MM Story Teller

Chapter 65

Viewers 4k

🚩Chapter - 65

Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 3 ]

_____

ဂိမ်းလောကမှသုံးရက်ကြာထွက်ခွာသွားပြီးနောက် စုဝမ်သည် ယခုရက်များအတွင်း ဘာမှမလုပ်ဖြစ်ပေ။ သူမသည် ဘဏ်တွင်စုဆောင်းထားသောငွေများကိုထုတ်လိုက်ကာ ရေတိုရင်းနှီးမြှုပ်နှံမှုတစ်ခုစတင်ရန်အတွက် ငွေလွှဲရန် အကောင့်တစ်ခုဖွင့်ခဲ့သည်။ ထို့နောက် မူလအလုပ်မှထွက်လိုက်ကာ ဂိမ်းစတူဒီယိုအား မေးလ်တစ်စောင်ပို့ခဲ့သည်။

ကျန်သည့်အချိန်များကိုတော့ စုဝမ်ကအပန်းဖြေရင်းသာကုန်ဆုံးလိုက်၏။

လက်တွေ့ကမ္ဘာ၌ သူမတွင် သူငယ်ချင်းအများကြီးမရှိပေ။ အလုပ်ကြောင့် သူငယ်ချင်းများနှင့် အဆက်အသွယ်သိပ်မလုပ်နိုင်ချေ။ သို့သော် ဂိမ်းထဲမှသူငယ်ချင်း ရှစ်လိဟွားမေသည် ယခုရက်များတွင် စုဝမ်လိုင်းမတက်တာကိုသတိထားမိ၏။ သူမကသည်းမခံနိုင်တော့သဖြင့် စုဝမ်ကိုဖုန်းခေါ်ကာ အခြေအနေတို့ကိုမေးမြန်းလိုက်သည်။

နှစ်ယောက်သည်တစ်မြို့တည်းဖြစ်သောကြောင့် စုဝမ်က သူမနှင့်ကော်ဖီဆိုင်တွင်တွေ့ရန်ချိန်းလိုက်သည်။

ရှစ်လိဟွားမေ၏ အမည်မှာ ရွှီဟွားဖြစ်၏။ သူမသည် ဂိမ်းထဲမှဇာတ်ကောင်ကဲ့သို့ အရပ်မရှည်သော်လည်း တက်ကြွဖျတ်လတ်ကာ နွေးထွေးပြီးသစ္စာရှိသည်။

သူတို့ကဂိမ်းထဲတွင်စသိခဲ့ကြသောကြောင့် တစ်ယောက်နှင့်တစ်ယောက် ဂိမ်းအိုင်ဒီဖြင့်သာခေါ်လေ့ရှိကြသည်။

“ဝမ်ယွဲ့ ဂိမ်းဆက်မဆော့တော့ဘူးလား”

သူမက Blue Mountainတစ်ခွက်မှာလိုက်ကာ စုဝမ်အား သနားနေသောမျက်နှာဖြင့်ကြည့်လိုက်သည်။ သူမသည်လည်း အွန်လိုင်းဂိမ်းများအား သဘောကျနှစ်သက်သူဖြစ်သည်။ နှစ်အများကြီးကြာပြီးနောက်တွင် သူမအထင်ကြီးလေးစားပြီး သူငယ်ချင်းဖြစ်ချင်ခဲ့သူမှာ စုဝမ်တစ်ယောက်တည်းသာဖြစ်သည်။

ရွှီဟွားက ရှစ်ထျန်းအုပ်စုထဲတွင်မရှိသော်လည်း သူတို့နှစ်ယောက်သည် ဂိမ်းထဲတွင် ခက်ခဲသည့်အချိန်များအား အတူဖြတ်ကျော်ကြခဲ့သည်။ ရှစ်ထျန်းအုပ်စုအတွက် စုဝမ်ပေးဆပ်ခဲ့သည်များကို ရွှီဟွားရှင်းရှင်းလင်းလင်းသိ၏။

ယခုတွင်တော့ ယဲ့ထျန်းကသူမကိုအလိုမရှိတော့ဟု ပြောလာခဲ့သည်။ ၎င်းက ရွှီဟွားအား အလွန်ဒေါသထွက်စေသည်။

“ဟွားမေ ငါထွက်လိုက်‌တာမဟုတ်ပါဘူး”

