MM Story Teller

Chapter 16 🚩Arc - 1 မင်းသမီးအစားထိုး ထိမ်းမြားလက်ထပ်ခြင်း The End

Viewers 2k

🚩Ch -16

Arc - 1.16 မင်းသမီးအစားထိုးထိမ်းမြားလက်ထပ်ခြင်း (ဇာတ်သိမ်း)

တိုင်းပြည်တစ်ပြည်က ဧကရာဇ်မရှိဘဲ တစ်ရက်တောင်နေလို့မဖြစ်နိုင်ပေ ။

ထို့ကြောင့် မြို့တော်က ရွှမ်းယွမ်ယယ်၏ တပ်ဖွဲ့များနှင့် ထိန်းချုပ်ခံလိုက်ရပြီးချိန်တွင် ရှင်သန်ခွင့်ရသော အရာရှိများက သူတို့၏ ကံကြမ္မာကို လက်ခံလိုက်ပြီး ရွှမ်းယွမ်ယယ်အား သူတို့၏ ဧကရာဇ်အသစ်အဖြစ် တင်မြှောက်လိုက်သည် ။

သုံးရက်ကြာပြီးနောက် ဧကရာဇ်အသစ်က နန်းတက်သည် ။ သစ္စာဖောက် ရွှမ်းယွမ်ချင်း နှင့် သူ၏ ကြံရာပါများကို အများအရှေ့တွင်ပဲ ကွပ်မျက်လိုက်၏ ။ ရွှမ်းယွမ်ချင်း နှင့် ယဲ့ကျီးကျင်၏ ခေါင်းများကို ညနေဂိတ်တံခါးတွင် သူခိုး နှင့် ဓါးပြများကို ခြောက်လှန့်ဖို့ ချိတ်ဆွဲထားသည် ။ ဤအချိန်တွင် သူတို့က တကယ်သေဆုံးသွားခြင်းဖြစ်ပြီး နောက်တစ်ကြိမ်လည်း ထပ်ပြီး မသေဆုံးနိုင်တော့ပေ ။

ဧကရာဇ်အသစ် နန်းတက်ပြီးသည့်နောက်တွင် သမိုင်းအစကတည်းက တစ်ခါမှမရှိဖူးသော အကြီးမားဆုံး သုတ်သင်ရှင်းလင်းရေး နှင့် တော်ဝင်ရုံးတော်ကို ပြန်လည်ဖွဲ့စည်းခြင်းများ ပြုလုပ်ခဲ့သည် ။ ထို့နောက်တွင် မင်းသားအများအပြားကလည်း များစွာသော ပြစ်ချက်များနှင့် ရုံးတော်တင်ခံရသည် ။ ထိုပြစ်ချက်တင်ခံရသူများထဲတွင် ကြီးလေးသောရာဇဝတ်မှုရှိသူများကို တော်ဝင်တရားရုံးတော်က ချက်ချင်းအမိန့်ချပြီး လူပုံအလယ်၌ ကွပ်မျက်ဖို့ အမိန့်ချလိုက်သည် ။

ဤလူသိရှင်ကြား စွဲချက်တင်ခံရသောမင်းသားများထဲတွင် ရွှမ်းယွမ်ရွေ့လည်းပါဝင်နေပြီး သူက သေဒဏ်ပေးခြင်းတော့ မခံရပေ ။ သူ့ကို တော်ဝင်မိသားစုများအကျဥ်းချသည့် ခြံဝင်းထဲတွင် နေအိမ်အကျယ်ချုပ်ချထား၏ ။ ဤနေရာက စုဝမ်အရင်က နေထိုင်ခဲ့ရသော အအေးနန်းဆောင်ထက်ပင်ပို၍ ယိုယွင်းပျက်စီး လူသူကင်းမဲ့နေသည် ။ ခြံဝင်းတစ်ခုလုံးက အစောင့်တစ်ယောက်မှပင် ရှိမနေချေ ။ ရွှမ်းယွမ်ရွေ့မှလွဲ၍ ထိုနေရာတွင် သူနှင့်အတူ အကျဥ်းချခံရသော ယဲ့ကျီးဟွာသာ ရှိသည် ။

နှစ်ယောက်စလုံးကို ဤပိတ်လှောင်ထားသော ခြံဝင်းမှ ထွက်သွားခြင်းမပြုဖို့ တားမြစ်ထားသည် ။ သူတို့က စည်းစိမ်များနှင့်လည်း မနေရတော့သလို သူတို့ကို စောင့်နေသော အစေခံလည်း တစ်ယောက်မှရှိမနေပေ ။အချိန်ကြာလာသောအခါ ရွှမ်းယွမ်ရွေ့က ပိုပိုပြီး စိတ်အခြေအနေဆိုးလာ၏ ။ယဲကျီးဟွာက ထိုအရာတို့ကို တစ်ယောက်တည်းသည်းခံဖို့သာ ရှိတော့သည် ။

