Chapter 64
Viewers 4k

🚩Chapter -64

 Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 2 ]


_____



မူလစုဝမ်သည် လမ်းခွဲလိုက်ပြီးနောက်တစ်နေ့တွင် လိုင်းပေါ်တက်ကာ ရှစ်ထျန်းအုပ်စုမှထွက်ခဲ့ပြီး ဟွာရှားပြည်နယ်လေးခုတွင် တတိယအကြီးဆုံးအုပ်စုဖြစ်သော ရှောင်ယောင်တပ်ဖွဲ့သို့ဝင်ရောက်ခဲ့သည်။ ထို့နေ့မှာပင် ရှောင်ယောင်တပ်ဖွဲ့၏ အင်အားကြီးမားသည့်အဖွဲ့ကိုခေါ်ဆောင်ကာ တောထဲတွင် အဆင့်၄၅ရောက်အောင် အဆင့်တင်နေသော ‌ဟွေ့မော့ယိရှောင်အား သတ်ခဲ့သည်။ 


ထိုကဲ့သို့မတူညီသော အုပ်စုနှစ်ခု တိုက်ခိုက်သတ်ဖြတ်ခြင်းသည် လင်ရှန်းတွင်သာမက PKဂိမ်းများတွင် ပုံမှန်ပင်ဖြစ်သည်။ စုဝမ်ကအမုန်းတို့ကိုမျိုမချနိုင်၍ ဟွေ့မော့ယိ‌ရှောင်အား သတ်ပစ်ရမည်။ သို့မှသာ သူမစိတ်ပြေနိုင်မှာဖြစ်သည်။ သို့သော် သူမမထင်မှတ်ထားခဲ့သည်မှာ မိန်းမတစ်ယောက်ကြောင့် ပြုလုပ်လိုက်သော ယဲ့ထျန်း၏လုပ်ရပ်ပင်ဖြစ်သည်။ 


ယိ‌ရှောင်အားသတ်လိုက်သည့်နေ့၏ ညနေမှာပင် ရှစ်ထျန်းအုပ်စုသည် ရှောင်ယောင်တပ်ဖွဲ့အား စစ်ကြေညာခဲ့သည်။ 


ရှောင်ယောင်တပ်ဖွဲ့၏ခေါင်းဆောင် ရှစ်လိဟွားမေသည် အမျိုးသမီး မီးမှော်ပညာရှင်ဖြစ်၏။ သူမနှင့် စုဝမ်တို့သည် အွန်လိုင်းပေါ်တွင်သူငယ်ချင်းများဖြစ်နေသည်မှာ နှစ်များစွာကြာပြီဖြစ်သည်။ သူတို့၏ သူငယ်ချင်းဆက်ဆံရေးအတွက် သူမက တိရှစ်ထျန်းနှင့် ညှိနှိုင်းမှုမလုပ်ခဲ့ပေ။ နောက်ဆုံးရလဒ်အနေနှင့် ရှစ်ထျန်းအုပ်စု၏ ချေမှုန်းခြင်းခံရကာ သူတို့နေရာယူထားသည့် အုပ်စုခံတပ်ကိုပင်ဆုံးရှုံးခဲ့ရသည်။ 


ခံတပ်ဆုံးရှုံးသွားသော ရှောင်ယောင်တပ်ဖွဲ့သည် ပြည်နယ်ထဲတွင် နံပါတ်သုံးနေရာမှ နံပါတ်တစ်ဆယ်သို့ ကျဆင်းသွားခဲ့၏။


သို့သည့်တိုင် ယဲ့ထျန်းသည် အမုန်းမပြေခဲ့ပေ။ သူက ဤကမ္ဘာ၏ချန်နယ်တွင် မက်ဆေ့ချ်တစ်ခုတင်လိုက်သည်။ ရှောင်ယောင်တပ်ဖွဲ့တွင် စုချန်းဝမ်ယွီရှိနေသရွေ့ သူနှင့်ရှောင်ယောင်တပ်ဖွဲ့က သေသည်ထိ တိုက်ခိုက်သွားရမည် ဟူ၍ဖြစ်သည်။ 


