MM Story Teller

Chapter 15

Viewers 11k

🚩Ch -15

Arc 1.15 မင်းသမီးအစားထိုးထိမ်းမြားလက်ထပ်ခြင်း

မြို့တော် အမဲလိုက်ကွင်းအပြင်ဘက်ရှိ တိုက်ပွဲခေါ်သံက တဖြည်းဖြည်း တိုးသွားလျက် ၊

ထိုနေရာတွင် တစ်မြို့တော်လုံးကို လင်းထိန်စေသည့် မီးကသာ ပိုကြီးလာသည် ။

ရွှမ်းယွမ်ချင်းက ခန်းမထဲတွင် ခြေလှမ်းကျယ်ကျယ်ဖြင့် နန်းတော်ပလ္လင်ရှိရာသို့ တစ်လှမ်းချင်း လျှောက်သွား၏ ။ သူက စုဝမ်ဘေးမှ ဖြတ်သွားချိန်တွင် သူက ခဏတန့်သွားသော်လည်း ထို့နောက်တွင် အပြုံးဖြင့် ဆက်လျှောက်သွားလိုက်သည် ။

ပလ္လင်ပေါ်တွင် ထိုင်နေသော ရွှမ်းယွမ်ဖော်က သူဘယ်တုန်းကမှ မချစ်ခင်ဖူးသော မင်းသား ( ၅ )ကို သေချာကြည့်လိုက်သည် ။ အချိန်အကြာကြီး တိတ်ဆိတ်နေပြီးနောက်တွင် သူက ဖြည်းဖြည်းချင်းပဲ စကားစပြောလိုက်သည် ။

" ဒီထိုင်ခုံနေရာအတွက် ၊ မင်းရဲ့ ဖခမည်းတော်ကို ပြန်သတ်တော့မှာလား ။ "

" ဖခမည်းတော် "

ရွှမ်းယွမ်ချင်းက သူ့ခြေလှမ်းများကို ရပ်လိုက်ပြီး ရွှမ်းယွမ်ဖော်ကို လှောင်ရယ်နေသော မျက်နှာပေးဖြင့် ကြည့်လိုက်သည် ။

" ခင်ဗျားက ကျွန်တော့် ခေါင်းကိုဖြတ်ဖို့ကိုတောင် အေးအေးဆေးဆေးနဲ့ ခွင့်ပြုပေးလိုက်နိုင်မှာတော့ ကျွန်တော်ကရော ခင်ဗျားတို ဘာလို့ မသတ်နိုင်ရမှာလဲ ။ ခင်ဗျား ကျွန်တော်ကို့ သတ်ခိုင်းတုန်းက ကျွန်တော်တို့ရဲ့ သားအဖဆက်ဆံရေးကိုရော ခင်ဗျားနည်းနည်းလေးဖြစ်ဖြစ် ဂရုစိုက်ခဲ့လို့လား ။ "

ရွှမ်းယွမ်ဖော်က ဘာစကားမှ မပြောပေ ။ သူက ယခင်က အတိုင်းသာ ရွှမ်းယွမ်ရွေ့ကို ဆက်ကြည့်နေ၏ ။ ယခုတွင် သူက နှလုံးသားထဲ၌ သူ့ကိုလာကယ်မည့် တစ်စုံတစ်ယောက်ကို မျှော်လင့်နေမိသည် ။ အဆုံးတွင်တော့ မြို့တော်အပြင်ဘက်၌ တိုက်ခိုက်မည့် စစ်သားများရှိနေဆဲ ဖြစ်သည် ။ ရွမ်းယွမ်ချင်းက သူတစ်ယောက်တည်း၏ အင်အားနှင့် မည်သည့်အုံကြွမှုမှမရှိဘဲ တစ်ချီတည်းနှင့် မြို့တော်ကို ကျဆုံးအောင်လုပ်နိုင်လိမ့်မည်ဟုတော့ ရွှမ်းယွမ်ဖော် မထင်ပေ ။

" ဖခမည်းတော် ၊ ဘာလို့ စကားထပ်မပြောတော့တာလဲ ။ ဘာကို စောင့်နေသေးတာလဲ ။ ကာကွယ်ရေးစစ်သားတွေကိုလား ။ ဒါမှမဟုတ် ခင်ဗျားရဲ့ တော်ဝင်အရိပ်တပ်သားတွေကိုလား ။ "

