MM Story Teller

Chapter 158

Viewers 32k

🌍Chapter 158

ထန်မော့မှာ ကြက်သိုက်၏ အသုံးပြုပုံကိုမြင်သော် အသက်ကိုပြင်းပြင်းရှူလိုက်လေသည်။ ထို့နောက် သူသည် အကူပစ္စည်းများကို သိုလှောင်၍မရဆိုသည့် ကန့်သတ်ချက်ကိုမြင်ပါမှ ပြန်လည်တည်ငြိမ်သွားခဲ့သည်။ ထန်မော့မှာ ဖူ၀မ်သော်သည် သူ့ထက်ပို၍လျှင်မြန်စွာ ကြက်သိုက်အကြောင်းကို သိပြီးဖြစ်ကြောင်းတွေ့သော် မေးလိုက်သည်။

"အသုံးပြုပုံကဘာလဲ"

သူတို့၂ဦးမှာ အသင်းဖော်များဖြစ်ကာ ရရှိလာသော အကူပစ္စည်းများ၏ အသုံးပြုပုံကို မျှဝေသည်က ပုံမှန်ပင်။

ဖူ၀မ်သော်ကဆိုသည်။

"မတူတဲ့ ပစ္စည်း၄မျိုးကိုသိမ်းလို့ရတယ် အကူပစ္စည်းတွေတော့မပါဘူး...ကြည့်ရတာ လူတိုင်းရဲ့ ကြက်သိုက်တွေကမတူသလိုပဲ...မင်းရော"

ထန်မော့ကခေါင်းညိတ်သည်။

"အင်း...ကျွန်တော့်ဟာက ပစ္စည်း၃ခုပဲသိမ်းလို့ရတယ်...စူပါမားကတ်မှာတုန်းက ရှောင်ကျီထုံးရဲ့ကြက်သိုက်က ကျွန်တော့်ဟာထက်ပိုသေးတာကိုတွေ့ခဲ့တယ်..ခင်များက ၄ခုသိမ်းလို့ရပေမယ့် ကျွန်တော်ကျတော့ ၃ခုတည်း...ရှောင်ကျီထုံးနဲ့ နင်နင်းတို့ရဲ့ ကြက်သိုက်တွေကပိုသေးတော့ သူတို့သိမ်းလို့ရတာလည်း ပိုနည်းမှာပဲ... ကျွန်တော်တို့ရဲ့အကူပစ္စည်းတွေကတူပေမယ့် အဆင့်တွေမတူဘူး...အဆင့်မြင့်တာနဲ့ နိမ့်တာနဲ့ပဲကွာတယ်...ဒါကြောင့် သိမ်းနိုင်တဲ့ ပစ္စည်းအရေအတွက်လည်း ကွာတာပဲ"

ဖူ၀မ်သော်မှာ နံရံတွင်မီလျက် ထန်မော့ကိုငုံ့ကြည့်လိုက်သည်။

"အကူပစ္စည်းသိမ်းလို့မရတော့ ဒီကြက်သိုက်ရဲ့အသုံး၀င်မှုကအတော်လေးကျသွားတယ်...ဒါပေမယ့်သူ့မှတ်ချက်ကတော့ စိတ်၀င်စားစရာပဲ"

၄င်းကိုကြားသော် ထန်မော့သည် ကြက်သိုက်ပေါ်မှ မှတ်ချက်ကို ဂရုတစိုက်ကြည့်လိုက်သည်။

"နွေဦးမှာ ငါ့ကြက်သိုက်လေးထဲ ကြက်ဥတစ်လုံးဥခဲ့တယ်...ဆောင်းဦးကျတော့ ဥတွေများများရတာပေါ့"

ထန်မော့မှာ ထိုစာကြောင်းကို ၂ကြိမ်ခန့်သေချာဖတ်ကြည့်လိုက်ပြီးနောက် အဓိပ္ပါယ်ကိုနားလည်သွားပြီးနောက် ဖူ၀မ်သော်ကိုထိတ်လန့်စွာ မော့ကြည့်လိုက်သည်။