လူတစ်ယောက်သည် ဒေါသထွက်ရုံလေးနှင့်တင် လက်စားချေရန်ထိုမျှအထိလုပ်နိုင်လေသည်။ ကောင်းအောင်ပြောရမည်ဆိုလျှင် သူသည်ယုံကြည်မှုလွန်ကဲနေသည့်အာဏာရှင်တစ်ယောက်ဖြစ်ပြီး သူ၏မိန်းမပျက်လေးအတွက် လက်စားချေရန်ကြိုးစားနေခြင်းဖြစ်သည်။ ရိုင်းရိုင်းပြောရမည်ဆိုလျှင် သူသည် စိတ်သဘောထားကျဥ်းမြောင်းကာ အမျိုးသမီးတစ်ယောက်အပေါ်မည်သို့အနိုင်ကျင့်ရမည်ကိုသာသိသော ခွေးကောင်ဖြစ်သည်။ 


ယဲ့ထျန်းက စုဝမ်အပေါ် သဘောကျခဲ့သည်ဖြစ်စေ၊ သဘောမကျခဲ့သည်ဖြစ်စေ အနည်းဆုံးတော့ စုဝမ်သည် သူ့ကို ငါးနှစ်ကြာအောင်အမှန်တကယ်သဘောကျခဲ့သည်။ ငါးနှစ်တိုင်တိုင် သူမ၏နှလုံးသားသည်သူ့အတွက်ပဲဖြစ်ခဲ့ကာ သူစိတ်ပျက်အောင်လည်း တစ်ခါမှမလုပ်ခဲ့ပေ။ 


သူအခုလိုပြုမူနေတာ တကယ်ယောက်ျားရောဟုတ်ရဲ့လား။ 


ရှစ်လိဟွားမေ ဒေါသထွက်သွားခဲ့သည်။ ယဲ့ထျန်း၏ကြီးကျယ်လှသောစကားတို့ကိုကြားပြီးနောက် ဤညီအစ်မသည် အမှန်တကယ်ယဲ့ထျန်းနှင့်သေသည်ထိ တိုက်ခိုက်ရန်ပြင်ဆင်ခဲ့၏။ သို့သော်လည်း စုဝမ်က ဟွားမေကိုပါဝင်မပတ်သက်စေလိုသောကြောင့် အုပ်စုမှ ထွက်ခဲ့လိုက်သည်။ 


ယဲ့ထျန်း၏အသည်းခွဲခြင်းခံခဲ့ရသောစုဝမ်သည် သူမနှင့်ယဲ့ထျန်း၏ခြေရာတို့ပြည့်နှက်နေ‌သော မြေပုံတစ်လျှောက် တစ်ယောက်တည်းလှည့်လည်သွားလာနေခဲ့သည်။ သူမက ဆုတောင်းပြည့်သစ်ပင်အား ဖြတ်သွားသောအခါ ဟွေ့မော့ယိရှောင်နှင့်တုလန်တို့စကားပြောရင်း ရယ်မောနေကြတာကိုတွေ့လိုက်သည်။ ထိုခဏတွင် အမုန်းတရားတို့သည် အဟောင်းအပေါ်အသစ်ပုံထပ်လာကာ စုဝမ်နှလုံးသားထဲတွင် ပေါက်ကွဲတော့သည်။ သူမက ရှည်ရှည်ဝေးဝေးစဥ်းစားမနေတော့ဘဲ ဟွေ့မော့ယိရှောင်အား နောက်တစ်ကြိမ်သတ်ပစ်တော့သည်။ 


ထို့နောက်တွင်တော့…


အင်း အဲ့နောက်မှာ မရှိတော့ဘူးဘဲ... 


