MM Story Teller

အခန်း(၁၀၂)

Viewers 7k

အခန်း(၁၀၂) - တကယ်ကောင်းတယ်

နောက်တော့ ရှစ်ချင်းလျို့က ခြင်ပြေးအမွှေးတိုင်လုပ်ခြင်းအပြင် ဟဲရှို့ဝူကို နေ့တိုင်း ပြုစုပျိုးထောင်ပေးခဲ့သည်။

သူမရဲ့ လျှို့ဝှက်ဆန်းကြယ်သည့် နေရာလွတ်လေးထဲမှာ သိပ္ပံစိုက်ပျိုးရေးကျောင်းက စုလာခဲ့သည့် မျိုးစေ့တွေနှင့် ပျိုးပင်တွေ ဖြည့်ထားခဲ့သည်။

ကောက်ပဲသီးနှံနှင့် သစ်သီးတွေအပြင် ဆေးဖက်ဝင်အပင်များစွာလည်း ရှိသည်။

ဆေးဖက်ဝင်အပင်တွေထဲမှ တစ်ခုက ဟဲရှို့ဝူအပင် ဖြစ်သည်။

သူတို့နိုင်ငံ တိုးတက်ဖို့အတွက် အနာဂတ်မှာ ဟဲရှို့ဝူပါသည့် ဆပ်ပြာနှင့် ခေါင်းလျှော်ရည်သုံးဖို့အတွက် စိတ်မပူဘဲ သူမက အများကြီး ကြိုးစားအားထုတ်ထားသည်။

သူတို့ရဲ့ အိမ်အသစ်က အဆင်သင့်ဖြစ်လုနီးပါး ရှိနေပြီ ဖြစ်သည်။

ရှစ်ချင်းလျို့နှင့် ရှောင်ဟန်ကျန့်က အတူတူ သွားကြည့်ခဲ့ကြသည်။

ခြံနှင့်အိမ်ထဲမှာ မြေကြီးတွေ တွေ့ခဲ့ရသည်။

အကယ်၍ ရေအိုင်ရှိပါက တက်နင်းမိပြီး သူတို့ဖိနပ်တွေ ပေကုန်မည်ဖြစ်သည်။

ဒါ့အပြင် ရှစ်ချင်းလျို့က ရုတ်တရက်ကြီး ပြဿနာ တစ်ခုကို တွေးလိုက်မိသည်။

ပိုင်ရွှီဘက်က ကြွေပြားနှင့် ကြွေထည်မြေထည်ပစ္စည်းတွေက ပုံစံသွင်းပြီးပြီဖြစ်ကာ ပထမတစ်သုတ်ကို သူတို့အိမ်မှာ သုံးမည်ဖြစ်သည်။

သို့ပေမယ့် ကြွေပြားကပ်ရန်အတွက် ဘိလပ်မြေလိုတာကို သူမ သတိရသွားခဲ့သည်။

ဘိလပ်မြေက ရှိမနေပေ။

သူမက ရှောင်ဟန်ကျန့်ကိုဆွဲကာ မေးခဲ့သည်။ "အဖိုးကြီးရှောင် နိုင်ငံနဲ့ လူမျိုးအတွက် အကျိုးရှိစေမယ့် ပစ္စည်းတစ်ခု ဖန်တီးချင်တယ်၊ ကျွန်မတို့ဘာသာ လုပ်သင့်လား ဒါမှမဟုတ် မော့ချင်းလင်ကို သွားရှာသင့်လား။"

ရှောင်ဟန်ကျန့်က သူ့ဇနီးရဲ့ ထူးဆန်းသည့် အကြံဉာဏ်တွေနှင့် ကျင့်သားရနေပြီ ဖြစ်သည်။

"အဲတာက ဘာကြီးတုန်း၊ အသေးစိတ် ပြောပါဦး။"