"ဒီကြက်သိုက်က ပစ္စည်းတွေကို ဆပွားပေးနိုင်တာလား"

ဖူ၀မ်သော်၏ နှုတ်ခမ်းတို့ တွန့်ကွေးသွားခဲ့သည်။

"ဒီအသုံးပြုပုံထဲမှာတော့ ထည့်မပြောထားပေမယ့် အနက်ရောင်မျှော်စင်ရဲ့ မှတ်ချက်တွေက ၂မျိုးရှိတယ်...ပထမတစ်မျိုးက အဓိပ္ပါယ်မရှိဘူး လျှောက်ရေးထားတာ...ဥပမာ ကိုယ်တို့ရခဲ့တဲ့ သံဖိနပ်ချုပ်သမားကြီးရဲ့ဖိနပ်လိုပဲ...ဒုတိယတစ်မျိုးက တစ်ခုခုကိုရည်ရွယ်တဲ့မှတ်ချက်မျိုးပဲ...ဥပမာ ကြက်ဆင်ဥပေါ်ကမှတ်ချက်လိုပေါ့"

ထန်မော့မျက်ခုံးပင့်လိုက်သည်။

"ကျွန်တော်မှ ကြက်ဆင်ဥပေါ်က မှတ်ချက်ကိုမသိတာ"

ဤသည်မှာ ဖူ၀မ်သော်သိသည်မှာ ကြာပြီဖြစ်သော ကိစ္စပင်။ ထန်မော့နှင့် ဖူ၀မ်သော်တို့စတင်ဆက်သွယ်မိချိန်က ထန်မော့မှ ဖူ၀မ်သော်ထံမှ သတင်းရအောင်အစ်အောက်မေးနေခဲ့သည်။ ကြက်ဆင်ဥ၏ သူတို့၂ဦးစလုံးပူးပေါင်းရန်လိုအပ်သည့် အသုံးပြုပုံကြောင့်သာမဟုတ်လျှင် ဖူ၀မ်သော်မှာထန်မော့အား နောက်တစ်ကြိမ်ပင် ဆက်သွယ်လာလိမ့်မည်မဟုတ်ပဲ ထန်မော့သည်လည်း ကြက်ဆင်ဥ၏ အသုံးပြုပုံကို သိရလိမ့်မည်မဟုတ်ချေ။

ဖူ၀မ်သော်မှာ ထန်မော့အား ကြက်ဆင်ဥပေါ်မှ မှတ်ချက်ကို ပြောရန်ပြင်ပြီးမှ ရုတ်ချည်းရပ်တန့်သွားခဲ့သည်။ ထန်မော့မှာ ဖူ၀မ်သော်၏စကားကိုစောင့်နေခဲ့လေသည်။ တဖက်လူရုတ်ချည်းရပ်တန့်သွားသည်ကိုမြင်သော် သူသည်ဖူ၀မ်သော်အား စိတ်၀င်စားစွာ ကြည့်လိုက်မိလေသည်။

"ဘာများလဲ"

ဖူ၀မ်သော်"..."

[ပစ္စည်း: မော့မော့]

.........

[မှတ်ချက်: ခေတ်မီတရုတ်လူမျိုးတစ်ယောက်ဖြစ်ပြီးတော့ မော့မော့ဆိုတာကဘာလဲ...မင်းရင်ထဲက တိတ်တိတ်လေးကွေးနေတာလား?]

မော့မော့ကဘာလဲ...

စစ်တပ်ထဲတွင် ရာစုနှစ်တစ်နှစ်စာနေခဲ့ဖူးသော ဖူ၀မ်သော်မှာ အဖြေကို အမှန်တကယ်သိနေခဲ့သည်။ သူသည်မူလကတော့ ထိုကြက်ဆင်ဥ၏ မှတ်ချက်မှာ မိမိတို့ကို သဲလွန်စတစ်ခုပေးနေခဲ့ကြောင်းပြောချင်ခဲ့သည်။ [ကြက်ဆင်ဥမှာ ပိုင်ရှင်၁ယောက်မက ရှိနေကြောင်း သဲလွန်စပေး]။ ၄င်းမှာ chatဆော့ဖ်၀ဲလ်တစ်ခုနှယ် အသုံးပြုရန်အတွက် ပိုင်ရှင်၂ဦးကဆက်သွယ်ကြရန်လိုအပ်လေသည်။

သို့သော် သူသည်အဆုံးမှာ ပြောမထွက်ခဲ့ချေ။

...သူ့ရင်ထဲမှာ ကွေးနေတာလား...