ရွှမ်းယွမ်ရွေ့အကျယ်ချုပ်ချခံရပြီး ဒုတိယမြောက်လတွင် အကျဥ်းချခြံဝန်းကို ပထမဆုံးဧည့်သည်ရောက်လာ၏ ။ ဧည့်သည်မှာ နန်းတော်၏ အတွင်းရေးအစေခံဖြစ်သည် ။ သူက တန်ဖိုးကြီး အဝတ်အထည်အချို့နှင့်အစာသွပ်မုန့်များကို သယ်ယူလာ၏ ။ ၎င်းမှာ ဧကရာဇ်က ဆုတံဆိပ်များချီးမြှင့်ရန် အခမ်းအနားကို ကျင်းပမည်ဖြစ်သည့်အတွက် အထူးတလည် ချီးမြှင့်လိုက်ခြင်းဖြစ်သည်ဟု ပြောသည် ။ အစပိုင်းတွင် ရွှမ်းယွမ်ရွေ့က အစေခံထုတ်ပေးလာသော ဧကရီနျန်နျန်၏ လက်ရေးစာကို မတွေ့မချင်း သူပြောတာတွေကို ဂရုစိုက်မနေပေ ။ထို့နောက်မှသာ ရွှမ်းယွမ်ရွေ့၏ အမူအရာက လုံးဝပြောင်းလဲသွား၏။

၎င်းမှာ ဧကရာဇ် ရွှမ်းယွမ်ယယ်က စုဝမ်ကို ထိမ်းမြားချင်နေခြင်းဖြစ်သည် ။

တကယ်တမ်းတွင် ရွှမ်းယွမ်ရွေ့က ဤသတင်းကို နောက်ဆုံးမှ သိရသည့်သူဖြစ်သည်။ လက်ရှိတွင် ဧကရာဇ်က စုဝမ်ကို သူ့ဧကရီအဖြစ် လက်ထပ်တော့မည်ဆိုတာကို မြို့တော်တစ်ခုလုံး သိနေပေပြီ ။

စုအိမ်တော်က အရင်နေ့များရှိ အမှုန်အမှိုက်များကို ရှင်းထုတ်လိုက်ပြီး အိမ်တော်တစ်ခုလုံးက အခြေအနေအသစ်ဖြင့် တောက်ပနေသည် ။

ရွှမ်းယွမ်ချင်း၏ ကိစ္စကို စုဝမ်ဖြေရှင်းလိုက်ပုံက မသင့်တော်သော်လည်း ယခုတွင် ရုံးတော်တစ်ခုလုံးက ရွှမ်းယွမ်ယယ်၏ ထိန်းချုပ်မှုအောက်တွင်သာ ရှိနေသည် ။ ဤကိစ္စနှင့် ပတ်သက်၍ မည်သူကမှ အသံမထွက်ရဲပေ ။ ဆန့်ကျင်ဘက်အားဖြင့် ရုံးတော်ကို ပြန်လည်ဖွဲ့စည်းပြီးနောက်တွင် စုအိမ်တော်၏ ရာထူးက တက်မသွားပေ ။ ဤအချက်ကြောင့် အရှင်မင်းမြတ်က စုဝမ်ကျွင်းကျူတစ်ယောက်တည်းကိုသာ ဘက်လိုက်နေကြောင်း အားလုံးကို သဘောပေါက်သွားစေခဲ့သည် ။ ယခုတွင် ထိုလူနှစ်ထိမ်းမြားမည့်သတင်းက ပျံ့နှံ့နေပြီး လူအများက သိပ်ပြီး အံ့အားသင့်မနေကြပေ။

အစောပိုင်းတွင် စုယွီဖုန်းက ယခင်ဧကရာဇ် နတ်ရွာစံခြင်းနှင့် ပက်သက်၍ အငြိုးထားနေသေးသည် ။ သို့သော် နောက်ပိုင်းတွင် ရွှမ်းယွမ်ယယ်နှင့် စာကြည့်ဆောင်၌ အကြိမ်ပေါင်းများစွာ ဆွေးနွေးပြီးသည့်နောက် စုယွီဖုန်းက ထီးနန်းဆက်ခံရသော ဧကရာဇ်ထံတွင် သိမ်းသွင်းခံလိုက်ရ၏ ။ စုဝမ်က သမားတော်စီးကို လက်လျော့ပြီး ဘာကြောင့် ရွှမ်းယွမ်ယယ်ကို ရွေးချယ်ခဲ့လဲဆိုတာ စုယွီဖုန်းမသိသော်လည်း စုဝမ်၏ ရွေးချယ်မှုကိုတော့ သူကန့်ကွက်စရာမရှိပေ ။

သမားတော်စီးက စုအိမ်တော်သို့ နောက်တစ်ကြိမ်ရောက်လာချိန်တွင် အရာအားလုံးက ပြောင်းလဲသွားသလို သူခံစားလိုက်ရသည် ။

