စတာAနဲ့ Bလို့မခန့်မှန်းမိတာလဲ ဖြစ်နိုင်ပါတယ်"

ထန်မော့လည်းတွေးလိုက်မိသည်။

"ဖြစ်နိုင်ပါတယ် ဒါပေမယ့် အဲဒီမျက်မှန်နဲ့ ခေါင်းဆောင်ဆိုတဲ့သူကတော့ ခန့်မှန်းမိမလားပဲ ထားလိုက်ပါတော့ တီကောင်ကြီးကိုပဲ သွားပေးလိုက်ရအောင်"

လူ၂ဦး ဆက်၍လျှောက်သွားခဲ့ကြလေသည်။

ကြီးမားသော တီကောင်ကြီးမှာ ငတုံးလိုခေါင်းကြီးကို လှုပ်ခါနေသည်မို့ အိတ်ကြီးမှာ ဖုဖောင်းနေခဲ့သည်။ ဆွဲယူနေသောအားမရှိတော့သည်နှင့် အိတ်ကြီးမှာ နောက်သို့ပြန်ဆုတ်သွားခဲ့သည်။ ၄င်းကိုကြည့်ရသည်မှာ ဆော့ရသည်ကို ပျော်နေပုံပင်။ သူကအမေကိုတ၍ ငိုရန်မေ့လျော့နေပြီး အိတ်ကိုသယ်နေသော ကစားသမား၂ဦးကိုလည်း သတိမရတော့ချေ။

တကယ်တည်းတွင် အစမှအဆုံးအထိ ထန်မော့၏ အစီအစဥ်မှာ ရိုးရှင်းလှသည်။

ပထမရက်တွင် ထန်မော့နှင့် ဖူ၀မ်သော်မှာငတုံး၂ယောက်ဖြစ်သည့် ၀မ်ရင်းကွေ့နှင့် လူအိုကြီးနျောင်ကို ဖမ်းမိခဲ့သည်။ ထန်မော့ဤ၂ယောက်ကို ဖမ်းမိစဥ်မှာပင် ပြဿနာတစ်ခုကိုတွေးမိခဲ့သည်။ ထိုပထမနေ့တွင် ကစားသမား၂၁ယောက်မှာ မပူးပေါင်းကြပဲ အုပ်စုကိုယ်စီနှင့်ဖြစ်ကြလေသည်။

ဤသည်မှာ ထန်မော့နှင့် ဖူ၀မ်သော်အတွက် သတင်းကောင်းပင်။

သူတို့အတွက် ထိုကစားသမားများအားလုံးပူးပေါင်းသွားမည်ကို အစိုးရိမ်ရဆုံးဖြစ်သည်။ ထို၂၁ယောက်လုံးအတွက် ဂိမ်းမစ်ရှင်မှာ အတူတူပင်။ သူတို့အတွက် တစ်ခုတည်းသော အငြင်းပွားစရာအချက်မှာ ဘုရင့်ရွှေဒင်္ဂါးပင်ဖြစ်သည်။ ၄င်းမှာ ပီနိုကီယိုဂိမ်းကဲ့သို့ပင်။ ကစားသမားများကို ထိုရွှေဒင်္ဂါးကို အပိုင်ရရှိစေရေးအတွက် တစ်ဖက်နှင့်တစ်ဖက် တိုက်ခိုက်စေသည်၊

အကယ်၍ ထန်မော့သာဆိုလျှင် ဂိမ်းထဲသို့ရောက်ရောက်ခြင်း ပူးပေါင်းရန်သင့်တော်သော အဖွဲ့ကို အရင်ဆုံးရှာမှာပင်။ ဘုရင့်ရွှေဒင်္ဂါးမှာ ဆုလာဒ်လည်းဖြစ်သလို ချိန်ကိုက်ဗုံးတစ်လုံးလည်းဖြစ်သည်။ ၄င်းကပင် ဂိမ်းကို အလွန်ခက်ခဲအောင် ပြုလုပ်လိုက်သည်။ အဆိုးဆုံးအခြေအနေမှာ မွန်းစတားကြီးကိုလည်းမခိုးနိုင်ဘဲ ကစားသမားများ အချင်းချင်းတိုက်ခိုက်မိကြမှာပင်။

