MM Story Teller

Chapter 66

Viewers 4k

🚩Chapter - 66

Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 4 ]

_____

စုဝမ်၏ကူညီမှုဖြင့် ကလေးသုံးယောက်သည် ဘော့စ်အား ချောမွေ့စွာနှိမ်နင်းနိုင်လိုက်သည်။ သစ်ပင်နတ်ဆိုးဘော့စ် နောက်ဆုံးသွေးစက်သာ ကျန်တော့သည့်အချိန်တွင် စုဝမ်မသတ်သေးခင်၌ ဖိတ်ခေါ်လွှာ မျက်နှာပြင်ကရုတ်တရက်ပေါ်လာခဲ့သည်။

ဝူဖုန်းက သင့်အား အသင်းသို့ပူးပေါင်းရန် ဖိတ်ခေါ်ပါသည်။

ပူးပေါင်းပါမည်လား

ပူးပေါင်းမည်/မပူးပေါင်းပါ

ဝူဖုန်းက ထိုစစ်သည်တော်၏အိုင်ဒီဖြစ်သည်။ သူကစကားတစ်ခွန်းမှမပြောသေးပေ။ ငယ်ရွယ်သည့်ကောင်လေးတစ်ယောက်ဖြစ်သော်လည်း အတော်လေးတည်ငြိမ်လှသည်။

စစ်သည်တော်ဝူဖုန်း

ထိုကလေး၏အချက်အလက်များသည် စုဝမ်၏ခေါင်းထဲတွင်ပေါ်လာ၏။ မူလဇာတ်ကြောင်းတွင် ဝူဖုန်းသည် ဒေသအပြန်အလှန်တိုက်ပွဲများ၌ ဟွာရှားဒေသတစ်ခုလုံးအား ကြီးမားသောပံ့ပိုးမှုဖြစ်စေခဲ့သည်။ သူက စစ်သည်တော်တစ်ယောက်ဖြစ်ပြီး အာရုံခံနိုင်စွမ်းနှင့် လုပ်ဆောင်ချက်များတွင် မည်သူမှလိုက်မမီနိုင်ချေ။ မူလဇာတ်ကြောင်းတွင် သူကမည်သည့်အုပ်စုများ၊ အသင်းများ၊ ဂိမ်းစတူဒီယိုများနှင့် ဆက်သွယ်မှုမရှိဘဲ တစ်ကိုယ်တော်လှုပ်ရှားခဲ့သည်။

ထိုကဲ့သို့သောသူမျိုးသည် သူငယ်ချင်းအဖြစ်လက်ခံရန်ထိုက်တန်၏။

စုဝမ်က ပူးပေါင်းမည်ကိုနှိပ်ကာ သူမအသင်းကိုပူးပေါင်းလိုက်သည့်အချိန်မှာပင် နတ်ဆိုးဘော့စ်၏ အသက်ပြဘားတန်းသည် ကုန်သွားတော့သည်။ ကြီးမားသည့် ခန္ဓာကိုယ်ကြီးသည် မြေပေါ်ကျသွားကာ ဖုန်မှုန့်တို့လွင့်စင်လာသည်။ ထို့နောက် တိုက်ပွဲ၏ဆုလာဘ်တို့သည် မြေပေါ်တွင်ပေါ်လာ၏။ အသုံးများသော ငွေဒဂ်ါးများ၊ဆေးဝါးများအပြင် ပစ္စည်းကိရိယာသုံးခုလည်းပါသည်။

တစ်ခုသည် အဆင့်၁၅ အပြာရောင်လုပ်ကြံသတ်ဖြတ်သူသံချပ်ကာဖြစ်ပြီး နောက်တစ်ခုမှာ အဆင့်၁၈ အပြာရောင်စစ်သည်တော်ဒိုင်းဖြစ်ကာ နောက်ဆုံးတစ်ခုမှာ အရည်အသွေးကောင်းမွန်သည့် ခရမ်းရောင် မှော်ပညာရှင်လက်အိတ်များဖြစ်သည်။

ထိုကဲ့သို့သောဆုလာဘ်များသည် အတော်ကောင်းမွန်သည်ဟုပြောရမည်။ ဤအသင်း၏ဇာတ်ကောင်များရဲ့ကံက ကောင်းမွန်သည်ဟုစုဝမ်ခံစားလိုက်၏။

“ဝါး ခရမ်းရောင် ပစ္စည်းကွ”