ဤအထိပြောပြီးနောက် ရွှမ်းယွမ်ချင်းက ရုတ်တရက် မျက်လုံးပင့်ကာ တော်ဝင်ထီးနန်းဘေးတွင် အမြဲစောင့်ကြပ်နေသည့် အထိန်းတော်ချုပ်ကို ကြည့်လိုက်သည် ။

" ခင်ဗျားပြန်ဖြေဖို့ အထိန်းတော်ချုပ် အန်းဖျင်ကိုပဲ အမြင်မှန်ရအောင်လုပ်ခိုင်းလိုက်ရင်ကောင်းမလား ။"

အန်းဖျင် ။

ရွှမ်းယွမ်ဖော်က ဘေးတွင်ရပ်နေသော အန်းဖျင်ကို စူးရှစွာ ကြည့်လိုက်သည် ။ အမြဲတမ်း နှိမ့်ချပြီးနေတတ်သော အန်းဖျင်က အခုချိန်တွင်တော့ သူ့ကိုယ်သူ ထပ်ပြီး ဖုံးကွယ်မထားတော့ပေ ။ သူက ချက်ချင်းပဲ အလျင်အမြန် လျှောက်သွားပြီး ရွှမ်းယွမ်ချင်း၏ ခြေရင်း၌ ဒူးထောက်လိုက်သည် ။

" အရှင်မင်းမြတ် ၊ ဒါက တော်ဝင်မိသားစုရဲ့ ကာကွယ်ရေးစစ်သားတွေနဲ့ လျှို့ဝှက်တပ်ဖွဲ့တွေကို အသုံးပြုနိုင်တဲ့ ကျားတံဆိပ်အမှတ်အသားပါ ။ "

" အန်းဖျင် ။ အဲ့ဒါက မင်းဖြစ်နေတာပဲ ။ "

ဤအချိန်တွင် သူအယုံကြည်ရဆုံးလူထံမှ အမြဲတမ်းသစ္စာဖောက်ခံနေရတာကို ရွှမ်းယွမ်ဖော် နားလည်သွား၏ ။ သူ၏ စိတ်ခံစားချက်များက မြင့်တက်လာသောကြောင့် အဆိပ်က သူ့နှလုံးကို တိုက်ခိုက်ပြီး ရုတ်တရက် သူ့ပါးစပ်ထဲမှ တစ်ဆင့် အနက်ရောင်သွေးများ အန်ထွက်လာသည် ။

အတိတ်ဘဝတွင်လည်း ရွှမ်းယွမ်ချင်းက မျက်နှာသာပေးခြင်းမခံရသော မင်းသား (၅)ပဲ ဖြစ်သော်ငြား အဆုံးတွင် ထီးနန်းကို ရယူနိုင်ခဲ့သည် ။ သူ၏ ထိန်းချုပ်နိုင်မှု ၊ ပညာရှိမှုများအပြင် သူက ပြင်ပ တပ်ဖွဲ့အင်အားများထံမှလည်း အထောက်အပံ့အများကြီး ရထား၏ ။ ထို့နောက် လက်ရှိ နန်းတော်အလယ်တွင်ရှိနေသော အကောင်းဆုံးအထောက်အပံ့ဖြစ်သည့် အန်းဖျင်က အတွင်း နှင့် အပြင်၌ တိုက်ခိုက်ဖို့ကို ညွှန်ပြပေးသည် ။

အတိတ်ဘဝတွင် ရွှမ်းယွမ်ရွေ့၏ ဘက်တော်သားများက အစောကတည်းက အာဏာကျဆင်းသွားသည့်အတွက်ကြောင့် အန်းဖျင်က ရွှမ်းယွမ်ချင်း၏လူဆိုတာကို ယဲ့ကျီးဟွာက မသိလိုက်ပေ ။ သို့သော် ဤကိစ္စနှင့်စပ်လျဥ်း၍ စုဝမ်က အလွန်ကို သေချာနေ၏။

၎င်းက တော်ဝင်မြို့တော်တွင် အကြီးဆုံးသစ္စာဖောက်မှုဖြစ်ပြီးတစ်ဖက်ကိုပါ မျှော်လင့်ချက်ပျက်သုဥ်းစေသည် ။