ထန်မော့သာဆိုလျှင် ထိုပီနိုကီယိုဂိမ်းကိုတော့ထပ်ဆော့မနေတော့ဘဲ ဘုရင့်ရွှေဒင်္ဂါးကို အစကတည်းက လက်လွှတ်ထားမှာပင်။ ထိုအစား အဓိကမစ်ရှင်ကိုသာ ရှေ့တန်းတင်ထားမည်သာ။

ကံကောင်းသည်မှာ မည်သည့်ကစားသမားများကမှ ဤလမ်းကိုမရွေးသည့်အပြင် ခိုး၀င်သူ၄ယောက်ဆိုလျှင် ကျန်အသင်းဖော်များကို ရှင်းပစ်ရန်ပင် ဆုံးဖြတ်ခဲ့သည်။

အခြေအနေမှာ ထန်မော့အား မျက်နှာသာပေးလာခဲ့သည်။ ထို၀မ်ရင်းကွေ့နှင့် လူအိုကြီးနျောင်တို့ကို မွန်းစတားအတုကြီး၏ လှောင်ချိုင့်ထဲထည့်ထားခဲ့ခြင်းမှာ မတော်တဆသာ။ အခြေအနေမှာ အလွန်ကောင်းလွန်းနေ၍ ထန်မော့မှာ အနက်ရောင်မျှော်စင်မှ စုံထောက်များ၏ အထင်သေးမှုရောင်၀ါကို ထုတ်ပေးလာလိမ့်မည်ဟု မျှော်လင့်မထားခဲ့မိချေ။ ဖူ၀မ်သော်ကဆိုခဲ့သည်။

"ကိစ္စမရှိဘူး သူတို့တွေလွတ်သွားရင် သူတို့ကမွန်းစတားကြီးကိုမြင်ခဲ့တဲ့ ကစားသမားတွေဖြစ်သွားမယ် သူတို့ကို လမ်းလွဲအောင် လုပ်ရတာလည်း မဆိုးပါဘူး"

ဖူ၀မ်သော်မှာ မြေအောက်နိုင်ငံ၏ ရေဆိုးပိုက်လိုင်းထဲမှ ကြီးမားသော ကြွက်ကြီးတစ်ကောင်ကို ဖမ်းခဲ့သည်။ ထို့နောက် ထိုကြွက်ကြီးကို လှောင်ချိုင့်ထဲတွင်ထည့်၍ ၀မ်ရင်းကွေ့တို့နှင့်အတူ ပိတ်ထားခဲ့လေသည်။

ထို့နောက်တွင် စုံထောက်များ၏ အထင်သေးခြင်းရောင်၀ါကို ကြေညာလာခဲ့လေသည်။ ထိုကြေညာသံကို ကြားသည်နှင့် ထန်မော့နှင့်ဖူ၀မ်သော်တို့မှာ ၀မ်ရင်းကွေ့နှင့် လူအိုကြီးနျောင်တို့ကို အခြားကစားသမားထံပြန်လွှတ်ပေးရန် အကြံကို ချက်ချင်းရလိုက်လေသည်။

ဤသည်မှာ မျက်မှန်နှင့် လူအား သူတို့ပေးခဲ့သော လက်ဆောင်ပင်။

ဖူ၀မ်သော်က ထိုလူ၂ဦးကယ်တင်ခံလိုက်ရပြီးနောက် သူတို့၏ အနိုင်ရရှိနှုန်းမှာ ၆၀ရာခိုင်နှုန်းမှ ၇၀ရာခိုင်နှုန်းအထိတက်လာသည်ဟု ဆိုခဲ့သည်။ ၄င်းမှာ ၀မ်ရင်းကွေ့နှင့် လူအိုကြီးနျောင်မှာတုံးလွန်း၍ အသင်းဖော်များကို ဆွဲချမိမှာကြောင့်မဟုတ်ပဲ သူတို့မှာ မျက်မှန်နှင့်လူအား မွန်းစတားကြီးအကြောင်း လမ်းလွဲအောင် လုပ်မိမှာ ဖြစ်၍ပင်။

