Welcome To MM Storyteller
LOGIN
🚩Chapter -81
Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 19 ]
_____
ယဲ့ထျန်း ပို့စ်ကိုဖတ်နေချိန်တွင် စုယွမ်နှင့် စုရွေ့တို့သည် ဆိုဖာပေါ်တွင် အနားယူနေကြကာ ‘ရေခဲတမျှအေးစက်သောခြေထောက်များ’၏ ပြောင်မြောက်သောလက်ရာအား အတူတကွ ချီးကျူးနေကြသည်။
“ဒီကလေးကပါရမီရှိသားပဲ”
စုရွေ့က ‘ရေခဲတမျှအေးစက်သောခြေထောက်များ’၏ နောက်ခံစကားပြောကိုကြားသောအခါ ၎င်းက အလွန်ကျေနပ်ဖွယ်ကောင်းကြောင်းခံစားရ၏။ ထို့အပြင် လူအများကြီးက သူ့အား တုံ့ပြန်လာကြတာကိုတွေ့လျှင် စုရွေ့မျက်လုံးထဲတွင် အလင်းတစ်ချို့ဖြတ်ပြေးသွားသည်။ ရုတ်တရက် သူ့စိတ်ထဲတွင် အကြံတစ်ခုပေါ်လာ၏။
မနက်ဖြန်လုပ်မလားတော့ မသိဘူး။
ကောင်းပြီ ငါတို့ရဲ့စစ်သူကြီးစုကတော့ ထူးဆန်းတဲ့စွမ်းရည်တချို့ကိုသုံးဖို့ အကြံရသွားတဲ့ပုံပဲ။
ယခုတွင် စုဝမ်မျက်နှာသည် အလွန်ပြေလျော့နေသည်။ ပို့စ်အောက်ရှိ ပြစ်တင်ရှုံ့ချနေသည့် တုံ့ပြန်မှုများကိုကြည့်နေရင်း ဟွေ့မော့ယိရှောင်သာ ထိုကောမန့်များကိုတွေ့သွားပါက တစ်ညလုံးငိုနေလိမ့်မည်ဟု စုဝမ်တွေးမိသည်။
“စုဝမ် မင်းဘယ်လိုထင်လဲ။ ပို့စ်ကိုမြင်ပြီးတဲ့နောက်မှာ ယဲ့ထျန်းက ဟွေ့မော့ယိရှောင်နားမှာ ဆက်ရှိနေဦးမယ်ထင်လား။”
ထိုအခိုက်တွင် ဗီဒီယိုသည် ဟွေ့မော့ယိရှောင်ကသူမနှင့်တုလန်၏ဆက်ဆံရေးအား ငြင်းဆိုနေကြောင်းပြသနေပြီး ‘ရေခဲတမျှအေးစက်သောခြေထောက်များ’၏ နောက်ခံစကားပြောသံက နောက်တစ်ဖန်ထွက်ပေါ်လာသည်။
ရှင်းပြနေတယ်ဆိုတည်းက ဖုံးကွယ်နေတာဖြစ်ပြီး ဖုံးကွယ်နေတယ်ဆိုတည်းက ဇာတ်လမ်းရှိနေတာဖြစ်တယ်။
“အင်း သူဆက်ရှိနေလိမ့်မယ်။”