လောလောဆယ်တွင် ခန်းမထဲရှိ လေထုက ပိုပြီး ထူးဆန်းလာ၏ ။ ၎င်းမှာ ရွှမ်းယွမ်ချင်းက ကြောက်စရာကောင်းနေပြီး သူဘယ်လောက်သွေးအေးသလဲဆိုတာကို ဘယ်သူမှ မသိရပေ ။ ရုတ်တရက် သူက အနောက်တွင်ရပ်နေသော အစောင့်လက်ထဲမှ ဓါးကို ဆွဲထုတ်လိုက်ပြီး တစ်လှမ်းချင်းလှမ်းသွားရင်း ထက်ရှသော ဓါးက ရွှမ်းယွမ်ဖော်၏ ရင်ဘက်ကို ချိန်ရွယ်ထားသည် ။

ရွှမ်းယွမ်ဖော်က နှစ်ပေါင်းများစွာကြာအောင် အုပ်ချုပ်ခဲ့ပြီး တသီးတခြားနေရတာကို သဘောကျသော်လည်း ယခုအချိန်တွင်တော့ သူ့အသက်ကို ခြိမ်းခြောက်ခံနေရသည် ။ သူ စတင် ထိတ်လန့်ကြောက်ရွံ့လာမိသည် ။

" ချင်းအာ ၊ခမည်း..ခမည်းတော်က ထီးနန်း...ပေးနိုင် "

နောက်ဆုံးစကားကို မပြောလိုက်နိုင်ခင် ရွှမ်းယွမ်ချင်း၏ ဓါးက ရွှမ်းယွမ်ဖော်၏ ခန္ဓာကိုယ်ကို ထိုးစိုက်သွား၏ ။

သူပုန်ကန်မည့်လမ်းကို လျှောက်လိုက်ကတည်းက ရွှမ်းယွမ်ချင်းက တရားမျှတမှုကို ရှာမနေတော့ပေ ။ သို့သော် ဤညတွင်တော့ အားလုံး၏ နှလုံးသားထဲ ၌အမှတ်အသားတစ်ခုကို သူချန်ရစ်ရလိမ့်မည် ။အားလုံးက သူ့ကို ရိုသေလေးစားတာမျိုးပဲ သူလိုချင်သည် ။

" ဖခမည်းတော် ၊ ကောင်းမွန်သော ခရီးဖြစ်ပါစေ ။"

သွေးများစွန်းထင်းနေသော ဓါးကို ပြန်နှုတ်ယူရင်း ရွှမ်းယွမ်ချင်းက ဆက်ပြုံးနေ၏ ။

" တစ်ခြားဘယ်သူရှိသေးလဲ ။ "

ရွှမ်းယွမ်ချင်းက ဓါးကို တရွတ်တိုက်ဆွဲသွားပြီး ပလ္လင်မှ တစ်ဆင့် သွေးများက တစ်စက်ချင်း ကျနေ၏ ။ သူက အခုနကအတိုင်းပဲ ဆက်ပြုံးနေပြီး ပင်မခန်းမထဲရှိ လူများကို ကြည့်လိုက်သည် ။

" အရင်ဧကရာဇ်ဟောင်းနဲ့ အဖော်ပြုပေးဖို့ ဘယ်သူဆန္ဒရှိသေးလဲ ။ ကိုယ်တော်က သူ့ကို အနိုင်ရသွားပြီ"

မျှော်လင့်ထားသည့်အတိုင်းပင် မူလဇာတ်လိုက်၌ ပို၍ ပိုင်စိုးပိုင်နင်းအငွေ့အသက်မျိုးရှိနေ၏ ။ စုဝမ်က အခြေအနေကို အခွင့်ကောင်းယူကာ သူမကိုယ်ကိုစောင်းပြီး လူအုပ်ကြားထဲရှိ ရွှမ်းယွမ်ရွေ့ကို ကြည့်လိုက်သည် ။ ဤအချိန်တွင် သူ့မျက်နှာက မဖော်ပြနိုင်လောက်အောင် ကြည့်ရဆိုးသွား၏ ။

ရွှမ်းယွမ်ချင်း၏ အသံထွက်လာချိန်တွင် နောက်ဆုံးတော့ ခန်းမထဲသို့ တစ်ဟုန်ထိုးဝင်ရောက်လာသော ပုံသဏ္ဍာန်အနည်းငယ်ကို တွေ့လိုက်ရသည် ။ ထိုလူများထဲမှ တစ်ယောက်က စုယွီဖုန်း ဖြစ်၏ ။

" အရှက်မရှိ ပုန်ကန်တဲ့ကောင် ။ အခုထိ သေဖို့ကို လက်သင့်မခံသေးဘူးလား ။ "