စုဝမ်က တည်တည်ငြိမ်ငြိမ်နှင့် ကော်ဖီတစ်ငုံသောက်လိုက်သည်။ ထို့နောက်သူမက မျက်လုံးမော့ကြည့်ကာ ဟွားမေအား လေးနက်စွာပြောလိုက်၏။

“ဒီရက်တွေမှာ ငါသေချာလေး အနားယူနေခဲ့တာ နောက်လာမယ့် အင်္ဂါနေ့ စနစ်အဆင့်မြှင့်ပြီးတဲ့အချိန်ကျရင် ငါလိုင်းတက်လာခဲ့မယ်”

“တကယ်လား”

စုဝမ်၏စကားများကိုကြားပြီးနောက် ဟွားမေ၏မျက်လုံးများအရောင်တောက်သွားသည်။ အုပ်စုခေါင်းဆောင်တစ်ယောက်အနေနှင့် ရွှီဟွားသည်စနစ်အဆင့်မြှင့်တင်ခြင်းအား စိုးရိမ်လျက်ရှိသည်။ စနစ်အသစ်သည် အုပ်စုကြီးများအားလုံးကို အလုပ်ရှုပ်အောင် လုပ်ဆောင်လိမ့်မည်။

ချက်ချင်းပင် ရွှီဟွားသည် စုဝမ်၏ အတွေးကိုသတိထားမိသွားကာ “ဝမ်ယွဲ့ နင်အရမ်းတော်တာပဲ ဒီလိုလုပ် နင်လိုင်းတက်လာရင် ရှောင်ယောင်တပ်ဖွဲ့ကိုဝင်လိုက် ငါနင့်ကိုအဆင့်ကူတင်ပေးမယ်”

“ဟင့်အင်း မဝင်တော့ဘူး”

စုဝမ်က ရွှီဟွား၏ဖိတ်ခေါ်မှုအား စိတ်မပါစွာငြင်းလိုက်သည်။

“ဟွား‌မေ နင့်အုပ်စုကအခုတောင် အဆင့်တော်တော်ကျနေတာ ငါ့အတွက်နဲ့ထပ်ဒုက္ခခံမနေပါနဲ့ ငါ့ကိုကူဖို့လူတစ်ယောက်ရှာတွေ့ထားပြီးပြီ သူကငါ့ကိုအဆင့်ကူတင်ပေးလိမ့်မယ်”

“အိုး”

စုဝမ်၏စကားကိုကြားပြီးနောက် ရွှီဟွားခဏတာမှင်သက်သွားသည်။ အကြောင်းမှာ ပြည်နယ်လေးခုလုံးတွင် သူမကဲ့သို့ တိရှစ်ထျန်းနှင့် တုလန်အား အာခံရဲသူမရှိသောကြောင့်ပင်။

စုဝမ်ပြောတဲ့လူကဘယ်သူများလဲ...

***(

ထိုအချိန်တွင် အခြားမြို့လည်ခေါင်ရှိ ကျွီဖုန်းအွန်လိုင်းဂိမ်းစတူဒီယိုတွင် အေးစက်သည့်မျက်နှာထားနှင့် လူသည် သူ့ရဲ့မေးလ်ထဲရှိ အီးမေးလ်တစ်ခုအား စိုက်ကြည့်နေသည်။

၎င်းကအလုပ်လျှောက်လွှာဖြစ်၏။ အလွန်ကိုထူးခြားသောအလုပ်လျှောက်လွှာဖြစ်သည်။

ဤအလုပ်လျှောက်လွှာကိုရေးပို့လိုက်သူမှာ ပြည်နယ်လေးခု၏ ရေပန်းအစားဆုံးဇာတ်ကောင် စုချန်းဝမ်ယွဲ့ပင်ဖြစ်သည်။

ကစားသူအများအပြားသည် ထိုနာမည်အားရင်းနှီးကျွမ်းဝင်စွာသိကြသည်။ သူမကရှစ်ထျန်းအုပ်စု၏ ဒုခေါင်းဆောင်ဖြစ်ခဲ့ပြီး လွန်ခဲ့သည့်လအနည်းငယ်တွင် ရှစ်ထျန်းအုပ်စုနှင့်အဆက်အသွယ်မရှိတော့ပေ။