ဖူ၀မ်သော်၏အမူအယာမှာ အလွန်ထူးဆန်းနေခဲ့သည်။ ထန်မော့သည်သူ့ကိုကြည့်လျက် မူမမှန်သည်ကို ခံစားလိုက်ရသည်။

သူအတွက် အကူအညီမဲ့သလိုခံစားရသည်မှာ ရှားပါးကာ မစ်စတာဖူမှာ တည်ငြိမ်စွာဆိုလိုက်သည်။

"မော့မော့ရဲ့ မှတ်ချက်က ကိုယ့်ကို သူ့ပိုင်ရှင်က တစ်ယောက်တည်းရှိတာမဟုတ်ဘူးလို့ပြောခဲ့တယ်လေ..အဲတုန်းက ကိုယ်လည်း ဒီလိုမှော်ဆန်တဲ့ အကူပစ္စည်းမျိုးရှိလိမ့်မည်မထင်ခဲ့တော့ ဒီလိုမျိုးမတွေးခဲ့မိဘူး..ဒါပေမယ့်အဲဒီမှတ်ချက်က အဓိပ္ပါယ်ရှိပြီး ကြက်ဆင်ဥအသုံးပြုပုံကိုလည်း ပြောပြခဲ့တယ်လေ"

ထန်မော့မှာ ဖူ၀မ်သော်ကိုကြည့်လျက် ထိုကိစ္စကိုဆက်မပြောတော့ချေ။ အကူပစ္စည်း၏မှတ်ချက်မှာ ၄င်း၏ အသုံးပြုပုံဖြစ်နိုင်၍ ထန်မော့တွေးလျက်ဆိုလိုက်သည်။

"ဒါဆို ကျွန်တော်တို့ ဒီထဲပစ္စည်းတွေထည့်ရင် ပွားသွားမလား ကြည့်ကြည့်ရအောင်လေ...ဒီဟာက အရေးပါနေတုန်းပါပဲ...ဥပမာ ကျွန်တော်တို့ ကျည်ဆံတွေလိုမျိုး အရေးကြီးတာတွေကို သိမ်းလို့ရတယ်လေ"

လွန်ခဲ့သော လေးလခန့်က ထန်မော့မှာ အလယ်တန်းကျောင်းတွင် အကန့်အသတ်မဲ့သော ကျည်ဆံများရှိသည့် ခိုး၀င်သူတစ်ဦးနှင့်ဆုံခဲ့သည်။ တကယ်တမ်းတွင်သူ၏ ကျည်ဆံများမှာ အကန့်အသတ်မဲ့မဟုတ်သော်လည်း အလွန်များပြားသည်ကအမှန်ပင်။ ထိုခိုး၀င်သူက ဖက်တီးလေးထံမှ အသတ်ခံလိုက်ရကာ ထန်မော့မှာ ထိုစွမ်းရည်ကိုမရရှိခဲ့ချေ။ checkmateစွမ်းရည်မှာ အသက်စွမ်းရည်ကိုကုန်ဆုံးစေပြီး ထန်မော့က ကျည်ဆံများများမသုံးနိုင်ချေ။ သိုသော် ဖူ၀မ်သော်ကတော့ ဤသိမ်းဆည်းထားသော ကျည်ဆံများကို သုံးနိုင်လေသည်။

ထို့အပြင် ထန်မော့တွေးမိသည်လည်း ရှိသေးသည်။

"သိမ်းဆည်းလို့ရတဲ့ ပစ္စည်းတွေရတဲ့ အရွယ်အစားကရော ဘယ်လောက်ထိရလဲ"