ပြောက်ကျားတပ်သားအချို့နှင့် စုယွီဖုန်း ဦးဆောင်သော သစ္စာရှိ ဗိုလ်ချုပ်များက အဆိပ်ကို အင်တိုက်အားတိုက်ဖိနှိပ်ပြီး ရွှမ်းယွမ်ချင်း ရှိရာသို့ ဝင်ရောက်လာ၏ ။ ရွှမ်းယွမ်ချင်းက ဓါးကို မြှောက်ကာ ခြွင်းချက်မရှိ အားလုံးကို သိမ်းကျုံးတိုက်ခိုက်သွားပြီး ဗိုလ်ချုပ်များက မြေပေါ်သို့ လဲကျကုန်သည် ။

သူတို့၏ ထိန်းချုပ်မထားနိုင်သော ဒေါသထွက်နေသည့် ပုံစံကိုကြည့်ရင်း ရွှမ်းယွမ်ချင်းက ပလ္လင်ပေါ်ရှိ ရွှမ်းယွမ်ဖော်၏ အလောင်းကို ကန်ချကာ မည်သူမှရှိမနေသည့်အတိုင်း ထိုပလ္လင်တွင် ထိုင်နေလိုက်သည်။သူက ချင့်ချိန်စဥ်းစားရင်း အားလုံးကို အပေါ်စီးမှကြည့်နေပြီး နောက်ဆုံးတွင် သူ့အကြည့်တို့က စုဝမ်ကိုယ်ပေါ်သို့ ကျရောက်သွား၏ ။

" စုဝမ်ပြောင်မေ့ ၊ မင်းရဲ့ ဒီအဆိပ်က တကယ်ကို ပြင်းတာပဲ ။ "

စုဝမ်က ရွှမ်းယွမ်ချင်းကို ကြည့်နေပြီး မယုံကြည်နိုင်စွာဖြင့် သူမကိုကြည့်နေသော အားလုံးရှေ့မှောက်မှာပဲ စုဝမ်က ထရပ်လိုက်သည် ။

" အဆိပ်က ဘယ်လောက်ပဲ ပျင်းနေပါစေ အထိန်းတော်အန်းရဲ့ အကူအညီသာ မပါခဲ့ရင် အဲ့ဒါက ဘာမှအသုံးဝင်မှာ မဟုတ်ပါဘူး ။ "

" ရှောင်ဝမ် "

မြေပြင်ပေါ်တွင်လဲနေသော စုယွီဖုန်းနှင့် သိပ်မဝေးသောနေရာတွင် ထိုင်နေသော သမားတော်စီးက စုဝမ်ကို အော်လိုက်ပြီး သူတို့အသံထဲတွင် တုန်ရီမှုများ ပါဝင်နေ၏ ။

သူ့သမီးက ပုန်ကန်သည့်သူနှင့် ပူးပေါင်းနေလိမ့်မည်ဟု စုယွီဖုန်းက မယုံကြည်နိုင်သလို သမားတော်စီး၏ အကြည့်တို့ကလည်း စုဝမ်အပေါ်တွင်သာ လုံးဝ အာရုံစိုက်ထားသည် ။ဤကဲ့သို့ ရှုပ်ထွေးသော အမူအရာမျိုးက သူမကို သူကတိတ်တဆိတ်မေးခွန်းထုတ်နေပြီး ပြစ်တင်ရှုတ်ချနေပုံရသည် ။

" လောလောဆယ် ၊ ကျွန်မလက်ထဲမှာ ကိုင်ထားတာက ဖြေဆေးပဲ ။ "

စုဝမ်က စုယွီဖုန်း နှင့် သမားတော်စီး၏ အကြည့်တို့ကို လုံးဝလျစ်လျူရှူထားသည် ။ သူမက လက်ရှိ ရှိနေသောသူများကို အမှုမထားသလိုသာ ကြည့်လိုက်သည် ။

" ရှင်တို့အားလုံး အရှင်မင်းမြတ်ကို လိုလိုလားလား သစ္စာခံပေးတာနဲ့ ရှင်တို့ ဖြေဆေးရနိုင်ပြီး ရာထူးပါ တိုးနိုင်သေးတယ် ။ တကယ်လို့ ရှင်တို့က ဘယ်ဘက်မှာ ရပ်တည်မလဲဆိုတာ မထုတ်ဖော်ချင်ဘူးဆိုရင် ရှင်တို့အားလုံး သစ္စာရှိရှိနဲ့ အရှင်မင်းမြတ်ကို ဦးညွှတ်နိုင်အောင် ကျွန်မက ရှင်တို့ကို မြေအောက်ထဲရောက်အောင် ပို့ပေးလို့ရတယ် ။ "