ရှစ်ချင်းလျို့က ပြောခဲ့သည်။ "အဲတာကို ဘိလပ်မြေလို့ခေါ်တယ်၊ အဲတာကို သုံးရင် မြေပြင်က ပြောင်ချောသွားပြီး လမ်းကြမ်းကြမ်းထက် ပိုကြာရှည်ခံတယ်၊ မိုးရွာချရင်လည်း ရွှံ့အိုင်ဖြစ်မနေဘဲ ဖိနပ်လည်း မပေဘူး၊ ပိုအရေးကြီးတာက ကြွေပြားကပ်ဖို့ ဘိလပ်မြေ လိုအပ်တယ်၊ အို ဟုတ်သား ဘိလပ်မြေနဲ့ ကျောက်စရစ်ခဲရောရင် ဘိလပ်မြေက ပိုခိုင်မာသွားတယ်၊ ကောက်ညှင်းနဲ့ ရောစပ်ထားတဲ့ လမ်းခင်းကျောက်တွေထက် ပိုတာရှည်ခံပြီး ကုန်ကျစရိတ်လည်း သက်သာတယ်၊ အဲတာကို သုံးပြီး အိမ်ဆောက်လို့ ရသလို တံတားတွေလည်း ဆောက်လုပ်လို့ရတယ်၊ ပိုအရေးကြီးတာက လမ်းခင်းတဲ့နေရာမှာ ပိုအသုံးဝင်တယ်။"

ရှေးခေတ်မှာ အဆောက်အဦးတွေရဲ့ အုတ်နှင့် ကျောက်ခဲကြားမှာ အဟတွေရှိနေပြီး ကောက်ညှင်းနှင့် ထုံးရည်ရောစပ်ပြီး ဖာထေးထားကြသည်။

ထိုနေရာမှာ ဘိလပ်မြေကို လုံးဝ အစားထိုးလို့ ရသည်။

"ချမ်းသာဖို့ဆိုရင် လမ်းအရင်ပြင်" ဟူသော မော်ဒန်ခေတ်က ဆိုရိုးစကားလည်း ရှိသည်။

ရှေးခေတ်မှာလည်း ထိုနည်း အတူတူပဲဟု ရှစ်ချင်းလျို့ ယုံကြည်သည်။

ရှာ့ရှီရွာနှင့် နန်ရှီမြို့ကို သွားသည့်လမ်းကို ဘိလပ်မြေဖြင့် လုပ်လိုက်ပါက အသွားအပြန် အချိန်တွေ တစ်ဝက်လောက် အချိန်ကုန်တာ သက်သာသွားမည်ဖြစ်သည်။

သယ်ယူပို့ဆောင်ရေးလည်း ပိုအဆင်ပြေကာ ပိုမြန်လာမည်ဖြစ်သည်။

ရှစ်ချင်းလျို့ရဲ့ စကားကို ကြားပြီးနောက် ဘိလပ်မြေက သာမာန်အရာ မဟုတ်ဘူးဟု ရှောင်ဟန်ကျန့် သဘောပေါက်လိုက်သည်။

သူ့ဇနီးလေးပြောသည့်အတိုင်း တကယ်ပဲ နိုင်ငံနှင့် လူမျိုးကို အကျိုးပြုမည့်အရာ ဖြစ်သည်။

သူက ခဏလောက်တွေးပြီးနောက် ပြောခဲ့သည်။ "ပူးပေါင်းဖို့အတွက် မော့ချင်းလင်ကို ရှာရအောင်။"

အရင်တစ်ခေါက် ရေခဲလုပ်တုန်းက ဝူမိသားစုနှင့် စီရင်စုတရားသူကြီးသာ သူတို့ကို စောင့်ကြည့်ခဲ့သည်။

ဘိလပ်မြေဟူသော အရာ ထွက်ပေါ်လာပါက လူအများရဲ့ အာရုံစိုက်စောင့်ကြည့်မှုကို ခံရနိုင်သည်။

ရှစ်ချင်းလျို့က ခေါင်းငြိမ့်ပြခဲ့သည်။ "ကောင်းပြီ။ ဒါဆိုလည်း မော့ချင်းလင်ကိုရှာပြီး စကားသွားပြောကြတာပေါ့၊ အချိန်ကျရင် ဒီမှာ ဘိလပ်မြေရောင်းပြီး ဘိလပ်မြေလိုချင်တဲ့လူက ရွာမှာ လာဝယ်ပေါ့၊ ဒီမှာ လူစည်ကားအောင် လုပ်ကြတာပေါ့။"