ယခုတွင် စုဝမ်သည်သူမ၏ အဆင့်နိမ့်နတ်ဆရာနှင်တံအား အုံ့မှိုင်းစွာကြည့်နေမိသည်။ စုဝမ်က ဟွေ့မော့ယိရှောင်အား နှစ်ကြိမ်သတ်ခဲ့ပြီး ယဲ့ထျန်းနှင့်တုလန်တို့သည် သူမအားဖမ်းဆီးသတ်ဖြတ်ရန် ပြည်နယ်တစ်ခွင် အမိန့်ထုတ်ထား၏။ သူမ၏နံပါတ်အားဖျက်၍ ကစားခြင်းရပ်သွားသည်အထိ သတ်ချင်နေကြ၏။


လင်ရှန်းသည် ကမ္ဘာ့ပထမဆုံးသုံးဖက်မြင်ဂိမ်းဖြစ်ပြီး ကမ္ဘာ့အွန်လိုင်းဂိမ်းလောက၏၈၀%ကိုနေရာယူထားသည်။ ကမ္ဘာတစ်ဝှမ်းမှလူတိုင်းက လင်ရှန်းကိုကစားကြသည်။ 


ထို့အပြင် လင်ရှန်း၏စည်းမျဥ်းများအရ တရားဝင်နိုင်ငံသားတိုင်း အကောင့်တစ်ကောင့်သာထားနိုင်သည်။ တစ်ခါမှတ်တမ်းတင်ပြီးသွားလျှင် ထိုနံပါတ်အားမဖျက်မချင်း အိုင်ဒီနှင့်ဇာတ်ကောင်ပြောင်းလဲမရသလို အမည်ပြောင်း၍လည်းမရချေ။ 


စုဝမ် ဤတာဝန်ကျကမ္ဘာအားရောက်လာသည့်အချိန်တွင် မူလစုဝမ်သည် ငါးကြိမ်အသတ်ခံခဲ့ရပြီး အဆင့်နိမ့်ရွာသို့ ပြန်လည်ရောက်ရှိလာခဲ့သည်။ 


ပထမဆုံးအကြိမ်အဆင့်၁၀သို့ရောက်သည်အထိ အသတ်ခံရစဥ်က သူမသည် အရည်အသွေးမြင့်မားသည့် ပစ္စည်းများကိုဆုံးရှုံးလိုက်ရပြီး စုဝမ်ကထိုအချိန်တွင် ဝင်ရောက်ထားသောအုပ်စုမရှိခဲ့ချေ။ သူမကလယ်ကွင်းထဲတွင် ညလုံးပေါက် အဆင့်တင်နေခဲ့၏။ သူမရှစ်ထျန်းတွင်ရှိနေခဲ့တုန်းက အလွန်သစ္စာရှိခဲ့သောကြောင့် အခြားအုပ်စုများက မကျေနပ်ခဲ့ပေ။ ထို့ကြောင့် သူမသွားလေရာတွင် အမုန်းတရားတို့ကို အလိုအလျောက်ဆွဲငင်နေမိတော့သည်။


ဤသို့ဖြင့် သူမသည်ထပ်ခါထပ်ခါ ပုန်ကန်ခဲ့ပြီး အဆင့်နိမ့်ရွာသို့ပြန်ရောက်သည်အထိ ထပ်ခါထပ်ခါ အသတ်ခံခဲ့ရ၏။


ဤပုံရိပ်ယောင်ကမ္ဘာတွင် အဆင့်သည်အလွန်အရေးပါသည်။ အဆင့်မမြင့်ပါက ပစ္စည်းအကောင်းများ တပ်ဆင်အသုံးမပြုနိုင်သလို သက်ဆိုင်ရာအထက်တန်းစွမ်းရည်တို့ကိုလည်းအသုံးမပြုနိုင်ပေ။ 