စုဝမ်ပြုံးလိုက်၏။ အမျိုးသမီးဇာတ်လိုက်၏အရောင်အဝါဆိုသည်မှာ မည်သို့သောအရာမျိုးနည်း။ သေချာပေါက် အမျိုးသမီးဇာတ်လိုက်ပြုလုပ်သမျှက အမှန်ဖြစ်သည်။ အမျိုးသမီးဇာတ်လိုက်က အမှားလုပ်ခဲ့လျှင်တောင် သူမအမှားမဟုတ်ဘဲ ကမ္ဘာကြီး၏အမှားသာဖြစ်သည်။ ထို့အပြင် အမျိုးသမီးဇာတ်လိုက်သည် ယောက်ျားတစ်ယောက်မကနှင့် ချစ်ကျွမ်းဝင်လျှင်လည်း ၎င်းက အမျိုးသမီးဇာတ်လိုက်၏ဆွဲဆောင်မှုအပေါ် တပ်မက်နေသည့် ယောက်ျားများကြောင့်သာဖြစ်လေသည်။ ၎င်းက အမျိုးသမီးဇာတ်လိုက် မရိုးမရှင်းလုပ်နေခြင်းမဟုတ်ပေ။ သူမ၏ လှလွန်းနေသည့်အသွင်အပြင်ကိုသာအပြစ်တင်ရပေမည်.....။
စုဝမ်က ဗီဒီယိုကိုပိတ်လိုက်ကာ စုရွေ့အားစိတ်မပါလက်မပါနှင့်ကြည့်လိုက်သည်။
“စောစောအိပ်တော့။ မနက်ဖြန်ကြားနေမြေပုံမှာ သေချာပေါက်ကျွန်မကိုစောင့်နေနော်။”
“အင်း အဲ့မှာတွေ့ကြတာပေါ့”
စုရွေ့က စုဝမ်အားခေါင်းညိမ့်ပြလိုက်သည်။ သူကအမှန်တကယ်ကို ထိုရက်အတွက် အချိန်အကြာကြီးစောင့်နေခဲ့ရတာပင်......။
နောက်တစ်နေ့ နံနက်ရှစ်နာရီလေးဆယ်အချိန်တွင်...
စုဝမ်လိုင်းတက်လာသောအခါ အုပ်စုထဲမှလူတော်တော်များများရောက်နေပြီဖြစ်သည်။ အုပ်စုထဲတွင် လူ၃၀၀ရှိတာကိုမြင်လိုက်ရသောအခါ စုဝမ်အနည်းငယ်ကြောင်အမ်းသွား၏။ အုပ်စုဝင်အသစ်များစုဆောင်းသည့် ဝူပေါင်ပေ့အားမေးမြန်းလိုက်သော် အသစ်ဝင်ရောက်လာသည့်သူများတွင် အယောက်တစ်ရာကျော်မှာ အမျိုးသမီးကစားသူများဖြစ်ကြောင်းသိလိုက်ရသည်။ သူတို့က ဤနည်းလမ်းဖြင့် စုချန်းဝမ်ယွဲ့အားထောက်ခံကြောင်းဖော်ပြခဲ့ကြသည်။
ပူတင်းလေး : မမဝမ်ယွဲ့... ညီမက မနေ့ကဖိုရမ်ပေါ်မှာ အစ်မကိုအော်ခဲ့တဲ့တစ်ယောက်ပါ။ ညီမအပြစ်ရှိပါတယ်... နောင်တလည်းရပါတယ်။ အာဏာရှင်တိရှစ်ထျန်းကိုအမြစ်ဖြတ်ဖို့ ဒီနေ့ အစ်မနဲ့အတူတိုက်ပွဲဝင်ပါမယ်။
ကျော်ကြားသည့် မိန်းမလှလေး : ဘဝမှာ ဒီသခင်မလေးက ယောက်ျားပျက်တွေနဲ့ လက်ဖက်စိမ်းမတွေကို အမုန်းဆုံးပဲ။ စုချန်းဝမ်ယွဲ့... အစ်မမင်းကိုအားပေးနေတယ်။
ဇူလိုင်၇ရက် : အဆိုးဆုံးမှသေရုံပဲပေါ့။ ဒီမမကြီးကချမ်းသာတယ်။ သေမှာကြောက်နေဖို့မလိုဘူး။
ဝူပေါင်ပေ့ : အစ်မကြီးများ ဖိုက်တင်း….