ပင်းဟွေ့ရှင်ကျဲ့က အခြားသူများကိုဂရုမစိုက်ဘဲ ခရမ်းရောင် ပစ္စည်းအား ကောက်လိုက်ကာ သိုလှောင်အိတ်ထဲသို့ ထည့်လိုက်သည်။ ခရမ်းရောင်ပစ္စည်းများ၏ အနိမ့်ဆုံးအဆင့်မှာ ၂၀ဖြစ်ပြီး သူကအဆင့်၁၅ပင်ရှိသေးသောကြောင့် ယခုဝတ်ဆင်၍မရချေ။

ဝူဖုန်းက သူ၏အပြုအမူအား ကျင့်သားရနေပုံပေါက်ပြီး နောက်သို့လှည့်ကာ စစ်သည်တော်ဒိုင်းအား ကောက်ယူလိုက်သည်။

ထို့နောက်ချက်ချင်းပင် စုဝမ်ကိုမော့ကြည့်လိုက်ကာ ဘေးတွင်လာရပ်၍ “ဝမ်ယွဲ့ မင်းက ဒီပစ္စည်းတွေကိုအသုံးမပြုနိုင်ဘူး ဒါကြောင့်ငါအကုန်သိမ်းလိုက်ပြီ တူညီတဲ့တန်ဖိုးအဖြစ် ရွှေဒင်္ဂါးတွေပေးလို့အဆင်ပြေလား”

လင်ရှန်းတွင် ငွေဒင်္ဂါးတစ်ထောင်သည် ရွှေဒင်္ဂါးတစ်ပြားနှင့်ညီမျှကာ ဂိမ်းထဲမှ ရွှေဒင်္ဂါးများနှင့်လက်တွေ့ကမ္ဘာမှငွေကြေးတို့လဲလှယ်သည့်တန်ဖိုးမှာ ရွှေဒင်္ဂါးဆယ်ပြားကို တစ်ယွမ်ကျသင့်သည် ဖြစ်သည်။

နောက်ပိုင်းတွင် ဂိမ်းစနစ်တဖြည်းဖြည်းတိုးတက်လာသည်နှင့်အမျှ လင်ရှန်းသည် လူသားမျိုးနွယ်၏ ဒုတိယကမ္ဘာဖြစ်လာလိမ့်မည်။ ဂိမ်းထဲမှရွှေဒင်္ဂါးတို့သည် လက်တွေ့ကမ္ဘာမှငွေကြေးတို့ထက် ပိုအဖိုးတန်လာမည်သာမက လင်ရှန်းရှိ မြေယာပိုင်ဆိုင်မှုများနှင့် သိုလှောင်ပစ္စည်းတို့သည်လည်း လက်တွေ့ကမ္ဘာမှအရာများထက် ပိုအဖိုးတန်လာလိမ့်မည်။

ဝူဖုန်း၏စကားတို့ကိုကြားသော် စုဝမ်ကပြုံးလိုက်သည်။ ဝူဖုန်းက RMB ကစားသူဖြစ်ကြောင်းသိလိုက်၏။ သို့မဟုတ်လျှင် ပိုမိုခက်ခဲလာသည့်ပတ်ဝန်းကျင်တွင် သူတစ်ယောက်တည်းဆက်လက်မရှင်သန်နိုင်ပေ။

“ငါလည်း ငွေပြတ်မနေပါဘူး သူငယ်ချင်းတွေပဲလုပ်ရအောင်”

သူမကပြောလိုက်ပြီး သူတို့သုံးယောက်အား သူငယ်ချင်းဖွဲ့သည့်တောင်းဆိုချက်ပို့လိုက်သည်။ သူတို့လက်ခံလိုက်သည်အထိ စောင့်နေလိုက်ပြီးနောက် စုဝမ်သည် တုံ့ဆိုင်းမှုမရှိ အသင်းမှမြန်မြန်ထွက်လာလိုက်သည်။

“အိုင်ဒေါ”

တစ်ချိန်လုံးငူငိုင်နေခဲ့သော ဝူပေါင်ပေ့သည် နောက်ဆုံးတွင် အသိစိတ်ပြန်ကပ်လာကာ စုဝမ်အားအော်ခေါ်လိုက်သည်။

“အိုင်ဒေါ ဘယ်လိုလုပ်ဖြစ်လို့အဆင့်၁၅ပဲရှိတော့တာလဲ”