ဆာဗာတစ်ခုလုံးအားစိုးမိုးခဲ့သော ထိုဒုခေါင်းဆောင်သည် ယခုတွင် ဂိမ်းထဲရှိကစားသူများအားလုံး၏ ပစ်မှတ်တစ်ခု ဖြစ်နေတော့သည်။ စုချန်းဝမ်ယွဲ့ဆိုသည့်အမျိုးသမီးသည် တစ်ယောက်တည်းဖြစ်နေ‌သော်လည်း ကြီးမားသောအာဏာရှင်များတောင်မှ လက်ရှိအခြေအနေအားကြောက်ရွံ့နေကာ သူမအားကူညီရန် စိတ်မကူးရဲကြချေ။

သို့သော်လည်း...

ထိုလူက မောက်စ်ကိုင်ထားသောလက်တို့ကိုလှုပ်ရှားလိုက်၍ အလုပ်လျှောက်လွှာအား အဆုံးအထိကြည့်လိုက်ရာ ဘဏ်အကောင့်နံပါတ်နှင့် လျှို့ဝှက်ကုတ်တို့ကိုတွေ့လိုက်ရသည်။

လျှို့ဝှက်ကုတ်အားစစ်ဆေးလိုက်ပြီးနောက် ထိုလူသည် ကိုယ်ပိုင်ကွန်ပျူတာသုံး၍ ဘဏ်အကောင့်ထဲသို့ ဝင်လိုက်သည်။ ဘဏ်အကောင့်ထဲမှ ပမာဏတို့ကိုတွေ့သောအခါ ထိုလူ၏မျက်လုံးတို့သည် ကျဥ်းမြောင်းသွားတော့၏။

တကယ်ကို စုချန်းဝမ်ယွဲ့ပီသပါပေတယ်...

သူမကိုသိခဲ့သည်မှာကြာပြီဖြစ်သော်လည်း သူမအားအပြည့်အဝလေးစားမိသည်မှာ ယခုကပထမဆုံးဖြစ်၏။

****

တစ်ပတ်ကုန်လွန်သွားကာ ဗားရှင်းအသစ်လဲအဆင့်မြှင့်တင်ပြီးသွားပြီး ဂိမ်းထဲ၌ ဒုတိယအဆင့်စစ်ဆေးမှုလိုပင် ပူပြင်းသည့်တိုက်ပွဲများစတင်နေပြီဖြစ်သည်။

တစ်ပတ်ကြာပြီးနောက် စုဝမ်က ဂိမ်းထဲသို့ပြန်ဝင်လိုက်သည်။ သူမကအဆင့်နိမ့်ရွာ၌ပင်ရှိနေသေး၏။

သူမကအဆင့်နိမ့်ရွာထဲမှထွက်လာလိုက်၍ ရွာ၏မြောက်ဘက်ရှိ မကောင်းဆိုးဝါးတို့ကိုသတ်လိုက်သည်။ အဆင့်၁၀မှ အဆင့်၁၁သို့ရောက်ရှိရန် များများစားစားမတွေ့ကြုံလိုက်ရပေ။

စုဝမ်က သူမ၏အခြေခံအလင်းပစ်ချက်စွမ်းရည်ကိုသုံး၍ ချစ်စရာကောင်းသည့်ယုန်တစ်ဒါဇင်ကျော်အား သတ်လိုက်ပြီးနောက် တစ်ကိုယ်လုံးလင်းလက်သွားကာ အဆင့်တက်သွားတော့သည်။

အဆင့်တက်သွားပြီးနောက် သူမကထိုနေရာတွင်ဆက်မနေတော့ဘဲ ယန်းချန်လွင်ပြင်ကိုရောက်သည်အထိ ဝေးဝေးသွားလိုက်သည်။ ၎င်းက အဆင့်၁၃သမားများအတွက်အဆင့်တင်သည့်နေရာဖြစ်ပြီး စုဝမ်အဆင့်တင်ရန်အသင့်တော်ဆုံးဖြစ်သည်။

ယခုကဲ့သို့အဆင့်နိမ့်သမားများအတွက်မြေပုံတွင် ဖြတ်သန်းသွားလာနေသူအနည်းငယ်သာရှိသည်။ စုဝမ်က စိတ်သက်သက်သာသာဖြင့် အနီးနားရှိ မကောင်းဆိုးဝါးတို့ကိုသတ်လိုက်၏။ တစ်နာရီမကြာသေးခင်မှာပင် စုဝမ်သည် အဆင့်၁၄သို့ရောက်ရှိသွားတော့၏။