စုဝမ်လိုင်းတက်လာသည်ကိုတွေ့လျှင် အုပ်စုထဲမှလူများက စတင်ကာ ဝုန်းဒိုင်းကျဲလာကြတော့သည်။
သူတို့စာများကြောင့် စုဝမ်ကအနည်းငယ်အံ့ဩသွားသည်။ သူတို့အားလုံးက နာမည်ကြီးကစားသူများဖြစ်ကြသည်။ ဥပမာအနေနှင့် ကျော်ကြားသည့်မိန်းမလှလေးပင်။ ဒေသဆိုင်ရာပြိုင်ပွဲအဆင့်ထုတ်ပြန်ပြီးနောက်တွင် အမျိုးသမီးကစားသူများက တိုက်ခိုက်သတ်ဖြတ်ရာ၌ ပိုမိုပြင်းထန်လာသည်။ ထို့အပြင် ‘ဇူလိုင်၇ရက်’သည် ဟွာရှားပြည်နယ်တစ်ခုလုံးတွင် သူဌေးအဖြစ်ကျော်ကြားသည်။
စုချန်းဝမ်ယွဲ့ : အားလုံးကိုကျေးဇူးတင်ပါတယ်။ လူစုံပြီဆိုရင်စထွက်ကြတာပေါ့။ အားလုံးကို ကြားနေမြေပုံမှာ မဟာမိတ်အုပ်စုနဲ့တွေ့ဖို့ခေါ်သွားပေးပါမယ်။ ကျွန်မတို့ဖီးနစ်အုပ်စုကိုဝင်ခဲ့တဲ့အတွက် နောင်တမရစေရပါဘူး
အုပ်စုစကားပြောခန်းထဲတွင် စာအနည်းငယ်ရေးပို့ပြီးနောက် ဝူဖုန်းအားဆက်သွယ်၍ အုပ်စုအဖွဲ့ဝင်အားလုံးအား မြို့တော်ရှိ အုပ်စုဟောခန်းတွင်စုဝေးခိုင်းလိုက်သည်။ ထို့နောက် ဝူဖုန်းသည် အုပ်စုလိုက် ကူးပြောင်းသည့်စာလိပ်အား ပိုက်ဆံအများကြီးသုံး၍ဝယ်လိုက်၏။ စုဝမ်ပေးထားသည့် တည်နေရာအတိုင်း ဝူဖုန်းကချက်ချင်းပင် ကူးပြောင်းရန်ပြင်လိုက်သည်။
ဤကဲ့သို့လူပမာဏအများကြီးပြောင်းရွှေ့ခြင်းသည် နှေးကွေးပြီး လူတိုင်းကလှိုင်းမူးသလိုခံစားနေရသည်။ ငါးစက္ကန့်ကြာပြီးနောက် အဖြူရောင်အလင်းတန်းပေါ်လာကာ လူအယောက်၃၀၀သည် ကြားနေမြေပုံသို့ တညီတညွတ်တည်းရောက်ရှိလာကြသည်။ သူတို့မျက်စိရှေ့တွင်ရှိနေသည်မှာ တရားဝင်အွန်လိုင်းကြော်ငြာတွင်ပြထားသည့် ကျယ်ပြန့်သည့် သဲကန္တာရစစ်မြေမြင်မဟုတ်သလို ခေါင်းပေါ်တွင် အနီရောင်စာတန်းများပေါ်နေသည့် မြင်တာနှင့်ကိုက်ရန်ပြေးလာတတ်သော ရုပ်ဆိုးဆိုးမကောင်းဆိုးဝါးများလည်းမဟုတ်ပေ။
ယခုလက်ရှိတွင် ‘ကောင်းကင်ဘုံကိုးထပ်ရှိဖီးနစ်’ အုပ်စုဝင်များအားလုံး၏ရှေ့တွင်ရှိနေသည်မှာ အေးခဲနေသည့် မကောင်းဆိုးဝါးအုပ်လိုက်ကြီးပင်ဖြစ်သည်။ ထိုမကောင်းဆိုးဝါးများပတ်လည်တွင် လူအယောက်၅၀၀စီရှိသော အုပ်စုနှစ်စုရပ်နေသည်။ မကောင်းဆိုးဝါးများ၏အပေါ်တွင်တော့ ကျစ်လျစ်သည့်ပုံရိပ်တစ်ခုက လေပေါ်တွင်ရပ်နေ၏။
သူကရေခဲမှော်ပညာရှင်၏ ဝတ်ရုံကိုဝတ်ဆင်ထားကာ ထိုငွေရောင်ဝတ်ရုံက လေထဲတွင် တဖျတ်ဖျတ်လွင့်မျောနေပြီး အပြာရောင်လင်းတို့ကိုဖြန့်ကျက်နေလေသည်။ ၎င်းက မြင့်မြတ်သောကောင်းကင်မှော်ပညာရှင်ဝတ်ရုံပင်။ လင်ရှန်းတစ်ခုလုံးတွင် အဆင့်၈၀ရှိ မှော်ပညာရှင်များသာဝတ်နိုင်သည့် တစ်ခုတည်းသောဝတ်ရုံဖြစ်သည်။
အဆင့်၈၀….