ထိုအခန်းထဲတွင်ပဲ သူ့မျက်လုံးရှေ့ရှိလူက ထိုအတိုင်းသာဖြစ်သော်လည်း စုဝမ်က သူနှင့်အများကြီး ဝေးကွာသွားသလို သမားတော်စီး ခံစားလိုက်ရသည်။ သူမက သူနှင့် မတူညီသည့် ကမ္ဘာတွင် ရှိနေသည့်အလား ဝေးကွာလွန်းလှသည် ။

" ရှင်လာပြီလား ။ "

သမားတော်စီး ရောက်လာသော်လည်း စုဝမ်က အလွန်တည်ငြိမ်နေ၏ ။

" ကိုယ်ဒီနေ့လာတာ မင်းကို မေးစရာရှိ..."

" မေးနေစရာမလိုတော့ပါဘူး... ကျွန်မ ရှင့်ကို ဘယ်တုန်းကမှ မချစ်ခဲ့ဖူးဘူး..."

စုဝမ်က အေးစက်စွာဖြင့် သမားတော်စီးကို စကားဖြတ်ပြောလိုက်သည် ။

'ကျွန်မ ရှင့်ကို ဘယ်တုန်းကမှ မချစ်ခဲ့ဖူးဘူး'

ဤစကားလုံးအနည်းငယ်ကို တိုက်ရိုက်သာပြောလိုက်သည် ။

သမားတော်စီး၏ နှလုံးသားက တင်းကျပ်သွား၏ ။ သူ့မျက်နှာကတော့ ပြုံးနေဆဲပင် ။

" တကယ်တော့ ၊ ကိုယ်မေးချင်တာက..."

" ဘာမှမေးနေစရာမလိုပါဘူး ။ အဲ့ဒါက ရှင်ထင်ထားတဲ့အတိုင်းပဲ ။ အစကတည်းက ကျွန်မ နဲ့ ပြောင်ကော ၄ ကအားလုံးကို ကျွန်မတို့ဆွဲထားအစီစဥ်ထဲမှာ အကွက်ချထားခဲ့တာ ။ ရှင် နဲ့ ရွှမ်းယွမ်ချင်းလည်း အပါအဝင်ပဲ ။ "

စုဝမ်က တစ်ဖန် သမားတော်စီးကို စကားဖြတ်လိုက်ပြီး နောက်ဆုံးတွင် သူ့နှလုံးသားထဲရှိ ကြည်နူးမှုအနည်းငယ်ကို ဖျက်ဆီးပစ်လိုက်သည်။

သမားတော်စီးက ထပ်ပြီး ပြုံးမနေနိုင်တော့ပေ ။ သူလုံးဝ တန့်သွားရသည် ။

" ဘာ..ဘာလို့လဲ "

ဘာလို့လဲ ။

စုဝမ်က သမားတော်စီး၏ မျက်နှာကို လေးလေးနက်နက် ကြည့်လိုက်သည် ။

" ဘာလို့လဲဆိုတော့ ရှင်က တုံးအလို့ပဲ ။ ရှင်က အကွက်ချဖို့ လွယ်ကူလွန်းတယ် ။ "

ရှင့်ကို အကွက်ချရတဲ့ တစ်ခုတည်းသော အကြောင်းအရင်းက ရှင်က အဲ့လိုလုပ်ဖို့ လွယ်ကူလို့ပဲ ။

ဒါက အကောင်းဆုံးအကြောင်းပြချက်ပင် ။ တကယ်တမ်းတွင် စုဝမ် မပြောလိုက်ရသော အကြောင်းပြချက် များရှိနေသေးသည်။ ၎င်းက နှလုံးသားနူးညံ့သည့် အမျိုးသားနှင့်ပတ်သက်၍ သူမမှာ ဘာအမြင်ကောင်းမှ ရှိမနေသောကြောင့် ဖြစ်သည် ။

သမားတော်စီးက သူမကို အများကြီး ကူညီပေးခဲ့သော်ငြား သူမနေရာတွင် အခြားမိန်းမတစ်ယောက်ဆိုပါကလည်း သူက မီးတောင်ကိုကျော်ပြီး ပင်လယ်ကိုဖြတ်နေအုန်းမှာပဲ ဖြစ်သည် ။ သူ၏ " ကြင်နာတတ်သော နှလုံးသား"က "အားနည်းချက်" လည်းဖြစ်နိုင်၏ ။

ဤကဲ့သို့ ရေစီးကမ်းပြိုလိုက်သည့်ချစ်ခြင်းမျိုးကို စုဝမ် လက်မခံရဲပေ ။

စုအိမ်တော်သို့ သမားတော်စီး ရောက်လာချိန်တုန်းကတော့ သူ့တွင် သတ္တိအပြည့်ရှိနေသည် ။ စုဝမ်နှင့် တွေ့လိုက်ပြီးနောက် သူက လုံးဝကို စိတ်ရှုပ်ထွေးကာဘာလုပ်ရမှန်းမသိ ဖြစ်သွားပုံရ၏ ။