လူ၂ဦးမှာ ခေါင်းငုံ့လျက် လက်ဖ၀ါးအရွယ်ကြက်သိုက်လေးများကို ကိုယ်စီကြည့်လိုက်ကြသည်။ ထန်မော့မှာ စွန့်ပစ်ခံစက်ရုံထဲသို့ တိုက်ရိုက်လျှောက်သွားလိုက်ပြီး ကျိုးနေသော စားပွဲတစ်လုံးကိုတွေ့လိုက်ရသည်။ သူသည်ထိုစားပွဲကို လက်တစ်ဖက်ဖြင့်မလျက် ကြက်သိုက်ပေါ်သို့ ညင်သာစွာတင်လိုက်သည်။ စက္ကန့်ပိုင်းအတွင်း မျက်စိကျိန်းဖွယ်အလင်းရောင်တစ်ခုကိုမြင်လိုက်ရလေသည်။ ထန်မော့နှင့် ဖူ၀မ်သော် မျက်စိကိုပြန်ဖွင့်လိုက်ချိန်တွင် ထိုစားပွဲအကျိုးမှာ မရှိတော့ချေ။

ထန်မော့ကဆိုလိုက်သည်။

"သူက အရွယ်အစား အကန့်အသတ်မရှိဘူးပဲ...သူကကြီးတဲ့ပစ္စည်းတွေလည်း သိုလှောင်လို့ရတာပဲ"

ဖူ၀မ်သော်ခေါင်းညိတ်လိုက်သည်။ သူသည်စကားမဆိုပဲ ထန်မော့၏ လက်ထဲမှ ကြက်သိုက်လေးကို ငုံ့ကြည့်နေခဲ့သည်၊ ထန်မော့သူ့အကြည့်ကိုလိုက်၍ ကြည့်လိုက်မိသည်။

"..."

သူသည်ထိုကြက်သိုက်ထဲတွင် လက်သည်းခွံအရွယ်အစား ကြက်ဥတစ်လုံးကိုတွေ့လိုက်ရလေသည်။ ထိုကြက်ဥလေးတစ်ဥလေး၏ အခွံပေါ်တွင် မျဥ်းကြောင်းတချို့ပေါ်လာခဲ့လေသည်။ ထန်မော့အနီးကပ်ကြည့်လိုက်သော် ၄င်းမှာ စားပွဲပုံကလေးဖြစ်သည်ကိုတွေ့လိုက်ရသည်။

ကြက်သိုက်ထဲတွင် ကြက်ဥတစ်လုံးရှိလာလိမ့်မည်ဟု ထန်မော့ထင်မထားခဲ့ချေ။ သူသည်ထိုကြက်ဥမှာ စားပွဲပေလား ကြက်ဥပေလားဟု သေချာမခွဲခြားနိုင်ချေ။ သူဖူ၀မ်သော်ကိုကြည့်လိုက်မိပြီး တစ်ဦးကိုတစ်ဦး စိုက်ကြည့်နေခဲ့မိကြသည်။ ထို့နောက် ထန်မော့သည် ကြက်သိုက်ကို မှောက်လိုက်ပြီး ထိုကြက်ဥပြုတ်ကျသွားမည်လား စမ်းကြည့်လိုက်သည်။

သို့သော် ထိုဥမှာ ပြုတ်ကျမသွားခဲ့ချေ။ ထန်မော့မှာ ထိုကြက်သိုက်ကို အံ့အားသင့်စွာကြည့်လိုက်သည်။ သူ ထိုကြက်သိုက်ထဲမှ ဥကိုလှမ်းယူလိုက်သည်။ သူ၏လက်မှာ သာမာန်ပင် အတွင်းသို့နှိုက်လျက် ထိုဥက အလွယ်တကူပင် ပါလာခဲ့သည်။ ထိုကြက်ဥမှာ မျက်စိကျိန်းဖွယ်အလင်းတစ်ခု လင်းလာပြန်ကာ ထန်မော့၄င်းကို မြေပေါ်သို့ချလိုက်သည်။ ထို့နောက် ထိုဥမှာ စားပွဲပြန်ဖြစ်လာခဲ့လေသည်။