ဟွာရှားတစ်လျှောက်သာမက လင်ရှန်းတစ်ခုလုံးတွင် လူတစ်ယောက်တည်းသာထိုမှော်ပညာရှင် ဝတ်ရုံကို ဝတ်ဆင်နိုင်သည်။
ပြည်နယ်တစ်ခုလုံး၏အဆင့်တစ်…
မှော်ပညာရှင် ယဲ့ယွီပင်ဖြစ်၏။
လူတိုင်းက တစ်ချိန်တည်းမှာပင် မော့ကြည့်လိုက်ကြသည်။ အလင်းထဲတွင် ကျရောက်နေသည့် အရိပ်ကိုကြည့်ကာ လူတိုင်းက ထိုလူ၏ပြီးပြည့်စုံလှသော ခန္ဓာကိုယ်ပုံပန်းသဏ္ဌာန်ကိုတွေ့နိုင်သည်။ သူ့ဦးခေါင်းထက်ရှိ တစ်ပြည်နယ်လုံးပထမ ဆိုသည့်ရွှေရောင်စာတန်းက လူတိုင်းအားမကိုးကွယ်ဘဲမနေနိုင်အောင် လုပ်နေလေသည်။
သူမက ကူးပြောင်းရေးလမ်းကြောင်းမှထွက်သောအခါ ထိုကြီးမားသည့်ဖြစ်တည်မှုကြီးကိုတွေ့လိုက်ရသည့်အတွက် အနည်းငယ်အံ့ဩသွား၏။ သူမကမနေနိုင်ဘဲ ခေါင်းမော့ကာ လေပေါ်တွင်ရှိနေသည့် စုရွေ့ကိုကြည့်လိုက်သည်။
ဆိုတော့ ဒါကသူစီစဥ်နေတဲ့ဟာပေါ့။
ထိုအချိန်မှာပင် စုရွေ့ကလည်း စုဝမ်ကိုတွေ့သွားသည်။ သူကချက်ချင်းပင် လေထဲမှသက်ဆင်းလာ၏။ ယခုမှသာ ‘ကောင်းကင်ဘုံကိုးထပ်ရှိဖီးနစ်’အုပ်စုမှလူများက ဟွာရှားပြည်နယ်၏နံပါတ်တစ် ဒဏ္ဍာရီလာသားရဲကြီးသည် အမှန်တကယ်တွင် ပခုံးကျယ်ကျယ်၊ ခါးသိမ်သိမ်နှင့် ရှည်လျားသည့်ခြေတံများရှိ၍ ပြေပြစ်ချောမောသည့် မျက်နှာနှင့် စွဲမက်ဖွယ်ကောင်းသောအမျိုးသားတစ်ယောက်ဖြစ်ကြောင်းတွေ့လိုက်ရသည်။
ဒါကတရားမမျှတလိုက်တာ….