စုဝမ်၏ ဤအသံထွက်လာတာနှင့် ခန်းမထဲရှိ လေထုက လုံးဝပြောင်းလဲသွားသည် ။

ရွှမ်းယွမ်ချင်းရဲ့ ပုန်ကန်မှုကလည်း ထင်ထင်ရှားရှားကို အောင်မြင်သွားပြီး အရှင်မင်းကြီးကလည်း နတ်ရွာစံသွားပြီ ။ သူတို့ ဘာများလုပ်နိုင်အုန်းမှာလဲ ။

သေရမှာ မကြောက်တဲ့ တစ်စုံတစ်ယောက်ကများ သစ္စာရှိတဲ့အရာရှိဆက်လုပ်မှာလား ။ ဒါမှမဟုတ်...

ခန်းမထဲတွင် အချို့လူများက တွန့်ဆုတ်နေချိန်၌ အချို့လူများက နှလုံးခုန်မြန်နေသော်လည်း ဘယ်သူကမှတော့ စကားစပြောဖို့မဝံ့ရဲကြပေ ။

" ရှင်တို့ စဥ်းစားဖို့ အမွှေးတိုင်တစ်ဝက်စာပဲ အချိန်ရမယ် ။ "

စုဝမ်က သူမလက်ကို ဝှေ့ယမ်းလိုက်ပြီး အန်းဖျင်က ချက်ချင်းပဲ အမွှေးတိုင်ထွန်းညှိလိုက်သည် ။

သူတို့က ဖိအားပေးခံနေရသော်လည်း မည်သူကမှတော့ ထမရပ်ရဲကြပေ ။ အချိန်က တဖြည်းဖြည်းလျော့နည်းလာပြီး နောက်ဆုံးတွင် ဆက်သည်းမခံနိုင်သော တစ်စုံတစ်ယောက်က ရွမ်းယွမ်ချင်း၏ ဘက်တော်သားအဖြစ် သစ္စာခံဖို့ ထရပ်လိုက်သည် ။ပထမလူပေါ်လာပြီးတာနှင့် ဒုတိယတစ်ယောက်လည်း ရှိလာ၏ ။ မျက်စိတစ်မှိတ်စာအတွင်း ခန်းမထဲရှိ လူတစ်ဝက်လောက် ဒူးထောက်နေကြပြီး ဤအချိန်တွင် အမွှေးတိုင်ကလည်း လောင်ကျွမ်းသွားသည် ။

" ဘယ်သူရှိသေးလဲ "

စုဝမ် နောက်တစ်ခါ လှည့်ပတ်ကြည့်လိုက်ပြီး သူမအကြည့်များက ကျန်ရှိနေသောသူများအပေါ်တွင် ရပ်သွား၏ ။

ရွမ်းယွမ်ချင်း၏ ညီအစ်ကို နှင့် တော်ဝင်မိသားစုများမှလွဲ၍ ကျန်သောသူများမှာ တကယ်အစစ်အမှန်သစ္စာရှိကြသည့် အရာရှိများဖြစ်သည် ။

"ဒါက ဒီလိုပဲ ဖြစ်သင့်တာမလား ။ "

စုဝမ်က ခေါင်းလှည့်ပြီး ရွှမ်းယွမ်ချင်းကို ကြည့်လိုက်သည် ။ ရွှမ်းယွမ်ချင်းက ခေါင်းညိတ်ပြလိုက်၏ ။

" ရှင်တို့ အားလုံး နောက်ဆုံးအခွင့်အရေးကို ဆုံးရှုံးလိုက်ရပြီ ။ "

စုဝမ်က နောက်ဆုံးစကားကို သူမကိုယ်တိုင်ရေရွတ်လိုက်သည် ။ ထို့နောက်တွင် သူမက လက်ထဲရှိ ဆေးပုလင်းကို ဖွင့်ပြီး ဒူးထောက်လာကြသော သူများ၏လက်ထဲကို ဖြေဆေးထည့်ပေးလိုက်သည်။ ထိုအရာရှိများ နှင့် သူတို့၏မိသားစုများက သူမကို စိတ်အားထက်သန်စွာ ကျေးဇူးတင်လိုက်ပြီး ဖြေဆေးကို တခါတည်း မြိုချလိုက်ကြသည် ။