ထန်မော့ကတွေးလိုက်သည်။

"ကြက်သိုက်ထဲမှာ သိမ်းတဲ့ ပစ္စည်းတွေက ကြက်ဥဖြစ်လာတာပဲ...သူ့ကိုမထိသ၍ ရွေ့လည်းမရွေ့ပဲ မြေဆွဲအားလည်းမသက်ရောက်ဘူး ကြက်သိုက်ထဲမှာပဲ ကပ်နေတာပဲ...ထုတ်လိုက်ရင်တော့ အရင်ပစ္စည်းပြန်ဖြစ်သွားတာပဲ"

ဖူ၀မ်သော်ကဆိုသည်။

"စားပွဲကိုပြန်ထည့်လိုက် ကိုယ်ပြန်ထုတ်ကြည့်လိုက်မယ်"

ထန်မော့ခေါင်းညိတ်လိုက်သည်။

ဖူ၀မ်သော်သည် ထိုကြက်ဥကို အတင်းဆွဲထုတ်ကြည့်ရန်ကြိုးစားလိုက်သည်။ ၅စက္ကန့်မျှကြာပြီးနောက် လက်ကိုပြန်ရုတ်လိုက်ကာ ထန်မော့ကိုကြည့်လိုက်သည်။

"ကိုယ်ယူလို့မရဘူး ကိုယ့်ဟာကိုလည်း စမ်းကြည့်လေ"

ဖူ၀မ်သော်သည် သူ၏ကြက်သိုက်ထဲသို့ ခုံတစ်ခုံကိုထည့်ကြည့်လိုက်သည်။ ထန်မော့၄င်းကို ပြန်လည် ထုတ်ယူကြည့်ရန် ကြိုးစားလိုက်သည်။

သူတို့သည် နည်းမျိုးစုံကြိုးစားကြည့်ပြီးနောက် အကျဥ်းချုပ်လိုက်ကြသည်။

"ပစ္စည်းပိုင်ရှင်ကပဲ ဥကိုထုတ်လို့ရတယ်...လက်နဲ့ပဲ ယူလို့ရတယ်...သိမ်းလို့ရတဲ့ ပစ္စည်းအရွယ်အစားကလည်း ကန့်သတ်မထားဘူး...အေးအေးပူပူ သိမ်းလိုက်တုန်းကအတိုင်းရှိနေတယ်"

သူတို့သည် စက်ရုံအတွင်း၌ အတော်ကြာစူးစမ်းနေခဲ့ကြသည်။ နောက်တစ်နေ့မနက်တွင် ထန်မော့နှင့် ဖူ၀မ်သော်မှာ စက်ရုံထဲမှ ထွက်လာစဥ် ရှောင်ကျီထုံးနှင့် ဆုံခဲ့လေသည်။ သူတို့ကိုမြင်လျှင် ရှောင်ကျီထုံးပြုံးလိုက်သည်။

"ကြက်သိုက်ကကောင်းလား"

ထန်မော့သာမာန်ကာလျှံကာပြန်ဖြေလိုက်သည်။

"သိပ်အသုံး၀င်ပါတယ်...ခင်များရော..."

ရှောင်ကျီထုံးကရယ်သည်။

"သိပ်ကောင်းတာပေါ့ အသုံး၀င်တဲ့ ပစ္စည်းပါပဲ"