မှောင်မည်းနေသော မြေတွင်းထဲတွင် မျက်မှန်နှင့်လူက တွက်ဆလိုက်သည်။

"စုံထောက်များ၏ အထင်သေးမှုရောင်၀ါက ငါတို့ကို မွန်းစတားကြီးရဲ့ တည်နေရာကို ပြပေးတယ် ဒါပေမယ့် နေရာကိုပြောပြနေရင်တောင် ငါတို့ထဲက ဘယ်သူကမှ မွန်းစတားအစစ်ကိုမမြင်ဖူးကြဘူးလေ... ငါတို့အဲဒီနေရာကိုရောက်တဲ့အချိန်ကျရင် မစ်စတာAနဲ့Bက မွန်းစတားကြီးကို ရွေ့လိုက်တာလည်းဖြစ်နိုင်တယ်... ထပ်ပေါင်းပြောရရင် သူတို့အဲဒါကြီးကို ဘယ်ကိုမှရွေ့နေဖို့မလိုတာလည်းဖြစ်နိုင်တယ်"

မျက်မှန်နှင့်လူမှာ မြေကြီးပေါ်တွင်မြို့တော်၏ မြေပုံကို အကြမ်းဆွဲပြလိုက်သည်။

"အနက်ရောင်မျှော်စင်ငါတို့ကိုပေးထားတဲ့ မြေပုံမှာ မြေပြန့်XY လမ်းကြောင်း၂မျိုးပဲပါတယ်.. အမြင့်နေရာပြအမှတ်တွေမပါဘူး... ဆိုလိုတာက မစ်စတာAနဲ့Bက မွန်းစတားအတုကြီးကို ပြထားပြီး အစစ်ကိုမြေအောက်မှာလည်း တွင်းတူးပြီး၀ှက်ထားလို့ရတယ်လေ ဒီလိုနည်းနဲ့ငါတို့ဘယ်တော့မှ မွန်းစတားအမှားကြီးကို ရှာနေမှန်း သိမှာ မဟုတ်ဘူး"

ရှောင်ချန်းက မြေပုံကိုကြည့်လျက် ရေရွတ်လိုက်သည်။

"သေစမ်း ငါတို့တော့အလိမ်ခံလိုက်ရပြီ"

မျက်မှန်နှင့်လူမှာ အလွန်တည်ငြိမ်နေခဲ့သည်။

"အလိမ်ခံရတာချည်းပဲတော့မဟုတ်ဘူး.. သူတို့က ကစားသမား၂ယောက်ကိုသုံးပြီးတော့ ငါတို့ကို လမ်းလွဲအောင်လုပ်သွားသေးတယ်... ပြီးတော့ငါတို့နဲ့ ရည်ရွယ်ချက်ရှိရှိပူးပေါင်းပြီးတော့ ငါတို့အကြံကိုသတိမမူမိချင်ယောင်ဆောင်လိုက်တာ ၄ရက်မြောက်နေ့က မစ်စတာAက ငါတို့ကို မွန်းစတားကြီးအကြောင်းလမ်းလွဲအောင်လာလုပ်တယ်...ဘာပဲဖြစ်ဖြစ်ငါတို့က ဒီကြွက်ကြီးကို မွန်းစတားကြီးအဖြစ် ယုံသွားမှာပဲ"

လူအိုကြီးလီက ကျိန်းမောင်းလိုက်သည်။

"ဒီလိုရှုံးရတာမတရားဘူး"