စုဝမ် နှင့် ရွှမ်းယွမ်ယယ်၏ မင်္ဂလာပွဲနေ့တွင် နန်းတော်ထဲရှိ နေရာအားလုံးကို အနီရောင်ဖဲပြားများ ၊ ပိုးချည်ပန်းပွင့်များ ချိတ်ဆွဲထား၏ ။ ပျော်ပွဲရွှင်ပွဲတေးသံက မြို့တော်၏ နေရာတိုင်းတွင် ပျံ့လွင့်လျက်ရှိသည် ။

အကျဥ်းချခြံဝင်းတွင်လည်း ထိုအသံများကို ကြားနေရပြီး နေရာတိုင်း၌ အနီရောင်များကို မြင်နေရ၏ ။ သူက ထိုနှစ်က တက်ကြွပြီး စိတ်ဓါတ်မြင့်မားသည့် အချိန်ကို ပြန်တွေးနေမိသည် ။ သူလည်း အိမ်တော်သို့ စုဝမ်ကို လက်ထပ်ခေါ်သွားချိန်က အလွန်ကို ခမ်းနားတင့်တယ်နေခဲ့သည် ။

မျက်စိတစ်မှိတ်စာအချိန် ငါးနှစ်အတောတွင်းတွင် သူမက ဧကရီဖြစ်လာသော်လည်း ဧကရာဇ်ကတော့ သူမဟုတ်ပေ ။

အဆုံးကျတော့ ဘာတွေက မှားယွင်းသွားတာလဲ ။

စုဝမ်က အစကတည်းက သူ့ဝမ်ဖေး ဖြစ်ခဲ့တာပဲ ။ အခု သူမက ဧကရီဖြစ်လာပြီ ။ သူကရော ဧကရာဇ်မဖြစ်သင့်ဘူးလား ။ သူကရော တိုင်းပြည်ကို အုပ်ချုပ်ရတဲ့သူမဖြစ်သင့်ဘူးလား။

ပျော်ရွှင်စရာအတွေးများတွင် နစ်မျောနေရင်း ရွှမ်းယွမ်ရွေ့အကြည့်တို့က တဖြည်းဖြည်း စိတ်လွတ်ကာ သူ၏ အမူအရာကလည်း ပုံမှန်နှင့်မတူပဲ နာကျင်နေပုံရ၏ ။

" ဝမ်ယဲ "

ဤအချိန်တွင် တစ်မနက်လုံး မနက်စာအတွက် ခက်ခက်ခဲခဲ ကြိုးပမ်းထားရသော ယဲ့ကျီးဟွာက ရွှမ်းယွမ်ရွေ့ကို အခန်းသို့ပြန်လာပြီး မနက်စာစားဖို့ ခေါ်လိုက်သည် ။ သူမ အသံကို ကြားလိုက်ရသောအခါ ရွှမ်းယွမ်ရွေ့က အလွန်အမင်း လှုံ့ဆော်ခံလိုက်ရသည့်အလား ချက်ချင်းထရပ်ကာ ယဲ့ကျီးဟွာရှိရာသို့ ပြေးသွားလိုက်သည် ။ သူက လက်နှစ်ဖက်လုံးကို သုံး၍ ယဲ့ကျီးဟွာ၏ လည်ပင်းကို ညှစ်ထား၏ ။

" အဲ့ဒါမင်းပဲ ။ အဲ့ဒါတွေ အားလုံးက မင်းကြောင့်ပဲ။"

" ဝမ်..ဝမ်ယဲ "

ယဲ့ကျီးဟွာ၏ မျက်နှာက ချက်ချင်းပဲ ဖြူတစ်လှည့် ပြာတစ်လှည့်ဖြစ်သွားပြီး သူမ၏ အကြည့်များက ရွှမ်းယွမ်ရွေ့ကိုသာ စိုက်ကြည့်နေ၏ ။ ဤအချိန်တွင် သူမက အကြီးအကျယ် စိတ်ပျက်အားငယ်မှု နှင့် ဆိုးရွားမှုတို့ကို ခံစားလိုက်ရသည်။

အသက်ရှူဖို့က ပိုခက်ခဲလာပြီး ယဲ့ကျီးဟွာ၏ အမြင်တို့မှာ ပို့လို့ဝေဝါးလာရသည် ။ ၎င်းက သူမအတိတ်ဘဝရှိ နွေဦးကို တစ်ဖန်ထပ်မြင်လိုက်ရသည့်အလား ။ သူမက ကြည်နူးစရာကောင်းပြီး လွတ်လပ်သော မင်းသား(၃)ကို မက်မွန်သစ်တောအပြင်ဘက်မှ မြင်လိုက်ရသည့် ပထမဆုံးအချိန်ဖြစ်သည် ။ ထိုအချိန်တုန်းက သူမ ရင်ခုန်သံများကပင် လွဲမှားခဲ့ရပြီး သူမရှာနေသည့် အမျိုးသားကို နောက်ဆုံးတော့ ရှာတွေ့ပြီဟု တွေးခဲ့သည် ။

ဒါပေမဲ့ အဆုံးသတ်ကျတော့ရော...