ထိုပစ္စည်း၏ စစ်ဆေးမှုရလဒ်ကိုတော့ မည်သူကမျှ ထုတ်မပြောခဲ့ချေ။

ထန်မော့မှာ ဤနေရာသို့ ရှောင်ကျီထုံးနှင့်အတူ ဖူ၀မ်သော်ကိုရှာရန် လာခဲ့ခြင်းပင်။ မနေ့ည သူတို့လူချင်းခွဲမလာခင်တွင် ရှောင်ကျီထုံးမှ နန်ကျင်းအဖွဲ့သို့ လူလွှတ်ကာ ဖူ၀မ်ရှန်း မည်သည့်နေရာတွင်ရှိနေသည်ကို ရှာကာ အမြန်တွေ့ရအောင် လုပ်ပေးမည်ဟုဆိုခဲ့သည်။ မူလတွင် ထန်မော့နှင့် ဖူ၀မ်သော်မှာ မိမိတို့ကိုယ်တိုင်သွားကာ ဖူ၀မ်ရှန်းလာစရာမလိုကြောင်း ပြောလိုခဲ့သည်။

ရှောင်ကျီထုံးက ရယ်လျက်ဆိုခဲ့သည်။

"ဘယ်လိုပဲဖြစ်ဖြစ်သူက ကြက်ဆင်ကြီးဂိမ်းအတွက် ဆုပေးဖို့ရောက်လာဦးမှာပဲလေ"

ကလေးသူငယ်လုပ်အားကို သုံးနေတာဖြစ်နေတာပဲ...

ထန်မော့ငြင်းမနေတော့ချေ။

ရှောင်ကျီထုံးကဆိုသည်။

"အချိန်အရဆို သူအခုလာနေလောက်ပြီ...ခဏလောက်စောင့်ရင် နောက်၁နာရီလောက်ဆိုရောက်လောက်ပြီ"

ထန်မော့ခေါင်းညိတ်လိုက်သည်။ သူဘာမျှမဆိုပဲ ဖူ၀မ်သော်ကို လှည့်ကြည့်လိုက်သည်။ ဖူ၀မ်သော်မှာ ထန်မော့မှ သူ့ကိုကြည့်နေသည်ကို မြင်သော် အိတ်ကပ်ထဲ လက်ထိုးထည့်လိုက်သည်။ ထို့နောက် သူသည်ထန်မော့အားကြည့်လျက် ပြုံးလိုက်သည်။

"ဘာလို့လဲ"

ထန်မော့ဖြေလိုက်သည်။

"ဘာမှမဟုတ်ပါဘူး"

ဖူ၀မ်သော်က အစ်ကိုကြီးဖြစ်မနေရင် ပိုကောင်းမယ်လို့ဘာလို့ခံစားနေရပါလိမ့်...

ထန်မော့ ထိုထူးဆန်းသော အတွေးများကို ပြန်လည်ဖုံးကွယ်လိုက်သည်။

ရှောင်ကျီထုံးသည် သိပ်မကြာခင်မှာပင် နောက်ဂိမ်းတစ်ခုကိုရှင်းရန်အတွက် နင်းနင်းနှင့်အတူထွက်သွားခဲ့သည်။ ရှောင်ရှောင်းနှင့် ရှောင်ဝေ့သာလျှင် နန်ကျင်းဗျူဟာအဖွဲ့၏ နေရာတွင် ကျန်ရစ်လေသည်။ ရှောင်ရှောင်းက တရုတ်စကားသိပ်မကြွမ်းလှချေ။ သူသည်ဘေးတွင်ထိုင်လျက် အကူပစ္စည်းအစုံကို ကလိနေခဲ့သည်။ ရှောင်ဝေ့မှာမူ ထန်မော့နှင့် ဖူ၀မ်သော်ကို စိုးရိမ်စွာကြည့်နေခဲ့ပြီး ဖူ၀မ်သော်၏ ကိုယ်ထံမှ အကြည့်လွှဲလိုက်လေသည်။

ဖူ၀မ်သော် သူမကိုပြန်ကြည့်လိုက်သည်။

ရှောင်ဝေ့က အလျင်စလိုဆိုလာခဲ့သည်။

"ကျွန်...ကျွန်မရှင့်ကိုကြည့်နေတာမဟုတ်ပါဘူး...ကျွန်မဒါတွေကိုသိမ်းလိုက်ဦးမယ်...သိမ်းလိုက်ဦးမယ်နော်"