အဆင့်၁၅၌ခက်ခဲလာသည်။ အဆင့်၁၅သို့ရောက်ရန် လုံးချန်မြို့စွန်သို့သွား၍ အဆင့်၁၅လူအုပ်တို့ကို သတ်ရမည်ဖြစ်သည်။

လင်ရှန်းတွင် လုံးချန်သည် လက်ရှိအကြီးမားဆုံးမြို့ဖြစ်သည်။ ဇာတ်ကောင်တိုင်းသည် အဆင့်၁၅ကိုရောက်ရှိမှသာ မြို့ထဲသို့ဝင်ရန်အရည်အချင်းပြည့်မီမည်ဖြစ်သည်။ လုံးချန်မြို့၏သတင်းပို့ဌာန၌ အမည်ကတ်အားတင်လိုက်ပြီးနောက် မည့်သည့်ဒေသမှမဆို လုံးချန်မြို့သို့ပြန်လာနိုင်သည့် စာလိပ်အား အသုံးပြုနိုင်မည်ဖြစ်သည်။ အကယ်၍ တည်နေရာပြအချက်အလက်အားအသုံးပြုသူဖြစ်ပါက ပြန်လည်ရှင်သန်သည့်နေရာအား မြို့လယ်ခေါင်သို့ပြောင်း‌‌ရွှေ့သတ်မှတ်နိုင်သည်။

စုဝမ်သည် လုံးချန်မြို့စွန်ဝင်ပေါက်၌ တုံ့ဆိုင်းနေမိသည်။ ထို့နောက် ခြေတစ်လှမ်းလှမ်းလိုက်သည်နှင့် သူမသည် မြေပုံအသစ်သို့ဝင်ရောက်သွားတော့သည်။ သူမမျက်လုံးတို့ကို နောက်တစ်ကြိမ်ပြန်ဖွင့်လိုက်သောအခါ သူမမြင်ကွင်းထဲသို့ဝင်လာသည်မှာ လွင်ပြင်မဟုတ်တော့ဘဲ စိမ်းစိုနေသည့်တောအုပ်ကြီးပင်။

ဤနေရာသည် ယခင်တစ်ခေါက်သူမအသတ်ခံလိုက်ရသောနေရာဖြစ်သည်။

မူလပိုင်ရှင်က အဆင့်၁၅သို့ရောက်တိုင်းဆိုးဝါးစွာအသတ်ခံခဲ့ရသည်ကိုတွေးမိသောအခါ စုဝမ်မျက်နှာသည် သုန်မှုန်သွားတော့သည်။

သူမကအနီးအနားပတ်ဝန်းကျင်အား ဂရုတစိုက်နှင့် စစ်ဆေးလိုက်၏။ ကံကောင်းစွာနှင့် လူအများစုသည် ကဏ္ဍအသစ်တွင်သာ တိုက်ခိုက်ရင်းအလုပ်ရှုပ်နေကြသည်။ လုံးချန်မြို့အစွန်တွင် မကောင်းဆိုးဝါးတို့ကို သုတ်သင်နေကြသောသူများသည် အသစ်ဝင်ရောက်လာသူများသူဖြစ်ပြီး ထိုအသစ်လေးများက စုချန်းဝမ်ယွီဆိုသည့်အိုင်ဒီအား မရင်းနှီးကြပေ။

သူမတစ်ပတ်စောင့်ခဲ့သည်မှာ အချည်းနှီးမဖြစ်သည့်ပုံပင်။ စုဝမ်က မကောင်းဆိုးဝါးတို့ ပေါများသည့်နေရာအား ရှာလိုက်ကာ တစ်ယောက်တည်းအဆင့်တင်နေလိုက်၏။

မကောင်းဆိုးဝါးများကိုသတ်၍ အဆင့်တင်ခြင်းသည် အလွန်ပျင်းဖို့ကောင်းပြီး လုံးချန်မြို့အစွန်မှ သစ်ပင်နတ်ဆိုးများနှင့် မီးအိမ်မကောင်းဆိုးဝါးများသည် အဆင့်နိမ့်ရွာအပြင်ဘက်ရှိ ချစ်စရာမကောင်းဆိုးဝါးလေးများနှင့် အများကြီးကွာလေသည်။