ဘိလပ်မြေ ဖော်စပ်နည်းကို မော့ချင်းလင်က သေချာပေါက် မြို့တော်ကို တင်ပြလိမ့်မည်။

မြို့တော်က ဘိလပ်မြေလုပ်ကာ သူတို့ဘာသာသုံးသုံး ရောင်းရောင်းကိစ္စမရှိဘဲ သူမရဲ့ ရောင်းချမှုကတော့ အကန့်အသတ် ရှိသည်။

သူမက အနီးအနားက မြို့တွေက လူတွေနှင့် စီရင်စုကလူတွေကို အဓိက ထားသည်။ ပြီးမှ စီးပွားရေးကို တဖြည်းဖြည်း တိုးချဲ့မည်ဖြစ်သည်။

ရှောင်ဟန်ကျန့်က ခေါင်းငြိမ့်ပြခဲ့သည်။ "ကောင်းပြီ။ ဒီကိစ္စကို မော့ချင်းလင်ကို ပြောကြတာပေါ့။"

ဘိလပ်မြေလုပ်နည်း မျှဝေပေးနိုင်ပေမယ့် သူတို့က ရွာမှာပဲ ဘိလပ်မြေစက်ရုံတည်ထောင်ကာ လူတိုင်းကို ရောင်းချမည်ဖြစ်သည်။

ရှစ်ချင်လျို့က အကြံပြုခဲ့သည်။ "အရင်ဆုံး ဘိလပ်မြေထုတ်လုပ်ပြီး ခြံထဲနဲ့ ခြံပြင်က လမ်းလေးကို အရင်ခင်းပြီးမှ မော့ချင်းလင်ကို ခေါ်ပြရင် ဘယ်လိုလဲ။"

သူတို့ကို ရှင်းပြနေတာထက် ဘိလပ်မြေရဲ့ အသုံးဝင်ပုံကို စီရင်စုတရားသူကြီးမော့ကို လက်တွေ့ပြလိုက်တာ ပိုအဆင်ပြေသည်။ သူ့မျက်လုံးဖြင့် ကိုယ်တိုင်မြင်ရတာ ပိုကောင်း၏။

ရှောင်ဟန်ကျန့်က ခပ်ဖွဖွပြုံးကာ ပြောခဲ့သည်။ "ကိုယ်တို့က ထပ်ပြီးတော့ အတွေးတူနေတာပဲ။"

သူ့ဇနီးလေးက ဉာဏ်ကောင်းပြီး ချစ်ဖို့ ကောင်းတာကြောင့် သဘောကျတာတင်မကဘဲ သူတို့နှစ်ယောက် တူညီသည့်ဓာတ်ရှိတာလည်း ပါသေးသည်။

သူမ တွေးသမျှကို သူ နားလည်သည်။

သူ တွေးသမျှကိုလည်း သူမက တူညီစွာ တွေးမိတတ်သည်။ သူတို့မှာ တူညီတာတွေ များသည်။

သူက သူမ အကြံပြုထားသည့်အတိုင်း လုပ်ခဲ့သည်။

ရှစ်ချင်းလျို့ အိမ်ပြန်ရောက်တော့ 'အချိန်ခရီးသွားစွယ်စုံကျမ်း' စာအုပ်ကို ထုတ်ကာ ဘိလပ်မြေလုပ်နည်း ကူးရေးခဲ့သည်။

ရှောင်ဟန်ကျန့် အခန်းထဲဝင်လာတော့ သူမက စာရွက်ပေးပြီး ပါဝင်ပစ္စည်းတွေ ဝယ်ခိုင်းခဲ့သည်။

အဓိက ပါဝင်ပစ္စည်းတွေက ထုံးကျောက်၊ ရွှံ့စေး၊ သံသတ္တုရိုင်းနှင့် ကျောက်မီးသွေးတို့ ဖြစ်သည်။

အကယ်၍ သံသတ္တုရိုင်း မရှိပါက သံပြုလုပ်ခြင်းမှ ကျန်ရစ်သည့် အကြွင်းအကျန် သံကို အသုံးပြုလို့ရသည်။

ရှောင်ဟန်ကျန့်က စာရွက်ထဲက ပါဝင်ပစ္စည်းတွေကို ကြည့်လိုက်သည်။ "မနက်ဖြန် ကိုယ်လူတွေခေါ်ပြီး သွားဝယ်လိုက်မယ်။"