ရှောင်ရှောင်းကအော်လိုက်သည်။

"ဆရာမ ကျွန်မကို ဒီပစ္စည်းကြည့်ပေးပါဦး"

ရှောင်ဝေ့သူ့ထံသို့လျင်မြန်စွာ ပြေးသွားခဲ့သည်။

ဖူ၀မ်သော်က အလွန်သန်မာကာ အနက်ရောင်မျှော်စင် ဒုတိယထပ်ကို ပထမဆုံးရှင်းလင်းသော ကစားသမားအဖြစ် မှတ်တမ်းလည်း ရှိသည်။ သာမာန်ကစားတစ်ဦး၏ ဖူ၀မ်သော်အပေါ်အမြင်ကို ၂မျိုးခွဲခြားနိုင်သည်။ ဥပမာ ရှောင်ရှောင်းမှာ သူရှိနေသော နေရာကိုသိကာ အကြိမ်ကြိမ်လှမ်းလှမ်းကြည့်နေတတ်သည်။ ထို့နောက်ကြက်ဆင်ဂိမ်းထဲတွင် ဖူ၀မ်သော်၏ လုပ်ဆောင်မှုနှင့် ခွန်အားကိုပြန်သတိရလျှင် လျစ်လျူရှုရန်ဆုံးဖြတ်လိုက်လေသည်။ နောက်တစ်မျိုးမှာ ရှောင်ဝေ့ဖြစ်သည်။ ခွန်အားကွာခြားမှုမှာ မြင့်လွန်း၍ သူမမှာ သူ့ကို ကြည့်ပင်မကြည့်ရဲချေ။

ထန်မော့နှင့် ဖူ၀မ်သော် ထိုစက်ရုံတွင် ၁နာရီမျှ စောင့်နေပြီးနောက် ခြေသံများကိုကြားလိုက်ရလေသည်။

ထန်မော့ သိချင်စိတ်နှင့်လှမ်းကြည့်နေစဥ်တွင် ဖူ၀မ်သော်မှာ စိတ်လှုပ်ရှားမှုပင်မရှိပဲ တည်ငြိမ်နေခဲ့သည်။ ခြေသံများမှာ တဖြည်းဖြည်းနီးကပ်လာခဲ့သည်။ အရပ်မြင့်မြင့်နှင့်ကိုယ်ဟန်တစ်ခုမှာ တံခါးတွင်ပေါ်လာသည်နှင့် ဖူ၀မ်သော်မှာ မျက်ခုံးပင့်လိုက်ကာ ထန်မော့မှာ အံ့အားသင့်လျက် မေးလိုက်သည်။

"ဖူ၀မ်ရှန်းလည်းမဟုတ်ပါလား"

ရောက်လာသော လူမှာ အရပ်မြင့်မြင့်ဖြင့် သန်မာသော လူတစ်ဦးပင်။ ဤသည်မှာ ရှောင်ကျီထုံး သတင်းပို့ရန် လွှတ်ထားသောလူပင်ဖြစ်သည်။ နန်ကျင်းအဖွဲ့မှာ အတော်ဝေးသည်ဖြစ်၍ အဖွဲ့၂ခုဆက်သွယ်ရန် သတင်းပို့သူလိုအပ်လေသည်။ ဤလူမှာ နန်ကျင်းအဖွဲ့၀င်တစ်ဦးပင်ဖြစ်သည်။

သူကဆိုသည်။

"ကျွန်တော်သွားတာ နည်းနည်းနောက်ကျသွားတယ်...သူဒီမနက်ကပဲ ဂိမ်းတစ်ခုထဲ၀င်သွားတာ...သြော် ခင်များက ရှောင်ရှန်းကိုရှာနေတဲ့သူလား...ဘယ်သူများလဲ"

ဖူ၀မ်သော်ကဆိုသည်။

"ကျွန်တော်ကသူ့အစ်ကိုပါ"

ထိုလူထွားကြီးမှာ အံ့အားသင့်သွားခဲ့သည်။

"ရှောင်ရှန်းမှာ အစ်ကိုရှိတယ်လား..."