စုဝမ်၏ နှုတ်ခမ်းက နောက်ဆုံးတွင် အနည်းငယ်ပြုံးကာ မြင့်တက်သွားပြီး ထိုအပြုံးက သူမ၏ လှုပ်ရှားမှုအားလုံးကို အာရုံစိုက်နေသော သမားတော်စီးထံ၌ မှတ်ယူခံလိုက်ရသည် ။ သမားတော်စီးက အသက်ပြင်းပြင်းရှူလိုက်ပြီး အံ့အားသင့်စရာကောင်းသည့်အမူအရာက ပေါ်လာ၏ ။

ဒီအနံ့က...

ရွှမ်းယွမ်ဖော်ကို သတ်ကာ ဧကရာဇ်ဘွဲ့ကို ရယူပြီးနောက်တွင် အရာရှိတစ်ဝက်လောက်ကို သူနှိမ်နင်းလိုက်သည် ။ လောလောဆယ်တွင် ရွှမ်ယွမ်ချင်း၏ စိတ်အခြေအနေက အလွန်ကောင်းနေ၏ ။ သူက ပြုံးလျက် ခန်းမထဲရှိ အရှုံးကိုဝန်ခံဖို့ ငြင်းဆန်နေသောသူများကို ကြည့်လိုက်သည် ။ ထိုလူများထဲ၌ သူ့ညီအစ်ကိုတော်များလည်း ပါနေ၏ ။

ဤလူအနည်းစုကလည်း ပါးနပ်သည် ။ ဘာပဲဖြစ်နေနေ ရွှမ်းယွမ်ရွေ့က သူတို့ကို လွှတ်ပေးမှာမဟုတ်တာကို သိနေသည် ။ ထို့ကြောင့် ဤအချိန်တွင် အားလုံးက သူတို့မူလနေရာတွင်သာ အကျည်းတန်စွာထိုင်နေရင်း ရွှမ်းယွမ်ချင်းကို မျက်နှာချင်းဆိုင်ကြည့်နေကြသည် ။

" မင်းတို့က ဒီကိုယ်တော်ကို ခစားဖို့ မလိုလားဘူးဆိုမှတော့ ၊ ကိုယ်တော်က ဖိအားပေးပြီး..."

" ခဏလေးစောင့်ပါအုန်း ။ "

ရွှမ်းယွမ်ချင်းက တော်ဝင်အစောင့်များအား အမိန့်ပေးတော့မှာကို တွေ့လိုက်ရသောအခါ ရုတ်တရက် အသံတစ်ခုက သူ့ကို နှောင့်ယှက်လိုက်သည် ။

သမားတော်စီးက တုန်ရီစွာဖြင့် ထရပ်လိုက်သည် ။ သူက ရွှမ်းယွမ်ချင်းကို စကားပြောနေသော်လည်း သူ၏ မျက်လုံးများကတော့ စုဝမ်ကိုသာ တည့်တည့်ကြည့်နေ၏ ။

" မင်းသား (၅) ၊ ကျွန်တော် ကျွင်းကျူကို မေးခွန်းတစ်ခုလောက်မေးလို့ရမလား ။ "

သမားတော်စီးက သူ့ကို ဘယ်လိုခေါ်သလဲဆိုတာကို ရွှမ်းယွမ်ချင်းက ဂရုမစိုက်ပေ ။ တကယ်တမ်းကျ သူလည်း သမားတော်စီး၏အသက်ကို အမှန်တကယ်မလိုချင်ပေ ။ သမားတော်စီးက အရည်အချင်းရှိသောသူဖြစ်ပြီး စုဝမ်ပေါ်တွင်လည်း နက်ရှိုင်းသော ခံစားချက်ရှိသည် ။ သူက စွန့်စားရမည့်သူဖြစ်နိုင်ပြီး သူ့ကို အသနားခံခိုင်းဖို့လည်း ဖိအားပေးလို့ ရနိုင်သည် ။

" လူကြီးမင်း စီး ၊ စိတ်တိုင်းကြသာလုပ်ပါ ။ "

စုဝမ်ကို သမားတော်စီးက ဘာမေးမလဲဆိုတာ ရွှမ်းယွမ်ချင်းက ခန့်မှန်းမိပြီးသားဖြစ်သည် ။ တကယ်တမ်းတွင် သမားတော်စီးကို စုဝမ်ဘယ်လိုပြန်ဖြေမလဲဆိုတာ သူလည်း သိချင်မိသည် ။