ထိုပစ္စည်းတွေကို မြို့ထဲမှာ ဝယ်လို့ ရသည်။

ရှစ်ချင်းလျို့က ပြောခဲ့သည်။ "ရှင် ပင်ပန်းခဲ့ပြီ။"

သူမခင်ပွန်းက စာပေနှင့် ဓားပညာရပ်မှာ တော်ပြီး ကောင်းမွန်သည့် လူမှုဆက်ဆံရေး ရှိသည်။

ရှောင်ဟန်ကျန့်က ပြုံးကာ ပြောခဲ့သည်။ "ကိုယ့်ဇနီးလည်း ပင်ပန်းခဲ့တာပဲ။"

သူမ နေ့တိုင်း ဟဲရှို့ဝူပင်ကို ပြုစုပေးနေတာ သူတွေ့ခဲ့သည်။

ခြင်ပြေးအမွှေးတိုင်ရောင်းချမှုကိုလုပ်ရပြီး ကြွေပြားစက်ရုံကိုလည်း ခုန်ကူးရကာ အိမ်ကိုလည်း ကြည့်ရှုရသေးသည်။

သူမ ပင်ပန်းနေတာမြင်ရင် သူ့ရင်တွေ နာသည်။

သို့ပေမယ့် သူ့ဇနီးလေးက အလုပ်များရင် ပျော်နေပုံရတာကြောင့် သူလည်း မမြင်ချင်ယောင်ဆောင်ခဲ့ရသည်။

သူ တတ်နိုင်သလောက် ကူညီပေးရုံသာ တတ်နိုင်သည်။

နောက်နေ့ကျတော့ ရှောင်ဟန်ကျန့်က ပစ္စည်းတွေ ဝယ်ခဲ့သည်။

သူတို့က ရွာထဲက အားကောင်းမောင်းသန်နှင့် ယုံကြည်ရသည့် ရွာသားတချို့ကိုခေါ်ကာ ဘိလပ်မြေလုပ်ခဲ့သည်။

ရှစ်ချင်းလျို့က တစ်ခါမှ ဘိလပ်မြေမလုပ်ဖူးပေမယ့် အချိုးအစား ရောစပ်ရမည့် ထုတ်လုပ်နည်း သူမမှာ ရှိသည်။

သို့ပေမယ့် သူမ ကျေနပ်သည်အထိ ဘိလပ်မြေ မရမချင်း အကြိမ်ကြိမ် စမ်းသပ်ခဲ့သည်။

ထို့နောက် အိမ်ဆောက်ကူနေသည့် လက်မှုပညာသည်ကို အကူအညီတောင်းခဲ့သည်။

အပင်တွေကို ချန်ပြီး ခြံထဲကို ဘိလပ်မြေခင်းခဲ့သည်။

ဘိလပ်မြေဖြင့် လုပ်ထားသည့် ခြံဝမှ လမ်းလေးကိုလည်း ရွာထိရောက်အောင် ဖောက်လုပ်ခဲ့သည်။

ရွာသားတွေက ချောမွတ်နေသည့်လမ်းကို ပထမဆုံး မြင်ဖူးတာကြောင့် လာရောက်ကြည့်ရှုခဲ့ကြသည်။

"လမ်းက တကယ်ကောင်းတာပဲ၊ တာ့လျန်ရဲ့ ဇနီးကတော့ အံ့ဖွယ်ပဲဟေ့။"

"လမ်းက ရေစိုရင်တောင် ရွှံ့မထဘဲ ဖိနပ်လည်း မပေဘူး၊ မိုက်လိုက်တာ။"

"ဘိလပ်မြေလို့ခေါ်တဲ့ဟာနဲ့ လမ်းခင်းထားတာလို့ပြောတာပဲ၊ အဲတာကို တာ့လျန်ရဲ့မိန်းမ တီထွင်ခဲ့တာလေ။"

"တာအိုဘုန်းတော်ကြီးက တာ့လျန်ရဲ့ မိန်းမကို အိပ်မက်ထဲမှာ ထပ်ပြောခဲ့တယ်ထင်တယ်။"

"တောင်အလယ်က တာအိုဘုန်းကြီးကျောင်း ပြီးတော့မှာမလား၊ ဆောက်ပြီးသွားရင် ငါတို့သွားဖူးရအောင်။"