အတိတ်ဘဝတုန်းက ရွှမ်းယွမ်ရွေ့ နှင့် အတူရှိနိုင်ဖို့ သူမတွင် ဘာအခွင့်အရေးမှ မရှိပေ ။ သူမ အသတ်ခံလိုက်ရ၏ ။

ယခုဘဝတွင်တော့ အရေးကြီးသောအရာအားလုံးက ပြန်စတင်ခဲ့သည် ။ သူမ ဆန္ဒအတိုင်း ရွှမ်းယွမ်ရွေ့ကို သူမ လက်ထပ်နိုင်ခဲ့သည် ။

ဒါပေမဲ့ အခုတော့ သူမ ဘာပြန်ရလိုက်သလဲ ။

တိုတောင်းသော ပျော်ရွှင်မှုမှလွဲ၍ သူက သူမအပေါ်တွင် သံသယများကို သိုလှောင်ထားပြီး သူမကို အေးစက်စွာဆက်ဆံပြီး ထိခိုက်စေသည်။

ယဲ့ကျီးဟွာ သူမ မျက်လုံးများကို ဖြည်းဖြည်းချင်း ပိတ်လိုက်သည် ။ သူမ စတင်ပြီး နောင်တရမိ၏ ။

သူမက ပြန်လည်မွေးဖွားလာရုံသာမက ရွှမ်းယွမ်ရွေ့နှင့် လက်ထပ်ဖို့ကိုလည်း နတ်ဘုရားကကူညီပေးပြီး သူမကို မျက်နှာသာ ပေးခဲ့သည်ဟု ထင်ခဲ့သည် ။

ဘယ်လိုတောင် ရူးနှမ်းလိုက်သလဲ ။

အတိတ်ဘဝတွင် ရွှမ်းယွမ်ချင်း၏ စွမ်းဆောင်နိုင်စွမ်းက အားလုံး၏ အထက်မှာဖြစ်သည် ။ ယခုဘဝတွင် ရွှမ်းယွမ်ချင်းကို တန်ပြန်တိုက်ခိုက်ဖို့ သူမက ရွှမ်းယွမ်ရွေ့ကို ကူညီပေးခဲ့သည် ။

ပြီးတော့ရော....။

အရင်တုန်းကလိုပဲ ရွှမ်းယွမ်ယယ်ဆီမှာ သူတို့အားလုံး မြေကြီးထဲရောက်အောင်ကို အလဲထိုးခံလိုက်ရတာပဲ မဟုတ်ဘူးလား ။

နတ်ဘုရားက သူမရဲ့ကံကြမ္မာကို ဒီအတိုင်းလက်ခံနိုင်ဖို့အတွက်ပဲ သူမကို ပြန်လည်မွေးဖွားခွင့်ပေးလိုက်တာလား ။

မဟုတ်ဘူး ။ ဒါက ဒီလို မဖြစ်သင့်ဘူး ။ အဲ့ဒါက ဖြစ်နိုင်ရင် ...အဲ့ဒါက အားလုံးကို ပြန်စတင်ဖို့ ဖြစ်နိုင်ရင် သူမက ရွှမ်းယွမ်ချင်းကို ပဲ လပ်ထပ်လိုက်တော့မယ် ...

ဤနောင်တ နှင့် ဝမ်းနည်းမှုများကို သယ်ဆောင်ရင်း ယဲ့ကျီးဟွာက သူမ မျက်လုံးများကို ထာဝရပိတ်သွားတော့သည် ။

သူမက ကောင်းကင်ဘုံထံမှ မျက်နှာသာပေးခံရလျှင်တောင် အခွင့်အရေးက တစ်ခါထပ်ပိုမရှိနိုင်တော့တာကို မသိခဲ့တာဖြစ်မည် ။ သူမတွင် ရွေးချယ်ဖို့ ဒုတိယအကြိမ်အခွင့်အရေးဆိုတာမျိုး ထပ်မရှိတော့ပေ ...