မူလစုဝမ်တွင် အင်အားအကြီးဆုံးနတ်ဆရာမစွမ်းရည်တို့ရှိခဲ့‌သော်လည်း ယခုတွင် အဆင့်နိမ့်ရွာသို့ လျော့ချခံလိုက်ရသည်။ 


စုဝမ်သာထိုအချိန်က တာဝန်ဆောင်ရွက်ရန်မဝင်ရောက်လာခဲ့လျှင် မူလပိုင်ရှင်သည်ဇာတ်ကြောင်းအတိုင်း ဖြစ်နေခဲ့လောက်မည်။ သူမ၏ အကောင့်နံပါတ်အားဖျက်ကာ မကစားတော့ဘဲနေခဲ့လိမ့်မည်။ 


အဆုံးတွင်တော့ သူမသည် ယဲ့ထျန်း၏ရည်းစားဟောင်းဆိုသည့်ခေါင်းစဥ်ဖြင့်အမြှောက်စာနံပါတ်(၁)ဖြစ်ပြီး အမျိုးသမီးဇာတ်လိုက်နှင့်သူမ၏ပြိုင်ဘက်အတွက်လည်း အမြှောက်စာနံပါတ်(၁)ဖြစ်သည်။


သိပ်မကြာခင်တွင် လင်ရှန်းသည် စနစ်အဆင့်မြှင့်တင်ခြင်းလုပ်ဆောင်မည်ဖြစ်ပြီး ဘော့စ်ကဏ္ဍအသစ်အား ဖွင့်ပေးလိမ့်မည်။ ထိုအချိန်တွင် အုပ်စုကြီးများအချင်းချင်း ပြိုင်ဆိုင်တိုက်ခိုက်မှုများသည် အထွတ်အထိပ်သို့ရောက်ရှိမည်ဖြစ်ပြီး ထိုကဏ္ဍအားတိုက်ခိုက်အောင်မြင်ပြီးသည့်အခါ ဒေသအပြန်အလှန်ဆက်သွယ်ရေးချန်နယ်အား ဖွင့်ပေးလိမ့်မည်။ 


ဟွာရှား၏ဒေသရှစ်ခုကိုဖြတ်၍ ဒေသအပြန်အလှန်ဆက်သွယ်ရေးချန်နယ်အားဖွင့်ပေးပြီးနောက်တွင် ဒေသအလိုက်စစ်ဆင်နွှဲရေးလှုပ်ရှားမှုတို့လည်း စတင်လိမ့်မည်။ ထိုအချိန်တွင် စစ်မှန်သည့် ဉာဏ်ကြီးရှင်တို့သည် ဂိမ်းလောက၏လက်ရွေးစင်တို့ကိုစုဆောင်းကြမည်ဖြစ်ပြီး ဟွေ့မော့ယိရှောင်သည် ယှဥ်ပြိုင်မရနိုင်သည့် မေရီဆူးအရောင်အဝါတို့ကိုရရှိလာလိမ့်မည်ပင်။ သူမသွားသည့်နေရာတိုင်းတွင် သူမ၏မေရီဆူးအရောင်အဝါက ကမ္ဘာတစ်ခွင်တောက်ပနေပြီး အာဏာရှင်အများအပြား၏ ပိုးပန်းခြင်းနှင့် လေးစားအားကျမှုတို့အား အလိုအလျောက် ဆွဲငင်နေလိမ့်မည်။ 


ထိုအချိန်မှစ၍ စစ်မြေပြင်ရှစ်ခု၏တိုက်ပွဲသည် အမျိုးသမီးတစ်ယောက်အတွက် ရုန်းကန်စရာတစ်ခုဖြစ်နေရာ သူတို့၏အတွေးများကလည်း သူမ၏လွှမ်းမိုးခြင်းကိုခံရလိမ့်မည်သာ။ 