သူ့ကို သစ္စာခံဖို့ သူမက သမားတော်စီးကို သိမ်းသွင်းနိုင်မလား ။ မသိမ်းသွင်းနိုင်ဘူးလား ။

တစ်လှမ်းပြီးတစ်လှမ်း သမားတော်စီးက စုဝမ်ဆီသို့ လျှောက်သွားပြီး သူမ ရှေ့၌ ရပ်လိုက်သည် ။ သူမ၏ မျက်လုံးများကို တည့်တည့်ကြည့်ရင်း လူနှစ်ယောက် ခဏကြာအောင် တစ်ယောက်ကို တစ်ယောက်ကြည့်နေ၏ ။

သူ့ရှေ့တွင် ရပ်နေသော စုဝမ်က အချိန်အတော်ကြာအောင် မလှုပ်ရှားဘဲ ဒီတိုင်းရပ်နေရသဖြင့် သူမပုခုံးများကို ဖွဖွလေးပွတ်သပ်လိုက်ချိန်တွင် သမားတော်စီးလည်း စကားစပြောလိုက်သည် ။

" ရှောင်ဝမ် ၊ မင်းသား(၅)ကို ပုန်ကန်ဖို့ ထောက်ပံ့ပေးတာက စိတ်ဆန္ဒအလျောက်လား ။ "

သမားတော်စီး၏ စကားကို ကြားရသောအခါ စုဝမ်က သမားတော်စီးကို တစ်ချက်ကြည့်လိုက်ပြီး ၊ ထို့နောက်တွင် တစ်ဖက်၌ ပါးစပ်တွင် သွေးများပေနေပြီး လဲကျနေသော စုယွီဖုန်းကို ကြည့်လိုက်သည်။

" သေချာတာပေါ့ ။ အဲ့ဒါက.."

စုဝမ်၏ အသံက ခဏရပ်တန့်သွားပြီးနောက် အသံကျယ်ကျယ်ဖြင့် ပြန်ဖြေလိုက်သည် ။

" စိတ်ပါလို့ မဟုတ်ဘူး ။ "

" စုဝမ် "

နဂါးပုလ္လင်ပေါ်ရှိ ရွှမ်းယွမ်ချင်းက စုဝမ်ကို ထိတ်လန့်စရာကောင်းသော အမူအရာဖြင့် ကြည့်နေ၏ ။ စုဝမ် စကားနောက်ကွယ်မှ အဓိပ္ပါယ်ကို သူစဥ်းစားနေမိသည် ။ ကြီးမားသောအုပ်စုဖြင့်ဖွဲ့စည်းထားသော လက်ရွေးစင် တပ်ဖွဲ့များက ရုတ်တရက် ပင်မခန်းမထဲသို့ တစ်ဟုန်ထိုး ဝင်ရောက်လာပြီး ရွှမ်းယွမ်ချင်း၏ အဖွဲ့များကို ဝိုင်းထားလိုက်သည် ။

" ရွှမ်းယွမ်ချင်း ၊ မင်းက ပုန်ကန်ပြီး မင်းအဖေကို ပြန်သတ်ခဲ့တယ် ။ ပြီးတော့ လူတိုင်းကိုလည်း အသေခံခိုင်းတယ် ။ "

လူအုပ်ကြားထဲတွင် မကျယ်လောင်သော အသံကထွက်လာပြီး အားလုံး၏ ဖော်မပြနိုင်လောက်သော အံ့အားသင့်နေသည့်အကြည့်များရှေ့တွင် အမြဲတမ်း ဒိုင်လျှိုသာ နေတတ်သော မင်းသား (၄) ရွှမ်းယွမ်ယယ်က တည်ငြိမ်သောအမူအရာနှင့်သာ ထွက်ပေါ်လာ၏ ။

ဒါက...