ယဲ့ကျီးဟွာ သေဆုံးသွားသည် ။ သူမက ရွှမ်းယွမ်ရွေ့ထံတွင် သေသည်အထိ လည်ပင်းညှစ်ခံထားရတာဖြစ်၏ ။ သူ၏ ခြေရင်းအောက်တွင် အသက်ရှူရပ်သွားသော သေဆုံးသွားသည့်ခန္ဓာကိုယ်ကို ကြည့်ရင်း ရွှမ်းယွမ်ရွေ့က အမူအရာကင်းမဲ့နေသည် ။ သူက ကိုယ်အပူချိန်ရှိနေဆဲဖြစ်သော အလောင်းကို ကန်ထုတ်ရင်း ကျယ်လောင်စွာ အော်ဟစ်လိုက်သည်။

" မလေးစားတဲ့ အစေခံတွေ ။ ဒီကိုယ်တော်ကိုတွေ့တာတောင် ဘယ်လို အရိုအသေပေးရမှန်း မသိဘူးလား ။ "

သူက အရှုံးသမားဆိုတာကို လက်ခံချင်ပုံမရပေ ။ သူ့နှလုံးသားထဲတွင်တော့ သူက အနိုင်ရသူဖြစ်သည် ။

ရာထူးနှင့် အာဏာကို သူ၏တစ်ဘဝလုံးအဖြစ် ခံယူထားသောသူက အရာအားလုံးဆုံးရှုံးလိုက်ရပြီးနောက်တွင် ခါးသီးသောနောင်တများနှင့်အတူကျရှုံး၍ ရူးသွပ်သွားလိမ့်မည် ။ ထို့အပြင် သူ့ကို တစ်ခါတည်း သတ်ပစ်လိုက်ခြင်းထက် ယခုလိုအခြေအနေက အချို့သူများကို ပို၍ ကျေနပ်စေ၏။

ယဲ့ကျီးဟွာက သေဆုံးသွားပြီး ရွှမ်းယွမ်ရွေ့က ရူးသွပ်သွားချိန်တွင် စုဝမ်က ဧကရီမီးလျှံငှက်ထိုင်ခုံ၌ ထိုင်ဖို့ အဆင်သင့်ဖြစ်နေပေပြီ ။

သူမ၏ မစ်ရှင်က လုံးဝပြီးမြောက်သွားပြီဖြစ်ကြောင်း အာရုံခံပြီးနောက်တွင် နီလာရောင်မီးလျှံငှက်ဝတ်စုံ နှင့် စုဝမ်က မြို့တော်၏ မြင်ကွင်းကို နောက်ဆုံးအနေဖြင့် ကြည့်လိုက်ပြီး ချက်ချင်းပဲ သူမစိတ်ထဲမှတစ်ဆင့် ဌာနချုပ်ကို ဆက်သွယ်လိုက်သည်။

နံပါတ် 003 မစ်ရှစ် ပြီးမြောက်ပါပြီ ။ ပြန်လာဖို့ တောင်းဆိုပါတယ် ။

ပြန်လာဖို့ တောင်းဆိုပါတယ် ။

ဌာနချုပ်ကို တောင်းဆိုချက်ကို တင်သွင်းလိုက်သည် ။ မက်ဆေ့ချ်ကို ပို့ဆောင်နေရင်း လမ်းခုလတ်တွင် ...

အမြဲတမ်းလိုလို ၊ ဌာနချုပ်ကို ပြန်နေကျ အချိန်က မပြင်ဆင်ရသေးပေ ။ တစ်ခါတစ်ရံ မက်ဆေ့ချ်က ချက်ချင်း ပို့ဆောင်ပြီး ကမ္ဘာမှ အလျင်အမြန်ထွက်ခွာနိုင်သည် ။ ထိုအချိန်တွင် ဝိဉာဥ်ပျောက်သွားသည့်အတွက် မူလကိုယ်၏ ခန္ဓာကိုယ်ကလည်း ပျောက်ဆုံးသွားလိမ့်မည် ။

တစ်ခါတစ်ရံ နှင့် မက်ဆေ့ချ်ပို့ဆောင်ခြင်းက နှောင့်နှေးနေတတ်ပြီး တစ်နာရီ ၊ နှစ်နာရီခန့်ကြာမြင့်တတ်သည် ။ သို့သော် အကြာဆုံးကတော့ ဆယ့်နှစ်နာရီထက်မပိုပေ ။

ဒီနေ့က သူမထိမ်းမြားရမည့်နေ့ဆိုတာကို ပြန်တွေးမိသောအခါ အခုချိန်က ပျောက်ကွယ်သွားဖို့ အကောင်းဆုံးအချိန်ပဲဟုစုဝမ်တွေးလိုက်သည် ။ သို့မဟုတ် နောက်ကျ ညအခါမှ အိပ်ယာထဲတွင် သတို့သားကို ဂါရဝပြုဖို့စောင့်နေရပြီး ကံဆိုး၍ မဖွယ်မရာပြုလုပ်ချိန်မှ ပျောက်ကွယ်သွားရလျှင် ၎င်းက တကယ်ကို ကူညီနိုင်စရာမရှိတော့ပေ။

အတိတ်တွင် စုဝမ်က တာဝန်ပြီးမြောက်သွားသောအခါ သူမက လုံခြုံမည့်နေရာကိုရှာပြီး တိတ်တဆိတ်ပျောက်ကွယ်သွားလိုက်သည် ။ သို့သော် ယခုတွင်တော့ သူမက လက်ရွေးစင်တော်ဝင်တပ်ဖွဲ့များဖြင့် ကာကွယ်ခံထားရ၏ ။ သူမ၏ ထွက်သွားချင်နေသော ဆုတောင်းက ရူးနမ်းသည့် အတွေးသာဖြစ်သည် ။