အမှန်တကယ်တွင် စုဝမ်အသင်းသို့ပူးပေါင်းလာသည့်အချိန်မှစ၍ ဝူပေါင်ပေ့ကအတွေးထဲတွင်နစ်မျောနေခြင်း ဖြစ်သည်။ သူမက စုဝမ်၏အဆင့်အား အဆင့်ပြကော်လံတွင်တွေ့သောအခါ မယုံကြည်ရဲခဲ့ပေ။

အိုင်ဒေါက ပြည်နယ်မှာ အင်အားအကြီးဆုံးနတ်ဆရာဖြစ်ရမှာလေ...အဆင့်၆၀မဟုတ်ရင်တောင် အဆင့်၅၅‌လောက်ရှိနေရမှာ။

ဘယ်လိုဖြစ်လို့အဆင့်၁၅ပဲဖြစ်နေရတာလဲ။

စုဝမ်၏ ‌ထွက်သွားနေသာ ခြေလှမ်းများက ရပ်တန့်မသွားပေ။

“ဘာမှမဟုတ်ပါဘူး အဆင့်အတော်လေးကျသွားတဲ့အထိ ရန်သူတွေသတ်တာခံလိုက်ရတာ ဒါပါပဲ”

ထိုစကားတို့သည် လေနှင့်အတူကျန်ခဲ့ကာ စုဝမ်ကနောက်ကိုပြန်လှည့်မကြည့်ဘဲထွက်သွားတော့၏။

“ဒီတစ်ခေါက် ငါမင်းအပေါ်အကြွေးတင်သွားပြီ”

ဝူဖုန်းသည် သူမနှင့် ကိုယ်ပိုင်စကားပြောခန်းတွင် ထိုစကားတို့အား ပို့လိုက်သည်။ စုဝမ်က၎င်းကို တစ်ချက်ကြည့်လိုက်ကာ စကားပြောခန်းကိုပိတ်လိုက်သည်။

သူမကကောင်းမွန်သည့်လုပ်ရပ်များကိုလုပ်တတ်သူမဟုတ်ပေ။ ယနေ့သူတို့ကိုကူညီခဲ့ခြင်းမှာလည်း ဝူဖုန်း သူမအပေါ်အကြွေးတင်စေချင်၍ဖြစ်သည်။

ထွက်ခွာသွားသည့် စုဝမ်၏နောက်ကျောကိုကြည့်ကာ သူတို့သုံးယောက်က ခေတ္တမှင်သက်နေကြကာ နေ့တစ်ဝက်ကုန်ဆုံးသွားပြီးနောက် ပင်းဟွေ့ရှင်ကျဲကရုတ်တရတ် အော်ဟစ်လာတော့သည်။

“အိုက်ယား ငါမှတ်မိပြီ ငါမနေ့ကငါ့အတန်းဖော်ရဲ့အစ်ကိုက ရှစ်ထျန်းအုပ်စုထဲမှာရှိပြီး အုပ်စုထဲဝင်ဖို့ငါ့တို့အတွက် ထောက်ခံချက်ပေးနိုင်တယ်လို့ပြောခဲ့တယ်မလား အခုတလောအုပ်စုထဲမှာအပြောင်းအလဲကြီးကြီးမားမားတွေ ဖြစ်နေပြီး အဲ့ဒါတွေက စုချန်းဝမ်ယွဲ့နဲ့ပတ်သက်နေတယ်လို့ပြောနေတာကြားခဲ့တယ် ခဏစောင့်နေကြဦး ငါမေးလိုက်ဦးမယ်”

ပင်းဟွေ့ရှင်ကျဲ့ကချက်ချင်းပင် သူငယ်ချင်းစာရင်းကိုဖွင့်လိုက်ကာ သူ့သူငယ်ချင်း၏အကောင့်ကားနှိပ်လိုက်ကာ စတင်စကားပြောလိုက်သည်။