ထို့နောက်တွင် စုဝမ်သည် ဇာတ်ကြောင်းကိုဆက်မတွေးတော့ပေ။ သူမက အဆင့်နိမ့်ရွာ၏ သိုလှောင်ရုံကွပ်ကဲသူထံတွင် သူမ၏သိုလှောင်ရုံမှပစ္စည်းများကို စစ်ဆေးလိုက်သည်။ ယခင်က ပစ္စည်းများကို ဆုံးရှုံးလိုက်ရပြီး သူမကအဆင့်၁၀သို့ပြုတ်ကျသွားခဲ့သည်။ ကံကောင်းစွာနှင့် ယခင်က သူမသင်ယူထားခဲ့သော စွမ်းရည်များသည် တည်ရှိနေဆဲဖြစ်ပြီး သူမ၏သိုလှောင်ရုံတွင် တစ်ခါမှမသုံးရသေးသော သတ္တုရိုင်းများ၊ အထည်အလိပ်များနှင့် ပြည့်နှက်နေဆဲဖြစ်၏။ 


သူမ၏လက်ရှိပိုင်ဆိုင်မှုများကိုကြည့်ရင်း ခဏလောက်စဥ်းစားလိုက်ပြီး မျက်လုံးတို့ကိုမှိတ်၍ ဂိမ်းထဲမှ ထွက်လိုက်သည်။


ဂိမ်းဆက်သွယ်ရေးစက်ထဲမှနိုးလာခဲ့ပြီးနောက် လက်တွေ့ကမ္ဘာတွင် ညနေ၅နာရီရှိနေပြီဖြစ်သည်။ သူမက အိပ်ရာသို့သွား၍ ကွန်ပျူတာကိုဖွင့်လိုက်ကာ လင်ရှန်း၏တရားဝင်websiteအားစစ်ဆေးလိုက်သည်။ websiteတွင် ‌နောက်ဆုံးသတင်းတို့အား တင်ထားပြီးသည်မှာ သေချာသလောက်ရှိသည်။ တစ်ပတ်အကြာတွင် ပထမဆုံးကြီးမားသည့်စနစ်အဆင့်မြှင့်ခြင်းအား ဒုတိယအဆင့်စစ်ဆေးပြီးနောက်တွင် လုပ်ဆောင်မည်ဖြစ်ပြီး ‌ဘော့စ်ကဏ္ဍအသစ်အား ဖွင့်ပေးလိမ့်မည်။ ထိုကဏ္ဍတွင် နောက်ဆုံးထွက်ဝတ်စုံတို့သာမက အထူးပစ္စည်းများအတွက် များပြားသောကိရိယာများလည်းပါဝင်လာလိမ့်မည်။ 


အဆင့်မြင့်ကိရိယာများနှင့် ဝတ်စုံများသည် အုပ်စုကြီးများအတွက်မရှိမဖြစ် ဖြစ်ပြီး အုပ်စုတိုင်းအတွက် ၎င်းတို့က အခြေခံအုတ်မြစ်ပင်ဖြစ်သည်။ 


စနစ်အား အဆင့်မြှင့်တင်ပြီးနောက်တွင် ယဲ့ထျန်းနှင့်တုလန်နှစ်ယောက်လုံးသည် ထိုကဏ္ဍတွင်အာရုံစိုက်နေကြလိမ့်မည်။ ထိုအချိန်တွင် သူမအား အာရုံစိုက်နိုင်မည်မဟုတ်ပေ။ ၎င်းသည် ပြောင်းလဲပစ်ရန်အတွက် သူမ၏တစ်ခုတည်းသော အခွင့်အရေးဖြစ်သည်။ စုဝမ်က အခွင့်အရေးကို အမိအရဖမ်းဆုပ်ရန်ဆုံးဖြတ်လိုက်သည်။ 


သူမတစ်ပတ်လောက်ဂိမ်းမဆော့ဘဲနေကာ ဂိမ်းထဲမှထွက်သွားသည့်ပုံစံအားဖန်တီးလိုက်မည်။ ဤနည်းဖြင့် အခြားသူများက သူမအပေါ် အာရုံစိုက်ကြတော့မည်မဟုတ်ချေ။ တစ်ပတ်အကြာတွင် ဂိမ်းထဲသို့ပြန်ဝင်လိုက်ပြီး သူမအဆင့်တင်ရန် တစ်ယောက်‌ယောက်အား ရှာရမည်။ 