စုဝမ်က ထွက်ခွာဖို့ လုပ်နေသည့်အချိန်တွင် မြို့တော်သို့ပြန်လာနေသော တော်ဝင်တပ်ဖွဲ့များက ရုတ်တရက် ရပ်တန့်သွားပြီး ထို့နောက်တွင် တိုက်ပွဲခေါ်သံက ထွက်ပေါ်လာ၏ ။

မမျှော်လင့်ထားစွာဖြင့် ဧကရီ၏ အနီရောင်ဝေါယာဥ်ကို တားဆီးရဲသည့်သူက ရှိနေသည် ။

ဘယ်လောက်တောင် ရဲတင်းလိုက်သလဲ ။

ရဲတင်းတာလား ။

စုဝမ်၏ နှလုံးသားက ရုတ်တရက် အေးစက်သွား၏ ။ သူမက လက်မြှောက်ကာ သူမမြင်ကွင်းကို ကွယ်နေသော လိုက်ကာကို မ,တင်လိုက်သည် ။ အနီရောင်လိုက်ကာကို မ,တင်လိုက်တာနှင့် တစ်ပြိုင်နက် ရင်းနှီးနေသော ပြိုင်ဘက်ကင်းသည့်ချောမောသော မျက်နှာက သူမအကြည့်ထဲသို့ ဝင်ရောက်လာ၏ ။

" စုရွေ့ "

စုဝမ်က ဒါကို မမျှော်လင့်ထားခဲ့ပေ ။ အစောတုန်းက သူမ ဝတ်စုံဝတ်ပြီး အလှပြင်နေသည့်အချိန်တွင်တောင် စုရွေ့က အခြားခြံဝင်းတွင် သတိမေ့နေဆဲဖြစ်သည် ။သူက ဘယ်လိုလုပ် ရုတ်တရက်ကြီး...

စုဝမ်နှင့် အကြည့်ချင်းဆုံလိုက်ပြီး စုရွေ့က ထူးဆန်းသော အပြုံးမျိုးကို ဖော်ပြထား၏ ။ထို့နောက်တွင် သူ့ပုံရိပ်ကလျှပ်တစ်ပြတ်အတွင်း သူမ၏ ဝေါယာဥ်အရှေ့သို့ ရောက်သွားသည် ။

စုဝမ်၏ အနီရောင်ဝတ်စုံကို တိတ်တဆိတ်ကို ကြည့်နေရင်း စုရွေ့က သူ့မျက်လုံးကို ကျဥ်းမြောင်းကာ သူ၏ သုန်မှုန်နေသော မျက်နှာက တဖြည်းဖြည်း နူးညံ့သော အမူအရာမျိုး ဖြစ်လာသည် ။

" မင်းဒီဝတ်စုံကို ဝတ်ထားတာ အရမ်းလှတာပဲ ။"

အာ..သူက စိတ်ရောဂါထလာပြန်ပြီ ။

စုဝမ်က သူမ၏ ကိုယ်နေဟန်ထားကို ထိန်းထားပြီး စုရွေ့ကို ကြည့်လိုက်သည် ။

" ရှင် အရင်ကတည်းက သတိရနေတာ ကြာပြီမလား။"

" မဟုတ်ဘူး "

စုရွေ့ ခေါင်းခါလိုက်သည် ။ သူသာ အစောကတည်းက သတိရနေရင် ဒီနေ့ ၊ ဒီနေရာတွင် ရွှမ်းယွမ်ယယ်လည်း ရှိနေလိမ့်မည်မဟုတ်ပေ ။

" ဒါဆို ရှင်..."

" ကိုယ်မင်းကို အရင်ကတည်းက ပြောဖူးပါတယ်.."

စုရွေ့က စုဝမ်ကို စကားဖြတ်ပြောလိုက်ပြီး သူမရှေ့သို့ ပိုပြီးနီးကပ်လာ၏ ။

" ကိုယ်အရင်ကပြောဖူးပါတယ် ။ မင်းလက်ထပ်ချင်တဲ့ သူကဘယ်သူပဲ ဖြစ်နေပါစေ ၊ ကိုယ်က အဲ့လူကို ခုတ်ပိုင်းပြီး ခွေးကျွေးပစ်မှာ ။ရွှမ်းယွမ်ယယ်ကလည်း ခြွင်းချက်မဟုတ်ဘူး ။ "

" ဒါဆိုလည်း သူ့ကို သွားခုတ်ပိုင်းလိုက်တော့ ။ "

" မင်းက ကိုယ့်ကို အာရုံပြောင်းစေချင်တာလား။"

စုရွေ့က အရင်ကလိုပဲ စုဝမ်ကိုသာ ကြည့်နေ၏ ။ ထိုအချိန်တွင် စုဝမ် ရုတ်တရက် ထိုးဖောက်သိမြင်ခံနေရသည့် ခံစားချက်မျိုးကို ခံစားလိုက်ရသည်။

သူက ဘယ်လိုလုပ်ပြီး...