ခဏကြာပြီးနောက် ပင်းဟွေ့ရှင်ကျဲ့၏ မျက်နှာသည်ထူးဆန်းလာကာ “ဝမ်းကွဲအစ်ကို ရှောင်ဝူ စုချန်းဝမ်ယွဲ့က ရှစ်ထျန်းအုပ်စုကနေထွက်သွားပြီလို့ ငါ့သူငယ်ချင်းရဲ့အစ်ကိုကပြောတယ် အဲ့အပြင် လတ်တလော တိရှစ်ထျန်း(ယဲ့ထျန်း)နဲ့တုန်လန်နှစ်ယောက်လုံးက သူမကိုသတ်ဖြတ်မိန့်တွေထုတ်ထားတယ်တဲ့ အဲ့အမိန့်မှာ စုချန်းဝမ်ယွဲ့ကို အဆင့်တစ်ဆင့်ချနိုင်သူအားလုံးဆုကြေးငွေအလိုအလျောက်ရရှိမယ်လို့ပြောထားတယ်”

တိရှစ်ထျန်းနဲ့တုလန်လား။

သူတို့နှစ်ယောက်က ရန်သူတွေမဟုတ်ဘူးလား။

ဝူဖုန်းကစဥ်းစားနေရင်း မျက်ခုံးတို့တွန့်ချိုးလာ၏။ သူသည် ယခင်ကတည်းကဂိမ်းဆော့နေခဲ့သော်လည်း သေချာအကျွမ်းတဝင်မရှိခဲ့ပေ။ ယခုနှစ်များတွင် သူ့အားစိတ်ဝင်စားအောင်လုပ်နိုင်ခဲ့သည်မှာ လင်ရှန်းသာဖြစ်သည်။ အမှန်တကယ်တွင် ဝူဖုန်း၏ပင်ကိုယ်စရိုက်အရ သူသည် အချုပ်အနှောင်တို့ကိုမကြိုက်ချေ။ သူကမည်သည့်အုပ်စုကိုမှ ဝင်ရောက်ရန်စိတ်ကူးမရှိသော်လည်း သူ၏ညီမသည် စုချန်းဝမ်ယွဲ့အား အလွန်နှစ်သက်သည်။ ယခုတစ်ခေါက်တွင် သူကညီမနှင့်ဝမ်းကွဲညီတို့ကိုခေါ်ကာ ဂိမ်းထဲသို့အတူဝင်လာခဲ့ကြပြီး သူ့ညီမ၏ဆန္ဒအတိုင်း ရှစ်ထျန်းအုပ်စုသို့ဝင်ရန်စီစဥ်ထားသော်လည်း ရှစ်ထျန်းတွင် ထိုကဲ့သို့ကိစ္စများ ဖြစ်ပျက်နေလိမ့်မည်ဟုထင်မှတ်မထားခဲ့ချေ။

ပင်းဟွေ့ပြောပြသည့်စကားများအရ ဝူပေါင်ပေ့သည်လည်း စုချန်းဝမ်ယွဲ့၊ ယဲ့ထျန်း၊ ဟွေ့မော့ယိရှောင်နှင့် တုလန်တို့၏ လေးပွင့်ဆိုင်ဇာတ်လမ်းကို သတိထားမိသည်။

အဖြစ်အပျက်တို့ကိုယေဘူယျနားလည်သွားပြီးနောက် ဝူပေါင်ပေ့ကချက်ချင်းပင် နတ်ဆရာနှင်တံအား ဒေါသတကြီးနှင့်ဝှေ့ယမ်းလိုက်သည်။

“ဒီအနိုင်ကျင့်တဲ့သူတွေ လွန်လိုက်တာ။ သုံးစားမရတဲ့လူတွေ… ရာရာစစ ငါ့အိုင်ဒေါကိုအနိုင်ကျင့်ရဲတယ်ပေါ့ ကိုကြီး ကိုကြီးကအတော်ဆုံးလေ အဲဒါကြောင့် ညီမရဲ့အိုင်ဒေါ လက်စားချေတာကိုကူညီပေးရမယ်”

လက်စားချေတာလား...

အဆင့်၆၅ရောက်နေတဲ့ တိရှစ်ထျန်းကနေစရမလား ဒါမှမဟုတ် အဆင့်၆၄ တုလန်လား.. ဒါမှမဟုတ် အဆင့်၅၅ ရောက်နေတဲ့ ဟွေ့မော့ယိရှောင်ကနေစရမလား။

ယခုတွင် ဝူပေါင်ပေ့သည် သူ့အစ်ကိုက အဆင့်၁၅သာရှိသေးတာကိုမေ့နေသည့်ပုံပင်။

“မြန်မြန်အဆင့်တင်ရအောင် သူမကိုအကြွေးတင်ထားတာ ပြန်ဆပ်ရမှာပေါ့”