‘ဖီးနစ်’အုပ်စုလူများ၏ စိတ်ဓာတ်ကြံ့ခိုင်မှုအား စမ်းသပ်နေသည့်အလား စုရွေ့က စုဝမ်အရှေ့တွင်ရပ်လိုက်သည့်အချိန်တွင် တိတ်ဆိတ်စွာရပ်နေခဲ့သော ‘အဆုံးမရှိည’အုပ်စုမှလူများက တစ်ချိန်တည်းမှာအော်လာကြသည်။
“ခေါင်းဆောင်ရဲ့ဇနီးကိုကြိုဆိုပါတယ်”
စုဝမ် : ……
ကောင်းကင်ဘုံကိုးထပ်ရှိဖီးနစ်အုပ်စုမှလူများ : ……
ထိုအချိန်တွင် စုရွေ့နှင့် ဝူဖုန်းတို့သည် မဟာမိတ်ဖွဲ့ပြီးဖြစ်သည်။ စုရွေ့ကစုဝမ်အားပြုံးပြ၍ အသင်းဖိတ်ခေါ်ချက်ပို့လိုက်သည်။ စုဝမ်ကချက်ချင်းပင် လက်ခံသည်ကိုနှိပ်လိုက်၏။
“ဒါကရှင့်ရဲ့ စပရိုက်ပေါ့”
“ဒါလေးကအစပဲရှိသေးတယ်”
စုရွေ့က ရုတ်တရက်ရှေ့သို့တိုးလာခဲ့သည်။ သူတို့နှစ်ယောက်က ယခုတွင် အသင်းအလိုက်ဆက်ဆံရေး ရှိသောကြောင့် စနစ်၏ကိုယ်ကာယထိပါးနှောင့်ယှက်သည့် အပြစ်ပေးခြင်းမခံရသဖြင့် စုဝမ်၏ခါးကို လက်တစ်ဖက်တည်းနှင့် ဆွဲဖက်နိုင်လေသည်။
သူတို့နှစ်ယောက်၏ပုံရိပ်သည် လေထဲသို့ဖြေးညှင်းစွာတက်ပြီး လေထဲမှ အောက်ဘက်ရှိခဲနေသော မကောင်းဆိုးဝါးများကို ကြည့်လိုက်သောအခါ စုဝမ်၏မျက်နှာအမူအရာက အနည်းငယ်ပြောင်းလဲသွားတော့သည်။
ထိုမကောင်းဆိုးဝါးများသည် နေရာတကျဂရုတစိုက်နှင့် လူများ၏ထိန်းကျောင်းခြင်းခံထားရသောကြောင့် ယခု ၎င်းတို့အား လေထဲမှကြည့်သောအခါ စာလုံးငါးလုံးအဖြစ်ရှိနေတော့သည်။
ရှောင်ဝမ်၊ ကိုယ်မင်းကိုချစ်တယ်။
ဂိမ်းထဲတွင် ထို့သို့ရလဒ်မျိုးရရန် အမှန်တကယ်ကို ဒုက္ခများခဲ့သည်ပင်။ ထိုသို့ရရန် စုရွေ့သည် ဤအဆင့်၈၀မြေပုံတွင် တစ်ပတ်ကြာအောင် တစ်ယောက်တည်းလေ့ကျင့်ခဲ့သည်။ မည်သည့်နေရာသို့ မည်သို့ရွှေ့ရမည်၊ မည်သည့်အစိတ်အပိုင်းနှင့်တစ်ကောင်ချင်းစီကို မည်သို့အေးခဲရမည်ကို တစ်ပတ်ကြာ စိတ်ရှည်သည်းခံမှုများ၊ ကျွမ်းကျင်မှုများအကုန်ထုတ်သုံးခဲ့ရ၏။
“အခုက မင်းရဲ့လူဘယ်လောက်အင်အာကြီးကြောင်း မင်းကိုပြရမယ့်အချိန်ပဲ”
စုရွေ့က မျက်လွှာချကာ တိတ်တဆိတ်ရေရွတ်လိုက်သည်။
အဆင့်၇၅ မှော်ပညာရှင်စွမ်းရည် မိုးသီးမုန်တိုင်း…
အဆင့်၈၀ မှော်ပညာရှင်စွမ်းရည် အကြွင်းမဲ့သုည…
ရေခဲစွမ်းရည်နှစ်မျိုးသည် တစ်ခုပြီးတစ်ခုထွက်လာကာ မြေပေါ်တွင်အေးခဲနေသောမကောင်းဆိုးဝါးများသည် ချက်ချင်းပင် ရေခဲတုံးလေးများအဖြစ်ပြိုကွဲသွားတော့သည်။ ထို့နောက် လူတိုင်းက စုရွေ့ဖက်တွယ်ထားသော စုဝမ်၏ခန္ဓာကိုယ်သည် အဖြူရောင်အလင်းတန်းများလင်းလက်သွားကြောင်းတွေ့လိုက်ရသည်။