ထိုသူသည် စုဝမ်၏အကောင်းဆုံး လက်ရွေးစင်ဖြစ်သည်။ 


စုဝမ် offlineဖြစ်ပြီး ဗျူဟာဆွဲနေသည့်အချိန်တွင် အခြားမြို့တစ်မြို့ရှိ ကိုယ်ပိုင်ဗီလာတွင် စုရွေ့သည် ဂိမ်းဆက်သွယ်ရေးစက်ထဲမှ အမူအရာမဲ့နေသောမျက်နှာနှင့်ထွက်လာ၏။ 


အဲ့ရေခဲသခင်လေးဘာဖြစ်နေတယ်ဆိုတာ ဘယ်သူပြောနိုင်လဲ။


သူဖြစ်ချင်ခဲ့တာ ဓားသမားကွ...။ ဓားသမား မင်းနားလည်လား။ 


“သခင်လေး” 


စုရွေ့မျက်နှာမကောင်းသည်ကိုတွေ့‌သောအခါ ဆက်သွယ်ရေးစက်ဘေးတွင်ရပ်နေသော သက်လတ်ပိုင်းအိမ်တော်ထိန်းက သူ့ကိုစိုးရိမ်စွာကြည့်လာသည်။ 


“အာဟာရဓာတ်ဖြည့်ရည် ထပ်ထည့်ပေးရမလား” 


ယခုတွင် အိမ်တော်ထိန်းကြီးသည် သူ့သခင်လေး၏ခန္ဓာကိုယ်အား အလွန်စိတ်ပူနေ၏။


သခင်လေး၏ ပိန်ပါးကာအားနည်းသည့်ခန္ဓာကိုယ်ကြောင့် လင်ရှန်းတွင် မှော်ပညာရှင်သာဖြစ်လာခဲ့သည်။ ကံကောင်းစွာနှင့် စစ်ထူမိသားစုသည်ပိုက်ဆံလျော့ပါးမနေရာ ၎င်းအားတည်ဆောက်ရန် ပိုက်ဆံအများကြီးသုံးခဲ့ပြီးနောက် သခင်လေး၏မှော်ပညာရှင်ဇာတ်ကောင် ယဲ့ယွီသည်ဟွာရှားပြည်နယ် ဆဌမမြောက်ဒေသတွင် နံပါတ်တစ်ရေခဲမှော်ပညာရှင်ဖြစ်လာခဲ့သည်။ သို့သော် သခင်လေးက မကျေနပ်နိုင်သေးပေ။ သူကပြင်းပြင်းထန်ထန် အဆင့်တင်ပြီး အချိန်အများစုကို ဂိမ်းထဲတွင် မြေပုံတစ်လျှောက် ပြေးရင်းသာကုန်ဆုံးနေသည်။ ဆာဗာဖွင့်ပြီးသည်မှာ သုံးလသာရှိသေး၍ ဂိမ်းထဲတွင် လူတိုင်း၏ပျမ်းမျှအဆင့်က အဆင့်၅၀ဖြစ်ပြီး သခင်လေးကတော့အဆင့်၆၆ကိုရောက်နေကာ ပြည်နယ်တွင် နံပါတ်(၁)အဖြစ် ရပ်တည်နေသည်။