ကံကောင်းစွာနှင့် စုဝမ်ကသာမန်မိန်းကလေးတစ်ယောက်မဟုတ်ချေ။ ထိုစက်ဆုပ်ဖွယ်နတ်ဆိုးများနှင့်ပတ်သက်၍ သူမကဘာမှမခံစားရသော်လည်း သိပ်မဝေးသည့်နေရာတွင်အဆင့် တင်နေသောအဖွဲ့ထံမှ မိန်းကလေးတစ်ယောက်၏အော်သံအား ကြားနေရသည်။

“အိုက်ယား ဒီဘက်ကိုလာနေတယ် ကြောက်စရာကြီး”

“ဝူးဝူးဝူး ဒီမကောင်းဆိုးဝါးသေနေတာကြီးကရုပ်ဆိုးလိုက်တာ”

စုဝမ်က အသံကြားသည့်ဘက်သို့လှည့်ကြည့်လိုက်ရာ အသစ်ရောက်လာသည့်အဆင့်တင်နေသောအဖွဲ့မှာ အသက်ဆယ့်ငါး၊ ဆယ့်ခြောက်အရွယ်ကျောင်းသားသုံးယောက်သာဖြစ်ကြောင်းနားလည်လိုက်သည်။

ထိုမိန်းကလေး၏အော်သံသည် အတော်လေးဆူညံနေသော်လည်း စုဝမ်ကစိတ်အနှောက်အယှက်မဖြစ်သွားပေ။

ဒီအသက်အရွယ်မိန်းကလေးတွေက ယခုလိုအပြစ်ကင်းစင်ပြီးချစ်ဖို့ကောင်းသင့်တာ ဟွေ့မော့ယိရှောင်ကတော့ အသက်နှစ်ဆယ်ကျော်နေတာအသိသာကြီးကို အခုထိကလေးဆန်နေတုန်း တော်တော်ကွာခြားတာပဲ ကမ္ဘာကြီးက ဒီလောက်တောင်ပရမ်းပတာဖြစ်နေတာ ဘယ်သူ့ကိုပြဖို့ ဖြူစင်ယောင်ဆောင်နေတာလဲ

...

“ရား ဒီတစ်ကောင်ကဘာဖြစ်လို့ သူ့ခြေထောက်အောက်မှာ အနီ‌ရောင်စက်ဝိုင်းကြီးနဲ့လျှောက်သွားနေတာလဲ”

၎င်းက ထိုမိန်းကလေး၏အသံဖြစ်ပြီး ဤတစ်ခေါက်သူမအသံတွင်အံ့ဩမှုများဖြင့်ပြည့်နှက်နေသည်။

“အဲ့ဒါကို နတ်ဆိုးဘော့စ်အသေးစားလို့ခေါ်တယ်ဟ” သူမဘေးရှိ အသင်းဖော်ကလျင်မြန်စွာပြောလာ၏။

စုဝမ်အတွေးများသည် သူတို့၏စကားများဖြင့်နှောင့်ယှက်ခံလိုက်ရသည်။ သူမက အာရုံစိုက်ကြည့်လိုက်ရာ ခြေတစ်ဖက်ထဲပါသော အလင်းစက်ဝန်းထဲရှိသစ်ပင်နတ်ဆိုးဘော့စ်သည် ထိုအသစ်ဝင်ရောက်လာသူများ၏ ဝိုင်းရံထားခြင်းခံရတာကိုတွေ့လိုက်ရသည်။

ထိုကလေးများ နတ်ဆိုးဘော့စ်အားတွေ့ကြုံရသည်မှာ ပထမဆုံးဖြစ်ကြောင်းထင်ရှားသည်။ သူတို့သုံးယောက်သည် အဆင့်နည်းနေသေးပြီး ပစ္စည်းကိရိယာကောင်းကောင်းတို့လည်း မရှိသောကြောင့် ကြောက်လန့်နေကြသည်။ အဖွဲ့ခေါင်းဆောင်ဖြစ်ပုံရသည့် စစ်သည်တော်သည် ဘော့စ်ကြောင့် ချက်ချင်းပင် အသက်တစ်ဝက်ဆုံးရှုံးသွား၏။

“ရှောင်ဝူ အစ်ကိုကြီးကို သွေးဖြည့်ပေးလိုက်ဦး”