ရွှမ်းယွမ်ချင်း ထိတ်လန့်သွားသည့်အချိန်မှာပဲ မမျှော်လင့်ထားသော အခြေအနေက ဖြစ်ပွားလာ၏ ။ ဖြေဆေးကို စားလိုက်သော အရာရှိများ၏ သွင်ပြင်က ခရမ်းရောင်ပြောင်းကာ ပါးစပ်ထဲတွင် အမြှုပ်များထလာပြီး တစ်ယောက်ပြီးတစ်ယောက် လဲကျကုန်သည် ။

ဤသို့အလှည့်အပြောင်းမျိုးက လက်ခံဖို့မလွယ်ကူပေ ။

သမားတော်စီးက စုဝမ်ကို ကြည့်လိုက်ပြီးနောက် သူမဆုပ်ကိုင်ထားသော ဆေးပုလင်းကို ကြည့်လိုက်သည် ။

" ဆေးပုလင်းထဲမှာ ပါတာက အရမ်းပြင်းတဲ့ အဆိပ်ပဲ ။ ကိုယ်ပြောတာဟုတ်တယ်မလား ။ "

စုဝမ်က အပြုံးနှင့်သာ ပြန်ဖြေလိုက်သည် ။

အဲ့ဒါအမှန်ပဲ ။ သူမလက်ထဲမှာ ကိုင်ထားတာက အဆိပ်တွေ ။

စုဝမ်က တကယ်တမ်းတွင် ဖြေဆေးကို လောင်ကျွမ်းသွားသော နံ့သာတိုင်၏ အမွှေးနံ့၌ မြှုပ်နှံထားတာဖြစ်သည် ။

" စုဝမ် "

ရွှမ်းယွမ်ချင်းက အမုန်းများပြည့်နေသော အကြည့်ဖြင့် စုဝမ်ကို ကြည့်လိုက်သည် ။ အခုချိန်ထိ သူ မယုံကြည်နိုင်သေးပေ ။

သူက တကယ်ကို အားနည်းပြီး အထိအခိုက်တောင်မခံနိုင်တဲ့ စုဝမ်ဆီမှာ ကစားခံလိုက်ရတာပဲ ။

စုဝမ်က ရိုးသားသော အမူအရာဖြင့်သာ ရွှမ်းယွမ်ချင်း၏ အကြည့်ကို ကြိုဆိုလျက်ရှိသည် ။

" မင်းသား (၅) ၊ ရှင်က စုရွေ့ရဲ့ အသက်ကို သုံးပြီး ကျွန်မကို ခြိမ်းခြောက်ခဲ့တယ် ။ ရှင့်နဲ့ အပေးအယူလုပ်ဖို့ ကျွန်မဖိအားပေးခံရပေမဲ့ ရှင်က တကယ်ပဲ အရှင်မင်းကြီးကို သတ်ပစ်လိမ့်မယ်လို့ ကျွန်မ မထင်ထားခဲ့ဘူး ။ ရှင်က တကယ်ကို ကြောက်စရာကောင်းတာပဲ ။ ရှင်သာ အရှင်မင်းကြီးကို ထိခိုက်စေလိုမှန်း ကျွန်မ အစောကြီးကတည်းကသိရင် ကျွန်မ အသေပဲခံလိူက်ပြီး ရှင့်နဲ့ သဘောတူပေးမှာမဟုတ်ဘူး ။ "

ဤစကားအနည်းငယ်ဖြင့် စုဝမ်က အရင်းဆုံး သူမကိုယ်သူမ ဤအခြေအနေမှ ဖယ်ထုတ်လိုက်သည် ။ အခြားသူများက သူမကို ယုံသည်ဖြစ်စေ ၊ မယုံသည်ဖြစ်စေ သူမကိုယ်သူမ ယုံကြည်နေသ၍ ကိစ္စမရှိပေ။

ထင်ထားတဲ့အတိုင်းပဲ...

စုဝမ်၏ ဆင်ခြေကို ကြားလိုက်သောအခါ ရွှမ်းယွမ်ချင်း နှလုံးသားက အေးစက်သွားရသည် ။

စုဝမ်က သူ့ကို အမြဲတမ်း အကွက်ချနေခဲ့တာပဲ ။ စုဝမ်ရဲ့ ဘက်တော်သားအစစ်က...

" အစ်ကိုတော် ၄ ၊ ခင်ဗျားက တကယ် ကိုယ့်ကိုယ်ကို ကောင်းကောင်းဖုံးကွယ်ထားနိုင်တာပဲ ။ "

ရွှမ်းယွမ်ချင်းက စုဝမ် နှင့် ရွှမ်းယွမ်ယယ်ကို လှည့်ကြည့်ရင်း သူ၏ စူးရှသောအကြည့်တို့က မှေးမှိန်သွား၏ ။

" ငါရှုံးသွားပြီ ။ ငါဝန်ခံတယ် ။ "

.....

🚩

Prev Next