မျက်မှန်နှင့် လူမှာ နှာရိုးပေါ်မှ မျက်မှန်ကိုပင့်တင်လိုက်သည်။

"တစ်ချက်ရှိသေးတယ်...မစ်စတာAနဲ့Bကဒီထက်ပိုရက်စက်ပြီး ပိုပြီးကြံစည်ထားတာလည်း ဖြစ်နိုင်သေးတယ်.. လူအိုကြီးလီ အဲဒီကျောက်တုံးနံရံပေါ်မှာ တွေ့ခဲ့တဲ့ အလောင်း၃လောင်းက ခိုး၀င်သူတွေလက်ချက်လည်း ဟုတ်ချင်မှ ဟုတ်မှာ...မစ်စတာAနဲ့Bတို့သတ်လိုက်တာလည်းဖြစ်နိုင်တယ်"

လူအိုကြီးလီ ထိတ်လန့်သွားခဲ့သည်။

"မစ်စတာAနဲ့Bက အဲဒီ၃ယောက်ကို သတ်ပြီး ဗိုက်တွေကိုဖွင့်ပြီးပြထားတာလား"

ထို့နောက်သူကခတ္တတန့်သွားပြီး နားလည်သွားခဲ့သည်။

"ငါတို့ကို ပူးပေါင်းလို့မရအောင်လုပ်တာပေါ့"

မျက်မှန်နှင့်လူကဆက်ပြောလာသည်။

"မသိဘူး... အဲဒီအလောင်းတွေက မစ်စတာAနဲ့Bနဲ့မဆိုင်တာလည်းဖြစ်နိုင်တယ်...အဲဒီသေသွားတဲ့ ခိုး၀င်သူလေးရဲ့အင်းဆက်တွေစားသွားတဲ့ ပုံစံက အဲဒီအလောင်း၃လောင်းနဲ့ တူနေတော့ သေချာပြောလို့မရဘူး... ပြောနိုင်တာကတော့ မစ်စတာ Aနဲ့Bနဲ့ဆိုင်ဆိုင် မဆိုင်ဆိုင် တကယ့်အကွက်ကောင်းပဲ...အဲဒီအလောင်း၃လောင်းရဲ့ဆိုးဆိုး၀ါး၀ါးသေသွားတဲ့ ပုံစံကြောင့်ပဲ ငါက ခိုး၀င်သူတွေနဲ့ ပူးပေါင်းဖို့မဖြစ်နိုင်ဘူးလို့ ဆုံးဖြတ်ခဲ့တာလေ...အခုတော့ငါတို့ရှုံးသွားပြီ"

လုရှင်းမှ ဘေးကမေးလာခဲ့သည်။

"ဂိမ်းကိုရှင်းသွားတဲ့ ၂ယောက်ရှိတယ်လေ... ဖူ၀မ်သော်ကတော့ကျွန်တော်သိပါတယ်... အနက်ရောင်မျှော်စင်ပထမထပ်နဲ့ ဒုတိယထပ်ကို ပထမဆုံးရှင်းသွားတဲ့ တရုတ်ကစားသမား...သူကခိုး၀င်သူပဲ ဒါပေမယ့်ထန်မော့ဘယ်သူလဲ တစ်ခါမှမကြားဖူးဘူး"

အန်ချူးမေးကိုပွတ်လိုက်သည်။

"ငါလည်းတစ်ခါမှ မကြားဖူးဘူး"

၀မ်ရင်းကွေ့သည် မိမိကြောင့် အားလုံးရှုံးနိမ့်သွားရသည်ဟူ၍ ခံစားချက်နှင့်အတူ အပြစ်မကင်းစွာ စိတ်ပျက်လက်ပျက်ဆိုလာသည်။