စုဝမ်ထွက်သွားပြီးနောက် သူမသည် ထိုကလေးသုံးယောက်က အလိုအလျောက် သူမ၏အဖွဲ့ဝင်များအဖြစ် မှတ်ယူလိုက်ကြသည်ကို မသိလိုက်ပေ။ ယခုတွင် စုဝမ်အတွေ့အကြုံသည် ၈၀%ရှိနေပြီး လုံးချန်သို့မဝင်ခင် အဆင့်၁၆ထိရောက်ရန်တွေးထားတာ အခြေအနေတို့ကိုစောင့်ကြည့်နေသည်။

ထိုအချိန်တွင် ရင်းနှီးလှသည့် လေအေးတစ်ချက်က နောက်ကွယ်မှတိုက်ခိုက်လာသည်…

ချုံခိုဓားကွက်စွမ်းရည်…

လုပ်ကြံသတ်ဖြတ်သူပဲ...

စုဝမ်ခန္ဓာကိုယ်ကတောင့်ခဲသွား၏။ သူမကရှည်လျားသည့်နတ်ဆရာမဝတ်ရုံကိုဝတ်ထားသော်လည်း ကျွမ်းကျင်စွာ ငုံ့ချလိုက်ပြီး အေးစက်နေသည့်လက်နက်က သူမဝတ်ရုံ၏အစွန်းကိုပိုင်းဖြတ်လိုက်သည်။ အနည်းငယ်ရှပ်ထိရုံလေးသာဖြစ်သော်လည်း စုဝမ်က အသက်၉၉၉လျော့သွားလေသည်။ ချက်ချင်းပင် သူမဇာတ်ကောင်၏ အသက်ပြဘားတန်း၌ တစ်ဝက်တိတိလျော့သွား၏။

စုဝမ်ကချက်ချင်းပင် သူမကိုယ်သူမ အခြေခံကုစားစွမ်းရည်အသုံးပြုလိုက်၍ ကုသလိုက်ရာ နောက်တစ်စက္ကန့်တွင် သူမကိုယ်ခန္ဓာကိုယ်သည် လင်းလက်လာ၏။

အဆင့်မြင့်ကုစားစွမ်းရည်ပါလား။

အဖြူရောင်နတ်ဆရာမဝတ်စုံကိုဝတ်ဆင်ထားသော အမျိုးသမီးတစ်ယောက်သည် သစ်ပင်နောက်မှထွက်လာကာ ဝတ်ရုံစက လေတွင်ကြော့ရှင်းစွာ လွင့်ဝဲနေသည်။

နင်းမုန့်ပုရွှမ် အဆင့်၆၀ နတ်ဆရာမ။

စုဝမ်ထိုအမျိုးသမီးအား မှတ်မိသည်။ ယခုသူမဝတ်ဆင်ထားသောဝတ်ရုံမှာ အလင်းသစ္စာဟုအမည်တွင်သည်။ လက်ရှိ ပြည်နယ်တစ်ခုလုံးတွင် ၎င်းကတစ်စုံတည်းသာရှိ၏။ အတိတ်တွင် စစ်မြေပြင်သို့စုဝမ်သည် ရှစ်ထျန်းမှလူများကိုခေါ်၍ သုံးရက်သုံးညတိုင်တိုင် တိုက်ပွဲဝင်ခဲ့သည်။ သို့သော် ၎င်းတို့ကအချည်းနှီးပင်။ တိရှစ်ထျန်းနှင့် တုလန်တို့သူမနောက်ကိုလိုက်ခဲ့တုန်းက သူမက ထိုဝတ်ရုံအား ဆုံးရှုံးခဲ့ရသည်။ ၎င်းကယခုတွင် နင်းမုန့်ပုရွှမ်၏ ခန္ဓာကိုယ်ထက်၌ ရောက်ရှိနေလိမ့်မည်ဟုထင်မထားခဲ့ပေ။

“မတွေ့ရတာကြာပြီနော်”

နင်းမုန့်ပုရွှမ်က လှပသောအမျိုးသမီးတစ်ယောက်မဟုတ်ပေ။ ယခုတွင် သူမ၏ခန္ဓာကိုယ်သည် ဆောင့်ကြွားနေပြီး ချဥ်းကပ်မရနိုင်သည့် အရောင်အဝါတို့ဖုံးလွှမ်းနေကာ သူမအသံကလည်း အေးစက်နေသည်။ သူမ၏မျက်နှာတွင်တော့ ခံစားချက်တစ်စွန်းတစ်စတောင်မမြင်ရချေ။