"ပြီးတော့မှာ အချောကိုင်နေပြီ၊ နောက်ကျရင် မကြာခဏ အမွှေးနံ့သာ သွားပူဇော်ကြတာပေါ့။"

ရွာသူကြီးနှင့် အကြီးအကဲတွေက အခုမှ ဒီလိုလမ်းမျိုး ပထမဆုံး တွေ့ဖူးတာ ဖြစ်သည်။

သူတို့အကုန်လုံးက အလွန်စိတ်လှုပ်ရှားနေကြသည်။ "ကောင်းတယ်။ ဘိလပ်မြေက သိပ်ကောင်းတဲ့ပစ္စည်းပဲ။"

"နောက်ကျရင် ငါတို့ရွာပိုက်ဆံရှိလာရင် ဒီဘိလပ်မြေနဲ့ လမ်းဖောက်ကြတာပေါ့။"

"သိပ်ကောင်းတာပဲ၊ မိုးရွာတာဖြစ်ဖြစ် နှင်းကျတာဖြစ်ဖြစ် သွားရ လာရ အဆင်ပြေတာပဲ။"

"ရွာကနေ မြို့အထိ လမ်းဖောက်ထားရင် ကောင်းတယ်နော်၊ အဲကနေ လှည်းဆွဲရတာ အဆင်ပြေတာပေါ့။"

ရွာသားတွေက စတင်စိတ်ကူးယဥ်ခဲ့ကြသည်။

ထိုအချိန်မှာပဲ ရှောင်ဟန်ကျန့်က မော့ချင်းလင်ကို ဖိတ်ခေါ်ခဲ့သည်။

သူ ရထားလုံးပေါ်မှ ဆင်းလိုက်သည်နှင့် ရွာသူရွာသားတွေရဲ့ ဆွေးနွေးသံကို ကြားလိုက်ရသည်။

ထို့နောက် သူက ဘီလစ်စာရေးကြီးဖြင့် ရွာသူရွာသားတွေကို လမ်းဖယ်ခိုင်းခဲ့သည်။

ထို့နောက် သူက ရထားလုံးမောင်းကာ ဘိလပ်မြေလမ်းကို စမ်းခိုင်းခဲ့သည်။

ထင်သည့်အတိုင်း လမ်းက သွားရတာ မြန်ပြီး ငြိမ်သည်။ လမ်းက တကယ်ကောင်းသည်။

သူက ရှောင်မိသားစုရဲ့ အိမ်အသစ်ကိုသွားကာ ခြံထဲခင်းထားသည့်လမ်းကို သွားကြည့်ခဲ့သည်။

ရွှံ့ထနေသည့်လမ်းထက် ပိုလှပြီး ကျောက်တုံးတွေဖြင့် လမ်းခင်းတာထက် ပိုကောင်းသည်။

ထို့နောက် သူက လူတစ်ယောက်ဖြင့် စမ်းသပ်ဖို့အတွက် လမ်းကို တူးခိုင်းခဲ့သည်။

သို့ပေမယ့် အကြိမ် အနည်းငယ် ထုပြီးတာတောင် အကောင်းအတိုင်း ကျန်နေဆဲ ဖြစ်သည်။ လမ်းက တော်တော်ခိုင်သည်။

ထို့နောက် လမ်းခင်းခြင်းအပြင် တာတမံဆောက်ခြင်း၊ တံတားဆောက်ခြင်းတို့အတွက် သုံးဖို့ပါ သူတွေးမိခဲ့သည်။

"ဘိလပ်မြေက ကောင်းတယ်။"

သူက ရှစ်ချင်းလျို့နှင့် ရှောင်ဟန်ကျန့်ကိုကြည့်ကာ မေးခဲ့သည်။ "ဘိလပ်မြေလုပ်နည်း ပေးချင်လား။"

အကျိုးရှိပြီး သူ့ကို ခေါ်ပြကတည်းက ဒါက ပြုလုပ်ပုံ သူ့ကို ပေးချင်သည့် အဓိပ္ပာယ် ဖြစ်သည်။

ဘိလပ်မြေလုပ်နည်းက ရေခဲလုပ်နည်းထက် ပိုအရေးကြီးသည်။

ဒါက နိုင်ငံနှင့် လူတွေအတွက် တကယ့်အကောင်းဆုံးထုတ်ကုန်ဖြစ်သည်။

Prev Next