"ဟုတ်တယ် သူတို့နှစ်ယောက်ကျတော့ မစ်ရှင်ကို ဘယ်လိုရှင်းလိုက်တာလဲ... ငါနဲ့လူအိုကြီးနျောင် မွန်းစတားကြီးကို ခိုးပြီးတဲ့အချိန်သူတို့ကနောက်ကျမှရောက်လာပြီး မြေကြီးထဲမြှုပ်ထားတဲ့ မွန်းစတားအစစ်ကိုတွေ့သွားတာလား"

၀မ်ရင်းကွေ့ပင်လျှင် ထိုစကားမှာ ကြံကြံဖန်ဖန်နိုင်ကာရယ်စရာကောင်းလှသည်ဟု ခံစားမိလျက် အသက်မပါစွာ ရယ်လိုက်သည်။

တစ်ခါမှပေါ်မလာဖူးသော ကစားသမား၂ဦးက မစ်ရှင်ကိုရှင်းသွားခဲ့သည်။ ဤသည်ကဂိုဏ်း၂ဂိုဏ်း သေရေးရှင်ရေး တိုက်ပွဲကို အသည်းအသန်ဆင်နွှဲနေကြပြီး ၂ဖက်လုံးအတူသေကြတော့မည့်အချိန်မှ နောက်လူ၂ယောက်က ရောက်လာသလိုမျိုးပင်။ ထိုဂိုဏ်း၂ဂိုဏ်းမှ လူများမှာ မလှုပ်ရှားနိုင်တော့ပဲ ထိုနောက်ရောက်လာသော လူ၂ယောက်က မိမိတို့နှင့် သက်ဆိုင်သော ဆုကို အေးအေးဆေးဆေးယူသွားသည်ကို ထိုင်ကြည့်နေရသည့်နှယ်။

လုရှင်းကဆိုလိုက်သည်။

"ထန်မော့ကိုတော့ငါမသိဘူး...ဒါပေမယ့် ဖူ၀မ်သော်ကတော့ တကယ်ပဲ အဲဒီဖူ၀မ်သော်ဆိုရင် ငါတို့နောက်မှာ တစ်ချိန်လုံးပုန်းနေပြီး အချောင်နှိုက်လောက်မယ့်အထိ မတုံးလောက်ဘူးထင်တာပဲ"

လင်းရီသည်လည်း တစ်ခုခုမှားယွင်းနေသည်ဟု ခံစားလိုက်ရသည်။

"ဒီ၇ရက်အတွင်အဲဒီ၂ယောက်ကို ငါတစ်ခါမှ မမြင်လိုက်ဘူး...ငါတို့လူအရေအတွက်ကို ထပ်ပေါင်းလိုက်မယ်ဆိုရင် ငါတို့၅ယောက်ရယ် မစ်စတာလုတို့၄ယောက်ရယ် ခိုး၀င်သူတွေသတ်တာခံလိုက်ရတဲ့ ၃ယောက်ရယ်...၀မ်ရင်းကွေ့တို့၂ယောက်ရယ်..ပြီးတော့ ငါမြို့ပြင်ကိုလိုက်ချောင်းဖူးတဲ့၃ယောက်ရယ်..စုစုပေါင်း ၂၁ယောက်ပါပဲ... ထန်မော့နဲ့ဖူ၀မ်သော်တို့ကိုပေါင်းလိုက်ရင် ကွက်တိပဲလေ ဒါပေမယ့်၄ရက်မြောက်နေ့တုန်းက အဆောက်အအုံပျက်တွေနားမှာ အကြာကြီးရှာခဲ့ပေမယ့်သူတို့ကို မတွေ့ခဲ့ဘူးလေ သူတို့ရဲ့ ထောက်လှမ်းရေးစွမ်းရည်က ငါ့ထက်ပိုသန်မာလို့ ငါမမြင်အောင် ပုန်းနေနိုင်တာလား ဒါမှမဟုတ် သူတို့မွန်းစတားကြီးကို ဘယ်တုန်းကမှလိုက်မရှာခဲ့တာလား"

🪩

Prev Next