“ဧကရာဇ် နင့်ရဲ့မိန်းမမျက်နှာကအကြောသေနေတဲ့ပုံပဲ နင်ဘယ်လိုထင်လဲ”

စုဝမ်က နင်းမုန့်ပုရွှမ်အား ပြုံးရုံပြုံးပြလိုက်သည်။ ထို့နောက်ချက်ချင်းပင် သူမနောက်မှ လုပ်ကြံသတ်ဖြတ်သူအား လှည့်ကြည့်လိုက်သည်။

အရှင်ဧကရာဇ် ဟွာရှားပြည်နယ်လေးခုရဲ့ နံပါတ်တစ်လုပ်ကြံသတ်ဖြတ်သူ (အရှင်ဧကရာဇ်-ဂိမ်းအိုင်ဒီ)

သူကယခုတွင် လုပ်ကြံသတ်ဖြတ်သူအနက်ရောင်ဝတ်စုံကိုဝတ်ထားသည်။ စုဝမ်ကိုယခုလေးတင် တိုက်ခိုက်ခဲ့သော လက်နက်မှာအရှင်ဧကရာဇ်၏ အထူးလက်နက် “ညရှိုက်သံ” ဖြစ်သည်။

စုဝမ်၏အဓိပ္ပာယ်မရှိသည့် စကားတို့ကိုကြားသောအခါ အရှင်ဧကရာဇ်က မျက်ခုံးပင့်လိုက်၍ “မတွေ့ရတဲ့ခဏလေးမှာ ဟာသဉာဏ်တွေတိုးတက်လာတာပဲ ခွေးကောင်တိရှစ်ထျန်းဆီကထွက်လာတဲ့နောက်ပိုင်း မင်းရဲ့ အိုင်ကျူကအတော်လေးမြင့်လာတဲ့ပုံပဲ”

စုဝမ်ကပြန်မတုံ့ပြန်ဘဲ အရှင်ဧကရာဇ်၏ သုန်မှုန်ခက်ထန်နေသည့်မျက်နှာကိုသာကြည့်နေလိုက်သည်။

အရှင်ဧကရာဇ်က စုဝမ်အားမျက်ခုံးပင့်ကြည့်လိုက်ပြီးနောက် အသင်းသို့ပူးပေါင်းရန်ဖိတ်ခေါ်လိုက်သည်။ စုဝမ်က အသင်းကိုပူးပေါင်းပြီးမှ အသင်းထဲတွင်အခြားနှစ်ယောက်ရှိနေကြောင်းသတိထားမိ၏။

လျင်မြန်သည့်ဓားသွား အဆင့်၆၂ စစ်သည်တော်

သုညဒီဂရီလောင်ကျွမ်းမှု အဆင့်၆၃ မှော်ပညာရှင်

[ T/N e-tranမှာ ဂိမ်းအိုင်ဒီတွေကို နာမည်နဲ့မဟုတ်ဘဲ အဓိပ္ပာယ်တွေနဲ့ပြန်ထားတာမို့ အဲ့အတိုင်းပဲဆက်ပြန်လိုက်ပါတယ်နော် ]

ယခုတွင်အခြားနှစ်ယောက်သည် သူတို့နှင့်အတူမြေပုံထဲတွင်ရှိမနေပေ။ သူတို့နှစ်ယောက်၏ ပရိုဖိုင်များက မီးခိုးရောင်ဖြစ်နေသော်လည်း အသင်းချန်နယ်တွင်တော့ စာပို့၍ရသည်။

လျင်မြန်သည့်ဓားသွား : ဟာရီကိန်းအဖွဲ့ကနေကြိုဆိုပါတယ်။

သုညဒီဂရီလောင်ကျွမ်းမှု : နတ်ဘုရားမဝမ်ယွဲ့ အကာအကွယ်ပေးပါ။

နင်းမုန့်ပုရွှမ် : တိတ်ကြစမ်း။

သုညဒီဂရီလောင်ကျွမ်းမှု : ဝူးဝူးဝူး မရီးကအရမ်းကြမ်းတမ်းတာပဲ ကြောက်လိုက်တာ နတ်ဘုရားမဝမ်ယွဲ့အကာအကွယ်ပေးပါ။

စုချန်းဝမ်ယွဲ့ : …

_____

🚩

Prev Next