ပင်းဟွေ့ရှင်ကျဲ့ဟုခေါ်သောယောက်ျားလေးမှော်ပညာရှင်က ဘော့စ်အားဝန်းရံထားကာ အကွာအဝေးတစ်ခုမှ ရေခဲမြှားတို့ဖြင့်ပစ်ခတ်ရင်း ဘေးတွင်ရှိနေသော နတ်ဆရာမကိုသတိပေးလိုက်သည်။ သူပြောနေသူမှာ ခုဏက အော်ဟစ်နေသည့်မိန်းကလေးပင်ဖြစ်သည်။ သူမ၏အိုင်ဒီမှာ ဝူပေါင်ပေ့ဖြစ်သည်။

ပင်းဟွေ့ပြောနေသည်ကိုကြားသောအခါ ဝူပေါင်ပေ့က လျင်မြန်စွာနတ်ဆရာမနှင်တံအား လှုပ်ရမ်းလိုက်သည်။ သစ်ပင်နတ်ဆိုးဘော့စ်က ရုတ်တရက် သစ်ကိုင်းတို့ကိုဖြန့်ကျက်၍ တစ်အုပ်စုလုံးအား တိုက်ခိုက်လာသည့်အချိန်တွင် သူမက စွမ်းရည်တို့ကိုထုတ်နေရုံရှိသေးသည်။

“ရား ငါသွေးလျော့သွားပြီ”

ဝူပေါင်ပေ့ ကြောက်လန့်သွား၏။ သူမကထိတ်လန့်နေ၍ နောက်သို့ခြေလှမ်းအနည်းငယ်ဆုတ်လိုက်ကာ ချက်ချင်းပင် သူမကိုယ်သူမ သွေးပြန်ဖြည့်လိုက်သည်။

ထိုအချိန်တွင် ဘေးဘက်မှစစ်သည်တော်၌ သွေးအနည်းငယ်သာကျန်တော့သည်။ ဤစစ်သည်တော် (အဓိကခုခံသူ) သာကျဆုံးသွားပါက ကျန်နှစ်ယောက်လည်းလျင်မြန်စွာအသတ်ခံရပြီး မြို့ထဲသို့ပြန်ရောက်သွားမည်ဖြစ်သည်။

ထိုအချိန်တွင် ရုတ်တရက် စစ်သည်တော်၏ခန္ဓာကိုယ်သည် တောက်ပလာသည်။ ထို့‌နောက် သူ့ခေါင်းအထက်တွင် နံပါတ်တို့ ဆက်တိုက်ပေါ်လာတော့သည်။

“+၁၀၀၊ +၁၀၀၊ +၁၀၀”

နတ်ဆရာရဲ့ ကုစားတဲ့စွမ်းရည်ပဲ

ဝူပေါင်ပေ့နှင့် ပင်းဟွေ့ရှင်ကျဲ့တို့ မသိစိတ်အရလှည့်ကြည့်လိုက်သောအခါ သူတို့အနောက်တွင် နတ်ဆရာမဝတ်စုံဝတ်ဆင်ထားပြီး တည်ငြိမ်စွာရပ်နေသော ငယ်ရွယ်သောမိန်းမပျိုလေးကိုတွေ့လိုက်ရသည်။

“ငါ့ကိုကြည့်မနေကြနဲ့ မကောင်းဆိုးဝါးကိုဆက်တိုက်ကြလေ”

“အိုး အိုး”

ပင်းဟွေ့ရှင်ကျဲ့ကချက်ချင်းပင် ပြန်လှည့်လိုက်ကာ မကောင်းဆိုးဝါးအားတိုက်ခိုက်နေစဥ် ဝူပေါင်ပေ့က ရုတ်တရက်ပေါ်လာသည့် နတ်ဆရာမ၏အိုင်ဒီကိုကြည့်နေသည်။

စုချန်းဝမ်ယွဲ့

အား အား အား အား

ဝူပေါင်ပေ့မှာ စိတ်မထိန်းနိုင်‌တော့ပေ။

စုချန်းဝမ်ယွီ တကယ်ကိုစုချန်းဝမ်ယွဲ့ဟ အိုင်ဒေါကိုဒီနေ့မှာအရှင်လတ်လတ်တွေ့လိုက်ရပြီ....

--------------

🚩

Prev Next