အဆင့်၆၁၊ အဆင့်၆၂၊ အဆင့်၆၃၊ အဆင့်၆၄၊ အဆင့်၆၅…
၎င်းကအမှန်တကယ်ကို အဆင့်ငါးဆင့်ဆက်တိုက်တိုးသွာခြင်းပင်။
“ဒီလက်ဆောင်ကိုကြိုက်ရဲ့လား”
စုရွေ့က စုဝမ်အား နူးညံ့ညင်သာနေသည့်မျက်လုံးများနှင့်ကြည့်လိုက်သည်။
စုဝမ်၏မျက်နှာအမူအရာသည် အလွန်ရှုပ်ထွေးနေပေမယ့် သူမအသံကမူ တည်ငြိမ်နေဆဲပင်။
“ရှင်ဘယ်လိုလုပ်လိုက်တာလဲ”
စုဝမ်သည် ဤကြားနေမြေပုံရှိမကောင်းဆိုးဝါးအားလုံးမှာ အတွေ့အကြုံမှတ်များမြင့်တာကိုသိသော်လည်း ဤမျှလောက် ပမာဏများသည်ကမဟုတ်သေးပေ။ အဆင့်ငါးဆင့်ဆက်တိုက်အဆင့်မြှင့်တင်ရန်အတွက် မကောင်းဆိုးဝါးမည်မျှများများလိုသည်ကို စုဝမ်တွက်မကြည့်နိုင်ချေ။
“လျှို့ဝှက်ချက်”
စုရွေ့ကစုဝမ်အား မျက်စိတစ်ဖက်မှိတ်ပြကာ ကောင်းကင်ထက်မှဆင်းလာလိုက်သည်။
ယခုအချိန်တွင် ‘ကောင်းကင်ဘုံကိုးထပ်ရှိဖီးနစ်’အုပ်စုရှိ မိန်းကလေးများမှာ ရူးခါနေကြတော့၏။
တိရှစ်ထျန်းလား... တုလန်လား...ငရဲကိုသာသွားကြစမ်းပါ။
ယဲ့ယွီကိုသိလား။
ယဲ့ယွီကိုသိကြလားလို့။
ဒါကငါတို့မိသားစုက စုချန်းဝမ်ယွဲ့ရဲ့လူပဲ...။ ရုပ်ရည်လည်းရှိတယ် အင်အားလည်းကြီးတယ်...သူ့ကိုရွေးချယ်ဖို့ လူတစ်ယောက်က မျက်လုံးကန်းမနေဖို့ဘဲလိုတယ်...။
ယခုတစ်ကြိမ် စုရွေ့နှင့်စုဝမ်တို့ ကောင်းကင်မှပြန်ဆင်းလာတာကိုတွေ့ချိန်တွင် ဖီးနစ်အုပ်စုမှ အယောက်တစ်ရာသောညီအစ်မတို့က သံပြိုင်အော်လာကြသည်။
“ခဲအိုကိုကြိုဆိုပါတယ်”
စုရွေ့ (အပြုံးတို့ဆင်မြန်းလျက်) : အားလုံးပဲ မင်္ဂလာပါ။
အဆုံးမရှိညအုပ်စုမှလူတိုင်း : ........
ခေါင်းဆောင် ခေါင်းဆောင် ကျွန်တော်တို့ဒီမှာလေ...။
ခေါင်းဆောင် မင်းရဲ့အေးစက်မှုတွေဘယ်ရောက်သွားတာလဲ။ မင်းရဲ့ ရေခဲတုံးမျက်နှာကြီးရော ဘယ်ထားလိုက်တာလဲ။ ဖီးနစ်အုပ်စုကလူတွေကို ဘာလို့အဲ့လောက်တောင် အရောတဝင် ပြုံးပြနေရတာလဲ။
ခေါင်း....ဆောင်... ငါတို့ကလည်းမင်းရဲ့ မိသားစုတွေလေ...။
အဆုံးမရှိညအုပ်စုမှလူများခမျာ သူတို့ရဲ့ဖန်နှလုံးသားလေးပွဲကြေသွားသလိုခံစားနေရ၏......။
__
🚩
Welcome To MM Storyteller
LOGIN
Welcome To MM Storyteller
REGISTER