ထိုအခိုက် အိမ်တော်ထိန်း၏စကားကိုကြားသောအခါ စုရွေ့ ခေါင်းခါလိုက်သည်။ သူ့ကိုယ်တွင် အားအင်ပြည့်နေသည်ကိုခံစားရ၏။ အဆုံး၌ ဆုံးရှုံးသွားသောအချိန်နှင့်နေရာများတွင် တာဝန်ဆောင်ရွက်သူတို့သည် စတင်အမှတ်များရရှိသောအခါ ထိုအမှတ်များအား မစ်ရှင်ကမ္ဘာသို့ သယ်ဆောင်သွားနိုင်သည့် “Golden Finger” နှင့်လဲလှယ်နိုင်သည်။ ဤ “Golden Finger” သည်သိပ်မထူသော်လည်း ဘာမှမရှိတာထက်စာလျှင် ပိုကောင်းသည်။


စုဝမ်၏ “Golden Finger” သည်တာဝန်ကျကမ္ဘာတိုင်းတွင် သူမ၏နာမည်အရင်းအားအသုံးပြုရန်ဖြစ်သကဲ့သို့ စုရွေ့ရွေးချယ်ခဲ့သည်မှာ တာဝန်ကျကမ္ဘာတိုင်းတွင် သူ၏မူရင်းခန္ဓာကိုယ်ကိုသာအသုံးပြုရန်ဖြစ်သည်။ 


အခြားသူများက ၎င်း၏တန်ဖိုးကိုသံသယရှိကြသော်လည်း စုရွေ့အတွက်တော့ ၎င်းသည် အကြီးဆုံး “Golden Finger” ပင်ဖြစ်သည်။ မူရင်း စစ်ထူယဲ့သည် လုပ်ကြံသတ်ဖြတ်သူဖြစ်ချင်သော်လည်း သူ၏ခန္ဓာကိုယ်သည် နေမကောင်းဖြစ်နေကာ ခံနိုင်ရည်လည်းအားနည်းလေသည်။ လုပ်ကြံသတ်ဖြတ်သူဇာတ်ကောင်သည် အာရုံခံနိုင်စွမ်းမြင့်မားရန်လိုအပ်ကာ စစ်ထူယဲ့အတွက်မဖြစ်နိုင်ပေ။ 


စစ်သည်တော်နှင့်ဓားသမားဖြစ်ရန်လည်း အားနည်းလှသည့်သခင်လေးသည် ထိပ်ချွန်ဓားရှည်ကိုပင် မကိုင်နိုင်သောကြောင့် မမျှော်လင့်နိုင်ပေ။ 


ရလဒ်အနေနှင့် စစ်ထူယဲ့သည် မှော်ပညာရှင်ကိုသာရွေးချယ်နိုင်ခဲ့သည်။ ၎င်းကနတ်ဆရာကဲ့သို့ပင် ခန္ဓာကိုယ်ကြံ့ခိုင်မှုမလိုအပ်ဘဲ အဝေးမှတိုက်ခိုက်နိုင်သည့်ဇာတ်ကောင်အမျိုးအစားပင်။ 


ယခုတွင် စုရွေ့ရောက်ရှိလာသည်နှင့် အရာအားလုံးပြောင်းလဲသွားတော့မည်။ 


စုရွေ့ကခေါင်းငုံ့လိုက်ကာ ဂိမ်းထဲမှသူ့ဇာတ်ကောင်၏ ကိုယ်ရည်ကိုယ်သွေးတို့ကိုတွေးလိုက်၏။ 


အိုင်ဒီ : ယဲ့ယွီ 


လိင် : ယောက်ျား


အထူးပြု : မှော်ပညာရှင်


အဆင့် : ၆၆


ပါဝင်ထားသောအုပ်စု : ယုံးယဲ့ 


အကောင်းအဆိုးတန်ဖိုး : ၀


မူရင်းစစ်ထူယဲ့သည် စစ်တိုက်ရသည်ကိုစိတ်မဝင်စားပေ။ သူကအဆင့်သာတင်နေခဲ့၍ ဆာဗာစတင်ပြီး သုံးလကြာသည့်တိုင် လူတစ်ယောက်မှမသတ်ရသေးပေ။ 