တင် ။ တင် ။

မက်ဆေ့ချ်ကို ပို့ဆောင်ပြီးပါပြီ ။

ဌာနချုပ်၏ မှတ်ဉာဏ်တုအသံက သူမခေါင်းထဲတွင် ထွက်ပေါ်လာ၏ ။

ယခုတွင် သူမက ဝိဉာဥ်ကူးပြောင်းနေသည့် ဖြစ်စဥ် ၌ကျရောက်နေသည်။

" စုဝမ် "

စုရွေ့၏ မျက်လုံးများက ရုတ်တရက်နီရဲလာပြီး သူက ရူးသွပ်စွာဖြင့် စုဝမ်ကို သူ့ရင်ခွင်ထဲသို့ ဆွဲသွင်းလိုက်သည် ။

" မင်းထွက်သွားတော့မှာလား ။ မင်းကို ထွက်သွားခွင့်မပြုဘူး ။ ကိုယ်မင်းဖို့ ထွက်သွားခွင့်မပြုဘူး ။"

သူမ ထွက်သွားတော့မည်ဆိုတာကို သူခံစားမိနေသည် ။

၎င်းက သူမ အန္တရာယ်သို့ကျရောက်နေသည့်နေ့က သူခံစားခဲ့ရသည့်အတိုင်းပဲ ဖြစ်သည် ။ ထို့ကြောင့် ချက်ချင်းပဲ သူ ရှင်းရှင်းသိလိုက်သည် ။ သူက ပွေ့ဖက်မှုကို အရမ်းတင်းကျပ်ထား၏။

ဒီနေ့လိုပဲ သူမကို သူဆုံးရှုံးရတော့မည်ဟု ခံစားခဲ့ရသည့် အတိုင်း ဖြစ်သည် ။ သူမက စုအိမ်တော်မှ ထွက်ခွာပြီး သတိုးသားအိမ်သို့ ပို့ဆောင်ခံရချိန်၌ သူသတိရလာ၏ ။

ယခုလိုပဲ သူမထွက်သွားတော့မည်ဟု သူခံစားနေရပြီး သူ့ကို ထာဝရ ခွဲခွာသွားတော့မည်ဟု ခံစားနေရသည် ။

သူမ အရှေ့ရှိလူငယ်လေးက သာမန်လူများတွင်မရှိသော အလွန်ကြောက်စရာကောင်းသည့် စိတ်ပိုင်းဆိုင်ရာထိုးထွင်းသိမြင်သည့်ဉာဏ်ကို ပိုင်ဆိုင်ထားလိမ့်မည်ဟု စုဝမ် မထင်ထားခဲ့ပေ ။

ဒါက အလားအလာရှိတဲ့ ပျိုးပင်ပဲ ။

သူမသာ သူ့ကို ဌာနချုပ်ဆီပြန်ခေါ်သွားနိုင်မယ်ဆိုရင်...ကျစ် ၊ ကျစ် ။

စုဝမ်အနည်းငယ် ဝမ်းနည်းနေမိသည် ။ အဘယ်ကြောင့်ဆိုလျှင် သူမ၏ ခန္ဓာကိုယ်က စတင်ပို့ဆောင်ခံနေရပြီ ဖြစ်၏ ။

စုရွေ့က သူ့မျက်စိရှေ့ရှိ ထိတ်လန်စရာကောင်းသော မြင်ကွင်းနှင့်ပက်သက်၍ ဘာမှ မခံစားမိပေ ။ သူက ခေါင်းမာစွာနှင့် စုဝမ်၏ ခန္ဓာကိုယ် နောက်ဆုံးအစိတ်အပိုင်းက ပျောက်ကွယ်သွားသည်အထိ သူမကို ပွေ့ဖက်ထားခဲ့သည်။

ပွေ့ဖက်မှု ၊ လစ်ဟာမှု ။

သူမက သူ့ကို ဆက်ပြီးထားသွားလိမ့်မည်ဟု မမျှော့်လင့်ထားမိပေ ။

ထင်ထားတဲ့အတိုင်း သူမက တကယ်ကို နှလုံးသားမရှိတဲ့ အမျိုးသမီးပဲ ။

စုရွေ့၏ အကြည့်တို့က တဖြည်းဖြည်း ပိုလို့ မှောင်မည်းလာပြီး နက်ရှိုင်းသော အမှောင်ထုက လွန်ကဲသော စွဲလမ်းမှုများလည်း ပါဝင်နေလေသည် ။

🚩Arc 1 မင်းသမီးအစားထိုး ထိမ်းမြားလက်ထပ်ခြင်း

END 🚩Ch -16