သူကရယ်သည်။

"ဟား ဟား ဟား ခင်များက ဖူ၀မ်သော်လား"

ရှောင်ရှောင်းနှင့် ရှောင်ဝေ့မှာ တန့်သွားမိကြပြီး ဖူ၀မ်သော်မှာမူ မျက်တောင်ပင်မခတ်ချေ။

"ကျွန်တော်ကဖူ၀မ်သော်ပါ"

"စတာပါ...နန်ကျင်းအဖွဲ့ကလူတိုင်း ရှောင်ရှန်းကို ဒီဟာနဲ့ ပတ်သက်ပြီး စနေကျလေ...သူ့ပုံစံက အရမ်းရယ်ရတာ...ခေါင်းဆောင်ရှောင်းက ခင်များကိုယုံတယ်ဆိုမှတော့ လူဆိုးမဖြစ်နိုင်ဘူး...ပြီးတော့ ရှောင်ရှန်းရဲ့ မိသားစု၀င်ပဲလေ"

ထိုလူထွားကြီးမှာ ထန်မော့အား ဖူ၀မ်ရှန်းနှင့်အမျိုးတော်သူဟုသာ မှတ်ယူလိုက်ကာ ထန်မော့ကလည်း ၄င်းကို မငြင်းလိုက်ချေ။ ဤအရာကိုရှင်းပြနေပြီး ပို၍ရှုပ်ထွေးအောင် လုပ်နေစရာမလိုချေ။ ထိုလူကဆိုသည်။

"သူပြန်ထွက်လာဖို့ ရက်နည်းနည်းတော့ကြာလောက်တယ်...နန်ကျင်းအဖွဲ့ကိုလိုက်ပြီးစောင့်ချင်လား...ဒီဂိမ်းပြီးရင်တော့ သူပြန်လာလောက်တယ်"

ရှောင်ကျီထုံးနှင့် နင်နင်းက နန်ကျင်းဗျူဟာအဖွဲ့၏ နေရာတွင်ရှိမနေချေ။ ရှောင်ရှောင်းမှာ ၉နှစ်အရွယ်ဖြစ်ကာ ရှောင်ဝေ့မှာ ဖူ၀မ်သော်ကို မြင်တိုင်းတုန်လှုပ်နေခဲ့သည်။ထို့ကြောင့် ထန်မော့ ထိုလူ၏ကမ်းလှမ်းမှုကိုလက်ခံလိုက်သည်။

သူတို့သည် ဗျူဟာအဖွဲ့တွင်နေနေစရာမလိုချေ။ နန်ကျင်းအဖွဲ့သို့သွားကာ ဖူ၀မ်ရှန်းကိုစောင့်နိုင်သည်။ ထို့အပြင်ကို နန်ကျင်းကစားသမားများအားလုံးကို ဖိနှိပ်ကာ နန်ကျင်းတစ်မြို့လုံးအား ဖန်လုံအိမ်အဖြစ်ပြောင်းနိုင်သော ထိုသန်မာသည့်ကစားသမားကိုလည်း တွေ့ချင်ခဲ့သည်။

မထွက်ခွာခင်တွင် ထန်မော့ရှောင်ရှောင်းထံသွားလျက်မေးလိုက်သည်။

"မင်းမှာ ငါ့ကို့ပေးလို့ရတဲ့ နန်ကျင်းမြေပုံရှိလား"

ရှောင်ရှောင်းမှာ ပုံးကြီးတစ်ခုဆီလျှောက်သွားလျက် အချိန်အတော်ကြာ မွှေနှောက်နေပြီးနောက် မြေပုံကြီးတစ်ခုကို ဆွဲထုတ်လာခဲ့သည်။

"ရော့ ယူသွားပါ"

ထန်မော့ထိုမြေပုံကို ယူလိုက်လေသည်။

🪩

(ဖူဝမ်ရှန်းက နန်ကျင်းအဖွဲ့ကလား /နန်ကျင်းဗျူဟာအဖွဲ့ကလား သိပ်တော့မရှင်းဘူး sorry ပါ 🥹)

Prev Next