သေချာပေါက် ယုံးယဲ့အုပ်စုရှိ အခြားသောအကြီးအကဲများသည် သူတို့၏မြင့်မြတ်၍အားနည်းလှသော ခေါင်းဆောင်အား ကောင်းကောင်းကာကွယ်ထားနိုင်သည့်အချက်ကြောင့်လည်းဖြစ်သည်။ 


“ကျွန်တော်ခဏသွားနားလိုက်ဦးမယ် ၈နာရီတိတိမှာ လာခေါ်ပါ”


သူက ဤကမ္ဘာ၏ ဇာတ်ကြောင်းအား စိတ်ထဲတွင်တွေးလိုက်သည်။ သူ၏ဇာတ်ကောင်အား ဒေသအနှံ့ဖြန့်ကျက်နိုင်ရန် တစ်လလောက်စောင့်ရဦးမည်ဟုခန့်မှန်းလိုက်သည်။ စုရွေ့စိတ်ရှုပ်သွား၏။ 


သူက စုဝမ်သည်လေးခုမြောက်ပြည်နယ်တွင်ရှိနေပြီး သူမကလက်ရှိတွင် အခြေအနေမကောင်းတာကိုသိ၏။


သို့သော် အခြေအနေတို့မည်မျှဆိုးဝါးနေပါစေ၊ စုဝမ်ကျော်ဖြတ်နိုင်လိမ့်မည်ဟု စုရွေ့ယုံကြည်သည်။


စုဝမ် ကိုယ့်ကိုစောင့်နေပါ...။ 


မင်းနောက်ကိုလိုက်ပြီးသတ်တဲ့လူတွေအားလုံးကို သူတို့အကောင့်နံပါတ်တွေဖျက်ပစ်ပြီး မကစားတော့တဲ့အထိ ကိုယ်သတ်ပစ်မယ် မဟုတ်ဘူး အဲ့ဒါတင်မကသေးဘူး သူတို့offlineဖြစ်သွားရင်တောင်မှ စစ်ထူမိသားစုရဲ့အင်အားကိုသုံးပြီး လက်တွေ့ကမ္ဘာမှာပါ ရပ်တည်မနေနိုင်အောင်လုပ်ပစ်မယ်...။ 


🚩

စာရေးသူမှာ ပြောစရာရှိ....

{ အခြားဘော့စ်တွေကိုစိုးရိမ်ဖို့မလိုပါဘူး စစ်ဖက်ရေးရာကျွမ်းကျင်တဲ့ မှော်ပညာရှင်ကိုသာစိုးရိမ်သင့်တယ် လင်ရှန်းမှာ သမိုင်းတွင်မယ့်အင်အားအကြီးဆုံးမှော်ပညာရှင် မွေးဖွာလာတော့မယ် ဘော့စ်အကြီးကြီးကို ဘယ်လိုခေါ်လဲသိကြလား ငါတို့မိသားစုရဲ့ စစ်သူကြီးစုကိုသာကြည့်ကြပါ...။ 


ဆာဗာတစ်ခုလုံးမှာ အကြီးမားဆုံးရွှေပေါင်လုံးကြီးက ဘယ်သူလဲ ငါတို့မိသားစုရဲ့ စစ်သူကြီးစုကိုသာကြည့်ကြပါ...။


စုဝမ် နာနာခံခံနဲ့ လာခဲ့လိုက်ပါ...ငါတို့ စစ်သူကြီးက မင်းကိုအလိုလိုက်လိမ့်မယ် အိုး....


၉၉၈မလိုဘူး ၉၈လည်းမလိုဘူး ၉.၉ပဲလိုတယ် စစ်သူကြီးစုက မင်းကိုအိမ်ပြန်ခေါ်သွားပြီး အမျိုးသားဇာတ်လိုက်ကို ဆုတ်ဖြဲပစ်လိမ့်မယ် ဆားဗာတစ်ခုလုံးကို စိုးမိုးချုပ်ကိုင်ပစ်လိမ့်မယ် }


__